Nisin Thuhiltu– 17 May 2017

User Rating: 0 / 5

Star InactiveStar InactiveStar InactiveStar InactiveStar Inactive
 

CM IN SHIRUI FESTIVAL, 2017 HAWNG; SHIRUI LILY UMNA TUAM LEH URKHUL DISTRICT   PUAPHATNA DING AH RS 5 CRORE PUANG

Imphal, May 16, 2017 (Nisin Thuhiltu):  Manipur Chief Minister N. Biren Singh in tuni’n Vangayan ground, Shirui village, Urkhul district ah  ni 5 sung um ding  Shirui Festival, 2017 hawnna a nei a, cultural items leh modern art banah music te nasatak ah tuni’n suklat in a um hi. Zia Shirui Festival, 2017 hawnna hun chu Chief Minister N. Biren Singh in chief guest hina tawh a uap a, Forest and Environment Minister  Th Shyamkumar in functiona president hina tawh a uap hi. N. Biren in a thugenna a chun, Tangkhul te chu nidang ah head hunter ti ah kigen himaleh tuhun ah soul hunter hita a hidan uh a gen a, Manipur government thak nuai ah caste, religion, minei zo leh migenthei te kal ah kikhenchuamna umlo a hidan a gen hi. Shirui khawmi te Shirui Lily venbitna nasep neitheina ding ah gam tuakdawk (donate) bawl ding ah kimansa um a hidan uh a hiat chu kipak mama leh a kua kua’n khautak ah thupukna kisiam khenkhat um te a hiatthiam ua a pak chat ding uh pawimaw in a gen a, Urkhul district  ah guest house  sakna ding, lampi keklianna ding, mipi kikhawp khawmna ding inn leh café etc sakna ding ah State Budget ah Rs 5 crore bithiat ah um a hidan puandawna nei in domestic leh foreign tourist te’n Shirui Village puaphat hiding in a gen hi. Infrastructures siamhawina ding ah NEC a pat Rs 15 crore dawt hiding in a gen a, Kangkhui cave le estimated cost Rs 4-5 crore seng ah puaphat hiding a hidan a taklang hi.  Chief Minister in Shirui Festival chu kumsin leh May 16 ah mat hizinta ding in le a puang a, state sung ningtin ah khantona ding ah nasep chu Government tup leh dawi a hidan a gen hi. Mipi leh Government kal ah relation hawitak a um zing ding, mipi te duthusam leh lungtup mualsua theina ding ah panlak ding chu government thiltup a hidan le a taklang a, Narendra Modi-led Central Government in state sung ah development a um theina ding ah kithuapina pezing a hidan gen in, tu ah golden chance umsun te chu thasuaklo ding pawimaw in a gen hi. Chief Minister in a gen belapna a chun, Govt a thutiam te a vaima theipen ah taksua a hitheina ding ah panla ding hin le a gen a, a thugen zaw in, Philasan Shangh Shimray in a zik   ‘Brief Introduction to Shirui Kashong: Abode of Shirui Lily’ kiti lekhabu  hawnna nei in, Shirui Lily Grand Prix competition flagged off bawlna a nei hi.  Forest and Environment Minister Th Shyamkumar in a thugenna a chun,  masang gual ah Ukhrul district hingzinzen ah a um taklo chu ngaikhawk mama hin a gen a,  thing leh gua kepbit a hitheina ding leh hing zinzen ah Urkhul district a um kit theina ding ah theitawpsua panla ding hin a gen hi. Tuni hun matna chu Public Health Engineering Minister  Losii Dikho, Parliamentary Secretary (Tourism) Dr. Sapam Ranjan, Parliamentary Secretary (MAHUD) N. Indrajit, Parliamentary Secretary (IFC), L. Rameshwor Meetei, Parliamentary Secretary (Home), L. Sushindro, Parliamentary Secretary (Transport, Planning), Khasim Vashum, Parliamentary Secretary (Agriculture, Works), Awangbow Newmai, Parliamentary Secretary (PHE, Horticulture), K. Leishiyo and MLAs, Y. Surchandra, S. Bira,  O. Lukhoi leh Ngamthang Haokip te’n guests of honour hina tawh a uap ua, Minister Counsellor of Royal Thai Embassy, New Delhi, Tharadol Thongruang leh  NEC Secretary Ramnganing Muivah, top civil leh police official te banah Chief Minister N. Biren Singh zi N. Hiyainu te’n special guest hina tawh a uap ui.  Hiatthei khat chu ni 5 sung Shirui Festival, 2017  um sung ah -  State, modern music, rock  &  fashion shows etc Tangkhul Naga Long ground (Ukhrul), Pakshi ground (Ukhrul) leh Vangayan ground (Shirui village) ah um ding a hi.

 

DR. MC MARY KOM LEH IFCD MINISTER  IN  HMAR MARTYRS DAY MATNA UAP

Lamka, May 16 (Nisin Thuhiltu): Hmar Martyrs Trophy Organizing Board (HMARTOB) saina’ Saikot Playground ah, a 27-veina Hmar Martyrs Day leh a 14-veina State Level Hmar Martyrs Trophy chu tuni, May 16, 2017 sumna dak 11:00 in Closing Ceremony leh Final Match kihelna a um hi. Zia hun chu Dr. MC Mary Kom, Five Times World Boxing Champion leh MP, Rajya Sabha, Government of India in Chief Guest hina tawh a uap a, Letpao Haokip, Minister, IFCD & YAS, Government of Manipur in Guest of Honour hhna tawh uap in, Dr. Chaltonlien Amo, MLA Tipaimukh Assembly Constituency in Functional President hina tawh a uap bak in, Dr L Fimate, Former, Director RIMS in Chief Host hina tawh a uap in,  CCpur district sung ah tribe chuam chuam ah leader t leh mi pawimaw chuam chuam in a uap ui.  Sunma dak 11:00 in closing program a kipan a, Rev Lalhmingthang, PS EFCI Saikawt Oresbytery in hun patna nei in, Chief Host Dr L Fimate, Former Director, RIMS in welcome address bawl in,  Lalvullien Hmar, chairman, HMARTOB in Hmar Martyrs day leh state level hmar martyrs trophy tawh kisai taklatna a nei zaw in, Hmar Returnee Association in Hmar Martyrs te suunna hun amapui ui.  NCC Rayburn College mapuina nuai ah khuallian leh HMARTOB ah puitu te’n Hmar Martyrs te zana leh suunna ah pakcha piakna hun a nei ua, Tribe chuam chuam - Kom, Meitei, Thadou Kuki Student Union leh Hmar ten namlam suklatna a nei ui.  HMARTOB in gun salute hun amapui ua, Alan Famhoite Secretary, HMARTOB in resentation hun mang in, khuallian te a pat thugenna a um a, Rev Lalramlawm Inbuon, PS Tuithaphai Presbytery ICI in hun masa khak in, kihelna pat in a um hi.  Hun mat sung in Hmar namsunga pat laa thiam chuam chuam - Blessed Choir, Lalsanglien Zote, Lalengvari Sinate, , Lorinda Varte, JohnL Varte leh Rotinkhawl Hrangchal ten Hmar Martyrs leh gam-ngai laa a kal lak in sakna a nei ui. Functional President Dr Chaltonlien AMO MLA Tipaimukh, A/C in a thugenna a chun, gam leh nam a ding ah thingnuaimi, gamnuai bel a, hinna pia Hmar Martyr te pakchatthu puang in, zana sangtak pia a hidan a taklang a, tuni a dam nalai ten gam leh nam a ding ah hinna pia Martyers te sulnung zuina ah pan nasatak lak ding pawimaw a hidan gen in, Chief Guest MDR MC Mary Kom in Pathian a pat talent hawitak ah a matthei gual ah ei ten le Pathian in talent a hung piak pilna, thiamna te a pha chuam theipen ah mat ding, innkuan vak na banah gam leh nam a ding ah theina zosia mang chiat ding in a chiakhawm mipi te a chial hi. Guest of honour Letpao Haokip in a thugenna a chun, Hmar Martyrs Day kiti chu khawvel pumpi Hmar nam te umna mun zosia, gam leh nam a ding ah hinna pete zana piakna kibang a hidan te taklatna nei in, Martyrs te zana sangpen pia a hidan a gen hi. Manipur state ah tuchung  BJP mapuina government dindaw ah um leh government thak nuai ah nasepna chiahawi zel ah, ni 600 val ah upa Bill thumziak a kiphinna banah salpha te chung chang ah kilemna suai kai ah um a hidan a gen a,  Manipur district te lak ah Churachandpur district chu nam chuam chuam - Zomi, Kuki, Hmar, Mizo leh a dangdang te chenkhawmna district a hi dungzui ah nam chuam chuam te kituak tak leh  kipumkhat tak ah chenkhawm ding pawimaw a hidan gen in,  district sung ah khantona leh masawnnaa um theina ding ah district mipi’n panlakna a nei ding pawimaw in a gen hi. Letpao Haokip in agen zelna a chun, Sport lam ah khantona a um theina ding ah Manipur state pumpi block leh sub-divison tin ah playgourd kawi suak ding ah panlakna chiatha zing hin a gen a, Government dindaw nung ni 100 a tin tak leh, BJP top leader Prime Minister Narendra Modi in Manipur hungpha ding leh Sport University hawnna nei ding hin a gen hi.  Chief Guest Dr MC Mary Kom in Hmar nam sung humbitna ding ah hinna pia, Martrys te zana sangtak pia a hidan a gen a, HMARTOB in kum 3 sung bang chialna bawl maleh tuni a khatveina ding ah Hmar Martyrs Day uap thei ah um pan a hidan a gen hi.  Sport tawh kisai a genna a chun, sport lam lunglut mite a ding ah HMARTOB in zia gual tournament a sai uh chu hawi mama in a gen a,  Manipur ah cheng  Hmar nam panna Thingtangmi te ki taitetna chi chuam chuam ah kitawm mama nalai in a gen hi. Football bep hilo, sport dangdang le chiapi ding pawimaw in a gen a, kitaitetna chi chuam chuam te lak ama thiamna pen Boxing lam ah khangthak te  dawpkang theina ding ah Boxing Academy hawng a hidan te genlang in, tuni a dinmun tiang a tunna ding ah nu leh pa ten Boxing lam ah lunglutpi nailo maleu, tup gukna lian tak nei pum ah, kipiakzawna tawh panlakna a nei ziak ah tu ah a dinmun tiang tung thei hin a gen hi. Ziagualma a chu sports chuam chuam ah lunglutna nei te’n tupgukna leh kukalna tawh panlakna a nei ding uh dawi a hidan a gen hi.  Closing program mat zaw ah kihelna  patna ding in Player te field sung ah lut in, Khuallian te’n a kihel ding player te inspection a bawl ua, Chief Guest DR MC Mary Kom in final match kihel patna ding in kick-off bawl in final match pat in a um hi.  Final match ah Sielmant Youth Club SYC leh FAST Rengkai a kihel ua,  Sielmant Youth Club SYC in 2-0 ah gualzo in, a 14-veina State Level Hmar Martyrs Trophy Champion hina a chang ui. Chun, kipakman in Trophy leh Rs. 1 Lakh a sang ua, Runner Up FAST in Trophy leh Rs. 50,00 a sang ui.

TRAFFIC POLICE TEAM IN LAMPI TAWH KINAI TALUA VAN ZUAK TE NAWZAK
Lamka, May 16 (Nisin Thuhiltu): Traffic Control Police (TCP) mapuina Police leh VDF Personnel te kithua in tuni, May 16, 2017 sunma dak 10:30 in Tedim Road-Red Cross Road Junction (Singngat Parking) area ah lampi tawh kinai talua thil zuak ten aw dawk in, lampi pam ah van zawkna um te a suthiang ui.   TCP in a vel vel ah lampi tawh kinai talua kuama’n van zuaktalo ding ah hiatsakna a bawl hitamaleh ngaina gual ah van zuak a um zing ziak ua, raid a bawl uh hin a kigen hi.  Zia hun a chun, Kelzu Hekna (Sugar Cane Extractor) 2 leh mezuakna dawkan 8 a man ua, Police Station a tut ui.  P. Neihsial, OC, Traffic lampi tawh kinai talua thil zawk ding khap ah a umna ziak leh raid bawl ah a umna tawh kisai a genna a chun, gari kining ting tak police department in a neilo ziak uaTraffic Control Police (TCP)  te ding ah lemchanlona nasatak um a hidan gen in, tuni gari a awn tawh kitawn ah raid bawlna nei uh leh van chuam chuam man a hidan uh a taklang hi. Thil zuak te van a mat hun ua, a neitu te’n sum piak ah matlo ding ah dawtna siam maleu sum lalo ah dan tawh kituak ah mat ah um a hidan le a gen a, mat ah um te chu me, nekthei chi chuam chuam pang in a gen hi. Chuleh, van neitu te Dan tawh kituak ah sum a liau uh ngai ding leh Police Station ah a van uh ki nung lak kit thei ding un OC in a gen hi.

TRIPPER IN A GAWTKHAK DAM ZO LO AH THI
Lamka, May 16 (Nisin Thuhiltu): Bungmual khawsak ah um Pioneer te camp kiang New Lane ah tuni, May 16, 2017 sunma dak 11:00 vel in Tripper khat in Jangkholal Zou (38) s/o Thangkhojam of Gelmol Khuman a gawtkha, District hospital tut himaleh damzo lo in a mualliam hi. Jangkholal ahileh Tripper nungzui a hia, lampi gul tha a guatna, driver in helo a gawtkhak hin a kigen hi. A tumpi leh kawnglak gari’n a gawt khak hin le a kigen a, kintak ah Lamka Damlo-inn zuan ah puak himaleh, a liamna thuak zo lo ah Lamkal ah thi hin le a kigen hi. Mi phukhatu Tripper gari ahileh Tongkhohau, Chief of Gelmol hi ah hiat a hia, Mithi ahileh KKL Ambulance mang in a luang vui ding ah puak in a um hi.

PASS IN GUALPHALO TE DING AH VANMAT HAWM
Lamka, May 16 (Nisin Thuhiltu): People Advanced in Social Services (PASS) in New Mata ah tuni, May 16, 2017 in guaphalo te a ding in van mat hawpna a um hi.  Zia hun chu Seiminthang Lenthang, MCS, SDO Churachandpur in Chief Guest hina tawh uap in van mat chi chuam chuam te piakdawna a nei hi. Chief Guest Seiminthang in a thugenna a chun, gualphalo ti thumal mat sang ah “Hitheina Chuam Nei” ti mat zawk ding lemsazaw a hidan a gen a, eima dawi dan dan ah mihing te’n i taksa leh lungthim kikisiam kawm theilo a hina chung ah mi ti’n in hitheina chuam chiat kinei a hidan taklang kawm in, panpi ngaite panpi thei dan lampi chuamchiat kinei a hi ti’n a gen hi. Hitheina Chuam Nei mite’ a ding ah Centre leh State Government in lampi chuam chuam hawn piak a hidan le a gen a, sepna tawh kisai ah Reservation percent thum a pat percent 4 a khansak a hidan gen in, mi tawh kibatlona neuh neuh nei ki um mahleh mitin in hitheina chuam chiat kinei a hina chung ah lekha simna, nek leh chak hawlna te ah kukal tak ah panlak chiat ding pawimaw in a gen hi. Esther Vaiphei in huntawp ah kipakthu genna nei in, Khuga Battalion in hun matna ding ah van mat pawimaw chuam chuam a piak bak ua, amau mama in a hall ding leh arrangement a bawlpina chung ua kipak mama a hidan a taklang hi. Vanmat hawp daw ah um te chu - Artificial Limb Manufacturing Coororation of India (ALIMCO), Kanpur tawh kithua ah PASS in a hawp a hia, Wheelchair, Crutch, Hearing Aids leh a dangdang banah Disability Certificate le piakdawna a um hi. 

UNICEF TEAM KHAT IN CCPUR DISTRICT HOSPITAL ENTHA
Lamka, May 16 (Nisin Thuhiltu): United Nations Children's Fund (UNICEF) a pat official team khat in tuni, May 16, 2017 in Churachandpur District Hospital etthakna a nei ui. UNIFEF a pat Hospital etthaakna nei official te chu; Dr. Tushar Rane, Field Officer, Northe East State, Dr. Ravichandra, Helath Specialist, NE State leh Dr. Mualik, Health Officer, North UNICEF, East State te a hiu a, hospital a duty doctor te’n UNICEF team te chu kithuapi in Ward chuam chuam etthaakna a neipi ui. Chun, sunnung in Imphal zuan in Churachandpur District a nusia kit ui.

COMMUNITY HALL, HIANGTAM LAMKA PHEL DING AH PANLAKNA CHIATHA ZING
Lamka, May 16 (Nisin Thuhiltu): Manipur Government a pat Order umsa dungzui in Tribal Movement ah thina tuak, vui nailo ah um Salpha 8-te luang vuina ding leh Salpha Memorial Park siamna ding in tuni, May 16, 2017 in Community Hall, Hiangtam Lamka sukthian in a um hi. Salphate vuina mun leh amau hiat zingna ding ah Salpha Memorial Park siamna ding ah Community Hall mun ding ah Community Hall umna lemsak ah a um dungzui ah State Government in Order a sua tawh kitawn ah Churachandpur District ah Community Hall um masapen lawi ah kihia chu phel ding ti a hi.  Zia gual lemsakna leh order chung a chun, Churachandpur District Badminton Association (CDBA) in thupukna enthak ding ah dawtna government kiang ah pemaleh CDBA a ding mun dang siam piak hiding ah government in thutiam a nei tawh kitawn ah  ni-thum sung ah CDBA in Property a nei zosia a lakdaw ding ti a hi.  

Zia dungzui a chu, CDBA in Badminton Court ding ah a mat uh thing, tile leh electric van mat chuam chuam te tuni’n a hedawk ua, zing a pat  Community Hall phelna nasep pat hiding hi’n a kigen hi. Government in CDBA in Temporary ah Multipurpose Hall, Churachandpur Government College a mat ding un phalna a pia, Headquarter Veng, IB Road kiang ah Vimala Rina Government School mai gam awng ah CDBA a ding ah Patta siam piak in, kihel theina ding ah Building le sak ding ti a hi.   Joint Action Committee Against Anti-Tribal Bills (JACAATB) leh Manipur State Government in a chiata May 10, 2017 ni ah Memorandum of Understanding (MoU) suai a kai uh tawh kitawn in Salpha vui nailo ah um luang 8-te vuidaw ah a um theina ding ua,  Community Hall  chu phel ding leh amun sukthian pai hita ding in a kigen hi. Chun, Salpha te vuina ding leh amau hiat zingna ding Memorial Park siamna ding mun chum un chuam chuam etvelna um maleh mun lemchang ding khenkhat a gam neitu te’n a zawk nawplo ziak ua, Community Hall, Hiangtam Lamka mun ah salpha te vui ding ah thupukna kisiam in le a kigen hi. Chuleh,  vui nailo ah um Salpha luang 8-te’ kivuini ding chu hiatchian hinailo maleh MoU dungzui ah May 25, 2017 masang ngei ah vui ding ti a hi.  Community Hall ahileh Ministry for Development of Tribals & Backward Classes nuai ah a la kisa, Rishang Keishing, Manipur Chief Minister ahi hunlai ah September 25, 1985 ni ah  a la hawn a hi.

ANNUAL CLASSIFICATION RANGE FIRING
Lamka, May 16 (Nisin Thuhiltu): Churachandpur District Police in Annual Classification Range Firing chu tuni zingkal lam 7:00 a pat STC/BSF Firing range, G. Mualkoi ah a pan ui. May 16-19 sung um ding zia firing hun a hin Augustine J. Khongsai, MPS, SDPO/Thanlon in tuni a pat zing chan Firing Range Officer mawpuakna la ding a hia, May 18-19 leh Firing Range Officer chu G. Ghanashyam Sharma, MPS, SDPO/CCpur, hiding a hi.

MORGUE AH SPECIAL PROGRAMME NEI DING
Lamka, May 16 (Nisin Thuhiltu): All Tribal Women Union (ATWU) leh All Tribal Movement of Lamka (ATML) saina nuai ah tuni, May 17, 2017 sunma dak 10:00 leh District Hospital morgue kiang ah Salphate min ah special programme um ding a hia, zia hun chu lunglutna nei kuamsap pang thei hi ding ti’n a sai tu te a pat thutut kimu chun a gen hi.

STATE GOVERNMENT IN A THUTIAM HEMIL?
Imphal, May 16 (Nisin Thuhiltu): Chief Minister N. Biren Singh mapui Government ah Cabinet in technical post khenkhat tilo in department dang dang ah retire sa Government employee a vel ah gawi (re-engage) talo ding ti ah a la thupukna chu tawtna bep hileh a kilawm hi. Zia gual thupukna chu Cabinet in April 3, 2017 ah a la lak hita maleh tuni tiang a hin re-engaged staff paithâk a hilam uh hiat a hi naipuai. Retired sa government employee te re-engage kibawl chun promote a chia ding gual ah chiathâk sak ngailo ti ah pawl chuam chuam in complain a bawl uh tawh kitawn ah cabinet in zia gual thupukna chu a lak a hi. Superannuation nung ah re-engage a um kit officer te chun office lua zing nalai in government in action bangma a la nai puai. Minor Irrigation Department, Govt. of Manipur ah Assistant Engineer khat chu a retire zaw in Minor Irrigation Department Division No. IV ah Executive Engineer in-charge ding ah gawi thak in a la um kit hi. Ama chu February 28, 2017 ah superannuation a mu tawh kitawn ah retire ta ding himaleh a panmun chu February 28, 2018 tiang lua thei nalai ding ti’n document khenkhat in a um hi. Minor Irrigation Department ah AE hi chiat - L. Sharatchandra Singh, Kh. Jotin Singh leh A Hemochaandra Singh te chu Superannuation a phak uh tawh kitawn ah a sepna ua pat official tak ah retire sak hita ti ah Minor Irrigation department ah Principal Secretary in February 28, 2017 a khan thusua a la bawl hi. Order suak masang a hin Minor Irrigation Department ah Chief Engineer, L.G. Singh in Principal Secretary kiang ah K. Jotin Singh thatheng thei ding officer titna nei a um nailo ziak ah a service hun chu belap ding in a la dawn a, zia dungzui a chun K. Jotin service chu kum 1 ( March 1, 2017- Feb 2, 2018) tiang suksau piak a um ti’n December 22, 2016 a khan order khat a la sua hi. Zia order chu pansan ah tuni tiang in le K. Jotin in EE i/c mawpuakna tu nalai in a nuai a um junior officer te promotion mu ding a hentang hi. A le lam ah, zia gual subei ding ah kigen government in le a thutiam hemil hitaleh a kilawm hi.

MANIPUR A THAU HAWLNA CHIA TA ZING
Imphal, May 16 (Nisin Thuhiltu): Oil India Limited in Manipur ah thau a um em ti etchianna survey chu a la nei a, Manipur State Level Convention on Oil Exploration team ah project manager, Sumit Mahajan in survey chu th 2 masang ah Jiribam district a pat kipan ta in Khaidem Village, Imphal West tungta hi’n a gen hi. Project chu a lawting a hileh state bep hilo ah gam pumpi a ding ah khantona tut tu hi ding hi’n le a gen hi. State sung ah thau a um chu Assam in phatchuam pi mama in Manipur le zia gual chu hung hi ding hi’n le a gen hi. A result a hawi a hileh sepna thak tamtak siam be in Manipur economic khangletna ding hi’n le a gen hi. Survey chu kum 2 lut be nalai ding a hia, April 2019 leh zawthiang hipan ding in a kigen a, zia a pat chu centre leh Directorate General of Hydrocarbons (DGH) thupuk dungzui hita ding a hi. Ministry of Petroleum and Natural Gas in Netherlands pansan oil exploration company khat, Jubiliant Oil and Gas Private Limited (JOGPL) kiti kiang ah Manipur sung mun chuam chuam - Jiribam, Tamenglong leh Churachandpur ah thau umna khual thei na ding license a pia, a hinla zia chung chang a hin local mite phalna lak a hi puai.

MAY 19 LEH UNC TRIPARTITE TALK SUTZAWP HI DI
Senapati, May 15 (Nisin Thuhiltu): United Naga Council (UNC), Manipur State Government leh Central Government te kal ah tripartite talk a la um chu May 19 leh Senapati Town ah nei zawm hikit ding a hi. Ministry of Home Affairs (MHA) thusuak in a taklat dan in, talk sutzawm ding chung chang chu UNC tawh kihiatua ta hi’n a gen a, a hinla khut ah zik chialna chu UNC kiang tung nailo hi’n le a gen hi. Talks chu chawlkal amsa khan um ding hi ah guatlawk sa a la himaleh MHA mapuina nuai ah nei a um North East Chief Secretaries’ meeting ziak ah tripartite talk chu chawlkal khat vuakchawn a um hi’n le a kigen hi. Zia talk nunungpen chu a chiata March 19 a khan a la um in zia na chun, tha khat zaw leh next round talk nei hi ding in a kigen hi. Talk tawh kisai ah UNC President, Gaidon Kamei in a gen dan in, Biren Singh Government in a dinmun a sâng em ti hawitak ah etsui a hi a tia, buaina khat suk venna ding ah Manipur Government in double-talk a neilo ding kinep um hi’n a gen hi. A chiata March 19 ni tripartite talk um hun a chun, Naga leh government kal ah kinawptuana a la um te government in a zalo ziak ah UNC in economic blockade a bawl hi ah hiatpi a um in a kiphinna ziak uh chu suk venna ding ah stakeholder zosia tawh kihona nei ding hi ah state government in tiam hi’n el Kamei in a gen hi.

UKHRUL AH SOUTH EAST ASIAN FILMS FESTIVAL KIPAN
Imphal, May 16 (Nisin Thuhiltu): Ni 5 sug um ding South East Asian Films Festival chu tun’n Town Hall, Ukhrul ah a kipan a, zia hun chu Ukhrul District Autonomous Council ah Chairman, Dr Yaronso Ngalung in Chief Guest hina tawh uap in festival hawnna a nei hi. Festival a hileh Film Society of Manipur; Tangkhul Music & Film Association, Ukhrul; Directorate of Information & Public Relations, Govt. of Manipur leh Department of Tourism, Govt. of Manipur te kithua khawm ah a sai khawm uh a hi. Hun matna ah chief guest, Dr Yaronso Ngalung in film te chu mipite chawndan leh hindan suklatna chi khat hi’n a gen a, society ah film pawimaw dan chu promote ngai hi ah taklang kawm in Manipur government leh Film Society kiang ah festival chu Ukhrul ah a sai ziak ua kipak thu le a puang hi. Festival hawnna vaiguan a chun, Tangkhul Music & Film Association, Ukhrul ah President, Ng. Ngashanngam leh Film Society of Manipur President Meghachandra Kongbam te’n Guest of Honour leh President hina tawha uap gel ua, Minister Counsellor (Commercial) of Royal Thai Embassy, Tharadon Thongraung in le zia hun chu a uap hi. Festival hun sung a chun Manipur, Thailand, Myanmar leh Taiwan ti te a pat film khenkhat chu sua hi ding a hi. Festival a ni khat ni ah Chaoba Thiyam director hina nuai ah kibawl Tangkhul documentary film, ‘Kungyee’ kiti leh Riyo Varam directna nuai ah kibawl, feature film ‘Thotkha Mirin Khani’ le suadaw hi ding a hi. Day-2 ni ah documentary film ‘Battle of Shangshak’ kiti chu sua hi ding leh ‘My Grandpa’s Home’, Myanmar a pat feature film ‘Let Pan’ leh Thai feature film ‘The Overture’ kiti sua hi ding a hi. A ni 3 ni’n, documentary film ‘Recent Souls of Tangkul’, Taiwan a pat feature film ‘The Shoe Fairy’ leh ‘Dream Flight’ te sua a um ding a hia, ABC of Filmmaking tawh kisai ah 2-day Demonstration Workshop le um dinga hi. A ni 4 ni’n Tangkhul feature film ‘Ashang Eina Aton’ leh Thailand a pat feature film ‘Tang Wang’ te le sua a um ding a hia, a ni 5 ni, 20th May, 2017 leh festival khakna um ding a hi.

MPP IN PRESIDENT N. SOVAKIRAN PAITHA
Imphal, May 16 (Nisin Thuhiltu) : Manipur ah regional party lui pen, Manipu People’s Party (MPP) in Nongmeikapam Sovakiran chu president hina a pat a paithak bep hilo in party a pat in le a nawdawk hi. MPP in a hileh N. Sovakiran in party fund suchavai leh diklo tak ah vaihawm hi ah ngawna siam in party a pat in a nawdawk hial hia, tuni um ding MPP central committee meeting chule a guk ah a la suk hai a hi. Central committee member te’n kithugual tak in ama chu party a pat paidaw hi ding in a thupuk ui. A chiata May 2, 2017 a khan May 16, 2017 ah meeting nei ding ti ah thupukna a la siam maleu meeting pang diing ah chia member te’n notce board ah meeting vuakchawn a hi tu a la kitâk chu a mu un a lungna mama mai ui. Central Committee member te’n meeting nei in Sovakiran chung ah action lak ding tawh kisai a genkhawm ua, meeting chu pang ding in a office a pat a kaidawk ui. Committee in ama chung ah assembly election a ding ah kibithiat lak ah Rs. 50 lakh chu suchavai ti’n ngawna a siam a, ama mimal vote le kikhiaklo hi’n le a ngaw ui. Chun, zia fund kimangkhial chu pass lo ding ti’n le committee in a thupuk hi.

UKHRUL AH NURSING COLLEGE SAKNA DING AH SUANGPHUNA NEI
Imphal, May 16 (Nisin Thuhiltu): North Eastern Council (NEC) ah Secretary, Ram Muivah, IAS in tuni zingkal lam in Leishiphung Christian Hospital, Meisailung Phungrei Ukhrul ah hostel tawh kithua School of Nursing (GNM) sakna ding in suangphuna a nei a, zia hun chu MH Khan, IAS, Principal Secy. MOBC, Dr. Karam Lokendro, Director Health Services & HMS ban ah Dr. Luithuk Zimik, MD (USA), founder president LCH (Ukhrul) te’n le a uap ui. Nursing college chu a hileh NEC, Shillong funding na nuai ah sak hi ding a hi.

HOTEL ROOM SUNG AH IGNOU DIRECTOR A THISA KIMUDAWK
Imphal, May 16 (Nisin Thuhiltu): IGNOU, Arunachal Pradesh ah Director, Dr Joseph Kuba Daniel (50) chu zani, May 15 zan in a tung na Tampha Hotel ah a room sung a mudaw in a um hi. A thina ziak thuchian hiat hinailo maleh a luang chu post mortem ding ah puak in a um hi. Dr Joseph hi Maram, Senapati district a pat a hia, suty nei a hi dungzui ah zia hun chu lawi leh pai te vena hun ah mat a guat a hi. Churachandpur pha in nidang ah JNU ah a la kai khawmpi a lawi leh pai te a va a, nitak lam ah kile kit in hotel ah chu room a book a hi.