Manipur Express - 18 November 2014

User Rating: 0 / 5

Star InactiveStar InactiveStar InactiveStar InactiveStar Inactive
 

Tuikham-lei gina nawnlou: lauthawng huai

Lamka, Nov-17: Ngathal khawtaw Tuitha-lui tunga kibawl Tuikham-lei (suspension bridge) hoih nawnlouh ziakin huai leitung a singpek kiphah khenkhat kekhia in huai lei zuih ngam huailou khopa dengdel hi’n kigen hi. Tuikham leh akim a mite niteng a Lamka hong phate apan kizadan in huai leitung zui a pai n lauthawng huai petmah hi’n gen uhi. Tuikham-lei bel Tuikham area adia Lamka phak theihna ding omsun hi a, zingkal leh nitak in Lamka lutna dingin zang uhi. Sun chiang in student-te’n leng cycle zang in school kai ding in tawn uh a, Diesel Auto a tai theihlouh ziakin Ngurte area banah Tuikham area leh mun tuamtuam a mipite’n haksatna tuak uh hi’n kigen hi.

Tuni’n North East Sports Competition kipan
Lamka, Nov-17: DYASO/CCpur saina in tuni zinglam dak 11:30 apan in Hiangtam Lamka a Community Hall/ Indoor Stadium ah numei leh pasal (kum bikhiah omlou)te’ adingin Rajiv Gandhi Khel Abhiyan (RGKA) Scheme 2014-15 nuai ah ‘Dist Level North East Sports Competition’ om hi.
Huai ah discipline tuamtuam -Athletics; Taekwondo; Badminton; Boxing; Judo; Wushu; Weightlifting; Karate; Archery leh Football kidemna om a, discipline bangzahhiam ah select bawlthawh uhi. Boxing kidemna ah mi a hunkhop tel uh a, kg category tuamtuam ah CCpur ai-oh dingin mi 8 telkhia uhi. Nov 20, 2014 in Imphal a State Level Competition om ding ah CCpur ai-oh in category teng atel ding telkhiak hi uhi.

Singngat area ah Tedim road kibawl
Lamka, Nov-17: Singngat leh Lamka kikal mun tuamtuam ah Tedim road lampi repairing pailel a, BRTF pawlin suang sungin nasem uhi. Lamka leh Mata kikal ah leng lampi ah suang sungin nasem uh a, Mata leh Singngat kikal mun tuamtuam ah BRTF pawlin gari hunkhop zang kawmin nasem uh hi’n kigen hi.


Ntl Level Competition ah tel ding
Lamka, Nov-17: Imphal ah Nov 15, 2014 a State Level Painting & Drawing Competition om ah JNV/Tuinom a classs VII student Lamginthang s/o Letkholal Singson sangtaka a lawhchin ziakin certificate & cash prize Rs. 11,300/- mu a,tunung sawtlou in Delhi a National Level Competition a tel ding in zinkhe ding chih thutut kingah hi.


Thanlon biala zinte hongtung
Lamka, Nov-17: Thanlon A/C MLA Vungzagin Valte, Parliamentary Secretary(Hort & SC/CADA), Lunminthang Haokip, IAS, DC/Ccpur leh District Level Officer (DLO) 17 velin Nov 13, 2014 akipan Thanlon Assembly Constituency(A/C) sung a khaw tuamtuam pha in development scheme hunkhop honna leh project/scheme nasepna pailelte enkhe kawma zinkhia gari 33 val a kizui in tuni nitak dak 8.30 velin Lamka hong tungkik uhi.


SO akipan Under Secy in kaisang
Lamka, Nov-17: UPSC saina in Oct 2013 in kum 2009, 2010 & 2011 ading Indian Foreign Service (Grade-B) a Under Secretary (Grade-I) lakna ding in Special Limited Departmental Examination, 2013 om a, Oct 20-22, 2014 sung om hi. Huai result zan zek Nov 13, 2014 in puankhiak hi a, huai ah External Affairs Ministry a Section Officer (SO) sem) S. Chinpau Ngaihte lawhching a, singtangmi amah kia ahi hi. Amah kum 2011 akipan IFS (Gr-B) a Under Secretary (Grade-I) in a seniority kipan ding chih ahi hi.


DC’s office puahna nasep kipan

Lamka, Nov-17: Lunminthang Haokip, IAS, DC/CCpur panlakna in DRDA lam te'n DC' office puahna (renovation) bawlin nasep pan uhi. Huai ban ah tunaizek in DC office a room tuamtuam ah CCTV fit thak uh a, DC' office main entrance telin mun tuamtuam ah CCTV fit zawh hi'n DC' office chamber akipan room tuamtuam ettheih in om hi.


Free Computer Servicing camp
Lamka, Nov-17: CCpur Community College-te’ saina in Nov 22, 2014 (Kiginni) zinglam dak 11.00 akipan sunnung dak 2.30 tan CCpur Govt College campus ah ‘One day Free Computer (Desk top & Laptop) Servicing camp’ om ding hi. Huai ah Computer model leh brand khatpeuh tawikawm in vatel theih ding a,huai dinga lunglutte’n registration fee Rs. 20/- sun ngai ding chi’n Nodal Office, CCpur Community College akipan thusuak in gen hi.


SP tuni’n training din kuan
Lamka, Nov-17: Hyderabad a Sardar Vallabhbhai Patel National Police Academy ah Police officer-te’ ading in Nov 17- 28, 2014 sung 'Training programme on Counter Terrorism’ kichi tuni’n kipan hi. Huai a telding in K. Kabib, IPS, SP/CCpur in tuzing in Hyderabad zuan a, amah omlouh sung N. Manimohan Singh, IPS, Cammandent 1st IRB/CCpur in SP/CCpur mawhpuakna tawh enkhawm ding hi.


EIAA-Core Committee meeting
Lamka, Nov-17: DC/CCpur’ residence ah Nov 22, 2014 nitaklam dak 5:00 in ‘Eimi International Achievers’ Award-Core Committee (EIAA-Core Committee) meeting om ding hi. Huai ah Committee member te' apan award category tungtang suggestion omte genkhawm ding uh a, program final zawh Dec 30, 2014 nitak dak 5:00 in Hiangtam Lamka a YPA Gen HQ Hall ah Eimi Internatioal Achievers’ Award hawmkhiak hidin kigen hi.


Bishnupur apan WSI hong kisuan
Lamka, Nov-17: Bishnupur dist a om Women Sub Inspector (WSI) Ngaihoihkim in CCpur dist a semding in tuni'n SP/CCpur office ah joined hi. Huailou in tulela Reader to SP/CCpur len WSI Luanneihoih @ Boinu leng tunung sawtlou in Bishnupur dist a kisuan ding hi'n kigen hi.


Saikot Play ground ah kisuan ding
Lamka, Nov-17: NYK/CCpur leh CDSA saina in Lamka Public Ground a Dist. 3rd Division League 2014 pailel League matches kipat hun Nov 19, 2014 apan in Lamka Public Ground apan Saikot Playground ah kimawlna mun kisuan ding hi’n CDSA thusuak kingah hi.


SUUNNA :
T. Jamkhangin (67) h/o Nemkhanching @ Chingpi of Tangnuam tuni zingsang dak 4.30 in sinna ziakin si a, Tangmual hanmual ah tuni mah in kivui hi.
Luan Kho Zen (81) m/o Dou Za Lam of Pangzawl tuni zingsang dak 3.30 velin BP stroke in si a, tuni mah in Pangzawl hanmual ah kivui hi.
Kaimuanthang (35) s/o T.C. Tungnung of Zenhang Lamka zan in RIMS a ki-ensak ding a kuan zan nitak dak 7.00 velin si a, tuni’n Zenhang Lamka hanmual ah kivui hi.


IMPHAL NEWS:
CM in building thak hongkhia
Imphal, Nov-17: Chief Minister O. Ibobi in tuni’n Lamphelpat a College of Nursing mun a building kibawlthak a honna hun ah doctor-te adin attachment policy thak kizang pah ding hi’n gen a, huai zat hun ah specialist doctor-te khempeuh district HQ a Hospital teng ah a tompen in kha 2 sung posting piak hiding uh chi’n gen hi. Doctor-te mun gamla leh kilkoi mundeuhte ah postimg a om a utlouh uh poisakthu CM in gen a,huai pumpelhna ding in govt in attachment policy patsawm hi’n leng gen hi.
Tuni a building thak honna ah Health Minister Phungzathang Tonsing, L. Nandakumar, MLA; Principal Secretary (Health & Family Welfare) Dr J Suresh Babu leh Director (Health Services) Dr O Ibomcha Singh tel uhi.


Nov 18 akipan dakkal 48 sung bandh
Imphal, Nov-17: Thadou Students’ Assn (TSA) Gen HQ in Moreh a Haolenphao mun state govt in Smart City dinga bawl a sawm Nov 12, 2014 tana zukkik ding in govt ah thutawp pe mahle uh huai tawh kisai govt in bangmah panla tuanlou chi’n lungkimlouh latsakna in Nov 18, 2014 zankim lai akipan Manipur tawnkha National Highway teng dakkal 48 sung bandh puang uhi.TSA thusuak in a gendan in bandh dinga kisakkholhna bangkim zawhsiang hi a, mipi in leng bandh support dia ngenkawm in bandh sungin National Highway-te ah gari tailou ding in theisak uhi.


Offer form ladin theihsak hi uh
Imphal, Nov-17: MPSC in MCS 17, MPS 20 leh Election Officer 1 lakna ding in Manipur Civil Services Combined Competitive (Main/written) examination, 2014 leh interview a conduct ua lawhching candidate-te appointment piak dia a recommend dungzui un candidate te’n amau adia post bikhiahte join dingin DP (Section) Manipur Secretariat South Block ah Nov 18, 2014 zinglam dak 11.00 akipan offer form la ding a theihsak hi uh a,huai Dec 6, 2014 nitaklam dak 3.00 tana submit dingin theihsak hi uhi.
MCS 17 lakna dingah ST quata 5 himahleh General category ah 3 a lutkhak ziakun ST mi 8 in MCS ngah uh a,MPS 20 lak ding lakah ST quota 6 ahi hi. Eection Officer post 1 bel unreserved ahi hi.


Tengnoupal kiangah IED puakzak
Imphal, Nov-17: Imphal-Moreh lampi (National Highway No. 102) a Tengnoupal village (Chandel district) kianga Sita Lamkhai junction ah tguni zingsang dak 7.10 velin IEB bomb khat puakzak chihthu om hi. Bomb puahzakna mun ahihleh Tengnoupal Post a om 24-26 Rifles te’n NH No. 102 a gari taite a check-na mun kiang uh hi’n kigen a, hileleng asi leh liam kuamah omlou hi’n kigen hi. Tengnoupal Village Authority te’n bomb puakzaksakte mawhpaihthu puang kawmin huchibang thilhihte’n ni 2 sunga kipuang ding theisak uhi.


UNC in Election hun ding bikhiah
Imphal, Nov-17: United Naga Council (UNC) in kum 2014-2018 ading Coumncil Assembly a Office Bearer telna dingin Nov 25, 2014 in Senapati a Phyamai Taphou Community Hall ah election om ding in bikhiah uhi. UNC thusuak in a taklatdan in Gen Secretary,Asst Gen Secretary,Assembly Secy leh Dy Asst Gen. Secy telna dingin Nov 25, 2014 zinglam dak 9:00-11:00 sungin nomination form issued hiding a,zinglam dak 11.00 akipan dak 11.30 pm kikal in submit theih ding hi.Nomination form-te zinglam dak 11.30 akipan sunnung dak 12.30 tan scrutiny om ding a, kizukkik utte adin sunnung dak 12.30 akipan sunnung dak 1.00 tan hithei ding hi.Sunnung dak 1.00 in election om ding chih ahi hi.


NEHU ah XXII Convocation om ding
Imphal, Nov-17: Shillong a NEHU campus a Convocation venue ah Nov 25, 2014 (Tuesday) in North Eastern Hill University (NEHU) XXII Convocation om ding hi.Huai tawh kisai in Nov 24, 2014 sun dak 12.00 in Convocation venue ah full dress in Rehearsal om ding chih ahi hi. Nov 25, 2014 a Convocation Gowns submit zawh akipan in NEHU permanent campus, Shillong a Controller of Examination office akipan in degree certificate collect theih ding hi.Gowns submit theih ding hun Nov 28, 20143 nunga submit te’n ni 1 zelin Rs. 20 liau ding uh a,gown submit loute certificate piak hilou ding chi’n Registrar, NEHU in thusuah hi.


Sangai Festival boycott puan sawm
Imphal, Nov-17: Manipur Govt in ‘International Manipur Sangai Festival 2014’ zat ding thupuan abawl nung in Andro mipite’n lampi kisia bawlhoih kin phutna in Sangai Festival boycott puan sawm uhi. Thusuak dan in Andro tourist spot ah leng khawtualte’n gamdangmi lutsak louh din puang uh a, Imphal-Ngariyan-Andro-Yairipok kisiatna State Govt. in ngaihsaklou chi uhi. Andro huamsung a Historical monument tuamtuam - Palam Ningthou Garden, Secret fire, Santhei Natural Park, Shree Shree Govindaji Kaina temple leh a dangdangte omna luttheihna dingte lampi kisia bawl dingin civil society tuamtuam in state govt a nget uh lawhchinglou hi’n gen uhi.


TUNI THUPI:
Kiveng unla, na ginna uah ding kip in, hangsan unla, hattak in om un.
-1 Korinte 16:13

manipurexpress