Guite Road Lampi Bawlhoihna kipanta

User Rating: 0 / 5

Star InactiveStar InactiveStar InactiveStar InactiveStar Inactive
 

Guite Road lampi siatnate MTMRC in Machine tuamtuam tawh bawlhoih panta

By Information & Publicity, Manipur Tribal Movement Road Construction

Lamka, Feb-24: JAC Against Anti-Tribal Bills in Dec 31, 2015 a aphuhkhiak Manipur Tribal Movement Road Construction (MTMRC) in Mizoram leh Manipur kawmtuahna lampi omsun Guite Road siatnate mipi tawh pangkhawm a bawlhoih a sawm uh, tu in nasep kipanta a, zan akipan in Mizoram gamgi tuivai akipan Sinzawl khua kikal ah gamgiak in nasem uhi.

Nasep kipatna ding in Sinzawl akipan km 6 vel ding ah zan (Feb 23) sunnung dak 12:30 in Lalmuanpuia Punte, General Secy, ZoRO GHQ & Ex-President, MZP GHQ in thau kapging in Flag-off nei hi. Hiai hunzang ding in Mizoram akipan S. Dochhuanawma, Secy i/c Information, MZP GHQ; Lalmuanpuia Punte, General Secretary, ZoRO GHQ & Ex President, MZP GHQ; Lalchhanhima Zofa, President, ZoRO Thalai Pawl (ZoRO Youth); B. Vanlaltana, Vice President, MZP GHQ leh SSPP Jt. Hqtrs Aizawl President leh Mizo Students Union makaite telin Mizoram akipan mi 15 vel hongkuan uh a, Manipur Tribal Movement a gupthu uh puang uhi.

Sinzawl khaw mipi tamtak tawh Guite Road bawlna ding Flag-off neih hi a, huaihun zawh in khawsung mipite'n lampi nawl a loupa omte vat siang in, JCB, Bull Dozzer tawh nasep pan ngal uhi.

Sinzawl leh Mizoram gamgi kikal lampi nasatak in kisia a, vuahzuk hun chiang in Aizawl-Lamka kikal passenger service te'n huai mun km 14 tan paisuakna ding in ni 7 sung khawng lut zel hi'n gen uh a, amau mah in gari sawnkhiak a ngaih ziakin passenger ding inleng pasal ngen deih uh hi'n gen uhi. Guite road mun tamzawte kisia a, Suangdoh gam ah leng lampi siatna huaise mahmah chi uhi. Sinzawl mipite'n MTMRC panlakna thupi sa in kipahthu gen uhi. Sinzawl apan MTMRC team te tuzing dak 3 velin Lamka hong tung uh hi'n leng kigen hi.

Mizoram leh Manipur a Zosuante adi'n Guite Road poimawhna haih vual hilou ahihdan, Lalmuanpuia Punte, General Secy, ZoRO GHQ in Flag-Off hun ah gen a, Manipur a Zosuante haksatna leh gimthuaknate, Mizoram mipite'n amau thuak bang a ngai in thuakpih uh ahihdan gen a, Zosuante adia hoihlou Anti-Tribal Bill 3 te apaisuak louhna ding in President of India kiang ah ZoRO in Memorandum pia hi'n leng gen hi. Manipur Government in nelhsiah tak a singtangmite a abawldan ZoRO in puaknatpih mahmah chi a, Central Govt. in Bill 3 te a pomlouhna ding inleng Home Minister kiang ah, November 2015 in Mizoram akipan All Political Partry, All NGOs leh makai tuamtuam te'n New Delhi a a Centre makaite amuh hun un ZoRO in memorandum pia uh chi hi. Guite Road tawh kisai agen hunah, Sept 2015 in ZoRO te'n Lamka a Martyr te galna hogn neihlai un Guite Road poimawhdan nouneltak in gen khinta chi a, Guite Road pen lampi poimawhtak, abikin Mizoram mipite adia poimawh mahmah ahihziakin ahoihtheihna ding dan ZoRO makaite'n leng tamveitak ngaihtuah khinta uh chi a, Mizoram government tanpha ah Guite Road lampi hahsiang ding in machine sawl ding tanpha nget dia ngaihtuah ngei uh chi hi. ZoRO GHQ in Guite Road bawlna ah amau leng pang uh ahihdan etsakna di'n Rs. 5000 pia uh a, JAC nuaia MTMRC in Guite Road bawlna dia pan a lak uh ZoRO in kipahpih in nungthuap ding chi uhi.

H. Mangchinkhup, Chief Convenor, JAC in athugenna hunah, MTMRC in sepsuah masak dia a guan leh atup Guite Road siatnapen Manipur leh Mizoram gamgi Sinzawl-Tuivai kikal bawlhoih masak ding ahi chi a, hiaite poimawhna ziak bel, I lifeline uh zattak deuh a a om ding deihna hi'n gen hi. Tribal Movement pailai a lampi bawl poimawhna agen hun in Zosuan kim-le-kiang a omte tawh kikawmtuah a kitanau zawksem na ding, Ccpur district adia haksat hun a hinna nak ahihman poimawh chi a, Manipur Govt. tung a kinga nawnlou a nenniam a omte mahni khe a ding a panla ding chi hi. Hiai lampi hong hoih leh kikawmtuahna baihlam in ki-unauna hoih zawsem ding chi hi. Sinzawl khaw te'n nasepna zintun a lampi hoihna dia apanlakk ziakun kipahthu gen hi. Hiai Bill te'n India danbupi tawn ding chih himahleh totsaklouh in om a, President Rule koihna ding in JAC in memorandum leng pe ngeita chi hi. Hiai Bill 3 ziaka Manipur singtangmite, I tu-ta te tanpha sukha ding ahihman in ngaihkhawk ding ahi chi hi. Hiai bill paisuak sak hileh population commission bawl in om leh amaute'n a utdan dan in Phaizang mite hamphatna ding in population manipulation (heilamdang) thei ding uhi. Manipur government in Tawndan khat (One Culture Policy) paipih ding ngaihtuah a, huaiziakin tawndan neisa, ei singtangmite ading in athak bawlsak a I zuih ding chih pen pomtheih vual hilou hi'n gen hi. Tawndan leh identity neiloute pen mihing hilou uh chi a, huaiziakin I tawndan leh identity te kepbit poimawh hi. MLR & LR Act kichi zat hileh Lamka khawpi a akizatna mun khua tampite ki khahsuah thei ding ahi chi hi. Huaiziakin unau khat khut kilen a nungtolh lou a kuhkal tak a panlak apoimawhdan gen hi. Zanlam zek in Sinzawl khua ah Manipur Government in Power Station thak hongkhia a, ahihhang in, a honkhiakni in Generator tawh nitak khat a painung, tunitan in pai nawn nailou chi a, Manipur Government in bangziak a electric paitheilou, zawhsiang nailouh, I movement pailel laitak a hongkhia uhiam chi'n dotna bawl hi. Manipur singtangmite kum paisa a khem a I om sek bang un tuhun ah hon khem sawm den lai uhiam chi hi. Manipur Government in singtangmite a ngaihsaklouh ziakin mipite'n lampi kibawl mai ngai hi'n leng JAC Chief Convenor in gen hi.

B. Vanlaltana, Vice President, Mizo Zirlai Pawl GHQ in athugenna ah Zosuante kipumkhatna ding a ngaih poimawhpen hi'n gen a, huai dinga poimawh Guite Road ngai poimawh mahmah uh chi hi. Manipur a singtangmite haksatnate thuakpih in theihtawp a panla ding leh taiselou ding uh chi a, Mizoram Chief Minister kiang ah hiaithu va tun ding uh hi'n gen a, Mizoram gamsung a heutu makai tuamtuamte tawh akimuh chiang un, Manipur buaina tawh kisai atamtheilam hilh in, panpih theihna ding a tamtheilam ngaihtuah pih ding uh chi hi. MTMRC te panlakna thupi sa in kipahpihthu gen hi. Hiai ni, Zosuante adia ni poimawhtak a chiamteh tham ahihdan leng gen a, athu a unauna leh kipumkhatna I gengen uh atak a sepsuahna ni hi'n mu chi hi. Zosuante khangthu ah chiamteh tham ching chi hi. JAC te Aizawl a akuan nuam uleh CM hi in state makaite kimuhpih a ut hun uah MZP GHQ in makaih ding uh chi hi. MZP in atam-atawm thu hilou in amau leng hiai lampi bawlna dia pang uh ahihdan etsakna in Rs. 1500/- pia uhi.

T. Nengkhansut, Finance Secy, Mizo Students Union (MSU) in athugenna hunah Manipur a Zosuante kiang ah a lungtang uh om den chi a, abikin Manipur a Zosuante kituaktak a om ding in ngen a, I kituah leh Meitei te adin zahtak tham ching I hidia, I kituahkeileh manthatna hiding chi hi.Manipur Anti-Tribal Bills 3 lakkhiakna ding in ei sung ah kituahna poimawh masa a, huaizawh in Government of India in khut a liik poimawh nawn a, huaiziakin hiai hun pen hun tomchik a saifel theih ding hilou ahihman in peih sawt in kuhkal ni chi hi. MSU GHQ in Aizawl ah Manipur a Zosuante gupna in protest tanpha nei uh hi'n gen a, Centre Govt. leh Mizoram Govt. kiang ah leng memorandum pia uh chi hi. I dikna leh Rights humbit ding in eite I hangsan huntawk uh chi hi. MSU in Guite Road bawlna a amau leng pang uh chih etsakna in Rs. 1000 pia uhi.

G. Nengdouthang, Chairman, MTMRC in a thugenna ah Road Construction tawh kisai agenna ah, Pu Thathang Langel in JCB leh vanzat poimawh kiphaltak in thawh banah saptuam te'n sum-le-pai tamtak kaikhawm a Guite Road bawlna dia apanlakna uh tung ah kipahthu gen hi. Lampi bawlding dan tawh kisai agenna ah, buannawi teng phutkhiak a nawtmai ding, a kuaknate ah suang leh lei sundim ding chi a, khoubang te leng Sinzawl khomipite'n vat siang uh hi'n gen hi. Manipur Anti-Tribal Bills deihlouhna a Movement paitou lel sutzopna in singtangmite'n nek-le-tak I laklutna ding lampi eimah kibawl in om chi hi. Anai-agamla a om, singtangmi kuapeuh in I lampi bawlna kithuahpih ding inleng ngen hi.

Paul Lalchhanhima, Asst Secy, JAC in a thugenna ah Hiai lampi bawlna san ahihleh nidang hun in Mizoram tawh athu in ki-unauna ding kigen sek mahleh, tutung in ataktak a kipumkhat na ding nasep kipanta chi hi. Huaiziakin Mizoram akipan heutu hongpai te'n leng na pai chiang un hiai message, Mizoram mipite kiang ah na puak un chi hi. Ki unauna hoihsemna ding in Mizoram inleng mawhpuakna nei a, Manipur a Churachandpur district mipite'n leng mawhpuakna nei uh chi a, huai dinga poimawhpen I kizop theihna omsun Guite Road ahi chi hi.

Lalhmachhuana Zofa, ZORO in amah mimal in Guite Road bawlna di'n Rs. 2000 pia a, Laltanpuia Senior Advocate in 'Hmar' nam min adi'n ZoRO makaite tungtawn in Rs. 1000 thawh hi.
>>>>>>>>>>><<<<<
Sinzawl hausapa inn a meeting na

Feb 22 nitak dak 7pm in Sinzawl hausa inn ah khawsung makaite tawh MTMRC leh JAC makaite'n meeting nei uh a, huai hunah MTMRC Vice Chairman in Manipur Government in tunitan Charter of Demands te buching saklou in, gam mipi'n ki pawna mahmah a, huchihlai in Manipur Blockade om chiang a thuak nawkpen Ccpur district ahihziakin Bandh/Blockade om hun a nektak laklutna ding Guite Road bawlsawm uh ahihthu gen hi.

H. Mangchinkhup, Chief Convenor, JAC in August 31, 2015 in buaina kipan a, ILP ahi a chih ziak un singtangmite adia hoihlou ding chih kitheipahlou hi'n gen a, hiai ILP thutun hoihtak a aki sui chiang in Bill pen Act hongsuak leh singtangmite adia hoihlou ding chih chiang sitset ahihdan theihkhiak in om chi hi. Phaizang a tenna ding mun awng a om nawnlouh ziakin phaizang mite'n singtanggam a luah theihna ding uh ngimna pipen a hiai bill hong piangkhia hi'n leng JAC Chief Convenor in gen hi. Singtangmi MLA te'n dalna neilou in paisuak a, dal le uh leng paisuak veve ding chih kichian mahleh a dal louh ziak un boycott puankhum a om ahihdan gen hi.
Theihtawp suah in JAC in kalsuantou a, Manipur Government in kihou ding in ngetna 4vei bawl a, himahleh government in charter of demands a limsaklouh ziakin kihou in omzia neilou ahihdan gen in JAC in tamzawte nawlkhin chi hi. Huai nung in Cabinet in thupukna 3 la a, huaite leng muantak hilou chi hi. Aziakbel, 3 bills ki passed pen Assembly a passed ahihman in cabinet level a khek lamdang guih theih te hilou chi hi.

Si vui ding tungtang ah Martyrs 9 te Manipur Anti-Tribal Bills ziaka si ahihman un thil dangteng sang a Bill 3 te a ki address masak ding ahi chih mipi deihdan ahihman in JAC in mipi deihdan paipih hi'n leng gen a, I buaina hunsung in Manipur government in lam chituamtuam zang in buaina sukveng dingdan ngaihtuah mahle uh Bill 3 te lakkhiak sawmlou in si vui ding lam buaipih uh chi hi. Manipur singtangmite misi vui utlou kihilou in, salpha 9 te'n a sihsan uh bill te a felma vuitheih vual hilou chi hi.

Singtangmite maban ding tawh kisai agenna ah, JAC leh mipi in movement I khawlsan hunhun in Phaizang mite'n hiai bill 3 te apaisuak na ding in panla nawn pah ngal ding uh ahihdan theihchet in om chi a, hiai bill 3 te Anti-Tribal Bill kia hilou in Anti-national bill hi'n leng gen hi. Khenkhat te gintakdan in hiai bill pen lakkhiakna ding i khawlsan hunun in phaizangmi Dan siam tamtak te'n Supreme Court ah President of India hek dia mansa hi uh a, Supreme Court ah hekna pe le uh President in Bill kipawlut te hiaitan a kep theih ding chih omlou ahihman in ut-le-utlou in suai a kaih ngai ding chi hi.

BJP in Manipur ah vaihawm nuam leh singtangmi MLA 19 hiam a ngaihsak ding, meitei MLA tamzaw te chi'n mipite dotna bawl a, huaiziakin I dinmun lauhuai mahmah chi hi.

Hiai I movement uh God's driven movement hi'n leng JAC Chief Convenor in gen a, hiai Bill 3 te politics sang tak kigolh ahihdan genkawm in, Phaizang mite'n theihtawp suah in lam chiteng ah apaisuak dingdan khawlsan lou uh ahihdan kuapeuh in theih dia hoih chi hi.

Naga te'n kingakna ding Nagaland nei ua, Non-Naga te'n innpi ding in Mizoram kinei a, I tawndan leh sakhua kibatpih amau ahihman un Mizoram tawh kikawm tuahna ding lampi poimawhna lian mahmah chi hi.

Singtangmite'n nasatak a pan I lak ziakin Manipur Government leng beidong ta a, khutzat ding zong vialvial in dinmun haksapi ah om uh chi a, Hiai bill 3 te singtangmite deihdan in lakkhe leh Phaizang gam kuangzak ding a, ahihhang in Bill I khahsuah leh I dukdaklouh man I tu-le-ta te'n thuakd ding uhi.

Bill 3 I lakkhiak zawhlouh a singtangmite'n I deihdan I ngah tuankei leh kithutuak in kumnawn election boycott theileng chih lunggulh huai a sakdan leng JAC Chief Convenor in gen hi.

Lianzapau Samte, President, SSPP GHQ:
Hiai bill 3 te'n chi 3 in singtangmite sukha a, khatna ah gam-le-leitang, 2na ah I identity, 3na ah sumsinna sukha a, singtangmite'n election politics tanlel I muhbat ziakin hiaitan ah haksatna tampi kithuak ahihdan leng gen hi.

Local Pastor in athugenna ah, tutung I movement hunsung in lamchituamtuam ah saptuam te' nasatak in pang uh chi a, Sinzawl telin muntuamtuam ah thumna leh anngawl zen in Pathian buan uh chi hi.