UPDATES:

S5 Box

ZOGAM.COM Login

Manipur Express - 5 November 2014

Chairman, ADC in meeting neihpih
Lamka, Nov-4: Langkhanpau Guite, Chairman, ADC/CCpur in Oct 24, 2014 in Delhi zin a, Nov 1, 2014 in hong tungkik in tuni zinglam dak 11.00 in office ah Executive member teng meeting neihpih a, sunnung dak 1:00 in MDC-te meeting neih pih hi. Aman Delhi a phak sungin 6th Schedule ngetna memorandum tungtang report a bawl banah ADC nuai a development scheme-te bang chileh zawhbaih theih ding hiam chih genkhawm uhi.
ADC Chairman in Oct 26, 2014 in Delhi a Vikaspuri ah Khua Do Pawi zatna uap a, Oct 27-28, 2014 sung Mumbai a CCpur mite tawh hun zang in 6th Schedule leh MDC thu houlim in suggestion tamtak leng kaikhawm hi. Oct 29-30, 2014 sung Bangalore a Gilead Ministry ah Seminar hun zang hi.
Huailou in Lalrokhuma, IPS, DGP, Bangalore kimuhpih in NE student leh NE mite haksatna genkhawm uh a, TSA President Michael Haokip leng veh in thumsak hi. Oct 31, 2014 in 6th Schedule tawh kisai memorandum kipia bangtan tung hiam chih Delhi ah kansui a, President’ Secretariate (Rashtrapati Bhavan) ah India President kiang a 6th Schedule ngetna kipia leng Ministry of Home Affairs ah study dinga pesawn ahihdan leh DoNER a memorandum kipia leng Ministry of Home Affairs te’n enzui lel uh hi’n Chairman ADC/CCpur in gen hi.

CCpur District Anganwadi Mahila Organisation
Lamka, Nov-4: CCpur District Anganwandi Mahila Organisation (CDAMO) te makaihna in tuni zinglam dak 11.00 in IB Road Synod Hall ah CCpur District a Block 10 akipan Anganwadi Worker leh Helper te’n 5th General Meeting nei uhi. Huai ah CDAMO a Secretary banah Secretary ( Finance) akipan report om a, agenda hunkhop genkhawm uhi. CCpur District a block tuamtuam a Anganwadi Centre tamtak ah Main leh Mini Anganwadi Centre a semtu ding Aug 28, 2014 a kipan written test leh personal interview a telteng list tunitan CDPO/ICDS, CCpur in Director kiang ah list a thonlouh thu genkhawm uh a, maban a panlakding dan kikum uhi.
Thanlon block nuai a Anganwadi Worker leh Helper-te buaina tawh kisai ni 2/3 nung a thuthak a omkei leh CDAMO in case take-up ding in thupuk uh a, Delhi ah Anganwadi Worker/ Helpers Employees rally omding thu ah tukum in CCpur District ah CDAMO in buaina leh thil hihfelding tamtak a omziak in representative kuamah tel theilou dingin thupuk uhi.

Chief Manager thak in join ding
Lamka, Nov-4: SBI/CCpur Branch a Chief Manager thak ding Pauneihthang Valte s/o V. Tunzakhup of Zenhang Lamka in tuni’n branch ah ki-report a, kalnawn sungin join ding hi’n kigen hi. Chief Manager thak ding in tuni’n SBI/Ccpur Branch a phak hun ah Pastor MT Khanlal in thumsak hi. Pauneihthang Valte in SBI ah kum 2004 in Probationary Officer in joined a, nasep hoih ziaka kaisang touzel in June 2014 in scale-IV tan ah kaisang hi.

Kha 1 sungin gari 163 kibehlap
Lamka, Nov-4: District Transport office ah Oct 2014 sungin gari thak 163 registered hi a, huaite heavy good vehicle 1, medium goods vehicle 4, light goods vehicle 4, maxi cab 2, jeep 6, car 20, auto rickshaw 7, bike/active 118 leh adang (others) 1 tel hi.
Huailou in DTO office te’n Oct 2014 sungin revenue Rs. 12,40,305/- mukhia uh a, April-Oct 2014 sungin revenue Rs. 86,28,922/- mukhia in govt ah challan in submit uhi. April-Oct 2014 sung in DTO office ah gari tuamtuam 1214 registered hi a, medium bus 1, heavy goods vehicle 1, medium goods vehicle 5, light goods vehicle 8, maxi cab 15, jeep 48, car 175, auto rickshaw 54, bike/active 899 leh adang (others) ah 8 ahi hi.


RC Society in training sai ding
Lamka, Nov-4: Indian Red Cross Society/CCpur District Branch saina in Nov 13-15, 2014 sung CMO Conference Hall ah ‘Certified First Medical Responders’ ahihkeileh ‘First aid’ training omding hi. Huai ading in mi 30 select hiding a, a lunglutte’n Lalson Suantak, Secy, Indian Red Cross Society, CCpur Dist Branch kiang ah Nov 8, 2014 tan in contact no. 9612904960 tungtawn in kithuzakpih theih ding hi.


Naupang 1 tuisa in buakkha in liam
Lamka, Nov-4: Thanglianson (10) s/o Lamnunthiem of Sielmat tuni nitaklam in tuidawn ding a kikoih tuisa in buakkha in a pum leh awm banah a taksa mun tuamtuam liam a, district hospital ah etkol in om hi.


Mi 62 in NFCH a huhna ngah ding
Lamka, Nov-4: Centre govt in namkal buaina ziaka nu-leh-pa neiloute National Foundation for Communal Harmony (NFCH) tungtawn in panpihna pia uh a, Nov 7, 2014 sunnung dak 1:00 in DC’ office a BRGF Resource Centre ah mi 62 ading Rs. 8,32,500 vel cheque tungtawn in hawmkhiat hiding a, student leh guardian-te tel ngai ding hi.


Joint Advance Christmas lopna
Lamka, Nov-4: Nation-wide Gospel Music Festival-te saina in tunung sawtlou in Nastion-wide Gospel Music Festival Motivation programme leh Joint Advance Christmas lopna programme kithuah om ding a, Rengkei in huai zintun ding uh chihthu om hi. Huai hun ah Lamka khawpi a Christian Tuailai teng kithuahkhawm in Pathian phatkhawmna hun zang ding uh chih thutut kingah hi.


Engineering career talk om ding
Lamka, Nov-4: SSPP Jt. Hqtrs Lamka saina in Nov. 8, 2014 zinglam dak 10.30 in IB Road a Synod Hall ah ‘Engineering Career Talk’ om ding hi. Huai ah Class-XI leh XII zil lelte tel thei ding uh a, mahni college chiat ah Rs. 50/- pia in registration bawltheih hi’n kigen hi. CCpur District Private School Assn (CDPSA) huhna tawh SSPP Jt. Hqtrs Lamka in sai ding hi’n kigen hi.


Paozalet Kipgen chih ding hizaw
Lamka, Nov-4 : Zan issue Manipur Express ah Custom & Central Excise a Inspector sem hunkhop Superintendent a kaisangte lakah Paozalet Haokip kichi pen Paozalet Kipgen chih ding hizaw hi.


PMEGP 2013-14 te’n RSETI ah training ding uh
Lamka, Nov-4: PMEGP loan beneficiaries te’n kumdang in Imphal ah training sek uh a, CCpur district adia masapen ding in PMEGP 2013-14 beneficiaries tawh kisai KVIC apan a list kim hun in Bjang a RSETI office ah EDP training neiding uhi. Huai tawh kisai in 1st instalment release louh beneficiaries teng list kimtak CCpur dist a bank omteng in akintheilam in KVIC office a submit dingin BO’ HQ, DC’ office in theisak hi.


JE Vaccination Campaign
Lamka, Nov-4: CMO/CCpur leh DFWO/CCpur saina in Nov 5, 2014 zinglam dak 9:00 apan in Hiangtam Lamka a YPA Gen HQ Hall ah Japanese Encephalitis Vaccination campaign omding hi.
Huai ah CMO/CCpur leh DFWO/CCpur nuai a om Nurse teng ban ah JE tawh kisai Designated Supervisor-te telding uh a, Resource Person te’n JE natna apan kiven ding dan leh JE damdoi kap ding dan sinsak ding uhi.

IMPHAL NEWS:
TA camp ah bomb puak:engineer 1 si
Imphal, Nov-4: Koirengei a Old Airport a National Highway No, 2 kiang a om 155th Territorial Army (TA) Bn post ah zan nitak dak 8.15 in meltheihlouh helpawl hidia gintakte’n grenade 2 paihkhum uh a, khat puakzak in a thehkhak ziakin TA engineer Lance Naik Jagga Singh si hi. Aman 29-Assam Rifles akipan hi a, Pune pansan 107-Engineer Regiment C/O 99 APO hi’n kigen hi.
TA personnel-te Heingang PS bialsung Old Koirengei a amau barrack chiat a a khawl tawldam laitak ua thiltung hi a, thil tunna mun ah tuni zingsang in police te’n grenade puak zaklou a om khat mukhia uhi. Grenade puakzak pen lamlian akipan kipaihkhum hi’n kigen a, Jagga Singh lutung zawn a puakzak hi a, Leimakhong a Military Hospital kintaka zotpih himahleh damzoulou in si hi. Grenade puakzaklou pen zinglam dak 9.30 in police te’n TA camp kingnai mun khat ah hihsia uhi.


Sanjenthong lei zawh hun zekai ding
Imphal Nov-4: Imphal east leh Imphal west district kawm tuahna dinga lemtangpen Sanjenthong lei (bridge) hongtung ding Nov 21-30, 2014 sung Sangai Festival om ding kipatma a zawhsiang man hilou ding in kilang chi’n Chief Minister O. Ibobi in gen hi. Chief Minister in tuni’n Palace Gate kianga City Convention mun enkhe kawm in Sangai Festival om hun chianga huai mun zotna ding a lemtang dang hi a kigen Thumbuthong bridge (lei) leng enkhia hi.
CM in Sanjenthong lei akin lama zawh hidin gen a, hileleng kha 1 sung zawhman ahih gintak huailou hi’n gen hi. CM in a genzelna ah Sangai Festival kipat huna honna nei ding in Prime Minister Narendra Modi chial hi a, hileleng amah akipan dawnnna bangmah om nailou hi’n gen hi. Tuni a CM in mun tumtuam a phak hun ah Works Minister Dr Kh. Ratan kumar in zui hi.


Winger service-te ‘ban’ puankhum
Imphal, Nov-4: Association of Tedim Road Commercial Vehicle Transport Society (ATRCVTS) pawlin Tedim Road ah Oct 31, 2014 akipan Winger service ‘ban’ a om lakkhiak ahih theihna ding a panla ding in state govt ngen uh hi’n ATRCVTS Secretary M. Oken in gen hi.
Oken in tuni’n Keishampat ah Press-te kimuhpih in a genna ah Ningthoukhong area ah Sept 30, 2014 nitaklam a thiltung ziakin JAC pawlin Oct 31 akipan Tedim Road a Winger service ‘ban’ uh ahihdan gen a, huaiziakin Imphal to CCpur, Imphal to Thanga, Imphal to Moirang, Imphal to Wongoo leh Imphal to Kumbi line a Winger service khawl hi’n gen hi. Association (ATRCVTS) in Ningkhoukhong area a thiltung a kigolhte govt in suikhia a mankhe dingin leng ngen uhi. Buaina bawlte matkhiakna dinga police-te panlakna thuap ding uh hi’n leng ATRCVTS pawlin puang uhi.


Senapati ah Dist Level Literary Meet
Imphal, Nov-4: Senapati district adia masa District Level Literary Meet zan in Ms Jacintha Lazarus, IAS, DC/Senapati in Multi-Purpose Hall ah hongkhia hi.Huai in a thiltup ahihleh Senapati district a student omteng kithuahkhawmsak hi a,student-te giahna lerh nekman teng leng govt in a sen banah paiman tanpha leng re-imburse sak hi’n kigen hi.
Huai Literary Meet ah painting, singing, recitation, extempore speech, quiz, fancy dress, elocution, dance, skit leh choreography om a, huai a tel student-te Sub-Junior, Junior leh senior levels a khenzak hi uhi.


National Festival of Classical Dance
Imphal, Nov-4; Department of Arts & Culture, Government of Manipur saina in Nov 6-9, 2014 sung 10th Bhagyachandra National Festival of Classical Dance om ding a, Chief Minister O. Ibobi in November 6, 2014 sunnung dak 2.00 in Shree Shree Gopinathji temple ah Chief Guest a pang in hong ding hi.Dance festival a programme tangpi Shree Shree Govindaji temple kong a om Kangla ah Nov 7-9, 2014 sung om ding a,Chief Minister O. Ibobi in Nov 7, 2014 nitak dak 5.00 in hong ding hi.


Health Scheme of MOBC puangkhia
Imphal, Nov-4; Directorate of Minorities & Other Backward Classes (MOBC) in MOBC nuai ah kum 2012-13 sunga Health Scheme beneficiaries-te puangkhia a, Directorate of MOBC Notioce Board ah a list takkhiak hi a, official website wwwmobcmqnipur.gov.in ah leng et-theih ding hi.Office hunsung in scheme officer kiang ah detail kantheih ding hi.


TUNI THUPI:
“Kuapeuh thilhoih hihding thei a hih tuanlou zaw amah adin khelhna ahi.”
-Jakob 4:17

manipurexpress

 

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING