Nisin Thuhiltu - 26 July 2017

User Rating: 0 / 5

Star InactiveStar InactiveStar InactiveStar InactiveStar Inactive
 

State Assembly session ah Demands for Grant 4 pass; Bill 3 luidaw ah um; Doctor 300 lakbe hiding

Imphal, July 25 *(Nisin Thuhiltu)* : A chiatha zing 11th Manipur Legislative Assembly-2017 budget session ah tuni’n demands for grant pali passed in a um a, Bill pathum le luidaw in a um hi. Demands for Grant pali passed ah um te chu : (1) Medical, Health & Family Welfare Services Rs. 605, 80,68,000, (2) Labour & Employment Rs. 54,20,91,000, (3) Department of Tribal Affairs & Hills Rs 504,48,35,000 leh Animal Husbandry & Veterinary Rs. 106,63,85,000 te a hi. Bill pathum - (1) Manipur Fiscal Responsibility and Budget Management (Amendment) Bill, 2017, (2) Manipur Private School (Registration & Regulation) Bill, 2017 leh (3) Manipur Coaching Institute (Control & Regulation) Bill, 2017 te le luidaw in a um hi. Discussion hun ah opposition MLA K. Ranjit Singh in Seventh Pay tawh kisai ah dawtna a siam Finance Minister leh Deputy Chief Minister Y. Joykumar Singh in a dawnhuna a chun, State Government in Seventh Pay implement ding ah guanggalna bangma nei nailo a hidan genkawm in collegeleh school teacher, judicial staff, contract leh muster roll employees te panglo ah State Government Employees 74,200 hin a gen a, Government lui in 14th December, 2016 ah a siamdaw Feedback Committee in enquiry report a piaklut nung ua State Government nuai ah semtu um zat hiatchian ah um hin a gen hi. Central Government employees te ding ah kum 1996 leh 2006 ah 5th leh 6th Pay implement ah um leh State ah kum 1999 leh 2010 ah 5th leh 6th Pay chiapi ah um a hidan taklang in Central Government Employees te ding ah Seventh Pay chu July 2016 ah implement ah um pan hi ah gen in State Government in financial position dinmun zil ah Seventh Pay implement theina ding ah panlakna a nei ding pawimaw nalai in a gen hi. MLA Kangabok A/c O Surjakumar Singh in tu ah state government in advertisement ah sen leh so a nei total expenditure zat dawt a siam, IPR Minister Th. Biswajit Singh in a dawnhuna a chun, advertisement ah total expenditure Rs. 55,00,371 hin a gen a, IPR Department a ding ah total budget 18 Crores (2017-18) lak ah 10 crores chu Manipur State Journalist Welfare Scheme ding ah kikawi hin a gen hi. Chuleh, a vaima theipen ah Keishampat, Imphal ah inn kisa te chu zawthian hiding in a gen hi. MLA K. Meghachandra Singh in thakhat thu PHC Khoirom, PHC Charangpat leh CHC Yairipok ah doctor te transfer ah a um nau tawh kisai ah dawtna a siam State Health Minister L. Jayantakumar Singh in a dawnhuna a chun, doctors te transfer ah a um uh chu government policy chiapi patna hin a gen a, Manipur Public Service Commission saina nuai ah doctor 300 tunung sawtlo ah lakbe hiding leh state sung ah doctor taksapna sukven hiding in a gen hi. MLA O. Surjakumar Singh in State Employment Exchange ah sepna hawl ki register te dinmun dawtna a siam Labour and Employment Minister Th. Radheshyam Singh in a dawnhuna a chun, Self Employed leh Working in Private Sector Enterprises te panglo ah 31st January, 2017 tiang ah State Employment Exchange ah sepna hawl registered ah um total ah 8,16,888 a hidan taklang in zia lak a chu pawsal 571,583 leh numei 245,305 um in a gen hi.

VPC GHQ election; President ding ah mi 3 leh VP ding ah mi 1 in nomination file ta
Lamka, July 25 *(Nisin Thuhiltu)* : Vaiphei Peoples’ Council (VPC), General Headquarters President leh Vice President telna 25th August 2017 leh a umna ding ah tuni tiang ah President ding ah nomination file mi pathum a um ua, Vice President ding ah nomination file mi 1 a um hi. President ding ah nomination file ta te chu - Hauneilal (date 7/7/2017); Ngulzathang (date18/7/2017) leh Khatkhotong Baite (date 22/7/2017) te a hiu a, Vice President ding ah nomination file a hileh Lalzakhai Vaiphei (date 22/7/2017) a hi. Hiatthei khat chu Election commission in June 20, 2017 ni notification a sua a hia, VPC constitution tawh kituak ah titna nei te’n nomination fee pia'n nomination file thei ding uh ti a hi. Nomination ahileh July 1- August 10, 2017 sung ah file thei ding, Aug. 11 ah scrutiny um ding, Aug. 12- 14 sung ah withdrawal bawl thei ding a hi. Nomination form dawi ten VPC Office Bethel Veng, New Lamka ah lakthei ding a hi.

Kargil Vijay Diwas, 2017 mang di
Lamka, July 25 *(Nisin Thuhiltu)* : Lalthanzam Fimate, Branch Officer (HQ) in Deputy Commissioner thasik ah tuni thusua a bawlna a chun, State Home Department hiatsakna dungzui ah 26th July 2017 zingkal lam dak 11:00 ah BRGF Resource Centre, DC Office, Churachandpur ah Kargil Vijay Diwas, 2017 mat hiding a hi. Zia hu chu a kisaipi a diak ah District Level Officer (DLO) te'n pello ah uap chiat ding in le hiatsakna a bawl hi.

Doctorate Degree muthak

Lamka, July 25 *(Nisin Thuhiltu)* : Mr Haominthang Vaiphei s/o Sawitinnek Vaiphei of Kamuching Village, Kangpokpi district chu tuni July 25, 2017 ah Manipur University, School of Social Sciences, Department of Library and Information Science nuai ah Prof. Th. Madhuri Devi supervisor hina nuai ah Doctorate Degree piak a hi. Ama Thesis a hileh "Growth and Development of Theological College Libraries in Northeast India" a hi. Mr Haominthang Vaiphei hi tulai tak ah Zillai (Vaiphei Students’ Association) GHQ President le a hi.

DLCC-cum-Review Meeting um ding
Lamka, July 25 *(Nisin Thuhiltu)* : A hung tung ding July 31 sunma dak 11:00 leh BRGF Resource Centre, DC Office, Tuibong ah Shyam Lal Poonia, IAS DC CCpur mapuina ah District Level Coordination Committee DLCC-cum-Review Meeting um ding a hi. Zia hun a chu August 15 leh 71st Indian Independence Day matna ding ah kisaklawkna leh DLO khat in government school khat a etkawlna ding tawh kisai ah report piakna um ding a hi. Chuleh, district sung ah government office te sukthianna ding tawh kisai ah Department chuam chuam te panlakna etzuina um ding a hi.

Ainujang khawmi banghem zat te damlo; mi 4 CCpur District Hospital tung
Lamka, July 25 *(Nisin Thuhiltu)* : Henglep Sub-Division ah um, Ainujang khawmi damlo mi bang hem zat te District Hospital, Churachandpur zuan ah puak himaleu a gari uh a a siat ziak in mi 4 bep puang tung thei in a um hi. A kihiatdan in Ainujang khua ah khawsung mi bangzat a hem ten damlona tuak uh ti a hia, zia chu tawh kitawn ah Chief Medical Officer (CMO) Churachandpur in damlo te puakna ding ah gari a sawl a hi. Ainujang khua ahileh gari lut theilo a hi ziak in damlo te Henglep khua chan keng ah, Henglep a pat Lamka zuan ah gari puak a hiu. Damlo ahileh mi 45 vel a hiu a, himahleh a gari uh a siat ziak ah mi 4 te chu gari chuam ah chuang ah District Hospital tung thei uh ti a hi. Zia mi 4 te chu - Lunkholal (40) s/o Seilun of Ainujang, Hatneinieng (8) d/o Lunkholal of Ainujang, Nehdinglen (26) s/o Jangmang of Ainujang leh Boinu (23) w/o Nehdinglen of Ainujang te a hiu a, a tangpi khawsik, luchangna, luaksuak leh gu- kisuktuana nasa a hideu ui. Damlo te chu a natnau hiatchian a hitheina ding ah a thisan uh test bawl hiding a hiu a, zia a pat chu a natnau hiatchian thei hiding ti a hi. Damlo mi 4 te chu Observation Room, Eastern Block, District Hospital ah etkawl in a um ui. Tulai in Manipur ah Dengue leh JE natna leng hat mama ti a hia, Churachandpur District ah zia natna case chu tam diak leh Dengue case 20 leh JE case 46 confirmed hita a hi.

Naupang kum 3 mi khat nullah tui ah thi
Lamka, July 25 *(Nisin Thuhiltu)* : Gouchinkhup Veng, New Lamka ah tuni, July 25, 2017 sunnung ah gua zuk hatlai tak in naupang kum 3 mi khat nullah ah khialut in a thisa a luang mudaw in a um hi. Zia thina tuak chu Man Hat Hoih (3) d/o Ngam Khan Suan Guite a hia, zia thil tun hun a chu a nu leh pa hospital ah a U etsak ah chia kal uh hin a kigen hi. Naupang’ nu ahileh Sianzadong, Ex-MDC chanu Niangmuanching’ a hia, hospital a chia ding kuan ua a pu’ kiang ah a nutsia malam uh, hun bang chan a hem sung a pu te’n a mulo nung ua, a umna ding a kan vel bak ua, a inn ua chia hikha ding ti ah a inn uh a va et uh leh a inn uh tunglo a hi bak ah a nu leh pa te le inn tung kit nailo uh ti a hi. Zia phat a chu a pu’n veng sung mun chuam chuam ah a hawl vel nung ah CYA Road pettona bul, Gouchinkhup Veng ah mi hawn khat in nullah ah naupang khialut a buaipi uh a mu tawh kit awn ah a va et leh a tu nu Man Hat Hoih (3) a hidan hiatchian ah um a hi. Man Hat Hoih luang chu CYA Road pettona bul, Gouchinkhup Veng ah thiksia la te’ lak nasem khat in Culvert siatna, thiik mawng dawk ah kibat chu nitaklam dak 4:00 vel ah a mu daw a hi. Thiltung hiat a hi tawh kitawn in bialtu MDC CT Lian leh Suanchinpau Guite, MDC te’n Gouchinkhup Veng del ngal in, H. Singsit, SI mapui police team khat in thil umdan etchianna leh kanzuina a nei ua, Thangboi Gangte, MCS, SDC Churachandpur leh Khaipao Haokip, Chairman, ADC Churachandpur te’n le thil tunna mun del in, a gaalna sum a piak ban-un, DC Churachandpur in le thil umdan entha ding in a thasang ding mi a sawl hi. Man Hat Hoih ahileh Postmortem bawl ding in nitaklam ah District Hospital ah puaklut in a um a, 26th July 2017 ah CJC Kochuam leh YPA New Lamka (G) inntekna ah YPA Thanmual ah vuiliam hiding a hi. Thiltung tawh kisai chu Churachandpur Police Station ah Report bawl in a um a, Unnatural Death nuai ah a case ziklut in a um hi.

YPA GHQ in lampi siatna mun te siampha

Lamka, July 25 *(Nisin Thuhiltu)* : Young Paite Association (YPA) General Headquarter in tuni, July 25, 2017 in Khawpi sung Tedim Road kuakna mun ni ah kawl-ek su’nna a nei ui. Khawpi sung sukthianna ding leh thiangtho tak ah umsak ding ah YPA GHQ in YPA Lamka Block leh YPA New Lamka Block lawiupa te tawh kithua ah zani mun khenkhat siamhawi ding pawimaw ah a hiat teu etthakna a nei nung ua tuni nasepna a pat uh a hi. Tuni ah lampi kuakna mun kawl-ek a su’nna mun uh chu Zenhang Lamka Area a Zouveng lutsukna phakma Tedim Road leh Damka Bazaar, New Lamka phakma a hia, tipper 2 mang in kawl-ek su’nna a nei ui. Nasep hunsung in Traffic Control Police (TCP) te’n kithuapi in gari taitua te ding ah Road Diversion bawl in, kawl-ek su’nzaw ah lampi nuam chuam mama ah hiat a hi. T. Khailianthang, President, YPA GHQ in nasepna tawh kisai a genna a chun, kuama sawklo ah YPA GHQ in a pawimaw sum leh pai pawdawk ah lampi siam hawina nasep chiapi ah um hin a gen a, khawpi sung thianthona ding ah dawr neitu te kim leh kiang suthiang chiat ding ah chialna bawl in nullah ah kuama’n niin pailo ding in le chialna a bawl hi. Chuleh, ADCC Sanitary Truck mang ah niin pai ding in le mipi te chialna a bawl a, YPA GHQ in thianthona lam thil ah panlana nei zawm zel ding hin a gen hi. A langkhatlam ah mipi te ding ah lampi nuamlo tak ah um YPA GHQ in a siamphatna chung in mitamtak in pakchatthu a gen ui.
NT 26july2017b

Territorial Army recruitment
Lamka, July 25 *(Nisin Thuhiltu)* : 119 Infantry Battalion Territorial Army TA, Assam saina’ a hung tung ding August 3 a pat August 5, 2017 sung ah Kenches Trace Shillong, Meghalaya ah Territorial Army TA kilakna um ding a hi. Territorial Army TA recruitment chu a bik tak ah North East, West Bengal leh Andaman Nicobar Island te a ding ah conduct hiding a hia, soldier general duty ah post 75 leh Clerk Staff Duties ah post 4 ah sem ding lak (recruit) hiding a hi. Soldier General Duty post apply na ding ah kum 18-42 mi hi ngai ding a hia, thiamna lam ah Class X, percent 44 chung ah zo hi ngai ding a hi. Soldier Clerk ahileh kum 18-42 kikal mi, thiamna lam ah pawl sawm-leh-ni percent 60 chung lam te’n apply thei ding a hiu a, computer lam ah thiamna neite ding ah bailam diak ding in a kigen hi. Soldier Tradesmen a ding ah kum 18-42 kikal mi, thiamna lam ah pawl X tiang zo te’n apply thei ding a hiu. Zia Territorial Army TA recruitment hun a chu Army Servicemen leh war widow chate banah National Level Sports Men te ding ah relaxation um ding a hi. Thuchian hiatbe nuam te’n contatat No. 07085839067/08119019706/07085692808 ah Khuga Battalion thuhiat thei ding a hi.

JE leh Dengue dawmdawi
Lamka, July 25 *(Nisin Thuhiltu)* : Churachandpur District sung ah Japanese Encephalitis (JE) leh Dengue natna a len tawh kitawn ah a ki venna ding ah Ayush damdawi mat in a um a, zia te chu JE ah Belladonna 200 leh Dengue a ding ah Eupatorium Perfolatum 30 kiti a hi. JE damdawi ahileh kum 12 nuailam te’n chang 2, kalkhat a khatvei, thakhat sung leh kum 12 chung lam te’n chang 4, hapta khat ah khatvei, thakhat sung nek ding ti a hi. Dengue ahileh kum 12 nuailam te’n ni thum sung nisian ah chang 2 a nek ding uh, kum 12 chunglam te’n ni 3 sung nisin leh chang 4 a nei ding uh, damdawi te chu tui panglo nekding hi’n a kigen hi. A natna veikhawm a um leh JE damdawi course ting ah a nek masak ding, zia zaw tak chuleh hapta khat kalhel ah Dengue damdawi neksak thei ding hin le a kigen hi. Chun, damlona chuam nei ah damdawi dang nek neite’n JE leh Dengue damdawi nek hun tawh dakkal kimkhat sung bek kikak ah nei ding hin a kigen bawk hi. JE damdawi tukum ah nete’n kumkit leh a hun tawh kituak ah a nek kit ding uh pawimaw in le a kigen hi. Damdawi-te aval ah nekha (overdose) a um leh kintak ah Coffee chîk-tak bawl ah dawnsak ding, zia chu damdawi gu thana ding ah a hawipen in a kigen hi. JE leh Degue natna len hun himaleh kum masa sang in tukum ah damdawi la tam lo in a kisaipi thuneitu te’n a gen ua, kum masa JE damdawi Belladonna 200 chang 10,000 (ten thousang) hawpdaw ah um hi ah le taklat in a um hi.

DC/CCpur in a khut ngawng suhek

Lamka, July 25 *(Nisin Thuhiltu)* : Shyam Lal Poonia, IAS, DC Churachandpur in a khut ngawng changlam pang a sukhek ziak in tuni, July 25, 2017 in District Hospital ah doctor te a ki etsak hi. A kihiatdan ah a chiata ni 5 sung a khah DC Shyam Lal Poonia, IAS in a kihelna a khutngawng changlam pang a sukhek khak hi a hia, Ultrasound Therapy bawl piak ah um leh ni 5 sung zia chu a chiapi zawm ngai ding in a kigen hi. A khut natna chu serious talo hilo in Medical Superintendent in a gen hi. Shyam Lal Poonia, IAS, DC Churachandpur a hileh ngaina gual in Office a kai zing tho hi.

Health Worker-te transfer & posting khak
Lamka, July 25 *(Nisin Thuhiltu)* : Secretariat, Health Department, Government of Manipur in State sung ah Dengue leh Japanese Encephalitis natna a len thak tawh kitawn ah Health Worker-te transfer & posting khak ah um a hidan a taklang a, himaleh July 17, 2017 tiang ah transfer ah um te’n a posting thakna mun chiat ua July 24, 2017 a pat nasep a pat ding un hiatsakna a bawl hi. Zia hiatsakna chu zuilo a um leh Government in a chung ua action khautak la ding hin Soiminlian Lengen, Under Secretary (Health & Family Welfare), Government of Manipur in Governor sik ah thusua a bawlna a chun a taklang hi.

Speical review meeting um ding
Lamka, July 25 *(Nisin Thuhiltu)* : A hung tung ding July 27 sunma dak 11:00 leh DACO Officer Chamber, DAPCU Office, CMO Campus ah National Aids Control Officer NACO thupiak dungzui in Speical review meeting um ding a hi. Zia hun a chu DAPCU tawh kizawpna nei, TI, DRP leh LWS ah project manager zosia pang ding a hiu. Chun, meeting hun ah kum 2016-2017 sung Annual Performance leh First Quarter performance 2017-2018 report piakna nei ding a hiu.

“Capping, Lamp Lighting leh Oath Taking” nei

Lamka, July 25 *(Nisin Thuhiltu)* : GNM Training School in tuni sunma dak 10:00 a pat amau Multi-Purpose Hall ah GNM First Year student te “Capping, Lamp Lighting leh Oath Taking” neisakna a nei ui. Zia hun chu Shyam Lal Poonia, IAS DC CCpur in chief guest hina tawh a uap a, Dr Songokham Samte, Medical Superintendent, district hospital leh Dr Kimngaihching Simte, CMO ten Functional President leh Chief host hina tawh a uap ui. Dr Vumchingpau Tonsing, DFWO, Dr. Romeo Sanate, DACO banah student nu le pa te’n hun matna a uap ui. Dimsuanlun, Tutor in hun matna a mapui a, khuallian Shyam Lal Poonia, IAS DC, Dr Songokham Samte, Medical Superintendent, Dr Kimngaihching Simte, CMO, Dr Vumchingpau Tonsing, DFWO leh V Gouhzachiin, Principal, GNM Training school ten candle detna a nei ui. Zia hun matna a chun, V Gouhzachiin, Principal in GNM Training School tawh kisai genlatna a nei a, Nursing Superintendent leh Nursing Sister, District Hospital-te’n GNM First Year Student 27’ Capping leh Lamp Lighting neisak in, Principal, V. Goihzachiin in, Florence Nightingale Pledge gen in kitiamsakna a nei hi. Pastor D Kamchinmang, Local Pastor, Hiangtam Lamka EBCC in nursing student te a ding in Pathian kiang ah pauchapna a nei hi. Kitiamna hun matzaw in, V Gouhzachiin, Principal, GNM Training school mapuina ah Chief Guest Shyam Lal Poonia IAS DC CCpur leh khuallian ten GNM Training School et-thaakna nei in thugenna hun le a nei ui. Tuni ah GNM First Batch student, Capping, Lamp Lighting leh Oat Taking Ceremony nei student 27 a hiu a, CCpur district khangthu Government nursing training school umsun GNM Training School ah GNM Course ziltheina pat patdaw a hi tawh kitawn ah Capping, Lamp Lighting leh Oat Taking nei masa pen te a hiu. Female Health Worker Training School ahileh S. Lienkim Hmar, Principal hina nuai ah March 16, 1984 ah First Batch regular class pat in a la um a, tuni tiang ah student 500 phial in zia Training School a pat hi zilna zo a, sepna chuam chuam a nei ta a hiu. GNM Course ziltheina ding ah Government in order a sua tawh kitawn ah, Female Health Worker Training School chu GNM Training School ah san a hia, tu leh tu V Goihzachiin, Principal hina nuai ah Utilize Tutor 4, outsource Tutor 2 etkawlna nuai ah ANM Second year student 8, leh GNM First year Student 27 a kigawm ah Student 35 a um ui.

IGSSS Manipur Flood Emergency relief 2017

Imphal, July 25 *(Nisin Thuhiltu)* : Manipur state sung a diak ah Imphal East and West, Thoubal leh Bishnupur banah Kakching district ah tuilet ziak ah haksatna tuak mitamtak a umna chung un Indo Global Social Service Society (IGSSS) leh Integrated Rural Management Association (IRMA) kithua in a chiata 20 July ni a khan tuilet ziak ah haksatna tuak te dinmun etthakna leh relief van hawpdawna a nei ui. Zia hun a chun IGSSS a pat Kaplianlal Thangluai, Assistant Manager leh Ms. Helam Haokip, IRMA Director te’n inkuan 215 te kithuapina ding Rs. 1000 chiat piakna a nei ua, zialo a chun -Torch light or Solar lamp (both men and women);Monetary support for buying essentials items (women);Water Purifier (both men and women); Soap (washing and bathing); Disinfectant Liquid (both men and women); Mosquito repellent (both men and women) leh Hygiene kits (women) ti te le piakna a nei ui. IGSSS leh IRMA panlakna chu haksatna tuak te banah district administration - Relief Department, MLA ((Konthoujam AC), DC, SDO leh CBOs- Meira Paibi (Khabi) leh youth clubs of Khabi banahHeigrujam te’n pakchat thu a gen ui.