Nisin Thuhiltu - 29 June 2017

User Rating: 0 / 5

Star InactiveStar InactiveStar InactiveStar InactiveStar Inactive
 

 Khamthei matdaw tawh kisai ah media briefing nei

Lamka, June 28 (Nisin Thuhiltu) : SP Churachandpur, Rakesh Balwal, IPS in tunai ah District sung a pat Heroin (No. 4) a bawl ding Raw Opium (Kâni) matdawna tawh kisai Press Briefing bawl na a chun, zingkal matak dak 1:30 tuam ah Hotline Number a pat Van ah khamthei kipua a hi dan thuguk mu dungzui in zingkal dak 2:00 tuam ah District Police Drug Cell leh Night QRT kithua in Kangvai Outpost ah Van khat kham in hawitak ah check a hinung ah No. 4 bawlna ding ah kimang, Raw Opium Kg 20 mudaw a um hi’n a gen a, a sum ah Rs. 16-20 lakh tuam man zo ding hi’n le a gen hi. Mat a um kâni leh a neitu Imphal ah puaksuk hi ta in kâni chu laboratory a test bawl hi ding in a gen hi. Chun, Churachandpur District sung mun chuam chuam, a diak ah Myanmar Border leh Pherzawl District ah le Opium chîng um a hi dan hiatchian hita a hi dan phuangdawk kawm in district a pat Opium Product kipua dawk te Thoubal ah No. 4 ding ah bawl a um leh zia a pat chu Myanmar puaklut hisek a hi dan mat a um te kipuanna a pat hiatdaw a um hi’n le a gen hi. Chuleh, District sung ah kâni lei kibawlna mun zosia le hiatchian hita in tunung hunkhat leh suksiat hi ding hi’n le SP in a gen hi.

Induction Meeting nei

Lamka, June 28 (Nisin Thuhiltu): MS Conference Hall, District Hospital ah tuni’n Induction Meeting on Bridge Program of Certificate Course in Community Health for Nurses (BPCCHN) a um a, zia hun chu Thienlaljoy Gangte, MCS, Assistant Commissioner to DC, Churachandpur in Chief Guest hina tawh a uap a, Dr. M. Shimray, Assistant Regional Director, IGNOU, Imphal in Guest of Honor leh Dr. Sashi Kumar Mangang, Additional Director, Health Services, Government of Manipur in Functional President hina tawh a uap hi. Chief Guest Thienlaljoy in IGNOU tawh District Hospital kithua ah zia gual Study Centre hawn thei ah a um chu kipakpi mama hi’n a gen a, Study Centre a pat mipi a ding ah damtheina tawh kisai ah phatchuamna nei diak na a hi ding dawisak thu le a phuang hi. Chief Medical Officer, Dr. Kimngaihching Simte in le study centre ziak ah Health Sector in khantona a chang ah a tamzaw’n a phatchuampi ding dawisak thu a phuang hi. Study Centre a chun Dr. Biakdiki, Dr. Lalromawi, Dr. Tongzakai, Dr. Seikholet, Dr. Ngahneikim, Dr. I. Chorjit Singh leh Dr. Seanboi te’n ziltilna pia ding a hiu a, nikhat ah dakkal 6 class um ding leh tha 6 sung ah Certificate Course chu zaw hi ding a hi. Zia Course chu ziltheina ding ah December 2016 a khan GNM leh B. Sc Nursing sêmlaite lak ah Entrance Exam neisak a um in candidate 39 te lak ah 38 a la lawting u’i.
NT 29june2017b

ADCC Chairman in excursion te thadawk

Lamka, June 28 (Nisin Thuhiltu): Autonomous District Council (ADC), Churachandpur nuai ah SSA CCpur Block a pat school 10 in tuni’n Imphal ah Educational Excursion a nei ui. Zia hun ah pang ding school 10 a pat teacher leh student te zingkal dak 6 in ADC CCpur Office, Tuibong ah a kingak khawm ua, ADCC Chairman Khaipao Haokip in Educational Excursion a chia ding teacher leh student te a thadawk hi. Excursion ah school tin a pat teacher khat chiat banah inspecting staff te’n le a zui ua, Imphal ah thiamzilna tawh kisai a mun pawimaw chuam chuam - INA Complex, War Cemetery, Khuman Lampak Sports Complex, Zoo, Science Centre, Kangla Fort leh Sendra ti te a va en u’i. Excursion a chun Upper Primary School 2 - New lamka leh Misao Lhavom banah JB School 8 - N Molhoih, Kholmun, Saidan, Thenmoul, S Mualcham, Thingkangphai, Moirang Mantak leh K Geljang a pat student 80 a pang ua, bus 2 mang in educational excursion a chiau hi.
NT 29june2017c

Zodawn Visit ding te kipan dawk di

Lamka, June 28 (Nisin Thuhiltu): Siamsinpawlpi GHQ in National Foundation For India tawh kithua ah I HAVE A DREAM pansan ah ‘Siamsin Zodawn Visit 2017’ a nei na ding ah zing, June 28, 2017 zingkal lam dak 10:00 leh SSPP Complex, Siloam Veng, Bungmual a pat kipandawk ding a hiu. Zodawn visit a kuan ding SSPP member te a kipatdaw masang ua Rev. S. Ginmalsawm, Director, Social Development EBC in Zodawn visit a kuan ding SSPP member te a ding ah pauchap piakna nei ding a hia, Rev. Khen P. Tombing, Chief Coordinator, PCI (R ), Emeritus SSPP in thadawk ding a hi. Zodawn Visit a hileh Zodawn khua ah thiamzilna dinmun leh haksatna te mit mama ah va mu ding banah Survey leh Group Discussion te a pat khawtin ah thiamzilna leh student te dinmun etthakna ding tup ah sai a hia, zia hun a chun SSPP GHQ, SSPP Jt. HQ Lamka leh Branch chuam chuam a member te banah Lamka pansa School leh College chuam chuam 8 a kipat teacher 23 pang ding a hiu a, amau chu Bus 2 leh Bolero 2 ah kuandawk ding a hiu.
NT 29june2017d

Health staff te a ding Workshop
Lamka, June 28 (Nisin Thuhiltu): District Nodal Officer, National Tobacco Control Program, CCpur saina nuai ah a hungtung ding June 30 sunma dak 10 a pat CMO Mini Conference Hall, CMO Complex ah One Day Training & Capacity Workshop of Health Staffs um ding a hia, zia hun a chun Dr Premchandra Singh, DNO, NPPCDS, CCpur in ‘Tobacco Cessation Steps and Measurer’ banah Dev Shree Sharma, FSO, CCpur in ‘Tobacco, Is it a Safe Food’ ti thupi pansan ah ziltilna pia ding a hiu.

Blood donation cum Awareness campaign
Lamka, June 28 (Nisin Thuhiltu): CCpur Government College nuai ah Anthropology Department 2014-2017 batch in zani sun in District Hospital a Blood Bank ah Voluntary Blood donation cum Awareness campaign nei in damlo thisan pawimaw te a ding in a thawn in thisan a piau hi. Zia hun a chun Professor Ricky Vanlallawm Guite, Principal, Professor R Tawna Khobung, Head of Department, Professor Dr Gpendra leh PC Ngaia te’n le a uap u’i.

Coaching a ding Batch thak kipan di
Lamka, June 28 (Nisin Thuhiltu): Football kihel lunglutte a ding ah The Shepherd’s Football Academy in a chiata May 24, 2017 a pat Lalpuithluii Fundation School ground a naupang kum 14 leh kum 17 nuailamte a ding ah Grassroot Football Coaching a nei chiato zel in, July tha a pat batch thak pat hikit ding a hina ah lunglutna nei te’n ngaiven thei ding a hiu. Grassroot Football Coaching a hileh T. Kammuanlal Simte, Manager, Lenlai Club in a la hawn a hia, AIFF Certificate holder T. Khamminthang, Manager, The Shepherd’s Football Academy leh footballer Ngulkhosiam Guite te etkawlna nuai ah tuhin Academy ah naupang 30 val um in coaching a chiatha zing hi. July tha a pat in batch thak a ding in amasa gual ah registration fee Rs. 2000 ma hiding a hia, Registration Form a hileh Universal Drug House, Near CCPur Police Station, Ephraim Computers, IB Road leh Kimboi Pan Shop, Hebron Veng, New Lamka ah tuni, June 28, 2017 (Nilaini) a pat in muthei ding a hi. Registration thak bawlte kiang ah Jersey khat chiat piak hiding a hiu a, registration bawlsa te’n monthly fee dan ah Rs. 500 pia in pang zawm thei ding a hiu.

Jubilee thîllawkna Sports kipan
Leisang, June 28 (Nisin Thuhiltu): Young Christian Organisation (YCO), EOC saina nuai ah tuni’n Diamond Jubilee Thîllawkna Sports a kipan a, zia hun chu Khaipao Haokip, Chairman, ADC/CCPur in Chief Guest hina tawh a uap a, Ginkhohen Haokip in Guest of Honour leh K. Minthang in Functional President hina tawh a uap hi. Pastor James Th. Minlun, Lamka Nuai Area Pastor in pauchapna tawh inaugural programme leh sports hawnna a nei a, Guest of Honour in kick off a nei hi. July 1, 2017 tiang cha tha ding Diamond Jubilee Thîllawkna Sports a hileh October 19-22, 2017 leh YCO leh Women Christian Organization (WCO) in kum 75 tinna Diamond Jubilee a matna ding thîllawkna ah sai a hia, zia hun a chun khua chuam chuam a pat YCO member te chiakhawm in football leh volleyball ah kigual siakna a nei u’i. Chun, Sports ni tawpni, July 1 zingkal leh marathon le um ding hi’n a saitute a pat thutut a kidawng hi.

Manipur Power Minister in Elangkhangpokpi leh Chandel ah 132/33 KV Sub-Station hawng; December 2018 tiang ah khua zosia electric meivak tunsak vek hidi: Biswajit Singh

Imphal, June 28 (Nisin Thuhiltu): Manipur Power Minister Thongam Biswajit Singh in IFC and Youth Affairs & Sports Minister Letpao Haokip, MANIDCO & MANITRON Chairman Dr Radheshyam Yumnam, Kakching MLA Y. Surchandra Singh, Kumbi MLA S Bira Singh leh Chief Secretary O Nabakishore Singh te uapna tawh tuni’n Elangkhangpokpi leh Chandel ah 132/33 KV Sub-Station hawnna a nei a, ama’n a thugenna a chun, industrialization masawnna ding ah power supply a buailo ding pawimaw in a gen a, government in December 2018 tiang ah khua zosia electricity tunsak ding tup ah nei hin a gen hi. Electric meivak tunlona khua te hiatchian masak hiding leh maban ah panlakna chiapi to hiding in le a gen a, government in khua zosia electricity tunsak ding dawi ah panla hin a gen hi. Minister Biswajit in a genzawm zelna a chun, Ukhrul district ah Chingai Somdal, Somdal, Sankeithel , Senapati ah Oinam leh Churachandpur District ah Molnom,Tamenglong Headquarter, Akampat, etc ah su-station 11 kawi be ding ah panlakna um a hidan le a gen a, Koutruk ah logistic park siam ding ah guanggalna um in a gen hi. A hun tak ah Elangkhangpokpi ah power sub-station install a kibawlna chung in Minister Biswajit in Manipur State Power Company Ltd panlakna pakcha mama in a gen a, power sub-station kawi ding chu November 2015 a khah lemsak hita a hidan a taklang hi. Governments lui leh thak hung um zing ding himaleh tu ah BJP mapui governments thak in a tup pipen chu mipi te welfare a ding hin a gen hi.

TD Minister in Senapati District ah Primary School 2 hawng
Imphal, June 28 (Nisin Thuhiltu): Manipur Tribal Affairs & Hills Minister N. Kayisii in tuni’n Senapati District ah primary schools pani a hawng hi. Hawn thak ah um primary school te chu - Makeng Cheijinba Village ah Makeng Cheijinba Primary School leh Thangal village ah khat a hia, Tadubi Assembly Constituency huapsung ah um gel a hi. TD Minister in a thugenna a chun, school kihawng thak te a pat naupang te’n zilna lam ah masawnna a nei ding uh kinem hin a gen a, naupang te primary level a pat kituptak tak ziltil ding pawimaw hin a gen hi. School hawnna hun chu Deputy Commissioner, Senapati Athem Muivah in le a uap hi.

Social Welfare Minister in HSO president kithana nasatak ah dem

Imphal, June 28 (Nisin Thuhiltu): Social Welfare and Cooperation Minister NemchaKipgen in tuni’n kaplup ah um Letkholal Haokip alias Palal Haokip, President,Haokip Students’ Organisation (HSO) insungmite RIMS morgue in a kimupi a, lunggil tak ah suunthu puang in, ziagual tualtha chu nasatak in demna a bawl a, a insungmi te thawkpi mama a hidan a gen hi. Letkholal Haokip alias Palal Haokip ahileh 23rd June nitak dak 7 pm ah a chenna Langol Game Village ah melhiatlo pawl khat in a kaplup uh a hi.

Education Minister Bishnulal High School hawng

Imphal, June 28 (Nisin Thuhiltu): Education Minister Th. Radheshyam Singh in tuni’n Kangpokpi District ah Bishnulal High School hawnna a nei hi. Zia school a chu computer room leh library panna room 8 um a hia, Rashtriya Madhyamik Shiksha Abhiyan (RMSA) 2015-16 nuai ah kisa thak a hi. Education Minister in a thugenna a chun, state sung ah government schools te siamhawi thakna ding ah teacher leh student te bep hilo, nu leh pa, local mite support pawimaw in a gen a, school van leh thil chuam chuam te gukmang ah a um sek chu ngaikhawk mama a hidan taklang kawm in, kiphinna chi chuam chuam a um hun ah school suksiat chiinlo ding pawimaw hin a gen hi. School kiti thiamna leh pilna muna ding mun a hi dungzui ah biakna mun gual ah kawi ding pawimaw in le a gen hi. Zia school hawnna hun chu Director Education (S) Th. Kirankumar , Deputy Secretary Education (S) & Additional State Project Director RMSA, Manipur L. Nandakumar Singh, ZEO Ngahchong Kipgen, Headmaster Khagra Prasad Prasai, teacher, student leh nu leh pa ten le a uap ui.

Power Minister Thongam Biswajit in Ujala Yojana’ scheme hawng

Imphal, June 28 (Nisin Thuhiltu): Sangai Hall, Hotel Imphal ah Manipur State Power Distribution Company Limited and Energy Efficiency Service Limited organsied bawlna nuai in Power Minister Thongam Biswajit in tuni’n Ujala (Unnat Jeevan by Affordable LEDs and Appliances) Yojana” hawnna a nei a, ama’n a thugennaa chun, ‘Ujala Yojana’ kiti scheme hawitak a hidan genkawm in Central Government in kum 2015 ah man tawmcha electric bulb chawk theina ding peower a beitamlona ding ah a hawn hin a gen hi. Ujala Scheme chu district zosia chiapi ah um ding a hidan puang kawm in government mission - hill leh valley ah um te kal ah gap um te sukbei ding a hidan genlang in hill leh valley ah khantona kibang tak a um theina ding ah state sung ah chamna a um masakpen ding pawimaw in a gen hi. Th Biswajit in power 37 % te chu technical leh naked wire ziak ah mawk man thai hin a gen a, Power department in naked wire zosia chu AV cable wire ah sang ding a hidan taklang kawm in kum 2018 tiang ah Manipur pumpi electric tunsak vek hiding in a gen hi. Ujala scheme nuai a chu consumerte’n quality 9 w LED bulbs te Rs 70 leh 20 w LED tube lights te Rs 230 ah chaw thei ding a hiu a, zia chu Household zosia’n 9w LED bulbs paguk (6) leh 20 w LED tube lights pani (2) tiang a mu thei ding uh a hi. Chuleh, zia mutheina ding a chu government issue photo ID proof leh electricity bill suklat ngai ding a hi. Chun, First phase ah MSPDCL subdivision 4 i.e IED I/II/III/1V ah muthei hiding a hi.