Nisin Thuhiltu - 07 July 2017

User Rating: 0 / 5

Star InactiveStar InactiveStar InactiveStar InactiveStar Inactive
 

SP Office ah Police canteen hawnna nei

Lamka, July 6 (Nisin Thuhiltu): Superintendent of Police (SP), Ccpur Office, Tuibong huang sung ah District Police Department te a ding ah kibawl Police Canteen lua thei ding ah zaw thiang a hitawh kitawn in hawn in a um a, zia hun a chun Police Department ah Rank Officer chuam chuam te pang in CCpur/DC Shyam Lal Poonia IAS leh CCpur SP Rakesh Balwal IPS te’n Police Canteen hawnna a nei ui. Canteen a chun nisin mamaw van chi chuam chuam - Sabawn, Surf, Samphoo, Face & Hand Wash, Lotion, toothpaste, Juice, Samthau, Noddle tite pang in van chuam chuam a um a, SP Office leh Treasury office a hi ding chuam chuam nei te dawn thei ding in coffee le a um hi. Canteen a chun police personnel te’n Smart card/Swipe card a pat amau a ding ah limit kipia chan van chuam chuam bazar rate sang ah niam zaw chaw thei ding a hiu. Police canteen a hileh Police headquarter in 2012 a pat district tin ah police te a ding canteen um sak vek ding tia Koirenggei ah BSF tawh kithua ah a pat a hia, canteen a van chuam chuam kikawi te chule BSF, Koirenggei a pat laksawn a um leh a kizuakdaw dungzui a lak be hi ding in a kigen hi. Canteen chu thingpi hotel ding ah mat a la himaleh Rakesh Balwal, IPS in CCpur SP panmun a lua a pat Police Canteen ding ah puathak a um in tunung sawtlo ah Manipur DGP LM Khaute, IPS in official tak ah a hawnna nei ding hi’n le a kigen hi. Canteen ah SP a pat SDPO chan te’n tha 1 ah Rs. 1000/- chan van chaw thei ding a hiu a, Inspector a pat ASI chan te’n Rs. 750 leh Head Constable a pat VDF personnel chan te’n Rs. 500 chan van chaw thei ding a hiu.

Tuiletna area ah lobawlmi te a ding bu-chi kiningting tak um;Haksatna tuak te ding ah anchang 12,000 metric tons hawpdaw hidi: Chief Minister

Imphal, July 6 (Nisin Thuhiltu): Manipur state sung mun chuam chuam ah tui let ziak ah haksatna tuak te kithuapina ding ah anchang 12,000 Metric Tons hawp ding ah sukfel hita a hidan Chief Minister N. Biren Singh in tuni’n CM Secretariat ah press conference hun in Minister for Agriculture, Veterinary and Animal Husbandary V. Hangkhanlian leh Minister for CAF & PD Karam Shyam uapna’n a taklang hi. Tui let ziak ah nisin pawimaw thil chuam chuam taksapna a tun tawh kitawn ah state government in haksatna tuak te dawn zangkhai theina ding ah panlakna nei zing hin le a gen a, anchang hawp ding te chu Rs 22.53 per kilo hiding in le a taklang bawk hi. Tuilet ziak ah lobawlmi te patau lo ding in le N. Biren Singh in chialna a bawl a, tuilet ziak ah haksatna tuak lobawlmi te a ding ah ni 100 sung ah a ga lak thei ding bu-chi, RC Maniphou-12(RCM12) leh Maru Taru University-1010(MTU1010) kining ting tak um hin a gen hi. Bu –chi chu lobawl mite a thawn (free) ah piak hiding a hidan uh taklang kawm in, tuilet ziak ah lo (paddy field) 40,000 hectare buaipha hin a gen hi. 40,000 hectares lak a chu Imphal East ah 14,079 hectares, Imphal West ah 7,700 hectares, Thoubal ah , 9,000 hectares, Bishnupur ah 9,210 hectares leh Urkhul ah 20 hectare buai in a gen a, agricultural targeted area 1,95,000 hectares lak ah 20.51 percent te tuilet in suasia’n a gen hi. Chuleh, government in tunuung sawtlo ah tui in a chup total area chu hiachian paita ding hin a gen hi. Minister for Agriculture, Veterinary and Animal Husbandary V. Hangkhanlian in a genna a chun, Agriculture and Veterinary department leh mobile team, Veterinary department a patRapid Action Teams 5 te’n doctor 2 mapuina leh field assistants te kithuapina tawh tui let na gancha um te a pawimaw dungzui ah vaccination bawl a hidan uh a gen a, farmer te a ding ah Mobile Plant Health camp siamdaw ah um hin a gen hi. Minister for CAF & PD Karam Shyam in a genna a chun, Nation Food Security Act (NFSA ) nuai ah Public distribution system (PDS) anchang te zawk (sale) ding Government in a khap (banned) a hidan taklang kawm in Union Ministry of Consumer Affairs & Food and Public Distribution thuhiat ah a um nung ah Centre in tui let ziak ah haksatna tuak te kithuapina ding ah anchang 12,000 metric tons pawdawk ding ah lemsakna a nei hin a gen hi. FCI godown ah NFSA nuai ah anchang kining ting tak um hin le a gen a, district 8 a ding NFSA rice quota 90550.90 quintal puakdaw ah um nailo hin a gen hi. A kisaipi thuneitu te anchang kilak ding ah chialna bawl kawm in, kituptak ah PDS anchang hawp a hitheina ding ah July tha a ding allocate kibawl hin a gen bawk hi. Thuthak lakhawm mite’n thil chuam chuam suizuina tawh kisai ah government panlakna tawh kisai ah dawtna a siam uh Chief Minister in a dawnhuna a chun, Manipur Development Society (MDS) nasep hawilona case um te Central Bureau of Investigation khut ah piakdaw ah um hin a gen a, substandard police belt leh CCTV installation scam tawh kisai khualna a hileh zawthian vang hita a hidan gen in tunung sawtlo ah mipi hiat ah suklat hiding in a gen hi. Parliamentary Secretary (Minor Irrigation and Agriculture) Shri Awangbow Newmai, Additional Chief Secretary(Agriculture), Dr. Suhel Akhtar, Director, Veterinary Department, Dr H Chaoba Singh, Director, Agriculture Department, Ph. Rajendro Singh te’n le zia press conference chu a uap ui.
NT 07july2017b

Manipur Chief Secretary thak ding Mr Rajani Ranjan Rashmi

Imphal, July 6 (Nisin Thuhiltu): Manipur Chief Secretary thak ding ah 1983 batch, senior IAS officer tu leh tu Ministry of Environment, Forest & Climate Change, Government of India ah Special Secretary Mr Rajani Ranjan Rashmi guat in a um hi. Ama’n tu ah Manipur Chief Secretary Oinam Nabakishore Singh , IAS, 1984 Manipur-Tripura cadre thasan ding a hi. O. Nabakishore Singh ahileh Director General, State Academy of Training (in the apex Pay Scale) mawpuakna tu ding ah transfer bawl in a um a, M.H. Khan IAS, tu leh tu Principal Secretary (AR/Relief & DM/Science & Tech/ Fisheries) leh Director General, State Academy of Training mawpuakna tukawp chu DG/SAT mawpuakna nutsia sak in a um hi. Manipur Chief Secretary thak ding Mr Rajani Ranjan Rashmi ahileh experience hau mama leh government of India nuai ah Commerce & Industry, Government of India, Director of Europe Division (1998 to 2001), kum 2014 tiang ah Advisor, Trade in India’s Mission to European Union in Brussels ah le a la pang a hia, administrator hina tawh North East ah le a la sem leh a nasep hawi ziak ah kum 2008 ah Prime Minister’s Award for Excellence in Public Administration a la dawng a hi. Chuleh, Patna University ah Economics ah graduate a la zo, Free University (Vriet Universitiet) of Brussels ah MBA zo le a hi.

ZC Gen. Secy in ‘Workshop on Zo Script’ hawnna nei

Lamka, July 6 (Nisin Thuhiltu): Zomi Language & Literature Society (ZOLLS) saina’ ni 2 sung um ding, “The First Workshop on ‘ZOLAI’ (Zo Script)” chu tuni’n ZOLLS Conference Hall, New Lamka ah hawnna nei a hi. Zia hun a chun, S. Dal Sian Pau, Secretary General, ZOLLS in Workshop tawh kisai genlatna nei in Khamneithang Vaiphei, General Secretary, Zomi Council in Workshop chu Zosuante a ding ah kihiattuana leh kihiatthiamna hawizaw bawltu leh Zosuante a ding ah kipumkhatna tuntu a hi ding dawisakna tawh a hawng a, Rev. ST Kaia Vaiphei, Executive Secretary, Manipur Synod in pauchapna tawh Pathian kiang ah latna leh hunkhakna a nei hi. Dal Sian Thang in Zo Sript chu 1930 kum ah Indian Script khat a tepte a um hi’n a gen a, Script bawltu Pauchinhau Sukte in Jesu Krist a hiatlo ziak ah Khristian sakhua ah lut nung a pat Zo Script ti sang ah Pauchinhau Lekhamal tisak a um hi ah genlang kawm in Script nei in nam hausa leh mi hiat nam hisak hi’n le a gen hi. Workshop hawngtu Khamneithang in zia gual ah Zo Script zil thei na ding ah panla ZOLLS chung ah kipak thu puang kawm in namsung ah Script nei in gen nei mama a hina ah ei Zosuan te’n Script kibang mangthei kihileh kihotuana ah buaina umlo ding, kihiatthiamna leh kipumkhatna hawizaw um ding ah gingcha hi’n a gen hi. Workshop ding in Myanmar ah Laipian Phungpi a pat Zuanliankhup leh Liankhatsuan banah China ah Ph.D in Mathematics simlai, Mun Suan Lian, M.Sc. Mathematics te’n ni 2 sung ziltilna pia ding a hiu.
NT 07july2017c

Aktui zuakna leh bakery te entha

Lamka, July 6 (Nisin Thuhiltu): Food Safety Officer Bisosana malatna nuai ah Food Safety & Standard Wings, Churachandpur in tuni’n khawpi sung mun chuam chuam phakual in aktui zuakna leh bakery hunkhawp te entha in a mudaw te tawh kisai Press/Media ah Report a bawl hi. Report a piak dungzui in, tulai ah China a pat kipan a kigen, plastic a kibawl aktui tawh kisai Imphal chan tung te hi ah kigen chu kuama’n lauthawnglo ding in a dawn a, khawpi sung ah supply lianpen KK Store, Hmuia Veng leh Mansoor Store, Rengkai Road a pat aktui kizuak te chu Silchar a pat a hiziak ah bit hi ah puang kawm in plastic a kibawl hi ding ah gingmaw te’n aktui hawng hal a pat bailam tak ah hiatdaw thei ding hi’n a gen hi. Bakery tawh kisai a genna a, khawpi sung a Bakery tamzaw in Manufacture Date chuangsaklo uh a hi dan genlang kawm in a huan (baking) hun ua Newspaper a kichûn a hi banah tuanglai ah packing kibawl a hina ah damthei huailo leh thiangtho zolo sa a hi’n le a gen a, kuama’n WhatsApp leh Facebook ah thu kizikte lauthawngna’ lalo ding in le a dawn hi.
NT 07july2017d

ADCC Chairman in New Bazar ah van kizuakna te entha

Lamka, July 6 (Nisin Thuhiltu): Khaipao Haokip, Chairman, ADC Churachandpur malatna nuai ah Churachandpur Autonomous District Council in New Bazaar kîmlak ah Building um te leh sa zuakna mun tuni’n etthakna a nei a, zia hun a chun, New Bazaar a malcha zuakna lampang Building kibawlthak, linling ziak ah sia hi ah a mu ziak ah lua tâk hilo ah mudawk in bawlthak dingdan ngaitua hi ding in ADCC Chairman in a gen hi. Red Cross Road-Tedim Road Junction simlam pang a um ADC gam ah building kibawlthak le etthakna a nei u’i. Chun, lampi zul ah me ding anche, sâ leh sa minsa zuak te kiang a le license ngaitua ding in a hiatsak a, Trade Licence neilo ah kuama’n sumkawl veilo ding ti’n le a gen hi. Sa lane kiang ah me zuak te le lampi ne talua lo ding ah hiatsakna bawl kawm in zia tawh kisai chu zing a pat District police tawh kithua ah etthâk hi zing ding le a gen hi. Chuleh, Sa Lane thiangtho na ding leh a kiang tuam ah nullah te bawl thak hi ding in le Khaipao Haokip in a gen hi. Zia hun a chun T. Kammuanlal Simte, CEO, ADC Churachandpur, Town Development & Planning Portfolio tû, V. Khaikhanmung, Vice Chairman, Executive Member P. Kamkholal leh Paukhanlian banah ADC Town Office Staff hunkhawp te’n ADCC Chairman a zui u’i.
NT 07july2017e

Malaria tawh kisai ah Review Meeting um

Lamka, July 6 (Nisin Thuhiltu) : Dr. Jamthianlal, District Malaria Officer (DMO), Churachandpur malatna’n CMO Mini Conference Hall, CMO Complex ah tuni’n Review Meeting um in zia hun a chun 2020 chan ah District sung ah Malaria natna beisak ding ah thupiak a um dungzui ah nasep ding dan leh ASHA incentive tawh kisai genkhawmna a um hi. Meeting a chun, Male Health Supervisor te’n thingtang khua ah PHC umte mang ah damdawi a pawimaw dungzui ah hawm ding banah kângkal hawmding leh thokanglo kap (Fogging) ding tawh kisai amau un pawimaw a sakna munteu a hi ding in a thupuk ua, ASHA incentive le PHC a Microscopist te’n a piakdaw ding uh leh thisan test (Slide Testing) le PHC zosia ah bawl a hi theina ding ah panlak hiding in a thupuk u’i. Zia hun a chun, S. Thangthianmuan, District Consultant, NVBDCP banah District sung ah PHC chuam chuam ah Malaria Staff, Male Health Supervisor leh Microscopist ti te a pang ua, zing, June 7 leh Meeting sutzawp hi ding in zia hun a chun Male Health Worker (MHW) leh Multi-purpose Worker (MPW) te pang ding a hiu.
NT 07july2017f

Thingno phu di
Lamka, July 6 (Nisin Thuhiltu): Joint Action Committee Against Anti-Tribal Bills (JACAATB) in zing, July 7, 2017 zingkal dak 7:00 leh Tribal Martyrs Park bawlna ding tawh kisai in Park ding mun ah Forest Department tawh kithua in thingno phu ding a hia, zia hun a chun Tribe, Philanthropic Organization leh pawl chuam chuam puitu te banah lunglutna nei mimal kuamasap thingno phuna ah pang ding in chialna leh hiatsakna a bawl hi.

YPA NL Block in bawng 9 man
Lamka, July 6 (Nisin Thuhiltu): Young Paite Association (YPA) New Lamka Block in New Lamka huapsung ah enkawl tu leh chingtu umlo ah gancha zalentak ah thadaw phallo hi ah thupuan a la bawl tawh kitawn in tuni’n bawng hunkhawp mat in a um hi. man uhi. Bawng mat tawh kisai ah YPA New Lamka Block President S Manlian in a genna a chun, YPA Block in khawpi sung thiangthona ding leh gan thazak ziak ah thiltung dawi umlo vengna ding ah gancha thazak khapna bawl in zia tawh kisai ah tuni zingkal ah a enkawltu leh a chingtu umlo bawng 9 man a hi dan a puang dawk a, bawng nei tu’n tuni a pat ni 3 sung ah bawng kawlman pia in YPA New Lamka Block puitu te kiang ah la thei ding uh hi’n a hiatsak hi.

Eimi Pâkbawm
Lamka, July 6 (Nisin Thuhiltu): A hung tung ding July 8, 2017 zingkal dak 8 leh LT Saulim (Pa Thangkam Inn), Lanva ah Eimi Pâkbawm (Eimi Flower Pot) hawnna um ding a hia, zia hun chu Langkhanpau Guite, MDC in le uap ding leh a hawnna nei ding a hi banah Khupkhanlal in Eimi Pâkbawn kipat dan genlatna nei ding a hi. Chun, Chingthaingai, Proprietor, MS Grace Dry Flower leh Dimngaihching te’n le thugenna nei ding a hiu.

Manmahotsava mang ding
Lamka, July 6 (Nisin Thuhiltu): North East India Tribal Development Foundation, Lamka saina nuai ah zing zingkal dak 6:30 leh Manipur Government nuai a scheme khat - Manmahotsava kiti kum khat a thingno phuni ah kimang sek chu um ding a hia, zia hun a chun Dorcas Veng area a lampi dung ah thingno phu hi ding a hi. Zia hun chu Southern Forest Division, Churachandpur in a sponsor a hia, lunglutna nei banah a bik ah New Lamka West huapsung ah school leh VA member te pang ding in CT Lian Guite, MDC, New Lamka West in chialna a bawl hi.

Social Welfare Minister Nemcha Kipgen in panpina anchang bag 41 pia

Imphal, July 6 (Nisin Thuhiltu): Manipur Social Welfare and Cooperation Minister Nemcha Kipgen in thutiam a bawl dungzui in tuni’n Deputy Director (Disability), Social Welfare Manipur Dileep Singh in Minister Nemcha Kipgen thasik in at Takyelpat, Imphal ah Government Ideal Blind School, Government Deaf & Mute School, Observation & Special Home for Juvenile in conflict with law & Children Home te leh BB Paul School, Monsangei & Mission Blind School, Heikakpokpi, Pallel Chandel ah schools thuneitu kiang in annchang bag 41 (institute khat ah anchang bag 5) piakdawna a nei hi. Mission Blind School Headmaster, Pareng in thutiam taksua ah a umna chung in Manipur Social Welfare and Cooperation Minister leh a kisaipi thuneitu te chung in kipak thu a gen hi.

20 July ah Assembly Second Session um ding
Imphal, July 6 (Nisin Thuhiltu): Manipur Governor Dr Najma Heptulla min ah M Ramanni Devi, Secretary Manipur Legislative Assembly in tuni thusua a bawlna a chun, a hung tung ding 20 July 2017, zingkal lam dak 11:00 leh Assembly Hall, Imphal ah 11th Manipur Legislative Assembly Second Session um ding hin a taklang hi. Hiatthei khat chu Cabinet Hall, Chief Minister Secretariat ah 5th July2017 ni ah Chief Minister N. Biren Singh chairman hina nuai ah State Cabinet meeting hun ah July 20, 2017 ah 11th Manipur Legislative Assembly Second Session (Budget Session) kipan ding ah State Cabinet in thupukna a siam hi le a hi.

Manipur Disaster Management Authority siamthak

Imphal, July 6 (Nisin Thuhiltu): Manipur Governor Dr Najma Heptulla min ah M.H. Khan IAS, Principal Secretary (AR/Relief & DM) Government of Manipur in tuni thusua a bawlna a chun, Disaster Management Act, 2005 nuai ah section (2, sub- section (I) ah thuneina piak ah a um dungzui ah governor in Manipur Disaster Management Authority siamthakna nei a hidan a taklang a, zia dungzui a chu Manipur Disaster Management Authority chairperson ding ah Chief Minister guat ah um leh Adim Pamei, Tamenglong chu Vice Chairman ding ah guat ah um hin a taklang hi. Chuleh Chief Executive Officer, ex-officio ding ah Manipur Chief Secretary guat ah um a hidan taklang kawm in Member ding ah Director General of Police (DGP) Manipur, Addl. Chief Secretary (PHED), Addl. Chief Secretary (Agriculture), Addl. Chief Secretary (Home), Principal Secretary (Relief & DM), Secretary (Health),Secretary (IFCD), government. of Manipur te guat a hidan uh a taklang hi.

Ni 1 sung ah thingno lakh 1 phu hidi
Lamka, July 6 (Nisin Thuhiltu): Kum sin leh July first week “Vanamahotsava” ah mat a hisekna chung ah tukum ah le Vanamahotsava mat ah um ding a hia, Manipur Forest department mapuina nuai ah July 7, 2017 zingkal dak 7 a pat Churachandpur District huapsung mun chuam chuam ah le a kisaipi thuneitu te leh volunteer te’n thingno phuna nei ding a hiu. Manipur Forest department in ziana ding a chu kisaklawkna bangkim zo vekta hin a kigen a, ni khat sung ah thingno lakh 1 phu ding ah guanggalna nei hin le a kigen hi. Zia thingno phuna chu local body chuam chuam - clubs, organisations, institutions, village 150 tawh kithua ah thingno phuna um ding a hi. Chun, Manipur Forest department in tu season sung ah mun chuam chuam 30 ah thingno chi chuam chuam a kigawm ah thingno lakh 9.95 phu ding in kisaklawkna a nei a, zia zat thingno kiphu chun Kangla Fort area ahiloleh Imphal town area huapsung tia, cover zo ding hin le a kigen hi. Thingno phuna campaign ah pang nuam te’n division zosia Divisional Forest Officers te thuhiat thei hiding a hi.

RMSA teacher te’n Director office chabi kampiak
Imphal, July 6 (Nisin Thuhiltu): Rashtriya Madhyamik Shiksha Abhiyan (RMSA) nuai ah teacher te’n tha 7 lam thalaw a mutaklona chung un tuni’n kiphinna a nei ua, Imphal ah Director of RMSA, office chabi a kam ui. Manipur Press Club ah RMSA Graduate Teachers’ Association, President N Prakasana in kiphinna a neina ziak uh a genna a chun, RMSA nuai ah teacher te’n November 2016 a pat thalaw (salary) mutalo a hidan uh a gen a, Chief Minister leh Education Minister kiang ah le thil umdan tutta a hidan uh a gen hi. Government in June 2017 tiang ah thalaw piak hiding ah thutiam bawl maleh tuni tiang ah a mu diaklo ziak ua kiphinna pan a hidan uh a gen hi.

Actor Sushant Singh Rajput in Imphal ah shooting bawl

Indian film leh television actor Sushant Singh Rajput chu a next film “Jai Jawan” shooting bawl in tulak Manipur in hun a mang a, Mantripukhri ah CRPF jawan te tawh traning bawl in a um hi. Chun, Hotel Classic Grand, Chingmeirong pansa hin a kigen hi.