UPDATES:

Zogam Thupuak | 30 July 2014

KNO/ZRF a Defence Director len Nicolas’ kaplup in om

Lamka, July-29: Police apan kizadan in zan nitak dak 11:30 velin B.Vengnom a om KNO/ZRF a Defence Director K.Nengzamuan @ Nicolas (36) s/o (late) K.Khamzaneng tenna innsung ah galvantawi pawlkhat lut in lupna gei ah kaplum uh a, thiltung zak phet in Police leh Army banah KNO sunga makai tuamtuamte’n delh uhi. Tuzing in B.Vengnom ah Police leh doctor te'n postmortem bawl uh a, Police te’n AK tanghawm(empty case)6 leh 9mm pistol tang hawm 1 mukhia uhi.

Nicolas’ zi Paukhanching @ Chiching apan kizadan in zan nitakin a tenna inn uah KNO makai tuamtuamte houlim uh a, nitak dak 7:00 velin Nicolas' body guard Mangkhum s/o Tungin of Songtal (Thanlon sub divn.) khawlai pawtkhia a, a paihak ziakin nitak sawtnung in hongpai ta in chi’n sam hi’n gen hi. Mangkhum in leng New Bazar ah singpi dawn a om hi’n dawng a, akhenchiang in Old bazar ah zudawn a om chi’n gen chi hi. Huai zawhin Mangkhum in sms tungtawn ngen in inn a omte paita uhiam? chi’n dong a, Chiching in leng kuamah om nawnlou hong paita in chi’n sms mah a thukkik hi’n gen hi.

Zan nitak dak 11:00 velin Nicolas leh a tapa lumkhin uh a, Chiching in Mangkhum ngak a tulai hi’n gen hi. Nitak dak 11:25 velin Mangkhum in mobile tungtawn in sms mahin gate bul a om hi a genkawm in gate hondia ngen hi’n gen hi. Chihing in gate hongkawm in ‘Khum’ chi a a sapleh gate sung ah mi 3 tailut in gate bul ah midang 1 thau tawh pang a, mi 1 in Chiching mantang in AK thau tawh a awm (chest) sutuah kawm in kikou lou dingin vaulau mahleh amah kikou kheman hi’n gen hi. Huchih phetin mi 3 in kongkhak kaihong in innsung ah tailut uh a, thau 7 vei kap uh hi’n gen hi. Mi 3 te’n thau a kapging zawh un inn saklam a Gypsy ngou(white) a tuang in kihemkhia uh hi’n gen a, Mangkhum leng koilai tunghiam chih theilou hi’n gen hi. Chiching in a genbehna ah innsung alut hun in a tapa lau leh lingkawm a kap(cry) leh a pasal lupna taw ah kapliamsa leh etkol manlouh a si mu hi’n gen hi.

Tuni in KBC Central Church, B.Vengnom inntekna in Nicolas suunna program om a, KNO nuai a organization tuamtuam apan makaite leh organization tuamtuam tamtak tel uhi. Huai hun ah P.S Hangshing, President & C-in-C, KNO/ZRF in agenna ah tuni a camp visit ding ziakin Lamka ah hong giak hi’n gen a, camp a naupangte’ nek-le-tak ding thil tuamtuam Nicolas tawh puak ding genkhawm in zan nitakin KNO makai tuamtuamte tawh a genkhawm nung uh sawtlou a Nicolas kaplup a om puaknat thu gen hi. Kuapeuh phuba kilatuah thei vek ahihdan gen a, Nicolas sihziakin Zogam pianglou ding a, KNO lamte’n leng saklam-te a kaplup ziakun Zalengam piang tuanlou ding ahihman in phuba kilaktuah a, kithah a hoihlouh ziakin kuapeuhin kithah tawpsan dingin ngen hi. Aman a genbehna ah KNO/ZRF te’n July 30 in Nicolas’ galna Rs 50,000 peding uh a,KNO atel organization tuamtuamte’n ‘kawsah’ leng bawlding hi’n gen hi.

Nicolas’ taksatung mun 4-a taklam ngawngbul, taklam lenuai, taklam pheipi leh taklam tawng(elbow) ah thautang lutin pailet vek hi’n kigen hi. Siluang vui mateng a suunna in Tuibuong area ah dawr/dukan leh bazar kikhak a, sunnung in B.Vengnom hanmual ah kivui hi. Nicolas in azi banah tanu 3 leh atapa kum 5 vel tulela class ‘B’ simlel nusia hi. Nicolas’ kaplup thu ah Police te'n FIR No.80 (7) 2014 CCP-PS U/S 400/302/34 IPC & 25(1-C) Arms Act registered uh a,hiai thu bawl ahihtan in Nicolas thah ahihna ziak leh a thattu hi a kipuang omlam theih leh zak omlou hi.


Salvation Army official-te London akipan hong zin uh
Lamka, July-29: Salvation Army a Commissioner Lalzamlova leh azi Commissioner T. Nemkhanching in hih ding tuamtuam neih ziakin England khawpi London apan Lamka hongzin uhi. Commissioner Lalzamlova tulelin International Secretary hi a, azi Nemkhanching in International Secretary Zonal Women ministry hihna len hi. Lalzamlova ahihleh (late) Vansanga of Thingkangphai’ tapa upapen hi a, a sanggampa Rev Lallarmawi a in Tuithaphai Presbyterian ah Executive Secretary len ngei hi. Commissioner Nemkhanching bel (late) Taipi Tombing’ tanu ahi hi. Salvation Army a South Asia enkoltu hi uh a, amau tu in London pansan uhi. A tapa uh Lt Timothy in tu in Saikawt bialah Officer/Pastor hihna len hi.


ZYA office leh Hall honna om
Lamka, July-29: T.Goukhomang, President, ZYA Gen HQ in zan nitakin Thanlon ah khuallian apang in ZYA Thanlon Block office hong a, N.Tuanglang, DS/Thanlon, EBC in thumna in lan hi. Huai ah Chief Host in Jamkhanpau, MDC (Thanlon) leh Guest of Honour in Joel Haokip, Jr MCS, SDO/Thanlon pang hi.
H.Jamkhanpau MDC in tuni zinglam in khuallian apang in Sainoujang khua ah ZYA Hall hong a, Ginzamang, Local Pastor, NTBC in thumna in lan hi. Huai ah Guest of Honour in B.Dongzalian Simte, President STC Gen HQ leh Chief Host in Kaikhomang, Chief of Sainoujang pang uhi.


Old Age Pension sum laktheih
Lamka, July-29: UBI/CCpur branch ah Bank Corespondent kitawpziakin New Lamka mi tamtak in kha 9 ading Old Age Pension sum latheilou uhi. Huaithu ah New Lamka Village Authority Council in panla a, July 31, 2014 zinglam dak 11:00 apan in YPA Hall New Lamka ah Old Age pension sum kihawm ding a, sum lading te'n Smart Card tawi ngai ding hi.


Ex-Servicemen-te adia theihtuak
Lamka, July-29: March 1,1963 akipan January 1, 1973 kikal a 20% disability hih ziaka medical ground a boarded out a om sepaihte 3rd Central Pay Commission in re-assessment a bawl dungzui in disability 20% sanga tawmzawte disability pension/family pension tawpsak/stop hi uhi. Himahleh tunai in representation/ case take up a om dungzui in India govt a Ministry of Defence in Feb 10, 2014 in phalna pekik in tuabang a pension tawpsak a omkha ten apply thak thei ding chih ahi hi. Hibang a tuakkha (affected persons) omte’n apu leh pate uh tawh kisai hileleng ngaihven thei ding uhi. Pensioner pen a sihkhit leleng eligible atu leh tate (heir(s) in leng claim thei ding chih ahi. Thu chiangzaw thei utten dot thei ding hi’n Major Thangson @ T. Shoute apan thutut kingah hi.


1-IRB te’n 21st Anniversary zang ding
Lamka, July-29: HQ Veng a om 1st IRB Bn HQ ah August 1, 2014 zinglam dak 8:00 apan in 1st IRB kiphuhkhiat nung kum 21 chinna (21st raising day ) lawmding uh a,huai hun ah singnou hunkhop leng suan ding uhi.


Secretary(Revenue) ah laikhak
Lamka, July-29: SSPP Gen HQ in Manipur govt a Secretary(Revenue) kianga laikhak in ‘Right to Fair Compensation and Transparency in Land Acquisition, Rehabilitation and Resettlement Act, 2013 & (Social Impact Assessment and Consent) (Manipur) Rules, 2014’ tungtang a draft rules kisuah taklang uh a, draft rules pen preliminary observation ahih ding banah petitioner-te apan final submission ahihlouh ding chi uhi. Draft rules kibawl leng local language leh major dialect a omsak dingin ngiat uh a, local press / media leh Akashvani Imphal banah DDK Imphal ah advertisement bawl ding, district leh sub-divisional HQ teng ah a translated text-te koih ding in zasak uhi.


Evangelistic Week zang ding uh
Lamka, July-29: New Lamka a Ebenezer Academy ah July 30 akipan Aug 1, 2014 tan Evangelistic Week zang ding uh a,July 30, 23014 zinglam dak 9.10 in Evan P. Hau Shoute,Pastor Asst. EBC Hebron in hong ding hi. Evangelistic Week sungin student-te category tuamtuam 5 in kikhen ding uh a,category tengah teacher te’n sinsak ding uhi. Huai dingin Nursery-Class I, Class II & III, Class IV & V, Class VI & VII leh Class VIII-XII in kikhen ding hi.Aug 1, 2014 in Upa LT Juan Tonsing,Chairman, Ebenezer Academy Managing Committee in a hunkhak ding hi.


Tui haksatna tawh kisai thusuah
Lamka, July-29: CCpur Consumers’ Club in tui lakna Zone-II (Bungmual) leh Zone-III(Khuga Dam) enkhia uh a, Bungmual ah illegal connection om hi a taklang in dept te’n lakhe dingin ngen uh a, supply line kisiate leng bawlhoih din ngen uhi. Khuga Dam water supply ah timing kichian bikhiah poimawh hi’n gen uh a, Generator kizang a hoihlouh ziakin adang ngaihtuah dingin dept theisak uhi. Amau Generator kisia leng a hoih a khek dingin deptt zasak uhi.


SUUNNA
Summinlian (23) s/o Phungkhogin of Lungchin(Singngat sub divn) zan nitak in Dist Hospital ah khawsik in si a, tuni’n YPA Hanmual, New Lamka ah kivui hi.

zogam thupuak logo

COMMENT (2) PHA TA..  
  •  
  •  

#2#2 barakhaih » 2014-07-31 15:28

Quote:
Salvation Army official-te London akipan hong zin uh
Commissioner sepaih salam galdoute kasa man vele..henuiii :lol: :lol:

  •  
  •  

#1#1 lemthei » 2014-07-30 18:25

"...Nicolas sih ziakin Zogam pianglou ding a, KNO lamte’n leng saklam-te a kaplup ziakun Zalengam piang tuanlou ding ahihman in phuba kilaktuah a, kithah a hoihlouh ziakin kuapeuhin kithah tawpsan dingin ngen hi."

Amen. "Ka gam uah Nang vaihawm in, Toupa aw... hon ngai ung"

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING