Nisin Thuhiltu – 31 July 2017

User Rating: 5 / 5

Star ActiveStar ActiveStar ActiveStar ActiveStar Active
 

Henglep Area ah natna hik lêng tawh kisai genkhawmna nei

Lamka, July 30 (Nisin Thuhiltu): District in-charge leh Manipur Agriculture,Veterinary & Animal Husbandry Minister V. Hangkhanlian leh 57 Henglep A/C MLA banah Chairman, Hill Areas Committee (HAC), Thangzalam Haokip @ TT Haokip te’n Health Director mapui Medical Team khat tawh tuni’n Churachandpur pha’n MS Conference Hall, District Hospital ah tulai Henglep Sub-Division a natna hikleng tawh kisai genkhawmna a nei ui. Kiho khawmna pat a hi masang in MS Office Chamber ah chukhawm in thuvantang in holimna a nei ua, zia hun a chun Medical Department panlakna tawh kisai a gen bak un, TT Haokip in District sung a sem Doctor 2 suspend ah a umnau tawh kisai a gen hi. Ama bial sung ah natna hik len ziak ah mitamtak in damlona ziak ah haksatna tuak a hidan uh state Assembly session ah a tangko tawh kitawn ah Chief Minister in la-khialkha Suspend Order sua ah um a hidan gen in, lakdan a diklo khak ziak hizaw hin a gen hi. V. Hangkhanlian, Minister (Agriculture, Veterinary & Animal Husbandry), Manipur in Health Minister portfolio a tukkhak hun ah doctor posting na mun ah chia nuamlo te buai um a sakthu a gen a, suspend ah um te’n lung nawpmawna a laklo ding uh a nawp thu a gen hi. MS Conference Hall ah hun matna a chun, Dr. J. Son Go Kham Samte, Medical Superintendent, District Hospital in hun matna amapui a, V. Hangkhanlian in Henglep A/C ah natna hik a lenna tawh kisai ngaikhawk mama a hidan gen in, Shaktiman mang ah damlo te puak ah a um uh chu State Government in ngaikhawk mama a hidan taklang kawm in, Chief Minister in emergency meeting ko ah thil umdan genkhawm hita a hidan a gen hi. Chief Minister lemtina tawh damlo te dinmun entha ding ah Churachandpur District Hospital pha a hidan uh le a gen a, Henglep bial ah damlo um nalai te entha ding ah tuni medical team khat kipan dawk a hidan uh le a gen hi. Natna dodalna ding ah Medical Department nuai ah mawpuakna chuam chuam neite panlakna pakcha mama hin a gen a, District sung khantona ding ah mipi te kithutuak tak ah pankhawm pawimaw in a gen hi. TT Haokip a thugenna a chun, Henglep ah thiltung chu State Government in ngai khawk mama a hidan taklang in, Henglep gam ah khantona a tun ding dawi ah panlakna a um zing lai ah ziagual buaina a tun chu khawk a sakthu gen in, khantona nasep sunawngkai chuam mama hin a gen a, a gam ngaikhawkna ziak ah Candidate dang kuama’n a hi khak ngailo, kum 1995 a pat 1997 kikal sung ah Henglep khua 15 vei pha a hidan, natna hik a len a pat del zui zing a hidan te a gen hi. Medical Team a mun del, Bolero leh Scorpio lut theihlona mun ah Shaktiman ah chuang ah te kipiakzawna ettawn tak mama in le a gen a, mi khat-le-ni mai damlona thu hilo ah kawzang damlo thu a hina chung ah zan imutheilo khawp ah lunggel nei a hidan te a gen hi. Henglep mipi te ding ah chawllo ah sem, District sung ah cheng nam chuam chuam te chung in kipakthu a gen hi. Dr. Karan Lokendro Singh, Director, Health Services, Manipur in zia hun matna a chun, Dengue leh JE natna dodalna ding ah panlakna chuam chuam um ding dan te taklatna nei in, Imphal a pat team khat in kithuapina peding uh leh Medical Camp le nei hiding in a gen hi. Shyam Lal Poonia, IAS, DC Churachandpur in District sung ah natna hik a lenna chung ah panlakpi zing, District Incharge Minister leh Bialtu MLA banah Medical Director te chung in kipakthu a gen a, kituptak ah panlak zing hiding in le a gen hi.

Minister leh HAC Chairman in Henglep zuan ding Medical Team thadawk

Lamka, July 30 (Nisin Thuhiltu): Henglep Sub-Division ah natna hiatchianlo a len ziak ah mitamtak in damlona a tuak uh tawh kitawn ah District Hospital tut ah a um nung un Henglep area ah damlo a um nailai te enzui ding in Medical Team khat tuni’n a kipan dawk ui. Medical Team kipandawk te chu V. Hangkhanlian, District In-charge Minister leh Thangzalam Haokip @ TT Haokip ten vaithakna tawh thaakdawna a nei ua, V Hangkhanlian in Medical Team te a mun tak ah thil umdan enzui ding a hinau ah kituptak ah panla ding leh damlo te puakvel lo ah a mun ma kituptak ah etkawl thei te enkawl ding in a vaithak hi. TT Haokip in Medical Team te ding ah bangkim arrangement bawl piak District Administration chung in kipakthu a gen a, lampi haksa tak kawm ah kipan dawk ding Medical Team-te chung ah kipakthu gen in, Henglep mipite’ kinepna supiting thei ding ah panla ding in chialna a bawl hi. Chuleh, District Hospital tut khel ngailo ah damlo te’n etkawlna a mu ding uh kinem hin le a gen hi. Medical Team te chu Dr. Leivon Belany Kom, MO, Henglep PHC, Dr. Alex Thangjalet Touthang, MO, PHC Henglep, Dr. Tongjakai Haokip, Paediatrician, DH, Churachandpur, Thangthianmuan, DPO Consultant, Manglal Muan, MPW, Paubiaklun, MPW, Seithang Mate, MPW leh Lalmalsawm,MPW; Lamthang Haokip, SI mapui Police Personnel 11 leh SDO Henglep Staff thum; Kailunlal, Andrew leh Thangminlun-te a hiu. Medical Team chu te chu Shaktiman khat, Jeep khat leh Gypsy khat tawh kipan dawk a hiu a, Jeep leh Gypsy ahileh Mualdak ah nutsia ding, Shaktiman ah Henglep tiang tung ding uh ti a hi. Fogging machine leh damdawi a pawimaw ding hunkhawp tawh medical team te chu Henglep zuan a hiu. A langkhatlam ah Henglep a pat tuni 30 July 2017 damlo Shaktiman khat ah District Hospital zuan te chu zan sawt nung in District Hospital a tung ui.
NT 31july2017b

Summer Talent Hunt ah kipakman te piakdawna nei

Lamka, July 30 (Nisin Thuhiltu) : Churachandpur Meetei Leikai Youth Club (CMLYC) saina in tuni’n Ibudhou Maigeingakpa Mandop, Khumujamba ah ‘Students’ Summer Talent Hunt-2017 Prize Distribution-cum-first Anniversary for Newly Elected Executive Member of CMLYC’ kiti hun mat a, zia hun a chun Summer Talent Hunt hun ah kipakman chuam chuam te piakdawna a um hi. Hun matna a chun, Advisory Board a pat Heman Romesh, Mutum Roshan Mangang, Secretary, CMLYC leh Ph. Umachandra, Treasury te a pat thugenna le a um a, M Kanta, Treasurer a pat Report piakna a um hi. Talent Hunt hun a chun category chuam chuam ah student te khen a um in Elocution, Extempore Speech, Singing, Quiz, Calligraphy, Quicker Mathematics, Painting, Spelling Bee, Debate leh Choreography ah kidemna a um hi.

PTC Vengnuam South Unit in JE damdawi a thawn ah hawm

Lamka, July 30 (Nisin Thuhiltu): Paite Tribe Council (PTC) Vengnuam South Unit in tuni’n Unit Office ah Japanese Encephalitis (JE) dalna Ayush damdawi, Belladonna 200 a hawm hi. District sung ah JE natna lêng a hi dungzui in PTC Vengnuam South Unit puitute’n vengsung mipi ngaikhawkna ziak ah damdawi chu a thawn ah hawp ding ah a dawt a hia, a dawtna pawm a um in piak a hitawh kitawn ah tuni zingkal in vengsung mipi te lak ah hawpdaw a hi. Zia hun a chun damdawi la ding te’n a innkuan teu min leh a kum zat uh zik in zia dungzui a chun PTC lawi uapte’n a kidai ding zat damdawi a piak uh a hi. Damdawi a hawpna tawh kisai ah Paumuanthang in hawp ding ah damdawi pia Medical Department chung ah kipakthu a puang a, natna lêng tawh kisai ah vengsung mite ngaikhawk ziak ah hi thei um sun leh damtheina ma ngai pawimaw ziak ah panla in seppi uh hi ah gen kawm in damdawi nek ding dan a hil hi. JE damdawi a hileh kum 12 nuailam te’n ni khat ah chang 2 khatvei nek ah a nek ding uh leh ni 3 sung a kizawm ah a nek ding uh a hia, kum 12 chuunglam te’n ni khat ah khatvei thu ah chang 4 leh zia chu ni 3 sung ma a nek ding uh a hi. Damdawi chu tui panglo ah nek ding leh lei (tongue) nuai a kawi ding a hia, natna dang ziak ah damdawi neklai neite’n a damdawi nek sek uh tawh minute 30 bek kikak ah JE damdawi nek ding ban ah, a vâl ah nekha (overdose) a um leh kintak ah Coffee chîktak hel ah dawnsak ding a hia, zia chu damdawi thana hawipen a hi.
NT 31july2017c

YPA GHQ in Hoihkim vena leh Henglep Area a pat damlo te panpina pia

Lamka, July 30 (Nisin Thuhiltu): Young Paite Association (YPA) General Headquarter in tuni zingkal in natna ziak ah a thiamzilna sunzawm theilo a um, Nianghoihkim @ Hoihkim (18) d/o (L) H. Rema of V. Munhoih vena nei hun saulo a va matpi hi. T. Khailianthang, President, YPA GHQ in mihing chung ah thiltungte chu Pathian in dawi a nei ziak hithei a hina ah Pathian kiang ah i dawi leh ngai i dawtte chu a lawtinna ding ah ginna leh ama chung ah muan ngamna nei pawimaw a hi dan a gen a, Hoihkim pauchap piaktu ding le pui uh a hi dan le a gen hi. Upa L. Velson in thamuanna thu gen piak kawm in Hoihkim damna ding in a pauchap piak hi. Zia hun a chun, Chin Ngaih Pau, Chairman, CEC, YPA GHQ in meeting thupukna dungzui ah Hoihkim vena ding ah a chawi dakbawm piakna le a nei a, Delhi ah YPA Joint Headquarter um a hina ah Delhi a phak hun ua a pawmaw leh thuhiat thei ding uh hi’n le a gen hi. Hun mat zaw a chun, YPA GHQ puitu te’n KKL Complex, IB Road ah Henglep bial a pat damlona ziak ah District Hospital kitut te panpina ding in KKL khut ah Ann-chang bag 2 leh Allu bag 1 piakdawna a nei u’i.

CM in National Sports University umna ding mun entha

Imphal, July 30 (Nisin Thuhiltu) : Manipur Chief Minister N. Biren Singh in tuni’n Imphal West district, Koutruk ah National Sports University umna ding mun et-thakna a nei a, Works Minister Th. Biswajit, Youth Affairs and Sports (YAS) Minister Letpao Haokip, Parliamentary Secretary (Home) L. Susindro, Sekmai AC MLA H. Dingo, Chief Secretary R.R. Rashmi, Works and IPR Commissioner K. Radhakumar banah high ranking official chuam chuam in le a zui ui. Chief Minister in National Sports University umna ding mun et-thakna a neizaw hun ah thuthak lakhawm mite kiang ah a genna a chun, foundation suangphu hawnna nei ding ah Prime Minister Narendra Modi chial a hidan gen in 15th August 2017 zaw leh hun lemchang pen pen ah hawn hiding in a gen hi. National Sports University umna ding mun tawh kisai ah gam thu ah buaina um zing nalai hi ah a kigenna tawh kisai ah hilchianna a bawlna a chun, buaina bangma umtalo a hidan gen in, demarcation leh fencing works zawthian hita hin a gen a, University umna ding mun leh helipad kikal ah 2-km ah sau approach road chu blacktopping bawl hiding in a gen hi. Foundation suangphu hawnna zaw a hitak leh University ah first session chu infrastructure umsate mang ah Khuman Lampak Sports Complex ah kipan ding hin a gen a, State Planning Department in Rs 5 crore sanction a bawl mang ah a pawimaw ding office rooms leh infrastructure siamzaw hita hin le a gen hi. N. Biren in State mipi te chu a vaima theilam ah Prime Minister in Manipur vena a nei a, foundation suangphu hawnna a nei theina ding ah panlakpi chiat ding in le chialna a bawl a, thanuam tak ah Prime Minister in State a phak hun ah vaidawn ding in le chialna a bawl hi.Works & IPR Minister Th. Biswajit in a genna a chun, University in University umna kiangnai tua te ding ah lemchang tamlo bep siampiak mailo ding leh state sung ah sepna tamtak kibelapna hiding in a gen a, Prime Minister in state vena a nei masang ngei ah approach road te chu tip-top condition ah kawi hiding in a gen hi. A kiangnai tuam ah khua um te chu government panlakna kithuapi ding ah chialna bawl in kipumkhat tak ah challenge um te lamtua khawm ding pawimaw hin a gen hi. National Sports University umna ding mun ah hun matzaw in Chief Minister in Heingang Hills, Imphal East district ah Ibudhou Marjing tourist complex kisa zing lai te le et-thakna a nei a, zia mun a chu gigantic polo statuebanah cafeteria, garden, approach road, parking leh Marjing temple siam leh sak a hi.

Medical Surveillance Teams te umsak hiding: CM
Imphal, July 30 (Nisin Thuhiltu) : Manipur Chief Minister N. Biren Singh in tuni’ Imphal West district, Koutruk ah National Sports University umna ding mun et-thakna a nei hun ah thuthak lakhawm mite kiang ah a genna a chun, State sung ah Japanese Encephalitis, Dengue, Swine Flu leh vector-borne diseases dang dang a len-thakna chung ah medical surveillance teams te a vaima theipen ah Moreh, Jiribam leh Behiang (Churachandpur district) ah umsak hiding, damlo te bak ah thil umdan et-zuina nei ding uh hin a gen hi. Zia natna te chu tawh kisai ah zani a khah high level review meeting ko ah um hin a gen hi. Meeting hun ah maban panlak ding dan genkhawm ah um a hidan taklang in State Health Services leh AYUSH Department mapuina ah doctor leh paramedic te Churachandpur ah thil umdan enzui ding ah sawl a hidan uh gen in, Henglep sub-division ah natna hiatchianlo damlo tamtak a umna ziak kituptak ah khualna nei ding uh hin a gen a, Chief Minister’s Relief Fund a pat damlo te etkawlna ding ah Hill Area Committee Chairman leh Henglep AC MLA T.T. Haokip khut ah Rs. 1 lakh piak ah um hin le a gen a, damlo 100 lam te zani a khat Churachandpur district headquarter tutbe ah um a hidan uh a gen hi. Damlo pua-ding ah Shaktiman trucks 2 sawbe ah um a hidan le gen in State Government in natna hiatchianlo a pat damlo ziak ah haksatna tuak te chu a pawimaw dungzui ah kithuapi hiding in a gen hi. Zia kithuapina district administration leh elected leader te mang ah piak hiding in a gen a, damlo khenkhat a pawimaw leh lenna mang ah puakdaw hiding in a gen hi. Chief Minister in State sung ah Dengue leh Japanese Encephalitis case kiman dawk70 per cent chu Churachandpur district a pat a hidan uh le a gen hi.

Chief Minister’s Relief Fund ding ah donation lutbe zing

Imphal, July 30 (Nisin Thuhiltu) : Manipur ah tuilet ziak ah hatna tuak te kithuapina ding ah miphachuam ngai pawl leh mimal chuam chuam in Chief Minister’s Relief Fund (CMRF) ding in sum donate a bawl zing ui. Zia chu tawh kitawn in tuni’n Dry fish merchants of Ngari Gali, Imphal in Rs. 1 lakh, Kakching Municipal Council in Rs 50,000, Mahesh Jain M/S Variety Traders Complex, Thangal Bazaar in Rs. 2,00,000, All Manipur Government Aided School Employees Co-ordinating Committee in Rs. 1,10,000 R.S.U.W.O. Branch Unit Social Swab Development, Laipham Khunou in Rs 50,000 banah Border Trade Chamber of Commerce, Moreh & Tamil Sangam, Moreh in flood relief materials - Arhar dal 485 bags, 25 per bag (of approx. Rs 8 lakh) CMRF ding in donate a bawl ua, Chief Minister’s Secretariat ah Chief Minister N. Biren Singh khut in piakdawna a nei ui. Chuleh, Nongthombam Budha Singh of Luwangshangbam in le CMRF ding in Rs. 1000 donate a bawl hi.Chief Minister in ziagual panlakna um te chung a chu kipakthu gen in, a phat chuam thei ding pen ah mat hiding in panpina sum petu te a thutiam hi.

Indigenous Wresting Championship Tournament
Senapati, July 30 (Nisin Thuhiltu): Autonomous District Council, Senapati in 45th Raising day matna kawm in state sung ah a khatveina ding in state level open indigenous wresting championship tournament organised a bawl a, mini stadium, Senapati District Head quarter ah tuni’n hawn in a um hi. Tournament hawnna hun chu M.L. Markson, Chairman, Autonomous District Council, Senapati in Chief Guest hina tawh uap in tournament a hawng a, ama’n a thugenna a chun, Manipur Government in state level ah championship a dawpkangna chung ah pakchat thu gen in, tu ah tournament chu state sung ah Indigenous Wresting Championship tournament umsun hinalai in le a gen hi. A khatveina ding ah state level open indigenous wresting championship tournament organised kibawl chu traditional sports dawpkangna hawi tak hiding leh khangthak tamtak suthatho tu hiding ah ginchatna nei a hidan genkawm in Autonomous District Council, Senapati in funds leh resources tamlocha nei maleh mipi te khualna neitak ah nasep ding lunggul zing a hidan gen in mipi te kithuapina a dawn hi. Ni 2 sung Indigenous Wresting Championship tournament ah participants 121 a um ua, category pani - 65 kg nuailam leh 65 kg chunglam te ding ah competitión chiapi a hi. Opening function chu Hingba John, Vice Chairman, Autonomous District Council, Senapati leh Senapati district ah district level officers zosia’n le a uap ui.

L.Tangnaum Village in lung-awilo thu taklang;
August 7 a pat bandh Kangpokpi, July 30 (Nisin Thuhiltu): Manipur Chief Minister N. Biren Singh in tuni Imphal West district, Koutruk ah National Sports University umna ding mun et-thakna a nei hun ah National Sports University umna ding mun tawh kisai ah gam thu ah buaina um zing nalai hi ah a kigen, a hilchianna ah buaina bangma umtalo hih ah agen chu L. Tangnaum (Haraothel), Village Authority in pawmlo a hidan a taklang a, L. Tangnuam (Haraothel) khawmi te’n state Government thupukna pawmlo ding uh leh nasatak ah dodal zing ding uh hin a taklang hi. H. Vaiphei, Chief of L. Tangnuam village in zaidaw thiam tak ah gam issue sukfel ding ah state Government thuhiat himaleh Chief Minister in foundation suangphu hawng ding ah Prime Minister chialna a bawl chu Manipur ah BJP Government in khenchuamna chiapi a hidan a kilatna khat hin a gen a, tamvei tak thil umdan state Government kiang tut a hinung ah limsak ah umlo hin le a gen hi. Director, Youth Affairs & Sports, Manipur in allotment orders a sua dungzui ah Haraothel tu ah L.Tangnuam Village gam 137.62 acres huap ah 325.60 acres chu (Dag.No.1 of village No.47-Koutruk) National Sports University umna ding mun ah taklat ah um a hidan le H. Vaiphei in a gen a, allotment order sua ah um chu official Gazette ah le suadaw hilo in a gen hi. A langkhatlam in Kangpokpi District ah Civil Society Organisation chuam chuam in National Sports University umna ding gam thu ah State Government panlakna chu nasatak ah demna bawl in a vaima theipen ah sukfel ahiloleh August 7, 2017 a pat kiphinna pan ding a hidan uh tuni Kangpokpi DHQ ah CSO joint meeting hun in thupukna a siam ua, Imphal West huap sung ah um Koutruk, Senjam Chirang leh Sejam Khunou ah National Sports University umsak ding ti kawm ah L.Tangnuam Village gam sukkhak ah a umna issue sukfel a hilo leh “bandh free district” hi ding ah panlakna a nei zing uh chawlsan ah a demand uh sukpitin a hilo ziak ah bandh pat ding in le lemsakna a nei ui.

Rule tawh kituak ah transfer & posting kibawl: Education Minister

Imphal, July 30 (Nisin Thuhiltu): Education Minister Th. Radheshyam in tuni’n upgrande kinawl thak The Bengoon Higher Secondary School, Mayang Imphal ah XI-Class Session, 2017-18 hawnnaa nei hi. Ama’n a thugenna a chun, teacher lecturer ah promotion piak thak ah um te transfer & posting kibawl chu a chiapilo a um uh leh a thalaw( salary) kipia theilo ding a hidan gen in, norm leh requirement tawh kituak ah a pay scale dungzui ua promotion piak ah um a hidan uh a gen a, school 20 sang ah tamzaw upgrade kibawl a hidan a gen hi. Student te a diklo lam ki kawkmu ah transfer & posting dawilo ah kiphinna kineisak chu khawk a sak mama thu gen in state education masawn theina ding school zosia techer te hawpgual ding pawimaw hin a gen hi. Teacher sanction post 30 himaleh School khenkhat ah teacher 40 a umna le um a hidan gen in, zia gual school a pat chu teacher 10 te transferred bawl ding a lotheilo thil hin le a gen a, upgrad thak ah um school te’n government guideline /criteria pathum - quality, accessibility leh equity a sukpitin tei tei ding uh pawimaw in le a gen hi. Zia hun matna chu Education & YAS Parliamentary Secretary, Mayang Imphal, MLA K. Robindro Singh te’n le a uap ui.