Nisin Thuhiltu – 08 August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Sit-in –Protest nei

Lamka, Aug. 07 *(Nisin Thuhiltu)* : TP Electricals neitu Liantungnung @ Chungnou’ inn a pat sum tamtak gukdaw ziak ah sawisak lup a um, Thangkhanlun Taitom thina tawh kisai ah kibawldaw, JAC againts the Killing of Thangkhanlun (JAC-AKT) in zani meeting ah a thupuk dungzui in tuni sunma dak 10:00 a pat Police Station gate bul ah mipi’n Sit-in-Protest a nei ua, zia hi a hileh tualthana ah kigawl khate zosia a kinthei lam ah mat ding leh dân tawh kituak ah gawtna piak ding phûna ah JAC AKT in a vaisai a hi. Chut mun ah kiphinna chu zing leh sunma dak 10:00 a pat SP Office mai ah nei hi ding banah thâini leh DC Office ah nei hikit idng in a kigen hi. Tualthana tawh kisai ah Police in Liantungnung @ Chungnou (60) s/o (Late) Khaivum of Beulahlane, Central Lamka leh a chapa Vumthansang @ Sangboi (27), Lalpiaklian Munlou (34) s/o (Late) Henthang of Beulahlane, Central Lamka leh T Ginkhanlian @ Liana Thomte (48) s/o T Pauthuam of Simveng a mandawk ta , Chungnou a hileh Court in bail ah a thadawk a, a dang te a hiuleh tuni’n court ah dinsak in a um u’i.

YPA Unit in Rising Day mang

Lamka, Aug. 07 *(Nisin Thuhiltu)* : Young Paite Association (YPA) Kanaan Unit saina ah tuni’n EBCC Kanaan Sunday School Hall ah kum 7 tinna Rising Day lawpna mat a hia, zia hun chu V. Hangkhanlian, Minister (Agriculture, Veterinary & Animal Husbandry) in Chief Guest hina tawh a uap in M. Gouzamang Guite, MDC in Guest of Honour hina tawh a uap a, mipi’n Chief Guest leh a zi Dr. Kimboi te chu Welcome Gate ah vaidawn in programme matna ding mun tiang a zawn u’i. Hun matna a chun Unit member thina tuak te sûnna le nei a hi ban in Pastor S. Thangchinlun, Local Pastor, EBCC Kanaan in Unit puitute a ding ah pauchapna a nei piak hi. Guest of Honor in Kanaan Veng chu official tak ah Vengnuam nuai ah um nalai hi’n a gen a, village recognition mu thei na ding ah kithuapi thei chan ah kithuapi ding hi’n a gen hi. Nam zosia chengkhawm a kihina ah phatchuam ngaina lam ah nam tin te tawh chiakhawm dan pawimaw hi ah taklang kawm in zia na ding a chun panla thak ding in YPA a tilkho hi. Chief Guest in a thugenna a chun, dawisak tak telting mipi te ziak ah Minister panmun tiang a luatheina chung ah kipakthu a puang a, WhatsApp ah zuau thuleng chuam chuam um te tawh kisai ah thuchian hianuam te’n a kisaipi te kiang ah kanchian masa phawt ding in le a hil hi. Centre a pat fund lut te mang ah District Headquarter zosia ah Ima Market bawl ding tawh kisai a genna a chun, bawlzaw a hi hun hun ah Bazaar min ding chu a gam ah chengte pau mang ah phuak hi ding tin a gen hi. District sung ah tuinek kining ting um na ding ah Rs. 150-200 Crore tuam bei ding a hina ah nasep dingdan ngaitua hi zing leh a term hunsung ah banghem tiang sepdaw hi ding ti’n le ginchat thu a puang a, YPA Kanaan Veng Unit in mun leh mual neilo ah Biakinn huang ah zia gual programme a mat uh kithuapina ding ah MLA Local Area Development Fund a pat Rs. 20 Lakh tawh kithuapi ding hi’n le a gen hi. Zia hun matna a chun, S. Manlian, President, YPA New Lamka Block, T. Khailianthang, President, YPA GHQ leh S. Chinngaihau, Chairman, CEC, YPA GHQ te’n le thugenna a nei u’i.

NT 08aug2017b

Henglep MLA in Rationing Agent te kimupi

Lamka, Aug. 07 *(Nisin Thuhiltu)* : Henglep MLA leh Hill Areas Committee (HAC) Chairman, Thangzalam Haokip @ TT Haokip in District Training Centre (DTC), Tuibong ah tuni’n Henglep A/C sung ah Rationing Agent leh SK Oil a Sub-Dealer ding ah guatthak a um meeting a neipi a, zia hun chu Chunglenmang Kipgen, MCS, SDO Henglep, M. Ginzasuan, DSO, Churachandpur, Joel G. Haokip, MCS, SDO Kangvai, Shyam Lal Poonia, IAS, DC Churachandpur leh Rakesh Balwal, IPS, SP Churachandpur te’n le a uap u’i. TT Haokip in a thugenna a chun, Manipur Chief Minister lui, O. Ibobi in MP ding ah chialna a la bawl maleh Henglep bial a ngaikhawk ziak ah a la sâng lo hi ah genlang kawm in Henglep Constituency nasatak ah a siamphat guat ziak ah Rationing Agent te a kimupi hi’n a gen hi. India in zalenna a mu kum 70 val ding hita maleh Henglep khua ah gari a lutthei nailo chu ngaikhawk mama hi’n le a gen a, bial in pawimaw tam maleh mihing a ding ah ann-chang ma pawimaw hi ah taklang kawm in agent te’n ann-chang a sâng teu chu kitup tak ah Henglep mipi te kiang tut chiat ding in le a dawn hi. Kua a hem chung ah action lak masang ah agent te kimupi masa hi ah le taklang kawm in gin um tak ah sem peilo ding te ki awngsut hun hi’n le a hillawk hi. Shyam Lal in MLA mapuina ah bialsung Agent te’n zia gual meeting a nei uh chu District Administrator in kipakpi leh zathuap a hi dan puang kawm in Henglep A/C sung ah Fair Price Shop ah zuak ding ann-chang te chu a hi gual gual ah District Administration in sawldawk ding hi’n a gen hi. Rakesh Balwal in ann-chang puakna tawh kisai Agent te’n lampi pângai ma haw ah pawding in a hiatsak a, Security tawh kisai District Police leh Assam Rifles in kithuapina hawitak peding hi’n le a gen hi. Henglep Assembly Constituency sung ah Fair Price Shop 62 um in zia lak a chu Henglep Sub-Division a pat 29 leh Kangvai Sub-Division a pat 33 a um hi.

ZRO in chawlsak
Lamka, Aug. 07 *(Nisin Thuhiltu)* : Zomi Re-Unification Organization/ Zomi Revolutionary Army (ZRO/ZRA) in tuni’n Romeo leh a kiselpi ZRA cadre te chung ah Suspension Order a suakhum hi. Thusua dungzui in Romeo leh a kiselpi ZRA Cadre te kiang ah ki report ding ah kona bawl himaleh huntiam sung ah a kipiakdaw lo ziak ua Cabinet leh Defence Secretary dawina gual ah amau sia chu tuni a pat chawlsak (suspend) hita uh hi’n a taklang hi.

MZP CCPur College Branch in thisan pia

Lamka, Aug. 07 *(Nisin Thuhiltu)* : Mizo Zillai Pawl (MZP) CCpur College Branch kiphudaw nung kum 10 tinna tuni a hitawh kitawn in MZP CCpur College Branch in damlo thisan pawimaw te a ding in Blood District Hospital ah tuni’n Voluntary Blood Donation Camp Cum Awareness Campaign a nei ui. Blood Donation camp kipatma in Blood bank waiting hall ah awareness campaign nei msa in Blood Bank MO In-charge Jayanta Ksherimayum in thisan piakna tawh kisai ah thugenna a nei hi. Awareness camp nei zaw in thisan piakna room ah member te’n thisan a piau a, zia hun a chun numei 9 panna’n member 27 in a thawn in thisan a piau hi.

Hoilday ladawklo
Lamka, Aug. 07 *(Nisin Thuhiltu)* : Manipur Legislative Assembly in Manipur Private School (Registration & Regulation) Bill 2017 a pass dawilo na ziak ah All Manipur Private School Welfare Association (AMPSWA) in zing, August 8, 2017 holiday ding ah puan chu Churachandpur District Private School Association (CDPSA) in le zathuap thu a la puang hi. A langkhat lam a, nitak lam ah AMPSWA palaite leh state Education Minister, Radheshyam in kiholemna a la nei in school suty talo ding ah thupuan bawl kit maleh CDPSA in holiday ding ah a puan sa chu chiapi ding hi’n thutut a kidawng a, zia tawh kitawn a chun CCpur district huapsung ah private school te suty ding uh hi’n a kigen hi.

MGNREGS chiadan thak tawh kisai ah ziltîl
Lamka, Aug. 07 *(Nisin Thuhiltu)* : Headquarter Community Hall, Headquarter Veng ah tuni’n SDO CCpur, Thangboi Gangte mapuina in Lamka block nuai ah MGNREGS chiadan thak tawh kisai ah hausa/ village authority (VA) te ziltilna nei a hia, zia hun a chun Lamka block nuai a um khua/ veng chuam chuam a pat hausa, VA chairman leh secretary te a pang u’i. Thangboi Gangte, SDO CCpur in hausa leh VA te kokhawm a hina ziak uh genna nei in, Siampu, SO, SDO Office, CCpur in MGNREGS chiadan thak, fund allocation tawh kisai ah hausa leh VA te hiat ding ah pawimaw chuam chuam um te a hil hi. Siampu, SO in a genna a chun, government in Aadhar seeding leh Geotech a pat MGNREGS sep piting gua a hitawh kitawn ah MGNREGS chiadan kitheng dang lam khenkhat a um a, kumdang gual ah Labour Cost leh Material Cost chia dan le kitheng in Aadhar seeding leh Geo-tech a pat fund release hita ding ti’n a gen hi. Zia tawh kisai ah khua/veng chuam chuam in aadhar seeding leh geo-tech a hi hawi dungzui ua fund mu dan le chuam chiat ta ding leh aadhar seeding leh geo-tech bawllo khua/ veng te’n fund bangma mulo ding uh a hina ua Hausa/ VA te’n Aadhar seeding leh Geo-tech ngai ngawi pawi ah a hun lai ah sai fel chiat ding in a chial hi. Tu dinmun in CCpur District sung ah block 12 um in, Lamka block nuai ah khua/ veng 60 ah Job Card 15, 989 a um a, zia lak achun aadhar seeding 5,995 leh Geo-Tech 760 bawl a hipan hi. Zia hun matna a chun Lamka Block nuai ah khua/ veng 60 a pat Hausa/ Village authority Chairman/ secretary mi 64 a pang u’i.

Charity Musical Road Show sunzawm

Lamka, Aug. 07 *(Nisin Thuhiltu)* : Kuki Khanglai Lawmpi (KKL) D. Phailian Unit in Henglep Sub-Division a natgual lêng ziak ah etkawl a um te panpina ding ah Charity Musical Road Show a sai chu tuni’n le khawpi sung mun chuam chuam ah sutzawp a hi. Charity Musical Road Show a hileh tuni’n Tedim Road dung Red Cross Road, Lailam Veng, Damkam Bazaar, Lanva Lei leh Tipaimukh Road, Bungmual ah nei in KKL Complex, IB Road ah zaw a hia, zia hun a chun District sung ah lasathiam chuam chuam - Grace Ngaihching, Daniel Gangte, B Muan Ngaihte, Muan Hangzo, Jems Arjun leh a dangdang te’n lasakna nei in damlo etkawl a um te panpina ding in mi kiphal te’n Donation Box ah a kiphal zat zat uh a khiau hi.

NT 08aug2017c

Health Minister in MMC Office Building foundation suangphu hawng

Imphal, Aug.7 *(Nisin Thuhiltu)*: Manipur Health and Family Welfare Minister L. Jayantakumar Singh in tuni’n Directorate Complex, Lamphelpat, Imphal West ah Manipur Medical Council Office Building sakna ding in Foundation suanphu hawnna a nei hi. Foundation suanphu hawnna a nei zaw ah Minister L. Jayantakumar Singh in a thugenna a chun, Office building thak chu quality neitak sak hiding a hidan gen in, Medical Staff te ding ah thil pawimaw mama ah hiat a hi tawh kitawn ah Medical Council Office Building sak ding ah lemsakna um a hidan taklang kawm in Health leh medical staff zosia chu Health Department khantona ding ah panlakpi chiat ding in chialna a bawl hi. Zia ah hun matna chu Prof. S. Rajendro Singh, Chairman, Manipur medical Council, Dr. K. Lokendro Singh, Director Health Services Manipur, Director JNIMS Prof. Th. Bhimo Singh, Dr. Kh. PalinSingh , M.D SHIJA Hospital Langol leh Sr. Doctors leh Health Officials banah staff tamtak ten le a uap ui. Health and Family Welfare Minister in tuni’n Moirang Khunou, Khoyol Keithel ah Health Services Manipur, National Health Mission in CMO Bishnupur tawh kithua ah organised a bawl Free Health Camp et-thakna le a nei a, zialo a chun tui-let in a chup, Moirang CHC dinmun et-thakna le nei in, Moirang CHC staff te le thil umdan a genpi hi.

CM Biren in ASEAN gam te leh Manipur kibatna taklang
Imphal, Aug.7 *(Nisin Thuhiltu)*: Manipur Chief Minister N. Biren Singh in ASEAN region ah um gam te tawh Manipur in culture, customs leh food habit ah kibatna nei a hidan Vientiane (Lao PDR) ah tuni ASEAN-India Dialogue Partnership, 25th anniversary celebration conference hun ah a thugenna a chun a gen hi. Tu ah Government in India in ‘Look East Policy’ -‘Act East Policy’ a chiapi chu ASEAN gam te tawh India in panlakkhawm ding dawi a hidan suklatna hin a gen a, ASEAN country te tawh India road leh maritime connectivity hawitak a um ding pawimaw in a gen hi. India-Myanmar-Thailand trilateral highway in Moreh a pat Manipur zawp mat, western Thailand, Mae Sot a pat Mandalay, Myanmar leh Kaladan multi-nodal transport project te’n kizawp matna nei a hidan uh taklang in, Sittwe Port, Myanmar leh Kolkata, India kal ah kikawmtuana a um theina ding ah panlakna um a hidan a gen hi. IMT highway chu Cambodia, Laos leh Vietnam tawh ki zawp mat sak ding ah guanggalna um a hidan le Chief Minister in a gen a, Act East Policy nuai ah North Eastern region leh Myanmar kal ah trade siam hawi thakna ding ah panlakna um a hidan le a gen hi. North East India ah kum 2013-2014 ah trade upswing Rs. 775 million ($12 million) leh kum 2015-16 ah Rs. 1.445 billion ($22 million) tungzo a hidan te le taklang in, Manipur chu ASEAN region te tawh India kikawmtuana ding ah gateway hin a gen a, Manipur government in National Highway te siam hawi thak ding, physical connectivity kituptak a um theina ding ah panlakna nei zing a hidan a gen hi. State flower – Shirui Lily umdan leh National flower of Lao, ‘Dok Champa’ chu Manipur ah ‘Khagi-Leihao’ kiti a hidan te le genlatna a nei a, culture, sports, traditional arts leh education exchanges a um ding leh chamna leh muanna tawh khantona a um ding pawimaw a hidan a gen hi. Chief Minister chu Parliamentary Secretary (Tourism) Dr. S. Ranjan, Parliamentary Secretary (Home) L. Susindro, Advisor to CM Rajat Sethi leh Personal Secretary to CM S. Rajen te’n le a zui ui. ASEAN-India Dialogue Partnership, 25th anniversary celebration conference ahileh ASEAN India Business Council (AIBC), Lao PDR Chapter, Indian Embassy, Lao PDR leh Lao National Chamber of Commerce and Industry in organize a bawl a hi.

KIM mapuina Indo-Kuki political talks ding tawh kisai genkhawm
Imphal, Aug.7 *(Nisin Thuhiltu)*: Manipur state Government panna Government of India leh Kuki armed nationalist te’n kihona a chiapi zing uh tawh kitawn ah 9th August 2017 leh Indo-Kuki political talks, third round a umna ding tawh kisai in Kukis apex body- Kuki Inpi Manipur (KIM) mapuina’ tuni’n Kuki Inn, Imphal ah Consultation Meeting a um a, zia hun chu Kuki civil social organizations chuam chuam te’n a uap ui. Meeting hun ah, Kuki National Assembly in kum 1964 ah Prime Minister Pandit Jawaharlal Nehru kiang ah Kuki te Statehood piak ding ah first memorandum a piak uh bawzui zawm ding in lemsakna a nei ua, Haipi ah Kuki Nampi Conclave, August 28-29, 2015 ah Haipi Declaration umsa chu namdetna siam in, Union of India nuai ah Statehood mu theina ding ah Kuki SoO groups ten pan a lak khawm chiat ding un lemsakna a nei ui. SoO nuai ah um Kuki armed nationalist zosia’n August 9 leh New Delhi ah third round talk hun ah kichian tak ah Statehood demand a hidan uh a tangko ding un le lemsakna a siam ui.

Kangpokpi ah dakkal 24 sung total shutdown um ding

Kangpokpi, Aug.7 *(Nisin Thuhiltu)*: Manipur ah National Sports University umna ding mun tawh kisai ah gam thu’ buaina a um zing tawh kitawn in tuni’n Kangpokpi District ah Civil Society Organisation chuam chuam in lung-awilo suklatna’n Brig. Thomas Ground, Kangpokpi leh Haraothel tu ah L. Tangnaum village leh adjoining area ah chutmun kiphinna (sit-in-Protest) a nei ua, zia hun a chun “Protect district integrity to protect Manipur integrity”, “Sit-in-Protest against illegal encroachment of Haraothel Land (Sadar Hills) by Manipur state”, “Stop Hill grabbing, Hon’ble CM Manipur”, etc. te kizikna placard chuam chuam suklat in a um hi. Zia kiphinna a nei uh chu sunzawm nalai ding a hiu a, Kangpokpi District huapsung ah August 8 zingkal dak 6:00 a pat August 9 zingkal dak 6:00 tiang ah dakkal 24 sung total shutdown chiapi nalai ding a hiu. Hiatthei khat chu, July 30, 2017 ni ah Manipur Chief Minister N. Biren Singh in National Sports University umna ding mun et-thakna a nei hun ah National Sports University umna ding mun tawh kisai ah buaina bangma umtalo hih ah agen himaleh L. Tangnaum (Haraothel), Village Authority in pawmlo a hidan a taklat leh Kangpokpi District ah Civil Society Organisation chuam chuam in National Sports University umna ding gam thu ah State Government panlakna dem kawm ah a vaima theipen ah gam thu ah buaina sukfel ahiloleh August 7, 2017 a pat kiphinna pan ding a hidan uh joint meeting ah a puan uh hita a hi. Chuleh, Director, Youth Affairs & Sports, Manipur in allotment orders a sua dungzui ah Haraothel tu ah L.Tangnuam Village gam 137.62 acres huap ah gam 325.60 acres (Dag.No.1 of village No.47-Koutruk) chu National Sports University umna ding mun ah a taklat a hia, zia chu diklo tak ah L.Tangnuam Village (Haraothel) gam kilakpiak gua ti ah kiphinna um zing a hi.

Dy. CM in Training Programme on Advancement of Seed Testing hawng

Imphal, Aug.7 *(Nisin Thuhiltu)*: ICAR Research Complex for NEH Region, Manipur Centre, Lamphelpat, Imphal ah tuni’n Deputy Chief Minister YumnamJoykumar Singh in ICAR, Research Complex for NEH Region, Manipur Centre leh National Seed Research and Training Centre, Varanasi in Ministry of Agriculture & Farmers Welfare and Department of Agriculture, Manipur sponsored bawlna nuai ah organised a bawl “five days Special National Training Programme on Advancement of Seed Testing” hawnna a nei a, ama’n a thugenna a chun, agriculture & horticulture lam ah khantona leh primary sector ah khantona chu State a ding thil pawimaw mama leh productivity leh revenue resources a hidan a gen a, State in sector khenkhat - tourism leh healthcare te a pat revenue resources generate bawl thei a hidan gen in, primary sector ah development pawimaw mama in a gen hi. Hun matna chu, Additional Chief Secretary Dr.Suhel Akhtar, Dr. S.V. Ngachan, Director, ICAR Research Complex te’n le a uap ui. Chun, training programme ah pang ding trainee 50 a um ui.

“Hill Leaders Day” leh “Meeyamgi Numit” 16th August ah
Imphal, Aug.7 *(Nisin Thuhiltu)*: N. Ashok Kumar, Secretary to Chief Minister, Manipur in tuni thusua a bawlna a chun, Vientiane (Lao PDR) ah ASEAN-India Dialogue Partnership, 25th anniversary celebration conference uap ah Manipur Chief Minister N. Biren Singh a chia tawh kitawn ah tha sin leh date 10, “ Hill Leaders Day” ah mat hisek chu tu tha a hun tak ah um theilo ding leh Independence Day ziak ah date 15, “Meeyamgi Numit” (Peoples Day) kimang sek le a hun tak ah umlo theilo ding a hidan taklang kawm in 16th August ah “Hill Leaders Day” leh “Meeyamgi Numit” (Peoples Day) mat hiding in a taklang hi.

Chandel CSO te’n Public rally nei
Chandel, Aug.7 *(Nisin Thuhiltu)* : Chandel ah Civil Society Organisation chuam chuam in Naga Students Union, Chandel mapuina nuai ah tuni’n United College a pat lecture 26 transfer a ki bawl bakah Jawarharlal Navodaya Vidyalaya (JNV) admission kihawn hun ah district dang a pat admission mu a tamzawk sek dawilona, Chakpi Multipurpose Dam dawilo ziak leh district hospital Medical Superintendent leh Nursing Matron ahiloleh sister in-charge te’n kituptak ah na a seplo uh, lampi hawilo tak ah a um zingna chung ah lung-awilo suklatna’n Public Rally a um hi. Zia hun a chun, L. Manahring, President NSU, Chandel, Modun Charanga, caretaker, Chandel Naga Peoples Organisation, Bliss Langhu, President, Naga Women Union Chandel, TS. Ruwngwar, president Naga Chief Association, Chandel te suai kaina memorandum, Chandel DC kiang ah Chief Minister kiang tung ding in piak in a um hi. Public rally hun ah kiphinna nei te’n state government in Chandel mipi te a ngaikhawk lo banah chuam kawi in a gen ua, Sugnu, Waikhong, Kakching, Thoubal police stations jurisdiction ah tribal village te kikawi lut le pawm theilo a hidan uh a gen ui.

KSO Imphal in khualna ding ah phutna bawl
Imphal, Aug.7 *(Nisin Thuhiltu)*: Kuki Students’ Organization-Imphal in Lamshang ah CRPF jawan Paolenmoi Singsit of Motbung in thina a tuakna tawh kisai chu kituptak ah khual (investigate) ding in phutna a nei hi. Khaiminlen Doungel, General Secretary, KSO-I in a genna a chun, thina tuak Paolenmoi Singsit of Motbung , Lhungjang Veng (Colony) chu 87th Bn. CRPF ah sem, GC Langjing ah Yoga Course ah chia, stationed leave la a hi tawh kitawn ah Motbung, Kangpokpi District ah a zi leh cha te kiang zuan ah a chiana Lamshang PS huapsung Lamshang kiang nai ah August 7, 2017 nitak dak 7:00 tuam ah lampi tuaksiat ziak ah thina tuak ti ah kigen a hidan taklang kawm in, Paolenmoi Singsit thina chu accident ziak hi ding ah ginchat a hilona chung ah a zi Neinu Singsit in Lamshang Police Station, Officer-in-Charge kiang ah complaint letter pelut hin a gen hi. Zia chu tawh kitawn ah Kuki Students’ Organization-Imphal in CRPF jawan Paolenmoi Singsit thina chu ngaikhawk mama a hidan taklang in, kituptak ah a thina tawh kisai khualna a um ding pawimaw hin a gen hi.

Minister Nemcha Kipgen in nasatak ah demna bawl
Imphal, Aug.7 *(Nisin Thuhiltu)*: Social Welfare and Cooperation Minister Nemcha Kipgen in Viewland Colony, Senapati district headquarters ah tunaicha numei naupang khat pawngsual leh tha guat ah a umna chu nasatak ah demna bawl in, thil tung chu ngaikhawk mama a hidan a gen a, pawngsual ah um numei naupang numei dinmun a hawi kit paitheina ding ah panlak hiding in a gen hi. Chun, ama thupiak dungzui ah pawngsual ah um nu ki etkawlna hospital room ah security personnel te duty bawl sak in a um ua, a khua hiatna ngaina gual a hi masang ah security personnel te chu kuama direct ah thudawtna neisaklo ding ah le thupiak nei hin a kigen hi. Ama thupiak dungzui ma ah Manipur State Commission for Women team khat in Chairperson Dr. K. Sobita Devi mapuina hospital ah etkawl ah um pawngsual ah um numei chapang nu dinmun etthakna nei un le a kigen hi. Pawngsual ah um numei chapang nu chu RIMS Forensic Department in medical examination a bawlzaw uh hita le a hi. Social Welfare and Cooperation Minister in a gen belapna a chun, pawngsual ah um tu’n justice a mutheina ding ah kithuapina pezing ding a hidan taklang kawm in, Senapati S.P mapuina Manipur police team in thil umdan kituptak ah a suizui zingna chung un pakchat thu le a gen hi. A langkhatlam ah Manipur State Commission for Women team in Senapati S.P. Faumei Gonglin, IPS kimupi in thil umdan tawh kisai in holimna a neipiu a, zia hun a chun S.P. Senapati in FIR zik lut ah um leh numei naupang pawngsualtu hawlna chiatha zing hin a gen hi.

Imphal town sung ah sa-zuak te’n IMC a pat license a lak uh pawimaw: MAHUD Minister
Imphal, Aug.7 *(Nisin Thuhiltu)*: Municipal Administration, Housing and Urban Development (MAHUD) Minister Thounaojam Shyamkumar in tuni’n Imphal town sung ah sa-zuak te chu Imphal Municipal Corporation (IMC) a pat license la ding in hiatsakna a bawl a, sa-zuak tu te’n religious sentiment sukhalo ding ah panlakna a nei ding uh pawimaw a hidan gen in, sakhua, ho leh biak chuam chuam te kituak tak ah chenkhawm a hizing theina ding ah hiatsa sa ahiloh leh hiatlo ziak ah religious sentiment sukha umlo ding in le chialna a bawl hi. Chun, open tak ah Kongba Keithel leh Hatta (Golapati) ah sa ki zuak in religious sentiment sukha a hidan gen in, sa-zuak tu ten a thiangtho thei ding pen leh mun lemchang ah saa, a zawk ding uh pawimaw hin a gen a, himaleh sa-zawk thei leh zawk theilo thu ah bangma khapna umlo hin a gen hi. Chuleh, Veterinary Department a pat sa-that leh sa-zuak tu te’n certificate a lak uh pawimaw ding hin a gen a, zia chungchang chu foreign tour ah chia Chief Minister a tun kit hun ah genkhawm hiding in a gen hi.

Schools leh colleges uniform ah handloom product mat dingdan Cabinet in genkhawm di: Minister Thongam Biswajit Singh

Imphal, Aug.7 *(Nisin Thuhiltu)*: City Convention Centre, Palace Gate, Imphal ah tuni’n Ministry of Textiles, Government of India leh Directorate of Handloom & Textiles nuai ah Development Commissioner for Handlooms Weavers’ Service Centre, Imphal saina ah 3rd National Handloom Day mat in a um a, zia hun chu Textiles, Commerce and Industry Minister Thongam Biswajit Singh in khuallian hina tawh a uap hi. Minister Thongam Biswajit Singh in a thugenna a chun, schools leh colleges uniform ah handloom product van te alotheilo ah mat a hitheina ding ah State Cabinet ah pawlut ding a hidan taklang kawm in handloom product van te ngaisan theina ding ah National Handloom Day kimasang a hidan a gen hi. Central Government in National Handloom Day ah August 7 a puanna ziak genlang kawm in India khangthu 'Swadeshi Movement' kiti 1905 ah chiapi a hidan a gen a, zia movement domestic products leh production processes ngaikhawk theina ding ah chiapi ah um a hidan a gen hi. Manipur ah puan-gat/puangkhawng kiti chu state tradition khat a hidan gen in, puan-gat/puangkhawng mi tamna pen le hin a gen a, khawvel mun chuam chuam ah state sung ah piang handloom product te suklat ding pawimaw hin a gen hi. Handloom product te suklatna ding ah Department in national level Vibrant Handloom Expo organize bawl ding a hidan le puandawna nei in, handloom sector ah inbest bawl ding investor tamtak um a hidan a gen hi. Government in handloom a pat State’s economy dawpkang a hitheina ding ah investor khenkhat tawh MoU suai kai a hidan le a gen a, Pradhan Mantri Employment Generation Programme nuai ah beneficiary ding selection kibawl dan te le genlatna a nei hi. Department official te chu scheme chuam chuam um te a lawtin theina ding ah kituptak ah implement bawl ding in chialna le a bawl hi. Hun matna uap Weavers Service Centre, Centre’s Assistant Director M. Ibohal in a thugenna a chun, handloom sector masawn theina ding ah panlakna um zing a hidan gen in, Weavers Service Centre in puan-gat/puangkhawng mi te skill upgradation training pezing a hidan a gen a, Ministry of Textiles, Government of India tawh kithua ah Weavers Service Centre in high quality handloom products a um theina ding ah panla a hidan a gen hi. Zia hun matna a chun, National Merit Certificate leh Shant Kabir Award hawpdawna le a um a, Assistant Director in E-dhaga –mobile app a pat weavers te’n raw materials, rate quotations, etc check zing thei ding a hidan uh genlatna a nei hi. Chun, Minister Biswajit in Compendium of Handlooms & Textiles hawnna le a nei a, Best Performing Handloom Clusters of Manipur Prize - Andro Cluster leh Yarou Bamdiar Cluster te kiang ah kiang ah piak in a um hi. Prize chu cash award Rs. 50,000 leh citation a hi.