Nisin Thuhiltu - 10 July 2017

User Rating: 5 / 5

Star ActiveStar ActiveStar ActiveStar ActiveStar Active
 

Government in awnna chuam neilo in nâsem hen: N. Biren Singh

Imphal, July 09 ( Nisin Thuhiltu): Luwangshangbam, Imphal East district ah tuni One-day Awareness Programme on Various Workers’ Welfare Schemes Cum Labour Cards Distribution hun a thugenna a chun, Manipur Chief Minister N. Biren Singh in state mipi te chu Government in khenchuamna leh awnna chuam neilo ah vai a hawm theina ding ah kithuapina pezing ding in chialna a bawl hi. Government in fake encounter leh corruption case ahiloleh danlo gual tak ah nasem thilbawl te chung ah gawtna a piakna le government kithuapi ding in mipi te a chial a, panpi ngai te leh numei te dinmun dawpkang ding chu State government nasep ding ah alotheilo thil a hidan taklang kawm in tu financial year sung ah State Government in meithai te a ding ah special scheme hawn ding ah guanggalna nei hin a gen hi. State sung ah tuilet leh nimchim um te tawh kisai a genna a chun, mihiam te khantona’n natural systems (Mother Nature) a sukbuailo ding pawimaw in a gen a, government in thupuan a neisa te a ban ban ah gasua to zel ding hin a gen hi. Hun matna uap Labour and Employment Minister Th. Radheshyam in a thugenna a chun, last man ahiloleh migenthei pen pen a pat economic development a kipat ding pawimaw hin a gen a, phatchuamna (benefit) chuam chuam mu ding dawl labour card nei tamtak um maleh mitawmcha te’n zia phatchuamna (benefit) chuam chuam um te chu hiachian a hidan uh taklang kawm in, labour card nei phatchuamna (benefit) chuam chuam um te hiachianlo te’n State Labour Department & Labour Unions thuhiat thei ding leh a thuneinau leh benefit um te a hun tak ah a mu theina ding ua demand bawl thei ding uh hin a gen hi. Chuleh, official kua hitaleh labour card nei phatchuamna (benefit) mu ding te a hiding gual tak ah benefit penuamlo a um ua le government in a chung ua action khautak la ding hin a gen hi. Zia hun matna a chun, Chief Minister in telchuam ah um beneficiary te kiang in labour cards piakdawna le a nei a, Kontha Khabam Zilla Parishad Member P. Bimola, Deputy Labour Commissioner E. Tomba, Manipur Building Constructions Welfare Board (MBCWB) Chairperson S. Preshyojit, Manipur Infrastructure Development Agency (MIDA) Vice-Chairman M. Asnikumar leh BJP Heingang Mandal President Kh. Jilla te’n le hun matna a uap ui.

YPA Khominthang kum 7 tinna lawm

Lamka, July 9 ( Nisin Thuhiltu): Young Paite Association (YPA) Khominthang Unit kum 7 tinna tuni’n BDO Conference Hall ah mat in a um a, zia hun chu M. Gouzamang Guite, MDC in Chief Guest hina tawh uap in Khailianthang, President, YPA GHQ in Functional President leh Manlian, President, YPA New Lamka Block in Guest of Honor hina tawh a uap ban un Chin Ngaih Pau, Chairman, CEC YPA GHQ in Chief Host hina tawh a uap hi. Chief Guest Gouzamang in YPA puanlap kaipal in hun matna a kipan a, a thugenna a chun, MDC a hima a pat Khominthang Power Station mun ding leh thiamzilna dawpsangna din ah SSA Residential school mun ding mimal tak ah a piakdaw a hi dan a puang a, zia te chu ama mimal phatchuamna ding hilo ah bialsung mipi phatchuamna ding hizaw leh residential school le maban ah Cl-X chan upgrade a hi theina ding ah panla hi’n a gen hi. Lamka a pau kihiatua ngen chengkhawm, Zosuan te’n gamgi neilo - Philantrophic leh Music ah kihuaikhawm ding dan ngaihtua in midang, namdangte’ ettawn ding in kituaktak a chengkhawm theina ding ah panla ding in YPA puitute a chial hi. Chun, hausa umlona mun te ah mipi’n MGNREGS a phatchuampi theina ding ua VDC bawldaw a um a hi dan le a gen hi. Functional President Khailianthang in Manipur a haksatna tuak hun ah Mizoram kibel a hi banah Economic Blockade um hun a le nisin mamaw van lakna ah kinei a hina ah tuchung Mizoram ah tuilêt leh nimchim thuakkha te panpina piak chu bangma kham hilo maleh Manipur ah Zosuan te a ding ah a panna teu hiatpi suklatna ah YPA in le kithuapi bawl ding ti a hia, unit te kithupina tawh panpina hunkhawp kaikhawm in zia te chu hun lemchang khat ah piakdaw hi ding ti’n a gen hi. Guest of Honor Manlian in YPA Khominthang Unit chu phatchuam ngaina lam ah ettawn tâk Unit khat hi’n a gen a, Social Media a kigensiat tite haisan hawi hi’n a gen hi. Unit kum 7 tinna hun mat zaw in District Hospital Blood Bank tawh kithua in Blood Donation Camp le nei a hia, zia hun a chun pawsal 17 leh numei 3 in a pawimaw te mat ding ti’n a thawn in thisan unit 1 chiat a piau hi.
NT 10july2017b

Album hawnna nei
Lamka, July 9 ( Nisin Thuhiltu) : Mini Auditorium, Dorcas Hall, New Lamka ah tuni’n Pathian pâkkhawmna leh Gospel Music Video Album ‘Phatna Luangkhawm Volume-III’ hawnna nei a hia, zia hun a chun kochuam leh nam ah kikhenchuamna umlo in a chiakhawm te’n lâ ah kipawllimna a nei ui. T. Pumkhothang in a genna ah album masa chu khawng ding ah kiginglo in disc 500 bep a bawl lai ah Pathian malsawmna chang in tuni chan a disc 4,000 val zuakdaw hita a hi dan a taklang a, album kibawl taphawt chu mihingte thupina panglo ah Pathian mel kilatna a hi ding leh entu zosia huapkhak thei ding tupna tawh bawl a hi dan a gen hi. Album chu Kochuam leh nam ah khenchuamna umlo ding ah bawl a um a hi banah angmasialna hilo ah Pathian a pat thu a dawng a pat lâ ah a phuak te kawitupna ding ah album a bawl hizaw hi’n le a gen hi. Rev. S. Vung Minthang, General Secretary, EBC in Album thak chu a hawnna leh Pathian kiang ah latna nei a, Rev. Khen P. Tombing, Chief Coordinator, PCI (R), India a pat thugenna le a um hi. Hun matna kichai in a chiakhawm te’n album etna leh annkuang sawkkhawmna a nei ui. Album sung ah nam chuam chuam a pat Artist chuam chuam in a sak pâkna lâ 11 a um a, a disc a hileh CD Library chuam chuam ah Rs. 150 ah chawk thei ding a hi.

Leaders’ Seminar khakna nei
Lamka, July 9 ( Nisin Thuhiltu): A chiata July 7, 2017 zan ah a la kihawng, Local Church Leaders’ Seminar chu tuni zan in Rev. Lamkhogin Khaute, Chairman, Ministerial Board in a khak hi. Seminar a hileh Evangelical Organisation Church (EOC) ah Ministerial Board in mun chuam chuam ah a la sai uh chiapi zel in Neihsial Veng EOC, Zion Church EOC, Central Church EOC, Hmuia Veng EOC, El-Shaddai Church EOC leh Bethel Church EOC te a ding ah July 7-9 sung Neihsial Veng ah um a hia, Pastor James Th. Minlun, Lamka Nuai Area Pastor in July 7 a khan a hawnna leh latna a la nei a hi. Local Church Leaders’ Seminar hun sung a chun Kochuam 6 te ah department chuam chuam a pat puitute a chiakhawm ua, thupi chuam chuam ah pansa in Evan. TL Mang Vaiphei, Child Promoter; Mr. Elvis Lalven; Rev. Dr. Robert H. Vaiphei, Director of Missions, EOC; Rev. L. Khupboi Vaiphei, Director of Ministries; Rev. Lamkhogin Khaute, Chairman, Ministerial Board; Rev. Harry Muanlal, Executive Director, EOC, leh Miss Ngaithiannem te’n seminar lakna a nei u’i. Zia hun sung a chun, zingkal dak 6:30 a pat kikhawpna kipan a hina ah a chiakhawm te giaklut lo maleu khawtual Kochuam in zingkal leh nitak ah a chiakhawm te nek leh chak ding a bawl piak zing a hi.

World Population Day mang di
Lamka, July 9 ( Nisin Thuhiltu): District Family Welfare Officer (DFWO), Churachandpur mapuina nuai ah a hung tung ding July 11, 2017 sunma dak 10:30 leh YPA GHQ Hall, Hiangtam Lamka ah World Population Day 2017 matna leh Population Fortnight hawnna nei hi ding a hia, zia hun a chun District sung ah PHC/CHC um te ah Medical Officer i/c zosia banah CMO leh DFWO nuai ah Nurse te zosia kimtak a pang ding in DFWO Churachandpur in hiatsakna a bawl hi.

Chief Minister in tuiletna mun chuam chuam entha

Imphal, July 9 ( Nisin Thuhiltu): Manipur Chief Minister N. Biren Singh in tuni’n Imphal East, Imphal West leh Bishnupur districts ah tui letna mun chuam chuam te etthakna a nei a, zia hun a chun a kisaipi official te a hun tak ah nasem ding te haksatna tuak te kituptak ah kithuapi ding in hiatsakna a bawl hi. State government tuilet ziak ah haksatna tung te dinmun etzuina a nei zing tawh kitawn ah zani a khah Centre ah thil umdan piaklut ah um hin le a gen a, himaleh surveys bawlna chiatha zing a hi’n a gen hi. Central Government in a vaima theilam ah kithuapina a piak ding kinem hin le a gen a, mipi te tuhun haksa tak ah hiahiamna tawh um ding ah chialna bawl in State Government in haksatna tuak te a hun tak ah relief material peding hin a gen hi. Tunai ah tuilet in chenna inn a suksiat piak te chu compensation piak hiding in le Chief Minister in a gen hi. Manipur Chief Minister N. Biren Singh in tuni tuiletna mun chuam chua vena a nein ate chu - Imphal East district ah Khurai Salanthong, Haotal, Khabeisoi, Kongpal Kshetri Leikai, Kongpal Khaidem Leikai, Kongpal Kshetri Leikai, Porompat Thawanthaba, Ayangpalli Road, Kongba Mutum Leikai leh Kongba Laishram Leikai te a hia, Kongpal Kongkham Leikai, Amateur Athletic Association community hall leh Ningthem Pukhri Mapal leh Kongba Laishram Leikai ah relief camps te le etthakna a nei hi. Imphal West district leh Bishnupur district ah Nambol Khabi, Nambol Jiri, Konthoujam, Nambol Phoijing leh a kiangnai tuam ah khua chuam chuam te vena a nei a, Parliamentary Secretaries L. Susindro, N. Indrajit, Dr. S. Ranjan leh State Government top official tamtak in le CM a zui ui.
NT 10july2017c

Chief Secretary lui O Nabakishor in a chung ah ngawna pawmlo

Imphal, July 9 ( Nisin Thuhiltu): Manipur Chief Secretary lui Oinam Nabakishor in nekgukna (corruption) ziak ah a panmun a pat paithak hi ah ngawna um chu pawmlo a hidan tuni’n a gen a, Manipur Development Society, MDS scam tawh kisai ah ama bawlkhial bangma umlo hin a gen hi. MDS case tawh transfer ah a umna’n kizawp matna neikhalo hin le a gen a, ama mimal lemchanlona ziak ah Voluntary Retirement dawn hizaw a hidan taklang kawm in government in Voluntary Retirement ding ah dawtna a siam pawmpiak a hitakdan a gen hi. Manipur Development Society, MDS scam tawh kisai a genbelapna a chun, Manipur Development Society, MDS ah Chief Secretary in Ex-Officio Chairman panmun lua a hidan a gen a, Chief Secretary role chu MDS meeting mapui ding a hidan genkawm in, ama hun sung ah Chief Secretary in MDS account operate bawllo a hidan a gen hi. MDS account chu Project Director / Administrative Officer te’n operate a bawl uh a hidan le a gen a, ama‘n bawl khial bangma neikhalo hin a gen hi. Chuleh, ama Chief Secretary a hi masang ah MDS chiadan dilo um hiding hin a gen a, vigilance department in thil umdan suizuina a nei tak bak ah Govt. thak in CBI khut ah a case a piakdaw a hina, CBI enquiry zaw tak leh thil umdan details suadaw hiding in a gen hi.

Report leh utilization certificate piaklut a la hiseklo ziak ah teacher te thalaw vaigei sek

Imphal, July 9 ( Nisin Thuhiltu): Education Minister Thokchom Radheshyam in tuni’n T. G. Higher Secondary School ah social service conduct a bawl a, zia hun a chun, T. G. Higher Secondary School ah seat capacity, seat 150 ah sukpunbe hiding in a puang hi. Student leh parent te khualna seat capacity sukpun ding ah lemsakna um hin le a gen a, thasin leh government school khatbek chuan ah social service a nei zing thei ding kinem hin a gen hi. Zia hun a chun teacher te haksatna le ngaithak piak in thasin date 1 leh teacher te’n thalaw (salary) a mutheina ding ua panla ding hin a gen a, teacher te chu kipiazo tak ah student te a kitup thei ding pen ah ziltilna nei ding in chialna a bawl hi. T. G. Higher Secondary School ah social service chu Director Education (S) Th. Kirankumar, Engineering Team leh Education Department Official te, Principal, Teachers leh Non-Teaching Staff te a pang ui. Education Minister Thokchom Radheshyam in Sarva Shiksha Abhiyan (SSA), Rashtriya Madhyamik Shiksha Abhiyan (RMSA) leh Rashtriya Uchchatar Shiksha Abhiyan (RUSA) nuai ah teacher te thalaw (salary) tawh kisai ah hilchianna a bawlna a chun, Centrally Sponsored Scheme (CSS) nuai ah chiapi a hi dungzui ah a hun tak tak ah financial aid tungzing a hi bak ah civil component leh salary chu sanctioned khawm hisek in a gen hi. Scheme nuai ah construction work te le huntiam sung ah zawthian ding leh a hun tak ah report piaklut ding pawimaw hin a gen a, himaleh a hun tak ah report leh utilization certificate piaklut thei a la hilo sek ziak ah a hun tak ah funds release hiseklo hin a gen hi. Ama leh official te’n a kisaipi thuneitu te kiang ah salary leh civil component te a chuam chuam ah kawi ding ah dawtna siamta a hidan uh le a gen hi. Zia hun matna zaw a chun, Minister Thokchom Radheshyam in ama constituency huapsung mun khenkhat ah lampi a hawilo ziak ah mipi’n haksatna tuak a hidan uh social media ah suklat ah um te kanzuina nei in, Sikhong Bazaar leh Yairipok kawmtuana lampi Nongpok Sekmai leh Lourembam Pechi Chinglak to Shikhong Sekmai ah lampi siatna te siamphatna nasep a nei ngal hi.

Music in khat leh khat eikankhawm : Deputy Chief Minister

Imphal, July 9 ( Nisin Thuhiltu): Maharaja Chandrakirti Auditorium, Palace Compound, Imphal ah ll Manipur Matam Eshei Kanglup (AMMIK) saina’ ni 2 sung Musical Festival & tribute to legendary Singers of Manipur “Kaongamdraba Ishei” mat ah um chu tuni’n khak in a um hi. Festival closing function chu Manipur Deputy Chief Minister Yumnam Joykumar Singh in khuallian hina tawh a uap hi. Deputy Chief Minister in a thugenna a chun, laa (song) in khat leh khat kal siam hawi chuam mama hin a gen a, laa lui leh laa thak ngai leh hiatna a pat kipumkhatna chi chuam bik um thei hin a gen hi. Hun matna uap Education Minister Th. Radheshyam Singh in a thugenna a chun, laa a pat society dinmun hiattheina um a hidan a gen a, kipakna tun thei a hidan le gen in, artists leh musician te’n ngaithatu te a ding ah mawpuakna liantak nei hin a gen hi. Zia hun matna chu renowned Musicologist, Laishram Birendrakumar Singh, President, Apunba Manipur Matam Ishei Kanglup (AMMIK), S.Tijendra, Artists of Manipur te’n le a uap ui.

42 Assam Rifles in tuithiang dawn ding pia

Moirang, July 9 ( Nisin Thuhiltu): Sendra (Loktak) ah um 42 Assam Rifles Troops te’n area mipi t etui thiang dawn ding piakna tuni’n a nei ua, Moirang leh a kiangnai tuam ah mipi tamtak in tui a kilak ui. Tuilet ziak ah tui thiang dawn ding mu a haksatna chung ah local mite khualna Assam Rifles in ziagual kithuapina chu a nei uh a hi. A langkhatlam ah local mite’n Assam Rifles Troops te panlakna chung ah kipak ma ma a hidan uh a puang ui.

Imphal – Jiribam lampi chimtha; gari tamtak tângdeng

Imphal, July 9 ( Nisin Thuhiltu): Manipur ah tulak gua a zuk zingna chung in tuni’n Imphal – Jiribam (NH 37 ) kawmtuana lampi, Sinam village kiangnai Tamenglong district in a chim a, gari taitua theilo in a um hi. Lampi a chipthak tawh kitawn ah Border Roads Task Force nuai ah semtu ten lampi suthiang in lampi siamthakna nasep a pan ua, himaleh lampi mawk siam daw kiat ziang thei a hilona chung in a lang a lang ah thautui pua leh nisin pawimaw van pua tamtak a tângden ui. Official thusuak in a taklatna a chun, lampi kituptak ah siamthak a hi masang sia gari lian (heavy vehicles) te taithei lo ding un a gen a, gari khenkhat in lampi siamzaw ding Jiribam ah ngak un a kigen hi. Chuleh, Imphal a pat passenger te le tai theng theilo ah kinung le ua le hiat a hi.

NT 10july2017d