Nisin Thuhiltu - 11 July 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Welfare scheme mu ding dawl te kituptak ah musak ding government ding ah challenge lianpen a hi: Chief Minister Biren Singh

Imphal, July 10 (Nisin Thuhiltu): Manipur Chief Minister N. Biren Singh in Hill Leaders’ Day ah thasin date 10th a mat sek tawh kitawn in tuni’n le Chief Minister’s Secretariat complex, Imphal ah zingkal lam dak 9:00 a pat nitaklam dak 3:30 sung in Manipur tanggam mi te kimupina nei in a haksatnau leh a pawimaw chuam chuam uh ngaithakna a nei hi. Zia hun a chun, mi 1000 val in Chief Minister kiang in a haksatnau leh a pawimaw teu tutna a nei ua, complaints/grievances 232 piaklut in a um hi. Khaw-hausa leh tribal leader te banin khaw chuam chuam a pat mitamtak te’n le Chief Minister a kimupiu a, N. Biren Singh in ama mimal tak in Hill District chuam chuam a pat ama kiang ah chiate holimna a neipi hi. Mitamzaw te’n haksatna a tut uh chu tuithiang dawn ding kining tak umlo, lampi hawilo, playground umlo leh community hall umlo ziak ah lemchanlona leh haksatna um te a hi tângpi hi. Zia gual ah interaction programme hi tunung ah le chiapi zing hiding a hia, khawpi a pat gamla taktak ah um leh border areas ah um te’n Chief Minister kiang ah a haksatnau tut zing thei ding a hiu.

Tanggam a pat leader leh khua-hausa banah villager te a kimupi zaw ah Chief Minister in thuthak lakhawm mite kiang ah a thugenna a chun, pianbukimlo naupang te leh mithum (blind) te’n a hiding gual tak ah government welfare schemes um te a mulo uh ngaikhawk mama hin a gen a, tuni ama kimupi pianbukimlo leh khuamulo naupang pathum te CM Relief Fund a pat Rs. 5000 chiat kithuapina pia a hidan a taklang hi. Government welfare schemes chuam chuam te nuai ah Social Welfare Department chu Rs 6000 per annum leh a pawimaw teu peding ah hiatsakna bawl in le a gen a, society khantona ding ah departments/ government machinery zosia’n kituptak ah nasep thil bawl a nei ding uh pawimaw hin a gen hi. Government a ding ah challenge lian mama chu, migenthei leh panpi ngai mitamtak te’n a hiding gual tak ah welfare schemes a mulo uh musak ding hin a gen a, migenthei te’n amau phatchuampi ding ah welfare schemes um te a mulo uh ngaikhawk thak mama hin a gen hi. Government in tha 3 sung ah welfare schemes chuam chuam te lawting tak ah chiapi theina chung ah government masa’n kum 15 sung ah introduced a bawldaw zawlo thil tamtak state government thak in semdawk a hidan le a gen hi.

National Food Security Act (NFSA)kituplona tawh kisai ah thuthak lakhawm mite dawtna Chief Minister in a dawnhuna a chun, a kisaipi DC te NFSA nuai ah PDS anchang kihawpna enzui thak ding ah hiatsak hin a gen a, government theitawp sua ah mipi te lungtup sukpitinna ding ah panla zing ding a hidan genkawm in state mipi te haksa tak ah a um zing ding uh dawilo hin le a gen hi.

National Highway (Imphal-Jiribam) ah nimchim (landslide) tawh kisai a genna a chun, State mipi te pataulo ding ah chialna bawl in government in nisin pawimaw nek leh chak kining tingtak a tun zing theina ding ngaitua ding a hidan a gen hi. PWD department in lampi siatna mun te siamphatna nasep pan ngal a hidan uh gen in lampi siamzaw pai hiding in a gen hi. Hiatthei khat chu Chief Minister in April 11 ah Ukhrul district a phak hun ah thasin date 10 chu Hill Leaders’ Day ah mat ding ah a puan a hi.

V. Sinai khua ah natna chikhat lê

Lamka, July 10 (Nisin Thuhiltu): Vaisuon khua kiang a um V. Sinai ah natna hî chikhat a leng ziak in khawsung mi hunkhawp te District Hospital puaktun in a um u’i. Thutut kimu dungzui in, June 25 a pat V Sinai khua ah natna chikhat lêng in khawsung mi hunkhawp te’n damlona a tuak ua, amau chun damtheina ding a hi khak leh ti’n amau leh mau a la kizen u’i. V Sinai khawmi 2 - Lunminthang (1) s/o Haukhomang Haokip leh Nu Kholchin (45) w/o Haukhomang Kigpen te’n July 7 leh July 5 a khan a hinna a la chân tau a, a hinla mi 2 te chu zia natna hî leng ziak ah thi a hiuleh hilo uh hiatchian hinailo maleh zia hun ah natna hî a leng ziak a chun natna lêng ziak hi ah tamtak in ngaw in mithi inn ah lengkhawm ding le umlo hi’n le a kigen hi. Zia thu chu Kuki Khanglai Lawmpi (KKL) GHQ in a hiat phat in KKL Ambulance leh member kiphal te gari chuam chuam mang in tuzingkal in V Sinai khua a del ngal ui. V Sinai khua lutna bul a Koite lui tui a let ziak in gari a lut thei pua, khawsung mipi’n amau thahatna mang in damlote chu Koite lui chan a puau a, zia a pat chu KKL Ambulance leh gari dang dang mang ah District Hospital puaktun a um in observation room ah kawi in a um u’i. Observation room a duty doctor leh nurse ban ah KKL GHQ te’n damlo te a buaipi ua, damlo innkuan te nek leh chak ding KKL GHQ in KKL Complex IB Road ah saipiak hi. V. Sinai khua a hileh Inn 18 leh milip 115 um in zia lak a chu observation room tut a um chu mi 60 val a hiu a, amau lak ah a tamzaw chu naupang kum 11 nuai lam hi in mi 4 te dinmun lauthawng um hi’n a kigen hi. Damlo te chun awmna, khuasik, luak suak tit e a nei ua, bang natna a hi hiatchian a hinailo ziak in medical team khat in a suizui nalai hi. V Sinai khua ah damlona tawh kisai ah KK GHQ President Kamthang in a genna a chun, khua khat ah zia gual damlona a um chu ngaikhawk leh thuakpi a hi dan puang kawm in KKL GHQ in le thei chan ah panla in a thu chu bialtu MDC Khaipao Haokip, Chairman, ADC, CCpur leh bialtu MLA TN Haokip, President, MPCC te hiatsak ta hi’n a gen hi. MDC Khaipau Haokip, Chairman, ADC CCpur in tuni’n Observation room a um V Sinai khawmi damlo te vena nei in kithuapina ding in Rs. 10,000 a pia’i. V Sinai khua a hileh Henglep bial a um a hia, Henglep huapsung ma a um Santing leh a kiang ah khua chuam chuam a pat natna chi khat a len ziak ah damlo tamtak um ti thu hiat ziak in tuni zingkal in Imphal a pat Dr. Kh. Sashi Kumar Mangang, Additional Director, Health Services, Government of Manipur malatna’n Dr Thangpa Serto, State Epidemiologist SSO, IDSP, Dr W Sashi, Microbiologist, STDC IRL, Shyamkishore, State Microbiologist IDSP, Anthony Haorakcham, State Data Manager leh W Holen Singh, State DEO IDSP te’n Lamka pha in District medical team - Dr Tongzakai Haokip, Pediatrician, Dr Keisham Amargit Singh, Physician, Dr Th. Dievara Singh, Dr Jure Pudaite, MO Parbung, Dr Prem Chingthem, Veterinary Consultant, K Biaklun ANM, Raghumani Singh, MPW leh James, MTS te tawh kithua in damlo te puakna ding Truck 1 tawh Santing khua a zuan u’i.
NT11july2017b

DHS general meeting

Lamka, July 10 (Nisin Thuhiltu): Churachandpur Deputy Commissioner leh District Health Society (DHS) Chairman, Shyam Lal Poonia, IAS mapuina’n tuni sunma dak 11:00 in BRGF Resource Centre, DC Office, Tuibong ah 2016-2017 sung National Health Mission (NHM) nuai ah nasepdaw te leh nasepna chia thazing te banah sum dinmun tawh kisai ah General Body Meeting a um a, zia hun a chun Chairman dawina gual in NHM nuai ah Free Diagnostic leh SOE tawh kisai, United Fund a pat RKS nuai ah sum kihawm dan leh matdan report piakdan tawh kisai banah nasemtu umzat leh nasep chiadan tangpi te genkhawmna um in District sung ah Sub-Division chuam chuam a pat SDO te ban ah DHS nuai a governing body leh special invitee te le a pang u’i.
NT11july2017c

Anchang hawpdawna pan

Lamka, July 10 (Nisin Thuhiltu): National Food Security Act (NFSA) nuai ah May tha quota anchang lakthei ding ti ah District Supply Officer (DSO) in list a suadaw tawh kitawn in tuni’n FCI Godown, Headquarter veng anchang hawpdawna a kipan a, amasapen ding in Thanlon Assembly constituency sung ah Rationing Agent te’n tuni zingkal in amau Quota ding anchang a kilak ui. Anchang hawpna zingleh sutzaw a um in Tipaimukh AC te’n la ding a hiu a, July 12-13 sung Singngat AC te hi ding leh July 14-15 sung henglep AC te’n la ding a hiu. Hapta kit July 17-18 sung Churachandpur AC te’n la ding a hiu a, July 19-21 sung ah Saikot AC te’n la ding a hiu. NFSA nuai ah may 2017 quota a chun Thanlon AC a ding ah quintal 911, Tipaimukh AC a ding ah quintal 611, Singngat AC a ding ah quintal 2,407, Henglep AC a ding ah quintal 1,963, Churachanpur AC a ding ah quintal 2,529 banah Saikot AC a ding 3,727a tung hi.
NT11july2017d

2nd Phase ASHA Training

Lamka, July 10 (Nisin Thuhiltu): Dr. Jamthianlal, District Malaria Officer, Churachandpur mapuina nuai ah tuni’n CMO Mini Conference Hall, CMO Complex ah Second Phase ASHA Training pat in a um hi. July 20 tiang um ding zia training ah ni masapen ni a chun, Sagang PHC a ASHA Facilitator - T. Elizabeth Kom leh Leivon Salomi Kom nuai a ASHA Worker a pang ua, Gopal Kishore, IEC (C), State Consultant leh S. Thangthianmuan, District Consultant, NVBDCP, Churachandpur te’n ziltilna a piau hi. Zing leh Sagang leh Saikot PHC a ASHA Facilitator - Hoipilhing leh S. Manngaihniang te nuai ah ASHA Worker 40 in traning nei ding a hiu a, July 12 leh Saikot PHC a ASHA Facilitator Joycee Lalmawizuol leh Niangngaihlun te nuai ah ASHA Worker 45, July 13 leh Saikot PHC a ASHA Facilitator Lhingneichong Haokip, S. Chinglian leh Lhingneithem te nuai ah ASHA Worker 53, July 14 leh Saikot PHC a ASHA Facilitator - G. Chingngaihlun leh S. Lamneiching te nuai a ASHA worker 41, July 15 leh Saikot PHC a ASHA Facilitator - Neihsial Hoineijoy Vaiphei, Lhingneilam Haokip leh Larozami te nuai a ASHA Worker 56, July 16 leh Saikot PHC a ASHA Facilitator Chingngaihvung leh Chingmuankim te nuai ah ASHA Worker 46, July 18 leh Henglep PHC a ASHA Facilitator Themhat Haokip leh Kimmy te nuai ah ASHA Worker 49, July 19 leh Henglep PHC a ASHA Facilitator Thangneiting, S. Gangte leh Lamneikim Baite te nuai ah ASHA Worker 49 banah July 20 leh Henglep PHC a ASHA Facilitator Kim Irene leh K. Esther te nuai ah ASHA Worker 28 te’n training nei ding a hiu. Training hun sung ah Dr. Jamthianlal, DMO Churachadpur, Gopal Kishore, IEC (C), State Consultant leh S. Thangthianmuan, District Consultant, NVBDCP, Churachandpur te’n ziltil ding a hiu.
NT11july2017e

DTC Hall leh DC Office puathakna chiatha zing

Lamka, July 10 (Nisin Thuhiltu): A ki bawlzaw a pat puaphat hikha nailo District Training Centre (DTC) Tuibong chu District Administration leh District police kithua in puaphatna nasep a chia tha zing hi. DTC Hall a hileh Manipur Chief Minister N. Biren Singh in Cabinet Meeting nei ding ah Lamka a phak ding tawh kisai ah puathak a um hi’n a kigen a, sum lut ding te chu District Administration in a puakdaw leh police personnel te’n a sep uh a hi. DTC hall building ah plaster siatna mun te chu khetthâk a um in plaster thak a bawl ua, a chung in rawng a nu thak u’i. Shyamlal Poonia, IAS, DC Churachandpur in le ama Office Building leh office puathakna nei in nasepna nasatak in a chiatha zing a, electric fitting a kituplo ziak ah Department khenkhat in electric mulo in Generator bep mang pawl le a um ua, electric ah wiring cheng cheng then in aum hi.
NT11july2017f

MANIREDA Chairman in tuilêtna mun te entha

Lamka, July 10 (Nisin Thuhiltu): Singngat Assembly Constituency huap sung a um Sangaikot Area ah nimchim a tung banah tui in tuilo tamtak a chup hi. Zia tawh kisai ah Bialtu MLA, Ginsuanhau @ GS Haupu, Chairman, MANIREDA in thiltung chu ngawikhawk mama in tuni’n mama ah a mun in etthâkna a nei hi. Tuilêt leh nimchim tawh kisai ah thiltung te chu SDO Sangaikot report pia hitamaleh thiltung chu a ngaikhawk ziak ah a mun pha a hi dan a gen hi. Ginsuanhau in tuni thuthak lakhawm te a kimupi hun a chun, gua a ha zuk ziak ah Tuining Lui khang in tuilo tamtak susia hi’n a gen a, Sugnu Road a le mun 3 ah nimchim in, bialsung mite khualna ziak in JCB 2 mang ah lampi khuatsak in tuni’n gari chia theng thei ta hi’n le a gen hi. Tuilêt in a suksiat tuilo te chu kichian tak ah hiatsak ding ah gen kawm in Tuining khua mai a le tuilo pari 40 val suksiat aum ta hi’n a gen a, Luihoi Mualcham leh Kangleiphai zawtna lei (bridge) te chule fund um masapen ah bawl hi ding ti’n le a puangdawk hi.
NT11july2017g

Thingno phuthak ah um te venbit hiding: Th. Shyamkumar

Imphal, July 10 (Nisin Thuhiltu): Forests and Environment Minister Thounaojam Shyamkumar Singh, tuni ama office chamber, New Secretariat, Imphal ah thuthak lakhawm mite kiang ah a genna a chun, Assembly Session zaw tak leh ama department in July 7, ‘Vanamahotsava’ hun ah thingno phu ah um te etkawlna ding leh venbitna ding ah panlalakna pan ding a hidan a gen a, Forest Department in ‘Vanamahotsava’ hun ah district zosia thingno lakh 1 phut hin a gen hi. Forest Department in July thasung ah thingno lakh 10 phu ding ah guanggalna nei hin le a gen a, thingno phu tak ah um te venbitna kituptak piak hiding in a gen hi.
Chun, DFO leh department official te chu thingno phu thak ah um te kituptak ah enkawl ding hiatsak bawl in, kituptak ah panlakna neilo te chung ah action lak hiding in le a gen a, Chief Minister N. Biren Singh leadership nuai ah department in guideline umsa dungzui ah revenue chawmkhawm ding a hidan a gen hi. Chuleh, tuilet in Keibul Lamjao National Park, Bishnupur district sukha thei ding ah gen a hi tawh kitawn ah Keibul Lamjao National Park etthakna nei ah thingno phuna le nei a hidan a gen hi.

17th Fish Farmers’ Day mat ah um

Imphal, July 10 (Nisin Thuhiltu) : Directorate of Fisheries, Manipur in tuni’n Directorate’s complex, Lamphelpat, Imphal mun in 17th Fish Farmers’ Day, 2017 a mang a, zia hun chu Chairman, Planning & Development Authority (PDA), Manipur ST. Robindro, Director, Fisheries, Manipur David K. Shimray leh Director, Economics & Statistics P. Kamei te’n khuallian hina tawh a uap ua, Fish Fair-cum Fish Crop Competition, 2016 ah winner te Cash awards piakdawna a nei ui. Chairman, PDA T. Robindro in a thugenna a chun, Manipur chu fisheries leh thil chuam chuam chiapina ding ah mun hawitak a hidan gen in, Loktak Lake panna fresh water lake tamtak um hin a gen a, State Fisheries Department chu state sung ah Fisheries Industries siamdawk ding in suggestion a bawl hi. Zia hun matna a chun, Fish Fair-cum Fish Crop Competition, 2016 ah 1st , 2nd leh 3rd te Cash awards Rs 1,00,000, Rs 70.000 leh Rs 50,000 banah citations piak in a um ua, mi 25 te consolation Prizes Rs.7000 chiat piak in a um ui. Chun, Indigenous Fish Producer te special Cash Prize Rs. 20,000 leh citation piak in a um a, Fisheries Department ah officer pani - T. Shyamanda Singh, CEO, FFDA (Bishnupur) leh S. Umananda Singh, DFO, Churachandpur te chu valley leh hill district ah highest fish producer ah a pan ziak un Cash reward Rs. 15,000 gel piak in a um hi. Fish Farmers’ Day ahileh July 10 sin leh India gamsung pumpi mat hisek a hia, Dr. Hiralal Chaudhuri in Angul, Odisha ah 10th July 1957 ah a la patdaw a hi.

Myanmar Defense Commander in Chief in Ahmedabad ve
Ahmedabad, July 10 (Nisin Thuhiltu): Senior General Min Aung Hlaing, Commander–in-Chief, Myanmar Defence Forces in July 09 a pat a khan Ahmedabad vena a nei a, 11 July 2017 tiang ah hun mang ding a hi. General Officer leh a zi Daw Kyu Kyu Hla, Myanmar Defence Forces banah delegation member 15 te chu Ahmedabad a tun hun un Major General Anil Puri, SM, VSM, GOC, Golden Katar Division in vaidawnna a nei hi. Commander-in-Chief leh a nungzui te’n Gandhi Ashram leh Sabarmati River Front, Anand ah Amul Dairy plant, Sanand & Gujarat Energy Research & Management Institute (GERMI) ah TATA NANO factory te etthakna a nei ui. Senior General Min Aung Hlaing zi Daw Kyu Kyu Hla in Golden Katar Skill Development Centre leh Golden Katar Aggregated Social Health Activities (ASHA) School vena a nei hun in naupang te kiholimpi in thilpiak piakna a nei bawk hi.

A vaima theipen ah college pawimaw thil te sukfel hidi: Education Minister

Imphal, July 10 (Nisin Thuhiltu): Education Minister Thokchom Radheshyam in tuni’n INA Hall, Moirang ah H. Nilamani Singh, 105th Birth Anniversary Celebration a uap a, ama’n a thugenna a chun, British Colonial Rule hun ah zalen galdona chu foreign rule a pat zalenna muna ding mai hizawlo ah social boundary te leh academical progress um theina ding, a phalam ah kisanna a um theina ding hin a gen hi. Freedom fighter te Birth Anniversary kimang chu tuhun ah khangthak te’n a sulnung uh zui a, a phalam ah hangsan tak panlakna a um hun ah lawting ding hin a gen hi. Zia hun matna a chun, H. Nilamani Singh Meritorious Awards piakdawna le a um a, MLA, Moirang A/c, P. Sharatchandra, Chairperson MMC, M. Romibala Devi, Vice Chairperson MMC M. Basanta Singh leh organizing committee member Hemam Nilamani Foundation, Moirang te’n le a uap ui. Hun matzaw in Education Minister in Moirang College, Moirang vena nei in principal leh staffs te kimupi in holimna a neipi a, a haksatnau a ngaithak piak hi. Zia hun a chun Education Minister in regular principal post siamdawna ding ah HRD Ministry thuhiat ah um le a phalam ah panlakna a um ding kinem hin a gen a, a vaima theipen ah college in a pawimaw thil te sukfel hiding in thutiam a bawl hi.

NCC in Swachhta Week mang

Imphal, July 10 (Nisin Thuhiltu): 65 Manipur (I) Company, NCC Group HQ, Imphal in 01-10 July 2017 sung ah Swachhta Week a mat uh chu tuni’n khak in a um a, Swachhta Week khakna kawm in thiantho a pawimaw dan suklatna leh awareness program dan in NCC cadets 700 leh NCC staff 60 te’n 6km ah sau lam zawtna a nei ui. Zia lamzawtna chu NCC Group HQ, DM College Campus ah kipan in Thangmeiband - Kangla Fort – Manipur Assemble Main Road te a chuan ua, Lt Col S N Thankur, Officer Commanding, 65 Manipur Girls (I) Coy, NCC, Imphal leh Brig Vivek Sharma, VSM Group Commander, NCC Group HQ, Imphal te’n a mapui ui.

Nimchip ziak ah National Highway pani ah gari taitua theilo
Imphal, July 10 (Nisin Thuhiltu): Gua zuk ziak ah mun chuam chuam ah tuilet leh nimchim hiat ding a um zing tawh kitawn in Kohima district huapsung Imphal-Dimapur national highway, Kiruphema Village kiangnai ah lampi chu tui in a chup a, zia chu tawh kitawn in Assam a pat Kohima banah Manipur kawmtua theilo in a um hi. A langkhatlam ah National Highway No. 37 (Imphal-Jiribam), Sinam leh Leijang villages, Tamenglong district ah nimchim (landslide) ziak ah lampi meters 100 lam zani a chipthakna chung in gari taitua theilo in a um a, loaded trucks leh oil tanker truck tamtak a tâng den ui. National Highways & Infrastructure Development Corporation Limited (NHIDCL) officials in a taklatna a chun landslide leh sinking ziak ah Peducha Village area NH-2 ah lampi mattheilo ah um hin a gen a, NHIDCL General Manager, AK Gupta in a genna a chun, July 10 zaw leh lampi siamphatna nasep pat hiding leh a vaima theilam ah siamzaw theina ding ah panlakna um hin agen hi. NHIDCL official banah Deputy Commissioner, Kohima, Chief Engineer of National Highways leh contractor te’n lampi dinmun etthakna nei a hidan uh le gen in lampi repair bawlna ding ah ni 15 tiang bek lut ding hin a gen hi.
Zia kawmkal a chun, Superintendent of Police, Kohima traffic advisory lemsakna dungzui ah light vehicles te bep in Dimapur a pat Zubza road chuan ah Kohima lut thei ding uh hin a gen a, himaleh heavy vehicle te lutsak hilo ding hin a gen hi.

Nimchip ziak ah medical team te tungtheilo
Lamka, July 10 (Nisin Thuhiltu): Henglep Sub- division huapsung Songpung, Molcham leh Momong village te ah natna chi khat leeng ah hiatsakna a um tawh kitawn in tuni’n State health Department nuai ah medical staffs leh para medics team in zia mun te chu zingkal vaimatak in a del ua, himaleh lampi ah nimchim a um ziak in a tunna ding mun uh tungtheilo in a um ui. State Health Department, Media Advisor Khoirom Loyalakpa in a genna a chun, Health Director K. Lokendro Singh medical staffs leh para medics team te chu natna hik leeng thak dinmun khualna nei ding ah a sawl a hidan gen in Dr. Kh. Sasheekumar Mangang , Additional Director (PH), Medical Directorate mapuina medical staff 10 in Songpung, Molcham leh Momong village zuan a hidan uh a gen a, medical staff te lak ah Dr. Thangpa Serto, State Epidemiologist/ SSO IDSP, Medical Directorate, Dr. W. Sashi Microbiologist, Dr. Tongjakhai Haokip Medicine , Dr. Keisham Amarjit, Dr, Th. Deveraj, Dr. Prem Chontham, Veterinary consultant te le pang un a gen hi. Himaleh Molnam Village kiangnai ah nimchip ziak ah a tunna ding mun uh tungthei lo ah tângden un a gen hi.

Army havildar khat a thisa kimudawk
Imphal, July 10 (Nisin Thuhiltu): Bishnupur district, Nachou Kwak Siphai ah Army personnel khat tuzing kal in Nachau leh Kwaksiphai kikal canal a thisa mudaw in a um hi. A thisa mudaw ah um Army jawan chu Moirangthem Herachandra Singh (37) s/o late Chaobahal of Moirang Khunou Khongnang Makhong, Bishnupur district a hia, 4th Assam Regiment ah sem, Moltuk Post, Chandel district ah um, zani a khah Leimakhong ah posting thak, suty ah inn a um hin a kigen hi. Thiluang chu a tukkhuk ah meichang mabe mu ding um hi’n police in a gen a, pawl khat in a kaplup nung ua canal ah a luang a pai uh hiding ah muanmaw hin a gen hi. A langkhatlam ah a insungmi te’n thiluang chu la nuamlo in a thattu te matdaw ding phutna a nei ua, Imphal ah routine health check up ding ah chia, nitak lam dak 2:00 tuam ah phone call a bawl ua leh a phone switch off ah um, zingkal ah a thisa a luang mudaw ah um hin a insungmite’n a gen ui.

MNPF in contractor te vauna bawl
Imphal, July 10 (Nisin Thuhiltu): Manipur Naga People’s Front (MNPF) in Manipur Naga inhabited areas ah contractor te vauna bawl in NSCN (I-M) lemtina tawh developmental work programs chiapilo ding in thusua a bawl a, NSCN (I-M) in lemtina tawh developmental work programs chiapi a hisek ziak ah Manipur Naga inhabited areas ah state government leh central government in developmental programs a chiapi te zawthianlo ah kum 20 sung lam um hita hin a gen hi.

Business Advisory Committee meeting um di
Imphal, July 10 (Nisin Thuhiltu): Manipur Assembly business advisory committee in July 13, 2017 nitaklam dak 3:00 leh Manipur Legislative Assembly Speaker office chamber ah meeting nei ding a hiu a, zia hun a chu July 20, 2017 leh business second session chiathak dingdan genkhawmna a nei ding a hiu.