Nisin Thuhiltu - 03 July 2017

User Rating: 5 / 5

Star ActiveStar ActiveStar ActiveStar ActiveStar Active
 

Kikawmtuana leh dawn ding tui thiang a ban ah Govt ngaikhawk: CM

Imphal, July 02 (Nisin Thuhiltu) : Manipur Chief Minister N. Biren Singh in tuni, Rotary Multi-Service Centre, Mantripukhri ah 45th Installation Ceremony of the Board of Directors (2017-18) of Rotary Club hun ah a thugenna a chun, ama Government in kikawmtuana (connectivity) leh mipi te piped water piak ding chu government next ngaikhawk pen pen te lak ah pang a hidan a gen a, zia chu hun chawmlo sung ah siamzaw hiding ti’n a gen hi. Tunai ah tuilet leh nimchim hiat ding um te chu mihing te pilvanlo ziak a hidan taklang kawm in gam leh gua kituptak ah enkawl leh pualim thak ding pawimaw in a gen hi. Kisiam thakna leh kisanna (change) kiti eima a pat a um masat ding pawimaw in le a gen a, state sung ah zu leh sa, khamthei ah kibual nasatak ah a pun chu ngaikhawk mama a hidan gen in drugs leh intoxicant thil te drive bawlna sukhat sem hiding in a gen hi. State government in rehabilitation lam siamhawi thak ding ah guanggalna nei in le a gen a, NGO te chu drug leh alcohol abuse tawh kisai enzui ding in a chial hi. State government thak in kivaihawmna lui leh corrupted system sukbei ding leh a thak ah kivaihawmna/ kivaipuakna phazaw a um theina ding ah panla a hidan le gen in, intellectual leh club member te chu government panlakna kithuapi ding in a chial bawk hi. A hithei chan ah Rotary Club kithuapi ding a hidan le gen in, Rotary Club in society ah liangvai te panpina nasep kituptak chiapi a hidan le a gen a, ziagualma a chu government thak in le mipi te thil dawi liangvai leh panpi ngai te kithuapi theina ding ah panlakna nei zing ding hin a gen hi. Zia hun matna a chun, Chief Minister in lam chuam chuam ah a chung chuang diak mi khenkhat leh student te award leh scholarship piakdawna le a nei a, Rotary Club outgoing president L. Manoranjan, outgoing secretary Ph. Saratchandra, incoming president Ellendra Thoudam leh incoming secretary Dr. Muhindro te chu Rotary lapel pin tawh chawi hawina le a bawl hi.

Huntiam umlo KSO general strike kipan ding
Lamka, July 2 (Nisin Thuhiltu): National Game Village ah a chiata June 23, 2017 nitak ah melhiatlo pawl khat in Haokip Student Organisation (HSO) President, Letkholal @ Palal Haokip a kaplupna chung ua, Kuki Students Organisation (KSO) General Headquarters in a vaima theipen ah mi kaplum tute matdaw ding phutna a nei bak ah state government hun tiam a piak sung tiang ah mi kaplum tute matdaw ah a umlona chung ah Kuki Students Organisation (KSO) General Headquartersin July 3, 2017 zankim a pat Manipur state sung pumpi huap ah huntiam umlo General Strike chiapi ding ah a puan chu bangma then danglam umlo a hidan Kuki Students Organisation (KSO) lawiupa te a pat hiat in a um a, zia chu puan lawksa gual ah General Strike chiapi ding ti a hi. Chuleh, a kaplum tute matdaw a hi masia thiluang le lak hilo ding in a taklang bawk hi.

NHM tawh kisai ah General Body Meeting nei di
Lamka, July 2 (Nisin Thuhiltu): Shyam Lal Poonia, IAS, Deputy Commissioner leh Chairman, District Health Society (DHS), Churachandpur mapuina’ a hung tung ding July 4, 2017 sunma dak 11:00 leh DTC, Tuibong ah 2016-2017 sung, National Health Mission (NHM) nuai ah nasepdaw leh nasepna chiatha zing te banah sum dinmun tawh kisai General Body Meeting um ding a hi. Meeting a chun Free Diagnostic, NHM nuai ah thasin SOE, RKS nuai ah sum kihawp dan leh a matdan leh Report piakdan tawh kisai banah nasemtu umzat leh nasep chiadan tangpi genkhawmna um ding a hia, zia hun a chun DHS nuai a Governing Body leh Special Invitee te kimtak ah pang ding ah hiatsak a hiu.

Lekhabu hawnna nei

Lamka, July 2 (Nisin Thuhiltu): Kohran Hmathlir Publication Board, Manipur District, Assemblies of God saina’ tuni’n HL Daka Memorial Hall, Rengkai Road ah Rev. Ramropui Khawbung in “Kona Rawl Mawi” kiti Rev. Zosanglien chanchin leh a laphuakte kizikna lekhabu hawnna leh latna nei a hi. Hun matna a chun, lekhabu ziktu Lallungawi in lekhabu tawh kisai genlatna a nei ban in Rev. Zosanglien innkuan te a pat thugenna le a um hi. ‘Kona Rawl Mawi’ kiti a hileh Rev. Zosanglien in a phuak lâ te lak ah khat min mang ah Lallungawi in lekhabu chu a zik a hia, a sung ah Rev. Zosanglien chanchin leh a laphuakte a um hi. Rev. Zosanglien a hileh Pathian mi mat mama khat a hia, Thagau a pat thu a dawnte ah pansa in lâ tamtak a la phuak banah Muolvaiphei Prayer Mountain a mei (fire) kodawktu hi’n le a kigen hi.
NT 3july2017b

MZP, Chiengkawn in kipakpina nei

Lamka, July 2 (Nisin Thuhiltu): Mizo Zirlai Pawl (MZP), Chiengkawn Branch in tuni’n Chiengkonpang Community Hall ah zillai lawtinna changte kipakpina a nei a, Pastor Lalsiam, BS. Saichang Biel, ESC in lawtinna chang zillaite a ding ah malzawlna a dawt piak hi. Hun matna uap, Thangboi Gangte, MCS, SDO Churachandpur in student te lawtinna ding ah nu leh pa te’n mawpuakna lianthak nei uh hi’n a gen a, naupangte school fee, lekhabu leh a pawimaw dang dang te chawk piak bep hilo hi’n a gen hi. Mitin in kihinsua na ding ah haksatna tuak vek uh a hina ah zia haksatna te thuak galkai ding leh theitawp sua ah panlak pawimaw hi’n a gen a, zia gual ah lawtinna chang te kipakpina hun matpi a sai tute chung in le kipak thu a puang hi. MZP Chiengkawn Branch nuai ah tuchung Result suak ah khan Class X ah mi 30, Class XII ah mi 15 leh Graduation ah mi 10 in lawtinna a chnag u’i.
NT 3july2017c

Lawtinna chang te kipakpina leh lawppiakna

Lamka, July 2 (Nisin Thuhiltu): Lungchin Welfare Committee (LWC) leh Lungchin Simthu kithua ah Upa L. Tualzanang Inn, College Veng, New Lamka ah tukum pawl X leh XII exam ah lawtinna chang Lungchin khawsuak te kipakpina leh lawppiakna nei in Pastor Suanmung Guite in malzawl dawt piakna a nei hi. Hun matn a chun, Upa N. Vialkhanthang in lawtinna chang te tilkhona a nei a, lawtinna chang te kipakpi suklatna ding ah memento piakna le a um hi
NT 3july2017d

Naupang Khawmpi khâk

Lamka, July 2 (Nisin Thuhiltu): Baptist Children Department (BCD) Evangelical Baptist Convention, Lamka South Division in EBC Centenary Hall, New Lamka ah a ni (2) veina Naupang Khawmpi a nei chu tuni’n zawthian a hi. Khawmpi hun sung ah Pathian thu ah kizil tilna a um banah naupang te chu category 3 - A, B leh C a kikhen in kidemna chuam chuam a nei ua, Rev V Nenglian, Divisional Superintendent, Lamka South Division, EBC in khawmpi khakna a nei hi. Khawmpi a hileh a chiasa July 2, 2017 ah Upa S Lalngailian, Chairman, Division Working Committee in a la hawn a hia, zia hun sung ah ah competition chuam chuam um te ah 1st a pat 3rd tiang te kiang ah kipakman piak na le a um hi.
NT 3july2017e

Songtal leh Kangkap kal lampi siamtu kimupi
Lamka, July 2 (Nisin Thuhiltu): Tuni, July 2, 2017 sunnung dak 2:30 vel in Thanlon Sub-Division sung ah um Songtal leh Singngat Sub- Division sung ah um Kangkap khua kikal lampi PMGSY schem nuai ah siamthakna a chiathak zing tawh kitawn in Kangkap khawsuak khanglai bangzat a hem te’n Lingsiphai ah Special Contractor Mangbeldam kimupi in gamsung khantona ding ah kikawmtuana lampi hawitak pawimaw amasapen a hidan genkhawmna a nei in, kituptak ah lampi siam ding in a kisaipi Contractor kiang in chialna a bawl ui. Zia hun a chun Contractor in lampi a hawithei ding pen ah siam hiding in thutiam a bawl hi.

Assam Rifles in tuilet ziak ah haksatna tuak te kithuapi

Imphal, July 02 (Nisin Thuhiltu): Ni 2/ 3 sung gua a zuk tak nung in Imphal lui (river) a pat tui let in Mayang Imphal area ah chenna inn 30 lam te chu tui in a chup a, zia chu tawh kitawn in DC Thoubal dawtna dungzui in Assam Rifles personnel te’n Flood Relief & Rescue Operations a bawl ui. HQ IGAR(S) nuai ah A Column of 5 JAK RIF of 9 Sector Assam Rifles te’n Commanding officer mapuina nuai in tuiletna mun tuam ah tuilet dalna ding in panlakna a nei ua, civilian te puidawna a nei bak un, medical assistance leh tui dawn ding tui thiang piakna le a nei ui.

Kongba lui a pat tuilet in chenna inn tamtak chup

Imphal, July 02 (Nisin Thuhiltu): Thongju constituency huapsung Kongba Erong leh Ucheckon Lai Moriba ah Kongba lui a pat tui let in chenna inn tamtak tui in a chup a, local mite leh PWD Minister banah local MLA Thongam Biswajit in Singjamei Police, Porompat Police leh Erilbung Police personnel te tawh tui let chu block bawl ding guan theitawpsua’n panlakna a nei ui. Bashikhong leh area chuam chuam te chu zia tuilet chun a chum hi. Imphal East Deput Commissioner, IFCD Minister Letpao Haokip in le tui letna mun chu etthakna nei in Imphal city area ah tui letna mun te le IFCD Minister in etthakna a nei a, himaleh tui let masang ah kigin lawkna umlo ah tuilet nung ah thil umdan kan thak leh etzuina’n tui letsa control bawl ding dan a um thei diaklo a hi. Chuleh, mun dang - Thoubal & Leishangthem kawmtuana lampi, Imphal- Dimapur, National Highway 2, Imphal-Ukhrul lampi leh lmphal-Thanlon lampi te ah le tui let ziak in hindan ngaina nasatak in a chawk buai hi.
NT 3july2017f

One Shop One Flower programme hawng
Imphal, July 02 (Nisin Thuhiltu): Kakching Keithel siamthakna ding in One Shop One Flower programme hawnna tuni’n a um hi. Zia proogramme chu Kakching Foundation for a Clean , Green and Blooming Kakching Keithel Alliance for Development of Alternate Manipur (ADAM) Blooming Manipur leh Kakching Bazar Business Welfare Association te’n joint ah organize a bawl uh a hia, Kakching Municipal Council leh MUDA, Manipur in Swachh Bharat Mission nuai ah sponsored a bawl a hi. Hun matna chu tate govemment lam a pat RK Nimai, director of MAHUD, Nepram Geetkumar, joint director, Ngangom Uttam, chairperson of Kakching Municipal Council, Moirangthem Inakhunbi Devi, vice-chaiman of KMC M Uma Devi, Councilors, executive councilor Suranjoy Singh Laishram te’n a uap ui. Zia One Shop One Flower programme nuai a chun Kakching Keithel ah a umna ding mun chet chet ah pakcha chi chuam chuam kawi in a um hi.

Manipur Congress in BJP govt. 100 days programme demna bawl
Imphal, July 02 (Nisin Thuhiltu): Manipur ag opposition Congress in Chief Minister Nonthongbam Biren Singh mapui BJP-led coalition government chu government masa Congress govemment sepdaw leh a bawldaw te chung ah minphat hawl in ngawna a bawl a, demna le a bawl bawk hi. BJP in state mipi te a diklo lam kawkmu in le ngawna a siam a, State govemment thak in thilmin phuakthak (re-name) bawl a, programmes chuam chuam chiapi hin MPCC spokesperson Kh Joykishan in tuni’n Congress Bhavan ah press conference in a gen hi. Government thak chu Congress in sepsa leh guanggalsa um te supiting tu mai mai in le MPCC spokesperson in a gen a, BJP govemment 100 days programme kiti chu govemment lui programme te chung ah minphat hawlna mai mai hin le a gen hi. Manipur Pradesh Congress Committee (MPCC) spokesperson in a gen zawm zelna a chun, BJP govemment in kum 15 sung Congress government in guanggalna a neisa te promote a bawl mai mai hin le a gen a, sate mipi te thilzosia a mau bawl leh sepdaw dan ah hiatsak uh leh a lungthim uh chawk buai un a gen hi. Congress MLA N Loken Singh in a genna a chun, govemment lui in state sung ah tu ah a kigen minthang Pradan Mantri Gram Sadak Yojana (PMGSY) kiti chu 10th phase tiang a chiapizawsa hita leh 11th phase nuai ah PMGSY work report le Centre kiang ah Congress govemment in a piaklutzawsa hita hin a gen hi. Nambol MLA in United Naga Council (UNC) leh Churachandpur district issue sufel ah BJP govemment in a gen chu political agenda ziak hin a gen a, Party MLA K Ranjit in BJP govemment chu ‘paper tiger a hilo ding dawi hin a gen hi. A langkhatlam ah BJP government panlakna demna bawl maleu kichian tak ah a sep diklo uh pin point a bawl thei uh a tamlo a hi.

PLA leh MNPF in attack amau bawl hi ah puang
Imphal, July 02 (Nisin Thuhiltu): People's Liberation Army (PLA) leh Manipur Naga People’s Front (MNPF) in tuni’n Ukhrul district, Lambui village ah 27 Assam Rifles Check post attack kibawl chu amau thil bawl a hidan a taklang ua, Bangkim, Assistance Secretary, Publicity of Revolutionary People's Front (RPF) leh Thomas Numai, Assistant Publicity Secretary, Manipur Naga People’s Front (MNPF) suai kaina joint press release in a taklatna a chun, amau group in Manipur ah mipi te khenzaktu Indian force te dodalna chiapi zing a hidan uh taklang kawm in October 15, 1949 ah Manipur gam India ah namphu laklut a hi nung ah Indian security forces te’n hill leh valley mi te khenzak un ngawna a siam a, Indian forces in ethnic community chuam chuam te lak ah thaichimu phalo tu zing un le a gen hi. Chun, “United we stand, divided we fall” ti thupi nei ah RPF armed wing MNPF leh PLA in kum 2013 ah sem khawm zing a hidan uh le a taklang hi. Chuleh, January leh April 2014 ah le MNPF leh PLA in joint ah 1/11 Gorkha leh 25 Madras Regiment te Churachandpur district ah Operation Leopard kiti nuai ah attack bawl un a gen a, December 2014 ah le AR troop te mun chuam chuam ah attack bawl un a gen hi.

Transfer ah a um a nasep phat ziak hi ah pawm

Lucknow, July 2 (Nisin Thuhiltu): Uttar Pradesh ah traffic rules palkek leh danlo gual tak ah traffic subuai local Bharatiya Janata Party (BJP) leader 5 te kidin tetpi numei senior police officer Shreshtha Thakur in social media ah mitamtak te pakchat a chan nung in Bahraich ah transfer bawl in a um hi. Shreshtha Thakur transfer kibawl lung awilo thu mitamtak in a taklat nung un Shreshtha Thakur in transfer ah a um chu anasep phat ziak ah reward kipia gual ah pawm leh kipaktak ah um a hidan facebook in a taklang a, transfer ah a um chu routine ahiloleh political leader te ziak a hi gen chian theilo maleh a batchmate te kuama transferred umlo un Ms Thakur in a gen hi. Senior police officer Shreshtha Thakur ahileh Bulandshahr district ah tha 8 sung a um nung ah Nepal border Bahraich ah transfer kibawl a hi. Zia thil tung chu local Bharatiya Janata Party (BJP) leader Pramod Lodhi in helmet a khuklo bak ah motorbike lekha document bei ah gari neu a tawl ziak ah police te’n a mat bak ua, Rs 200 a liausak uh lung awilo ziak ah duty ah um police personnel te kilawmlo tak ah a bawl bak a, a kiko khum ziak ah senior police officer Shreshtha Thakur in local BJP leader Pramod Lodhi chu a kinialpi leh a ki dintetpi a hia, local BJP leader supporter midang 5 te tawh mankhawm vek ah jail ah a khum le a hi. A langkhatlam ah Bharatiya Janata Party (BJP) MLA 11 leh MP banah Chief Minister Yogi Adiyanath in thiltung tawh kisai a genkhawm nung ua transfer order suadaw ah um hin le a kigen hi.

Mr Bahri kum 52 val newspaper hawmta

Shillong, July 2 (Nisin Thuhiltu): Meghalya, Mawlai Nongkwar ah cheng Devin Kharsyntiew @ Bahri in kum 52 sung newspaper a hawptakna chung in “oldest & longest living newspapers’ hawker in Meghalaya” ti title piak in a um hi. News reporter, editor, columnist leh publisher hilo maleh journalism field ah Bahri panlakna chu a thupi mama hi. Bahrit in kum 52 sung lam newspaper a hawptakna chung in Mawlai Nongkwar headman leh Meghalaya Newspaper Hawker & Vendor Association (MNH&VA) in tunaicha a khan kipakpina leh chawihawina a nei ui. Devin Kharsyntiew @ Bahri in a genna a chun, insung haksat ziak ah zilna sunzawm thei talo a hina chung ah kum 1964 a khah newspaper hawmpanta a hidan a gen a, zia chu tuni tiang ah chiapizawm zing nalai a hidan gen ina bullim ah - Pyrta Lum, Peitngor, Lyngwiar Dpei, Kyrwoh, Talajur, Sur Shi para kiti newspaper te a la hawm hin a gen hi. Bahri in a gen zawm zelna a chun, a newspaper hawp chu income muna bep hilo ama leh a insungmi te chawpna mang thei a hibak ah mipi te information pesawntu a pan chu kipak hin a gen a, mi dang zosia hiat masang ah ama’n chanchin thak hia masapen leh society banggual dinmun a hi em ti te hiathei zing hin a gen hi. Chuleh, a bullim ah mi simaw leh nuisan ah um hin a gen a, himaleh ziagual ah min a kawi uh chu khawksalo ah panlakna sunzawm zing, sepna neu in lian le a sepna phat chu thanuam tak ah panla zing hin le a gen bawk hi. Devin Kharsyntiew @ Bahri ahileh tu leh cha tamtak neita le a hi. A upa tak bak ah hatzo talo himaleh newspaper haawp chawlsan ding lunggel nailo a hidan le evin Kharsyntiew @ Bahri in a gen hi.
NT 3july2017g