Nisin Thuhiltu -13 May 2017

User Rating: 5 / 5

Star ActiveStar ActiveStar ActiveStar ActiveStar Active
 

EVM HACK A HI PROVE BAWL DING AH PARTY ZOSIA CHANCE PIAK HI DING: CEC ZAIDI
 
New Delhi, May 12  (Nisin Thuhiltu) : Tu nai ah Assembly election um hun ah electronic voting machines (EVMs) kimang te chu hack a um a hiloleh hack thei a hi dan prove ding ah political party zosia chu chance piak hi ding in Election Commission in a gen a, a hinla zia na ding ah a ni ding chet vang a genlang puai. Election Commission in EVM leh Voter Verifiable Paper Audit Trail (VVPAT) tawh kisai ah tuni’n New Delhi ah all party meeting a ko hi.  Meeting hun a chun, election hun ah gawlgukna um te chu gawt tâk leh disqualify a hina ding thu le gen khak in a um a, zia tawh kisai a hin National party 7 leh state party 35 te’n a ngaidan uh a gen ui. Chief Election Commissioner Nasim Zaidi iin political party te kiang ah EVM tawh kisai ah kisa-ikna a nei teu chu Commission in hiatpi hi ah gen kawm in a thu chu suk fel hi pai ding ti’n a hiatsak a, maban ah election um ding te a chun a lo theilo ah VVPAT mat hita ding ti’n le a tiam hi. Meeting kipat lim ah a la genna a chun, Commission in political party zosia kithuapina tawh electoral process te chu siam hawi gua zing hi’n a la gen a, EVM hack hi ah ngawna um te chu pansatna ding bul le bal neilo kingawna mai leh panpi chuam umlo hi’n a gen hi. Commission in EVMs leh VVPAT te chu hack thei hilo leh bit mama a hi dan suklatna ding in technical, administrative protocol leh procedural safeguards chuam chuam a chiapi te taklatna le a nei a, EVM a hawi leh diak na ding ah ngaidan pe nuam te a ding ah Commission chu kihawng zing hi’n le a gen hi. Election process ah transparency a um na ding ah sum mat dan chung chang ah electoral reforms leh election hun ah gawlgukna um te venna ding ah Commission in proposal pelut ta  ahi dan le a phuang dawk hi. BJP leader Bhupender Yadav in Election Commission tawh meeting nei zaw ah thuthak lakhawm te a kimupi hun a chun, BJP in electoral funding ah transparency um ding dawi a hi dan gen kawm in election hun ah sum a mi zawl te gawt a hi thei na ding dân thak ngaitua hi’n a gen hi. Commission in EVM hack thei a hi prove na ding ah chance piak ding a ti chu AAP leader Manish Sisodia in pha a sak thu puang kawm EVM chu bit tak tak lo ding ah party khenkhat in meeting hun ah muangmaw thu puang uh hi’n le a gen hi.


FREE SCREENING CAMP
 
Lamka, May 12 (Nisin Thuhiltu): Salem V ah um Don Bosco Higher Secondary School ah tuni, May 12, 2017 sunma dak 9:30 a pat sunnung dak 2:00 kikal in naupang kum 15 nuailamte’ a ding in Free Screening Camp for Detection of Congenital Heart Disease kiti a um hi. Free Screening Camp ah ki-etsak ding in nu-le-pa te’n naupang kum 15 nuailam tamtak a chiapiu hi. Screening Camp ahileh Catholic Medical Centre (CMC) Hospital Koirengei, Imphal East te saina nei a hi. Zia hun a chun, Lisie Heart Institution, Cochin, Kerala pan Specialist Doctor 2 - Dr. Edwind leh Dr. Ebin ban ah CMC, Imphal a pat Dr. Romen banah CMC Hospital a pat Nurse 5 kithuapina tawh  nuapangte en-in, screening a bawl ua, a pawimaw dungzui un a thawn in damdawi a hawm ui.

ZRO CONSULTATIVE MEETING
Lamka, May 12 (Nisin Thuhiltu): Zomi Re-Unification Organization (ZRO) Headquarter in May 13, 2017 in Camp Muvanlai ah sunma dak 11:00 a pat Consultative Meeting nei ding a hi.  Zia hun uap tute ding  a chu Bus 2 um ding a hia, sunma dak 9:00 in EBCC Hebron mai ah kinga ding a hi.  Zia hun chu Tribe Leader, Zomi sung ah Frontal Organization lawiupa te leh Church Leader banah Intellectual te pangkim chiat ding in Ministry of Information & Public Relations, ZRO Headquarter in hiatsakna a bawl hi.

AMSSATA IN ZEO GATE CHABI KAM
 
Lamka, May 12(Nisin Thuhiltu): All Manipur Sarva Siksha Abhiyan Teachers’ Association (AMSSATA) pawl in tha 8 law a mu taklo uh tawh kitawn ah Government kiang ah dawtna chuam chuam bawl maleu sukpitin piak ah a umlona chung un, tuni, May 12, 2017 a pat Indefinite Cease Work Strike a nei uh chu SSA Primary Teachers’ Association, Churachandpur in le support bawl in ZEO Office, Hill Town Gate, Tala’n a kam ui.   Manipur ah SSA Teacher te’n ahileh September 2016 a pat April 2017 kikal sung tha 8 law mutalo a hiu a, Congress Government in December 2016 tiang piak ding  a la thutiam himaleh a la sukpitin piaklo nung ah BJP Government in le May tha, first week ah piak ding ti ah a la gen himaleh tuni tiang ah piak hinailo a hiu. Lamka ah ZEO Office Gate chabi kam bep hilo in, slogan chuam chuam kizikna - poster le tak in a um a, himaleh ZEO leh a Staff-te chum un dang ah lut in, office sung ah ngaina gual in na a sem tho tho ui. AMSSATA pawl in zani a khah Director of Education (School) tawh kihona nei ah a demand chuam chuam teu zikthaw ah  ala piak uh le hita a hia,  zia a demand teu chu a vaima theipen ah thawlaw piak ding; tutha sung ah MGEL/EIN zawthian ding; SSA Primary Teacher-te State Cadre ah kawilut ding leh SSA Teacher te Zonal Wise ah Model School siamdaw ding ti te a pang hi.

ZU TAMTAK SUKSIAT AH UM
 
Lamka, May 12 (Nisin Thuhiltu): Drugs Cell leh Anti Alcohol Unit, District Police kithua in khawpi sung mun mun chuam chuam ah amatdaw uh Zu tamtak tuni, May 12, 2017 sunma dak 11:00 in Mini-Secretariat Complex, Tuibuang in a susiau hi.   Rakesh Balwal, IPS, SP Churachandpur panlakna nuai ah gamsung ah muanna, bitna banah khamthei ziak ah buaina a pian ding venna ah khawpi sung mun chuam chuam a pat District Police ah Drugs Cell & Anti Alcohol Unit ten district mun chuam chuam ah zu kizuakte a etzui zing uh tawh kitawn ah - Indian Made Foreign Liquor (IMLF) leh local zu hunkhawp a matdaw uh a hi. Matdaw ah um Zu te chu Police Station ah Malkhana (store room) ah a kawi sek uh a hi.  District Police nuai ah Drugs Cell & Anti Alcohol Unit in April 25, 2017 a pat May 11, 2017 tiang ah a matdaw uh zu suksiatna chu Inspector R.K Anil Kumar Singh, OC, Police Station in a mapui a, suksiat ah um zu te chu a sum ah Rs 33,500 man hiding ti a hi. Sukisat ah um zu te lak a chun, Indian Made Foreign Liquor (IMLF) bottle 67, Rs. 31,500 man Local zu Illicit Countymade Liquor (ICL) liter 315, Rs. 4,200 man, Beer bottle/Cane 28 leh Rs. 7,050 man Wine Bottle 47 a pang a,  a kigawm ah  Rs. 76,250 vel phazo ding ti a hi.  RK Anil Kumar in a genna a chun, SP Rakesh Balwal, IPS panlakna nuai ah CCpur Police in khawsung-khawtang phatna ding leh dawi umlo buaina zu ziak ah a tun ding venna, Tedim Road dung ah duty zing a hidan uh a gen a,  Police sung ah Drug Cell pawl in zu zuakna a diak ah New Bazaar, Old Bazaar banah zu huanna leh zuakna mun chuam chuam check bawl zing a hidan uh a gen hi.

LAMPI SIAMPHATNA NASEP CHIATHA ZING
Lamka, May 12 (Nisin Thuhiltu): Lamka khawpi sung kikawm tuana lampi pawimaw chuam chuam te  siamthakna chia to zel in tuni, May 12, 2017 a pat Nehru Marg suk lampi bawlna nasep pat in a um hi.  Lampi bawlna a hileh a chiata March thatawp a pat IB Road bawlna nasep pat ah um, zawthian a hi tak tawh kitawn ah Mission Road siam ah um kit, Mission Road le black topping zaw ah a um tawh kitawn ah Nehru Marg lampi siamna pat ah um kit hin a kigen hi. Khawpi sung lampite kum tamtak siamthaklo ah um chu, State BJP Vice President, V. Hangkhanlian, 58 Churachandpur A/C ah teltin a hi nung ah ama panlakna Public Works Department (PWD), Churachandpur Division in lampi siamphatna nasep a chiapi zing hin a kigen a, Nehru Marg lampi suk siamthakna ahileh, Rengkai Road ah chiasuk in, Zenhang Lamka chuan in, Zoveng tiang bawl hiding in a kigen hi.  Lampi siamna a hileh tuni’n a kuakna diak munte ah suanghum sung in a chung ah alkatara (bitumen) sun in a um a,  Road Roller khat mang ah nawt zawl in a um hi.


LANVA LUI CHUNG AH LEI THAK KIHAWNG 
Lamka, May 12 (Nisin Thuhiltu): Lanva lui chung ah Dorcas Veng leh G Mualkoi ki kawmtuana lampi pawimaw tak, bialtu MDC, CT Lian Guite panlakna (Children Iron Foot Bridge) mang ah kisiam chu zawthian a hitak tawh kitawn in tuni, May 12, 2017 zingkal in mipi mat thei ding ah hawn in a um hi.  Zia Lei (bridge) chu bialtu MDC leh a team te’n ngaikhawkna liantak tawh R Sudhan, IAS, DC Churachandpur kiang ah thil umdan a tut nung ua, DC in Job Card ah siamd ing ah genpi maleh Bialtu MDC in chuuk tui in a lap ding a lau ziak ah school kai naupang te ding ngaikhawkna temporary ah mat thei ding ah a siam hin le a kigen hi.  Zia lei chu BRGF nuai ah kum 2013-2014 ah kisiam himaleh kum 2015 ah Lanva Lui tuilian in a suksiat a hia, siamthak ah a umlo nung ah  bialtu MDC panlakna kisiam dawk thak kit ti a hi.


JACAATB IN HIATSAKNA BAWL
Lamka, May 12 (Nisin Thuhiltu): Joint Action Committee Against Anti-Tribal Bills (JACAATB) in Tribal Movement a liamna tuak khate’  ding in hiatsakna thusua a bawl hi. Zia thusua dungzui a chu - Manipur Government leh JACAATB in Memorandum of Understanding (MoU) suai a kai uh tawh kitawn ah kihona lemna pangsak ah um,  liamna tuak kha zosia panpina sum piak ding ti tawh kisai liamna tuakkha zosia chu Chief Convener chenna inn, Bungmual ah  lekha pawimaw chuam chuam te chawi ah May 13, 2017 tiang ah kilang ding ah hiatsak a hiu a, zia hun a chu min diklo ah kizik kha te sukdik hiding ti a hi. Zia hun a chu Aadhar Card photocopy, Voter’s I-Card, Domicile Certificate, Medical Bill leh a liamna uh tawh kisai ah report umthei te leh Bank Account Number a chawi uh ngai ding ti a hi.


HAC CHAIRMAN KIPAKPINA NEI 
Lamka, May 12 (Nisin Thuhiltu) : Henglep Block sung ah Deputy Inspector of School, Henglep leh ADCC, Henglep Block nuai a sem teacher te’n tuni, May 12, 2017 sunma dak 11:00 in B.Vengnom Community Hall ah Thangzalam Haokip @ TT Haokip, Chairman, Hill Areas Committee, Manipur kipakpina hun amat piu hi. Hun matna chu Nehkhohao Haokip, OA leh Taichin Gangte, A/T te’n amapui ua,  Hegin Haokip, President, TWA, Henglep Block in hun pat pauchapna nei in, H. Paokhothang Haokip, DI, ADC Henglep in vaidawn thugenna a nei hi.  DI of School, Henglep leh DI of School, ADC Henglep te’n  Staff tawh kithua in TT Haokip puan silsakna a nei ua, zia zaw a chun, TT Haokip in thugenna a nei hi. TT Haokip in a thugenna a chun, ama’n a Constituency sung ah Government Department-te ziagual programme chu a neipi ding kilawm himaleh ZEO leh ADC nuai ah School Teacher te’n ziagual ah kipakpina a siam uh chu kipak mama hin a gen a, Prime Minister Narendra Modi in State zosia MLA ten ni 100 sung ah a na sepdaw uh Report a piak ding ua thupiak nei a hidan taklang in,  Henglep Block sung ah school zosia  Headmaster leh Teacher te school a kai zing nau em? Student bangzat nei, school umna a um uh em? A sepna school uh bang zat vei phakha ta, Class X student bangzat pass; first division leh second division bangzat um? Ti te dawtna a siam a, khenkhat dawnhuna petheilo bang le a um ui.  TT Haokip in Headmaster/Headmistress-te lunglut leh kituptak ah nasem ding in chialna a bawl hi. Hun matzaw ah TT Haokip in thuthak lakhawm mite kimupi in, tunung ah Henglep bial ah hausa zosia kimupi ah banggual ah school um te siamhawithak ding ti tawh kisai genpi ding hin  agen a, bialsung ah khantona a um ding ngaikhawk mama a hidan gen in, khantona a umna ding ah theitawpsua panla ding hin a gen hi. Chuleh,   Kikawmtuana lampi a hawilo ziak ah khantona tak tak um theilo a hidan genle gen in,  lampi siamna ding ah sum sanction ah um, kilometer khat ah Rs 50 lakh umte lak ah  Rs 30 lakh mang ah lampi siam hileh lampi hawi mama ding a hidan a gen hi. Hiathei khat chu Henglep Block nuai in Government Aided school 11 a um a, ZEO nuai in School 36, ADC nuai ah School 41 a um hi.  Chun, SSA nuai ah Teacher 58, RMSA nuai ah Teacher 11 leh ZEO nuai ah Teacher 75 a um a, Student 1,902, Teacher 246, Peon 39 leh non-teaching staff 39 a um hi.


PETROL PUMP TE’N HUNTIAM UMLO KHAK DING AH VAUNA A BAWL LA DAWK
 
Imphal, May 12 (Nisin Thuhiltu): All Manipur Petrol Pump Dealers Association in huntiam umlo ah petrol pump khak ding ah vauna a la bawl maleh Consumer Affairs Food & Public (CAF& PD) Minister Karam   Shyam tawh kiholemna a um tawh kitawn in kiphinna chu um talo ding a hi. Association in CAF & PD director, Y Ranjan thugen te chu kilawmlo leh petroleum products retail seller te suminsia hi’n ngawna a bawl a, May 11 ma ngei ah ngaidam a dawt ding ti’n huntawp a la piai. Zia tawh kisai a hin CAF&PD minister in Secretariat South Block a um ama office ah Association kimupi in kiholemna  a siam ui. Kihona nei zaw ah tuthak lakhawm te a kimupi hun a chun, minister Karam Shyam in mipi a ding khualna ah kihiatthiamlo n ate zosia kiho lem a hi tak ziak ah a pangai gual a petrol pump kihawng ding hi’n a puangdawk hi. Kihona hun a chun CAF&PD ah commissioner K Radhashyam leh director Ranjan te le a pang ui.

MSF IN COHSEM HILCHIANNA BAWL DEM
Imphal, May 12 (Nisin Thuhiltu): Council of Higher Secondary Education Manipur (COHSEM), employee te’n employee 38 appoint na leh zia lak ah 27 te regularized na ah a diklo bangma um lo hi ah hilchianna a bawl chu Manipur Students’ Federation (MSF) in nasatak ah dem in zia appointment kibawlna a chun a diklo tamtak mudaw a um hi’n a gen hi. MSF thupuangtu in tuni thuthak lakhawm te a kimupi hun a chun, 2014 ah employee 38 te lakna ding tawh kisai ah advertisement a hilo leh notification bangma suadaw hilo hi’n a gen a, April 22, 2016 ah employee 38 te lak ah 27 in regularized hi na ding ah petition file bawl uh hi’n le a gen hi. April 27, 2016 ah court in CoHSEM kiang ah a dawtna uh chu ngaitua ding leh zia chung chang chu court ah dawnhuna pe ding in le a dawn a, zia chu dawnhuna a piakna in CoHSEM Chairman in employee te chu regularized bawlna ding ah mun awng lo hi ah a la gen hi’n le thupuangtu chun a puang hi. CoHSEM employee te’n mipi them gua hi ah ngawna le a bawl a, chuleh, zia bep chule hilo in campus khat ah school 2 affiliation pia hi’n le MSF in ngawna a bawl hi. Chun, duplicate certificate lakna ding a le sum a vâl ah seng ngai sek hi’n le thupuangtu chun a puang hi.

ICM HOSTEL BUILDING THAK HAWNG
 
Imphal, May 12 (Nisin Thuhiltu): Social Welfare & Cooperation Minister, Nemcha Kipgen in tuni’n Institute of Cooperative Management (ICM), Lamphelpat, Imphal ah Hostel Building thak leh Cooperative/SHG Product te Exhibition na a hawng hi. Chief Guest hina tawh uap Minister Nemcha Kipgen in North East India a ding ah Manipur chu Cooperative Institution a ding ah centre khat suak sak na ding ah pan la ding hi’n a gen hi. ICM, Imphal in 1988 ah a kibawldaw a pat in napha sem zing in training programme chuam chuam a saina a pat cooperative movement leh self employment programme chu khangto sak hi’n a gen hi. Hawng thak a um lupna 32 dawl hostel thak ziak a chun institution in training programme chuam chuam a sai tak leh a pang pung be ta ding hi’n le a gen hi. Institute in a kigawm ah training programme 80 lam a la sai ta leh zia na chun mi 3000 val a la pang uh hi’n le a gen hi. Hostel building thak hawnna a um zaw in cooperative/SHG product te exhibition le um in zia na chun handloom, handicrafts leh nek leh chak um na stall 25 a um hi. ICM ah hun matna chu Rajya Sabha MP leh President, National Cooperative Union of India (NCUI) ban ah Chairman, National Council for Cooperative Training (NCCT) le hi Dr. Chandra Pal Singh Yadav in President hina tawh uap in Secretary, NCCT Mohan Kumar Mishra, Registrar, Cooperation L. Nabakishore Singh leh Joint Registrar, Cooperation Michael Bepol Lamkang te’n Guests of Honour hina tawh a uap chiat ui.

SSA TEACHER TE’N ZEO OFFICE KAM
Thoubal, May 12 (Nisin Thuhiltu): All Manipur SSA Teachers Association, Thoubal branch ah member te’n tha 8 law pedawk ding ah phûtna nei in ZEO Zone III office ah kawt chabi a kam ui. District sung in a kigawm ah SSA teacher 215 a um a, amau sai chun tha 8 lam law la talo uh hi’n association Thoubal branch ah Joint Secretary, K Goutam in a gen hi. Zia tawh kisai a hin minister pang ah authority te tawh kihona a la um ta maleh taksua hilo hi’n le a gen hi. Chun, association branch in meeting a neina ah thupukna a lak dungzui ah ZEO Zone III office khak ding leh teacher te’n a nasep uh a chawlsan phawt ding uh hi’n le a gen hi.

DM COLLEGE SOUTHERN GATE SUKSIAT A UM
Imphal, May 12 (Nisin Thuhiltu): PCTC petrol pump kiang a um DM College campus southern gate lui mama ta chu AMSU volunteer te ban ah college student te’n a khensiau hi. Student te’n gate chu siamphat ding ah authority te kiang ah dawtna siam himaleh a limsak lo ziak ua kiphinna dan ah gate chu a khetsiat uh a hi dan a puangdawk ui.

1ST RENEWAL FORM LAKTHEI
Imphal, May 12 (Nisin Thuhiltu): Council Of Higher Secondary Education, Manipur (CoHSEM) in thusua a bawlna' chun, Ministry of human Resource Development, Department of Secondary & Higher Education, Govt. o India in a sai, "Central Sector Scheme of Scholarship for College and University Students" nuai ah scholarship dawng te a ding ah academic session 2016-17 a ding 1st renewal form chu CoHSEM Office, Babupara, Imphal ah lakthei ding leh June 20, 2017 tiang in Dr. M.Bidyasagar, Secretary, CoHSEM, Manipur kiang ah piaklut thei ding hi'n a gen hi.

JUNE 4 LEH WRITTEN UM DI
Imphal, May 12(Nisin Thuhiltu): Kereilhouvi Angam, Principal Chief Consevaor of Forest & HOFF, Govt of Manipur in thusua a bawlna a chun, Forest Department nuai ah Range Forest Officer (Direct Recruitment) post a ding ah writen examination chu a hung tung ding June 4, 2017 leh um ding leh zia na ding ah admit card chu May 22 a pat June 2 sung in 10:00 AM - 5:00 PM kikal a Forest Head Office, Sanjenthong ah lak thei ding hi'n hiatsakna a bawl hi.
 
1 DAY WORKSHOP UM
Imphal, May 12 (Nisin Thuhiltu): Rural Development & Panchayati Raj Department, Government of Manipur saina nuai ah tuni’n Classic Hotel, Imphal ah ‘Mission Water Conservation-Natural Resource Management under MGNREGS’ tawh kisai in 1 day workshop a um hi. Zia hun chu Chief Secretary O. Nabakishore Singh; Chief Conservator of Forests, Govt. of Manipur, D.J. Anand; Undersecretary, MGNREGA Rajeev Sharma; Deputy Secretary (RD & PR) Valentina Arambam leh Secretary (RD&PR), Sumant Singh te’n Chief Guest ,Guests of Honour leh President hina tawh a uap chiat ua, Pankaj Shrikant Duberkar, Project Executive Alternative Technologies, MGNREGA Division,MORD, Government of India leh Sonal Kulshrestha, MORD te’n resource person hin atawh a uap ui. MGNREGA ah undersecretary, Rajeev Sharma in MGNREGS scheme leh water conservation kizawpna taklang kawm in scheme khat chu mangcha kawm ak scheme dang te le phatchuampi ding hi’n a gen hi. Resource person, D.J.Anand in tui chu hinna leh hinna chu tui hi ah gen kawm in mihiam hinna chu 70% tui ah kisiam leh khawvel ah food security a um thei ziak chu mihing te ziak hilo in tui ziak hi zaw in a gen hi. Chief Guest hina tawh uap, Chief Secretary O. Nabakishore Singh in water conservation chung chang ah pan lakna chu grassroots level ah pat pawimaw a sak thu a gen a, teltin a um mipi palai te kiang ah water management a ding technique thak mang ding ah dawtna siam ding hi’n le a gen hi.

GOVERNOR IN KIPAKTHU PUANG
Imphal, May 12 (Nisin Thuhiltu): Manipur Governor, Dr. Najma Heptulla in a chiata May 10, 2017 ni ah JAC Against Anti Tribal Bills (JACAATB) in Manipur State Government tawh kinawptuana a nei uh leh Bills 3 ziak ah kum 2 ting ta vang kiphinna a nei uh a chawlsan uh chu kipakpi mama a hi dan a phuang hi. Governor in tha masa khan mithi chu vuidawk ding leh a buainau suk veng na ding in democratic tak ah kihona nei ding in chialna a la bawl ta hi’n le a gen hi. JAC in May 25 ma ngei ah mithi te vui ding a nawp chu kipak a hi dan le a gen a, hun sawttak a la kivei zia buaina suk venna ding ah panla, State Government leh JACAATB leader te pâkchat thu le a puang hi.