Nisin Thuhiltu– 19 May 2017

User Rating: 1 / 5

Star ActiveStar InactiveStar InactiveStar InactiveStar Inactive
 

DIKLO TAK AH GOVT QUARTER LUA TE CHUNG AH ACTION LA DING AH DC TE THU PIA
Imphal, May 18 (Nisin Thuhiltu): Manipur works minister Th Biswajit in tuni’n district 9 ah Deputy Commissioner te kiang ah thu pia in amau puakna district chiat ah dân diklo tak ah government quarter luate nawdaw na ding ah pan la ding in a gen hi. Minister in Old Secretariat conference hall ah tuni meeting a ko hun a chun, DC te kiang ah ni 7 sung ngei ah government quarter lua te chung chang verification bawl ding thu a piai. Meeting chu a hileh government quarter lua te leh a luaman uh chung chang genkhawmna ding ah sai a hia, zia hun a chun DC te kiang ah general pool quarters a cheng te chu etchetna bawl ding leh a lua lo ding dawl a lua kha um te chu nawdawk ding in thu a piai. Meeting hun a chun, quarter te puaphatna leh siam phatna chu Public Work Department in a sai ding leh PWD ma in district Head Quarter zosia ah a sawng um ding residential quarters a sak ding ti’n le a gen a, zia na ding a chun a kisaipi Deputy Commissioner te’n quarter sakna ding mun ngaitua piak ding hi’n le a gen hi. DC te kiang in amau mawpuakna sung ah developmental work chia tha zing te ensui ding in le Minister chun a gen hi. Zia meeting chu Commissioner (works) K Radhakumar, Public Works Department ah Chief Engineer, Ch Tiken, district 9 ah DC leh palai te’n a uap ua, District chuam chuam a pat DC leh representative te’n report piakna le a nei ui.

VPC LEILON BLOCK ELECTION
Leilon, May 18 (Nisin Thuhiltu): Vaiphei Peoples Council (VPC) Leilon Block in tuni’n vaipaw thak ding telna a nei a, zia hun a chun Chairman ding ah  Mr Lunneimang  Vaiphei teltin in a um a, Vice Chairman ding ah Chungmang Vaiphei teltin a um hi. Teltin ah um Chairman le Vice Chairman te chu  VPC GHQ President Mr Khatkhotong  Baite in kitiamna (oath) neisak in  Upa Liankhothang in Pathian kiang in pauchap piaka a nei hi.

ADCC CHAIRMAN IN ZILLAI SPORTS MEET HAWNNA NEI
Saipum, May 18 (Nisin Thuhiltu): Saipum Playground ah ni 3 sung um ding Zillai Churachandpur Block (ZCB), Annual Sports Meet 2017 chu tuni May 18, 2017 sunma dak 10:00 in a kipan hi. Inaugural function chu D. Khaipao Haokip, Chairman, ADC Churachandpur in Chief Guest hina tawh a uap a, P. Kamkholal, EM, ADC Churachandpur in Functional President hina tawh uap in, Pauchungnung Vaiphei, Associate Professor leh D. Khuala Vaiphei, Project Manager, NERCOMP te’n Guests of Honour hina tawh a uap ui.  Inaugural function chu Mr Zamnel, Secretary, Social & Culture ZCB in ama pui a, Mr HS Kaiminlun, President ZCB in in vaidawn thugenna a nei a, Mr Kamzamuang Vaiphei, Secretary, Games & Sports, ZCB in Sports Meet tawh kisai genlatna nei in khuallian te’n thugenna a nei ui. Chief Guest D. Khaipao Haokip in a thugenna a chun, ama chu 50% Vaiphei a hidan gen in, football pek ti chu nidang ah thil dawi umlo himaleh tuhun ah nekmuna leh innchen siamna thei a hitak dan gen in, Zillai kukal tak leh gunchu tak ah zilna leh Sports  lam ah panla ding in tilkhona a nei hi. Functional President P Kamkholal in a thugenna a chun, kukal tak leh tupna nei ah panlak ding pawimaw a hidan a gen hi. Guest of honour D Khuala Vaiphei in a thugenna a chun, zillai te discipline  nei tak leh zilna lam ngaikhawk ding in tilkhona a nei a, gin um tak leh kukal tak ah panlakna’n gasua hawitak nei ding a hidan a gen hi. Chun, Chief Guest, Guest of Honour leh Functional President te’n Football pekdawna, Volleyball betdawna leh air-gun kap in  Sports hawnna a nei ua, play masapen ding in Zillai Churachandpur Block leh Zillai Kangvai Block ah puitu te’n exhibition match a nei ui. Sports Meet hun sung ah kidemna chuam chuam - numei leh pawsal Football leh volleyball banah individual item chuam chuam Airgun Shoot, Target Kick ti te um ding a hia,  May 20, 2017 le zothiang ding a hiu. Sports Meet hawnna chu ZSF General HQtr President, K.Vanlallian; Churachandpur Consumers’ Club President, SN John; ZCB ex-President, Kaithianjoy; Zillai GHQtr ah Secretary, Info. & Pub. Khailalpiak Vaiphei, Zillai GHQtr ah Secretary, Games & Sports, Haubawi Vaiphei, unit chuam chuam 15 tuam a pat member te ban ah ngainatu tamtak in le a uap ui.

HAC CHAIRMAN IN SCHOOL HAWNG
Lamka, May 18 (Nisin Thuhiltu): Thangzalam Haokip, MLA, Henglep, Chairman Hill Area Committee (HAC) in tuni 18th May, 2017 zingkallam dak 11:30 in Chief Guest  hina tawh L. Phaijang khua ah South Point High School Building thak hawndawna a nei hi.  Zia hun matna a chun Functional President in Seilienmang Khongsai, EM, MDC, Khousabung a pang a, Guest of Honour in Mangkhogin Haokip, IPS, SP, Bishnupur a pang hi. Chief Guest Thangzalam Haokip in a thugenna a chun, a bial sung ah Private School building  kilawmtak hawng thei ah a um chu kipak mama hin a gen a, Thangtinlun Haokip, Chairman, SMDC leh Vanhmingthanga Sailo Principal te pakchat thu gen a hi. Seilienmang Khongsai, EM, MDC, Khousabung in School toilet siamna ding ah a pan theina chan ah panla ding hin a gen a, Mangkhogin Haokip, IPS, SP, Bishnupur in a thugenna a chun, ei uh thingtang mite’n zilna nasatak ah ingai khawk thak uh pawimaw a hidan gen in, I chenkhawmpiu nam dang te tawh kituak tak ah chenkhawm theina ding ah kiziltilna le pawimaw in a gen hi. South Point High School hi kum 2011 ah  kiphudawk a hia, tu ah School cha patg 338 nei, Teaching Staff 15 nei leh Non Teaching Staff 1 leh  SMDC 11 a um hi.

YPA ELECTION UM DI
Lamka, May 18 (Nisin Thuhiltu): Young Paite Association (YPA) General Headquarter mapuina nuai ah Kiginni, May 20, 2017 sunma dak 11:00 in YPA Lamka Block leh YPA Lanva Block te’n 2017-2020 sung vaipaw ding kitelna nei ding a hiu a, YPA Lamka Block in YPA GHQ Hall, Hiangtam Lamka leh YPA Lanva Block in YPA Lanva Block Office, G. Mualkawi ah kiteelna nei ding a hiu.  Zia ding a chun Lamka Block a pat Candidate 20 a um a,  Lanva Block a pat Candidate 22 a um hi.  Lamka Block Election ah Upa V. Vungzathang, Senior Advisor, YPA GHQ chu Presiding Officer  hiding a hia, Lanva Block Election ah Upa M. Ginzalian, Senior Advisor, YPA GHQ in Presiding Officer hina tu ding a hi.  Block vaipaw diing kiteelna a chu  Block sung ah Unit um zosia’n  Palai 10 (sawm) sawl chiat diing leh, Candidate zosia le vote nei ding a hiu.

OFFICE HAWNNA
Lamka, May 18 (Nisin Thuhiltu): Singngat MDC, Hausuanthang Zou, Executive Member, ADC Office ding hawnna leh a latna tuni, May 18, 2017 sunnung dak 1:00 in ADCC Office, Tuibuang in a um hi.  Zia hun a chun, V. Khaikhanmung, Vice Chairman, ADCC in Hausuanthang’ office ding hawnna a nei a, Bishop Hangminthang, MELC in hawn ah um office chu  Pathian’ kiang ah a latna nei in, Hausuanthang’ a ding in pauchap piakna a nei hi.

SBI-RSETI TRAINING CHIA THA ZING
Lamka, May 18 (Nisin Thuhiltu): State Bank of India-Rural Self Employed Training Institute (SBI-RSETI),Bijang ah khangthak kum 18 a pat kum 45 kikal mi 2016-2017 sung ah PMEGP loan muthei ding ah teldaw ah umte ding ah Short Term Course Entrepreneurship Development Program (EDP) training ni 10 sung um ding chu May 16, 2017 in a kipan hi.  EDP training hun sung  ah PMEGP loan  la zo mi 29 a pang ua, S. Mangboi Vaiphei, Faculty, SBI-RSETI in Entrepreneurship tawh kisai in ziltilna a nei hi.  PMEGP loan lading training ah pang te  ahileh Canara Bank a pat mi 15, Central Bank of India, Churachandpur Branh a pat mi 6, Central Bank of India, Singngat Branch a pat mi 2, State Bank of India, Loktak Hepa a pat mi 4 leh State Bank of India, Churachandpur Branch a pat mi 2 a hiu a, May 27 leh training zo thiang ding a hiu. Tuni ah EDP training a nei zaw un, Digital India a pat Lianzagou Hauzel, PO in E-Governance tawh kisai ah India khua leh tui te dikna/hina tawh kisai leh mimal dikna/hina bawsiat ah um te complaint bawl ding dan tawh kisai ziltilna a nei hi. SBI-RSETI, Bijang nuai ma ah June tha sung in mi 25 a ding ni 10 sung Aak vak dan - Poultry training leh mi 25 a ding ni 30 sung  Photography & Videography training um ding a hia, Aak vak dan poultry training ah pang nuam te ding in registration a kihawng zing hi.

RAWNG NU TRAINING ZAWTHIANG HITA
Lamka, May 18 (Nisin Thuhiltu): Guwahati pansan Asian Paints nuai a Mobile Color Academy leh Pricilla Home kithua in College Road, New Lamka a um Pricilla Home ah sepna neilo khangthakte kiang ah May 5, 2017 a pat rawng nu dingdan Basic Painter Course & On-site Training a nei uh tuni’n zawthiang in a um hi. Training hunsung in Mobile Color Academy, Guwahati a pat Biplab Hajrika, Training Assistant in trainee te kiang ah Innbâng, kawtkhak, Gate leh a dang dang ah rawng leh lim chuam chuam nu dingdan a hil a, zia hun sung ma a hin trainee te’n particle in Pricilla Home sung leh paw, kawtkhak ban ah gate rawng chi chuam chuam mang in a nu/chei ui. Innbaang, kawtkhak leh Gate a rawng leh van mat chuam chuam Mobile Color Academy ten a puakdaw uh a hia, rawng quality hawi pen mang in a thawn ah Pricilla home baang a nu piak ui. Pricilla Home ah Basic Painter course a nei sung in rawng nu ding dan chi chuam chuam, Site Preparation, Health & Safety, Behavior on Site, scaffolding, Undercoats & Top Coat Application leh Touchwood  application tawh kisai in training a nei ua, training hun ah a chun a lunglut numei 2 panna’n mi 20 a pang ua, lunch leh bangkim Mobile Color Academy, Guwahati ten a puakdaw vek uh a hi. Asian Paint Mobile Color Academy in National Skill Development Cooperation tawh ki partner a hia, academy in a tup a hileh khangthak sepna neilo te rawng nu na lam a thiamna nei te hawldaw a, India in a pawimaw zat rawng nuthiam bawl daw ah sepna guan ding ti dungzui ah Government of India leh National Skill Development Cooperation hiatpina tawh training a sai a hi dungzui in training a pang te kiang ah certificate piak hi ding a hiu a, NSDC nuai a register contractor te a hiuleh khawpi ah training sang zaw ah pang ding ah sawldaw hi ding a hiu.

BLOOD DONATION TAWH KISAI MEETING NEI
Lamka, May 18 (Nisin Thuhiltu): Meeting ahihleh Blood Bank & Transfusion Unit, District Hospital, Churachandpur a sisan poimoh kizangkhia ditkikna toh kisai a Voluntary Blood Donation tungtawn a ditkik percentage aniam mahmah ziak a neih aom hi a, Voluntary Blood Donation tungtawn a Blood Bank a sisan tamsem kaihkhawm ding tupna a Meeting neih aom hi’n kigen hi.  Manipur State sung a Government license nei Blood bank tuamtuam a April kha sung a sisan kaihkhawm, donation camp, voluntary donor, replacement zah ahihleh RIMS in april 2017 sung in sisan Unit 991 kaikhawm a, huailak ah donation camp a pat unit 5, voluntary donor a pat unit 230 kaikhawm ua, April khasung mah in family a pat collection leh replacement Unit 751 om hi. JNIMS in April 2017 sung in sisan Unit 583 kaikhawm a, huailak ah donation camp a pat unit 5, voluntary donor a pat unit 261 kaikhawm ua, April khasung mah in family a pat collection leh replacement Unit 322 om a, CCpur District Hospital in april 2017 sung in sisan Unit 108 kaikhawm a, huailak ah April kha sung in donation camp khat vei mah leng nei lou ua, voluntary donor a pat unit 1 kaikhawm ua, April khasung mah in family a pat collection leh replacement Unit 107 leh Thoubal District Hospital in april 2017 sung in sisan Unit 11 kaikhawm a, huailak ah donation camp a pat unit 1, voluntary donor a pat unit 11 kaikhawm ua, April khasung mah in family a pat collection leh replacement khat leng om a, Manipur State pumpi ah ahihleh april 2017 sung in sisan Unit 1693 kaikhawm ua, huailak ah donation camp a pat unit 11, voluntary donor a pat unit 503 kaikhawm in, April khasung mah in family a pat collection leh replacement Unit 1190  om ahihdan thusuah kimu in taklang hi.

BOMB PUAK DAWILO ZIAK AH TOTAL SHUTDOWN UM DI
Imphal, May 18 (Nisin Thuhiltu): A chiata Nilaini zan ah bomb a puak dawilo suklatna in Moreh pansan civil society organization (CSO) chuam chuam kigawm te’n zing, Simhaini leh total shutdown puang uh hi’n a kigen hi. Thingnuaimi te kam hi ding ah ginmaw te’n a kam uh, Improvised Explosive Device (IED) chu zani zan dak 7:10 tuam ah puak hi’n police thusuak in a gen hi. Zia na hin liamna tuak hiat hilo maleh minautang a ding in lauthawngna piang law ti’n Hill Tribal Council (HTC) in tuni’n a gen hi. Moreh pansan CSO) chuam chuam – HTC, KSO, MYC leh KWU&HR te’n Gamnom Veng community hall kiang ah bomb puakna chu nasatak in a dem a, zia thiltung dawilo suklatna ding in May 18 zankim a pat dakkal 24 sung Moreh sung leh Asian Highway No. 1 (Imphal-Moreh lampi) zul chu total shutdown um ding hi’n le a puang ui. Zia hun sung a hin medical, fire brigade, electricity leh guatlawksa religious event te ngaidam hi ding a hi ti’n HTC in a gen hi. Chun, government kiang ah zia gual thil chu a tung kit taklo na ding ah pan la ding in le dawtna a siam hi.