Nisin Thuhiltu– 18 May 2017

User Rating: 0 / 5

Star InactiveStar InactiveStar InactiveStar InactiveStar Inactive
 

RATIONING AGENTS APPOINTMENT KI SUKSAUBE  

Lamka, May 17 (Nisin Thuhiltu) : R.Sudhan, IAS, Deputy Commissioner, Churachandpur District NFSA nuai ah kum 2016- 2017 sung ah Rationing Agents leh S.K Oil Sub-Dealer te appointment chu April, 2017 tiang  ding himaleh kum 2017- 2018 ah FPS Agent ding guatna tawh kisai sukfel a hinailona chung ah  tha khat (i.e May 2017)  tiang ah a hun suksau a hidan a taklang hi.  Zia chu tawh kitawn ah kum 2016-2017 sung ah Rationing Agents & S.K Oil Sub-dealer te’n Rationing Agents & S.K Oil Sub-Dealers mawpuakna tuk zawm nalai ding un order a sua hi.   Chun, kum 2016-2017 sung ah Rationing Agents te’n NFSA nuai ah tha 1 quota a ding man chu a kintheilam ah a piaklut ding uh pawimaw a hidan taklang in, April, 2017 a ding Release Order (RO)  la ding in le hiatsakna a bawl hi.

CHAIRMAN ADCC IN SAFE DRINKING WATER TANK  THAK HAWNNA NEI
Lamka, May 17 (Nisin Thuhiltu): NERCORMP Churachabdpur in a Poject khua uh Tuibong block nuai ah K.Salbung khua K.Salbung NaRM_G te Safe Drinking Water ( small) dinga Rs. 50050 apiak nau ah, a mau NaRM_G ten Rs. 25000 leh a khua ECA kochuam in Rs. 21500 contribute a bol be ua, RCC water tank kilawm tak chu Pu D. Khaipao Haokip, Chairman ADC, Churachandpur in may16, 2017 zingkal  lam dak 7:30 in Chief Guest hina toh uap in hon dawna a nei  jaw in Local Pastor in katna a nei hi. Chief guest in  gen na chun, NERCORMP ten khua mi paisa tampi pi pe zolo ma leh, a sum kipia sanga hoizaw leh phazaw ah muthei ah a sepdaw uh hi thupi sa in Project Manager leh a team te kipakpi ma ma ahi dan a gen hi.D.Khuala Vaiphei, project Manager,NERCORMP Churachandpur in etton tak tak leh kilung gual taka a pankhawm jiak un kipakman in beneficiary inn 25 hap be piak ding ahi dan a gen hi. Chuleh khua enkawl tu , facilitate bawltu AWCA Chief Functionary Pi Grace Zamnu, member ADC, Ccpur leh a team Sutpu, Supervising Officer te chung in le a sep phat ziakun kipakpi ma ma ahi dan a gen hi. K.Salbung hausa Pu DT. Haokip in le  houlimna hun a mang hi.

ZCB ANNUAL SPORTS MEET -17 KIPAN DI
Saipum, May 18 (Nisin Thuhiltu): Zillai Churachandpur Block vai saina nuai ah tuni, May 18, 2017 leh Saipum ground ah Annual Sports Meet – 2017 kipan ta ding a hi. Ni 3 sung um ding zia Sports Meet kipatni a hin, D.Khaipao Haokip, Chairman, ADC/CCPur in Chief Guest hina tawh uap in a hawnna le kick-off nei ding a hia, P.Kamkholal Vaiphei, EM/ADCC in Functional President ban ah Pauchungnung Vaiphei, Associate Professor, Deptt. of Political Science leh D.Khuala Vaiphei, Project Manager, NERCOMP te’n Guests of Honour hina tawh uap chiat ding a hiu. Sports hun sung a hin pawsal football, pawsal leh numei volleyball um ding a hi ban ah individual item chuam chuam le um ding a hia, May 20 leh Soiminlian Lengen, MCS, CEO/ADCC in a khak ding a hi.

CAREER PLANNING TAWH KISAI WORKSHOP NEI DI
Torbung, May 17 (Nisin Thuhiltu): IGSS saina nuai in May 18, 2017 leh Torbung Community Hall, Torbung ah Career-cum-Business Development Planning tawh kisai ah workshop um ding a hia, zia hun a hin Kaplianlal Tangluai in khangthak te mâni kitodel theina ding ah lampi um te tawh kisai ah ziltilna pia ding a hia, business model tawh kisai a le khangthak te ziltil ding a hi. A hung tung ding May 19 ni leh khangthak 100 tuam tawh tunung ah mani kitodel theina ding lampi te genkhawmna leh Kangvai Sub-Division nuai ah Youth Club 6 kiang ah Computer set piakdawna um ding a hi. Zia hun a hin, Vicky Suantak, Editor, Nisin Thuhiltu in khangthak te tilkhona lam tawh kisai ah thupi pawimaw tak pansan ah holimna le nei ding a hi.

CARITAS TEAM LEH MALARIA DEPTT IN MEETING NEI
Lamka, May 17 (Nisin Thuhiltu): Caritas, India Regional Office, Guwahati a pat Official Team khat in tuni’n Lmaka pha in District Hospital CMO Chamber ah Malaria Department tawh Joint Meeting a nei ui. Caritas Staff te a hiuleh Churachandpur ah a Staff te uh nasepna entha ding ah hung a hiu a, CMO, Churachandpur kimupina nei in joint meeting le a nei ui. Churachandpur Chief Medical Officer, Dr. Kimngaihching malatna nuai ah nei a um zia meeting a chun malaria nat leng hun a hi tak tawh kitawn ah Malaria Department in zia natna a pat kiveng na ding ah kisaklawkna a nei te ban ah damdawi kining ting a nei nam ti te gen khawm a hi. Meeting hun chu Stephen, Director, Regional Office, Guwahati; Suanhau, DPO Churachandpur; Rameshor, Coordinator, Manipur; Akham, IEC Consultant Regional Office; Kanta, Regional Logistic Consultant (Supply & Chain Management); Gopeshor, MIS Officer ban ah Dr. Jamthianlal, DMO, Churachandpur; Dr. Liankhojam, CMO Pherzawl; Dr. Phirthanglien Buhril, CMP Pherzawl; Zenngaihlun, DPM, NHM leh S. Thangthianmuan, Consultant, NVBDCP te a pang ui.

ZMA UNIT THAK 4 PHUTDAWK
Lamka, May 17 (Nisin Thuhiltu): Zomi Mothers’ Association (ZMA), General Headquarter in zani’n Singaikot Sub-Division ah ZMA Unit thak 4 a phutdawk ui. Unit thak kihawnna mun te chu Joujang, Dumsau, Tuaitengphai leh Tuibul a hi. Zia lo chun, zani ma a khan, ZMA in naupang etkawlna ding ah Donation Box a kawina mun, Buallian leh Pearsonmun chu R. Sudhan, IAS, DC Churachandpur in a va entha, Donation Box kikawina Shed te bawlthakna ding ngaitua piak ding hi’n a la gen hi.

ADCC EX-CHAIRMAN DELHI AH KHUALZIN
Lamka, May 17 (Nisin Thuhiltu): Delhi ah zin ding, Churachandpur ADC ah Ex-Chairman, Langkhanpau Guite in tuni’n Lamka a nusia hi. Ama’n Delhi a um sung in hun chiasa ah Manipur District Council a ding ah budget a la kibawl chu bang tiang tung a hi em ti entha ding a hi ban ah ADC tawh kisai ma ah a pawimaw chuam chuam le ensui ding a hi.

WORLD NO TOBACCO DAY MAT HI DI
Lamka, May 17 (Nisin Thuhiltu): A hung tung ding May 31 chu World No Tobacco Day a hi tawh kitawn in Churachandpur District Health Society, Nation Health Mission, CCpur intekna nuai in MS Conference Hall, District Hospital ah sunma dak 11 a pat World No Tobacco Day matna um ding a hi. Zia ding tawh kisai ah CMO District Mission Director, CCpur malatna’ a hung tung ding May 22, 2017 sunma dak 11 leh Churachandpur District Hospital ah National Tobacco Control Program (NTCP) meeting um ding a hia, zia hun chu State Nodal Officer SNO, NTCP leh State Program Manager, SPM te’n le uap ding a hi ban un STCP leh NCD staff te le pang ding a hiu. Meeting hun ah National Tobacco Day mat ding dan, Tobacco Cessation Centres (TCCs) bawldaw ding dan tawh kisai ban ah thu chuam chuam genkhawmna um ding a hi. Chun, NTCP, CHurachandpur saina nuai ah a hung tung ding May 26, 2017 leh Rayburn College ah class XII te a ding in Painting Competition um ding a hia, zia na’ prize te chu May 31 ah World No Tobacco Day mat hun leh hawpdaw hi ding a hi.

ZYA 18TH FOUNDATION DAY
Imphal, May 17 (Nisin Thuhiltu): Zomi Youth Asociation (ZYA), Gangpimualkawi Unit in tuni’n Community Hall, Gamgpimuol ah 18th Foundation Day a mang a, zia hun chu T. Khaikhomang, MDC Lanva leh E. Henzagou Neihsial, Chief of Gangpimuol te’n Chief Guest leh Guest of Honor hihna tawh a uap gel ui. Hun matna a chun ZYA GHQ President, Lianzalal; ZYA Lamka Block President, Damliansiam leh ZYA Gangpimualkawi Unit Founder Secretary, Ginlian te’n thugenna a nei ui. Paulalzom, Secretary, ZYA Gangpimualkawi Unit in Report piakna nei in Organizing Board in kipakman chuam chuam piakdaw le a nei hi. Chief Guest Khaikhomang in Gangpimualkawi chu a channa Pearsonmun tawh kinai a hina ah a seiletna gual ah ngai leh MDC a hi ziak hilo ah khawpam ziak ah uap hizaw hi’n a gen hi. ADC nuai ah panmun lua neilo maleh ZRO Consultative Meeting nei hun ah Sixth Schedule chu nai mama ta in ADC a ding a le maban kinepna lian tak um hi’n a gen hi. MDC a hina ah hithei nei tamlo maleh Community Hall chung khuna ding piak di’n a tiam a, Gangpimualkawi a cheng nam chuam chuam te’n kituak tak ah a mat ding uh Office-cum-Store Room ngaitua piak ding hi’n le a gen hi. Hunmat sung a hin Local Artist chuam chuam ban ah Jems Arjun te’n lasakna a nei ui. Rationing Agents of 2016-17 te’n NFSA nuai ah tha 1 quota a ding man chu a kintheilam ah a piaklut ding uh a hi ban ah April, 2017 a ding Release Order (RO) a lak ding un le hiatsakna a bawl hi.

FARMER TE INCOME PUNBE THEINA DING AH PARTICIPATORY MEETING
Lamka, May 17 (Nisin Thuhiltu): Krishi  Vigyan Kendra, Churachandpur, Pearsonmun Village Lamka saina Participatory Meeting on Development Srategies for Double Farmer`s Income kiti a um a,  zia hun chu Minister Agriculture and Animal Husbandary  V.Hangkhanlian, Joint Director, ICAR Research Complex for NEH Region, Manipur Centre, Narendra Prakash, Senior Scientist  leh Head KVK, Churachandpur, Lamka, Dr. Niranjan Lal  te’n Chief Guest, President leh Member Secretary hina tawh a uap ui. Minister  V.Hangkhanlian  in district sung ah agriculture leh animals rearing system masawnna ding leh awareness um theina ding ah programme pawimaw tak a siam chu pakcha mama a hidan taklang kawm in Prime Minister Modi in  kum 2022 tiang ah farmer te income double sak ding ah tup leh dawi ah a nei te taklatna a nei hi. Tu ah thingtang gam ah shifting cultivation system  chiapi ah um chu san ding pawimaw leh khawsak dan dawpkang ding pawimaw in a gen hi.  Zia hun matna a  chun, Churachandpur district ah farmer 16 te kiang in Jalkund Polysheet, Ginger leh groundnut piakdawna le a nei hi. Senior Scientist leh Head, KVK, Churachqandpur Dr.Niranjan Lal in le hun matna a chun thugenna a nei a, DAO, Sericulture, DFO, NABARD, SBI Manager of Churachandpur, NYK, NECROMP, NGOte banah  village chief, Farmers clubs, Progressive Farmers  leh Krishi Vigyan Kendra, Churachandpur staff & experts te’n le a uap ui.

 

SPECIAL TIME WITH TRIBAL MARTYRS MATNA UM
Lamka, May 17 (Nisin Thuhiltu) : All Tribal Women Union (ATWU), General Headquarter leh All Tribal Movement of Lamka (ATML) kithua in tuni’n District Hospital Morgue ah Special Time with Tribal Martyrs kiti hun matna a nei ua, zia hun a chun Manngaihkim malatna in slogan sapna a um ban in ATWU President, Nianglian, Lianchinthang @ LC Thang leh Pauzarual te’n thugenna nei in Evan Thawnkhansuan malatna in mipi pauchap gualna a um hi. Hun matna a chun, a chiata May 10 ni ah Manipur government leh JACAATB in kinawptuana, MoU a la kaina ua Salphate a ding ah dikna bangma genkhak ah a umlo ban ah mithi te vui ding a hi tak ziak ah lungkimlo suklatna leh ki awngsutna ding in ATWU leh ATML in van matchak chuam chuam leh thânkuang lim kisiam te halna a nei ui. ATWU President, Nianglian in Salphate vui a hi nuang ua le Tribal Movement chu chia zing ding hi’n a gen a, morgue ah hun matna chu chawlsak hita maleh zing a pat Jehovah Jire Home, Beulahlane ah hun matna sutzawp hiding a hina a zia lam a chu chiakhawm ding in chialna le a bawl hi. Chun, ZRO Consultative Meeting ah chial a hi dungzui ah ama le va pang in ZRO President, Thanglianpau tawh kihona nei in, zia hun a chun government tawh kihona nei hun ah 6th Schedule sung ah provision chuam chuam gunglut dingdan ngaitua hi zing a hi dan gen piak hi’n le ATWU chief chun a gen hi. Special Time with Tribal Martyrs hun mat zaw in ATWU leh ATML in Joint Press Release a bawl ua, ziana chun ni 600 val kiphinna um sung ah panla leh movement zathuap chuamchuam te chung ah kipakthu a gen ban un panlak chuam chuam a nei teu taklatna le a nei ui. Salpha innkuan te thuakpi a hi dan uh le phaungdawk kawm in MoU chu thingtang mite buaina vengna ding hilo hi’n le a gen ui. Chun, MoU ah ah thuthung um te chu pawm thei hilo hi ah taklang kawm in 6th Schedule a um masia movement chiatha zing ding leh thingtang mite gam humbitna ding ah pan lak hi zing ding hi’n le thusua a bawl khawm uh chun a kigen hi.

 

CAF&PD MINISTER KARAM SHYAM IN FCI GODOWN 2 ENTHA
Imphal, May 17 (Nisin Thuhiltu): Consumer Affairs Food and Public Distribution  Minister  Karam Shyam in tuni’n FCI (Food Corporation of India) godown, Bishnupur district leh Sawombung, Imphal East etthakna a nei hi. Thuthak lakhawm mite kiang ah  Minister Karam Shyam in a genna a chun, State PWD (Public Works Department)  nasepna chung ah lung awi  mama hi’n a gen a, State Government in  FCI godown 15 siamdawbe ding tup a hidan taklang kawm in, tu ah 6 um chu 9 siambe hiding in a gen hi.

Sawombung ah FCI godown chu capacity 10,000 MT (metric tonne) capacity December 2017 tiang ah zawthian  hiding ag guanggal a hia,  a sakna ding ah Rs.16,54,98,645 (sixteen crore fifty four lakh ninety eight thousand six hundred forty five) biathiat a hi.  Bishnupur ah FCI godown a hileh 5000 MT(metric tonne) capacity a hi. Minister  Karam Shyam in a gen belapna a chun, hill district -  Chandel, Churachandpur leh Tamenglong ah nasepna chiatha zing te chung ah lungdam mama hin le a gen a, construction work chu Central Public Works Department (CPWD) khut ah piakdaw a hidan le a gen hi.

Tamenglong district  ah FCI godown chu Rs. 11, 89, 18,300 (Eleven Crore Eighty Nine Lakhs Eighteen Thousand and Three Hundred) ah kisa ding hin Minister in a gen a, Churachandpur leh Thoubal district ah FCI godown kisakna chung ah MDS (Manipur Development Society) lung tunglo a hidan gen in,  Churachandpur ah FCi godown chu Rs 6, 39, 73,600 (Six Crore Thirty Nine Lakh Seventy Three Thousand and Six Hundred) ah kisa hin a gen hi.

INFRASTRUCTURE  KITUPTAK UMSAK DING AH MINISTER IN THUTIAM BAWL
Imphal, May 17 (Nisin Thuhiltu): Minister for Social Welfare and Cooperation Nemcha Kipgen in tuni’n Takyelpat ah Government Ideal Blind School, Government Deaf & Mute School, Government Legal Aid Clinic/ School & Observation & Special Home for Juvenile te genlawkna umlo in surprise inspection bawlna a nei a, zia hun a chun,  up-to-date infrastructure umsak hiding in thutiam a bawl hi. Nemcha Kipgen in thil tamtak mumallo tak ah um a hidan te a gen a, surprise inspection te chu a pawimaw dungzui ah written proposal pelut ding leh institution hawina ding ah panla ding hin a gen hi. A langkhatlam ah Nemcha Kipgen in ama mimal tak ah institute etthakna a nei chu kipak mama a hidan uh head of department  te’n a gen ui.