Nisin Thuhiltu - 12 June 2017

User Rating: 0 / 5

Star InactiveStar InactiveStar InactiveStar InactiveStar Inactive
 

YVA NEW LAMKA UNIT IN VAIPAWTHAK DING TELNA NEI
Lamka, June 11 (Nisin Thuhiltu): Young Vaiphei Association (YVA) New Lamka Unit in kum 2017 – 2019 sung ah vaipawthak ding telna tuni’n a nei hi. Vaipawthak ding telna hun chu Mr Vungminthang, President, YV GHQ, Mr H Sangpi, Vice President YVA GHQ leh D David, General Secretary, YVA GHQ te’n a mapui ua YVA New Lamka Unit, President ding leh Vice President ding tel in a um hi. President ding telna ah vote neithei ding ah telchuam ah um voter 158 in vote a khiakna a nei nung un Mr Thianneilam in vote 82 a mu, vote mutampen a hi tawh kitawn ah kum 2017 – 2019 sung YVA New Lamka Unit, President ding ah teltin a hi. Vice President tel hun ah voter 158 in vote a khiak na lak un Mr S Haulal in vote 78 a mu, vote mutampen a hi dungzui in Vice President ding in a telting ui. President ding leh Vice President ding telna neizaw in Mr Vungminthang, President, YV GHQ in teltin thak ah um te kitiamna neisak a nei sak ngal a, a vaima theipen ah cabinet keklianna leh cabinet a siamtup ding uh ti a hi.

GINMALSAWM TONSING AWARD TAWH KISAI AH HIATSAKNA
Lamka, June 11 (Nisin Thuhiltu): Niang Ngaih Mang, Deputy Director, Centre for Community Initiative (CCI) in thusua a bawlna a chun, Chuarchandpur District huap sung ah persons with disabilities CBSE/BOSEM/COHSEM nuai ah tukum 2017 ah Class XI leh XII zo thak GINMALSAWM TONSING AWARD dawng thei ding te'n 16th June 2017 tiang ah application piaklut thei hiding in a taklang hi. Centre for Community Initiative (CCI) Office, Nehru Marg, Centre Lamka ahiloleh email: mangi@ communityinitiative.in ah le piak ah Disability Certificate, Pasport khat leh Marksheet piaklut thei hiding a hia, thuchian kimzaw contact no: +9| 3873-233108 (Offlce) ah kanchian thei hiding a hi. Award ceremony ahileh 26th June 2017 leh Malsawm Ability Resouce Centre (MARC), Pearsonmun ah “6th Unau Meet 2017” hun ah um ding a hia, award winner te Citation leh Cash Award Rs 5000/- chiat piak hiding a hiu. Ginmalsawm Tonsing Award ahileh student te tilkhona ding a June 2016 ah a la kipan a hia, Mr & Mrs Pauzagin Tonsing in famta a chapa upa pen Ginmalsawm Tonsing hiatzingna ding ah award donate a bawl a hi.

DAKKAL 48 SUNG BANDH PUANG; BANDH BAWL TE CHUNG AH LEGAL ACTION LAK HIDI: CM N. BIREN SINGH
Imphal, June 11 (Nisin Thuhiltu): Chief Minister N. Biren Singh mapui state government thak in state sung ah bandh leh blockade umsaklo ding leh bandh bawltu te gawtna piak hiding khawp in taklang zing maleh All Police Constable (Male/Civil) Viva-voce completed candidate Fresh Batch 2016, 10+2 te’n a demand uh sukpitin piak a hilona chung ah dakkal 48 sung tuzan kim (11th June 2017) a pat chiapi ding a hidan uh puang in vauna a bawl ui. Kiphinna nei pawl in thusua a bawlna a chun, Chief Minister N Biren Singh in kua hitaleh bandh ahiloleh blockade bawl masang ah state government thuhiat ding leh kihona buaina sukven theina ding panlak hiding ti ah thutiam a bawl himaleh Chief Minister thum vei kimupi ding a guat uh lawsam uh hin a gen a, zia ziak a chu a lampi um thei sun dakkal 48 bandh bawl ding ah lemsakna nei uh hin a taklang hi. Chuleh, a vaima theilam ah Manipur Police constable (Male) fresh candidate recruitment result suadaw ding demand bawl uh hin le a taklang ui. A langkhatlam ah Chief Minister Nongthombam Biren Singh in facebook comment ah bandh tawh kisai ah dawtna a dawnhuna a chun, bandh bawlte chung ah legal action lak hiding “Bandh toubasing legal action lougani” ti’n a gen hi. Hiatthei khat chu, state government thak in band leh blockade bawl masang ah government thuhiat masak ding ti tangko zing maleh Imphal khawpi sung in bandh thumvei a umna a hitai.

KRA CADRE 2 THANA’ KIGAWL KNF CADRE 1 KIMAN
Imphal, June 11 (Nisin Thuhiltu): Kuki Revolutionary Army (KRA) cadre 2 thana ah kigawl kha, Kuki National Front (KNF) ah defence PRO khat tuni’n police in a man hi. DGP LM Khaute in tuni sunnung ah ama office chamber ah thuthak lakhawm te kimupi in a chiata May 5 ni’ N.Boljang, Kangpokpi district ah KRA cadre 2 kithana ah kigawl kha, Letkhoson (42) s/o Selpao of Saparmeina chu Additional SP (OPS) Dr S Ibomcha malatna Imphal East commandos leh Imphal West district police te combine team in Saparmeina a pat a mat uh hi’n a gen hi. Operation hun a chun, .22 revolver khat, a chang 6 ban ah mobile phone 2 mudaw a hi. Combine team a chun Inspector Achouba Meitei, Officer in charge of Imphal West commando leh Inspector B. Lunthang Vaiphei, Officer-in-charge of Imphal East commando te le a pang u’i. A chiata June 8 a khan, People’s Liberation Army (PLA) overground worker khat Koijam Warjit (47) s/o K Yaima of Thongju Pheija Leitong chu Thongju area a pat Imphal West District Police in mandawk hi’n a gen hi. Zia ni ama a chun, H&B Enterprises neitu, Thoudam Hemchandra Singh @ Itomba s/o (L) Th Aber Singh of Lairikyengbam Makha Leikai chu KCP (Progressive) te a ding ah sum transaction a bawl ziak ah Imphal West Police commando te’n man uh hi’n le DGP in a gen a, ama a pat document chuam chuam, computer set ban ah internet dongle khat lak piak a um hi’n le a gen hi.
NT 12June2017b

IMPHAL-JIRIBAM LAMPI SIAMZAW HITA: CM N BIREN
Imphal June 11 (Nisin Thuhiltu): A chiatha zing Imphal-Jiribam National highway lampi siamphatna nasep zaw thian a hitakdan Manipur Chief Minister N Biren in tuni’n a taklang hi. Hiathei thei khat chu Chief Minister in Arpil tha tawp tiang ah lampi siamphatna nasep zo thiang ding ah lampi siamtu National Highway Infrastructure Development Corporation Limited (NHIDCL) chu a la hiatsak a hia, himaleh a hun tak ah zo zolo a hiu. Central Government in Imphal-Jiribam road in siamna leh etzuina nasep chu BRO khut a pat National Highway Infrastructure Development Corporation Limited (NHIDCL) a la piakdaw le a hi. Chuleh, Project Pushpak nuai ah Imphal-Jiribam lampi kisiam thak a hi.

CHILDREN'S DAY-CUM- FELICITATION
Lamka, June 11 (Nisin Thuhiltu): Imphal West District huapsung Langol ah um OMCRS Ebenezer Children's Home in tuni’n Children's Day Cum Felicitation Program a mang a, zia hun chu Soiminlen, MCS in Chief Guest hina tawh a uap a, Mr. Mangminlian Vaiphei, MCS leh Ms. Rebecca MFS te’n Guest of Honour hina tawh a uap in home ah um naupang te zilna lam leh lam chuam chuam ah panlak ding dan tawh kisai in tilkhona a nei ui.
NT 12June2017c

PARTY MINTHANG PEN BJP: STATE BJP PREZ
Imphal, June 11 (Nisin Thuhiltu): Rajya Sabha member ding ah teltin thak a um, Manipur BJP chief K Bhabananda in BJP chu India ah political party minthang pen hi’n a gen hi. Kakching district headquarter ah tuni ama kipakpina hun matna um a chun, Prime Minister Narendra Modi ziak ah party chu minthang mama ahi dan a gen a, Modi in mipi phatchuamna ding ah pan a lak dan te chu mipi bep hilo in party dang ah politician te le hîp hi ah taklang kawm in Modi leh party ideology ziak ah BJP in Manipur a le vaihawm thei a hi dan le a gen hi.

MIPI BUAINA SUKVENNA DING AH TELTIN TE KITHU TUAK NGAI: KARAM SHYAM
Imphal, June 11 (Nisin Thuhiltu): Consumer Affairs, Food & Public Distribution Minister Karam Shyam in mipi te buai na chuam chuam te sukven piak na ding ah Manipur State Legislative Assembly ah member teltin zosia’n kithutuak tak ah pan lak khawm ngai hi’n a gen hi. Minister Karam Shyam in tuni’n Ima Nongpok Panthoibi Shanglen, Naorem Leikai mai ah community gate hawnna hun chu Chief guest hina tawh uap in National Food Security Act (NFSA) nuai ah anchang hawpna pang in a diklo leh a phalo te chu suk dik na ding ah MLA zosia pankhawm ah nasep khawm pawimaw ding hi’n a gen hi. Mipi te kiang ah kg khat ah Rs. 3 a kipia, NFSA anchang chu sumkawlveina ah mat a hilo na ding ah state government in bazar ah anchang man le ensui zing hi’n a gen a, constituency chuam chuam ah MLA te’n NFSA anchang kihawpna chu ensui in a chang ding dawl te kiang ah changsak ding in a dawn hi. Tanggam leh phai bial a pat NFSA anchang tawh kisai ah complain tamtak dawng a hi tak dan gen kawm in scheme leh phatchuamna zosia chu a chang ding dawl te kiang a tung chiat theina ding ah panlakna thak khat chiapi hipai ta ding hi’n a gen hi. MLA zosia’n kituaklona te hemil kawm ah pan lakkhawm hun hita a hi dan a gen a, Central leh state policy leh programme te chu lawting tak ah chiapi a hi theina ding ah mipi leh government kithuakhawm ngai a hi dan le a gen hi. Naorem Leikai ah community gate kihawng thak chu Maharaj Gambhir Singh Memorial Complex, Manipur University Gate, Narshing Temple leh Kawa Keithel (market) gual ah mipi a ding ah tepte thei thil hung hi ding hi ah Minister Karam Shyam in genlang kawm in gate bawldawna ding ah area mi te panlak dan chu pakcha mama a hi dan le a gen hi. Zia lo chun, Minister Karam Shyam in Lilong Chajing Mairenkhong Community Hall ah numei Self Help Group (SHG) te a ding ah awareness programme kisai chule Chief Guest hina tawh a uap a, financial ah mani kitodelna leh financial management pawimaw dan a gen hi. Financial lam ah numei te dawpkang a hi theina ding ua SHG 160 tuam um te kiang ah kithuapina piak hi ding a hi dan le a gen a, khawtang a ding ah numei te’n panmun pawimaw tak lua a hi ziak ua khawtang khangtona ding ah numei te chu sum leh pai lam ah amau leh amau a kitodel thei ngai uh hi’n le Minister in a gen hi. Awareness programme a chun Langthabal Assembly Constituency a pat numei hunkhawp a pang u’i.

AR SHIRUI SUMMER CAMP SAI
Ukhrul, June 11 (Nisin Thuhiltu): HQ IGAR (South) nuai a um 27 Assam Rifles in June 9-12 sung um ding Shirui Summer Camp 2017 kiti chu Somsai, Ukhrul District ah a sai a, zia hun a chun Ukhrul, Imphal East, Thoubal, Kakching leh Churachandpur district te a pat numei leh pawsal a kigawm ah mi 101 tuam a pang u, adventurous activity chuam chuam a nei ban un mun chuam chuam etthâkna le a nei u’i.
NT 12June2017d

POLITICAL PARTY MINTHANG PEN BJP: STATE BJP PRESIDENT
Imphal, June 11 (Nisin Thuhiltu): Rajya Sabha member ding ah teltin thak a um, Manipur BJP chief K Bhabananda in BJP chu India ah political party minthang pen hi’n a gen hi. Kakching district headquarter ah tuni ama kipakpina hun matna um a chun, Prime Minister Narendra Modi ziak ah party chu minthang mama ahi dan a gen a, Modi in mipi phatchuamna ding ah pan a lak dan te chu mipi bep hilo in party dang ah politician te le hîp hi ah taklang kawm in Modi leh party ideology ziak ah BJP in Manipur a le vaihawm thei a hi dan le a gen hi. Congress MLA khenkhat in BJP zawm ta a hi dan gen kawm in a zawp be ding le um nalai a hi dan a taklang hi. BJP bep in mipi khantona ding ah panla thei a hi dan a hiat ziak ua Congress MLA te’n le disqualification proceeding chu laulo hial ah BJP zawm uuh hi’n le state BJP president in a gen hi. Zia hun matna chu State BJP leader te ban ah Kakching Municipal Council ah BJP Councilor te’n a uap u’i.

GST COUNCIL MEETING AH ITEM 66 TAX LEVEL SUKNIAM AH UM
New Delhi, June 11 (Nisin Thuhiltu): New Delhi ah tuni’n Goods and Services Tax (GST) Council 16th meeting a um a, zia hun a chu item 66 te a ding ah tax rate siam thak a hi. Finance Minister Arun Jaitley in meeting zaw ah thuthak lakhawm mite kiang ah a genna a chun, industry player te feedback dungzui ah GST Council in tax rate khenkhat etthakna nei a hidan a gen a, item 133 lak ah 66 te tax level sukniam thak ah um hin a gen hi. Principle pani - equivalence leh utilisation behavior dungzui ah tax level sukniam ah um hin le a gen a, 18th June leh GST Council meeting um kit ding a hidan taklang kawm in zia hun chuleh lottery tax, e-way bill ti te etthakna nei um ding hin a gen hi. Union Finance Minister Arun Jaitley in tax rate sukniam ah um te khenkhat a taklatna a chun,₹ 100 nuailam man movie ticket te chung ah GST chu 18% hisak a hia; ₹100 chung lam te chu 28% hisak a hi. Computer printer te chung ah GST chu 28% a pat 18% ah sukkiam in a um hi. Insulin, 12% a pat 5%, Dental wax 28% a pat 8% , Plastic beads 28% a pat 18% , Plastic turpolin 28% a pat 18% , Exercise books 18% a pat 12% , Coloring books 12% a pat nil, Pre-cast concrete pipes 28% a pat 18% , Cutlery 18% a pat 12%, Tractor components 28% a pat 18%, Agarbatti 12 a pat 5% leh school bag a 28% a pat 18% ah sukniam a hi.