Nisin Thuhiltu - 24 July 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Parliament in President 13na, Pranab Mukherjee thâkna nei;
Parliament chu political vision hawitak ei pia tu a hi: Pranab Mukherjee

New Delhi, July 23 (Nisin Thuhiltu) : India a ding ah President 13 channa, President Pranab Mukherjee in zing leh Rashtrapati Bhavan nusia ta ding a hina ah tuni’n Parliament ah House 2 te a pat member te’n Parliament Central Hall ah a thâkna a nei ui. President Mukherjee in President hina tawh a thugen nunung penna a chun, Hall ah um zosia kiang ah kipak thu a gen a, Parliament chu ama siamdawk tu a hina ah le kipak thu a puang hi. Parliament House 2 te ah thu pawimaw tak tak genkhawm na a pat hiatbe tampi nei a hina ah Parliament chu a political vision lampi kawk mutu hi’n le a gen a, ama’n Parliament session chu kum 34 a hi kum, July 22, 1969 ah a la uap pan hi’n le a gen hi. A chiata kum 37 sung ah Rajya Sabha member ding ah 5 vei teltin ah a la um in Bengal a pat 4 vei leh Gujarat a pat 1 vei hi’n le puang hi. Chun, a thugenna a chun famta Indira Gandhi pang in Indian prime minister lui te geldawk a hi dan le puang kawm in Indira Gandhi puihuaina leh ziltilna nuai ah zia tiang tung hi’n le a gen hi. President Mukherjee in Goods & Services Tax (GST) regime chu ama president hun sung ah pat a hina chung ah kipakthu puangdawk kawm in GST pass a hi banah July 1 ah mat pat a hi chu Indian Parliament piting dan puangzâk tu hi’n a gen a, a langkhat lam ah Parliament ah vaihawmna hunbi kipia sung ah vaihawmna hawitak ah a chiathakna chu tawm hiai hiai a hi chu da uma sak thu le a puang hi. Minute 20 tuam thugenna a nei sung a chun, Prime Minister Narendra Modi tawh a kithua khawmna chung ua a umchan thiam dan leh a mi ngainatdan te chu hemil lo ding hi’n a gen a, President ding ah kitiamna a nei a pat a term, kum 5 sung chu India dâm bupi vengbittu hina chu ginum tak ah sem in PM Modi in le nasatak ah kithuapina pia hi a le gen kawm in zia gual ah ama thâkdawna sai leh uap MP te chung in kipakthu a puang hi. President thâkdawna hun a chun, Lok Sabha Speaker Sumitra Mahajan in President kiang ah MP te suaikaina lekhabu khat a pia, Rajya Sabha Chairman leh Vice-President Hamid Ansari in President Mukherjee career chung chang genna nei in mi ettawn tâk mama khat hi’n a gen hi. President thâkna’n Prime Minister Narendra Modi in zani’n Hyderabad House, New Delhi ah farewell dinner khat a la bawl in president ding ah teltin thak a um Ram Nath Kovind, Vice-President Hamid Ansari, Bihar chief minister Nitish Kumar, senior minister leh Opposition leader hunkhawp te’n le a uap u’i. Chun, Armed Force te ah Supreme Commander le hi, President chu armed force te ah chief te’n le a thâkna a la nei u’i. President Mukherjee in zing (July 24) nitak lam dak 7:30 leh gamsung mipi te kiang ah farewell speech genna nei ding a hia, President thak ding, Kovind in a hileh Sepkitni (July 25) leh Indian President 14na ding ah kitiamna nei ding a hi.

Awareness hun ding chawn
Lamka, July 23 (Nisin Thuhiltu): Lamka Traders and Self Employee Association (LATSEA) in a kisaipi department tawh kithua ah St. Paul’s Institute ah July 23, 2017 leh Goods and Services Tax (GST) tawh kisai ah awareness campaign nei ding ah guanggalna a nei chu a lemchangzaw ding gelna July 30, 2017 zawk ah um ding ah a hun chawn in a um hi. A hun ding chawn ah um maleh guanggalna dang a kisang umlo in a kigen a, a pang nuam te’n July 30, 2017 sun dak 12:00 a pat dak 1:00 kikal ah registration bawl thei ding a hiu.

Capping, Lamp Lighting & Oath Taking Ceremony
Lamka, July 23: CMO office kiangnai ah um Multi-Purpose Hall, General Nursing and Midwifery (GNM) Training School ah July 25, 2017 zingkal lam dak 10:00 leh 1st year (1st Batch) GNM student te ding ah Capping, Lamp Lighting & Oath Taking Ceremony um ding a hi. Zia hun chu Shyam Lal Poonia, IAS, DC/CCpur in Chief Guest hina tawh uap ding a hia, Rakesh Balwal, IPS, SP/CCpur in Guest of Honour hina tawh uap ding leh Dr. Kimngaihching Simte, CMO in Chief Host hina tawh uap ding a hi. Chun, Dr. J. Son Goukham Samte, Med. Supdt. Dist. Hospital in Functional President hina tawh uap ding a hi. Nursing Supdt. & Nursing Sisters, Dist. Hospital te mapuina Capping & Lamp Lighting um ding a hia, Principal, GNM Training School in student te kitiamsakn nei ding a hi.

Bike leh Bolero kiphutua, bike hektu liam

Lamka, July 23 (Nisin Thuhiltu): Tuibong Forest Gate thang, Kamdou Veng lutsukna bul ah tuni nitaklam dak 5:30 tuam in Bike leh Bolero kiphukha in Biak hektu’n liamna a tuak hi. Bike tawltu chu Tourbung Bangla lam a pat kipan YAMAHA R-15 (Registration Number MN02B 5480) hattak ah tai hin a kigen a, Kamdou Veng a lutsuk ding Bolero (Registration No. MN05 2190) tawh kiphukha a hiu. Mit a mute gendan in bike hattak a tai in Bolero a phutkhak hun ah Bike hektu leeng (fly) pek ah Pan Dukan chung sena kinei hin a gen ua, zia chu Bolero hektu leh a a lawiten va la dawk uh hin a gen ui. A langkhatlam ah Bolero ah chuang te chu te chu liamna tuak umlo ua hiat a hia, Bike hektu’n Helmet a khukhak ziak ah liamna tuak maleh etkawl thei ding ah um in le a kigen hi. Police in zia accident na tawh kisai a chu panla’n Bike leh Bolero chu a kawl ui.

Moreh ah numei chapang khat kaplum ah um

Moreh, July 23 (Nisin Thuhiltu): Gilgal Khul, Moreh Gate Number 1 ah um, Mount Moreh Public School, Cannan Veng, Moreh W/No.7 ah Class IX simlai, a min Nengneingah Khongsai (15), d/o Letthang Khongsai of Thingphai Village chu tuzingkal dak 5:00 tuam ah a umna room sung ah kaplup in a um hi. A kaplumtu chu Sasat Haokip (21) s/o Thanglet Haokip of Chavangphai Village, Moreh hin a kigen a, police te’n man dawk ngal un a kigen hi. A kigendan in zingkal matak ah meithal git a hiat uh tawh kitawn ha a insungmi te’n a room sung a va et ua leh Nengneingah chu meithal ah kaplup sa mudawk un a kigen a, mi kaplumtu chu insung a pat a zamdaw nung ah a kiangnai tuam ah inn khat ah a kiselna Moreh police station a OC, H. Chaoba leh J. Baite mapuina Police team in va man dawk ua hiat a hi. Mi kaplumtu a pat chu 9 mm pistol khat leh meichang kapdaw nailo chang 3 a mudawk ui. Nengneingah chu a chalpâng tak pistol ah kap ah um a hia, a insungmite gendan ah nungak tangval thu ah ziagual kithana chu piang hiding in a muang ui. A langkhatlam ah zia kithana ziak a chun, mipi kipunkhawm te’n mi kaplumtu piakdaw ding phut in kiphinna a nei ua, Moreh police station a butlu bak un, Imphal ah mi kaplumtu a puang ding uh le lamtin in pólice te tawh mipi te kal in kinawktuana a piang hial hi. Sasat Haokip chu Kuki National Army, KNA cadre khat hin le a kigen a, zia ah mipi te kiphinna ziak a chun Moreh ah dukan te khak in a um vek hi. Thiltung tawh kisai ah Khongsai Inpi inntekna nuai ah khulkhial te leh thina tuak te'n tuni ma in kiholem na a nei u'i.
NT 24july2017b

MPCC President,TN Haokip in hilchianna bawl

Lamka, July 23 (Nisin Thuhiltu): Manipur Pradesh Congress Committee (MPCC) President,TN Haokip in BJP zawm a hidan taklang kawm ah a lim ( photo) thezak ah a um nung in tuni’n Congress Bhavan ah press conference ko in MPCC President, TN Haokip in hilchianna a bawl a, ziagual ah diklo tak ah thuzuau leh a photo thezak ah a um chu ngaithiamlo a hidan taklang kawm in legal action lakna ding ah panlakna nei ding hin a gen hi. Mimal hina chu zawk (sale) lumlet thei hilo in MPCC president in a gen hi. A langkhatlam ah Face Book ah a lim takdawktu Media co-ordinator to Chief Minister, Manipur L.Bashanta Sharma in Billboard ah TN Haokip’s photo chuansak ah a um chu bawl khiak khak a hidan gen in ngaidam a dawn a, Billboard siamtu Sharma Enterprises neitu’n le zikthaw in ngaidam a dawn hi. TN Haokip in a genbelapna a chun, rape case ah thiamlo chan ah um te ngaidam ziang thei a hilo gual ua, sorry ti mai tawh diklo tak ah a lim kitakdawna kichai sak ziang hitheilo ding hin a gen a, zia gual thil chun ama mimal bep suminsialo ah party min le suminsia hin a gen hi. Court of law a ah thil umdan tut ding leh cybercrime department ah case ziklut ding a hidan a gen bawk hi. Social media ah a taklatna khat a chun, zia gual photo kisiam leh kitakdawk chu BJP political propaganda hin ngawna a siam a, Speaker a hi hun ah Sum tamtak tawh BJP zawm ding ah zawl himaleh BJP a la zawmlo a hidan gen in, propaganda thezak ah a um chu khawk a sak thu gen in MPCC chu BJP gual hilo in a gen hi. Chuleh, a dam sung ah MPCC member hizing ding a hidan le gen in Sharma Enterprises, Wangkhei Pukhrambam Leirak hilchianna chu pawmlo hin a gen hi. Chuleh BJP a um sawt laisia Indian society sia deu deu ding leh Manipur society le chawk buai zing in a gen hi. Zia press conference chu N. Loken Singh, MLA Nambol, VP MPCC leh K. Ranjit Singh, MLA Sugnu, Treasurer MPCC, Former Speaker Th. Lokeshwar te’n le a uap ui.
NT 24july2017c

ZILlai GHQ in nasatak ah demna bawl
Lamka, July 23 (Nisin Thuhiltu): Zillai (Vaiphei Students’ Association) General Headquarters in Gilgan Khul, Moreh Gate Number 1 ah Mount Moreh Public School, Cannan Veng, Moreh W/No.7 ah Class IX simlai Nengneingah Khongsai (15), d/o Letthang Khongsai of Thingphai Village melsia tak mai ah kaplup ah a um chu nasatak in demna a bawl a, state sung ah student community te chung ah huham tak ah gamtatna uang thak mama a hidan taklang kawm in kithana chu humanistic leh Christian values suasalna khat hin a taklang hi. Zia gual thil chu tunung ah a tunkitlo ding dawi hin le a gen a, a kisaipi thuneitu te’n thil umdan kituptak ah khualchilna a nei ua, tualthat tu chung ah gawtna khautak a piak ding dawi hin le a taklang bawk hi. Chuleh, thina tuak insungmi te le thawkpi a hidan Mr Khailalpiak Vaiphei, Secretary Information and publicity, Zillai General Headquarters in thusua a bawlna a chun a taklang hi.

HSO president kithana chung ah KIM in hapta khat sung huntiam suksaube
Lamka, July 23 (Nisin Thuhiltu): Kuki Inpi Manipur in state DGP dawtna dungzui in HSO president kithana kigawlkha zosia matdaw ding ah huntiam a piak chu hapta 1 sung extend a bawl hi. Information & Publicity Department, Kuki Inpi Manipur in tuni thusua a bawlna a chun DGP in ama mimal tak ah hapta khat sung ah tualthana kigawl khate matdaw hidding leh a case sukfel hiding ah dawtna a siam ziak ah hapta 1 sung KIM in meeting a nei hun ah Police Department chu hun piakbelap ding ah lemsak nei hin a taklang hi. Chuleh, social Media ah thuchian hilo, ginchat thu taklat ah um te thulak ah neilo ding in Kuki Inpi Manipur in mipi te chialna a bawl hi.

State Govt. in road safety policy thak pawdawk paita ding

Imphal, July 23 (Nisin Thuhiltu): Manipur Chief Minister Nongthombam Biren Singh mapuina State Level Road Safety Council (SLRC) meeting hun ah State government in a vaima theipen ah road safety policy a puakdaw ding in lemsakna a um a, state government in traffic rule zui diklo mat ah um te liausakna a pat sum kimu te road safety policy chiapina mat ding in lemsakna a nei hi. Finance department in traffic rules zui diklo ah mat ah um te a pat sum kimu te chu release a bawl ding in le lemsakna a um a, Finance dept. funding lam tawh kisai ah panlakna a nei ding ah lemsak in le a um hi. Director Transport by transfer/ deputation nuai ah line department a pat pool oficial ding siamdaw ding ah le lemsakna um ah taklat in a um a, State Level Road Safety Council nuai ah monitoring Cell le siamdaw ding in lemsakna a um hi. Chun, SP CID chu fake driving licence investigation tawh kisai ah interim report pelut ding ah hiatsak in a um a, traffic chawk buai thei sakawl te dinmun etzui ding dan le genkhawm in a um hi. Commissioner YAS in meeting hun ah sakawl te umna ding ah Heingang chu mun lemchang pen hiding in a gen hi. Zia State Level Road Safety Council chu M. Lakshmikumar Singh, Commissioner (transport), Govt. of Manipur leh top ranking government oficial tamtak in le a uap ui.

Chief Minister's Relief Fund ding ah dónate bawl
Imphal, July 23 (Nisin Thuhiltu): Chief Minister's Relief Fund ding ah donation lut zing in, tuni’n le All Manipur Petroleum Products Transporters' Association leh Meetei Council, Moreh te’n Chief Minister khut in Rs. 1 lakh leh Rs. 50,000 piakdawna a nei ua, Khaidem Nongthrei of Kairang Mamang Leikai in le Rs. 10,000 donate a bawl hi. Zia ah sum dónate kibawl te chu state sung ah tuilet ziak ah haksatna tuak te kithuapina ah mat hiding a hi.

Education Minister in Heirok Higher Secondary School dinmun entha

Imphal July 23 (Nisin Thuhiltu): Manipur Education Minister Th. Radheshyam in tuni’n Heirok Higher Secondary School, Heirok infrastructure leh a kiangnai tuam ah thil umdan te et-thakna a nei a, classroom leh a kisa zinglai kitchen leh a kisiam zing school playground dinmun te le etthakna a nei hi. Educational institution te siamhawina ding government in panlakna a nei zingna chung ah school vena a nei hin a kigen hi. School etthakna a nei hun ah window sia, kawtkhak sia, tuang (floors) sia leh gua (rain) a zuk hun ah gawtui vathei ti te a mudawna chung ah Education Minister in kituptak ah school te etkawl thak ding pawimaw in a gen a, siamphat hisek maleh etkawl hawi a hilo ziak ah school infrastructure hawitak tak theilo hin a gen hi. School etthakna a nei zaw ah Labour & Employment portfolio le tuk Minister Th. Radheshyam in library hawnna nei in meritorious student te kiang in award piakdawna a nei a, hawn thak ah um library chu mitamtak in a phatchuampi ding uh kinem a hidan gen in, library ah kikawi lekhabu te chu a pha chuamtheipen ah mat ding dawi a hidan a gen hi. Chun, meritorious students te kiang ah award hawp ah um sek chu oganisation ahiloleh leh institute chuam chuam kigawm khawm ah hawp hisek leh lawting diak ding ah ginchatna nei in a gen hi. Prime Minister Modi in panlakkhawmna a pat khantona ‘Sabka Saath Sabka Vikas’ ti a tangko dungzui ah khantona hawitak a um theina ding ah panlak khawmna pawimaw hin a gen a, student lekha thiamlo pen te a thiampen a hitheina ding ua panlakkhawm ding pawimaw in a gen hi. Numei te dinmun dawpkang theina ding ah panla ding hin le a gen hi. Zia function chu All Heirok Students Welfare Association (AHSWA) organized bawl a hia, 4th Foundation Day Celebration tawh thua a hi. Hun matna chu DC Thoubal L. Nabakumar leh mi pawimaw hunkhawp ten le a uap ui.

Mary Kom in a chung ah ngawna pawmlo

Imphal July 23 (Nisin Thuhiltu): Olympic bronze-medallist leh five-time world champion M C Mary Kom in pawsal boxers - Shiva Thapa leh Manoj Kumar te national observers meeting hun ah kilawmlo tak ah ho ah ngawna um chu Mary Kom in pawmlo a hidan tuni’n a gen a, kilawmlo tak ah kampau mangkhalo in a gen hi. Shiva Thapa chu “Target Olympic Podium (TOP) scheme mu ding te lak a pat paithak ding, kum over hita a hi” ti ah kampau kilawmlo tak in Mary Kom in a hina kibatpi bóxer te a ho hi ti ah ngawna um a hi.

Mizo boxer Laldinmawia in champion la

Aizawl, July 23 (Nisin Thuhiltu): 21st International Boxing Simon Tretsin Memorial Tournament Elite (Senior) men, Odessa Ukraine mun ah 17th - 23rd July 2017 hun ah nei ah chun zani khan Mizoram apat Tuipui boxer Laldinmawia chun Fly weight (52kg) ah a zintuntu, Ukraine boxer chu zo in hatpen hina a chang hi. Laldinmawia hih a naupang lai apat boxing lunglut mama in Mizoram SAI (Sports Authority of India) ah lutin, Coach Vulthavunga apat hung zildawk hiin gen a hi. Chun a kigen zel dan ah chun boxing a thiam jiakin Army ah lutin tuhin Signal Regiment 1 STC Jabalpur Madhya Pradesh ah a sep laitak a hi. Laldinmawia hin a maban ah le a bawl hawi to zel a hi chun Olympic ah Mizoram min sulang dingtu hung hithei dinga gingchak a hi.

Laldinmawia hin national level ah sulnung a la nei tak te chu:
1) 23th Subjunior (men) national boxing championship 2008 Feb. Assam (Golagat) Gold medal
2) 24th Subjunior (men) national boxing championship 2008 Dec. Sikkim (Gangtok) Gold medal
3) 25th Subjunior & junior (men) National boxing championship 2009 Aurangabad, Gold medal
4) 1st Subjunior (men) national boxing championship 2010 Kolkata (West Bengal) Silver medal
5) 27th Junior (men) national boxing championship 2011 Pune (Maharastra) Gold medal & Best Boxer
6) XXIV North East games 2012 Aizawl, Gold medal
7) 4th Junior &subjunior (men) National boxing championship 2012 Akola, Gold medal.