Nisin Thuhiltu - 15 June 2017

User Rating: 0 / 5

Star InactiveStar InactiveStar InactiveStar InactiveStar Inactive
 

GOVT. QUARTER LUA TE ETCHETNA NEI

Lamka, June 14 (Nisin Thuhiltu): Churachandpur DC, Shyamlal Poonia, IAS in District sung ah government Quarter lua te entha ding ah Team khat a bawl daw tawh kitawn in tuni’n district sung ah government quarter a cheng te etthâkna nei in a um hi. Zia hun a chun, James Douzapau Haokip, MCS, SDO/BDO Tuibong malatna’n SDO office staff leh police kitua in Tuibong area ah Government quarter lua te kiang ah quarter tawh kisai lekha pawimaw chuam chuam - allotment order, rent payment proof, service card ti te etchetna aum hi.

STATE CABINET IN JOURNALISTS WELFARE SCHEME APPROVE BAWL; FINANCIAL ASST.RS 5.00 CR BITHIAT

Imphal, June 14 (Nisin Thuhiltu): Manipur Cabinet in tuni’n Chief Minister Nongthombam Biren Singh mapuina meeting nei in Manipur State Journalists Welfare Scheme approve a bawl hi. Scheme in a tup chu journalists leh a family member teu one-time ex-gratia & relief piak ding ti a hi. Zia ah Scheme hi Manipur state in a kinaipi state dang - Assam, Mizoram leh Nagaland and ah le chiapi ah um hita a hia, Ministry of Information and Broadcasting, Government of India, guideline tawh kituak le a hi. State Journalists Welfare Scheme nuai ah Financial assistance ahileh corpus fund Rs 5.00 crores bithiat a hia, official gazette ah publication kibawl ni a pat mat pat hita ding a hi. Scheme dungzui ah journalist thina tuak insungmi te ahiloleh liamna ziak ah gualpha talo (permanent disable) te Rs. 2.00 lakhs piak hiding a hiu a, damlona huaisia - cancer, renal failure, heart ailments requiring bypass ahiloleh open heart surgery, angioplasty, brain haemorrhage, paralytic attack etc te Rs 1.00 lakh tiang ki etkawlna ding ah piak hiding, accidents ziak ah liamna tuak hospitalize te kithuapina Rs. 50,000/- piak hiding a hiu. Zia benefit te hi journalist kum 60 mi tiang in a muthei ding uh a hi.
NT 15June2017b

SABKA SAATH SABKA VIKAS SAMMELAN
Lamka, June 14 (Nisin Thuhiltu): National Hydroelectric Power Corporation (NHPC) Limited in government of India thupiak dungzui ah tuni, 15th June 2017 zingkallam dak 11:00 a pat nitak lam dak 1:00 hun sung ah Young Paite Association (YPA) Hall, Hiangtam Lamka, Churachandpur ah “Sabka Saath Sabka Vikas Sammelan” organise bawl ding a hi. Zia hun chu Ksh.Bhabananda Singh, Member of Parliament in Chief Guest hina tawh uap ding a hi. Hun mat sung ah Prime Minister Narendra Modi mapui Central government in kum 3 sung ah a sepdaw te leh NHPC in a sepdaw te taklatna um ding a hi.

CCPUR POLICE IN ZU TAMTAK MAN DAWK

Lamka, June 14 (Nisin Thuhiltu): District Police in tuni’n New Bazaar tuam lak a pat zu hunkhawp a mandawk hi. Police in thuguk a dawn tawh kitawn in M. Kumarjit, MPS, Additional SP (Ops.), Churachandpur mapuina’n Civil Police, Women Police leh VDF kithua Police team khat in New Bazaar tuam lak a pat in Indian Made Foreign Liquor (IMFL) leh Beer hunkhawp a mandawk hi. Zu leh Beer a hileh Thangjam Road a dawr bawl, Heman Momocha (38) s/o Heman Khoidong of Khumujamba, Abung (37) s/o (L) Khelemba Singh of Khumujamba leh Chingtam Hotel ah Pauminlal (25) s/o Tongkholal of Phailian a pat a hia, Beer Bottle 47 leh IMFL Bottle 243, a kigawm ah 290 a pha, a sum ah tuat in Rs. 67,800/- man zo ding hi’n a kigen hi.
NT 15June2017c

ELECTRIC IN A MATLUP TE CHUNG AH KIHOLEM

Lamka, June 14 (Nisin Thuhiltu): Teikot khua a zani Electric Current in mi 2 hinna a lak ban ah mi dang 2 in liamna a tuakna chung thu chu tuni’n kiholemna a um hi. Teikot khua ah electric HT line sia siam lai mei a chia khak ziak in Onkam (35) of Tuilaphai leh Thangminlen of Lhanjang te’n thina a tuak ua, Ginlunthang (13) of Teikot leh Haugousiam (23) of Teikot te’n liamna a la tuak u’i. Zia tawh kisai a hin Kuki CSO chuam chuam te panlakna’n tuni’n kiholemna um in zia dungzui a chun thina tuak mi 2 innkuan te kiang ah zângna dawpna’ Rs. 5 lakh chiat piak ding ban ah a innkuan kinaipi pen khat government sepna piak in ti a hia, chun, liamna tuak te a damthiang chan uh a etkawl na ah sen leh so te chu government in a puakdaw ding ti a hi. Thiluang 2 te chu zani’n Churachandpur District Hospital Morgue ah kawi a hiu a, a galna nei nuam te a ding ti’n Kuki Khanglai Lompi (KKL) General headquarters in KKL Complex, IB Road ah Donation Box a chutpi ua, tuni nitak lam in a khua ua vui ding ti’n KKL Complex a pat KKL GHQ malatna’n puakdaw a hi tai.
NT 15June2017d

WORLD BLOOD DONORS DAY KI MANG

Lamka, June 14 (Nisin Thuhiltu): Kumsin leh June 14 chu World Blood Donors Day a hi tawh kitawn in tuni’n le World Blood Donors Day chu ‘Don't Wait Until Disaster Strikes, Give Blood, Give Now, Give Often’ ti thupi tawh mat a hi. Churachandpur District Hospital Blood Bank saina leh National Rural Health Mission (NRHM), Manipur kithuapina tawh may a um World Blood Donors Day a chun, distrist sung ah mi phachuam ngai mimal ban ah pawl chuam chuam te'n damlo thisan pawimaw te a ding in thisan a piau a, a kigawm ah tuni’n thisan unit 10 val a thawn in a piau hi. World Blood Donors Day mat hun ah Peace, Revival Among Kinship And Score Hope (PRAKASH) a pat thisan piakna tawh kisai ah thugenna a um a, District Hospital Blood Bank ah Incharge Dr. Vijanyanta Khestrimayum in midang te a ding ah thisan a thawn ah piak bangma a khawkna umlo hi’n a gen a, thisan piakzaw tha 3 nung in a pangai gual ah um thak kit sek a hina ah District Hospital ah thisan taksapna aumlo na ding ah kuamasap in thisan a thawn ah piak sek ding hi’n a gen hi.
NT 15June2017e

SASHA SHOPPING COMPLEX HAWNNA NEI

Lamka, June 14 (Nisin Thuhiltu): New Lamka, GS Road lutna bul a ARON and SASHA Shopping Complex kibawl lua thei ding in tuni’n a hawnna leh latna nei a hi. Shopping complex a hileh Bialtu MDC CT Lian Guite leh Pauginmuan te’n dawr kai te a ding bîk ah a bawl uh a hia, shopping complex min a hileh Pauginmuan chate min putsak ah phuak a hia, Pastor Kamchinmang, Local Pastor EBCC Hiangtam Lamka in a hawnna leh latna a nei hi. MDC CT Lian Guite in shopping complex thu a genna a chun, building chu shopping complex a ding liau liau ah kibawl leh pindan (room) khat chu a dung feet 12 leh a vai feet 10 ah kibawl a hi dan a taklang a, tu tiang ah room 8 bawl zaw hita in maban ah room 50 val um theina ding bawl zaw hi ding a hi dan a phungdakw hi. Room kibawl te chu a chaw tu te’n a kichang den thei ding uh a hi ban ah room khat ah Rs. 6 lakh man hi ding in a gen a, zia chu booking bawl masak thei ding leh installment a le piak thei ding hi’n a gen hi. Building a hileh floor 3 um ahia, ground floor chu godown ding, floor khatna chu dawr, clinic, office leh sumkawl veina chuam chuam a ding ban ah a chung nung pen chu hotel bawlna ding bîk ah guanggal ahi dan le a gen hi. Shopping complex hawnna hun chu a ngainatuhun khawp in a uap u’i.
NT 15June2017f

LAWTINNA CHANG TE KIPAKPINA NEI

Lamka, June 14 (Nisin Thuhiltu): Dorcas Hall Mini Auditorioum ah tuni’n Tuivai ADC Constituency huapsung ah khua chuam chuam a pat pawl 10 leh 12 ah lawtinna chang te kipakpina leh a lawsam te siatbatna nei in a um a, zia hun chu Shyamlal Poonia IAS, DC/CCpur in Chief Guest hina tawh uap in Rev Dr Kh Khaizakham in student te a ding ah malzawl dawt piakna a nei hi. Dr Ginlianlal Buhril, Senior professor, Mumbai in student te tilkhona thu a gen a, Chief Guest leh Langkhanpau Guite MDC, Tuivai ADCC te’n te kipakpina leh tilkhona thu a gen u’i. Tuivai ADC Constituency sung ah tukum in pawl 10 leh 12 ah mi 35 a lawting ua, 12 a lawsam u’i. Lawtinna chang a hileh Pawl 12 ah student 14 a hiu a, pawl 10 ah 21 a hiu. Chun, VK Tawna College a kai Niangngaihmawi d/o Kamkhanlal of Mualnuam in Class 12 ah 64.4 % amu tawh kitawn in Tuivai ADC Constituency sung a class 12 lawting te lak ah sâng pen hina a chang a, St. Mary’s School, Pathankot (Punjab) a kai Dalbiakson s/o Songthianmuan of Songtal in pawl 10 ah 9.8 Grade (CGPA) a mu tawh kitawn in pawl 10 ah lawting te lak ah a sang pen hina a chang hi.
NT 15June2017g

VACATION BIBLE SCHOOL CHIATHA ZING

Lamka, June 14 (Nisin Thuhiltu): A chiata June 12, 2017 ah kipan EOC Central Church, Hill Town ah Vacation Bible School (VBS) chu chiatha zing in tu tiang a hin naupang min khumlut sia a kigawm ah 313 a hi. Town Area huapsung ah Sunday School Union chuam chuam kithuakhawm ah sai a um VBS a chun, Pathian thu leh lâ ah naupang te ziltilna a um zing a, amau chu teacher leh volunteer a kigawm ah mi 32 tuam in a enkawl u’i. Chun, VBS a ding in pawl chuam chuam ban ah mimal kipia zo hunkhawp te’n le sum leh pai ah panpina a piau hi. VBS a hileh a hung tung ding June 17, 2017 leh khak hi ding a hi.
NT 15June2017h

LOK SABHA SPEAKER MAHAJAN IMPHAL TUNG

Imphal, June 14 (Nisin Thuhiltu): Imphal ah 15th – 18th June, 2017 sung ah um ding 16th North East Region Commonwealth Parliamentary Association Conference uap ding Lok Sabha Speaker Sumitra Mahajan chu tuni’n Imphal a tung a, ama’n Manipur Legislative Assembly huangsung ah conference hawnna nei ding a hia, Speaker, Manipur Legislative Assembly, Yumnam Khemchand Singh in vaidawn thugenna nei ding leh Speaker, Meghalaya Legislative Assembly & Chairman, NERCPA, Abu Taher Mondal. Deputy Chief Minister, Manipur, Y. Joykumar Singh te’n Inaugural Session hun ah thugenna nei ding a hiu. Conference second day leh Manipur Governor Dr Najma Heptulla in thugenna nei ding a hia, Conference chu North East States chuam chuam a pat Presiding Officers leh Legislature te’n uap ding a hiu. Conference sung ah (i) North East & Look East Policy; (ii) Railways, Airways, Surface Road & Inland Waterways connectivity, economic development of North East Region tawh kisai leh (iii) North Eastern Region ah Chapter of Speaker’s Research Initiative (SRI) siamdaw ding chungchang panna North Eastern Legislature dinmun tawh kisai genkhawm ah um ding a hi.

PRIVATE SCHOOL TE ETZUINA DING POLICY SIAM HIZING: EDN MINISTER

Imphal, June 14 (Nisin Thuhiltu): Education Minister Th. Radheshyam in private school te’n kituptak ah dan kisiamsa te a chiapi leh chiapilo uh etzui theina ding ah educational policy siamthakna chiatha zing a hidan K.M. Blooming Higher Secondary School annual toppers felicitation function hun ah tuni a thugenna’n a taklang a, Manipur ah educational institution zosia kituptak ah a function theina ding ua private schools’ policy chuam a um ding pawimaw hin a gen hi. Recognition Rules - Condition for Recognition of High School nuai ah Board of Secondary Education Manipur in dan leh mual zui ding hun tiang a luidaw te etthakna chiatha zing in le a gen a, mun neucha leh class room kitiak tak ah school run kiti chu thil hitheilo in le a gen hi.

CM, IFCD MINISTER IN TUILET ZIAK AH HAKSATNA TUAK TE ENTHA
Imphal, June 14 (Nisin Thuhiltu): Chief Minister N Biren Singh leh IFCD Minister Letpao Haokip in tuni’n Imphal River kiangnai tuam ah tui let in a suk khak haksatna tuak te vethakna a nei ua, Heingang AC nuai ah Kairang Muslim area ah thil umdan a mun tak ah etthakna a nei ui. Imphal river a pat tui a let nasat ziak ah Kairang area ah mitamtak in haksatna tuak uh leh inn khenkhat tui in chup hin a kigen a, family bang hem zat te government relief camps ah umsak a hiu. Chief Minister N Biren Singh in tuni Aizawl a pat Imphal a tun tun ah Kairang zuan ngal ah thil umdan etthakna nei ngal hin a kigen a, Kompany, Mayang Imphal area ah tui let nasa diak hin a kigen hi. A langkhatlam in Lilong, Irilbung, Ithai Barrage, Hump Bridge tuam ah High Flood Level ah tui um zing nalai in a kigen hi.

INTERNAL INVESTIGATION ORDER SUA A HI: ARMY
Imphal, June 14 (Nisin Thuhiltu): Mat ah a um nung ah Army personnel te’n custody ah SS Sergeant Major W Basanta Singh, PREPAK (Pro) Cadres nasatak ah sawisa a hidan uh media khenkhat in a taklat dungzui ua Army thuneitu te’n internal investigations order sua a hidan PIB Defence Imphal in a taklang a, diklo tak ah kigawlkha a um ua leh a chung ua disciplinary actions lak hiding a hidan le a gen hi.

NE HEALTHCARE CONFERENCE
Imphal, June 14 (Nisin Thuhiltu): Confederation of Indian Industry in Govt. of Manipur leh North East Council, Ministry of DONER, Govt. of India tawh kithua ah 16th June 2017 leh City Convention Centre, Imphal ah North East Healthcare Conference sai ding a hi. Conference, Inaugural Session chu Manipur Chief Minister Nongthombam Biren Singh in Chief Guest hina tawh uap ding a hia, L Jayanta Kumar Singh, Minister for Health & Family Welfare, Govt. of Manipur in Guest of Honour hina tawh uap ding a hi. Chuleh, Medical Tourism, Affordable Healthcare and Skilling & Capacity building tawh kisai Conference sung ah genkhawm hiding a hi.

SECOND MEEYAMGI NUMIT (PEOPLE’S DAY)
Imphal, June 14 (Nisin Thuhiltu): CM Secretariat ah Chief Minister N. Biren Singh in 2nd Meeyamgi Numit (People’s Day) ah mipi te a kimupina ding tawh kisai ah arrangement kituptak ah siam a hidan taklat in a um a, Chief Minister in tuni 15th June zingkal lam dak 8:00 a pat nitak lam dak 2:00 kikal ah ama kimupi nuam leh haksatna tut nuam te kimupi ding a hi. Chuleh, Minister, Administrative Secretarie, DC, SDO leh HoDs etc te’n le thasin ah date 15 Meeyamgi Numit (People’s Day) ah mat a hina chung ah a kimupi nuam te kimupi ding a hiu.

KANGPOKPI AH MYANMAR PRODUCT CHUAM CHUAM DRIVE BAWL
Kangpokpi, June 14 (Nisin Thuhiltu): Food Safety Officer, Kangpokpi in district police tawh kithua in tuni’n Kangpokpi DHQs ah tobacco leh tobacco products drive bawlna a nei ua, zia hun a chun khap ah um Myanmar food product chi chuam chuam hunkhawp a mandawk ui. Zia ah drive chu Food Safety Officer, Kangpokpi L. Saratchandra in Deputy Commissioner leh Additional Supoerintendent of Police, Kangpokpi te thupiak dungzui in amapui a, drive chu sutzawm hiding in a kigen hi.

THEI-GA SUKMINNA CHEMICAL TAWH MI 2 KIMAN

Imphal, June 14 (Nisin Thuhiltu) : Imphal East District Police in tuni special drive a nei hun un Shahidum (50) w/o Md Salim of Hafta Makha Leikai a pat in SP Capsule 886, WY Pieces 2.75, N10 Pieces 15, a sum ah Rs 40,000/- man ding a man dawk ui. Chuleh, City Police Station nuai ah OC mapuina Dharmasala, Thangal Bazar thei (fruit) zawkna leh Nagamapal Singjubung Leirak, Imphal-west ah um godown checking a bawl hun un mi 2 tawh thei (fruit) sukmin na kimang damdawi (chemical) a man dawk ua, matdaw ah um chemical leh mi 2 te chu Designated Officer (Food Safety)/CMO Imphal West district khut in a pedawk ui.