Zogam Thupuak | 4 June 2014

User Rating: 0 / 5

Star InactiveStar InactiveStar InactiveStar InactiveStar Inactive
 

MLA honkhat in CM hongtun ding ngaklah
Imphal, July-3:Manipur a Congress MLA 25 te’n Chief Minister O. Ibobi kiang ah Ministry reshuffle ding a a phut uh Congress High Command in leng niallou ding a kinem kawm in Chief Minister hong tunkik hun ding ngaklah takin om uh a, Ministry lepthakna om dinga panlak MLA pawlin July 6, 2014(Pathianni) in meeting nei ding uh a, huai ah maban a panlak ding tungtang genkhawm ding uh chihthu om hi. Hibang kal ah Chief Minister O Ibobi leh Dy Chief Minister Gaikhangam in zan in Delhi a Congress Working Committee(CWC) meeting zawh in AICC President Sonia Gandhi mu uh a, huai akipan thu kipahhuai banghiam om ding a gingta in Congress MLA pawl kinem mahmah uh chih ahi hi

Ministry reshuffle deih Congress MLA 25te July 6, 2014 a meeting hun ah telkim mahle uh CM tawh kimuhna hun ah amau laka kipan palai tamlou chik sawl tum uh hi’n kigen hi. Huai hun ah CM leh Dy CM in AICC President tawh a kimuhna hun ua Mrs Sonia in bang gen hiam chih thuchian kanchet sawm uh hi’n kigen hi. Chief Minister in tutung a Ministry kibawlkhiak hunlai in term kimkhat(kum 2 leh kha 2) chin hun ah Minister len ding kikhen kual hidia a chiam dungzui in MLA pawlin CM kiangah a thuchiam banga semkhe ding in nawh uh ahi hi. CM in huai thu CWC meeting zawh in AICC President kiang tun ding ahihdan a zinkhiakma in MLA te kiangah gen hi. Thutut kingah dan in Deputy CM tuni’n hongtung a, CM in Assam khawpi Guwahati a Manipur Bhavan dinmun enkhe kawm in tulel in Guwahati ah om chih ahi hi. Congress MLA 25 te’n CM leh Dy CM chihlouh Minister 10 banah Assembly Speaker leng midang in lendia khenkhiak ding in nawh uhi.


Shillong pansan NERCORMP III in nasep pan
Lamka, July-3: North Eastern Council(NEC) nuaia project ‘NERCORMP III’ kichi January 2014 in Arunachal Pradesh leh Manipur a CCpur district leh Chandel district ading banah Arunachal Pradesh a Changlang, Tirap leh Longding bial adia honkhiak(inaugurated) hi a, huai Project in nasep panta uhi. Shillong a NERCORMP’ Regional Society office ah July 1-3, 2014 sung project team member dinga telching thakte’n induction programme nei uh a, Shillong a NEC Conference Hall ah tuni’n Ameising Luikham, IAS, Secretary, North Eastern Council(NEC) tulel a NERCORMP Chairman in officer namkip a omte pulak kawm in project nasepna ah haksatna tuamtuam omte phusuak dingin hasuan hi. Aman agenzelna ah NEC flagship project ‘NERCORMP’ lawhchinna dingin NEC in pan latou zel ding hi’n gen hi. Tuni a meeting ah L.Baite, IFS, MD, NERCORMP; J Lhungdim, Planning Adviser, NEC; G.K.Chin, Financial Adviser, NEC; M.Iboyaima Meitei, Adviser (Agri/Hort), NEC leh NERCORMP PSU a senior officer tuamtuamte tel uhi.


World Cup,2014 ziak hilou - DC
Lamka, July-3: Brazil ah June 12, 2014 nitak in FIFA World Cup 2014 kipan a, huai nung Lamka ah nidang sangin electric power hoihzaw a, huai pen FIFA World Cup 2014 ziak hilou in electric meivak/power lakna mun (Hydropower) te’ peak session leh tui (water) tamziak in nidang tawh teh in electric meivak/power kiching leh hoihzaw hi’n DC/CCpur in gen hi.


KSO/CCpur in panpihna pia
Lamka, July-3: T. Lalkhohao, President, KSO/CCpur makaih in tuni zinglam dak 11:00 in Bijang a Sang-ga Muon Inn ah KSO/CCpur makaite’n panpihna antang bag 2 pia uhi. Huai zawh in Bungmual a Amazing Grace ah leng antang bag 2 pia uh a, Pangzawl khua a Happiness Home ah antang bag 3 pia uhi.


Nampi Maicham kum 3 chinna
Lamka, July-3: Kuki Nampi Kipumkhatna Maicham Committee-te saina in July 7, 2014 zinglam dak 10:30 apan in Songpi Maicham mun ah Kuki Nampi Kipumkhatna Maicham kum 3 chinna leh thumkhawmna program om ding a, Chairman ADC/CCpur khuallian apang in Souvenir hong ding hi. Huai ah Guests of Honour in President, KIC; Chairman, ZC; Presiden, MPC; President, ZORO Northern Zone leh Chairman, KCLF pang ding uhi. Nu Parchi leh khualliante apan thugen ngaihkhiak hiding hi.


WC ziaka buaina bawlte mat hiding
Lamka, July-3: World Cup 2014 pailel a round 16na tan ah betting/gambling ziaka buaina omlouh ziak in SP/CCpur in mipi lakah kipahthu gen a, July 4, 2014 nitak apan Quarter final kipan ding a, kuapeuh in games spirit neikawma en chiat ding in ngen hi. Huchi kalah betting/gambling bawl hiam ,zukham a kisual leh buaina bawl a om leh Police Station ahihkeileh SP office a Control room theisak dingin ngetna bawl a, buaina bawlte matkhiat hiding in gen hi.


‘Dist Level One Day Workshop’ om
Lamka, July-3: District Health Society/CCpur saina in tuni zinglam dak 10:30 in CMO campus a NRHM Conference Hall ah ‘Dist Level One Day Workshop on Infant & Young Child Feeding’ om a, Dr. Thangchinkhup Guite, CMO/CCpur in hong hi. Workshop ah Dr. W.Kameshore Singh, MD.Asst Prof(Paed)/JNIMS,Imphal leh Dr. Usha Khundrakpam, Joint Director/SNO(ASHA), NRHM/Manipur in sinsak uh a, huai ah doctor leh nurse 40 val tel uhi.


Electric thu ah DC/CCpur makaih in tuni in meeting om
Lamka, July-3:P.K Jha, IAS, DC makaihna in tuni zinglam in DC office chamber ah ‘Dist Level Energy Distribution & Revenue Collection Monitoring Committee (DLEDRCMC) meeting om a,huai ah electricity deptt official-te banah makai tuamtuam leh pawl tuamtuam a heutute tel uhi. Huai meeting ah khua/veng tuamtuam 91 in electic fee a bat uh kigawm Rs. 7,19,10,935/- dinmun genkhawm uh a, enkhawm uh a, due omte atamthei pen kaihkhawm ding in thupuk uh a, permit neilou a electric late’n permit a neihtheih dingdan uleng genkhawm uhi. HQ Veng ah July 9, 2014 akipan electric new connection drive pat hi ding a, huai awlawl a sutzawp ding, permit beia electric late’n permit a neih theihna ding un amun(spot) a permit issue ding, huai utloute a electric lakna uh sutkhiak a, a join nawn ua leh Security tawh pangkhawm a lakkhiat banah action lakkhum dingin thupuk uhi. Loadshedding thu ah akisaipih deptt te’n mipi theihding a puankhiat ding in leng thupuk uh a, huai dingin hun lutzek laiding hi’n kigen hi.


CWC leh MACR in electric mat enkol
Lamka, July-3:Khomawi khua ah June 27 zinglam dak 8.00 in electric gui niamchik a om in Patrick Lalmiring(9) s/o (late) Abraham Lalsansuok of Saidan village a mat tungtang Child Welfare Committee(CWC) leh Manipur Alliance for Child Right -Ccpur Chapter (MACR CC) te’n enkai uh a, district administration leh electricity a official tuamtuamte mu in panpihna a ngah theihna dingin panla uhi. Electric current in a mat naupang tuni tan hospital ah etkol hi a, ataksa tung mun tuamtuam liam hi. Thiltung tawh kisai electricity deptt inleng thuneitu sangzaw tut a sawm ban uah panlak theihdan a nasem ding uh hi’n chiam uh a, panlakna gahsuah a omkei leh MACR CC leh CWC in Electricity dept a official-te sam(summon) ding uh hi’n kigen hi.


BSI Annual Conference,2014
Lamka, July-3: Rayburn College a PCI(R)Church ah July 12-13, 2014 sung Bible Society of India(BSI) CCpur Branch pawlin Annual Conference nei ding uhi. July 12, 2014 nitak kikhopna ah Dr TK Muana, Secretary,BSI/Ccpur in thugen ding a,July 13, 2014 sunnung dak 1.00 a kikhopna ah Rev Vanmawia, Vice Chairman, BSI/Ccpur in thugen ding hi. Huai hun ah Elder Vanlallawm Guite,Treasurer, BSI/CCpur in laibu hong ding a,Rev JF Lalropuia in thumna in lan(dedicate) ding hi.July 13, 2014 nitak kikhopna ah Rev Khen P. Tombing,Co-ordinator,PCI(R) in thugen ding a, kikhopna tawp tawh kitonin BSI Annual Conference 2014 bei ding hi.


IRB duty-te chou pawl om
Lamka, July-3: Dist Police-te Quick Respond Team(QRT) 8 kisuah in nitak tengin khawpi sung mun tuamtuam ah duty uhi. Women Police pawl AK tawi in Police Station kong, Tedim Road ah duty zel uh a, sun in khe a paikawm a patrolling team leng om uhi. UBI leh SBI a duty IRB te’ leng nitak in Tedim Road ah duty zel uh a, hileleng nitak teng phial in bike atuang khenkhat in chouzel uh hi’n kigen hi. Tuni nitak dak 7:30 vel in leng bike atuang khenkhat in IRB duty-te chou uh a, taisuak zel uh hi’n kigen hi. Huai mukhate’ gendan in IRB te’leng duty hun a choute mat theihna power piak hile uh kuaman chou ngamlou deuh ding uh hi’n gen uhi.


PTC Lamka Block election
Lamka, July-3: Hiangtam Lamka a PTC office ah July 7, 2014 zingsang dak 7:00 in kum 2014-17 sung Paite Tribe Council(PTC) Lamka Block makai ding telna om ding a, Unit 1 apan candidate 2 chiat om ding a, Unit teng apan Committee member-te telding uhi.


Live in khahkhiak hiding
Lamka, July-3: EBCC Dorcas Veng ah July 4-6, 2014 sung Baptist Children department(BCD) Lamka South Division in Naupang Khawmpi nei ding uh a,huai ah Lianding Guite, Child Co-ordinator, EBC thugentu in pang ding hi. Khawmpi a hun zatnate leh kidemna tuamtuamte Angels Vision cable in Live in khah ding chihthu om hi.


UKLA(MC) in thupuan bawl
Lamka, July-3: T. John Kuki, Secretary, Info & Publicity, UKLA(MC) in thusuah abawldan in United Kuki Liberation ArmyUKLA(MC) a Finance Secretary dingin T.Anthony Kuki mawhpuakna piak hi a, amah kiangah donation piak ding hi’n taklang hi. Tualou in CCpur- Imphal Taxi Owner Society(CITOS)in July 5, 2014 ma ngei in tax a piak dingte uh pe dingin theisak hi.


HSLC Compartment Exam,2014
Imphal, July-3:Board of Secondary Examination (BSEM) thusuak dungzui in June 30, 2014 a om ding HSLC(Compartmental) Examination,2014 ahun kisuan nungin July 5,2014(Kiginni) a om dingin bikhiah hi a,exam centre leh ahun(timing) banah May 30, 2014 a Notice kisuah a kitaklangte khen lamdang hilou ding chih ahi hi.


SUUNNA
Dr. Zarzolien @ Dr Z.Z.Lien (61) f/o Buonga of Tipaimukh Road, Hill Town tuni zinglam dak 9.00 in stroke ziakin si a, tuni mah in kivui hi.
Seikholet (85) f/o Kamkhawsat of Thangtindal Colony, Chiengkonpang zan nitak dak 7.00 velin ihmu lum in si a, tuni’n Chiengkonpang hanmual ah kivui hi.


IMPHAL NEWS:
C Doungel, RK Shivachandra leh Kh Ibomcha in BJP zom uh
Imphal, July-3:Tuma deuh a Lok Sabha election laia NCP candidate banah ex-Minister C. Doungel banah All India Trinamool Congress(AITC) akipan RK Shivachandra leh Kh Ibomcha in tuni’n AITC nusia in BJP zom uh a, BJP Manipur Pradesh President Th. Chaoba in amaute lalut chihthu om hi. Tuni’n party office a Press-te a kimuhpihna hun ah Centre ah NDA govt a dinkhiak nungin BJP in masawn deuhdeuh hi’n gen a,tuni a makai poimawh 3 in BJP a zop uleng party hat leh muanhuai hi a belhtak chih thei uh hi’n gen hi. Tuni a mi 3te banah NCP Executive member L Kaikam of Saikul A/C, Keishamthong Kendra Block Trinamool Congress President RK Gyankishwar leh President of Lamlai Block Trinamool Congress President Ibotombi in leng BJP zom uhi.


Manipur a IFCD employees te’n project teng khawlsak sawm
Imphal, July-3: IFCD a regular employees (Plan) te’n kha 5/6 lawh lalou in om uh a, huaiziakin Ad-hoc Committee on Non-gazetted Employees (Plan), IFC Department, Manipur pawl kibawlkhia in Govt in July 8, 2014 tan in lawh piaklouh a omteng a piakkhiak kei leh Thoubal Project, Khuga Project leh Dolaithabi Project a nasepna teng khawlsak vek hiding chi’n puang uhi. Thusuakin a gendan in IFCD a sem Non-Plan nuaia om staff te’n regular takin lawh la uh a, huchi kalah Plan nuai a om regular employee te’n apaisa kha 5/6 akipan lawh a muhlouh ziakun govt nawhna ding in Adhoc Committee kibawlkhia in panla uh hi’n gen uhi.


UCM in 14th Foundation zang uh
Imphal, July-3 :United Committee Manipur(UCM) ten tuni’n Lamphel a a office uah 14th Foundation Day zang uhi. Hiai hun ah India govt leh NSCN(IM) ten June 14, 2001 a ‘without territorial limits’ chi a kilemna suai akaih uh deihlouh ziaka kiphinna a si mi 18te suunna om a, zahna leng pia uh a, huai hun ah Chief Guest in H. Nandakumar Sharma, Vice-Chancellor MU pang hi. Functional President in Y. Nabachandra, President UCM pang a, Guests of Honour in BM. Yaima Shah, President, UPF; E. Johnson, President, IPSA; Sunil Karam, President, NIPCO; Yumnancha Dilipkumar, President, PANDM; Ksh. Somorendro, President, ACOAM-Lup; Y. Leirikleima, President, Kanglamei leh Dr. Y. Mani Khuman, President, AMUCO te pang uhi.


Security-te’n galvan tamtak mukhia
Imphal, July-3 : Security force ten tuni in Bishnupur district sung Karong Lake area ah galvan tamtak mukhia uhi. Thusuak kizadan in security force-te’n Loktak lake leh Karong lake area lak operation a bawlna uah Karong lake area munkhat ah galvan tamtak mukhia uhi. Galvan muhkhiakte bel, AK-56 rifle 1, AK-47 1, Rocket Lauhcher 1, .2 rifle 1, revolver 3 leh thautang tamtak hi’n kigen hi. Huai area ak bel UNLF, KYKL, PREPAK te omna mundeuh hi a, tulai in security force te’n operation a neih zel ziakun helpawlte kihemkhia uhi. Loktak lake bel Imphal akipan km. 45 vel a gamla hi a, helpawlte’n huai kimlak kibukna mun din neisek uh a, tua ziakin security force te’n operation a bawl zel uh hi’n kigen hi.


Manipur Chronicle Daily office hong
Imphal, July-3 : Palace gate Imhal ah tuni’n All Manipur Working Journalists’ Union(AMWJU) President W. Shyamjai in Manipur Chronicle Daily, Imphal Branch office hong hi. Manipur Chronicle bel Silchar a kisuah Daily Newspaper hi a, Imphal ah Branch office a hon uh hi’n kigen hi. Huai hun ah Seram Herojit Singh, Publisher, Manipur Chronicle; Th,. Shyamo, APO (Press) DIPR leh Dinamani Haoba, ex-President AMWJU ten leng uap uhi.


Licensed vendor-te’ meeting
Imphal, July-3 : Purana Keithel leh Khwairamband bazar a licended vendor ten tuni’n meeting nei uh a, bazar kim leh kianga street vendors-te tungtang genkhawm uhi. Huai hun ah bangbang thupuk uhiam hiam chih theih hikei mahleh lampi kianga vanzuak a omte tawh kisai govt kiangah thil omdan theihsak a license neiloute hawlkhe dingin ngen uh hidan in kigen hi. Alehlam ah street vendors te’n licensed vendor-te kilawmloutak leh simmawh takin bawl zel uh a, huai tawh kisai a govt in pan alak kei aleh kiphin ding uh hidan in gen leuleu uhi.


Siluang khat kimukhia
Imphal, July-3: Mayang Imphal a om PWD quarter a chowkidar tenna compound sung ah tuni in pasal khat sisa a muhkhiak in om hi. Misi bel Saikhom Shyam (29) s/o 9late) S. Tomba of Mayang Imphal Maning Leikai hi’n kigen a, ataksa tungah liamna muh ding bangzahhiam om a, kuate’ thah hihiam, chih theihtel hilou a, police te’n siluang la in RIMS morgue ah koih uhi.


State level Pineapple festival
Imphal, July-3 : Development of Organization, Andro Kendra (DOAK) te saina in Andro AC sung Thambalby Market complex mun a 7th State Level Pineapple Fair-cum -Youth Festival, 2014 om tuni in zou uhi. Tuni a hunkhakna ah Agri. Minister Md. Abdul Nasir leh Andro A/C MLA Th. Shyamkumar te’n Chief Guest leh Functional President hihna tawh uap uhi. Oinam A/C MLA Dr. I. Ibohalbi. S. Sanathoi, Project Manager, RSBY, Raja Medicity, North AOC leh 2nd Assam Rifles a CO Digvijay Sapra in Special Guests hikawm in uap uhi.


TUNI THUPI:
“Pilna neilou namte ahi ua, amau ah theihsiamna a om kei.”
– Diuteronomi 32:28

zogam thupuak logo