Nisin Thuhiltu - 10 June 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Thil dik leh diklo ah kibawl te dinmun etthakna  ding mass recruitment khualna nei a hi: CM Biren 
Imphal, June 9 (Nisin Thuhiltu ): Chief Minister N. Biren Singh in media fraternity pawimaw leh haksatna umte sukven piak ding a hidan Manipur Press Club, Imphal ah tuni All Manipur Working Journalists’ Union (AMWJU) in reception function a matpi hun in a gen hi. Zia hun matna chu Chief Minister banah Information and Public Relations Minister Th. Biswajit leh Social Welfare Minister Nemcha Kipgen in le a uap hi.  Chief Minister in a thugenna a chun, State Government in state sung ah journalist te a ding ah  health insurance scheme approved bawlta a hidan puangkawm in zia scheme chun, media person liamna tuak leh damlona tuak ahiloleh accident tuak te a panpi chuam ding kinepna liantak nei a hidan a gen hi.
Journalists’ pension sukpun ding leh Press Housing Colony sakna ding tawh kisai a genna a chun, a vaima theilam ah State Cabinet in media fraternity te ding ah  sukven piak ding a hidan gen in thutiam a bawl a, media te’n a sep ding dawl uh kituptak ah a sep ding uh pawimaw a hidan gen in State Government sep hawilona leh a diklona a um leh kituptak ah a suadaw ding uh pawimaw a hidan le a gen hi.  State mipi te ding ah panlakna journalist te leh government in kituptak ah pan a lak khawm ding le pawimaw in a gen a, State Government in mipi te kiang ah transparency a tun ding dawi a hidan taklang kawm in  media chu society ding ah lim-et (mirror) hin a gen hi. State Government in tulak diklotak ah tobacco leh khamthei kizuak te dodalna nasatak chiapi zing a hidan le a gen a, mipi te government panlakna support bawl cchiat ding in chialna a bawl hi. State Assembly election ding kuan cha Government Department 15 ah mass recruitment tawh kisai ah Special Investigation Teams (SITs) siamdaw ah a umna tawh kisai a genna a chun, tu ah state Government in kuama khenchuam leh melma neilo a hidan gen in, election model code of conduct kal ah nasepna, thil dik leh diklo ah kibawl te dinmun etthakna nei hizaw hin a gen hi.

Information and Public Relations Minister Th. Biswajit in a thugenna a chun, media te ding ah quality reporting leh thudik phawldaw ding pawimaw hin a gen a,  editors, senior journalists, reporter te’n mipi te ding ah nathupi tak sem a hidan uh gen in, government leh mipi te kal ah gap um te sukbeina ding banah state sung ah khantona kituptak a um theina ding ah panla ding in media person te chialna a bawl hi.

Social Welfare Minister Nemcha Kipgen in a thugenna a chun,  State journalist te State neucha a pat himaleu a theinau sang mama in a gen a, journalism lam ah numei a pantam ding dawi a hidan a gen hi. Chuleh, numei banghem zat te journalism field ah a um takna chung ua ki aat-pi mama hin a gen hi.  Zia hun matna chu Parliamentary Secretary (Home) L. Sushindro, DIPR Director Meghachandra Kongbam, Media Advisor to CM S Irengbam Arun ten le a uap ui.

UG te ding ah meichang gudawk Riflemen 2 mat ah um: DGP LM Khaute 
Imphal, June 9 (Nisin Thuhiltu ): Bishnupur district police team leh 25 Assam Rifles kithua combined team in May 30, 2017 ni ah Imphal-Churachandpur lampi, Kangvai village ah gari taitua te check a bawl hun ua amatdaw uh  2780 rounds of 7.62x39 mm ball CTN, AK Rifles chang tawh kisai Manipur Police in khualna a nei zing tawh kitawn in meichang matdaw ah um te chu state armed police te’n a zawkdaw’u a hidan mudaw a hi.  Manipur DGP LM Khaute in press conference ah tuni a taklatna a chun meichang matdaw ah um te tawh kisai ah meichang gudawk leh zuakdawktu - Fimrothang Hmar, 1st IRB leh Asem Boiton Singh, 1st Manipur Rifles te mat ah um a hidan uh a taklang a, khualchilna nei hun ah state security forces personnel 2 in thingnuaimi te supply bawlna ding ah meichang a gukdaw’u a hidan suidaw ah um hin a gen hi.

Mat ah um rifleman Boiton Singh kipuan dungzui ah DGP Pool Arms Kote a pat 1088 rounds, mei chang ( ammunition) chu thingnuaimi te kiang ah zawksawn ding ah a gukdaw’u hi ah kipuang hin a gen a, mat ah um riflemen  2 te court ah dinsak a hinung ua thudawtna neibe ding ah police custody kawi a hidan uh le a taklang hi. Chuleh, meichang kipuakna gari chuang te chu -  Khaiginlal Haokip (34) of Churachandpur Gamphajang, Jangkhokhao Khongsai (40) of Tingkanphai leh Simon Gurung (31) of Mantripukhri (Imphal East district) te a hidan  uh taklang kawm in, meichang pua mi pathum leh a meichang puak uh kimandawk te chu Moirang police, Bishnupur district te khut ah piaklut a hidan uh a gen hi.
NT 10June2017b

Govt. Qtr lua te etchian thakna nei hidi: DC/CCpur
Lamka, June 9 (Nisin Thuhiltu ): Shyam Lal Poonia, IAS, Deputy Commissioner, Churachandpur in tuni thusua a bawlna a chun, 14th June, 2017 a pat office team in Churachandpur town sung ah Government Quarter lua te etchian thakna (verification drive) kipan ding a hidan taklangkawm in Government Quarters lua zosia te chu Quarter luana tawh kisai ah documents, allotment order, rent payment proof, service I-Card, etc tawh ready sa um ding in hiatsakna a bawl hi. Chuleh,  Quarter luana tawh kisai ah document te chu verification team te etsak ding leh kithuapina pechiat ding in le chialna a bawl hi.

Aadhaar leh Jeevan Pramaan suktuakna khak hita
Lamka, June 9 (Nisin Thuhiltu ): District e-Governance Society (DeGS), Churachandpur nuai a Common Service Centre (CSC) leh District Treasury Office, Churachandpur kithua ah Treasury Office, Tuibong ah Pensioner/Family Pensioner te a ding ah Aadhaar leh Jeevan Pramaan (Digital Life Certificate for Pensioners) suktuakna chu tuni’n khak a hi ta’i. Hun matna a chun, Peter G. Bieklien, District Manager, DeGS, Churachandpur in Jeevan Pramaan chu pensioner mun gamla a um leh a têk te’n kumkhat ah Treasury Office 4 vei a phak ua lim a kilak uh a ngai taklo na ding ah kibawl hi’n a gen a, Life Certificate mang ah veng chuam chuam a um Common Service Centre ah update bawl ah Treasury Office phak ngailo ding hi’n a gen hi.  Camp chu May 31, 2017 chan ding ti himaleh Pensioner a tam ziak ah June 10, 2017 chan a ding ah suksau be a um a hia, a hinla, June 10 chu 2nd Saturday a hina ah tuni, June 9 ah khak a um leh zia hunsung ah sudik manlo te a ding ah a hun lemchang dang hawng hikit ding in le a gen hi. Tu dinmun in, town area ah CSC 100 tuam lak ah 42 bep a active a, zia centre te a chun Aadhaar kilak thei ding hi’n le a gen hi. Camp hunsung ah District a pat pensioner 4,751 um lak ah Jeevan Pramaan ID 2,900 tuam bawldaw a um a hi dan le a phuangdawk hi.

Police in tobacco product mandawk kit
Lamka, June 9 (Nisin Thuhiltu ): District Police in khawpi sung ah tobacco product dodalna a chiapi sunzawm to zel in tuni’n le van hunkhawp a mandawk hi. New Bazaar a Axis Bank bul, Tedim Road a dawr bawl, Srikumar (41) s/o Ramprawas of Ara Village, Bihar a pat police team in van hun beisa leh dum a pat kibawl thai leh muamthei (smokeless tobacco) tamtak mandawk in van te chu K. Sunita Devi, Designated Food Safety Officer, Churachandpur khut ah piakdawna a nei hi. Matdaw a um van te a hileh Baba Black bawm 1,251, Balmiki bawmpi 3, Signal bawm 13, Saajan packet 30, Save Sea piece 690, Golden Khaini piece 1,620, Paras packet 519 leh bag 7, Talab bag 3, Baba Black packet 204 leh Baba Black (120) packet 100 pha zo hi.
NT 10June2017c

SMDC te’n training nei
Lamka, June 9 (Nisin Thuhiltu ): Vimala Raina High School, CRC Centre ah BRP CRP CCpur block saina nuai ah Community Mobilization SSA/CCpur block nuai a um School Management Development Committee/PPRI’s Local Authority Cluster level te a ding in ni 3 dai ding training tuni’n a kipan a, training hun ah Lianzagou Zou, BPR CRP in ‘Overview of Right To Education (RTE) Act, 2009’ tawh kisai a ziltil a, Nengzathang BPR CRP in ‘School & Teacher under Right To Education (RTE) Act, 2009’ tawh kisai a ziltil a, Chinlamthang BRP CRP in discussion hun malat hi.  Zing, June 10 leh Gouchinlangh BRP CRP in ‘Community and civil society awareness involvement, participation and their roles’, T Thawngzading BRP CRP in ‘Access, equity and quality’, G khupchinthang BRP CRP in ‘Civil works, funding, planning, monitoring and maintenance of account’ ti tawh kisai in ziltil ding a hiu a, June 12 leh Lianthianmung BRP CRP in ‘Protection of child rights’ leh Ginsuanlal BRP CRP in ‘Abbreviation’ tawh kisai ah ziltil ding a hiu. Training hun sung in Community mobilization SSA CCpur block nuai ah cluster 1 leh 3 te pang ding a hiu a, June 13-15 sung Vimala Raina High School ah training zaw hun leh New Lamka Upper Primary School ah cluster 2 leh 4 te a ding in training um ding a hi.
NT 10June2017d

Singngat AC MLA kipakpina leh malzawl dawt piakna nei di
Lamka, June 9 (Nisin Thuhiltu ): 60 - Singngat (ST) Assembly constituency a pat term a kizawm ah MLA ding ah teltin ah um Ginsuanhau Zou @ GS Haupu kipakpina leh Malzawl dawtpiakna hun Muolbem Village, Churachandpur ah tuni 10th June 2017 zingkal lam dak 11:00 ah um ding a hi. Zia hun matna chu Tracy Hrilthangmawi in mapui ding a hia,First session hun ah Singngat(ST) Assembly constituency MLA leh  Manipur Renewable Energy Development Agency (MANIREDA) Chairman Ginsuanhau Zou @ GS Haupu in Sarva Shiksha Abhiyan (SSA) nuai ah Muolbem Upper Primary School hawnna nei ding a hi. Second session ah kipakpina leh malzawl dawt piakna hun um ding a hia, zia hun chu Khaipao Haokip, Chairman ADC/CCpur leh Singngat bial ah khaw-hausa chuam chuam te'n uap ding a hiu.

CDSA Election 2017 ding ah Scrutiny bawl
Lamka, June 9 (Nisin Thuhiltu ): Churachandpur District Sport Association (CDSA), Office Bearer Election 2017 umna ding tawh kisai in tuni’n nomination paper filed, candidate te ding in Scrutiny a um a, zia hun a chun President ding ah nomination paper filed Lalvullien Joute leh G. Thiauthianmung te Scrutiny hun in a chia theng ua, Vice President ding ah Kamzathang Haokip, T. K Lala, Gousut Hangsing, James Thangluai, Lamzamang Gangte, Ginsuanlal Zou leh Thangzasong te a chiatheng ui. Chun, Treasurer ding ah nomination paper filed Thangchinhau leh G. Lalkholun Kipgen te a chia theng a hidan Kae Haopu Gangte, Returning Officer in thusua a bawlna a chun a taklang hi. CDSA Office Bearer Election 2017 ahileh 16th June, 2017 le um ding a hia, voter 80 in President, Vice President leh treasurer ding telna vote khia ding a hiu. Chuleh,  10th June 2017 tiang ah candidate ki withdraw nuam te ki withdraw thei ding a hiu a, 10th June 2017, 10:00 am – 2:00 pm sung ah Counting Agent Form lak thei hiding leh thuchian kimzaw Returning Officer  @9862326965 ah kanthei ding a hi.

Pawl X eh XII ah lawting te kipakpina nei
Lamka, June 9 (Nisin Thuhiltu ): Joutung Tualkuan saina ah tuni’n Joutung hausa, Th Pauchinthang chenna inn, Simveng ah Joutung khawsuak te lak ah class X leh Class XII exam ah lawtinna chang thakte kipakpina hun mat in a um a, zia hun a chun Rev P Soilian in lawtingna chang student te a ding in malzawlna a dawt piak hi. Th. Pumzakham, Chairman, JTP, Thanlon MDC, Th Jamchinthang leh Professor Ginlianlal Buhril te’n naupang te tilkhona’n thugenna hun a mang ua, hun matzaw in a Th Pumzakham, Chairman, JTP in lawtinna chang student leh hun matna uap te annkuang a umpi hi.  Tuchung class X leh Class XII exam ah Joutung khawsuak Class X ah student 6 in first division, 5 in second division, 1 in compartment mu in student khat a fail hi. Class XII exam ah student 3 in first division, 2 in second division leh 4 in third division ah a zo u’i.
NT 10June2017e

HAC Chairman in IDCF hawnna nei di
Lamka, June 9 (Nisin Thuhiltu ): District health Mission, Churachandpur saina nuai ah a hung tung ding June 12, 2017 sunma dak 11 leh Kangvai Government School, Kangvai, Churachandpur Distrcit ah 'Intensified Diarrhoea Control Fortnight (IDCF 2017)' kiti um ding a hia, zia hun chu Henglep AC MLA leh Hill Areas Committee (HAC) Chairman, TT. Haokip in Chief Guest hina tawh uap ding a hia, Churachandpur DC, Shyam Lal Poonia, IAS in Guest of Honour ban ah Dr. Kimngaihching Simte, District Mission Director/CMO, Churachandpur in Functional President hina tawh uap ding a hiu. IDCF a hileh Diarrhoea ziak ah naupang thi beisakna ding ah panlakna a hi.

Anti-Malaria Month 2017 hawnna nei di
Lamka, June 9 (Nisin Thuhiltu ): A hungtung ding June 13, 2017 sunma dak 11 leh YPA Hall, Hiangtam Lamka ah Anti-Malaria Month 2017 cum Launching of Malaria Elimination Campaign hawnna um ding a hia, zia hun chu DC/CCPur, Shyam Lal Poonia, IAS in Chief Guest hina tawh uap ding a hia, Dr. Kimngaihching Simte, CMO/CCPur in Functional President ban ah Dr. Liankhawzam Guite, CMO/Pherzawl leh Dr. T.Nengkhanmang, Dy. Superintendent, CCPur District Hospital te’n Guests of honour hina tawh uap ding a hiu. Vaiguan a hileh ‘End malaria for Good’ ti thupi tawh mat hi ding a hia, Churachandpur leh Pherzawl District ah District Malaria Office staff te pang ding a hiu. District 2 te ah National Vector Borne Diseases Control Programme (NVBDCP) saina nuai a um ding zia hun matna chu 2020 tiang ah district sung ah malaria natna sukbei ding tupna’ sai hi ding in a kigen hi.

7-Day Basic Course in News Reporting um di
Lamka, June 9 (Nisin Thuhiltu ): State Institute of Journalism, DIPR saina nuai ah a hung tung ding June 12, 2017, zingkal lam dak 9:30 a pat Lamka Press Club, (MHJU) HQ Veng ah 7-Day Basic Course in News Reporting kiti kipan ding a hia, zia hun chu Meghachandra Kongbam, Director (IPR) in Chief Guest hina tawh uap in a hawnna nei ding a hi. Training hun sung a chun, news reporting tawh kisai ah kiziltilna um ding a hi.

One Day Awareness Programme
 Lamka, June 9 (Nisin Thuhiltu ): District Handloom and Textiles, Churachandpur saina in One Day Awareness Programme, tuni'n  Salem Veng Handloom Cluster leh New Lamka Area HL cluster in a um hi. Zia hun chu M. Ibohal Singh, Asst. Director (W) WCS, Imphal, Th. Ibemcha Devi, Project Manager, District Handloom and Textile, Miss Chiinnu leh Mr. Tualkhansong ten Chief Guest, Functional President leh Guest of Honours hina tawh a uap ua, puankhawng mite tawh holimkhawmna leh puankhawng mite ding ah benefit chuam chuam um te genkhawmna a nei ui.
NT 10June2017f

GSO Imphal Block puitu ding telna nei
Lamka, June 9 (Nisin Thuhiltu ): Gangte Students' Organisation (GSO), General Headquarters mapuina’n tuni 9th  June 2017 zingkal lam  dak 11:00 in New Lambulane, Imphal ah GSO Imphal Block puitu ding telna a um a um a, GSO Imphal Block President leh Vice President ding ah P. Lien Gangte leh Henkhopau Gangte  te teltin in a um ua,  General Secretary ding ah Ngam S Gangte teltin in a um hi. Chun, Kimruthy Gangte, Goulalzom Gangte, Margareth Gangte, Neifel Gangte, Haoginlun Neihsiel, Hawlneihmawi Gangte, Henlalsuon Gangte te chu  Secy. Finance; Inf. & Pub., Secy. Edn.,  Moral & Religion; Games and Sports; Asst. Games & Sports; Jt. Secy ding ah teldaw in a um ui. Chuleh, Member ding ah  Ginlun Gangte, Lienlalpaul Gangte leh Vahshi Mate te chu teltin in a um ua, GSO Imphal Block advisors ding ah Lalzo S Thangjom, Thangminlun Gangte leh Remthang Gangte guat in a um ui.

NSCN -K Chairman SS Khaplang mualliam 
Kohima, June 9 (Nisin Thuhiltu ) :  National Socialist Council of Nagaland - Khaplang (NSCN -K) Supreme Commander  Shangwang Shangyung Khaplang (78) chu tuni nitaklam dak 8:05 in Taga Hospital, Myanmar (Burma) ah damlona ziak in a mualliam hi. Hun sawtpi a pat diabetes ziak ah ki enkawl zing hin a kigen a, tunaicha a khah China ah a damlona tawh kisai ah ki enkawl ah chia, a pianna khua  Indo-Myanmar border tawh kinaih, Pangsau Pass village kiang a um - Waktham village zuan zing lai hin le a kigen hi. Thudang kit khat ah, ni tamlo cha a kha Yangon ah khualzin, Taga camp a tunkit nung ah mualliam hin a ki gen a,  Nagaland director general of police LL Doungel in a genna a chun, NSCN (K) general headquarter, Myanmar ah SS Khaplang mualliam hi ah hiatsakna mu hin a gen hi. A suunna leh a vuina programme ahileh 10 June 2017 ah Taga, Burma ah um ding  hin a kigen hi. NSCN (K) chairman SS Khaplang ahileh April 1940 ah, Hemi Naga tribe a pat Waktham village, Myanmar ah piang a hia, a pianpi suapi te lak ah a neupen a hi. Tunai ah ki form thak United Liberation Front of Western South East Asia (UNLFW) mapuitu le a hia, Inn pani - China Yunan province leh Myanmar ah Inn khat gel nei hi ah hiat le a hi. Chapa pathum leh chanu khat nei le a hi. Shangwang Shangyung Khaplang (78) ahileh, kum 1964 ah Naga Defence Force a la phutdawk, kum 4 zaw ah Eastern Naga Revolutionary Council (ENRC), vice-chairman leh chairman panmun a la lua, kum 1946 ah kiphutdawk - Angami Zapu Phizo mapui Naga National Council (NNC) tawh semkhawm, NNC senior leaders Isak Chisi Swu leh Thuinaleng Muivah tawh kithua January 31, 1980 ah National Socialist Council of Nagaland (NSCN) a la phutdawktu a hi. Himaleh NNC in Indian government tawh Shillong Accord suai a kai dawilo ziak banah Nagaland’s northernmost Mon district ah Konyaks Nam te leh Manipur’s Ukhrul district ahTangkhul Nagas Nam te tawh ki khenchuamna a um ziak ah Nationalist Socialist Council of Nagaland (NSCN) a pat kum 8 zaw ah pawtdawk a hi.  Zia nung a chu, Khaplang in India Government tawh  kum1999  in ceasefire agreement suai a la kai a, himaleh ceasefire agreement suai kikai in umzia nei ah a hiatlo ziak in March 27, 2015 a khah kum 14 sung ceasefire agreement a chiapi chawlsan in Praesh Baruah mapui United Liberation Front of Assam (Independent), Nationalist Socialist Council of Nagaland (Khaplang), Kamatapur Liberation Organization (KLO), National Democratic Front of Boroland (Songbijit) te banah Meitei  UG group 4 tawh kithua in United National Liberation Front of Western South East Asia (UNLFW) a phutdawk a, UNLFW Chairman panmun lua le a hi. “Between David & Goliath, Frans Welman” kiti lekhabu a la zikna a chun, NSCN vice-chairman panmun a lua hun ah insurgent group dang a pat commander (Kachin) in sum leh pai thu demkai a hidan genpi kawm ah a tilsiat ziak ah April 1988 a khah Khaplang in NSCN headquarter bulu,  mi 60 lam a la that hin a kigen hi. NSCN-K in a tup chu  India leh Myanmar gam ah Naga dominated areas gawpkhawm  ding leh ‘greater Nagaland’ sua ding ti a hi. Khaplang hi "President" of the 'Government of the People's Republic of Nagalim" ti title le piak in a um a,  South Asia Terrorism Portal in a taklat dungzui ah kum 1992- 2000  sung ah NSCN-K khutnuai ah civilian 62 leh security personnel  26  in thina  tuak un a taklang hi. Chuleh, kum 1992- 2000  sung ah ama sepai 245 in le thina tuak un a taklang a, a chiata kum 20 sung ah northeast India ah thingnuaimi leader pawimaw tak hiat hi’n a gen hi.
NT 10June2017h

Plastic Industries work-shed 2 mei in kang 
Imphal, June 9 (Nisin Thuhiltu ): Imphal West, industrial complex sung ah industry units 2 - Loktak Industries leh Manipur Plastic Industries work-sheds tuni’n mei in a kang a, Takyel Industrial Estate a katmat masang in  Imphal fire service station a pat meiphel mite’n meikuang a phelmit ui.  Police te’n zia meikang kipatna chu khualna a nei ua, himaleh zia thu zik a hi tiang ah banggual ah meikang kipan a hi em ti hiatchian in a um naipua, thil bangzat man kangtum a hi em ti le hiatchian a hipuai. Manipur commerce and industries minister Thongam Biswajit Singh in nitaklam ah meikatna mun etthakna nei in thil umdan khualna a nei a,  state fire service thuneitu te chu report kimtak pelut ding in hiatsakna a bawl hi.  

Minister V.Hangkhanlian in Yening Animal Foundation hawng 
Imphal, June 9 (Nisin Thuhiltu ): Sangeet Kala Sangam, Khurai Lamlong ah tuni’n Yening Animal Foundation hawn in a um a,  zia hun chu  Agriculture, Veterinary and Animal Husbandry Minister V.Hangkhanlian in khualna hina tawh uap in Yening Animal Foundation hawnna a nei hi. Managing Director (Yening Animal Foundation), Film maker, Author,Writer Sapna Laishram, Parliamentary Secretary (Home) L.Sushildro (Yaima), Director Veterinary and Animal Husbandry Haobijam Chaoba te’n le zia hun matna chu a uap ui.  Minister V.Hangkhanlian in a thugenna a chun,  state sung ah cruelty to animals Act, 1960 chiapi ah um a hitakdan a gen a, gancha te hepi ding leh kituptak ah etkawl ding pawimaw a hidan a gen hi. Chuleh, Government in a pawimaw dung zui ah gancha vak te kithuapina peding hin a gen hi
NT 10June2017i

Thiluang kimu
Imphal, June 9 (Nisin Thuhiltu ): Imphal East, Lamlai police station huapsung Chingnungkok, Awang Ching, Tourist Spots ah tuni’n kum 27/ 28  mi khat a thisa mudaw in a um a, police team khat in thi luang chu la’n Jawaharlal Nehru Institute of Medical Sciences (JNIMS) morgue a tut ua, himaleh zia thu zik a hi tiang ah kua a hi hiatchian a hinai puai.