UPDATES:

Zogam Thupuak | 10 July 2014

Rakesh, IAS (retd) in Lamka hongpha
Lamka, July-9:Manipur Chief Secretary-lui banah tulela 13th Manipur State Finance Commission a Chairman Rakesh,IAS(retd) in tuni’n Lamka hongpha a, Tuibuong a ADC office omdan enkhia hi. Huai zawh in Chairman ADC/CCpur office chamber ah Vice Chairman, ADC/CCpur, Executive Member-te ban ah CEO/CCpur tawh meeting nei uhi. Chairman, 13th State Finance Commission in ADC/CCpur nuai a development scheme kisemkhiate amun a hong enkhia hi’n kigen a, nasepkhiakte lungtung in 14th Finance Commission hun adin ahithei tan arecommend ding hi’n gen hi. ADC/CCpur nuai a semte haksatna tuamtuam ban ah pension omlouh thu ama’ level a panlak theihna omte ah panla ding hi’n Chairman leh EM-te theisak hi’n kigen hi. Rakesh in sunnung dak 12.30 in DC/CCpur office pha in DC tawh kimu uh a, huaizawh in New Lamka a JB school leh Hebron Veng aV/A Hall pha a,huai ah V/A member te tawh houlim uhi. Aman sunnung Moirang tawn in Imphal ah kiknawn hi.


Financial Literacy Awareness Camp
Lamk, July-9: Relief and Development deptt/ECA saina in tuni zinglam dak 10:30 in Lanva ah ‘Financial Literacy Awareness Camp’ om a, Zamlianthang, Chief of Lanva in hong hi. Awareness camp ah Ch.Surchandra, Chief Manager, Vijaya Bank, CCpur Branch leh Goulalsiem Gangte, Financial Adviser, LIC te’n sinsak uh a, huai ah mi tamtak tel uhi.


AIR/CCpur ah Programme Head thak
Lamka, July-9: G. Chinkhanlian, Programme Executive, All India Radio/CCpur in June 30, 2014 in Robinson Sanate, Asst Director akipan in Progamme Head hihna charge la chihthu kiza hi. Robinson Sanate ahihleh All India Radio/Kohima a sem dingin kisuan chih ahi hi.


Elect deptt- te’n special drive pan
Lamka, July-9: Electricity deptt/CCpur divn. te’n tuni zinglam apan in HQ Veng ah phalna bei a electric meivak late matkhiatna dingin special drive pan uh a, phalna beia electric meivak la innkuan 3-te meigui(wire) lakkhiat sak uh a, innkuan 4 te kiang ah electric new connection form pia uhi. Maban ah khua leh veng tuamtuam ah special drive sunzom ding uhi.


July 9 tan in Malaria ‘PF’ 5 mukhia
Lamka, July-9:Dist Malaria deptt- te’n July 1-9, 2014 sung in damlou hunkhop a kipan sisan a test ua kipan in malaria positive ‘PF’ 5 mukhia uh a, huaite Damdiei khua ah 2, Sipuikawn ah 1, Singngat Zelenphai ah 1 leh Singngat Thadou Veng ah case 1 hi’n gen uhi. Huailou in June 2014 sungin district pumpi apan malaria positive ‘PF’ case 8 mukhia uhi.


Waiting Shed bawlzawh phet kihihsia
Lamka, July-9: District Hospital a Children Ward leh Surgical Ward building kikal a Waiting Shed om tuma lam in Bolero gari in amalam bang(wall) phusia a, Med Suptd/ Dist Hospital in Hospital campus a nasemte a chial dungzui in nasemte’n teklei(brick) zang in bawlthak uhi. Nasemtute’ sepzawh minute 30 leng kihallou in YPA Lamka block makai te’n hoihloulua chi’n hihsia uh chih ahi hi. Nasemte’ gendan in cement work kibawlzou phet, amau dawnglou a, hihsiat ngaisiamlou uh a, nasep lungtunglou leh hoihsalou a omleh amau thuzak a, hihsiat poisalou uh hi’n gen uhi. Govt apan sum leh pai Re 1 leng mulou ding uh himahleh p Med Suptd in a nget dungzui in phattuam ngaihna ziak leh YPA adia donate omthei chi a bawl uh hi’n gen uhi. YPA Lamka Block makaite, Med Suptd leh Dy Suptd in waiting shed bang (wall) enkhawm uh a,YPA Lamka block te’n a bawlhoih dingin thupuk uh hi’n kigen hi.


Gari gu akipei 1 Jail ah koih
Lamka, July-9: Police te’n July 6, 2014 in 2-wheeler gu a kipei Pauzangam @ Pauboi Zou (23) s/o (late) Khamzathang Zou of HQ Veng mankhia uh a, Police custody ah ni 3 sung om nung in tuni’n CJM court in Judicial Custory (Jail) ah omdi’n thutan khum a,Police te’n Jail ah koih uhi.


Hospital ah tulai in security khauh
Lamka, July-9: District Hospital akipan gari neu(2-wheeler) gukmang a hihsek ziakin Polic-te’n enkai uhi. Amau nitak zansawt nung tanpha duty uh a, gari lut leh pawtte chiamteh uhi. Police-te’n gari lian(4-wheeler) te bel gelhlut lou in 2-wheeler kia registration bawlsak uh a, guta pawlkhat in hospital ward sunga damlou omte leh a vehte’ zat gari khenkhat a gukmang sek uh pumpelh theihna dingin gari pawtkhiate neitu’ min tawh enchian zel uh hi’n kigen hi.


Parbung Police-te’n Patpuihmun zuan
Lamka, July-9: Patpuihmun khua ah June 17 nitak in Lalrintluong (30) s/o Remsung in Samuel Lalbieknuom (24) s/o Dalthangsuok a satliam thu ah Parbung Police te’n case suizui in Patpuihmun khua zuan in ni 3 vel nungin Patpuihmun khua tung ding uh hi’n gen uhi. Samuel Lalbieknuom leng Jiri CHC ah admit in om hi. Zan issue ah Samuel Lalbieknuom in Lalrintluong’ veilam ngawng(neck) satliam kichi pen Lalrintluong s/o Remsung in Samuel Lalbieknuom s/o Dalthangsuok satliam hizaw chi’n OC/Parbung apan kiza hi.


KNLF in amau thilhih hi’n puang
Lamka, July-9: Zan nitak dak 9:30 velin meltheihlouh pawlkhat in Tuibuong Service Station (Oil pump) in a hal utawh kisai tuni thu kizadan in Kuki National Liberation Front (KNLF) pawlin amau’ thilhih hi’n puang uhi. Joys Kuki, Secy(Inf. & Pub) KNLF apan kizadan in Tuibuang Service Station in petrol leh thildang hel (adulterated) zuak uh a, civil society leh amau pawlin huchibang hih nawnlou dingin theisak mahle uh a tawpsan tuanlouh ziak un 2nd second warning kipia ahi chi’n Joys Kuki in gen hi. Thil diklou chin tawpsan dingin leng thupia uh hi’n leng gen hi.


SUUNNA
Lalthuoilien @ Thuoia (45) b/o Lhuna, AE/Manager, Electricity deptt/CCpur Divn. of Tipaimukh Road, Hiangtam Lamka tuzing dak 8:30 vel in sungkhawh in si a, tuni’n Lamka hanmual ah kivui hi.
Nianngaihvung (51) w/o Khamzakhen of Thangdong veng, G.Mualkoi tuzing dak 3.30 velin cancer ziakin si a, Ngathal a COC hanmual ah kivui hi.
Jamkholun (47) h/o Lamkhochiin of Tollen zan sunnung dak 2:00 velin chamber of Commerce, Imphal ah gawlna in si a, tuni’n Tollen hanmual ah kivui hi.
Baby Ningzuidik(11months) d/o Pauzalian of Zenhang Lamka tuzing baihtak dak 3:00 velin sungkhawh leh khawsik in si a, tuni’n Zenhang Lamka hanmual ah kivui hi.
Awicha w/o S.Lienmingou of Chiengkawnpang tunitaklam dak 5.00 in brain tumour ziakin si a, July 10 in Chiengkawnpang hanmual ah kivui ding hi.
Mrs. Veijanem(37) w/o Letkholal @ Lalboi of Bijang tuni sunnung dak 2:00 vel in a innkuante’n awklumsa in mukhia uh a, July 10, 2014 in Bijang hanmual ah kivui ding hi.


IMPHAL NEWS:
CLP a Chief Whip dingin Debendra
Imphal, July-9: CM Secretariat ah tuni nitallam in Congress Legislature Party (CLP) meeting om a,CLP Chief Whip dingin Th Debendra Singh, Minister(Forest & Environment, Law & Legislative Affairs) guang uhi. MSCP akipan Congress zom MLA 5 telin Congress MLA 47 om lak ah tuni a meeting ah 40 tel uh a,July 11, 2014 a kipan ding Manipur Assembly Budget Session ah CLP member teng kituak taka pankhawm ding tungtang gen uh chihthu om hi. Manipur ah lou bawlna gam kiam deuhdeuh hi a theihziakin buh piangkhe a punbeh theihna dingin Manipur Land Revenue Reform Act(MLR Act) a clause khenkhat amendment tungtang leng genkhawm uh a, Assembly MLR Act amendment puaklutma July 12 in CLP meeting om nawn ding in thukim uh chihthu kiza hi.


Hemanta leh anungzuite’n BJP zom
Imphal, July-9 : M. Hemanta,ex-Minister leh leh anungzui te’n tuni in BJP zom uhi. M.Hemanta banah Uripok A/C a candidate Dr. Dwijamani; Anwar Hussein, Social Worker of Lilong leh a nungzui uh tamkhop in BJP zom uhi. Tuni’n Nityapat Chuthek mun a BJP Manipur Pradesh office ah party President Th. Chaoba makaihna in BJP zom thakte laklutna leh amaute vaidawnna kithuah programme om hi. M.Hemanta in a gendan in Congress party sungah kideihsakna lianpi a om ziakin lungkiak-huai sak thu gen a, tua banah BJP makaih Narendra Modi ah muanna a neih ziak ua BJP zom uh hi’n gen hi.


Assembly session tawh kisai thusuah
Imphal, July-9; Manipur Assembly a Chief Security Officer Th. Nimai Singh in July 11, 2014 zinglam dak 11.00 in Chingmeirong a Assembly Hall thak ah Manipur Assembly Budget Session ding tawh kisai thupuan bawlkawm in Chief Minister, Dy CM, Assembly Speaker, Minister-te, Chairman HAC, Dy Speaker, Vice Chairman HAC, Parliamentary Secretaries leh MLA-te’ tuanna gari himhim Gate No. 1 lut in Gate No. 2 a potkhe dingin theisak a, Assembly Hall mallam a Parking No. 1 a khawl dingin theisak hi.Assembly session a duty Chief Secretary,DGP,Adll Chief Secy, Addl DGP tuanna gari-te gate 2 a lut in Assembly Hall mal-tum lama main entrance door kianga kinga thei dingin bikhiah hi.Govt nuai secretaries leh deptt gari himhim Assembly campus a lut om theilou ding in leng thusuak in taklang hi.Officer tengin Security(CID) personnel duty-te kiangah mobile handset koih chiat dinga theihsak hi uhi.


Khamtheih hunkhop mukhia
Imphal, July-9: Mizoram Police a CID(Spesial Branch )leh Lunglei a BSF Intelligence Wing te’n July 8, 2014 in Aizawl a Bethlehem veng apan Meth Amphetamine WY tablet packet 53, sum a tuat in Rs. 1.60-Rs. 2.67 crore vel dingin mukhia uh hi’n kigen hi. Thusuak in a gendan in Manipur-Myanmar gamgi gei a Tamu apan Tahan tan khamtheih puaktung in om a, huai apan Mizoram-Myanmar border a Tiao mun ah puaktung a om hi’n kigen hi. Khamtheih pua a mat a om ahihleh Myanmar mi ahih banah Myanmar Presbyterian Synod a driver kum 52 mi hi’n kigen a, a pianna anu damlou etkolna ding a hibang a gamtang hi’n gen a, Aizawl police-te’ kiangah piakkhiak hi’n kigen hi.


TUNI THUPI:
“Huaiziak in aw TOUPA, namchih lak ah kipahthu ka honhilh ding a, na min phat in la kasa lai ding.”
– II Samuel 22:50

zogam thupuak logo

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING