Nisin Thuhiltu - 04 July 2017

User Rating: 0 / 5

Star InactiveStar InactiveStar InactiveStar InactiveStar Inactive
 

HSO President kaplumtu hiding ah muanmaw kimandawk; KSO in huntiam umlo general strike chawlsan

Lamka, July 3 (Nisin Thuhiltu) : Langol Game Village Zone 1, Quarter No. B-343 ah a chiata 23 June 2017 nitak ah (L) Letkholal Haokip @ Palal, President, Haokip Student Organisation (HSO) kaplumtu hiding ah muanmaw Solomon Baite (38 years) s/o (L) Thangjangul Baite of Moreh Ward No.1, Tengnoupal District chu tuni, 3rd July 2017 nitak lam dak 3:30 tuam in Imphal West District Police in a man dawk hi. Police thusuak in a gendan ah combined/joint District operation nasatak ah nei a hi nung ah prime accused Solomon Baite, 38 chu matdaw ah um hin a gen a, (L) Letkholal Haokip @Palal kaplumtu ah kipuang in le a taklang hi. Zia ah kithana tawh kisai a chu Lamphel Police Station ah FIR No. 307/326 IPC & 25 (1-B) added 302 IPC ah case registered a hi. A langkhatlam ah (L) Letkholal Haokip @ Palal, President, Haokip Student Organisation (HSO) kaplumtu te matdaw ding phutna Kuki Students’ Organisation (KSO) General Headquarters in 4th July 2017 a pat hun tiam umlo bandh bawl ding ah a puan chu a chawlsan a, SP mapui Imphal West police force in tualthattu te matdawna ding ah panlakna nasatak a neina chung un KSO in pakchatthu a a puang a, mat ah um pa a pat thil umdan kituptak suizui ding leh kaplup ah um (L) Letkholal Haokip @ Palal insungmi te leh CSOs leh public dawidan ah action lak ding dawi a hidan taklang kawm in gun culture tawh hinkhua kimang khawk a sakthu le a taklang bawk hi. Chuleh, Manipur Chief Minister Nongthombam Biren Singh leh KSO leader te’n tuni ni taklam in Manipur DGP L M Khaute panna zia kithana chungchang in kihona a nei ua, Chief Minister in facebook ah a taklatna a chun, (L) Letkholal Haokip @ Palal, President, Haokip Student Organisation (HSO) kaplumtu hiding ah muanmaw matdaw a hi tak tawh kitawn ah KSO, GHQ in huntiam umlo general strike chiapi ding ah a puan chawlsan a hitak dan a taklang bawk hi.

Emergency Flood Review Meeting nei;‘State Calamity’ ah puan ah um

Imphal, July 3 (Nisin Thuhiltu) : Manipur Chief Minister N. Biren Singh mapuina tuni’n Chief Minister Secretariat ah Manipur tuiletna tawh kisai in emergency Review Meeting a um hi. Zia emergency review meeting a chun, IFCD Minister Letpao Haokip, Education Minister Th. Radheshyam, Chief Secretary O. Nabakishore, Additional Chief Secretary, Principal Secretary, Commissioner, DC leh department chuam chuam ah Director te a pang ui. Meeting hun ah official leh a kisaipi DC te’n report piak nung un, tu ah state dinmun chu ‘State Calamity’ ah puan in a um a, ziagualma a chu Chief Minister N. Biren Singh in Central Government in le Manipur state ‘severe nature’ ah a puan ding in dawtna (request) a bawl hi. State sung ah mitamtak in tui let ziak ah haksatna a tuakna chung ua 24x7 State Disaster Control Room, telephone number 0385-2443441 hawn in a um a, haksatna tuak te’n Disaster Control Room a thuhiat thei ding uh ti a hi. State Disaster Control Room kihawng thak chu a umsa Irrigation & Flood Control Department (IFCD) Flood Control Room, telephone number 0385-2451550 bak ah a kihawnbe a hi. Meeting hun ah Chief Minister N. Biren in a kisaipi official te, tuilet na District te ah medical camps pani tiang bek hawng ding in thupiak a nei a, Directorate of Health Services leh Directorate of AYUSH a pat Nodal Officer 2 gel appoint bawl in a um hi. Nodal Office te’n tuilet ziak ah haksatna tuak te health/medical tawh kisai a etzui ding uh a hi. Chuleh, Directorate of Health Services chu phone number 9862284898 leh 9436206298 ah contact bawl thei ding, Directorate of AYUSH ahileh 9862003144 leh 9436894604 ah thuhiat thei ding a hi. Chief Minister in IFCD official te chu tuilet dodalna ding ah van mat kiningting tak arrange bawl ding in hiatsakna a nei a, Deputy Commissioner te chu haksatna tuak te a pawimaw dungzui ua relief material peding in a hiatsak bawk hi. A langkhatlam in Chief Minister in Veterinary Department chu tuilet ziak ah haksatna tuak, gancha te etkawltheina ding ah panla ding in hiatsakna a bawl a, PHED official te tuithiang dawn ding arrangement bawl ding in thupiak a nei hi. PHED official thusuak in a taklat kitna khat a chun, tui thiang dawn ding pua water tanker pani gel Thoubal leh Imphal East district tungta leh tanker khat Imphal West tungta hin a gen hi.
NT 04july2017b

“Pakna Gihaw” kiti album hawng ding

Lamka, July 3 (Nisin Thuhiltu) : “Pakna Gihaw” kiti New Delhi ah um laa thiam chuam chuam in a siam uh Vaiphei Gospel Music Video album thak chu a hung tung ding 8th July 2017, nitaklam dak 4:00 leh Mizoram House, Visant Vihar, Delhi ah hawn hiding a hi. Release zaw a hitak leh Manipur leh mun chuam chuam ah zawkdaw ngal hiding a hi.
NT 04july2017c

Zu leh tobacco product hunkhawp mandawk

Lamka, July 3 (Nisin Thuhiltu) : District police in khamthei dodalna a chiapi zing tawh kitawn in tuni sunma dak 11:30 vel in M. Kumarjit Singh, Addl. SP (Ops), Ccpur, Inspector Anil Kumar Singh, OC Police Station, H Jonny Sharma, SDPO CCpur, Chiinneilam Gangte, Women Police Officer mapuina Civil leh Women Police team khat in khawpi sung mun chuam chuam ah zu leh pan dukan chuam chuam check a bawl hun un, zu leh tobacco product hun khawp a man dawk ui. Zu matdaw ah um te chu - Cane Beer 12, Rs. 1980 man kingfisher beer bottle 11, Rs 750 man Distilled Illicit Country-made (DIC) Liquor/Local Zu liter 7 leh kim, Rs 450 man Rum old monk bottle khat leh kim, Rs 1890 man Grape Juice bottle 27,Rs 250 man Magic Moment half bottle, Rs 800 man Whiskey Officer Choice bottle 2 a hia, matdaw ah um zu leh beer kigawm ah Rs 7920 man a tung a, tobacco product kiman dawk te ahileh Rs 960 man Sajaan packet 8, Rs 1260 man Talab packet 9 a kigawm ah Rs 2220 man a hi zo a, zu, beer leh tobacco product matdaw ah um te a kigawm ah Rs 10, 140 man a hi. Zu leh beer te ahihleh Super market, Zenhang Lamka ah hotel bawl Ranjita leh Remita banah Don bosco Higher secondary school opposite ah dawr bawl Sarita Dukan a pat a hia, tobacco product te ahileh Tedim Road Axis Bank zul a pat dukan bawl Diphu Store leh Ranjit Store a pat matdaw a hi. Mat ah um van zuak tute chu women police in Magistrate ah a dinsak ngal ui.

CDSA in cabinet keklian; Club te hiat ding ah thusua bawl
Lamka, July 3 (Nisin Thuhiltu) : Churachandpur District Sports’ Association (CDSA) puitu ding ah teltin thak ah um te’n mawpuakna a lak uh tawh kitawn in Cabinet Expansion bawl in tuni’n 2017 – 2021 sung CDSA Executive Council member ding suadawna a nei ui. Zia dungzui a chu President - G. Thiauthianmung, Vice President - TK Lal, Kamthang, James Thangluai, Ginsuanlal Zou, Treasurer-Lalkholun Kipgen, Honorary Secretary- SN John, Assistant Secretary-Thangzasong, Finance Secretary-Lalawmthanga, Joint Secretary-Siehlam Singson, Muon Di Neihsial leh L. Benjamin Munluo, Co-opted Joint Secretary - Elvis Sanglian Tonsing, Seiminlun Kipgen, D. Khaiminlen Haokip, Kamthainminlun, Lianminthang Taitom, Muandoulian Ngaihte, Lalramhlun leh C. Thangboi Haokip te a hiu a, Cabinet Expansion a bawl zaw uh tawh kitawn in District sung ah Club um te hiat ding ah thusua bawl in, Fresh Affiliation, Renewal, Transfer leh Loan Player bawlthei hunsung July 15, 2017 chan hiding, CDSA Office, Hiangtam Lamka a zingkal dak 7:00 leh dak 9:00 kikal sung Seppatni, Sepkitni leh Kiginni zosia bawl thei ding, Fresh Affiliation Fee Rs. 3,000, Renewal Fee Rs. 2,000 leh Transfer & Loan Player Rs. 1,000 hiding ah taklat in a um hi.

NHM General Body Meeting hun ding kichawn

Lamka, July 3 (Nisin Thuhiltu) : Shyam Lal Poonia, IAS, Deputy Commissioner leh Chairman, District Health Society (DHS), Churachandpur mapuina zing, July 4, 2017 sunma dak 11:00 in DTC Tuibuang ah 2016-2017 sung National Health Mission (NHM) nuai ah nasepdaw leh nasepna chiatha zing te dinmun banah sum dinmun tawh kisai genkhawmna ding ah General Body Meeting um ding ti himaleh a lemchangzaw ding gelna July 10, 2017 zawk leh nei ding ah General Body Meeting hun ding chawn in a um hi. Meeting ahileh a dak leh mun ding puanlawksa gual hiding, a ni ding ti lo a dang then lamdang umlo a hi. Chairman dawidan ah NHM nuai ah Free Diagnostic, NHM nuai thasin leh SOE tawh kisai, United Fund mang ah RKS nuai a sum kihawp dan leh matdan, Report piakdan tawh kisai, nasemtu umzat leh nasepna chiathak dan ti te meeting agenda hiding ahi. Zia meeting a chu DHS nuai ah Governing Body leh Special Invitee te pangkim chiat ding ah hiatsak a hiu.

District Police in matdaw ah um zu tamtak susia
Lamka, July 3 (Nisin Thuhiltu) : Churachandpur District Police in khamthei dodalna a chiapi na chung ua a matdaw uh zuu hunkhawp press/media te mu in a susiau hi. Suksiat ah um zu chu CCpur District Police nuai ah Drug Cell team in June 14 a pat khawpi sung mun chuam chuam ah khamthei ki zawkna mun te etzuina a nei hun ua amatdaw uh a hia, suksiat ah um zu chi chuam chuam te chu - Distilled Illicit Country-made (DIC) Liquor/Local Zu liter 600, Indian Made Foreign Liquor (IMFL), bottle 280, Beer cane/bottle tel in Grape wine bottle 773, a sum ah hisap ah Rs 3 lakh man hin a kigen hi. Zu suksiatna chu M. Kumarjit, MPS, Additional SP (Ops.) in amapui a, OC, SDPO CCpur, Women Police leh VDF Personnel te le a pang ui. M. Kumarjit, MPS, Additional SP (Ops.) Churachandpur thuthak lakhawm mite kiang ah a genna a chun, district sung ah khamthei zu leh a dang dang te ziak ah buaina a um ding venna leh khangthak te khamthei ziak ah a hinkhuau a siat ding uh dawilo ziak ah police department in khamthei dodalna chiapi a hidan gen in, tobacco product dodalna le chiapi zing a hidan a gen a, Police department panlakna kithuapi ding in District mipi te chialna a bawl hi.

Book Reduction Sale bawl

Lamka, July 3 (Nisin Thuhiltu) : Synod Bookroom, Churachandpur Branch in IB Road ah lekhabu chuam chuam tuni, July 3, 2017 a pat in Reduction Sale a bawl ui. Reduction Sale ah Bible, Christian Literature, Bible Comics, English a Pathian thu kizikna lekhabu leh Mizo pau ah ki zik, Mizo History, Mizo Novel, Bible Hilchianbu, Music tawh kisai ban in Naupang te’ Study Material ding leh Stationery, Pencil, Eraser, Instrument Box, Name Plate, Nursery Rhymes leh a dangdang Percent 5 a pat Percent 80 kikal niam ah zawk in a um hi. Reduction Sale ah Bible zosia chu 5% niam a zuak a hia, Lekhabu dang te ahileh 10% -80% kikal niamzaw zawk a hi. Kiginni, July 8, 2017 tiang ah Reduction Sale bawl ding a hia, sunma dak 10:00 a pat nitaklam dak 5:00 kikal ah kihawng zing ding a hi.
NT 04july2017e

CM in Kario Isaac Maheo khut ah appointment order piakdawna nei

Imphal, July 3 (Nisin Thuhiltu) : Manipur Chief Minister N. Biren Singh in tuni’n CM Secretariat, Imphal ah Super Fight League champion, Mr Kario Isaac Maheo khut in appointment order piakdawna a nei a, zia hun chu Minister for Tribal and Hill Areas Development N. Kayasii in le a uap hi. Kario Issac Maheo ahileh Mixed Martial Arts Player, Champion of Super Fight League Challengers (SFL) India, 2012 ah winner a hia, kipakpina Manipur police Department nuai ah Sub-Inspector piak a hi. Kario Issac Maheo hi, Karong, Senapati District ah cheng, kum 6 sung Jet Airways flight attendant ah sem ta, B.Com graduate le a hi. Chief Minister in appointment order piakdawna a nei hun a chun, Barak Spring Festival 2016, Organising Committee te khut in le Rs.50 lakhs piakdawna a nei hi. Chief Minister in kum 2017 a pat National leh Foreign tourist te etla thei ding ah state level Barak Spring Festival mat hiding ah a puan tawh kitawn ah state level Barak Spring Festival matna ding ah Organising Committee sum a piak a hi.

Govt thak sepdaw te lak ah a thupi pen economic blockade hawn: Govt Spokesperson Th Biswajit

Imphal, July 3 (Nisin Thuhiltu) : BJP mapui Manipur government in 100-day programme nuai ah project chuam chuam chiapi te a vaima theipen zawthian hiding leh public khut ah piakdaw theina ding ah government in panlakna nei zing a hidan state government spokesperson Thongam Biswajit Singh in tuni’n Thongju ah tuilet ziak ah haksatna tuak te vethakna a nei hun in thuthak lakhawm mite kiang in a gen hi. National Highways pani ah hun sawtpi economic blockade kihawng chu tu ah government thak sepdaw te a lak ah a sepdaw thupi pen hin a gen a, Churachandpur ah kiphinna sukven ah um le government sepdaw te lak ah thil thupi khat hin a gen hi. Thongam Biswajit Singh ahileh Thongju Assembly Constituency MLA le a hia, a ma’n tuni’n Kongba lui ah a pat tui let ziak ah haksatna tuak te ding mun Kongba Irong mun in vethakna a nei hi. Government thak, 100-days programme nuai ah government in central government scheme chuam chuam hun sawtpi, hiatmil ah um te re-introduced a bawl banah zawthianlo ah kikawi leh scheme chiapi lo ah a la um te kituptak ah chiapi ding ding ah hawn ah um in a gen a, tu ah state government thak in ni 100 sung ah a sepdaw te lak ah - Pradhan Mantri Awas Yojana-Gramin leh UJALA Yojana kihawng dawk thak, khua 63 ah electricity tunsak, DIPR App, Cyber Crime branch, SP Traffic, community policing, handloom leh handicrafts materials door-to-door delivery system, Manipur State Transport Bus Service ki puapha thak, Khuman lampak Sports complex, Akampat ah flood lights installation, district Headquarters zosia ema-markets sakna kipan ti te pang in a gen hi. Central government tawh kithu hiat ah tunung ah government in develop programme chi chuam chuam hawnbe nalai ding in le a gen a, government mawk dem sang ah Opposition te’n constructive suggestion a piak uh pawimaw in a gen hi. Tu ah government nekguk chiing ah ngawna tawh kisai ah evidence puakdaw ding phutna le a nei a, government mipi te khenchuam neilo ah panlakna nei zing in le a gen hi. A langkhatlam ah Thongju Assembly Constituency huap sung ah tui let ziak in innkuan 200 lam in haksatna a tuak ua, Biswajit in haksatna tuak te vethakna a nei hun in relief material - anchang, thau (oil), dawn ding tui thiang te piakdawna a nei a, Kongba lui a pat tui let ziak in Kongba Irong, Kajipat, Loumanbi Loukon leh Kitnapannung areas ah tui-lo tamtak tuilet in a chup hi.

Lawtinna ding ah gunchuna leh kukalna pawimaw: Karam Shyam

Imphal, July 3 (Nisin Thuhiltu) : Labour Rest House, CAF&PD Campus, Sangaiprou ah tuni’n CAF&PD Labourers’ Welfare Association (CAF&PDLWA) leh Voice of Indigenous People, Manipur (Kangleipak) in Manipur State Legal Service authority & District Legal Service Authority, Imphal West te sponsored bawlna nuai ah organized a bawl “ One Day Legal Awareness cum Meritorious Student’s Award Presentation” function a um a, zia hun chu Consumer Affairs, Food and Public Distribution, Minister Karam Shyam in Chief Guest hina tawh a uap hi. Minister in a thugenna a chun, discipline neitak leh ti takna tawh panla chiat ding in student te tilkhona a nei a, lawtinna ding ah gunchu leh kukal tak ah panlak ding pawimaw in a gen hi. Student te lampi dik kawkmu ti tawh Meritorious student nu leh pa, suapi te chu Minister in pakcha mama hin le a gen a, student te chu hun (time) mang thiam ding in chialna le a bawl hi. Minister Karam Shyam in meritorious students prizes leh thingno pathum piakdawna le a nei a, student te chu Rs 5,000/- chiat piak in a um ui. Legal experts te’n legal lam thil in student te ziltilna le a nei ua, Ranjan Yumnam, Director, CAF&PD, Surchandra Sanjenbam, President, CAF&PDLWA leh Premjit Moirangthem, President, Helping Hands for People (HHP) te’n le hun matna a uap ui.

Manipur mi Agasthi Sinha in Grand Sea Child Continental 2017 title dawng

Imphal, July 3 (Nisin Thuhiltu) : Bulgaria ah International Model & Talent Pageant – Grand Sea Asia – 2017 ah Manipur a pat Agasthi Sinha (14) in Grand Sea Child Continental 2017 title a dawng hi. Ama a hileh India a pat international Model & Talent Pageant – Grand Sea Asia – 2017 title dawng masapen hinalai ah hiat hi. Zia competition a chu gam chuam chuam 30 a pat participant um a hiu a, Grand Sea Child Continental 2017 title bak ah sub-titles - Best Child Asia 2017, Mr. Child Best Personal Interview 2017, Mr. Best Talent 2017 leh Mr. Popular 2017 dawng le a hi. Grand Sea Asia hi kum 1994 ah a la kipan dawk, khawvel ah beauty pageants lianpen ah kihia le a hi. Agasthi ahileh tu leh tu Greenwood High International School, Sarjapur Road ah Class IX simlai a hia, Bulgaria ah title a lak masang ah Master Galaxy 2017 title a la dawng le a hi.

Diploma Course in Journalism & Mass Communication zilthei
Imphal, July 3 (Nisin Thuhiltu) : Directorate of Information and Public Relations, State Institute of Journalism in press release ah tuni a taklatna a chun, DIPR saina a hung tung ding July 24, 2017 a pat “1-Year diploma course in Journalism and Mass Communication” kipan ding a hi. Lunglutna nei te’n State Institution of Journalism, DIPR, Moirangkhom, Imphal ah 15th July, 2017 masang ngei ah attested educational certificates/documents copy 2 leh recent passport photograph 2 tawh application form a piaklut uh ngai ding a hia, detailed information le zia mun ma a chu hiatchian thei ding a hi. Zia ah pang thei ding te chu Bachelor Degree in any discipline ahiu pawimaw ding, 1st August, 2017 tiang ah kum 30 sang ah upa zaw a hilo ding uh a hia, ST/SC candidate te ding ah Government Rules umsa dungzui ah age relaxation um ding a hi. Chuleh, course material bangkim participant te piak hiding a hiu a, selected candidate te’n Directorate of Information & Public Relations, Imphal ah course fee Rs. 3000/- a piak uh ngai ding a hi.