Nisin Thuhiltu - 12 July 2017

User Rating: 0 / 5

Star InactiveStar InactiveStar InactiveStar InactiveStar Inactive
 

World Population Day (WPD) 2017 mang

Lamka, July 11 (Nisin Thuhiltu): District Family Welfare Officer (DFWO), Churachandpur saina’ tuni, July 11, 2017 sunma in YPA GHQ Hall, Hiangtam Lamka ah World Population Day (WPD) 2017 matna leh Service Delivery Fortnight hawndawna a um hi. Zia hun chu Shyamlal Poonia, IAS, DC Churachandpur in Chief Guest hina tawh a uap a, Dr. T. Nengkhanmang, Deputy Superintendent, District Hospital in Functinal President hina tawh uap in, Dr. Kimngaihching Simte, CMO Churachandpur in Guest of Honor hina tawh a uap hi. Chinkhanjam, DE & MO leh Panthoi, CA, DFWO te’n hun matna a mapui ua, Dr. VC Pau Tonsing, DFWO, Churachandpur in vaidawn thugenna nei in, Chief Guest Shyamlal Poonia, IAS, DC Churachandpur in thugenna a nei hi. Shyamlal Poonia, IAS in a thugenna a chun, “Chiapi dan thak, Lam-etna thak, Inkuan khantona di’n” ti thupi mang in World Population Day tawh kisai genna a nei a, zia ah thupi kimang “Chiapi dan thak, Lam-etna thak, Inkuan khantona di’n” ti sukpitin thei a hina ding ah mimal, khawtang ah khantona a um masak ding pawimaw a hidan taklang kawm in, khantona a um masang sia pawl chuam chuam te banah mawpuakna nei Medical leh District Administration in chawllo ah panlakna a nei ding pawimaw in a gen hi. Functional President, Dr. Nengkhanmang in khawvel, India leh igam te et a, Population Control pawimaw dan mizosai’n a hait ding pawimaw hin a gen a, tusawn-khangsawnte khualna ah Population Control dingdan hiatthiam pawimaw in le a gen hi. Chief Host Dr. Kimngaihching in a thugenna a chun, “Importance of Spacing and Planning Family” ti thupi a nei a, Zenngaihlun, DPM, NHM in “Eligible Couple Registration leh ASHA Incentive” ti tawh kisai genna a nei hi. Nalini Devi, DPHNO, Churachandpur in huntawp ah kipakthu genna nei in, hun matna khak in a um a, Service Delivery Fortnight hawnna, District Hospital ah nei a hi. Dr. Kimngaihching Simte, CMO, Churachandpur in ribbon cheptan in Service Delivery Fortnight a hawng hi. World Population Day mat ah a umna chung ah June 27, 2017 a pat July 10, 2017 sung Population Fortnight ah mat hiding a hia, zia hun sung a chu mun chuam chuam ah Poster/Banner tak hiding, Service Delivery Fortnight July 11 a pat July 24, 2017 sung ah nau neilo ding ah kibawlsak nuam te hunpiak hiding leh sang kivangna vanmat chuam chuam hawm hiding a hi.

TB tawh kisai in Informal Meeting nei
Lamka, July 11 (Nisin Thuhiltu): Dr. T. Pumzathang, District TB Officer, Churachandpur mapuina’ tuni, July 11, 2017 sunnung in a Office chamber ah TB tawh kisai in Informal Meeting a um a, zia hun a chu District sung ah PHC chuam chuam a pat Medical Officer in-charge-te pang in, TB testing tawh kisai Report bawl dingdan leh TB Control Program nuai ah Term thak kimang te genkhawmna a nei ui. A langkhatlam in, tukum June 30, 2017 tiang ah District TB Centre ah ki-etsak ding in mi 8,490 in ticket lau a, zia te lak a chun mi 522 test bawl in a um ua, patient 69 Registered kibawl lak in mi 5 Multiple-Drug Resistant (MDR)-TB ah record bawl in a um hi. Patient 69 Registered um lak ah Patient 54 in Treatment zo thiang ta uh leh damthiangta ah record in le a um a, Patient pani in thina a tuak bak ua damlo dang pani te’n treatment zo thiang tamaleu damthiang nailo a hina chung ua Treatment sunzawm ua record a hi. Chuleh, damlo 5 te’n treatment chawlsan ua record bawl a hi.

District ai-aw School Football team te flag-off bawl
Lamka, July 11 (Nisin Thuhiltu): State Inter School Subroto Mukherjee Football Tournament 2017 ah pang ding Churachandpur leh Pherzawl District ai-aw School Football team te tuni sunma in Lamka nusia in a kipan dawk ui. Tournament a pang ding te sunma in Churachandpur District Sport Association CDSA Office, Hiangtam Lamka ah kingak khawm in, T Thangzasong, Assistant Secretary, CDSA in Pathian khut ah kawlsakna nei in, Thauithianmung, President, CDSA in flag off bawl in thâkdawna a nei hi. Churachandpur District ai-aw kuan School football team te chu - Under 14 ah Churachandpur District a pat Saint Jone School, Gothol a hiu a, Pherzawl District a pat Parvachawm High School te a hiu. Under 17 ah Churachandpur district a pat Dr. Radha Khrisna Foundation School leh Pherzawl District a pat Parbung Government high School te a hiu a, School khat a pan football player 16, kigawm player 64 a hiu a, Team Leader Vanlalrout Joute leh Kaielmuon Gangte ten mapui ding a hiu. State Inter School Subroto Mukherjee Football Tournament 2017 ahihleh July 12 a pat July 18 sung ah Thoubal District sung mun chuam chuam ah um ding a hia, Under 14 ah Churachandpur District ai-aw Under 14 Saint John School team in July 13 leh Imphal East te tawh match nei ding, Pherzawl District ai-awh under 14 Parvachawm High School team in Kakching team te tawh match nei ding ahiu. Churachandpur district ai-aw Under 17 Dr. Radha Khrisnan Foundation School team in July 13 ah Tamenglong Team te tawh match nei ding a hiu a, Pherzawl District ai-awh Parbung Government high School team in Kangpokpi team te tawh match nei ding a hiu. State Inter School Subroto Mukherjee Football Tournament 2017 ah pang ding district zosia school khat chiat teldaw ah um, Under 14 leh Under 17 ah a kigawm ah School 15 pang ding a hiu. Chun, July 18 sunnung dak 1:30 leh final match um ding a hi.

Synod Hall ah “Book Fair 2017” khak hita
Lamka, July 11 (Nisin Thuhiltu): Bookline, Kolkata in July 1, 2017 a pat Synod Hall, IB Road ah “Book Fair 2017” a bawl uh chu tuni’n khak in a um hi. Book Fair hun sung in lekhabu chi chuam chuam a neu a lian in a sim thei ding, school leh college student te a ding ah Study Material chuam chuam, naupangte’ lunglut thei ding lekhabu chi tamtak chawk thei ding ah kawi in a um a, Novels, Literature, Comics ti te panna lekhabu a 10000 ah sim, 105 discount ah zawk in a um hi. Bookline, Kolkata in Churachandpur district ah Book Fair 4-vei a bawlnau hita le a hia, maban ah Imphal ah Book Fairbawl kit ding uh leh kumkit leh CCpur district ah le bawl kit ding ah kisaklawkna nei a hidan uh Bookline te a pat hiat a hi. Tu ah khak ah um Book Fair chu July 1, suma dak 9:00 ah DC/CCpur Shyamlal Poonia IAS in a hawn a hi.

SAFA saina Singngat ah Football Tournament um di
Lamka, July 11 (Nisin Thuhiltu): Singngat Area Football Association SAFA in kumsin leh Singngat Area Football Association SAFA Independence Day Shield Football Tournament a sai sek uh chu tukum 2017 ah sai kit ding a hiu a, Singgnat Public Ground ah July 24, 2017 leh kipan ding a hi. Zia chu tawh kitawn ah clubs, School, association, organization banah affiliated club te’n July 11 a pat entry form la thei ding a hiu a, lunglutna nei te’n Rs 100 pia’n Entry form -TD Medico, Singngat Bazar ah mu thei ding a hiu.Singngat Area Football Association SAFA Independence Day Shield Football Tournament ah champion in Rs 30, 000 leh running trophy sang ding a hiu a, runner-up in Rs 15, 000 leh running trophy a sang ding banua, tournament nei hun sung ah Top Scorer, Best Player, Best Save Hand leh Men of the Tournament ti te le prize piak hiding a hi.

Kipawlkhawmna hun mang
Lamka, July 11 (Nisin Thuhiltu): MPCS Manipur Area Administrative Secretary Rev. C. Zorammawia mapuina'n tuni'n Rev. Thangkai leh Rev. Lungpau Conference Hall ah ‘Sakhua leh khawtang kivaipuakna kawng ah kipumkhat a pawimaw hi’ ti thupi ah mang in YVA GHQ lawiupate tawh kipawlkhawmna hun a nei ua, zia hun a chun, ngaidan leh dawidan chuam chuam te genkhawmna a nei u’i.

Orthopaedic Surgeon ki-etsak thei
Lamka, July 11 (Nisin Thuhiltu): Lamka Nursing Home, IB Road ah Orthopaedic Surgeon, nisin sunnung dak 2:00 a pat ki-etsak theita ding a hi. Orthopaedic Surgeon in ahileh guulam leh thagui natna chi chuamchuam enthei ding a hia, a ki-etsak nuam te’n OPD hun, sunnung dak 2:00 ma ah booking bawl ngai ding hin a kigen hi.

“Zaila Awih Zan Kumpite Kumpi” mang di
Lamka, July 11 (Nisin Thuhiltu): New Lamka Vengnuam South ah um Pethuel Baptist Youth Fellowship BYF in a hung tung ding July 13 nitak leh amau biakinn ah “Aw, Toupa hon Phatpih Unla, A Min Pahtawi Chiat Ni” ti thupi nei in “Zaila Awih Zan Kumpite Kumpi” kiti hun matna nei ding a hiu. Zia hun chu laa thiam chuam chuam te banah BYF Vengnuam Music band, Pethuel BYF Music Band leh Pethuel Praise Team Pathian chawihawina laa sa ding a hiu a, Local BYF group tin ten le kidemna (competition) nei ding a hiu. Pethuel BYF Youtube Channel hawnna leh a latna le um ding a hia, Mangjoymung Guite, Secretary Pethuel BYF in Youtube channel tawh kisai taklatna nei ding leh Upa V Daikhansuan, Local Chairman, Pethuel EBCC in Pethuel BYF Youtube channel hawnna le a latna nei ding a hi.

Senapati ah World Population Day mang
Senapati, July 11 (Nisin Thuhiltu): District Family Welfare in District Health Society, Senapati tawh kithua in tuni’n DRDA Conference Hall, Senapati ah "Be Responsible Partners for making Plans of a Family" ti thupi mang in World Population Day, 2017 a mang a, MM Markson, Chairman, ADC Senapati in khuallian hina tawh hun matna a uap hi. Ama’n a thugenna a chun, AASHA worker te’n doctors leh damlo te kal ah panmun pawimaw tak nei un a gen a, ziana ding a chu a pawimaw dungzui ah AASHA te kithuapi ding hin a gen hi. District Immunisation Officer, Dr. Sokha in a thugenna a chun, kum 2022 leh India chu World's Most Populous Country hiding ah ginchat a hidan taklang kawm in family planning leh birth control pawimaw a hidan a gen a, population explosion um thei ding a hidan a gen hi. Dr. Loli, CMO Senapati in a thugenna a chun, World Population Day chu UNDP Governing Council in kum 1989 ah a patdaw nung ah khawvel pumpi kimang pan a hidan a gen a, world population, growth rate a san mama na chung ah family planning leh birth control mai hizawlo ah kichenna, chate, tu leh cha etc dinmun le etthak ding pawimaw hin a gen hi. Chuleh, family planning lawtin theina ding ah, gender equality pawimaw hin a gen hi. Zia hun matna chu ADC Member, DLO, MOs, AASHAs leh SDWA of Senapati District te’n le a uap ui.

JNIMS ah nekgukna beilo ah taklat in um
Imphal, July 11 (Nisin Thuhiltu): Chief Minister N. Biren Singh in Manipur ah nekgukna (corruption) kiti sukbei ding tangko zing maleh tawtna gual hin a kilang a, state run Jawaharlal Nehru Institute of Medical Sciences (JNIMS) ah diklo tak ah damlo te etkawlna leh corruption chiapi ah um hin Imphaltime in a taklang hi. A kigendan in, insung haksa damlo te etkawlna chung ah sen leh so um te kituptak ah hospital authority in sulang theilo uh hin a kigen a, ziana chung a chu mitamtak te ngaituana JNIMS thuneitu te a diak ah Director in insung haksa tak tak te ki etkawlna chung ah benfit mu nei a hi em ti a hi. JNIMS ahileh kum 2009 ah Medical Council of India in officially tak ah MBBS zil theina ding ah phalna a la piak, July 2010 ah MBBS zilna kipan a hi a hia, Chief Minister of Manipur president hina tawh society khat in run a hi. JNIMS director Dr.L. Deben Singh term July 15, 2017 ah kichaita ding himaleh Chief Minister insungmite kithuapina tawh tha 6 sung Director of JNIMS mawpuakna tukzawm nalai ding ah a term suksaube ah um hin le a kigen a, Dr. L. Deben Singh in Department of Physiology, JNIMS ah Professor naa a sep le 21st Governor Council meeting resolution recommendation tawh kituaklo hi’n a kigen hi. Dr. Deben in arrear dan ah JNIMS exchequer mang ah Rs. 8 lakhs withdraw bawl in le Imphal Times in a taklang a, Dr. L. Deben Singh diklo tak ah nasepna chi chuam a nei te suklat zel hiding in le a gen bawk hi.

PDS anchang thu ah MLA K. Ranjit in demna tuak
Imphal, July 11 (Nisin Thuhiltu): Kakching Khunou Youth Forum in PDS anchang man (lost) na chung ah investigation bawl ding ah phutna MLA K. Ranjit in ngaisaklo hin a gen a, zia chu tawh kitawn ah PDS anchang gukmangna MLA K. Ranjit le kigawl ah muanmawna nei uh hin tuni’n press release in a taklang ui. KKYF President in press release ah a taklatna a chun, NFSA card holder khenkhat PDS anchang piak ah umlo a hidan uh leh a gen a, Agents leh councilor te’n thil umdan kituptak ah a genchian nuamlo bak ua, mipi te kithuapi nuamlo un ngawna a siam hi. Chuleh, avaima theilam ah bialtu MLA K. Ranjit in PDS anchang man (lost) na tawh kisai khualna kituptak a nei ding leh gukmang ah um PDS anchang a puakdaw ding phutna a nei hi.

Manipur Kung-Fu team in Imphal nusia
Imphal, July 11 (Nisin Thuhiltu): Assam, Bhogeshwari Phokanani Indoor Stadium, Dispur Super Market Guwahati, ah um ding 15th National Kung Fu Championship 2017 ah pang ding Manipur a pat Kung Fu martial artists 22 te’n tuni’n Imphal nusia in Assam a zuan ui. All Assam Kung Fu Association in Indian Kung Fu Federation tawh kithua ah organize a bawl uh a hia, 13 – 16 July 2017 sung ah um ding a hi. Player 22 te chu All Manipur Kung Fu Association saina Kakching Bazar ah MLA Dr. Radheshyam Yumnam, chairman of MANITRON & MANIDCO in thaakdawna a nei hi. Manipur Team member te chu – Yaikhom Bidyaluxmi Dvi, Yaikhom Roshni Devi, Thounaojam Rita Devi, Yaikhom, Anjali Devi, Yaikhom Kiran Singh, Thounaojam Nilakumar Singh, Thounaojam Shyam Meitei, Yumnam Langamba Meitei, Yumnam Roson Singh, Yumnam Ranjan Singh, Irengbam Bikash Singh, Elangbam Lanchenba Meitei, Nishidash Oinam, Rajkumar Sanayaima, Thounaojam Amarjit Meitei, Sanabam Thomas Singh, Sorokhaibam Samuel Meitei, Lourembam Boynao Singh, Yumnam Vijoy Meitei, Irfan Ahammad, Yumanm Bikash Singh, Wahengbam Sanathoi Singh including Team Manager Kh. Sharatchandra Singh, S. Rohitkumar Singh te a hiu a, Thang Ta Martial Artists team te le a pang ui. Manipur a pat - Mayanglambam Sharat Singh, N. Ramananda Singh, leh Y rajen Meitei te chu Championship Chief Jury, Assistant jury, Technical Official ding ah teldaw in le a um ui.

Rs 80,000 man ding zu matdaw ah um
Imphal, July 11 (Nisin Thuhiltu): Narcotic OC Inspector P John mapuina Narcotic Cell Imphal East in tuni’n Wangkhei Ayangpali Road ah frisking leh checking a bawl hun un Maruti Vans bearing registration number MN0/1G/ 3556 leh MN0/1G/9356 ah kipua Rs 80,000 man ding zu litres 800 val a man dawk ua, zu pawtu te leh zu puakna kimang gari te le mat in a um hi. Zu pawtu te chu Seleibam Sanjit Singh (40), s/o Seleibam Khomei Singh of WangkhemMamang Leikai leh Puthem Ranjit Singh (40), s/o (Late) Puthem Dharma Singh of Andro Khunou Leikai, Imphal East te hi ua hiat a hi. Chuleh, mat ah um zu leh a pawtu te chu OC Porompat Police Station mang ah OC Excise Station, Porompat khut ah piakdaw in a um ua, apawimaw dungzui ah a chung ua action lak hiding a hi. Imphal East District police in SP/Imphal East K Kabib (IPS) leh DSP (CAR)/Imphal East Roni Mayengbam (MPS) te thupiak dungzui ah khamthei dodalna a chiapi zing a hi.