Nisin Thuhiltu - 16 July 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Welfare Schemes zosia kituptak ah et-thak hiding : CM

Third People’s Day (Meeyamgi Numit) ah complaint 800 ziklut ah um

Imphal, July 15 (Nisin Thuhiltu) : Chief Minister Secretariat, Imphal ah tuni’n People’s Day (Meeyamgi Numit) a hi tawh kitawn in Chief Minister N. Biren Singh in ama kimupi nuam mi 3000 tuam, zingkal lam dak 8:30 a pat nitak lam dak 5:30 tiang in a kimupi hi. Zia hun a chun mipi te’n Chief Minister N. Biren Singh kiang in a haksatnau a tut ua, complaints 800 ziklut in a um hi. Mipi te haksatna chuam chuam um te ngaithakna a neizaw nung ah Chief Minister N. Biren Singh in a thugenna a chun, mipi te tawh holim khawmna a pat society umdan leh mipi te khawsak dan hethiam thei a hidan genkawm in, state sung ah pian-bukimlo te, meithai te leh teksia te’n haksatna a tuak uh chu ngaikhawk mama hin a gen a, zia gual haksatna um te chu a sukven theina ding lampi government in ngaitua ding hin a gen hi. State government thak thil dawi chu infrastructure development leh lampi siam etc ding mai hilo, state sung ah panpi ngai leh haksatna tuak te theitawpsua kithuapi ding hi’n a gen hi. Government welfare schemes leh programmes chuam chuam in gasua hawitak a nei theina ding ah panlakna a thak tak ah a um ding pawimaw in le a gen a, government in welfare schemes umsa te dinmun et-thakna nei ding leh a phatchuampi ding dawl in a phatchuampi theina ding ua panlak hiding in thutiam a bawl hi. Micro level ah mipi te haksatna sukven a hitheina ding ah State Government in panlakna nei zing hin le Chief Minister in a gen a, Banks a diak ah Manipur State Co-operative Bank chu inchen haksa te kitodel theina ding leh Self Help Groups masawn theina ding ah bank loan peding ah chialna bawl in welfare scheme zosia chung ah agency leh beneficiary te kal ah gap a umlo ding pawimaw in a gen a, mipi te’n haksatna chi chuam chuam a tut teu a kisaipi Commissioners/Secretary te enzui ding leh a pawimaw dungzui ah panlakna nei ding ah zikthaw hiatsakna bawlta hin le a gen hi. Thuthak lakhawm mite kiang ah a genna a chun, Manipur ah fake encounter case umte khualna nei ding ah Supreme Court lemsakna a nei chu kipakpi hin a gen a, human rights za (respect) ahiloleh hinkhua kiti’n umzia neilo in le a gen a, government in human rights violation kiti nasatak ah dodal zing ding a hidan gen in, fake encounter case khualna tawh kisai ah government kithuapina a pawimaw dungzui ah peding hin a gen hi. Education, Labour and Employment Minister Th. Radheshyam in le tuni’n People’s Day (Meeyamgi Numit) a hi tawh kitawn in mi 300 tuam te a chenna Canchipur leh New Secretariat ah a office chamber in a kimupi a, Civil Society Organisation chuam chuam te’n memoranda piakna a nei ua, mitamzaw te haksatna tut chu thiamzilna lam ah haksatna chuam chuam um te leh Motbung High School ah infrastructure kituplo dan te tut in a um hi. Chuleh, hill district chuam chuam ah school kai chawlsan student a kibelap zingna tawh kisai le tut in a um a, labour smart card chungchang le haksatna tut ah um te lak in a pang hi.

Imphal West ah Swine Flu case mudaw ah um: Health Minister

Imphal, July 15 (Nisin Thuhiltu): Vok (pig) ah kipan natna Swine Flu kiti Pandemic Influenza A H1N1 natna case nei mi khat Imphal West ah mudaw in a um hi. Zia chu tawh kitawn in tuni’n Conference Hall, Old Secretariate, Imphal ah Health Minister L. Jayantakumar Singh in Press Conference ah thil umdan taklatna a nei a, ama’n thuthak lakhawm mite kiang ah a genna a chun, Shija Hospital, Langol ah damlo admit ah um mi khat chu 4th July 2017 ni ah Swine Flu natna nei a hidan test chuam chuam bawl ah a um nung ah confirm hin a gen a, zia natna chu dodalna ding ah state government panlakna nei a hidan taklang kawm in Health Department in panlakna chuam chuam a nei ziak ah Swine Flu case tamlo a hidan a gen hi. Manipur ah Swine Flu case kum 2015 ah mudaw ah um hin le a gen a, zia gual natna nei te ding a chu JNIMS leh RIMS ah Isolation Wards kawi ah um leh muanmaw ah um damlo khenkhat le zia Ward a chu kawi ah um hin a gen hi. Chuleh, zia gual natna chu enzui ding ah State Survilence team siamdaw ah um leh State Information Cell le hawn ah um hin a gen a, mipi te pilvang ding leh thianthona bak ah nek leh chaak ah kiveng ding ah chilna bawl in, health tips - thil nek ding kuan ah khut sawpthian zing ding, tui dawn tam ding, mi tamtak kikhawp khawmna panlo guat ham ding, imut hawi ding etc te zui gua chiat ding in chialna bawl hi. Zia Press Conference chu Health Services Director K. Lokendro Singh leh Health Department Officials te’n le a uap ui.

“KRAWS MELSIA" Album hawng

S Kawtlian, July 15 (Nisin Thuhiltu): S. Kawtlian Pastor Bial Lapawl te'n a siam uh Gospel Video Album "KRAWS MELSIA" _Vol - I_ kiti chu tuni’ July 15, 2017 nitaklam dak 1:00 in S. Kawtlian MPCS Biakinn thak mun ah Bialtu Pastor Thanglianlal, i/c S. Kawtlian Pastor Bial in a hawnna leh a latna a nei hi. Zia hun a chun, Album Director Upa Kaithian in Bial Lapawl chanchin chawmkim genna leh Album "Kraws Melsia" hung ki bawl daw dan genna a nei hi. S. Kawtlian Pastor Bial Lapawl hi May 2011 ah Rev. Rory Lalrinsanga leh Kamlalngai te mapuina, Bial Committee hiatpi a siam pat uh a hia, laa 11 um a hi. Hawn a hitak tawh kitawn ah Skylight Media, Red Cross Road leh mun chuam chuam ah Pathianni nitak lam a pat a dawi te’n muthei ding a hiu a, a man (price) ahileh Rs 150/- hiding a hi.
NT16july2017b

Lekhabu thak hawng

Lamka, July 15 (Nisin Thuhiltu): Hebron EBCC, Sunday School Hall ah tuni zingkal in “Evangelist Teacher (Late) PK Nengsong Khualzinna leh Laphuahte” kiti lekhabu hawnna leh latna nei in a um hi. Lekhabu ziktu K. Thangkhopau in lekhabu tawh kisai leh a pa PK Nengsong chanchin genlatna a nei a, lekhabu sung ah a pa’n Pathian nasepna ding ah kalsuanna a neite taklat a um hi’n a gen hi. Zia hun a chun (L) PK Nengsong panna’n, a innkuan ua thina tuak mi 9 sûnna a um a, Pastor H. Jamkhanpau, Local Pastor, EBCC Hebron in a sungkuanteu a ding ah pauchap piakna nei in Rev. S. Vung Minthang, General Secretary, EBC in lekhabu hawnna leh latna a nei hi. (L) PK Nengsong a hileh July 15, 1910 ah a la piang in a damsung kum 76 sung Pathian nasepna’ a mat nung ah July 6, 1986 a khan Gelzang khua’n a la mualliam hi.

NT16july2017c

(L) Thangjalang Memorial Award piakdawna nei

Lamka, July 15 (Nisin Thuhiltu): Singngat bialsung ah Central leh Manipur Board nuai a Class X leh Class XII ah lawtinna chang te kiang ah tuni’n Late Thangjalang Inn, Lailam veng ah a 5 veina Late Thangjalang Memorial Award piakdawna nei in a hia, zia hun chu Shyamlal Poonia, IAS DC CCpur, Rakesh Balwal, IPS, SP CCpur, Suanchinpau MDC Lungthul, Lalsangjual Joute, MCS, SDO Sangaikot Sub- Division, James Hangshing, MCS, SDO Singngat banah Singngat leh Sangaikot a pat hausa tamtak in a uap ua, Ginsuanhau Zou, MLA, Chairman MANIREDA banah DC, SP, MDC leh SDO te’n student te kiang ah award piakdawna a nei u’i. Bialtu MLA Ginsuanhau, Chairman MANIREDA in bialsung ah lekhasim nuam te khualna leh tilkhona ding ah kum 4 chiata a pat a pa Late Thangjalang hiat zingna ding ah Singngat bial sung ah 1na leh 2na te piak ding ah award chu a bawldaw hi’n a gen a, kumdang ah award tawh sum tamlo cha kizui sak sek himaleh tuchung ah nu leh pa dawn zangkhai thei ding ti ah kipakman Rs. 10,000 leh Rs. 5,000 hisak a um hi’n a gen hi. Student te’n tupgukna tawi lekha hawitak ah a sim ua Singngat bial a pat IAS, IPS, SDO ti te a hi guat ding uh leh a niam tawp ah SDC bek hi ding tup ding ah tilkho kawm in maban ah lawtinna a chang ding uh dawisak thu le a lân hi. A 5-veina Late Thangjalang Memorial Award dawng te chu - CBSE Class XII ah Carolyn Chingthianmawi d/o T Paominlian of Teikot Singngat in 90.6% mu in 1na leh Dongzahau s/o Ginzathan of Belpuan, Singngat in 84.2% mu in 2na a lâ, CBSE class X ah Chinzathang d/o Khamkhansuan of S Zezaw, Singngat in 83.6% mu in 1na a lâ, M Thangjalet Haokip s/o Thongkholal of Mongbung, Sangaikot in 74.1% mu in 2na a la’i. COHSEM Class XII ah Lhingneichong d/o Lamkhosei of T Vajang, Sangaikot in 75.8% tawh 1na la in Kimneinou d/o Khamminthang of Hq veng, Singngat in 73.6% tawh 2na a lâ, BSEM Class X ah Nianghoihching Manlou Zou d/o M Thangchinmang Zo of Hingtamjang in 80.16% mu in 1na a chang a, Lamneithem Baite d/o Otsei Baite of T Laloiphai, Sangaikot in 74.83% 2na a la’i.
NT16july2017d

People’s Day mang

Lamka, July 15 (Nisin Thuhiltu): Chief Minister N. Biren Singh mapui Manipur Government in thasin ni 15 chu Meeyamgi Numit (People’s Day) ding ah a puan tawh kitawn in tuni’n District sung a um Government Office chuam chuam ah mat a hi. SP Conference Hall ah DC leh SP Churachandpur mapuina’n Meeyamgi Numit matna um in zia hun a chun YPA New Lamka Block, ZMA Headquarter, HWA GHQ, KWU, HYA GHQ leh WWO palaite a pang ua, numei te’n anchang, gas, thautui haksat thu banah gucha leh khamthei tawh kisai genkhawm in ziate chu DC leh SP Churachandpur te’n etsui hi ding in a chiakhawm te a hiatsak u’i.

BSI Annual Conference kipan
Lamka, July 15 (Nisin Thuhiltu): Bible Society of India (BSI), Churachandpur Branch in EBCC Bethany, Zoar Veng, Bungmual ah ni 2 sung a nei ding Annual Conference 2017 chu tuni’n pat in a um hi. Conference a hileh Business Session ah pat a um in zia hun a chun December tha Pathianni masa chu ‘Bible Sunday’ a mat ding leh ziani thawlawm te chu BSI a sun ding in a chiakhawm te’n a thupuk ua, ningkum a pat kimang, Promotional Secretary Honorarium chu kum sin leh Rs. 500 a punsak ding banah 2017-2018 sung Budget ding in Rs. 17 Lakh a namdet u’i. Nitak biakna kikhawp hun ah Rev. Dr. SK Manlun, Assistant Secretary, BSI, Churachandpur Branch in Pathian thu a gen hi. Zing leh zingkal biakna kikhawp um ding in zia hun a chun Rev. V. Khamvum, Principal, GBC in Pathian thu genna nei a hia, Finance Report piak na le a um ding banah Award chuamchuam piakdawna um ding a hi.

Tuaksiatna ah nupi 1 thi, a chapa liam
Lamka, July 15 (Nisin Thuhiltu): Koite khua ah tuni sun in Activa khat leh TATA Magic khat kiphutua in Activa a chuang mi khat thi in mi dang khat in liamna a tuak hi. Thutut kimu dungzui in, Imphal lam manaw a tai Honda Activa (Registration Number MN05D-8988) leh Imphal lam a pat kipan TATA Magic (Registration Number MN06L-6260) te chu Koite khua ah kiphutua kha in Activa a chuang mi 2 te’n liamna a tuak ua, kintak ah District Hospital puaktun himaleu mi khat dam zolo in a mualliam hi. Thina tuak a hileh Activa nung a chuang, Lamkhotin Doungel (38) w/o Doulen of L. Semol a hia, Activa hektu, a chapa Lunkhosei (18) chu a lianglak liam hi’n a kigen hi. Lamkhotin a hileh a lu lak liam in Casualty kihawnma a hiziak in kintak a etkawl thei hilo in minute 40 tuam Hospital huangsung ah pak vel vela um hi’n le a kigen hi. TATA Magic chu Romen s/o Khambi of Saidan Khun, Sadar Hills min a um a hia, kiho lemna a umma sia thiluang chu KKL Complex, IB Road a kawi hiding a hi. Lamkhotin in nau nawicheplai khat panna’n cha 4 - numei 3 leh pawsal 1 banah a pawsal, Doulen a nusia a, a pawsal Doulen a hileh Assam Rifle, Dimapur a Warrant Officer a sem a hi.

Ki report ding ah hiatsak
Lamka, July 15 (Nisin Thuhiltu): 2016-2017 PMEGP Phase-II dawng thei ding ah teldaw a umte’n July 18-20, 2017 sung in General Manager, District Industries Centre, Churachandpur ah sunma dak 11:00 a pat sunnung dak 3:00 kikal ah lekha pawimaw te chawi ah ki report ding ua hiatsak a hiu a, zia hun a chun Address Proof, Trained Certificate leh nasepna tawh kisai Proof chawi ngai ding leh kuamasap in ngai pawimaw chiat ding in Y. Nabachandra Singh, General Manager, District Industries Centre, Churachandpur in hiatsakna a bawl hi.

Drug Awareness programme khak

Lamka, July 15 (Nisin Thuhiltu): Siamsinpawlpi (SSPP) leh Lamka Rehabilitation and Research Centre (LRRC) in St Peter’s Auditorium New Lamka ah ni 2 a nei uh Drugs Awareness & Prevention Programme chu tuni’n zaw thian a hi. Tuni sunma dak 10:30 a pat in Class VI - Class VIII chan te a ding in basic information about drug abuse, the harmful effects of drug abuse leh prevention life skills ti tawh kisai ah ziltilna a um a, sunnung dak 3 in Elder T Langsanglian Secretary LRRC EBC in pauchapna tawh programme chu a khak hi. Drugs Awareness and prevention program a hileh zani Pastor T Songkhanthang, Local pastor EBCC Vengnuam in a la hawn a hia, zia hun chu student te’n khamthei hawilo dan a hiat chian ua a pitin hun tiang ua khamthei hi nawpna lungthim a nei lo ding uh dawina leh tupna ah SSPP leh LRRC in student te lak ah awareness a sai uh a hi.
NT16july2017f

GSO Block 2 in Joint Felicitation Programme mang

Lamka, July 15 (Nisin Thuhiltu): Gangte Students Organization GSO, CCpur Block leh Thangting Block in tuni’n KKL Complex, HQ Veng ah Joint Felicitation Program 2017 a nei ua, zia hun chu Ginsuanhau MLA Chairman, MANIREDA in Chief Guest hina tawh a uap a, Thangboi Gangte MCS, SDO CCpur leh KSJ Gangte Chief Manager ICICI Bank ten Guest of Honour hina tawh a uap banah Manglien, President GSO GHQ, T Dongzakai Gangte, Chief of Hill Town leh Major Radha Krishnan 25th Assam Riffle te’n Chief host, Functional President leh special guest hina tawh a uap ui. Felicitation hun a chun khuallian te’n student te kiang ah kipakpina memento piak dawna a nei ua, Rev L Sata Gangte in student lawting te a ding ah malzawlna a dawt piak in khuallian te a pat thugenna le a um hi. GSO CCpur Block leh Thangting Block a pat Central leh Manipur Board nuai ah Class X ah student 14 in first division leh 17 in second division ah a zo ua, Class XII ah student 14 in first division leh 13 in second division in a zo ua, a kigawm ah student 58 in lawtinna a chang u’i.

CDVDFWA in kipakthu genna leh hiatsakna nei
Lamka, July 15 (Nisin Thuhiltu): Churachandpur District VDF Welfare Association (CDVDFWA) Association in tuni thusua a bawlna a chun, a chiata July 10, 2017 ni ah a seppi uh Khupsuanlun, VDF No. 020281 in thina a tuak hun ah a khua uh Tuining chan puaktungna ding ah kithuapina pia SP leh Officer chuam chuam chung ah kipakthu a puang a, Khupsuanlun a hileh CDVDFWA a ding ah mi kipezotak, sep leh bawl lam ah fel leh Association ah fund hawtak ah pia a hina ah Association chiadan dungzui ah Rs. 1 Lakh ah gal hiding in a gen hi. Thusua in a taklat bena a chun, a 6veina General Assembly thupukna dungzui ah MGEL, CPIS leh SIN tite delzui na ding ah Rs. 500 tuakkhawm ding kiti chu a pia nailo te’n July 25, 2017 chan ah a piak theina ding ua hun suksau piak a um hi’n le a gen a, a chiata July 13, 2017 ah thupukna sungzui a July 25, 2017 sun dak 12 leh Reserve Line, SP Office Complex a General Body meeting um ding in zia hun a chun MGEL, CPIS leh SIN tawh kisai ma genkhawm hiding ti’n a taklang hi. Chun, Association ah Rs. 500 pianailo te’n le July 25 chan ah Khupsuanlun gâlna ding tawh pia khawm ding in le VDF personnel te a hiatsak hi.

Mizoram tung ding panpina te thadawk

Lamka, July 15 (Nisin Thuhiltu): Young Paite Association (YPA), General Headquarter in Mizoram a tuilian leh nimchim thuakte panpina ding ti ah Block nuai ah Unit te mangcha ah panpina a dawlkhawm te tuni zingkal dak 6:30 in YPA GHQ Hall, Hiangtam Lamka ah thâkdaw in a um hi. Panpina dawlkhawm a um te chu YPA GHQ puitute’n Aizawl ah Central YMA khut ah a piakdaw ding uh a hi. YPA GHQ in Block leh unit te mang ah panpina ding a dawlkhawm te chu anchang bag 183 leh a sum ah Rs. 1,53,120 a hi. Anchang te chu truck khat ah puak a hia, YPA GHQ a pat T. Khailianthang, President, Lianmuanthang Valte, General Secretary, Chin Ngaih Pau, Chairman, CEC leh Khanpau Ngaihte, Member, CEC te’n Bolero khat ah zui in Tipaimukh Road haw in a kipandawk u’i.
NT16july2017g

U-17 tournament khakna nei; SANMT in trophy dawm
Lamka, July 15 (Nisin Thuhiltu) : Vanglai Sporting Allies (VASA) saina nuai ah a chiata June 20 a pat P.T Sports Complex, New Lamka ah a 2-veina (L) Siam-Chin-Thang Memorial Tourney 2017 (Under-17) um chu tuni’n final match kihelna leh a khakna nei a hi. Tournament khakna hun chu Langkhanpau Guite, MDC Tuivai, Ex-Chairman ADCC in chief guest hina tawh uap in Gouzamang Guite, MDC New Lamka East, EX-Executive Member ADCC in guest of honour hina tawh a uap a, zia hun a chun Donor family leh khuallian te a pat thugenna a um ban in SIAM-CHIN-THANG te sûnna hun le mat in a um hi. Final match ah Sir Aloysius Nehkhojang Memorial Team (SANMT) in 2-0 ah United Khawzim Brothers (UKB) a zo a, a 2-veina (L) SIAM-CHIN-THANG MEMORIAL TOURNEY 2017 (Under-17) ah champion hina la in kipakman Rs. 10,000 leh trophy a sâng hi. Final ah guallel UKB in 2na la in kipakman Rs. 5,000 leh trophy a sâng hi. Individual ah Damlai Memorial team a pat Hauthianmung in tournament sung ah goal 7 khum in top scorer hina a la, SANMT a pat Jamlunmang in best player leh Joldei Aii a pat James in best keeper hina a la’i.

Chief Minister in Aerial Survey bawl

Imphal, July 15 (Nisin Thuhiltu) : Chief Minister N. Biren Singh in tuni’n Works Minister Th. Biswajit, Chief Secretary, R.R. Rashmi leh Additional Chief Secretary (Home) Dr. J. Suresh Babu te tawh state sung ah tuilet in a chupna mun te aerial survey bawlna a nei ui. Kangla helipad ah zingkal lam dak 9:30 ah helicopter ah lengdawk in dakkal 1 sung val surveyed bawlna a nei ua, Chief Minister N. Biren Singh in survey a bawl zaw ah thil umdan a genna a chun, gua a zuk tam ziak ah state sung mun chuam chuam ah tuilet nasa mama nalai a hidan gen in, mun tamtak tui-let in chup zing nalai in a gen hi. Chuleh, Central team te a mun tak ah thil umdan entha ding ah State ah umta a hidan uh a gen a, State Government in tu ah tuilet ziak ah haksatna um te chu ‘State calamity’ ti mai ding hizawlo ah Central Government in ‘calamity of severe nature’ ti ah le puang ding a hidan genkawm in, Central Government in a pawimaw dungzui ah kithuapna a piak ding kinem hin a gen hi.

Police personnel 3 suspend ah um
Imphal, July 15: Moreh ah um Police personnel khenkhat in diklo tak ah Imphal- Moreh kawmtua tai gari driver te kiang ah sum a lak sek uh complaint ah a um nung in akisaipi thuneitu te’n diklotak ah nasem police personnel pathum suspend a bawl ui. P Gojendro Singh, OSD, Anti Corruption Cell, Imphal in thusua a bawlna a chun, complaint a um tawh kitawn ah Dr. S. Ibomcha Singh, MPS, SP/Tengnoupal in khualna a nei nung ah Police personnel pathum – GC Md. Farijuddin of MGH-PS, C/No. 0906125 SK. Bosko Lamkang of MRH-PS leh C/No. 0901601 Md. Rafiuddin of MRH-PS te chu suspend bawl ah um hin a taklang hi.

Ambulance ah JCB mang; Dam zo lo ah thi

Chandel, July 15 (Nisin Thuhiltu): Chandel District, Khengjoy Sub Division huapsung ah um N Gamnom khawmi, Mr Thangtinlian Baite s/o Lemthamg Baite chu tuni,15th July 2017 ah thakhat thu damlona tuak in, a khua kiangnai tuam ua ki-etkawlna ding hospitals, health centre or healt care facilities a umlo ziak in JCB mang ah Myanmar Hospital zawtpi in a um a, himaleh damzo lo in a mualliam hi. Government in khantona thu a tangko zing lai ah ambulance ah JCB ki mang chu mitamtak in lamdang a sakthu’u a gen ua, Manipur ahiloleh India khangthu ambulance ah JCB a kimat masaknapen hinalai ding in le ginchat a um hi. Hiathei khat chu N Gamnom village leh a kiangnai tuam chu kikawmtuana lampi kituptak umlo, hospitals, health centre ahiloleh health care facilities umlo ti a hia, himaleh office file ah zia gual facility chu umvekta ding ah ginchat a hi bawk hi.
NT16july2017h

Govt. in a theichan ah mipi te kithuapi ding: Dy CM
Imphal, July 15 (Nisin Thuhiltu) : Chief Minister Nongthombam Biren Singh mapui Manipur ah coalition Government in Government leh mipi te kal ah gap a umlo ding ti tupna tawh thasin date 15th, People’s Day (Meeyamgi Numit) ah a chiapi zing tawh kitawn in tuni’n Deputy Chief Minister Yumnam Joykumar Singh in a office chamber ah ama kimupi nuam mitamtak te kimupi in a haksatnau leh a thil dawi tei ngaithakna leh holimna a neipi hi. Numei panna mitamtak in Deputy Chief Minister Joykumar Singh a kimupi hun un, numei pawl khenkhat in numei te bitna ding ah panlakna pawimaw a hidan te leh buaina chuam chuam a tuak sek teu tutna a nei ui. Joykumar Singh in a kiang ah haksatna tut ah um te chu etzui hiding leh theituasua kithuapi ding hin thutiam a bawl a, Government panlakna chuam chuam um te kithuapi ding in mipi te chualna a bawl hi.

CM in Family Court hawng ding
Imphal, July 15 (Nisin Thuhiltu) : Manipur Chief Minister Nongthombam Biren Singh in 16th July, 2017 nitak lam dak 3:00 leh Thoubal DLO Complex ah Family Court hawnna a nei ding a hi. Zia hun chu a kisaipi thuneitu te leh Minister, Parliamentary Secretary khenkhat in le uap ding a hiu.

Andro AC huapsung ah lo 78% te tui in chup: Minister Th. Shyamkumar

Imphal, July 15 (Nisin Thuhiltu) : Thounaojam Shyamkumar, Forests & Environment, Horticulture & Soil Conservation, MAHUD and Town Planning Minister in tuni’n Andro, Imphal East ah tuilet in a chup lo (paddy field) te vena a nei a, Poiroupat mun ah thuthak lakhawm mite kiang ah a genna a chun, Andro constituency huap sung ah lo (paddy field) 78 percent te tuilet in chup a hidan a gen a, lui ah nin a tam ziak ah tuilet nasa diak hin a gen hi. Chief Minister N. Biren Singh nuai ah State Government in tunung ah zigual tuilet hi a umkit taklona ding ah panlakna nei ding a hidan taklang kawm in tukum a pat Forest Department in soil conservation kithuapina ding ah mipi te kani (Poppy) chiin sang ah Cardamom (ilaichi) chiing zaw ding ah tilkhona nasep chiapi ding a hidan a gen hi. Th. Shyamkumar in a genbelapna a chun, Andro Assembly Constituency huap ah a kisaipi department in buchi a hawp ding uh dawi hin a gen hi.

Minister Shyamkumar inCherry Blossom Avenue hawng

Imphal, July 15 (Nisin Thuhiltu) : Natural Park, Andro, Imphal East ah tuni’n Forests & Environment and Horticulture & Soil Conservation Minister Thounaojam Shyamkumar in ‘Cherry Blossom Avenue’ hawnna a nei hi. Zia function chu Institute of Bioresources and Sustainable Development (IBSD) - National Institute of Biotechnology, Government of India, Imphal, Manipur saina nuai ah um a hi. Minister Th. Shyamkumar in a thugenna a chun, local mite cherry blossom thingno phuthak ah um te veng bit ding in chialna a bawl a, kum 3 zaw leh cherry blossom thingno phuthak ah um te pak ding, zia chu local mite leh tourist te ding ah etlawm mama ding hin a gen hi. Chun, IBSD scientists te Natural Park, Andro kiangnai tuam masawnna ding leh khantona ding ah theina zosia mang ah panla chiat ding in chialna a bawl hi. Professor Dinabandhu Sahoo, Director of IBSD, Andro Assembly Constituency ah councilor te leh IBSD scientists leh student tamtak in zia hun matna chu a uap ui.

A pawimaw dungzui ah panlak hiding: Minister Letpao Haokip
Imphal, July 15 (Nisin Thuhiltu): Irrigation & Flood Control Department, (IFCD) leh & Youth Affairs and Sports (YAS) Minister Letpao Haokip in tuni’n People’s Day (Meeyamgi Numit) a hi tawh kitawn in a chenna inn mun leh Old Secretariat ah a office mun in ama kimupi nuam te kimupi in a haksatnau leh a thil dawi teu genkhawmna a neipi hi. Zia hun a chun, ama kimupi mitamzaw te’n tuilet ziak ah haksatna um te dinmun leh widow welfare tawh kisai a tut ua, Minister Letpao Haokip a pawimaw dungzui ah panlak hiding ah thutiam bawl in thumuana a bawl hi.

Diploma Courses a ding ah seat awng nalai
Imphal, July 15(Nisin Thuhiltu): Government Polytechnic, Imphal ah academic session 2017-18 sung ah 1st Year Diploma in Engineering Courses zilnuam te ding in seat awng um nailai in Controller of Technical Education, Manipur in thusua a bawlna a chun a taklang a, lunglutna nei te’n ngaiven thei ding a hi. A langkhatlam ah 17th July, 2017, zingkal lam dak 11:00 leh Multipurpose Hall, Government Polytechnic, Takyel, Imphal ah 2nd Counseling um ding a hi. Lunglutna nei candidate apply bawltu te’n 2nd Counseling hun a chu Original testimonials document a chawi uh ngai ding a hi.