UPDATES:

S5 Box

ZOGAM.COM Login

Zogam Thupuak | 31 July 2014

Health Minister in hong ding
Lamka, July-30: Dist Steering Committee, Intensified Diarrhoea Control Fortnight (IDCF) Programme (July 28-Aug 8, 2014)te saina in Aug 1, 2014 zinglam dak 10:30 in Dist Hospital campus ah Health Minister Phungzathang Tonsing khuallian apang in IDCF hong ding hi. Huai ah Guest of Honour in Langkhanpau Guite, Chairman, ADC/CCpur, Functional President in PK Jha, IAS, DC/CCpur leh Special Guest in MLA-te leh MDC-te pang ding uhi. Sunnung in 2nd session om ding a IDCF tawh kisai Capacity Building/Training om ding hi.Huai ah Dr V.C Pau, DFWO in slide-show tungtawn in sinsak ding a, Vung Mary, DCM/NHM in CDPO-te, Anganwadi Worker-te, ASHA te’ mawhpuakna sinsak ding a, huai zawhin IEC materials, ORS packet leh Zinc Tablets hawmkhiat hiding hi.

 

IDCF thu ah tuni’n interaction om

Lamka, July-30: Dist Steering Committee, Intensified Diarrhoea Control Fortnight (IDCF) Program(July 28-Aug 8, 2014) tawh kisai in tuni’n CMO Mini-Training Hall ah Press & Media Interaction om a,Dr Thangchinkhup Guite, CMO in hongkhia hi. Penalist ah Dr Thangchinkhup Guite, CMO; Dr V.C Pau, DFWO; Dr Nelson Kom, Padiatrician, Dist Hospital; Dr Zarzolien, Dist Hospital; Seiboi Mate, DPM/NHM leh Vung Mary, DCB/NHM pang uhi.
Ministry of Health & FW in India gam pumpi ah naupang kum 5 nuailamte sungkhawh (diarrhoea) a si om nawnlouhna din July 28-Aug 8, 2014 sung IDCF Program puang hi’n Penalist te’n gen uh a, kumteng in India ah naupang kum 5 nuailam mi 2 lakh vel sungkhawh a si gige in CCpur dist ah naupang sungkhawh ziaka si official record omlou hi’n gen uhi. Sungkhawh louh hunin ORS mawk dawnlouh ding, IDCF sung in ASHA te’n inn tenga naupang kum 5 nuailamte ORS packet 1 chiat pedinga, sungkhawh a damloute kiang ah Zinc tablet leng peding uh hi’n gen uhi. Health Institution (PHC, PHSC) te ah ‘ORS Zinc Corner’ kichi kihong ding a, tukum sung kihong dending hi’n gen uhi.

 

Anti-Drinking Month

Lamka, July-30: CCpur dist ah lemna leh muanna kepbit a, zu-le-sa ziaka accident leh buaina tuamtuam pumpelh theihna din Dist Police-te’n Aug 1, 2014 apan ‘Anti-Drinking Month’puang uh a, veng tuamtuam a zuzuakna munte special drive pan ding uhi. Mipi’n Police-te kithuahpih a, special drive leh zuzuakna tawh kisai Police Control room telephone No. 03874-233239 a theisak ding in ngen uh a, a poimawh hun in Assam Rifles pawlin leng Police-te kithuahpih ding uhi.


Zogal Hall ah Financial Awareness camp
Lamka, July-30: Relief and Devlopment dept, EAC saina leh NABARD apan huhna tungtawn in tuni zinglam in Zogal Memorial Hall complex ah ‘Financial Literacy Awareness Camp’om a, V.Chinkhenpau, Member,V/A Zenhang Lamka in hong hi. Huai hun ah Axis Bank apan Tualkhansuan leh LIC apan Goulalsiem in sinsak uh a, mi ahunkhop telin bank a sum saving leh recurring deposit poimawhdan sin uhi.


Kemchung-II album hon hiding
Lamka, July-30: Zalengam Film company panpihna tungtawn a Lucky Thangcha Khongsai in abawl ‘Kemchung-II’ kichi film July 31, 2014 nitak dak 6:30 in M.Songgel Community Hall ah T.Hangkhanpau, ex-MLA in hong ding hi. Huai ah Guest of Honour in Thiena Touthang, Social Worker leh Functional President in L.Thangpu Lianzo, Social Worker pang ding uhi.


A/C fellou ziakin sum latheilou
Lamka, July-30: New Lamka V/A Council panlakna in mi tamtak ading Old Age pension sum kha 9 ading July 31, 2014 zinglam dak 11:00 apan in YPA Hall New Lamka ah hawmkhiat ding chih himahleh UBI/CCpur branch ah account fellou om ziakin sum hawmkhiat theih nailouh ding hi’n N.Lamka Authoriy Council pan kiza hi.


CDSU in mawhpaih
Lamka, July-30: CCpur Dist Students’ Union(CDSU) a Info Secy in KNO/ZRF a Defence Director len K.Nengzamuan @ Nicolas (36) s/o (late) K. Khamzaneng of B.Vengnom mulkimhuaitaka thah ahihna tung ah tualthatte mawhpaih thu puang hi. I gam ah lemna, muanna leh bitna omtheihna dingin hibang gamtatna kuapeuhin maban ah tawpsan chiat dingin leng ngen hi.


ZC Cabinet Committee meeting
Lamka, July-30: Nehru Marg a Zomi Council office ah August 1, 2014 zingsang dak 7:30 in Zomi Council Cabinet leh Special Invitee te’n Joint meeting nei ding uh a, huai ah thu poimawh tuamtuam genkhawm ding uh chi’n General Secretary, Zomi Council in thusuah bawl hi.


Nicolas thatte mawhpaih: KNO President in suun thupuang
Lamka, July-30: PS Haokip, President, KNO in thusuah a bawlin a taklatna ah Nicolas, Defence Director,ZRF suunthu puangkawm in lusunna thuak a innkuante KNO in suunpih hi’n puang a,a thatte mawhpaihna sangtak puankhum hi’n taklang hi. Nicolas bel July 28, 2014 nitak dak 11.30 velin Vengnom a a tenna inn ah azi leh a tapa kum 3 a upa’ muh in ZRA cadre 5 in kaplum chi’n KNO’ President thusuak in taklang hi.
Nicolas sih ziakin manna liantak om mahleh Kuki nampi adia a kipiakna a mawkna hilou ding chi’n thusuak in gen a,KNO armed wing teng leh Kuki mipite hih hattu hizaw din leng puang hi. Nicolas in KNO leh Zo nampi(nation) adia a kipiakna kipahpih gige hiding chi’n taklang hi.


Guta khat matkhiak in om
Lamka, July-30: Tuzing dak 2.30 velin Elim Veng New Lamka ah tuni zingsang baihtak ak(chicken) tamveitak gu a kipuang Mr. Dongkholun s/o (late) Ginchinthang of Vengnuam hi a kipuang matkhiak in om a, Elimveng a Songtal Hausa tenna inn ah ak gu deklai matkhiak hi’n kigen hi.


SUUNNA:
Ginmanching(72) w/o (late) K.Pumchindal of Zion Veng, New Lamka tuni nitaklam dak 3:45 velin cancer in si a, July 31, 2014 in YPA Hanmual, New Lamka ah kivui ding hi.
Upa V. Thangkam (83) of Dinthar, Aizawl zan ni takin nak haksa sak ziakin Aizawl ah si a, tuni’n Dinthar Hanmual ah kivui hi.

zogam thupuak logo

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING