Nisin Thuhiltu -15 May 2017

User Rating: 4 / 5

Star ActiveStar ActiveStar ActiveStar ActiveStar Inactive
 

MEITEI CENTRIC LUNGPUT PAITHAK NGAI: N. BIREN SINGH; CM IN SAHITYA PARISHAD AWARDS HAWMDAWK    
Imphal, May 14 (Nisin Thuhiltu): Meitei te’n mi upa panmun a lua ding leh state sung ah nam chuam chuam kal ah chamna, muanna leh kituakna a um theina ding ah Meitei centric lungput haisan ngai ding hi’n Chief Minister Nongthombam Biren Singh in tuni’n a gen hi. Manipuri Sahitya Parishad, Imphal leh Department of Art & Culture, Govt of Manipur in a sai khawm, Maharaja Chandrakirti Auditorium, Imphal ah 82nd Manipuri Sahitya Parishad Annual Meet cum Award distribution ceremony matna hun a chun Chief Minister N. Biren Singh in Chief Guest hina tawh uap in zia thu hi a gen a hi. CM Biren Singh in state government thak chu state sung ah vaipuakna pha umna ding ah panla zing hi ah taklang kawm in kipumkhatna a um theina ding ah ngaidan kihiatsak tua pawimaw hi’n a gen hi. Government in transparency leh accountability a um ding tup a hina ah mipi te’n a haksatnau leh a buaina teu puangdawk thei zing hi’n le a gen a, mipi te’n state sung ah development tawh kisai ah muthei ding kithenna mu ding uh hi’n le a tiam hi. Tha 4 val a la um economic blockade leh "Anti Tribal Bills" ziak ah kum 2 leh a kim lam kiphinna a la um te sukven a hi chu mipite kithuapina zâl hi’n le CM in a gen hi. Chun, media te kiang a le society a ding ah positive leh constructive tak ah pan la ding a chial kawm in state minsiat theina ding thu chuam chuam te sua lo ding in le a dawn hi. CM in zia hun a chun, state government in kumsin leh Manipur Sahitya Parishad a ding recurring grant Rs 5 lakhs pe zing ding hi’n le a tiam hi. Award piakdawna chu Health & Family Welfare ban ah Art & Culture Minister tukawp, L. Jayantakumar Singh leh Manipuri Sahitya Parishad ah President, Professor N. Tombi Singh te’n Guest of Honour leh President hina tawh a uap gel ui. Manipur a ding ah literature ban ah art & culture lam ah nasep hawi mama te kiang ah kipe sek, Manipuri Sahitya Parishad Awards a hin a kigawm ah award 26 a um, zia lak a chun Sahitya Bhusan, Sangeet Bhusan, Natya Bhusan, Kala Bhusan te le a pang hi. Tukum ah awrd dawng te lak a hin (L) Yumnam Yaima, Sagolsem Tijendra Singh, Lourembam Bedabati, Gangmei Aluna Kabui leh Rani Khidir Devi te le a pang ui.

AIR HOSTESS MUTHAK
Lamka, May 14 (Nisin Thuhiltu): Nk. Lucy Khaute d/o K. William Vaiphei of Bethel Veng, New Lamka in tha masa GO AIR nuai ah Air Hostess ding ah interview ala piak chu lawting in tha kit, June leh sem pan ngal ding a hi.

VAN MAT CHUAM CHUAM PEDAWK DI
Lamka, May 14 (Nisin Thuhiltu): A hung tung ding May 16, 2017 zingkal lam dak 10:00 leh People Advanced in Social Service (PASS) in New Mata a um amau office ah gualphalote kiang ah vanmat chuam chuam hawpdawna nei ding a hiu a, zia hun chu R. Sudhan, IAS, DC/Churachandpur in Chief Guest hina tawh uap in van hawmdawna nei ding a hi. Zia na ding a hin van dawng ding ah kidawtna piaklut zaw hita maleh document pekim nailo te’n le a ni ma ngei ah a piak lut thei nak lai ding uh hi’n a kigen hi. Van mat chuam chuam kihawm ding te a hileh Crutch, Wheelchair, Tricycle, Rotator, Blind Stick leh Hearing Aid hiding a hi.

PDDC IN CM KIANG AH CHIALNA LEH HIATSAKNA BAWL
Pherzawl, May 14 (Nisin Thuhiltu): Pherzawl District Development Committee in thusua a bawlna’ chun, Chief Minister N. Biren Singh mapui state government in hunchawm cha sung mai ah na tampi a sepdaw te ziak in kipakpi thu a phuang a, kiphinna nei thingtangmite tawh kinawptuana siam chu maban ah chamna umna idng leh khantona tut tu a hi ding kinepthu le a phuang hi. PDDC in thusua ah a taklatna’ chun, Manipur sung mun zosia ah khantona a um ding dawi ah CM N Biren in pan a lak dan te mu in PDDC in le a vaima thei pen ah Pherzawl District headquarters ah CM reception neipi nuam uh a hi dan a phungdawk a, khantona dawi PDDC leh district mi te chu kithuakhawmpi thei ding hi’n le Cm kiang ah a hiatsak ui. CM in Pherzawl a phak tak leh lampi haw ding in le dawtna a siam a, zia a pat chu Pherzawl district mipi te’n bang ziak ah kum tamtak development a la ngek zing uh a hel ti hechian ding ti’n le a dawn hi. District in a mamaw te chu Chief Secretary leh CM kiang ah piaklut a la hita maleh tutiang ah bangma a um nailo chung ah lungnawplo thu puang kawm in state government in district mipi te chu a chuam bawl  a hi em ti’n le dawtna a siam a, zia chung chang a hin May 17 ma ngei ah thupukna kichian tak la ding in CM kiang in chialna a bawl hi.
 
ZILLAI SPORTS UM DI
Saipum, May 14 (Nisin Thuhiltu): A hung tung ding May 18-20 sung a hin Zillai Churachandpur Block (ZCB) in Saipum lentual ah Zillai Sports sai ding a hia, zia na hin Churachandpur Block sung bep hilo in Block dang a pat le a thanuam leh lunglut unit khenkhat pang ding a hiu. Sports a hin group lam ah pawsal football leh volleyball ban ah numei volleyball um ding a hia, individual items ah target kick, airgun kap leh a dang dang um ding a hi. May 18 ni leh ADC, Churachandpur Chairman, Pu Khaipao Haokip in Chief Guest hina tawh uap in Sports hawnna nei ding a hia, P Kamkholal, EM/ADCC in Functional ban ah Pauchungnung, Associate Professor (Deptt. of Pol. Sc.) leh D Khuala, Project Manager, NERCOMP te’n Guest of Honour hina tawh uap ding a hiu. Chun, football a hin match official ah Muana Vaiphei leh James Suantak te pang ding a hiu.

DRAMA CD HAWNNA LEH LATNA  
Lamka, May 14 (Nisin Thuhiltu): Tuailai 1434Pro Drama CD hawnna leh latna chu tuni’n Mini Auditorium, Dorcas Jubilee Hall, New Lamka ah nei in a um hi. Drama CD chu a entu leh a ngaitha tu te a ding ah malzawlna dawnna a hi a, Pathian Lalgam nasepna a hina ding ti in Rev. Paukhanmang Guite, Director of Ministries, EBC in a hawnna leh a latna a nei a, hun mat sung a hin Drama Team in Special Item show na le a nei hi. Rev. N. Pumsuanmung in Tuailai 1434Pro tawh kisai a genna a chun, EBC Headquarter a lawiupate lemsakpina tawh kalsuanna masa pen ding in November 14, 2015 in EBCC Bungmual ah Workshop nei a um in zia a pat chu 2016 sung chu Division chuam chuam a lawi upate hiatpina tawh Tuailai 1434Pro Campaign tawh kisai kalsuanna nei a um hi’n a gen a, Tuailai 1434Pro kiti chu kuama a chuam hilou ah tulai khangthak, nekguk-chakgukna awlmaw te’n zia pansan ah zia gual thil te a pat kikawi kang ding ah kitiamna a nei ban ah midang tamzaw a kailutna ding nasepna hi’n le a gen hi. Tuailai 1434Pro chu Proverb 14:34 pansan ah bawldaw a hi dungzui ah zia Bible chang zui nuam taphawt chu “Pro” hi uh hi’n le a a, maban ah Seminar, Consultation, Competition leh a dang dang te nei to zel ding uh hi’n le a puang hi.

TKLC IN MEETING NEI
Lamka, May 14 (Nisin Thuhiltu): Thadou-Kuki Literature Committee (TKLC) in zani, May 13 in TKLC Temporary Office ah Dr Seikho Singsit, Chairman, TKLC malatna’n meeting a nei hi. Zia hun a chun, member chiakhawm te’n Michael Lamjathang chu TKLC Additional Secretary ding ah namdetna a nei ban un a hung tung ding June 10, 2017 leh ‘Workshop on Thadou-Kuki (MIL): Problems & Issues on Textbooks’ sai ding ti’n a thupuk ui. Textbooks leh Examinations tawh kisai zosia ensui ding member 7 panna, Syllabus & Curriculum Sub-Committee (SCSC) chu siamdaw ding in lemsakna a nei ua, zia tawh kitawn a chun Dr Marykim Haokip leh Dr Ngamkhohao Haokip chu Convenor leh Secretary ding in a guat ua, amau te gel in member a vat 5 te chu a kitel ding un le member chia khawm te chun a ngansia ui. Chun, Thadou-Kuki pau ah lekhabu zik (author) zosia chu TKLC in kipakpina a neipi ding bep hilo in publish le a bawl piak ding in le a thupuk ui.

RS BY-POLL AH BJP-CONGRESS STRAIGHT FIGHT HIDING
Imphal, May 14 (Nisin Thuhiltu):  Manipur ah Rajya Sabha MP by-election umna ding ah Congress leh BJP paty 2 te kal ah gualzo ding kichuna a nasatk um ding in a kilang hi. Zia by-election chu May 25 le um ding ti a hia, May 15 (Monday) chan ah nomination file thei ding a hi. Damlona ziak ah sitting Rajya Sabha MP Haji Abdul Salam a thi tawh kitawn ah  seat ah um lua tu ding telthakna ding ah by-election chu um ding ti a hi. Opposition Congress in senior leader leh minister lui E Dwijamani Singh chu party candidate ding in a puang a, a langkhat lam in BJP  in state unit president of the party (BJP), K Bhabananda chu party candidate ding in a puang a, party Secretary of Central Election Committee , Jagat Prakash in party candidate ding tawh kisai a chun thusua le a bawl bawk hi.Official tak ah puan hinailo maleh Congress pat BJP join thak te tawh sim ah legislator 38 nei BJP-led coalition government ding ah K Bhabananda chu common candidate hiding in a kilang hi. Chuleh, BJP in candidate ding ah state president Bhabananda a guatna ziak chu  Thoubal leh Kaching civil organization te’n nasatak ah MP demand a bawlna chung ua guat ah um hin le a kigen hi.

POLICE IN SC LAWYER VAUNA TAWH KISAI KHUAL  ZING
Imphal, May 14 (Nisin Thuhiltu): Supreme Court lawyer Utsav Singh Bains vaulauna tawh kisai in Manipur police team khat in tuni’n human rights activist Binalakshmi Nepram chenna inn khualna a nei ua, ama chu Supreme Court lawyer vaulauna chung ah kigawlkha muanmaw a hi ziak ah a chenna-inn khual ah um hin a kigen hi. Chun, Police team dang khat in tunaicha Assembly election ah Chief Minister N  Biren contest N Ratan Singh chenna-inn le khualna a nei ui A langkhatlam in Right activist leh  founder of Manipur Gun Survivors Network, Binalakshmi Nepram in Friday (May 12) zan ah Manipur police te’n a chenna Imphal’s Sagolband ah kilawmlo tak ah bawl un ngawna a siam a, himaleh zia ngawna chu Inspector General of Police (IGP) Clay Khongsai in thudik hilo a hidan gen in, SDPO Imphal mapuina police team khat in activist chenna inn official tak ah vena nei ah thudawtna nei a hidan uh a gen hi.

DISTRICT ZOSIA AH HANDLOOM & HANDICRAFT EMPORIUM HAWN HIPAI TA DI: TH. BISWAJIT  
Imphal, May 14 (Nisin Thuhiltu): Minister of Textiles, Commerce & Industries Thongam Biswajit in state ah khualzin mi tamzaw hîp na ding in district zosia’ handloom & handicraft emporium chu hawn hipai ta ding hi’n a gen hi. Uchekon, Laikon Lampak ah reception programme leh puan-gat te a ding bank account thak hawnna hun a chun, Manipur a kibawl handloom leh handicraft van te chu India ah min chia mama hi’n a gen hi. Loitang Khunou ah spinning mill um chu suk hin kit hipai ta ding a hi dan puang kawm in North East a ding ah spinning mill umsun a hina ah a suk hin kitna ding ah ministry of textiles 70% subsidy pe ding hi’n le a gen hi. State ah puang-gat te kiang ah Centre in solar power loom 4 lakh tuam pe ding hi’n le a puangdawk a, puang-gat te’n hun a ha sukmang lo na ding ua raw material delivery system le bawldaw hipai ta ding ti’n le a gen hi. Tu din mun ah government in department chuam chuam ah kumsin leh a kigawm ah sepna 1 lakh bawldaw ding ngaitua hi’n le a gen hi. Handloom leh handicraft chu state a ding ah sum mu na pipen a hina ah pawimaw mama hi a le taklang kawm in puang-gat te a ding bank account kihawng chu agency te transparency etsui na ding hi’n le a gen hi. Hun matna uap, Project Manager (Handloom), Imphal East, P. Meenakumari in bank account chu central government nuai ah scheme chuam chuam te apply na ding ah puang-gat te a ding ah kihawng hi’n a gen a, zia scheme te chu apply hun tak leh idendity card chawi chiat ding in le puang-gat te kiang ah chialna a bawl hi. UBI ah lead District Manager, Imphal East, Seikai Singsit in a chiakhawm te kiang ah UPI (Unified Payment Interface APPS) phatchuam dan genlatna a nei hi. Hun mat zaw in puang-gat mi 300 tuam in bank account hawnna a nei ui. Department of Textiles,Commerce & Industry leh Directorate of Handlooms & Textiles in a sai khawm zia programme chu Additional Director (Handloom), K. Lamlee Kamei, Women Empower, Thonju A/C Thongam Juneiwon, Commerce & Industries ah official te ban ah Uchekon mipi hunkhawp in a uap ui.

DÂN DIKLO TAK AH SUANG LEH PIAUNEL PUA KIMAN  
Imphal, May 14 (Nisin Thuhiltu): Forest & Environment Minister Th. Shyamkumar in tuni Mantripukhri a um Forest Check Post ah inspection a nei na chun, toll tax pelo ah suang leh piaunel pua, truck 10 tuam a mandawk hi. Zia lo chun, Minister Shyamkumar in Sekmai leh Kanglatombi ah Forest Check Post te le etthâkna a va nei hi. Thuthak lakhawm mite a kimupi hun a chun, Forest Department in kumsin ah revenue Rs. 100 crore dawldaw gua a hi ban ah tuni etthâkna a nei chu le target lak ah pang hi’n Minister Shyamkumar in a gen hi. Forest Department in revenue a dawldaw te chu natural resource te a siat ding humbitna ah pang thei hi’n le a gen a, department official te kianga h a mawpuakna teu chu diktat tak ah sem piting ding in le hillawkna a bawl hi. Hentang a um truck 10 te chu toll tax piaksak a hi zaw un thadaw in a um kit ui.

IPR DIRECTOR IN LEKHABU HAWNG  
Imphal, May 14 (Nisin Thuhiltu): Senior Journalist minthang mama Oken Jeet Sandham in Nagaland pansan ah a zik, “Modi Walking on Elusive Naga Peace” kiti lekhabu chu Meghachandra Kongbam, Director, Information and Public Relations in tuni’n State Information Centre, Palace Gate, Imphal ah a hawnna a nei hi. Lekhabu hawnna hun chu Chief Guest hina tawh uap, Meghachandra Kongbam , Director, IPR, in mun dang a um te’n a thuchian helo hial ah North East chung chang a zik sang ua a cheng te mama in a ki zik chu midang te’n NE buaina hechiam zaw ding hi’n a gen a, Governor lui, S S Sidhu in a la gen khak, ‘NE a invest nuam la hileh NE region hechian masa’n, zia chu lawting ding lahi’ ti ah a la gen khak chu genlang kit kawm in i mi teu i hiatchian ding uh leh midang te le hiat sawn sak ding hi’n le a gen hi. NE state te ah journalists minthang mama te nasep hawi dan genlang kawm in journalist community te kiang ah a retire zaw tak ua leh a experience teu chu lekha bu ah zik ding in le chialna a bawl a, zia chu maban ah khang hung um te a ding ah pha chuam ding ti’n le a gen hi. Hawndaw thak a um lekhabu ziktu, Oken Jeet Sandham chu pâkchat thu gen kawm in maban ah a lawting to zel ding dawisak thu le a puang hi.