UPDATES:

Manipur Express - 30 October 2014

Tuibuong a District Jail function sak nawn hiding-CM
Chief Minister in District & Session Court hong

Lamka, Oct-29: Tuibuong a CCpur District Court complex ah tuni zinglam dak 10.00 velin Chief Minister O.Ibobi khuallian apang in District & Session Court hongkhia hi. Huai ah Functional President in Justice Laxmi Kanta Mohapatra, Chief Justice of Manipur High Court pang a, Guests of Honour in Phungzathang Tonsing, Minister (Health&FW,GAD and CADA) leh Justice N.Kotiswar Singh, Judge of Manipur High Court pang uhi. Huai hun ah Dr Chaltonlien Amo, Chairman, Hill Area Committee; Vungzagin Valte, Parliamentary Secy(Hort & SC and CADA); Ginsuanhau, MLA (Singngat A/C); DC/CCpur; Vice Chairman ADC/CCpur, MDC-te, DLO-te, CCpur Dist Bar Association-te, Tribe leader leh Student leader-te banah Women Orgn leh Orgn tuamtuam apan makaite tel uhi.


CM in a genna ah India democracy ah khuampi 3- Legislative, Executive leh Judiciary om a, huaiteng in kituaktaka na asepchiang un state gam leh mipi in hamphatpih hi'n gen a, huai lak ah Judiciary in hoihtaka na asep theihna din legislative te' judiciary nasepna ah a kigolh kei ua leh thutak leh diktaka vaihawmna omthei ding hi'n CM in gen hi. Mi teng dan (law) nuai ah ki-om vek a,Law ma ah mi tengteng dinmun kikim vek a, huai sepsuah theihna dingin Dist & Session Court kihong khia hi’n gen hi . Tuibuong a JCM court in thukhenna a laktheihlouhte’ Imphal hawh ngailou in District & Session Court ah hihveng thei hi’n gen a, Dist & Session Court in a hihveng theilouh case liante High Court ah genkhawm leh thukhenna lak hiding chih ahi hii.


CM in a genzelna ah kum 1990 vel akipan Tuibuong a District Jail function lou a om a building renovation bawl hiding a, huai zawhsiang hun in function sak hidin gen hi. Kum 1959 in Parliament in Tribal Act kichi passed a, tunitan zat a om hi’n gen hi. Tribal Act nuai ah village level in case tuamtuam genveng theih a, case liante gen veng theihna din tuni’n District & Session Court kihong khia hi’n CM in gen hi. Tribal Law nuai a thutanna kibawlte gensiatna hilou in mi neizou leh chethei (muscle power) te' vualzou chih omthei a, himahleh govt court ah huaite kizangtheilou in thudik a vaihawmna om hi'n gen hi. Police Station leh Court-te mipi’n hoihtaka nasem sak a, thudik thutak a thukhenna bawlsak ding in ngen hi.


Health Minister in agenna ah sum dinmun haksatak kal ah CM in mipite hamphatna ding a Session Court a honkhiak kipahthu gen a, Manipur govt in dist. teng ah Session Court honsuak sawm hi'n gen hi. Mipi hamphatna dia court honkhiak ahihman in mipi'n kithuahpih a, hoihtaka function sak ding in ngen hi. CCpur dist. ah Dist & Session Court honkhiat ahihnung case tamtak omte akintheilam a hihfel pahpah lam-et thu leng gen hi.


Chief Justice, High Court of Manipur in agenna ah Chief Justice lending in Oct 21, 2013 in charge la a, huai hun a atheihkhiat khat ahihleh Hill Dist te ah Session Court omlou chih hi a, tuni’n Session Court honkhiat ahih kipahpihthu gen hi. Maban ah Ukhrul, Tamenglong leh Chandel ah Session Court hon hidin gen a, a sepsung in Dist teng ah Dist & Session Court honkhiat ahihleh lungkim mahmah ding hi’n gen hi. Justice N.Kotiswar in agenna ah tuni a honkhiat a om Sesion Court pen Dist in hunsawt pek a lunggulh gige tuni a sepsuah theih a om hi a,India Constitution Article 39 (A) sukbuchinna hi'n leng gen hi. Legislative leh Executive banglou in Judicial pen atuamliuliau hi a, Juidicial Officer-te’ leng a tuam a training hi uh a, huaiziak in Supreme Court in Judicial pen a tuam a kipaw dingin order suah hi'n gen hi. 1990s velin haktakna tuamtuam ziakin Hills dist a Dist Court teng function lou in om mahleh tuni’n thak a Session Court honkhiat hilou in alui omsa mipi hamphatnang a hihhing leh function saka om hi'n gen hi. Program zawh in CM makaih in official-te’n Dist & Session Court campus ah singnou tamkhop suan uhi.


Pasal naupang khat in Numei naupang 3 sual(rape)
Lamka, Oct-29: Thutut kingah in a taklatdan in Tangnuam khua ah Oct. 7, 2014 leh Oct. 19, 2014 in Siamthianmuan (15) s/o Paukhanlam of Ngalzang tulela School kai dia Tangnuam a innluah a om in a innvengte inn a omlai numei naupang kumchinglou mi 3 sual(rape) chihthu kiza hi. Thukizadan in Oct. 7 in kum 5 mi class-B zillel Biaki(min kikhek) sual masa a, huainung Oct. 19 in class-A zillel 2 kum 5 mi Muani(min kikhek) leh kum 4 mi Hoihte(min kikhek) sual nawn chih ahi hi. Sual a om numei naupangte 3 omna inn leh a sualtu omna inn kizom hi a, tua inn ah innkuan 3 in pindan kisehkhente luah uhi. Biaki’ nu don(etkol) dingin a sanggam numei nihte’n Muani leh Hoihte vakoih zel uh hi’n kigen hi.


Tuni sunnung in sualluih a om naupang 3te innkuante’n thil omdan mipi theih ding in puangkhia uh a, naupang 3te’ innkuan tuam chiat leh khaw tuam chiat hi uh a, a nute uh ki-unau ahihziakun Tangnuam ah a nuneuin a don ding in vakoih zel uh chi uhi. Huchihlai in naupang dontu(nu) omlouh kal in Siamthianmuan in hihbuah chih ahi hi. Oct. 29 in naupang 3te’ taksa tung medical test bawl hi a, sualluih a om mah hi un theikhia uhi.


Siamthianmuan(15) bel naupangte nu’n a manlouh chiangin naupangte donsak zel a, inn kizom ahihman un naupangte tawh kinel(maingal) uh chi uhi. Oct. 7 nitaklam dak 5.30 vel a thiltun hun in Biaki leh Siamthianmuan vuak innsung ah om uh a, lupna tung ah kimawlpih lai khoih a, sawtlou nung in Biaki taikhia hi’n kigen hi. Oct. 19 in Muani leh Hoihte nute’n Biaki’ te inn ah an ne ding in va koih ua, Bazar ah meh lei ding a Biaki nu a pawtkhiak lai in naupang nihte don(enkai) khawm ding in Siamthianmuan zang a, a nu pawtkhiak kal nitaklam dak 3.00 velin Muani leh Hoihte khoih nawn a, Muani private part sung kisia in penetrate a, Hoihte aleng sisan pawt hi. Biaki in nitak chiangin a mang(dream) sia in kingaihsiatna(depression) nei hi’n anu’n gen a, a thiltuah nung in Sunday School leng kai nuamlou in sawlzou nawnlou uh hi’n gen uhi.


Biaki’ nu gendan in naupangte’n a gen ngamlouh ziakun thiltung theikhe pahlou ua, himahleh naupang 3te’ omdan chituam hi a a theih ziakin Oct. 21, 2014 in a innluahna uh neitupa(land-lord) kiang ah hilh hi. Inn neitu inleng Siamthianmuan vamu in thil omdan dong a, naupang 3te’ khoih hiam chih a dotlai un hun sawttak im mahleh maituam a azep nung un kipuang chi uhi. Oct. 24 nitakin rapist innkuante leh numei naupang 3te’ innkuante’n kihouna nei ua, huai hun in rapist innkuante’n Siamthianmuan vuak(soisak) ngai siamlou in numei lamte mawhsa uh a, kihouna neitheilou in kikhen uhi. Oct. 25 zingkal dak 7.00 velin Rs. 1000 tawh Siamthianmuan innkuante valut ua, numei lamte’n pom theilou in Oct. 27(Monday) a kihouna nei ding in genpih uhi. Kihouna neih ni ding Oct. 27 sun dak 12.00 velin Siamthianmuan leh a unu a vante uh tawh Vengnuam,New Lamka ah pemkhia uh hi’n numei lamte’n gen ua, huainung in kihouna om nawnlou chi uhi. Siamthianmuan ahihleh Class-IV zil pan hi’n gen uh a, Biaki nute’n innkuan khat banga naupangte don dia azat zel hi’n gen uhi. Numei naupang kum chinglou 3 bawlsiatna Zomi Mothers Assn(ZMA) Tangnuam Unit leh Tangnuam Village Authority kiangah athutut in om a, Siamthianmuan matkhiak hi nailou hi’n gen uhi.

 

SSC saina a exam 2vei om ding
Lamka, Oct-29: Staff Selection Commission (SSC) saina in Nov 2 & 9,2014 in CCpur College ah Combined Hr.Secondary Level (10+ 2) examination 2014 om ding hi. Nov 2, 2014 morning & evening shift adi’n candidate 895 tuak om uh a, Nov 9, 2014 morning shift adi’n candidate 895 om a, evening shift ah 888 om hi. Examni in morning shift zinglam dak 10:00-12:00 hiding a, evening shift sunnung dak 2:00-4:00 hiding hi. Candidate tamkhop in Internet apan Admit card download theilou uh a, www.sscner.org.in ah download theih ding a, buaina neite’n CCpur College ah Dr Jangkholun Mate, Asst Supervisor, SSC Exam Centre CCpur kimuhpih theihding hi.

 

DC/CCpur in hilhchian
Lamka, Oct-29:Molnom Community Hall ah zan in ‘Chavang Golseh 2014 Silver Jubilee Celebration-cum-(late) Jamsei Lhungdim Lentol’ honna programme zatna ah thugentu khat in a gendan in ‘DC in Molnom khawmi deihsak ziakin Community Hall khat balwsak ding’ chih a gen DC/Ccpur in a hilhchetna ah Community Hall kichi sum lakh tamtak senna ahih ziakin amah thu in hihthei vuallou hi’n gen hi.Aman huai kikhopna a a thugendan genthak dan in Hiangtam Lamka a YPA Gen HQ Hall leh Molnom a Community Hall mipi tamtak kikhop theihna mun ahihman in puah hoihsem lungluthuai sakthu gen a,adiakin light leh sound system lam lungtunhuai taka bawl poimawh a sakdan gen hizaw ahihdan genchian hi.


Oil Pump ah thautui deih tam
Lamka, Oct-29: Bijang a M/s Suakhnun & Sons Oil Pump ah tuni’n petrol kihawm a, adeih mi tam a mahmah ziakin Tedim Road ah gari tamtak kivual uhi. Dist Administration in thautui haksat hun a hawmkhiat ding bikhiah dungzui in 3-wheeler gari-te litres 10, LV 4 wheeler gari-te litres 20 leh LV 2-wheeler gari-te litres 10 dan in hawmkhia uhi.


November 3 adin ahun bikhiah
Lamka, Oct-29: Tuithapi hausa Health Minister Phungzathang Tonsing in khaw mipite tawh Oct 30, 2014 a kithuahkhawmna programme a bawl ahun suanthak uh a,tu’n Nov 3, 2014(Monday) zinglam dak 11.00 adin bikhiah thak a om hi’n Programme convenor LT Juan Tonsing akipan thutut kingah hi.


Hidden Valley School hongkhia
Lamka, Oct-29: Gangpimuol a K. Soia Veng ah tuni zinglam dak 10.00 in TN Haokip, MLA(Saikot A/C) Hidden Valley School hongkhia a, a thugenna ah school lawhchinna ding in nu-le-pate’ mawhpuakna poimawhpen chi hi. Khawtang leh gam masawnna dingin nu-le-pa leh kuapeuh in Education ngaihkhawk ngai ahihdan leng gen hi. Pastor H.Jamkhanpau, Local Pastor, EBC Mualkoi in school honthak Pathian min a latna nei kawmin school neitute thumsak hi. Hidden Valley School ah tuni’n admission kipan a, Preparatoroty akipan Class-I tan om ding a, tunung in class omzah upgrade ding hidin gen uhi.

Caree Guidance Seminar om
Lamka, Oct-29: Young Christian Orgn(YCO) Gen HQ saina in Oct. 31-2nd Nov, 2014 sung Lingsiphai khua ah ‘Career Guidance Seminar-cum-One Day Fellowship Programme’ om ding hi. Huai ah Rev. Lamkhogin Khaute, Executive Director, EOC leh Rev. L. Khupboi Vaiphei, Director of Missions, EOC in ‘Tupna Mualsua Ding ah Malam Zawt’ (Phil 3.13b) pansan in thugen ding uh a, Resource Person in Muanzo, SBI Manager, Tuibuong; Dr. Paulunmang, Blood Bank Officer/CCpur’ Dr. Thathang Vaiphei, Asst. Professor, MU leh Dany Khuplianlal, Ex-consultant, NRHM pang ding uhi.


Laparoscopic machine thak
Lamka, Oct-29: Nazareth Nursing Home ah tunai zekin keyhole surgery bawlna machine Laparoscopic kichi USA pansan Stryker Company in a bawlkhiak nei uh a, huai machine tuzing dak 9:00 in Pastor D.Kamchinmang, Local Pastor, EBCC Hiangtam Lamka in Pathian kiang ah lan (dedicate) hi. Pastor in agenna ah Nazareth Nursing Home apan damlou tamtak in damna ngah uh a, tuni a Pathian kianga thumna a latkhiat keyhole surgery bawlna Laparoscopic machine tungtawna mi tamsem in damna a ngah uh deihthu gen hi. Huai machine thak un a bukim in Rs.25 lakh vel man hi’n kigen a, company te’n instalment a piak dia lem asak ziakun Nazareth Nursing Home in neithei hi’n kigen hi.


Supdt akipan A/C in kaisang
Lamka, Oct-29: Zan issue Manipur Express ah Molnom khawmi Jamkhogin Haokip,IRS in Superintendent (Custom & Central Excise) akipan Assistant Commissioner (Income Tax) in kaisang kichi kha pen Assistant Commissioner(Customs & Central Excise) chih ding hizaw hi.


ZMA Go Cin Khup Veng Unit
Lamka, Oct 29: Go Cin Khup Veng V/A leh ZYA Unit ban ah ZMA HQ makaite theihpihna in tuzing dak 7:00 in Zomi Mothers Assn, Go Cin Khup Veng Unit kiphutkhia a, President- Ngai Biak Lun , Vice President-Tan Vung hi uhi. Secretary-Kh Siamnu, Asst Secy- Ngakngeihdim, Finance Secy- Lal Ngaihnem; Treasurer- Naing Za Ngai; Inf Secy Don Ngaih Vung; member-teT.Hatnu leh Niang Lian Cing hi uh a, Adviser in V/A a Chairman & Secy ban ah ZYA Unit a President leh Secy hi uhi


PMJDY A/C form leh Overdraft application
Lamka, Oct-29: BO HQ, DC’s office/CCpur apan kizadan in Finance Secy, Govt of India leh Govt of Manipur in Pradhan Mantri Jan Dhan Yojana (PMJDY) bank account form leh overdraft application tawh kisai DC teng leh Bank-te kiang ah ‘Common one page form’ a bank account hon ding thu ah bank-te’n summet bawlna a neilou a, customer-te kiang ah a thawn(free) a hawmkhe dingin theisak hi. Huai dungzui in PMJDY account form bank te’n kiningchingtak a koih dinga theihsak hi a, www.financialservices.gov.in/banking/jandhan.asp ah form download theih uhi. Huai form ah govt in terms and condition abawl pansan in overdraft sum ngetna firm leng kithuah hi.


Guta te’n thil tamtak gu
Lamka, Oct-29: Meltheihlouh gutate’n zan nitak in Rengkai Vengpui a om Lalthlamuong tenna inn luh uh a, innsung om TV flat (Onida company) 1, Gas Cylinder 6, a zatlai uh gas stove 1 leh Pressure Cooker 1 gumang uhi. Thusuak kingahdan in inn neitute’ 1st floor ah giak uh a, gutate’n ground floor kongkhak(shutter) hihsia in huai apan innsung a thil omte gu uh hi’n kigen a, Rengkai khawsung ah hibang a inn kiluh 3/4 veina hita hi’n kigen hi.


SUUNNA
Hangsuanlian (35) s/o Donkhanniang of Bethel Veng, New Lamka zan nitak in gilna in si a, tuni’n YPA Hanmual, New Lamka ah kivui hi.

manipurexpress

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING