Manipur Express - 7 August 2014

User Rating: 0 / 5

Star InactiveStar InactiveStar InactiveStar InactiveStar Inactive
 

Police te’n tuni’n zu ahunkhop bua uh, Tulai a kizuak local zu lak ah urea kihel
Lamka, Aug-6: SDPO/CCpur makaihna in Police te’n zan nitakin Old Bazar a Super market area ah zu check uh a, tuni zinglam dak 10:00 velin Zou Veng area lak check nawn uh a, zu hunkhop mankhia in tuni nitaklam in bua uhi. SDPO/CCpur makaihna a zu matkhiak(seized) teng zusante (Indian made foreign liquor/IMFL) quarter bottle 9 leh local zu litre 20 vel hi’n kigen hi.Huchi kalah tulai a local zu kihuante lakah mihing adia lauhuai lei hoihna damdawi(urea/fertilizer) tanpha kihel chih ahi hi.
SDPO in a gendan in social evil neu chikchik i chihte leng doudal ahihkei leh atawp in thil teng ‘ a maimai’ chih hiding a, kithah, kimat tanpha leng kithat maimai chih hongsuak mai ding hi’n gen hi. Police-te’ nasep ding koilai hiam a misi luang lak ding kia hilou in khawtang bawlhoihna ding a sualdouna ah nasep ding tamtak om a, mipi’n kithuahpih ding in ngen hi. Aman a genbehna ah nidanglai a local zu kihuante’ lak ah sleeper, surf, spirit leh adangdang hel uh a, himahleh tuhun in local zu kihuan lak ah urea/fertilizer kihel ahihman in mihing adia lauhuai petmah hi’n gen hi.

V/A leh ZYA te’n No. 4 haltum
Lamka, Aug-6: New Lamka Gou Cin Khup Veng V/A leh ZYA Unit pangkhawm in July 31, 2014 in Chingzakim (42) w/o Lamzathang of G.S Road, New Lamka Gou Cin Khup veng akipan No.4 (heroin) packet 6 mukhia uh a, Aug 5, 2014 tan in vengsung potsan ding in thupia uhi. Himahleh aman V/A leh ZYA Unit makaite theisaklou in Gou Cin Khup Veng pawtkhiat san a, a tenna inn leng chabi in kalh hi. Huai thu ah tuni zingsang in V/A leh ZYA Unit makaite’n No.4 packet 6 matkhiak teng uh haltum uhi. New Lamka Gou Cin Khup Veng V/A leh ZYA Unit makaite gendan in Chingzakim’ in vengsung pawtkhiat san a, a neih leh lam ban ah a tenna inn siatna, melhemna a om leh V/A leh ZYA Unit makai te’n theihpihlou in thuneihkhum lou uh ahihdan puang uhi.

NH-150 ah Chakka bandh puang
Lamka, Aug-6: Tipaimukh Road NH-02/150 a Compensation Committee pawlin July 30, 2014 in gam(land) compensation tawh kisai Chief Minister kianga ngetna a piak uh Demand point 1,2 & 3 dawnna bangmah a omlouh banah govt in sepzui tuanlouh ziakin CCpur akipan Tipaimukh(km 6-262) huamsunga hausa(village chiefs) kigawmte bawlkhiak Compensation Committe te’n Aug 11, 2014 zingsang dak 6.00 akipan in Aug 13, 2014 zankim tan Chakka bandh puang uhi. Huai hunsung in BRO gari himhim NH-150 zui in pai theilou ding a,NH-150 ah casual labourer nasem om theilou ding chih ahi hi.


CCpur Book Fair tuni’n bei
Lamka, Aug-6: IB Road a Synod Hall ah July 26, 2014 akipan CCpur Book Fair Committee leh Bookline, Kolkota &Penguin Books, India saina in ‘4th CCpur Book Fair 2014’ om tuni nitaklam dak 6:00 in beita a, Aug 7, 2014 in Lamka nuse ding uhi. Bookline & Penguin Books Manger in a gendan in kumlui 2013 in tamtak zuakkhia uh a, hileleng tukum in laibu tam zuak khelou uh hi’n gen hi. Tukum in cartoon 300 val sum a tuat in Rs 45-50 lakh vel man ding laibu 20000 vel 10% discount in zuak uhi.


Laibu thak honna om ding
Lamka, Aug-6: M. Thangboi Zou,Missionary,NMSI/MELC in laibu a bawl ‘Ni Poimawte’ kichi Aug 9, 2014(2nd Saturday) zinglam dak 10.30 in Zomi Colony a MELC HQ Church compound ah Ms Grace Zamnu,MDC khuallian a pang in hong ding a, Rev Nengkhanlal Milun, Director of Missions/MELC in thumna in lan ding hi. Huai ah Functional President in Mrs Mannuamching,MCS, CEO, ADC/CCpur pang ding a Guest of Honour in Upa Doulamthang Ngaihte pang ding hi.


BA sangtaka pass kipahpih
Lamka, Aug-6: Miss Tinpineng Haokip in Rayburn College akipan Manipur University saina nuaia BA(Hons in English) sangtaka pass in Top 7th position in zou a,huai tungtang ah Thadou Kuki Students Union(TKSU) Gen HQ leh TKSU Rayburn Branch in kipahpihthu puang uhi.Amah lawhchinna student-te adia enthon tham ching leh phat-huai lawhchinna thupitak hi’n taklang uhi.


Tunkhopum Baite cassette honna
Lamka, Aug-6:PTC Conference Hall ah Aug 7, 2014 sunnung dak 1.00 in Chin National Liberation Army(CNLA) chief Gen (late) Tunkhopum Baite’ cassette honna om ding a,Vungzagin Valte,Parliamentary Secretary khuallian a pangin hong ding a, Rev Rev Sutkhanthang,Executive Secretary,CBA in thumna in lan ding hi. Huai hun ah Guest of Honour in Ginsuanhau,MLA pang ding a, Functional President in Langkhanpau, Chairman,ADC/Ccpur pang ding hi.


Dist Forum Sensitization & Formation
Lamka, Aug-6: NE India Community Orgn. for Rural Development (NEICORD-ACTED) /CCpur district saina in tuni in Tuibuong a District Training Centre ah ‘Dist Forum Sensitization & Formation’ meeting om hi. Huai ah CCpur district sung a JSSK, ICDS, IAY, MDM, MGNREGS, RKVY, IHH, PDS,NSA & RGGVY scheme pailelte tungtang Nongyai, Program Co-ordinator, ACTED leh G.Daimei (Athui), Project Manager, NEICORD te’n sinsak uh a, scheme tuamtuam sepsuah dingdan kikum uhi.


Anti Malaria Month hon hiding
Lamka, Aug-6: Dist Vector Borne Disease Control Society/CCpur saina in Aug 8, 2014 zinglam dak 11:00 in CMO Mini Conference Hall ah ‘Anti Malaria Month honna Programme 2014’ om ding a, Kamsuanlun, EM/ADC khuallian apang in hong ding hi. Huai ah Functional President in Dr. Thangchinkhup Guite, DMO/CMO, CCpur leh Guest of Honour in Dr. F.Thienkhogin, DACO pang ding hi. Sunnung dak 12:30 in H.Thangkhanlian makaihin Loud speaker zangin town area ah Awareness campaign pat dingte pat hiding hi.


Implementation & Monitoring Team
Lamka, Aug-6: Intensified Diarrhoea Control Fortnight (IDCF) Program (July 28-Aug 8,2014) sepzuina ding Implementation & Monitoring team te’n Kangvai , Singngat , Thanlon , Henglep leh Sangaikot area adin kuankhia uh a, ni 2/ 3 nungin area tuamtuam zuan nawn ding uh hi’n CMO/CCpur apan kiza hi.


C-in-C, ZRF/UPF in hilhchetna bawl
Lamka, Aug-6: PS Hangshing,C-in-C, ZRF/UPF akipan thusuak in a gendan in Nengzamuan @ Nicolas sihna tawh kisai C-in-C, ZRF/KNO min a thusuah hilhchetna bawl in ZRF/KNO ah PS Hangshing kichi omlou hi’n hilhchian a,PS Hangshing kichi UPF nuaia om ZRF a C-in-C hizaw a, KNO nuaia om hilou chih taklang kawm in ZRF/UPF minsiatsak tupna hi’n thusuak in gen hi.
Thusuakin a genzelna ah Songlianlal @ Lalpu Hangsing in ZRF/KNO a C-in-C dan a kigen hi a taklang in ZRF/UPF in ZRF/KNO tawh kisaikhakna neilou hi’n gen a,ZRF/KNO in Dec 5, 2012 in ZRF/UPF zom hi’n thusuak in taklang hi.


SUUNNA
Rabi Singson (52) s/o (late) Nengkhogin of Monglianphai zan nitaklam in cancer in si a, tuni’n kivui hi. Rabi Singson ahihleh 49-Bn. BSF asem tulelin Silchar a posting hi a, azi’ Kikim tawh tapa 4 leh tanu 1 nei uhi.

manipurexpress