Nisin Thuhiltu - 09 June 2017

User Rating: 0 / 5

Star InactiveStar InactiveStar InactiveStar InactiveStar Inactive
 

ATWU in pauchapna sunzawm
Lamka, June 8  (Nisin Thuhiltu): All Tribal Women Union (ATWU), Churachandpur in pauchapna tawh Tribal Movement chiapi chu tuni’n Jehovah Jire Home, Beulahlane ah sutzawp in a um a, zia hun a chun gennawp nei chuam chuam in thugenna a nei ban ua lengkhawpna leh pauchap khawmna a nei u’i. ATWU a chiata February 8, 2016 a pat District Morgue gei ah pauchap khawmna a hia, Salpha te luang vui ding a kigen tawh kitawn in May 17, 2017 a khan District Morgue mun a pat kichawn in Jehovah Jire Home, Beulahlane ah hun matna a sunzawm hi.

CMO/CCpur in mipi te hiatsak
Lamka, June 8  (Nisin Thuhiltu): Dr. Kimngaihching Simte, Chief Medical Officer (CMO), Churachandpur in tuni’n ama office chamber ah thuthak lakhawm te kokhawm in mipi te kiang ah damtheina tawh kisai ah hiatsakna a bawl a, tulai nisat/khawlum ziak ah nisa kham (sun stroke) um thei a hi na ah nisa kiha khawsak lo ding ban ah naupang school kai te’n le tuithiang kipuak ah a tam thei lam dawn hawi hi’n a gen hi. Khawlum ziak ah sungkhaw um thei a hina ah kivengna ding ah thiangtho lam ngaikhawk ding leh thil nek masang ah khut silthiang masat ding a hi ban ah nau nawichep nei te’n le naunawi piak ding phatleh khut sil ding hi’n le a gen a, tho in a bawk ta phawt nelo ding in le a hiatsak hi. Sungkhaw a um leh kintak ah ORS dawnsak pawimaw hi’n le a gen a, santen a hileh damdawi dang piak ding ti’n le a gen hi. CMO in a gen be na a chun, guazuk tawh kituak ah tui kivei te a pat natna chuam chuam - Malaria, Dengue leh Ja patese Encephalitis (JE) ei kâi thei ding thokang piang thei a hi dan a taklang a, malaria chu hiatdaw a hi zaw ah damdawi a pat damthei himaleh Dengue leh JE ti te chu damdawi nek a le mawk damlo a hina ah kivenna ding ah innkiang sukthiang zing ding hi’n le a gen hi. Thokang a pat kivengna ding a thokanglo (mosquito repellant) mat ding ti te a gen a, khuasik, luchangna ti te tuak khak hun hun ah a kintheilam ah hospital zawt ding a hi dan gen kawm in natthawk awlna te chu dengue leh JE natna tawk kituaklo hi’n le a gen hi.
NT 09June2017

Unemployment ziak ah buaina sukven a hi masang sia state sung ah buaina chuam chuam te sukven hitheilo di: Minister Thongam Biswajit Singh
Imphal, June 8  (Nisin Thuhiltu): Commerce & Industries Minister Thongam Biswajit Singh in tuni’n Nambol Maibamlotpa Ching Leimaram Lamkhai ah kisathak Arcus Modern Handloom and Handicraft Enterprises, work-shed hawnna a nei hi. Minister Biswajit in a thugenna a chun, state sung ah entrepreneur te a pat sepna kibelap thei a hidan gen in, State government in kum sin le khangthak 1.5 lakh te amau leh amau a kitodel theina ding uh lampi siam piak ding target ah nei a hidan a gen a, unemployment ziak ah buaina sukven a hi masang sia state sung ah buaina chuam chuam umte sukven hitheilo ding hin a gen hi. Government sepna (jobs) ah ki-nga mai lo ding leh mani kitodel theina ding lampi ngaikhawk chiat ding in le mipi te chialna a bawl a, Manipur  ah Nupilan movement a pat numei te panlakna thupi mama leh handloom lam ah a panlaknau le thupi mama hin a gen hi. Agriculture, handloom leh handicraft ti te chu mi tamtak te ding ah income muna  a hidan taklang kawm in, a kisaipi department official te chu khenchuam neilo ah panla chiat ding leh beneficiary te kituptak ah loans leh subsidies a mu ding teu kituptak ah peding in hiatsakna a bawl a, ki khenchuamna  kiti chu khangthak entrepreneur te leh khutthiam thil bawl te sukthatdana mai hin a gen hi.  Tu ah state government thak vision, hill-valley mi te kal ah gap um sukbei ding leh gawp khawm ding ti a hidan  a gen a, hill area ah khantona kituptak a umlo ziak ah community chuam chuam kal kisiatna tung sek hin a gen hi. Commerce &Industries Minister in a gen belapna a chun, tunung sawtlo ah beneficiary te tha leh hun sukbei a tawm theina ding ah solar power looms hawp (distribute) hiding in a gen a, zia a pat chu product kibelap chuam thei ding hin a gen hi.  Jiribam leh Moreh ah cotton plantation bawlna ding ah soil testing chiapi ah um a hidan le a gen a, numei puan-khawng te ding ah Commerce and Industries department in a vaima theilam ah a inn kawt chiat ua raw material delivery umsak ding hin a gen hi. Ama nuai ah department te monthly review meeting neipi zing a hidan taklatna nei in, zia meeting hun tak chuleh official leh staff te’n a haksatnau leh a pawimaw teu tut thei zing ding uh a hidan a gen hi. Zia hun matna chu Oinam MLA leh Chairman, Pollution Control Board & Khadi leh Village Industries Board, Manipur,  Laishram Radhakishore Singh,Moirang MLA P. Sarachandra Singh, Directorate of Handloom & Handicrafts, Weavers official te’n le a uap ui.
NT 09June2017c

Principal Secretary, R&DM  in Kalikhola area dinmun entha   
Kangpokpi, June 8 (Nisin Thuhiltu) : Tadubi  AC huapsung Kangpokpi District ah Kalikhola area lei khikek a nasat mama nachung ah Kalikhola khawmi te puidaw ah a um nung un tuni’n  Principal Secretary, Relief and Disaster Management, Government of Manipur in Chief Conservator of Forest and IFCD official te tawh a mun tak ah thil umdan ethakna a nei ua,  Principal Secretary, R & DM chu District Administration Kangpokpi team - Deputy Commissioner, T. Ranjit Singh, IAS, SDC (HQ) Kaigoulal Kipgen, DFO Kangpokpi Vinod Kumar te’n le a zui ui.  Relief and Disaster Management teams in temporary Relief Camp - Goma Devi High School, Toribari ah um Kalikhola khawmi te le kimupi in thil umdan holimna a neipi ui. Principal Secretary, R&DM, M.H. Khan in Kalikhola area ah thiltung chu khawk a sakthu a gen a,  lei khikek in lampi, lei (bridge) leh PMGSYnuai ah kisaim retaining walls te susia vek a hidan a gen hi.  District Administration Kangpokpi leh 38 Assam Rifles, Kangpokpi Post in mipi haksatna tuak te kithuapina pan a lak uh chu kipakpi mama in le a gen a, lei khikek in a suksiat te chu dinmun chu Deputy Commissioner in June 12 tiang ah a piaklut ding leh Government of India kiang tut ah um ding hin a gen hi.  Chuleh, Deputy Commissioner zosia kiang ah District te chu a pawimaw dungzui ah a mat ding ua Rs. 20 lakhs  chiat tuni piak ah um a hidan uh gen in, DC Kangpokpi in le ni 2/ 3 zaw ah mu ding hin a gen a, haksatna tuak te a pawimaw dungzui ah kithuapi hiding un a gen hi. National Disaster Management Authority, Geological Survey of India in le thil umdan etthakna nei ding uh hin a gen hi.

DC/CCPUR VISITING HOUR
Lamka, June 8  (Nisin Thuhiltu): A Krishchandra Singh, Assistant Private Secretary to DC/ Churachandpur in thusua a bawlna a chun,  Deputy Commissioner Churachandpur kimupi nuam te ding ah Visiting Hour zingkallam dak 11:00 a pat nitak 1:00 sung bithiat ah um hin a gen a, Nilaini leh Kiginni a hileh visiting day hilo a hidan a taklang hi. Himaleh emergency thil ahiloleh official thil ah Deputy Commissioner kimupi nuam te’n Assistant Private Secretary to DC/ Churachandpur kiang ah phalna a lak masat sek ding uh pawimaw in le a taklang hi.

Khuga Bn sai Free Coaching chia tha zing
Lamka, June 8  (Nisin Thuhiltu): District sung ah khangthak sepna hawl te panpina ding ah Khuga Battalion in Free Coaching a sai chu khangthak tamtak in phatchuampi mama hi’n a kigen hi. Coaching a chun Mathematics, Reasoning leh General Knowledge a hil ua, Khuga Battalion in sun-an a piak ban ah sepna chuam chuam hawlte a ding in le a thawn ah Online Application a bawl piak hi.  Khuga Battalion in tuhin Territorial Army kilakna ding enkawm ah Free Coaching a sai pet a hia, Territorial Army le nidang banglo ah Regular Army tawh kibang ta a hi ban ah thalaw, promotion leh facility chuam chuam tamtak umta hi’n officer khat in a gen hi.  Mun gamla a pat kipante tawh kisai ah a Camp ua sepaite tawh kibang a nek leh dawn ban ah giakna bep hilo in free physical training le pethei ding uh hi’n le a gen hi.  Coaching Centre a hileh 2015 kum a Colonel Anil Kumar, Commanding Officer, Khuga Battalion a hi hun ah Counseling Centre dan a patdaw a hia, himaleh a huaplian zaw ding ti’n Coaching Centre a then a hi.

Mewar University tawh kisai lamhina nei
Lamka, June 8  (Nisin Thuhiltu): All Tribal Students’ Union, Manipur (ATSUM) malatna’n tuni sunnung dak 2:30 in Rengkai Road ah Rajasthan a um, Mewar University a Tribal Student te a ding ah hamphatna chuam chuam umte lamhilna a um a, zia hun chu Joseph R. Hmar, Tribunal Secretary, ATSUM in Event Coordinator hina tawh a mapui hi. Mewar University a pat Aza, Coordinator, North East India in University tawh kisai a genna a chun, Mewar namsung ah mi hunkhawp te kithua ah a bawldaw uh hi ah taklang kawm in University a sem hina dawl ah thingtangmite phatchuampi thei um te gensêng lo ding hi’n a gen a, ATSUM through ah admission bawl te’n phatchuampi diak ding hi’n le a gen hi. Vareyo Shatsang, President, ATSUM in Mewar University chu University dang banglo in thingtangmite a ding ah facility tamtak um hi’n a gen a, University dang a Course um sia a um ban ah Course Fee le niam in khawpi pawlam a um a hina ah lekhasim lunglut te a ding ah mun kilemtak hi’n a gen hi. University a kai thingtangmite’n Scholarship dawng thei ding leh zia scholarship chu Course fee tawh kituak a le University in bawl piak thei ding hi’n le a gen a, Mess Fee le installment a piakthei ding a hi dan le a taklang hi. Zia hun a chun, khawpi sung ah student organization chuam chuam a pat lawi upate leh student hunkhawp a pang u’i.

Thanlon bial ah mallam hausa te’n PDDC zathuap
Lamka, June 8  (Nisin Thuhiltu): Thanlon simlam ah khaw 30 ah hausa te kilawi khawmna, Northern Thanlon Chiefs Association (NTCA) in tuni thusua a bawlna’ chun, Pherzawl District bawldawna ding ah thusua kibawl zukkit lo ding ah Pherzawl District Development Committee in a phût chu support a hi dan puangkawm in a kintheilam ah Pherzawl District headquarters ah staff kiningting kawi ding in government kiang in a dawn hi. PDDC in Chief Minister kiang ah Pherzawl pha ding ah chialna a bawl chu le phasak thu puang kawm in Pherzawl District khantona ding ah CM in a bawl guat te a vaima thei pen ah a puandaw ding kinep thu le a gen hi.

TSA in Kochuam puitu kisawisak leh KLA chief kithana dem
Lamka, June 8  (Nisin Thuhiltu): Thadou Students' Association in tuni thusua a bawlna’ chun, a chiata June 6, 2017 zankhang ah Kuki Revolutionary Army/Kuki National Organisation (KRA/KNO) hi ding ah ginmaw pawl te’n Kaikam Kipgen S/o (L) Tonglal Kipgen a puimang leh a sawisak uh chu demna bawl kawm in zia gual ah kochuam puitu khat kisawisak chu da um thil a hi na ah khawnung ah bawl tak lo ding ti’n a gen hi. Kaikam Kipgen a hileh tu leh tu a hin Kangchup Phaijol Local Church, Kangpokpi district ah Church Secretary hi’n a gen hi. Zia lo chun, tuni zingkal lam dak 9:30 tuam ah Kangpokpi district huapsung Saikul Police Station nuai a um Thangkanphai Village ah Kuki Liberation Army / Kuki Liberation Organization (KLA/KLO) a Chief-in-Commander, Timothy Lhanghal kithana chule nasatak ah dem a hi dan a gen a, state sung, a diak ah thadou community sung ah thagum suana leh tualthana thiltung te chu luangkham um a sak thu le a puang a, armed group zosia kiang ah thagum sauna a pat kikawi kang ah khawtang ah chamna, zalenna leh khantona a um zawkna ding ah kihepituana leh kingaidamna del zaw ding in le a chial hi.

Food Safety Enforcement Wing drive chiapi zing 
Kangpkpi, June 8 (Nisin Thuhiltu):Food Safety Enforcement Wing, Imphal East in tuni’n Hapta Golapati area ah tobacco product leh mihing nek ding ah thiangtho lo nek thei kizuak te drive  bawlna a nei ua, zia hun a chun tobacco product leh mihing nek ding ah thiangtho lo van khenkhat Food Safety Enforcement Wing in lakpiak ding a guat uh nawplo ziak in van zuak te tawh Enforcement Wing te kal in kinawktuana a piang  a, himaleh police team te’n kinawktuana a sukveng ui. Food Safety Enforcement Wing in tobacco products -zarda, khaini leh Moreh a pat kipawlut nekthei chuam chuam tamtak te a matdaw bak un  sa (meat) zawkna le check bawlna a nei ua, Food Safety and Standards Authority of India (FSSAI) license neilo leh thiantho lo tak ah sa zuak  a um em ti etzuina a nei ui.

Numei chung ah zawntat ziak ah BJP MLA khat hai ding phutna nei
Imphal, June 8 (Nisin Thuhiltu): Manipur ah Chief Minister N. Biren Singh mapui BJP government tha 3 ting zo ham ham hipan maleh,  numei chung ah BJP MLA khat zawntat ziak ah kiphinna music ngaitha kit ding in a um hi. 11th Manipur Legislative Assembly election ah Sekmai Assembly Constituency a pat MLA ding ah teltin ah um, Parliamentary Secretary Heikham Dingo Singh in kum sawttak a kingaipi a nungaknu’n  ngawna a siam pawmlo maleh a bial sung ah mipi te’n Heikham Dingo Singh thiamlo chan in tuni’n kiphinna a nei ua, a kintheilam ah MLA hina a pat a haina a siam ding phutna a nei ui. Thangmeiband DM College Gate, Imphal West ah local mi a 100 ah sim te kipunkhawm in Sekmai MLA Heikham Dingo Singh in a nungaknu, election zaw leh kichenpi ding ah thutiam a bawl, a zi gual ah a la kawi himaleh MLA ding ah teltin a hi nung ah kihelna mai mai ah a mat gual ah a kilat chu nasatak ah demna bawl in, Thangmeiband United Club leh Thangmeiband Apunba Meira Paibi Lup  te’n a panmun a vaima theipen ah a nutsia ding pawimaw in a gen ui. Sabita Devi, Vice President, Khunthokhanbi Meira Paibi Lup in thuthak lakhawm mite kiang ah a genna a chun, MLA Dingo gamtatna dawi umlo a hidan gen in, numei te chu zawk (sale) leh sum ah mawk thepthak ding hilo un a gen a, MLA Dingo chung ah action lak a hi masang ah Chief Minister in a vaima theilam ah pan a lak ding pawimaw in a gen hi. Chief Minister leh a council of minister te’n MLA Dingo chung ah action a laklo ua leh June 10th  ah dakkal 12 sung bandh bawl ding a hidan uh le a gen hi.

Doctor kiningtin lo ziak ah Hospital emergency service subei
Imphal, June 8 (Nisin Thuhiltu): Sagolmang CHC & Hospital Authority in doctor kidailo ziak ah emergency service sukbei ding in lemsakna a nei hi. CHC Sagolmang Hospital gate ah notice a kitak dan in June 10, 2017 a pat  doctor kiningtinlo ziak ah CHC Sagolmang Hospital ah emergency service umtalo ding hin a kigen a, thuchian kimzaw hianuam te’n MO in charge thuhiat thei ding ti’n a kizik hi. Ziagual notice chu a um tawh kitawn in Sagolmang area mipi’n tuni’n hospital mai in kiphinna a nei ua, government thuneitu te chu doctor pawimaw zat hukdim ding in phutna a bawl ui.  A langkhatlam in state health department nuai ah total doctor post 1092 awng um in a kigen a, state health department nuai ah doctor 590 te’n nasem un le a kigen hi.

Kikhenchuamna nasatak ah dem ding a hi:  Minister Karam Shyam
Imphal, June 8 (Nisin Thuhiltu): Centenary Hall, Manipur University ah North East NSS Youth Festival, 2017 valedictory function hun ah tuni Karam Shyam, Minister CAF&PD and Revenue in a thugenna a chun, North East mite National Level Youth Festivals ah a pan tam ding uh pawimaw in a gen a, caste, gender, language, facial features leh religion ah kikhenchuamna kiti chu nasatak ah dem ding a hidan a gen hi.  National Service Scheme (NSS) Cell, Manipur University  saina North East NSS Youth Festival in gasua hawitak a nei ding a nawpthu le a gen hi. Zia hun matna chu Arunachal Pradesh, Meghalaya, Assam, Nagaland, Mizoram, Tripura leh  Manipur a pat volunteer 300 in a uap ui.