Nisin Thuhiltu - 21 July 2017

User Rating: 0 / 5

Star InactiveStar InactiveStar InactiveStar InactiveStar Inactive
 

STATE ASSEMBLY SESSION KIPAN
FINANCE MINISTER IN 2017-18 A DING BUDGET ESTIMATE LUIDAWNA NEI

Imphal, July 20 (Nisin Thuhiltu): Ni 13 sung um din 11th Manipur State Legislative Assembly, Budget session tuni’n a kipan a, Finance Minister mawpuakna le tuk Deputy Chief Minister Yumnam Joykumar in kum 2017-18 sung a ding estimated fiscal deficit Rs. 851.41 crore tawh Budget Estimate Rs. 12,510.61 crore luidawna a nei hi. Budget ki luidawk dungzui ah revenue receipt estimate Rs 11096.25 crore leh Capital receipts Rs 1414.36 Crore ah bithiat in a um hi. State’s own tax leh non-tax receipts, total estimates Rs 831.86 Crore leh Rs 245.51 Crore ah bithiat in a um a, State Central Taxes & Duties receipt estimate Rs 4168.45 Crore ah bithiat a hi. Tu fiscal year ah total Consolidated Fund a pat total expenditure Rs 12420.65 Crore ah bithiat in a um a, zia a pat chu Revenue account ah Rs 9952.35 Crore leh Capital account ah Rs 2468.30 Crore umsak a hi. Total expenditure lak ah Rs 961.31Crore chu Charged expenditure ah kawi in a um a, a dang Rs 11459.34 Crore chu Voted expenditure ah kawi a hi. PMGSY-Pradhan Mantri Gram Sadak Yojana scheme nuai ah Central share Rs 447.00 Crore leh State Matching Share for maintenance of PMGSY roads ding ah Rs 10.00 Crore bithiat in a um a, Public Works, Civil Secretariat a ding ah Rs 10.00 Crore chu bithiat in a um hi. Disrict kisiam dawk thak 7 te infrastructure siamhawina ding ah Rs 19.00 Crore, (Kakcing, Kamjong, Noney Rs 5.00 Crore chiat, Tengnoupal, Kangpokpi, Pherzawl, Jiribam Rs 1.00 Crore chiat ) bithiat a hi. One Time Special Assistance of Central Plan Scheme nuai ah anti-erosion leh Flood Control a ding ah Rs 7.50 Crore bithiat in a um a, liabilities management leh flash flood control a ding ah Rs 10.00 Crore bithiat a hi. Centrally Sponsored Scheme for Swachh Bharat Mission (Gramin) nuai ah Rs 68.00 Crore chu Central Share ding ah bithiat in a um a, Rs 28.00 Crore chu National Rural Drinking Water Programme a ding ah bithiat a hi. Manipur State Transport restoration/establishment a ding ah Rs 5.00 Crore bithiat in a um a, Manipur ah Start Up Policy implementation a ding ah Rs 30.00 Crore bithiat a hi. Ukhrul, Chandel, Tamenglong, Churachandpur, Senapati, Kangpokpi, Jiribam ah Women Markets sakna ding ah Rs 35.00 Crore bithiat in a um a, One Time Special Assistance of Central Plan Scheme nuai ah Rs 5.00 Crore bithiat a hi. Tourism sector a ding ah Rs 16.00 Crore bithiat in a um a, Shirui, Ukhrul ah Integrated Tourist Destination sakna ding Rs 2.50 Crore bithiat a hi. School Education a ding ah Rs 10.00 Crore bithiat in a um a, 50% total project cost chu Districts 5 ah Model schools siam mat ding (Rs 4.00 Crore chiat One Time Special Assistance of Central Plan Scheme nuai ah kawi a hi. SCERT a ding ah Rs 15.22 Crore bithiat in a um a, zia chu Educational Development - teachers training te huap sak a hi. Khuman Lampak Sports Complex repairing renovation a ding ah Rs 4.20 Crore bithiat in a um a, zia chu Academic Session, 2017-18 ah National Sports University ah calss kipatna ding le huapsak a hi. One Time Special Assistance of Central Plan Scheme nuai ah Rs 20.00 Crore chu Khuman Lampak Sports Complex leh Luwangshangbam Cricket Stadium ah flood lighting kawina ding ah bithiat a hi. JNIMS ah supply, Installation & commissioning of new medical gas pipeline system (Oxygen & Nitrogen gas pipeline) a ding ah Rs 1.46 Crore bithiat in a um a, One Time Special Assistance of Central plan Scheme nuai ah Ukhrul District hospital ah 50 100 bedded kawina ding ah Rs 2.50 Crore bithiat a hi. Smart City project a ding ah Rs 16.44 Crore bithiat in a um a, Linling in a suksiat Ima Markets siamhawithakna ding ah Rs 21.98 Crore bithiat a hi. Pradhan Mantri Kaushal Vikas Yojana nuai ah Manipur Skill development Mission a ding in Rs 24.99 Crore bithiat in a um a, zia lak a chu Skill Development Training programme a ding ah Rs 2.00 Crore bithiat a hi. Chun, Manipur State Journalists Welfare Scheme a ding ah Rs 10.00 crore bithiat in a um hi.

HOSPITAL HUANGSUNG AH ATM BOOTH HAWNNA NEI
Lamka, July 20 (Nisin Thuhiltu): District hospital ah damlo umte banah ki etsak ding te khualna ziak ah Medical Superintendent, District Hospital leh United Bank of India (UBI) panlakna’ District Hospital huangsung ah ATM Booth kibawl chu mipi mat thei ding ah zawthiang a hi tawh kitawn in tuni sunnung in a hawnna nei a hi. Zia hun a chun, Dr Songokham Samte, Medical Superintendent, Dr T Nengkhanmang, Deputy Medical Superintendent, Dr Thangchinkhup Guite, District Hospital Consultant leh Hospital staff te banah UBI a pat Manager, Yengkhom Ibochou Singh; Deputy Manager, Hauchinmang leh Mangkhum, Dhruva Jyoti Das leh Laishram Suraj Kumar te’n a uap ui. Khaipao Haokip, Chairman, ADC CCpur in mipi mat ding in UBI ATM Booth hawnna a nei a, ATM Machine mat patna ding ah UBI official khat in sum a la dawk ngal hi. Khaipao Haokip in a thugenna a chun, Hospital huangsung ah UBI ATM booth um thei na ding ah panla te kipakpi mama a hi dan a puang a, hospital a um damlo banah ki etsak ding sum kidailo te a ding ah bailam tak ah sum lakdaw thei na ding ah panla, Medical Superintendent team leh United Bank of India UBI team te chung in kipak thu a gen hi. Yengkhom Ibochou Singh, Manager, UBI in a genna a chun, kuamasap in ATM a mat ding dan gual tak ah mang ding in mipi te a chial a, ATM machine ah sum umlo hun a le swap machine ah ATM card tilo card dang himhim thun lo ding ban ah ATM Booth chu mani a gual ah ngai ah hawitak ah enkawl chiat ding in le chialna a bawl hi. Tulai khawvel ah sum dawina lian mama in diklotak ah electronic vanmat chuam chuam tawh kithua ah sum kiguk piak ti te a kithang mama leh zia ding ah them ding ah kipei pawl a um ziak in ATM machine a sum ladawk ding te’n midang kuama sawl lo ah mani a chiat ladawk ding banah mani ATM PIN chu midang te hilsawnlo ding leh pilvang chiat ding in a dawn hi. ATM Machine kawina ding bawlna a hileh ningkum September ah nasep pat hita in 2016 sung ah mat thei ding ah bawldaw ding ti himaleh 3 Bills ziak ah buaina a um banah National Highway 2 te ah hun tiam umlo Economic Blockade a um ziak in dawi gual ah nasep a châl pua, Blockade hon a hi tawh kitawn in nasep sutzawp a um in tuni’n mipi matthei ding ah hawn a hi.

DC IN SCHOOL SURPRISE VISIT BAWL
Lamka, July 20 (Nisin Thuhiltu): Shyam Lal Poonia, IAS, DC Churachandpur in tuni sunnung in Vimala Raina Government High School surprise visit bawl in thil umdan tawh kisai School Management Committee member te tawh zing leh genkhawm thak ding ti’n a vaithak hi. District Level Officer (DLO) meeting hun ah thupukna dungzui in, DLO khat in Government School khat a etkâi ding leh a school khanto nading ah pan a lak ding ti a hia, DC in Vimala Raina Government High School a changkhak zia tawh kitawn in tuni’n a khatvei nading ah Surprise Visit a bawl a hia, zia hun a chun School Compound ah lut in Class V room ah student te tawh hun a mang masapen hi. Class V student te chu numei leh pawsal, Group A leh B ah khen in General Knowledge, Mathematics leh Spelling kidemnaa neisak hi. Zia zaw a chun Mid-day Meal kitchen a lut in government a pat vanmat a dawng teu a entha’i. Chun, classroom zosia a le lut in government a pat fund chuam chuam mang ah kibawl School Building Block chuam chuam te le a entha, toilet leh school gamgi hawitak ah a etthak zaw in Headmaster room ah lut in form fill-up ding khat pia’i. DC in surprise visit a bawl hun school infrastructure chuam chuam hawitak ah a etthâk ban in a thawn ah hawp ding ah kipia textbook, school uniform leh a dangdang hawitak ah hawp a hi nam ti te a kanchian hi. School etthâkna a nei hun a chun, Shyam Lal in Toilet kitup umlo, school huangsung ah thaichi kichîng banah a chiata kum 5/6 tuam ah kibawl pan school building dinmun lamdang sa a hi dan mit ah et mai a le muthei a hi banah classroom tamzaw a tuang cement kawk ta leh a chung a pat guatui vâ tite mudawk a hi dan Headmaster kiang ah gen kawm in school in a pawimawte leh tâksap te hiatsak ding in le a hil hi. Chun, school dinmun tawh kisai ah School Management Committee member te kokhawm in zing zingkal lam dak 9:30 leh school ah genkhawm hiding hi’n Headmaster a hiatsak ah, a chia kuan in School gamgi entha malam in hawitak ah teptena bawl ding in a vaithak hi. Vimala Raina Government High School ah tu dinmun in Teaching Staff 32, Non Teaching 6 leh a chuam ah Mid-day Meal huantu mi 6 a um ua, tu Academic Session ah Student 724 um in November 5, 2016 a pat Thanglienlal C. Thangjom in Headmaster mawpuakna a la’i.

TRAFFIC TAWH KISAI MEETING NEI
Lamka, July 20 (Nisin Thuhiltu): Rakesh Balwal, IPS, SP CCpur dawina gual in SP Conference Room, SP Office Tuibong ah tuni’n traffic tawh kisai gen khawmna a um a, zia hun a chun P Neihsial OC, Traffic Control Police (TCP) banah Churachandpur ah Auto Rickshaw Association, a pat palaite a pang u’i. Meeting hun ah District Magistrate in passenger pua a tai diesel auto te a ding ah zani thusua a bawl tawh kisai hun chawmkhat genkhawm a hi zaw in passenger pua a tai diesel auto te’n passenger te auto changlam pang ah a kum leh kal theilo na ding ua khak ding leh zia chu July 31 tiang ah sep piting ding ti’n a thupuk u’i. Chun, lampi dung ah stop point leh pick up point te kiang bep ah passenger la/kumsak ding, lampi ut na mun mun ah passenger laklo ding in le a thupuk ua, zia ding a chun Police, Transport leh District Administration in July tha sung ah stop/pick up point mun ding a siam ding ban un diesel auto mâi veilam pang leh auto nung lam ah Route number a tak chiat ding un le lemsakna a nei u’i. Zia lo chun, Red Cross road ah one way traffic a um theina ding ah TCP in etthâkna a nei ah a kisaipi thuneitu te kiang ah report bangkim a piak ding banah CCPur Distt Auto association in OC, TCP kiang ah July tha sung ngei ah Auto rickshaw neitu/ driver te detail, Muster roll kimtak ah piak lut ding ti’n le a thupuk u’i.
NT 21july2017b

TOWN PLANING PAWIMAW
Lamka, July 20 (Nisin Thuhiltu): Tulai chûktui luan hun a hi tawh kitawn in tuni sun ah gua zuk ziak in khawpi sung ah nullah tamzaw luanglêt in lamlian lai ah nullah tui a luang a, guazuk a theu tawh kitawn in lamlian ah buanthuak a tam mama hi. Gua chu hun chawmcha bep zu himaleh nullah luanglêt ziak a chun ning tin ah nîn kipai te chu lamlian lai ah tawkdawk in keng a chiate leh gari a tai te a ding in a buai um mama bep hilo in ningsiat a um mama mai hi. Khawpi khangto in mihing leh gari banah nîn kibelap zing a hina ah khawpi sung plan hawitak ah bawl a ngai a, guazuk hun ah Town Planing hawitak ah umlo a hi dan a kilang diak hi.

VAWKNO GU KHAT KIMAN
Lamka, July 20 (Nisin Thuhiltu): Young Paite Association (YPA) V Munhoih Unit in tuni zingkal in vengsung ah vawkno gu khat a mandawk hi. Mat a um vawkno gu a hileh Pauminthang (35) s/o Zelzamching of Tuibul, Saikot Sub-Division a hia, vawkno chu tuni zingkal dak 4:30 tuam ah V.Munhoih a a pat a gukdaw a hi hiat himaleh khawsung a nutsia man ziak in YPA V. Munhoih Unit in delzui in New Bazar ah malcha zuakna bûk sawngchung ah mandaw in a um hi. Ama kipuang dan in Number 4 hi zawngsak a hia, van chuamchuam a gukte man tawm tak ah zuak sek a hi banah a lawipa Lalboi of Mata Mualtam tawh kizui in veng chuam chuam ah van gu sek uh hi’n a kigen hi. YPA V. Munhoih Unit in thuhilna hawitak ah a neizaw in Police khut ah piakdaw a hi.

ASHA TE TRAINING ZAWTHIAN HITA
Lamka, July 20 (Nisin Thuhiltu): District Malaria Officer, Churachandpur saina’n CMO Mini Conference Hall, CMO Complex ah ‘Second Phase ASHA Training on Malarialogy’ chu tuni’n Henglep Primary Health Centre (PHC) nuai ah ASHA Worker te’n a neizaw uh tawh kitawn in zawthian a hi. Henglep PHC ah a hileh ASHA Worker 77 um in Group 2 in a kikhen ua, Group khat chu Themhat Haokip leh Kimmy te’n Facilitator hina tawh enkâi in training a la zo tau a, ASHA Facilitator Kim Irene leh K. Esther te nuai ah ASHA Worker 28 in tuni’n training a zaw uh tawh kitawn ah Second Phase ASHA Training on Malarialogy zawthiang a hi tai. Training hun sung ah Dr. Jamthianlal, DMO Churachadpur, Gopal Kishore, IEC (C), State Consultant leh S. Thangthianmuan, District Consultant, NVBDCP, Churachandpur te ziltiltu in a pang ua, Block sung ah ASHA Facilitator te’n kithuapi in Slide mang ah thisan lak ding dan leh a dang dang a ziltil u’i.

MAHIDOL UNIVERSITY,THAILAND DELEGATION TEAM IN CHIEF MINISTER KIMUPI

Imphal, July 20 (Nisin Thuhiltu): Mahidol University,Thailand a pat delegation team in tuni’n Chief Minister N. Biren Singh kimupi in Chief Minister’s Secretariat ah Northeast India leh Manipur ah tourism sector dinmun tawh kisai genkhawmna a nei ui. Delegation team member te chu Prof. Sophana Srichampa, Chair, Center for Bharat Studies, Mahidol University in amapui hi. Prof. Sophana Srichampa in Manipur chu healthcare leh medical tourism munpi khat hithei ding in a gen a northeast India leh a kinaipi Myanmar banah Southeast Asia ding ah Manipur chu gateway pawimaw tak a hidan gen in Northeast India lampi siamhawi hileh ASEAN gam te tawh kitawmtua kituptak um thei ding leh tourism lam masawn mama ding ah ginchatna nei hin a gen hi. Zia hun chu Minister for Forest and Enviroment Th. Shyamkumar, Chief Secretary R.R. Rashmi leh Advisor to CM Rajat Sethi te’n le a uap ui.

GOVERNOR DR. HEPTULLA IN LEKHABU THAK HAWNG

Imphal, July 20 (Nisin Thuhiltu): Sahitya Bhushan awardee Dr. Ch. Jamini Devi in Nepal a phakna based ah a zik, Shree Shree Govinda Raseswari Pala Marup in published a bawl “Lumbini Leikolda Sathouba Leirang” kiti lekhabu hawnna Raj Bhavan Darbar Hall, Imphal ah tuni’n a um a, Manipur Governor Dr. Najma A Heptulla in Chief Guest hina tawh hun matna uap in lekhabu hawnna a nei hi. Padmashree awardee R.K Jhalajit leh Sahitya Akademi Award dawng - Prof. Jodhachandra Sanasam te’n zia hun matna chu function president leh guest of honour hina tawh a uap ui.

CHIEF MINISTER’S RELIEF FUND DING AH DONATION

Imphal, July 20 (Nisin Thuhiltu): Manipur state sung ah tuilet ziak ah haksatna tuak te kithuapina ding ah institute, organization leh pawl chuam chuam te banah mimal mipha chuam ngai te’n sum donate a bawl zing uh tawh kitawn in tuni’n Chief Minister’s Relief Fund ding in Forest Department, Government of Manipur in Rs. 6,44,764 donate a bawl ua, Minister for Forest and Environment, Th. Shyamkumar in Chief Minister N. Biren Singh khut in cheque piakdawna a nei hi. Chun, Work-Charge Employees of Public Health Engineering Department (PHED) leh MCS Officers of 2012 batch (direct recruit) pawl in Rs. 1 lakh chiat Chief Minister’s Relief Fund (CMRF) ding in donate a bawl ua, online transactions ah donate bawl pawl le um ah taklat in a um a, July 14 a pat tuni tiang ah online donations ah Rs. 26,601 lutzo ta hin a kigen hi.