Nisin Thuhiltu - 11 June 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Minister in Institute thak hawng
Lamka, June 10: Minister of Agriculture leh Veterinary &Animal Husbandry, V. Hangkhanlian in tuni’n Hauzel Mansion, Hiangtam Lamka ah Techno Paramedical Institute hawnna nei in Rev. Khen P. Tombing, Chief Moderator, PCI (R) in a latna a nei hi. Techno Paramedical Institute hawngtu Minister Hangkhanlian in Institute hawn a hi tawh kitawn ah khangthak sepna neilo hunkhawp te sepna mu na ding leh institute a pat zilthiam ah sepna musak tu hung hi ding a hina ah kipakpi a hi dan a gen a, Course zil thei ding te lak ah Pawl X passed te a ding le um a hina ah tamtak te a ding ah phatchuamna hi ding in a gen hi. Gamsung a ding ah go mantam khat a hina ah gamsung ah damlona tawh kisai ah van mat pawimaw tak a hung hi ding dawisak thu le a puang hi. Techno Paramedical Institute a hileh Planning Commission, Govt. of India in 1952 kum ah a la bawldaw, National Development Agency nuai a um Bharat Sevak Samaj (BSS) in hiatpina a piak, Authorized Study Centre a hia, kum 2 Course - BSS Diploma in Medical Laboratory Technician, BSS Diploma in X-Ray Technician, BSS Diploma in Ophthalmic Technicial leh kum 1 Course - ECG Technician leh Laboratory Assistant tite um ding a hi. BSS saina in Techno Paramedical Institute, Churachandpur a exam zosia chu BSS saina nuai ah nei hi ding leh Certificate zosia le BSS a pat hiding a hi. Institute hawn a hi tawh kitawn in Admission Form leh Prospectus zuakdaw a hingal a, Admission Fee, Course Fee leh a dang dang chu Prospectus ah kimtak in a um hi. Hun matna a kichai in Minister malatna’n Khuga Dam ah tuinêk leh lo tui piakna ding ban ah Pangzawl a Bus Terminal ding etthâkna a um a, khawpi sung ah tuidawn ding kiningting piak theina ding ah panlak ding leh chuktui luanma ah Khuga Dam Right side leh left side canal bawl ding ti ah Minister in phuangdawk kawm in Pangzawl a Bus Terminal bawlthak hiding in le a gen hi.

Exam ah lawting te kipakpina nei
Lamka, June 10: CCpur Meetei Student Union saina nuai ah tuni’n Khumujamba Meetei Leikai mandap ah tuchung Class X leh Class XII ah lawting te ban ah MA a Gold Medalist la te kipakpina hun nei in a um a, zia hun chu Minister of Agriculture leh Veterinary &Animal Husbandry, V. Hangkhanlian in Chief Guest hina tawh a uap a, Shyamlal Poonia IAS DC CCpur, Khaipao Haokip, Chairman, ADC CCpur leh V Khaikhanmung Vice Chairman, ADC/CCpur ten Guests of Honour hina tawh a uap ua, Paukhanlian, EM/ADC , Vungsuanthang, Chairman, Election Committee ban ah meetei society sung ah puitu chuam chuam te’n le a uap u’i. Zia hun a chun, Class X leh XII ban ah Manipur university nuai ah MA Mathematic ah Gold medalist, Laisram Melody (28) d/o Chaodras of Manlap leikai te kiang ah kipakpina thil piak a hi. Chief Guest Minister V Hangkhanlian in a thugenna a chun, tulai khawvel ah kitetna sang mama ta in lekhathiam bep hilo in mite sang ah chung nung zawk hi ngai ta a hina ah student te le thiamzilna lam ah kukal tak ah pan a lak uh ngai ta hi’n a gen a, thiamzilna lam ah haksatna tuak a um leh ama theina chan ah panpi nuam zing a hi dan gen kawm in lawtingna chang te kipakpi thu le a phuang hi. Guest of Honour Shyam Lal Poonia, IAS in tunung ah gamsung enkawl ding student te thiamzilna lam ah nu leh pa te’n tawsawt dan thiam mama ngai hi’n a gen a, student te’n le mani mawpuakna hia zing kawm in tawmngai tak ah pang ding in a tilkho a, government bep ah sepna um lo in lam lam chi chuam chuam ah sepna mu thei na tampi um hi’n le a gen hi.
NT 11June2017a

I-League player te tawh kipawl khawmna hun mang
Lamka, June 10: Happy Feet Football Academy saina’ tuni’n Nghathal Playground ah I league player te tawh kipawl khawmna leh exhibition match nei in a um hi. Zia hun chu CT Lian Guite, MDC, New Lamka West in Chief Guest hina tawh a uap a, T Lianminthang, Assistant Director, SAI leh T Chinzasawm, Section Officer Engineer te’n guest of honour leh functional president hina tawh a uap ua, khuallian te’n thugenna nei in Siam hanghal XI leh Happy Feet Football Academy te’n exhibition match a nei u’i. Chief Guest CT Lian Guite football kiti game mantam tak a hi ban ah sum tampi senna a hia,kua ma’n ngainep lo ding leh tupna kichian tak ban ah kukal tak ah football kihel ding hi’n a gen a, kuama a thiam sa’ piang umlo a kihina ah kukal leh kitakna tawh kizil in maban ah ball pek thiam hung suak sak ding hi’n a gen hi. Kizil lo hial ah kuama’n ball peklo ding ah chialna bawl kawm in discipline neitak ah kihel ding in le a chial hi.

Career Guidance nei
Lamka, June 10: Hmar Students’ Association (HSA), Churachandpur Joint Headquarter in tuni’n JJ Memorial Hall, JJ Plaza, Rengkai Road ah Career Guidance-cum-Felicitation Programme a sai hi. Hun matna a chun, technical session ah Michael Fimliensang Fimate, Jr. MCS in “Competitive Examinations” leh Dr. CA Laldinsang Pudaite in “Career on Medical Science & Sports” ti te thupi ah mang in Career Guidance hun matzaw a hi. Zia zaw a chun, kipakpina hun mat a um in Tlangtinkhuma, IAS, Director (Education-U) leh Chairman, COHSEM, Joint Secretary (Hr & Tech.Edn) in Chief Guest hina tawh a uap a, Rakesh Balwal, IPS, Superintendent of Police, Churachandpur in Guest of Honor hina tawh in lawtingna chang student te thilpiak piakdawna a nei u’i. Class X leh Class XII lawting te kipakpina hun ah award dawng te a hiuleh Class X Toppers’ Award - Mathematics: Hosea Ramthlunglien s/o Lalzarlawm, MIL Hmar: Lalhrietsang s/o Lalthanglur, (Douglas Memorial H/s), Science : Hosea Ramthlunglien s/o Lalzarlawm, (AG H/s), Social Science: Joshua Lalditsak Infimate s/o Lalnunsang (Douglas Memorial H/s), ENGLISH: Hosea Ramthlunglien s/o Lalzarlawm, (AG H/s), Overall Topper : Joshua Lalditsak Infimate, S/o Lalnunsang, (Douglas Memorial H/s) a hiu a, Class XII ah ARTS: Jimmy Lienhmingthang s/o Lalrokhum, (Vision Academy), SCIENCE: Lalvarmawi Hmar d/o Lalnunsang, (Vision Academy), MIL HMAR: Nancy Lalvarmawi d/o Lalthlamuongpui Infimate (Rayburn College), CBSE Class X: Justin Songrolal Songate s/o Joseph L Songate (Hermann Gmeiner School), Class XII : Jerome Lalneithang Pulamte s/o Hluni (St.Paul) hi ua, Best Performance (School) ah Class X AG High School – percent 97.85 leh Class XII ah Vision Academy 100 % (Sc & Arts) a hi.
NT 11June2017b

Ngamatna tawh kisai ah holimna nei
Lamka, June 10: Churachandpur Police Station ah tuni’n Khuga Dam Area a hausate leh police official te’n meeting nei in Khuga Dam ah nga matna tawh kisai genkhawm a hia, Khuga Dam ah nga matna tawh kisai ah Deputy Commissioner, Churachandpur in gû (poison) leh Dynamo mang ah ngamat ding a khap tawh kisai a gen khawm u’i.

Quiz competition sai
Lamka, June 10: National Health Mission, District Health Society, Churachandpur saina in tuni’n St. Paul’s Institute, New Lamka ah Intensified Diarrhea Control Fortnight (IDCF) toh kisai Quiz Competition a um hi. Competition a chun St. Paul’s school a kai student 55 tuam a pang ua, “Sanitation & Hygiene” ti thupi pansan ah Quiz kitetna a nei u’i. Competition ah kipakman te a hileh a hung tung ding June 12, 2017 leh Kangvai Higher Secondary School a um ding IDCF hawnna hun ah piakdaw hi ding a hi.

MANIREDA Chairman in School building hawng
Lamka, June 10: Muolbem Upper Primary School building hawnna chu tuni’n tuni’n Muolbem khua ah nei in a um a, school building a hileh Ginsuanhau Zou @ GS Haupu, Chairman, MANIREDA in a hawng a hia, Rev. Zasangkhum, Thenmuol Local Church in School banah Ginsuanhau leh a zi a ding in a pauchap piak hi. Zia hun a chun, P. Tongthang Zou, Social Worker, Tongthang Baite, Election Chief Agent leh Chief of te’n thugenna hun a mang u’i.of Khawpuibung leh Lalmalsawm, Chief of Muolbem te’n thilpiak piakna hun la in P. Tongthang Zou, Social Worker, Tongthang Baite, Election Chief Agent leh Chief of Panglian, Suanchinpau, Lungthul MDC, T. Goukhomang, ZEO Churachandpur ban ah GS Haupu te’n thugenna hun a mang ui.

CCPur police in drive chiapi zing
Lamka, June 10: Churachandpur police in lamka sung ah anti-tobacco drive a nei chu tuni’n le a sutzawm kit hi. Zia hun a chun, van hunkhawp mandawk in mat a um in van neitu a hileh Jagnarayan Sahu (47) s/o Late Ram Sarup Sahu of Kanehri Village, Buxar, Bihar a hia tu a hin Hebron Veng, New Lamka ah dawr bawl a hia, a godown ah police in check a bawlna’ chun talab tamtak, a sum ah Rs. 1,56,200 tuam hi ah tuat a hi, mat a um van te chu Food Safety & Standard Wing, Churachandpur khut ah piakdaw in a um hi.
NT 11June2017c

CEO in Computer set 1 pia
Lamka, June 10: T Kammuanlal, MCS, CEO/ADC Churachandpur in a pawimaw na ah a la matthei ding ti’n Malsawm Ability Resource Centre (MARC), Pearsonmun a mat ding ti’n Computer set khat a la pia’i.
NT 11June2017d

Award piakdawna nei
Lamka, June 10: Hope Baptist Academy (HBA) in tuni’n Garlow Memorial Chapel Bible Hill ah Pi Ngailhing Haokip award for topper from Hope Baptist Academy 2017 kiti nei a hia, zia hun a chun Rev S Kaikhanmang, Director of Mission, NTBCA in passing out student te a ding in a pauchap piak hi. HBA student Kimlemdeih in Pi Ngailhing Haokip Hope Baptist academy HBA topper award 2017 a kisâng hi.Ama’n a hileh pawl X exam a khan 75.5% a um zo hi. Award a hileh certificate ban ah sum Rs. 5,000 in a zui hi.

Cup lawpna leh lawting te kipakpina nei
Buallian, June 10: A chiata May 18-20, 2017 sung a la um Zillai Churachandpur Block saina nuai ah Annual Sports ah Men’s Football champion, Zillai Buallian Unit in cup lawpna ban ah tuchung pawl X leh pawl XII ah lawtinna chang te kipakpina chu tuni, June 10 in Buallian hausate inn ah a nei ua, zia hun chu exam ah lawtinna chang te, Zillai Buallian Unit member te ban ah Zillai Churachandpur Block puitu te’n a uap u’i. Zia hun a chun, a chiakhawm khenkhat te a pat thugenna hun um in lawtingna chang te pauchap piakna a um a, hun mat zaw a chun a chiakhawm te’n ankuang sawkkhawmna le a nei u’i.

Children's Day kipat dan
Children's Day hi khawvel mun tin ah mat a hi sek a, a hinla a hun a kibang suak diak pua, gam chuam chuam te mat ni hi et a hi chun Children’s Day chu thasin ah kimang zing tina a hi. Amasapen ding in Republic of Turkey in 1929 a khan Children's Day chu suty ah a la puang pan a, a ni ding ah April 23 hisak in zia ni chu naupang te a ding bîk in a lân dawk mai u’i. International Day for Protection of Children in 1950 a pat in Children's Day chu June 1 in a la nit a, United Kingdom in vang November 20 chu Universal Children's Day ding ti’n a la puangdawk hi. Chun, ei uh chenna India ah a hileh Prime Minister masapen, Pt. Jawaharlal Nehru pianchampha hiatzingna ding ah November 14 chu Children’s Day ding ti’n sawlkal in a la phuang hi. Tu ah en ei un i mat uh, June 2nd Sunday ah Children’s Day mat ding ti hi Universalist Church of the Redeemer, Chelsea ah pastor, Reverend Dr. Charles Leonard kiti in a la patdaw a hia, zia ni chuleh naupang te a ding bîk ah special service a la nei pi sek hi. Dr. Leonard in zia ni chu Rose Day ti’n a la minput sak a, khawnung ah Flower Sunday theng in zia zaw a chun Children's Day ti ah minput sak den a hitai.

Hill People’s Day ah CM in mi 800 val kimupi
Imphal, June 10: Manipur Chief Minister N. Biren Singh in Hill People’s Day ah thasin date 10 a mat sek tawh kitawn in tuni’n le Chief Minister’s Secretariat complex ah Hill People’s Day a hi tawh kitawn in mitamtak te haksatna leh buaina ngaithakna a nei a, a kimupi mi a tam mama hi. Organisation chuam chuam 260 a pat - Khaw hausa leh Civil Society leader mi 800 tuam in Chief Minister kimupi a hidan uh taklat in a um a, ama mimal tak ah group leh mimal tin te dakkal 5 sung kichawl man keilo ah kiholimpina nei in a kigen hi. Chief Minister in a genna a chun, khaw-hausa leh organisation leader chuam chuam in lampi hawilo thu, drinking water supply hawilo thu, playground leh community hall kitutak umlo ti te panna issue chuam chuam a kiang tut a hidan uh a gen a, Hill People’s Day leh Meeyamgi Numit chiapi a hina a pat issue chuam chuam hiatdawlo ah um te hiadawk thak a hidan a gen hi. State ah BJP-led coalition government chung ah mipi’n muanngamna nei a hidan uh genlang kawm in mun gamla taktak Tousem, Nambashi leh Jessami etc ti te a pat le ama kimupi um a hidan uh a gen hi. tunai ah tui-let ziak ah haksatna tuak tamtak in le a haksatnau tut a hidan uh a gen a, Hill People’s Day leh Meeyamgi Numit hun ah a kiang tut ah um issue chuam chuam te chu ama office in record kituptak ah bawl a hidan le gen in, kituptak ah etzui hiding hin a gen hi. Tunaicha Central Government in a puan, Hill Area Development Programme nuai ah hill district chuam chuam ah haksatna um te sukven hiding in a gen a, zia programme a diak tak ah Chandel, Tamenglong leh Churachandpur district ah chiapi hiding hin a gen hi. Khangthak tamtak sepna neilo ah um, a diak ah migenthei inkuan a pat et chu government sepna kilak hun ah preference piak chuam hiding uh le a hithei tiang ah sepna piak hiding un a gen hi.
Chief Minister in a gen belapna a chun, inter-village road leh approach road siamthakna ding ah Centre ah Rs 600 crore bei ding detailed project report piaklut ah um hin le a gen hi. Hiathei khat chu, Chief Minister in April 11 ni Ukhrul district a phak hun ah thasin leh date 10th chu Hill People’s Day ah mat ding ah a puan a hi.

Stage masa sang ah a sangzaw tung student te le kipakpi ding a hi: Deputy Chief Minister
Imphal, June 10: Emmanuel Higher Secondary School, Haipi, Kangpokpi District ah tuni’n “19th Major S. Kipgen, SM (Pagin) Foundation Meritorious Award in High School Leaving Certificate Examination 2017” function a um a, zia hun chu khuallian hina tawh Deputy Chief Minister Yumnam Joykumar Singh, Health Minister Shri L. Jayantakumar Singh leh Tribal Affairs Minister Shri N. Kayisii ten a uap ui. Deputy Chief Minister in a thugenna a chun, meritorious student te bep hilo stage masa sang ah a sangzaw tung te le kipakpi leh tilkho ding pawimaw in a gen a, hun masa tawh tekak ah tulai zilna/zildan nasatak ah kisang danglamta a hidan a gen hi. Tuhun ah student a tamzaw te tuition/coaching ah kinga a hitakdan uh gen kawm in masang ah tuition/coaching la student a la tawm mama hin a gen hi. Bang level hita leh student te tilkho leh chawihawina bawl ding pawi hin le a gen a, quality education pawimaw hin a gen hi. Chuleh, Learning, Understanding leh Application chu zilna lam thil ah a pawimaw mama hin a gen hi. Health Minister L. Jayantakumar Singh in a thugenna a chun, mipi te leh society dinmun siamhawina ding ah panla chiat ding leh zilna chiapi ding in student te chialna a bawl a, mihing hinkhua social education pawimaw mama hin a gen hi. Tribal Affairs Minister N. Kayisii in a thugenna a chun, theitawpsua ah student te’n lekha simna lam ah pan a lak uh pawimaw a hidan gen in, nu leh pa leh society in a kinepna supitint thei ding ah panla chiat ding student te a chial hi. Sadar Hills District huap sung ah topper 11 te zia function hun a chu award piak in a um ui. Award function zaw, Imphal a zawt lam in Deputy Chief Minister in Guwahati High Court, Imphal Bench Complex , North AOC ah Taxation Office ah a chiatha zing renovation work dinmun etthakna a nei a, hapta kit sung ngei ah nasep zothiang ding in a kisaipi thuneitu te a vaithak hi.

Thangmeiband ah dakkal 12 sung bandh
Imphal, June 10: Thangmeiband Assembly constituency huapsung ah tuni’n zingkallam dak 6:00 a pat in bandh a um a, Thangmeiband area ah hindan ngaina a su nawngkai mama hi. Zia dakkal 12 sung bandh chu Sekmai MLA Dingo hai ding phutna kibawl a hia, bandh hun sung in Khuyathong apat Chingmeirong kikal ah gari tai ding khak in a um a, dukan, business establishment te a kikhak vek hi.
Hiathei khat chu, 11th Manipur Legislative Assembly election ah Sekmai Assembly Constituency a pat MLA ding ah teltin ah um, Parliamentary Secretary Heikham Dingo Singh in kum sawttak a kingaipi a nungaknu’n ngawna a siam pawmlo maleh a bial sung ah mipi te’n Heikham Dingo Singh thiamlo chan in 8th June ni a khan le a kintheilam ah MLA hina a pat a haina a siam ding phutna’n Club leh Thangmeiband Apunba Meira Paibi Lup te mapuina Thangmeiband DM College Gate, Imphal West in sit-in- protest a la nei ua, Sabita Devi, Vice President, Khunthokhanbi Meira Paibi Lup in thuthak lakhawm mite kiang ah MLA Dingo gamtatna dawi umlo a hidan gen in, numei te chu zawk (sale) leh sum ah mawk thepthak ding hi a hidan uh genkawm in numei chung ah zawntat MLA Dingo chung ah action lak ahiloleh June 10th ah dakkal 12 sung bandh bawl ding ah ala puansa hita a hi.

GSI team in Kalikhola entha
Imphal, June 10: Tadubi AC huapsung Kangpokpi District ah Kalikhola area lei khikek a nasat mama nachung ah Kalikhola khawmi te mun dang ah puidaw ah a um bak ua, lei khitkekna ziak khualna a chiathak zing tawh kitawn in tuni’n geological Survey of India (GSI) expert team khat in Kalikhola ah thil umdan etthakna nei ui. Zia ah lei khikek chu 5 Km radius huapsung sukha a hia, population 400 tuam umna inn 76 te ding ah haksatna tuntu le a hi.

Museum ah Old Assembly Secretariat siam hidi
Imphal, June 10: State Assembly Secretariat complex, Chingmeirong ah Manipur Legislative Assembly Speaker Yumnam Khemchand in tuni’n state journalist te tawh interaction programme nei hi. Zia hun a chu Assembly Speaker in state Assembly Museum ah Old Assembly Secretariat Building sua (convert) hiding in a gen a, Manipur Legislative Assembly speaker masapen T.C. Tiyangkham lim leh thil lui chuam chuam te Assembly Museum ah kawi hiding hin a gen hi. Zia interaction programme chu June 14 -June 18, 2017 sung ah um ding, 16th Annual Conference of North East Region Common Wealth Parliamentary Association tawh kisai ah organised kibawl a hi. Chuleh, Assembly Speaker in media te leh State Legislative Assembly in relationship hawitak a nei theina ding ua media advisory committee siamdaw hiding in a gen a, zia committee member ding a chu Manipur Hills Journalists’ Union, Editors’ Guild Manipur leh AMWJU a pat selected journalist te pansak hiding in a gen hi.

7th Pay Commission: Central govt employees te'n July a pat revised allowance mupan thei ding

New Delhi, Jun 10: Central government employees te’n a ngakla mama uh 7th Pay Commission recommendation dungzui ah house rent (HRA) panna revised allowances chu July 2017 a pat mupan theita ding un financial daily “Financial Express” in tuni’n a taklang a hi. Zia ding a chu Union Cabinet in tu hapta sung ah meeting nei ding leh 7th Pay Commission dungzui ah HRA leh allowances punsakna ding tawh kisai ah thupukna siam ding uh ti a hi. Empowered Committee of Secretaries (E-CoS) in revised allowances tawh kisai Simhaini a taklatna a chun, April 27, 2017 ni a khah finance minister /Union Cabinet khut ah allowance tawh kisai final report piaklutna neita hin a gen a, E-CoS in Ashok Lavasa committee recommendation tawh kituak ah Seventh Pay Commission, chairman Justice AK Mathur in khawpi (city) zil ah Class X, Y leh Z te House Rent Allowance (HRA) rate, 24 percent, 16 percent leh 8 percent ah kawi ding ti chu support bawl in a taklang hi. 7th Pay Commission recommendation dungzui in house rent allowance (HRA) chu a umna mun uh zil in basic pay thak a pat 24 %, 16 % leh 8% hi ding a hia, dearness allowance (DA) chu 50% a val tak leh HRA chu 27 %, 18 % leh 9 % hi ding ban ah DA 100% a val tak leh HRA chu 30 %, 20 % leh10 % hi ding a hi. Allowance tawh kisai a hin employee union te’n HRA chu 30%, 20% leh 10 % hisak ding ah a la phût uh a hi. Chun, a kigawm ah allowance 196 um lak ah 52 sukbei ding banah 36 te le ladawk in allowance dang tawh gawpkhawm hiding a hi.