Nisin Thuhiltu - 12 May 2017

User Rating: 0 / 5

Star InactiveStar InactiveStar InactiveStar InactiveStar Inactive
 

*ADCC CHAIRMAN IN EM OFFICE DING HAWNG*  
Lamka, May 11 (Nisin Thuhiltu): Khaipao Haokip, Chairman, ADC, Churachandpur in tuni sunnung dak 2:00 in ADC Churachandpur ah Executive Member, Seilenmang office ding hawnna a nei a, Upa Thangpu, Local Chairman, ECA Khousabung in Pathian kiang ah latna a nei hi. Seilenmang in thugenna a nei na’ chun, Pathian leh mipi te dawisakna chang ah teltin ah a um bep hilo ah ADC, Churachandpur ah Executive Member dinmun piak ah a um chu kipak mama hi’n a gen a, maban ah nasep ding chuam chuam um te chu lawting tak ah mipi’n a phatchuampi thei ding ua sepdaw a hi thei na ding ah kuamasap in kithuapina pe chiat ding in le chialna a bawl hi. Office hawnna hun chu ADCC ah Vice Chairman, Khaikhanmung, Executive Member dangte leh MDC hunkhawp ban ah Soiminlian Lengen, MCS, CEO/ADCC te’n le a uap ui.

*GRASSROOT FOOTBALL COACHING PAN DI*
Lamka, May 11 (Nisin Thuhiltu): The Shepherd’s Football Academy in tunung sawtlo ah naupang kum 14 leh 17 nuai te a ding ah Grassroot Football Coaching pan ding a hi. Football coaching a pang nuam kum 14 leh kum 17 nuailam lunglutna nei te’n May 13, 2017 a pat May 17 sung in UDH Near Police Station leh Emphraim Comps, IB Road ah registration bawl thei ding a hi. Coaching a pang te chu nek leh chak hawitak ban ah a thawn ah Jersey le piak hi ding a hiu a, All Indian football Federation (AIFF) Guideline dungzui ah ziltil hi ding a hiu. Grassroot football coaching a hileh tha 1 course hi ding a hia, course fee Rs. 2,000 a hi ban ah course 1 a hin Under 14 leh Under 17 ah mi 25 chiat lâk hiding a hi.

*NI 3 UM DING BOOK FAIR KIPAN*  
Lamka, May 11 (Nisin Thuhiltu): World Christ Ministry, Chennai in ni 3 sung dai ding Book Fair chu tuni’n Synod Hall, IB Road ah a hawng pan hi. Book Fair ah Bible chi chuam chuam leh hilchianbu, Study Material chuam chuam, CD, Gift Item, Key Chain, naupangte lunglut thei ding lekhabu chi chuam chuam ban ah Second Hand Lekhabu le tamtak chawk thei ding ah kawi in a um a, lekhabu zosia chu a man kizik sang ah percent 10 leh 20 kikal niam a zuak in a um hi. Tuni mai in le lekhabu hunkhawp zuakdaw in a um hi. World Christ Ministry pawl in a hileh 1999 kum in Lamka ah ziagual Book Fair a la sai kha ta, tukum in Senapati ah nei zaw in Imphal ah sunzawm in zia zaw a chu Lamka a um a hi. Chun, hun lemchang a um leh October tha a le Lamka ma ah sai hikit ding in a kigen hi.



*CERTIFICATE PELUT DING AH HIATSAK*
Lamka, May 11 (Nisin Thuhiltu): DC Office, Tuibong in school naupang Financial Assistance dawng tei ding te kiang ah hiatsakna a bawlna’ chun, Secretary, National Harmony for Communal Harmony, New Delhi kiang ah document pawimaw chuam chuam piaklut a ngai ziak in Churachandpur District sung ah National Foundation for Communal Harmony nuai ah kithuapina, Financial Assistance dawng kha school naupang te’n a kin theilam ah Reading Certificate, Progress Report leh Income Certificate pelut ding in a gen hi.

*NEW DELHI AH KIPHINNA SUTZAWP A UM*  
Lamka, May 11 (Nisin Thuhiltu): Jantar Mantar, New Delhi ah sit-in-protest leh Salphate sûnna chu zani nitak ah sutzawp in a um hi. Thutut kimu dungzui in zanitak ah chiakhawm te’n Manipur sawlkal leh JACAATB in Memorandum of Understanding (MoU) suai a kai uh chung chang genkhawm in, kinawptuana, MoU ah thuthun te chun Salphate dikna leh gam humbitna ding ah Constitutional Safeguard kichian, ginâ leh detdo bithiak leh seppiting ding ti te umlo a hi ziak ah may 25, 2017 masang ah thiluang vuidaw ding ah kinawptuana a nei uh chu pawmlo a hi dan suklatna ding in MoU copy halna nei uh hi’n a kigen hi. MoU a chun gam humbitna ding tawh kisai ah provision bangma a um lo bep hilo in JACAATB in a bul a pat a la tângkopi, Separate Administration chu bang gual bep a hi em ti’n le dawtna a bawl ui.



*POLICE TRAINING CHIA THA ZING*
Lamka, May 11 (Nisin Thuhiltu): Lamka, May 10: Churachandpur SP, Rakesh Balwal, IPS panlakna ah Tuibong Peace Ground ah Mob Control/Mob Disperal training chu chiatha zing in zani a pat in 2nd batch te’n a nei zawm ui. Training hun ah Civil Police (male), Women Police leh Village Defence Force (VDF) personnel te a pang ua, amau chu training ding tawh kisai a April ah Special Training lâ Personnel 5 in a hil ui. Zia hun a chun, tîngpum (lathi) leh phaw (shield0 mat ding dan leh mipi tawh kinawktuana a um phatleh pan lak ding dan ban ah mipi kitawm te thagum sualo hial ah nawzâk ding dan zilsak in a um ui. Lhunkhomang Khongsai, Additional SP (Law & Order) in thuthak lakhawm te a kimupi hun a chun, tu a hin Churachandpur police in mipi kiphi te nawzâk na ding vanmat (Riot Gear) leh force kining ting neita hi’n a gen a, van mangtu ding te kiang ah a mat ding dan hilna chiatha zing hi’n le a gen hi.



*V/A TE’N A PIAKLUT UH PAWIMAW*
Lamka, May 11(Nisin Thuhiltu): R.Sudhan, IAS, DC/CCpur in thusua a bawlna a chun, National Food Security Act nuai ah Rationing Agent leh S.K Oil Sub Dealer tawh kisai in Registered/Recognised Village Authority te’n amau khua chiat ah kum 2017-2018 sung Rationing Agent leh S.K Oil Sub-Dealers zosia’n May 15, 2017 tiang ah a submit uh pawimaw in hiatsakna a bawl a, zia tawh kisai a chu  form format siamdaw ah um a hidan le taklang in, Village Authority te’n DSO/CCpur kiang ah lakthei hiding in a gen hi.

*HONORARIUM LAKTHEI*
Lamka, May 11(Nisin Thuhiltu):  Churachandpur District TB Centre ah January 1, 2016- December 31, 2016 sung sung/kikal ah TB damdawi diktak leh a hi ding gual ah  damdawi nezo a dampihte (course completed/cured) leh damdawi hawmtu (DP) te’n TB office ah office hour sung in Honorarium/Incentive ngaiven thei ding a hi. Zia Honorarium/Incentive lakna ding a chu damdawi netu (patien) te’n I-Card chawi ngai ding leh DOTs Provider (DP) te’n duplicate card leh revenue stamp 1 a chawi uh ngai ding hi’n Dr.T. Pumzathang, Dist. TB Officer in hiatsakna a bawl hi.

*FOREST DEPTT AH WRITTEN TEST*
Lamka, May 11(Nisin Thuhiltu): Kereilhouvi Angami, Principal Conservator of Forest & HOFF, Manipur in Forest & Environment Department  Manipur nuai ah Range Forest Officer ah semding direct recruitment written exam chu June 4 leh um ding hi’n a taklang a,  candidate te’n May 22, 2017 a pat June 2, 2017 sung zingkal lam dak 10:00 a pat nitak lam dak 5:00 kikal ah Forest Head Office, Sanjenthong, Imphal ah Admit card lakthei ding a hia, Admit card ah exam centre leh a hun (time) kizik ding hin a gen hi.

*EXAM CENTRE KIANGNAI TUAM AH 144 CR.P.C. PUAN AH UM*
Imphal, May 11 (Nisin Thuhiltu): District Magistrate, Kakching District Th. Kirankumar, IAS  in dated, 8th May, 2017  ni order a sua dungzui ah  BA/BSc/BCom/BTT/BFT/BSW 2nd/4th/6th Semester examination, 2017  umna ding mun Kakching Khunou College, Kakching Khunou leh  Kha Manipur College, Kakching ah umna kiangnai 100 meter huap sung ah sub- section 2 of Sec. 144 Cr.P.C. of 1973  puan ah um chu tuni a pat mat pat in a um hi. Zia dungzui a chu 09.05.2017 to 07.06.2017 sung ah nisin leh zingkallam dak 8:00 a pat nitak lam dak 5:00 kikal ah examination um sungsia Prohibitory Orders  chu mat hiding a hia, himaleh Government Officials/machinery te banah exam tawh kisai ah official te leh District Magistrate, Kakching District leh SP, Kakching District chu huap sak hilo ding a hi.

*MANIPUR SCIENCE MEET, 2017 KIPAN*
Imphal, May 11 (Nisin Thuhiltu): National Institute of Electronics and Information Technology NIELIT, Akampat ah tuni’n  Manipur Science Meet, 2017 a kipan hi. Manipur Science Meet, 2017 chu  ni 5 sung um ding a hia, Manipur Science & Technology Council, NIELIT leh organisations dang 4 te’n  Department of Science and Technology, Government of India nuai ah organised a bawl uh a hi. Secretary of Science & Technology, Manipur leh mitamtak te’n inaugural function a uap ua, thugentu tamzaw te’n Science research lam ah taksapna liantak um in a gen ui.  Chun, State Science Communicator award le Dr. Chungkham Indira, teacher Johnstone Higher Secondary School kiang ah piak in a um hi.

*TRUCK IN STUDENT KHAT PHULUM*
Imphal, May 11 (Nisin Thuhiltu): Yairipok Khoirom  ah tunitak lam in kum 14 mi student, tuition class ding ah chia chu truck in a phulum hi.  Thina tuak chu Antarctic English School ah class X student SM Rukaiya, d/o Abdul Barik of Phouden Moirangpalli hi ah hiat a hia, accident na mun ah thingal a hi. A langkhak lam in truck driver chu a kiangnai police station in a ki surrendered hi. A kigendan ah student SM Rukaiya chu Actuva gari tai a hia, lampi truck in a gari tawh a phut khak a hi.

*LOKCHAO ATTACK AMAU KHUT NUNG HI AH UNLF IN TAKLANG*
Imphal, May 11 (Nisin Thuhiltu): Proscribed group UNLF in tuni’n  May 8 ah Imphal-Moreh lampi Lokchao area ah Territorial Army 165 Bn te attack kibawl chu amau khut nung a hidan a taklang a, UNLF. army wing in Manipur Peoples’ Army (MPA) team in attack a bawl uh a hidan taklang kawm in revolutionary movement chiapina chikhat hin  le a taklang a, Thina tuak te Manipur mi ngawn a hiu chu maksa a hidan uh le a gen ui.

*TDMCDC IN GENERAL STRIKE LA DAWK*  
Imphal, May 11 (Nisin Thuhiltu): Thoubal District MP Candidature Demand Committee (TDMCDC)  in Thoubal leh Kakching districts ah zani zingkal dak 5:00 a pat huntiam umlo kiphinna (general strike) a pat uh chu, tuni’n a chawl san ui. Kakching ah Demand Committee chief convenor Y Thambal in thuthak lakhawm mite kiang ah a genna a chun, BSc, BCom leh BA exam bawl te leh nisin ah nekkawm hawl te khualna ziak ah general Strike chawlsan ah um hin a gen hi. Hiatthei khat chu - Manipur ah Rajya Sabha seat khat umsun luatu Haji Adbul Salam a mualliam nung ah May 25, 2017 leh a thasang ding telna bye-election um ding ti a hi tawh kitawn ah  TDMCDC in Thoubal leh Kakching district a pat candidate khat pen pen Rajya Sabha seat piak ding ti demand  a bawl uh a hi. Thoubal district ah Assembly constituency - Heirok, Khangabok, Wabagai, Kakching, Hiyanglam leh Sugnu banah Jiribam district assembly segment ah mipi te chu parliamentary (Lok Sabha) elections um hun ah vote khia hi sek himaleu zia constituency te a pat chu candidate a um ding uh phal a hi seklona chung ah Rajya Sabha seat awng piak ding ti paulap ah nei le a hiu.

*MEITHAL NUNGPIAK DING AH NSCN-IM IN PHUTNA NEI*
Imphal, May 11 (Nisin Thuhiltu): National Socialist Council of Nagaland - Isak-Muivah (NSCN-IM) in 36th AR te’n  May 5, 2017 ni Jalukie Town ah Asalu Zeliangrong Region Administrative Office raid a bawl uh chu nasatak in demna a bawl a, cadre 2 banah civilian 7 a mat uh chu khawk a sakthu’u taklang kawm in meithal leh meichang a matdaw’u zosia chu nung piak kit ding leh mat ah um cadre leh civilian te le thasuak ding in phutna a nei hi.