UPDATES:

S5 Box

ZOGAM.COM Login

MZWA FRESHERS' MEET 2016

MZWA FRESHERS' MEET 2016
Reported by: Thangkhenpau Guite
From Ground Zero

August 15,2016 pen kumdangte banglou in khua pha a, huihsiangte nung heuhheuh in khohun nuam mahmah hi. Mumbai khopi leh asehvel a om Zomi te ading in leng tuni hun pen nithupi leh poimoh mahmah khat ahi.Dak gingzah enkawm in kaki sa meng meng a,a hunma ngei a tun sawm in kakipei hehu mai hi.India in British te khut a pan mahni kivaihawmna zalenna amuh nung a kum 70 chinna Independence Day lawm ding a kisa khawl chauh leng ka hi kei a, Mumbai Zomi Welfare Association in kumteng a asai, melthakte vaidawnna hun Freshers' Meet 2016 zangding kithalawp a om maimai theinawn lou kahi zaw hi. Kindeuh a kisa in ka lawinu leh ka tapa toh Mumbai Local Train a tuanding leng lunggulh lou in Taxi kala ua, Western Express Highway tawn in Meet neihna mun ding Asha Kiran Hall, St Pius College Campus, Goregaon East, Mumbai lam manoh in kaki khohtou viahviah mai uhi.

Sun dak 12:00 ginma deuh in amun ding katung tou uhi. Amun katun in Organising Committee etkaina nuai ah tuailai fel leh kizen mahmah ten kikhopna munding mansa diam in ana cheimawi khinta uhi. Hall sung kava lut a, sound system checking ana neihlaitak uh ahi a, ana buai cherchuar mai uhi. Amai lam a kava pai phei leh MZWA Chairman Pa Capt (In) Lalsuonglien Tonsing, traditional dress a naldeuh a kichei toh kava kimu kha ua, chibai kaki buk uhi. Huchi kawm kawm in Mumbai a Zomi Artist omten stage tung akipan devotion la hoih deuh maite honsa hiau hiau ua, honsu thathou mahmah uhi. Akong lam khatvei kava pai khe nawn a, Hall kong a red carpet a limkilakna ding background banner naldeuh a kibawl ana lemkhawm te kava tuak kha nawn hi. Naupang te bang inleng nuamsa in alang alang ah ana kidelh hehu mai uhi.
Hiai hunzang ding a hongkuan lawm-le-vual, u-le-nau, nu-le-pa bangzah hiam toh chibai kibuk kawm a hall kong a ka omlai in, "Pat hunta ei, honglut ta uau", chih aw ushers lam apan kaza guih a, hall sung ah kindeuh in ka lutta hi.Hiai pen hun masa FIRST SESSION zatna ding ahi. Ka lut phet leh Meetiing Conductor Pu Seilun Mate in mipi te mai a hunzat didan anapuan laitak ana hi a, tutnate ka etkual leh maizen!!! Katheih louh kal a tutna ding tangkhalou dektak ana hi kahih lam kaphawk khethak a, kindeuh in kakiang a tutna awng ah katusuk pah hi. Nu Nempi in hun honna thumna honneih khitphet in MZWA Band makaihna nuai ah la KATAN VUALZAWLNAchih nuamtak in kisa ziahziah hi. Lasak nuam mahmah a, lapitu te kipiak zohdan leh a zeidan te un hon kithalawp sak a tha honguan mahmah hi. La ichih thu hi a, ahi di bang tak a sakkhiaka omchiang in athu a genthoh sang inleng lungsim sukha baih zaw a, lungsim nopna tun pahpah thei in mi hip zaw hi. Mipin leng lasak nuam kisa mahmah a,biakna hun nuamtak kizang khawm thei hi.

Tv Lalhmangaih Hauzel, Co-ordinator in Welcome Address na hun manphatak honla a, tuni a hiaibang programme zang dinga hongpai khawm adiak in Fresherte ban ah mipite ana vaidawn ahihdan taklatna honnei hi. Mun gamla pipi apan paikhawm mipi te a pahtak thu leng taklang hi. Huai kawmkawm in kikhopna Hall pen akikhelh thoh ahihna toh mipiten discipline neitak a zang siam ding leh, kuamah hunzat sung a, apolam a mawkvak thang louh ding deih huai ahihdan hon gen hi.

Limlak No.1: Kizen leh fel mahmah melthak khenkhat te lim ban ah Miss & Mr dia tel a omte lim a hi.

image003

Mr.Seilun Mate, Conductor in Fresher tuni a hiai meeting adia hohkha teng sapkhiatna leh amaute a ding a

thumsaktu ding Pastor M Thangkhenmung sapna hun honnei hi. Ka na simleh Fresher tuni a hong paikhawm thei mi 23 a pha uhi. Pastor in a hun honla a, Fresher te adia thumna lungtunhuaitak mai, a hong paina san uh subuching thei ding a ludam chidamna leh thil tuamtuam asubuai thei te lak a kipan venbitna leh huaimai hilou a khotang adia etton tak leh saptuam ading a mizat tak thupitak hongsuah ding uh deihsakna in Pathian kiang ah thumsakna na nei hi. Huaikhit in Ms Jenifer Hmar in Mumbai Hmar Welfare Association ai-oh in la siamtak mai in hon sa hiahhiah hi. Hiai hun zang ding a chial a om Mumbai pansan a pawl pi tuamtuam om unaute lak a hongkihel thei omsun ahihziak un kipahna chiamteh ahi. Huaikhit in Joint Youth Choir ten Pathian phatna la kilawmtak honsa liahliah uzaw nuam khatel ngal ei!!! Mumbai khopi a om tuailai te kipiak zohna thupi petmah a theih in om hi. Kisakkholhna omlou in lah hichituk a siam in asa theisin ngal kei ua!! Gimletawl khoksa lou a, lazil na ding a tha le zung ana seng ahihna uah phattham ching leh ettontak ahi uhi.
MZWA Chairma Capt (IN) Lalsuonglien Tonsing in Exhortation Speech hun honla a, MZWA hong kipat khiak dan leh atup leh angim te pulakna hon nei masa a, tulel a Executive Member te leh Office Bearer te ban ah Advisorte mellahna leng honnei hi.

Limlak No.2: Joint Youth Choir of MZWA presenting special song
image005

Limlak No.3: Nu-le-pa leh naupang te pupa lam zangta lam ding a kisaklaitak ahi

image007
Aman agendan inma lam in bel Zomi Welfare toh kisai himhim Mumbai Zomi Chrisian Fellowship nuai ah department khat in ana om a, himahleh saptuam bang leng punbeh zel ahihna toh kivaipuakna lemtang zaw ding gelna in independent welfare body khat Mumbai Zomi Welfare Association pen dinsuah in om chi hi. Hichibang Freshers' Meet pen 2005 apan ana kisai touden ahihdan leng hon gen hi.
Aman hasotna thugen manphatak mai melthakte ading kia hilou in kuapeuh ading a poimoh thu tamtak tomkimtak in genna honnei hi. Hihding leh hihlouh ding pilhuai mahmah thu te hon gen hi. Kuapeuh in I omna san (purpose) leh I mohpuaknate (responsibilities) te theisiam a, kuhkaltak a ipan leh lohchinna in honzuiding ahihdan leng taklang hi.Tulai khovel siamna asan dungzui a hong piangkhia thilte leh vanzatte, social media facebook, whatsapp etc.etc te azat dan siam a, fake identity khawng zang a utut khawng post mawkmawk louh ding ahihdan leh whatsapp khawng zang a kihou hou a , mahni mohpuakna leng ngaihsak louzen a omtheih ahihdan leh huai in lohsapna hontun ding ahihdan gen uang mahmah hi. Captainpu thugen lai in mipin nuamsa mahmah in dak heuhou mai uhi.
MZWA Quartet apan la ngaihnop huai mahmah ngaihkhiatna kinei nawn a, hiai zoh in Upa T Roumuan in hunkhakna thumna honnei a, hiai tuh First Session beina leng ahi.

Limlak No 4: Cultural Troupe , Traditional Dress leh Jenifer Hmar presenting song

image009
30 Minutes Breaks sung in singpi dawnna leh Red Carpet tung a limkilakna hun nuamtak kizang hi. Organising

Committee deihna bang in hiai limkilak na pen fund rise nadan a bawl ahi a, khatvei click Rs.50/- pia in inkuan bang, mimal bang ahihkei leh nungak leh tangval bang kilak theih hi. Hiai hunsung in limlak theihna tuamtuam te phal hilou a, hiai ding mawng a kisam professional photographer te chauh in limla thei uhi. Asai tuten apoimoh leh editing bawl in limkilate aneitu kiang ah mobile number leh email address zang in khaksawn ding uhi. Mipi ten discipline neitak in ki support a, kuamah ahih buai vengvung leng omlou in limlakna hoihtak in paithei hi. Huchih hunlai vel in kenle ka Camera tawi kala khia a," kei a discount om ahi, a free leng hithei ahi" chiin ka utut kana banlak suk zialzial mai hi. Nuamthou eive!!!
Usher lamte akipan " Hun nihna kipan ut nawnta ahi, honglutta un" chih aw ging kaza a, time ka etleh 3:00 pm ana hita hi. Limla a kipei nuamsim mahleh hun nihna SECOND SESSION zang ding in Hall sungah kalut nawnta hi. Hun masa sang in mi anatam zaw tham a, last line bang ana full khinta ahih man in alailam ah kapai tou a, kava tutei nawnta hi.
Master of Ceremonies (MC) Mr. K Damsuanmang leh Mrs.Ngaihboi in hun honla ua, siamtak mai leh zei mahmah in amau leh amau introduction hongki bawl in hun honpan ta uhi. Inlam buaina ziak a honna mualliamsan ta salpha mihangsante theih gigena leh sunna hun Pastor K Robert Samte leh MZWA Band te makaihna in kinei hi. Lung khoih huai mahmah hiai buaina hongkipatdan, athuakdan uleh a doudan uh leh maban a panlak didan kikupna thugente bang visual show honthuah kawm ua, huai kawm in la lungkhoih mahmah mai SALPHA NGALLIAMchih la, MZWA Band lasiam ten honsa uzaw chimul bang a thou a, a khasiat huai ngei mai!!! Gam leh nam hihna humbit ut in salpha mihangsan ten amau hinna ana lanta uhi

Limlak No 5: Pastor Robert Samte praying in remembrance of the departed soul of SALPHATE

image011
Pastor Robert K Samte in thumna honnei a, gam leh lei neitu Pathian thilbangkim hihthei hatna toh salpha te sisan

athawn mai a luang lou ding ahih dan thumna lungtun huaitak honnei hi. Gamlei neitu Pathian ei a ding in a hausa hi. Gamlei huaikhawm ding in khangthakte kisa ni. Kagam in kei ading in bang honpe ding hiam chih sang in kagam a ding in bang kapiak theih omdia chin hanchiam thak ni.
Limlak No 6: MCs interacting with freshers by posing challenging questions

image013
Masters of Ceremonies te makaih na nuai ah Fresherte self introduction, min, omna, koi akipan leh bangsem ding a

hongpai chihte gensakna om a, huaiban ah tulai toh kituak mahmah dotna te leng dot in om ua, fel tak leh kizentak in dawng ziahziah thei uhi. Khat in dotna a dawnna hoih mahmah hi." Kei polictics a lunglut mi kahi a, MDC atel ching in omleng kahih masak ding point thumte: Lampi siate kabawl hoih ding a, nekguk takgukna thilchin hoihlouh omte ka doudal ding a, kituahna omtheihna ding in pan kala ding" chi hi. Hiai in tulai igam dinmun honmusak mahmah a theih in om hi.Hiai hun ah Freshers' Miss & Mr telna leng omngal hi.Freshers'Miss ding in Miss Chiinmuankim leh Freshers' Mr ding in Mr John Hangkhanpau te telkhiat in om uhi.
Fresherte mellahna zoh in Pa Roumuan in gamngaihla VANGSEL ZOLEI HING E chih la honsa a, mipite'n nuamsa in sakpih dupdup mai uhi. Projector apan video clip bang ettheih ding in hon bawl ua, hiaila in lung honkhoih kha mahmah hi. Kon it chi uh kon ngai chi uh, tak in simthu na sang ing, hizong kavang ningzou nuam uh, vangsel zoulei hing e!!! Amah ahihleh igam inam vei mahmahte lak a khat ahih ban ah, tatsatlou a inlam a buaina thu toh kisai a Pathian ana buan leh biakna kikhop na hun a leng thumna point a telsak zou gige khat ahi.
Social & Cultural Dept te saina nuai ah Traditional Dress a naupangte kizemsak in show na om a, naupang neuchichik te toh nungak tangval te stage tung ah hongpai khawm ziahziah mai uh zaw etlawm in nalh thei mahmah uhi. Huaikhit in naupangte nu-le-pa te toh stage tung ah traditional dance om nawn a, kuapeuh phulthei mah mah in kilam dudup mai hi. Hiaite khit in Bamboo Dance show na nungak leh tangval ten honnei nawn ua, a etlawm in pahtak huai mahmah uhi. Pianna gam ngaihna puangsak a, tuan a pilepu tawndan kepbitna manphatak ahih man in, ngaihnat huai mahmah hi.

Picture No7: Cultural Troupe of Mumbai Zomi Welfare Association with children

image015
Education Department saina in MZWA Excellence Award 2016 omding chih himahleh tukum in hiai award sangthei

ding omlou hi. Mailam hunte ah hiai excellence award sangthei diing a siamsin naupangte kisiakding a ngetna bawl kawm in, hiai Award in ahuamkhak pen suklet hiding a, Academic Excellence chauh hilou in field tuamtuam apan leh society adia mi etton tak te bang leng huamsak hita ding chi'n Education Department apan thupuan leng omhi.
Comedy Time ah Alian leh David makaih in spelling bee kidemna honnei uh zaw kawngna zen anui bangzah hiam om uhi. A word te bang haksa thei mahmah ahiding a, calculator bang zat ngai chihdan ahi. Kikhop khawmna asu nuam mahmah a, lei theihlouh damtheihna chikhat a thawn a hawm ahih man un pahtak huai mahmah uhi.A kallak teng in artiste Lunniang Phiamphu, Andrew Lulun leh fresherte apan inleng ngaihkhiatna kinei hi. Hun nuamtak mai zat ahih lai in, hun le nite ana pailiam zel a, theihlouh kal in nitak ann nek hunbang ahong hita mawk hi.
Co-ordinator Lam David Shingto in kipah thugenna hun hon la a, kuapeuh tanmun neite hi in mipite hita leh hiai hun zang ding a hongpai fresherte tengteng tung ah organizing committee sik-le-tang in kipahthu hongen a, banghiam hihdia kilawm hihkhaklouh leh maihkhak a omleh leng ki ngaidam ding in ngetna bawl hi. Executive Member Pa Ginminthang in tawpna thumna honnei a, hiai tuh hun nihna khakna leh Freshers'Meet 2016 khakna ahita hi. Hiai Freshers' Meet zang a paikhawm mi 200 vel apha hi.
Organising Committee te lemgelna leh mipite pankhawm siausiau na ziak in ankuang luina leng kinei thei a, kuapeuh mah in gilvah sa in inlam kizuan chiat ta hi.Khiaklah huai mahleh hun in honpai liamsanta ahihman in freshers' meet nawn chiang a kimuh ding lam en in kikhen thang ta uhi.
Limlak No 8: Freshers' Meet a paikhwm mipiten ankuang umna neikhawm uhi

image017
Tutung Freshers' Meet a chiamteh tham thil khenkhat:


1. Mipite kithu tuahna lian a, panmun leh tanvou te ngaipoimoh in thalawptak in na sem uhi.
2. Pathian hing nei namte ihihna toh kizawi tawn in kikhopna siangthou a, zawlla sa hiam ahihkeihleh la ginalou chik khawng sa a kikou khat leng omlou hi.
3. Usherte chihna munmun ah thumangtak in mipi te tutheita uhi.
4. Social gathering pian himahleh zukham sakham a buaina bawl chihte omhetlou hi.
Kuaten bang gen:
" Ikithutuahna te uleh ikipiakzohna te uh thupi lua, hici di dan mah ahi"
– Lam David Shingto, Co-ordinator

" Kithutuahna, pankhawmna leh itna in MZWA hongdim hen"
-Pa Lalsuonglien, Chairman MZWA

"Program nuamtak ki miss kha eizel ve...."
-Liangousang Vualnam, Information Secretary, MZWA

KHIAKLAHNA LA:
Lawm le vual lungkituak a, nuihchiam lellai hunte;
Sulkik lel lou ding khangchiang a luang deldel Arabian tuipi bang,
Amual zatam kan in lenmual na khumta maw,
Ngilhi omlou ding hichia lenkum zatam kivei zong leh!!!

Laukha selou aw! Lailung zuangsam lou aw!!
Luankhi nul sawlbang bangta ni e!
Lenkil pan tung sunni leh solkha te hongtan chiang
Nunnop lenlai nite ngaihna thelbang thouding hi e!!!

Organising committee of the Freshers' Meet 2016
MZWA Executive Meeting July 15, 2016 deihna bang in anuai ate Organsing Committee for Freshers' Meet ading in guan in om uhi.
Co-ordinators: Tv Lam David Shingto leh Tv Lalmangaih Hauzel
Committee Members: Ng Catherine Vungremmawi, Tv B.Kapsianmung, Ng.Lunniang, Tv Kungmuanlal Seldou, Ng Ninglunmawi, Ng Chingkhanvung, Ng Biakdik Guite, Tv Vanlallian Vualzong, Tv Ginsuanthang Tombing leh Tv Thiansiam Tombing
MZWA OFFICE BEARERS 2016
Mumbai Zomi Welfare Association panlak na nuai ah kumteng in melthakte vaidawnna kikhop pihna 2005 apan neih hitou zelhi. Siamsinna sangzaw delh bang, sepna kichian nei bang ahih keileh sepna tuamtuam a sembang, nekzonna lam tuamtuama sem bang, kumteng in kibehlap touzel hi. Hichibang a hongpai khawm te toh kimel theihna leh ki tanauna etsakna leh ki kankuah na in hiaibang program te sai in omzel hi. Huaikia hilou in MZWA vaisaina nuai mah ah kumbul lam March 12, 2016 in Annual Sports Meet leng lohchingtak in ana saizouta uhi.
Kum bangzah hiam paita akipan makai masaten Mumbai khosung a om Zomi ten vangsiatna sihna atuah hunchiang ua panpih theihna ding lampi gelna in Welfare Fund omding hoih ana sa gige uhi. Huai ding in Mumbai Zomi Christian Fellowship panlak na in Welfare Committee ana dinsuah uhi. Mumbai a om Zomi member teng kiang ah annual membership fee dong in Corpus Fund khat bawl khia ua, huaite in memberpih vansiatna tuak te ana panpih zel uhi. Hun hongpai zel in mileng hong kibehlap hiaihiai a, ban ah siamsinna toh kisai, khotang toh kisai, pupa tawndan toh kisai, sports lam toh kisai te bang saptuam in ava sai pen lemtang gige lou sakna ziak leh MZCF a member ana hise se lou Zomi omkha teng huamkhak ding ngimna toh hiai Mumbai Zomi Welfare Association pen phuhkhiak in hong om hi. Tu kum pailel ah Corpus Fund pia mi 230 val om a, General Fund pia ahihleh 70 lak vel om hi.
Mumbai Zomi Welfare Association ahihleh 6th February 2016 in dinsuah in ana omta hi.

Limlak No 9: Some of the office bearers of Mumbai Zomi Welfare Association

image019
MZWA Executive Committee in meeting khatveina 16th February,2016 aneih na uah anuai ate Office Bearers ding in telching uhi.
Chairman: Capt (IN) Lalsuonglien Tonsing
Vice Chairman: Upa T Roumuan Paite
Secretary : Pa Joshua Singson
Asst. Secretary: Pa Thangzason Ngaihte
Finance Secretary-General: B. Kapsianmung
Finance Secretary-Corpus Fund: Dr. Liankhanmung Guite
Members: Pa Ginminthang Shoute, Pa Henry L Guite


MZWA Executive Committee in department tuamtuam a panmun lending in hiai anuai abang in tanvou guanna nei uhi.
Information Secretary: Liangousang Vualnam
Assistant Information Secretary: Thawngsonhau Ngaihte
Assistant Information Secretary: Tv George Neihsial

Sports Secretary: Kungmuanlal Seldou
Assistant Sports Secretary: John Sektak
Assistant Sports Secretary: S K Mung Ngaihte
Secretary Social & Culture: Tv Lam David Shingto
Assistant Secretary Social & Culture: Tv Vanlallian Vualzong
Assistant Secretary Social & Culture: Ng Catherine Vungremmawi

Education Secretary: Tv Lalhmangaih Hauzel
Assistant Education Secretary:Tv Thangliansang
Assistant Education Secretary: Ng Lunniang Phiamphu

 

Apoimoh kin thilte omhun chiang a kithuzakna baihsam zaw omtheih ding ngimna in Mumbai leh Navi Mumbai sung a omte Area 6 in kikhen ngal a, hiai anuai ate Area Leader ding in mohpuakna piak ahi uhi.
South Mumbai Area: Pa Kamzalian Tomging

Kalina Area : Pa Henry L Guite

Andheri Area : Nu Nempi Seldou

Mira Road Area: Pa Thangkhenpau Guite

Chembur-Antop Hill: Pa Khamhoumang

Navi Mumbai: Pa N Thangzamang

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING