UPDATES:

S5 Box

ZOGAM.COM Login

Zogam Thupuak | 19 June 2014

Dynamo rechargeable battery ziakin mipi patau: ZRA te’n mi 2 man

Lamka, June-18: New Lamka a Sauliim Restaurent khangzek a Sauliim Book Burn kong, College Road ah tuni sunnung dak 1:30 velin thil kitun khat muh hi a, mi tamtak in bomb hiding a muangmawh in patau mahmah uh a, Police te’n a theih un amun delh pah uh a, bomb hiding ginta in Police station ah kem uhi. SP/CCpur makaihna in Police te’n thil kimukhia hoihtak in enchain uh a, huchi’n SP/CCpur in bomb hilou in electronic device thil hi’n gen hi.Thil omdan hoihtaka suizui nungin tuni nitaklam dak 4.00 velin ZRO/ZRA te’n bomb hiding a gintak koihtu mi 2 mankhia uh a, amau Thangthianmuang (20) s/o Hauzachin of ColonyVeng, Bungmual leh Khuppu (24) s/o Chinpu of Zoar Veng, Bungmual hi un kigen hi.
Matkhiak a om mi 2te’n a gendan un tuni’n Gangpimual a STC/BSF camp gei ah Dynamo battery rechargeable khat charging theihhiam chih test uh a, ahoih nawnlouh ziak in College road a Sauliim Book burn kong ah paikhia uh a, bomb hilou in Dynamo battery rechargeable’ hi’n gen uhi. Amau a genbehna uah ‘gari a leh taikik in hoihtak akitun athil paih uh bomb ahihlouh thei kawmkawm in phelkhia in bomb hi maithei’ chia agenziak un a kiangnai zeka om Sauliim Book Burn leh huai kim a dukan/dawr/pharmacy neitute ban ah akiang a om mipi patau in bomb dan in thei uhi. Mi phatuanmngaite’n Police te theisak uh a, Inspector MA Salam OC/CCpur makaih in Police te’n Sauliim Book Burn naih uh a, chiang(stick) zangin a khoihnung un puak theilou a, OC/CCpur in akhut ala in leilak denna a, bangmah a chihlouh ziak in Police Station ah tawi uhi. Huai zawh in SP/CCpur makaih in Police te’n Sauliim Book Burn kim naih in thil omdan enkhia uhi.
Sauliim Book Burn kongah bomb hidia ginlelh Dyanamo battery rechargeable koihtute ZRA/ZRO te’n suizui in mankhia uh a, thuhilhna hoihtak pia uhi. ZRA/ZRO apan kizadan in maban ah khawpi sunga numei, naupang leh mipi patausak thei ding thil himhim kuaman koihlou ding a theisak kawmin a koihtu matkhiat ahihleh action khauhtak lakkhum hiding chi uhi. Hebron Veng Village Authority, YPA leh PTC ban ah bialtu MDC Gouzamang, EM/ADC in Sauliim Book Burn kong ah bomb bangmai thil koih a, mipi patausaktu mi 2 te mawhpaihthu puang uhi.

Rayburn College ah Green Workshop & Seminar om ding
Lamka, June-18: Delhi Paite Indongta, Delhi leh Environment Friends pawl saina in June 20-21, 2014 sung New Lamka a Rayburn College ah ‘Green Seminar& Workshop’ kichi omding a, huai thu ah tuni zing dak 7:30 in New Lamka a Sauliim Restaurent ah Delhi Paite Indongta leh Environment Friends makaite’n Press-te kimuhpih uhi. June 20, 20141 zinglam dak 10:00-11:00 sung ‘Roundtable Consultative with educators and eminent person’om ding a, invitees mi 50 vel telding uhi. Huai zawh zinglam dak 11:15 in Vungzagin Valte, Parliamentary Secy in khuallian apang in Green Exhibition hong ding hi.
Huai zawh sun dak12 in Interactive Workshop om ding a, huai ah Dr. Chingnunsiam, Biaklun Shoute, Soumen Dey, World Wild Life, Sikkim Team-te mi 4; K.Vungzamawi, Haukhum Hauzel, Member Secy Planning Board, Mizoram leh Kham Suanmung, DFO/CCpur te’n thupi tuamtuam zang in thugenn ding uhi. June 21, 2014 in mipi kikhopna g om ding a, Health Minister Phungzathang Tonsing khuallian apang in Green School Initiative, Green Volunteers leh Eco-Tourism hong ding hi. Program hunsung in Goukhomang, President, ZYA Gen HQ, Soumen Dey, Haukhum Hauzel, Sikkim team te’n thupi tuamtuam pansan in thugen ding uh a, khuallian inleng thugen ding hi. Delhi Paite Inndongtate’ gendan in Green Seminar kichi CCpur dist a singtangmi teng adia patkhiak hi genkawm in kuapeuh telchiat dingin chial uhi.

MGNREGS ni tha pung ding
Lamka, June-18: Ministry of Rural Development Govt of India in Feb 13, 2014 akipan in India state 34 ah MGNREGS 2014-15 akipan Job Card tungtawn a nitha(wages) bangzahzah hiam in pungsak uhi. Haryana state a Job card holder te’n ni 1 in Rs.236 lawh ding uh a, state 34 lak ah nitha a tampen hiding a, Arunachal Pradesh, Sikkim, Nagaland leh Tripura state a Job Card holder te’n ni 1 in Rs.155 lawh in Job card holder te’ ni 1 thaman a tawmpen hiding hi. Manipur a Job Card holder te’n kumthak 2014-15 in ni 1 in Rs.175 lawh ding uh a, kumlui 2013-14 a ni 1 thaman Rs.153 apan Rs 22 in tamzaw ding hi.Kum lui 2013-14 in CCpur dist a Job card holder te’n ni 39 thaman sem man lel uh hi’n higen hi.


Dist Surveillance Committee kiphut
Lamka, June-18: CCpur dist ah natna tuamtuam (epidemic) hong om phut hileh huai hun a panla ding Dist Surveillance Committee kiphutkhia a, PK Jha, IAS, DC/CCpur in Chairman len hi. Vice Chairman in Thangchinkhup Guite, CMO; Member Secy in Dr. F.Thienkhogin, DACO; member-te DMO/CCpur; DHPM, NRHM/CCpur; EE/PWD; SP; DI & PRO/CCpur; Project Director, DRDA/CCpur; DSWO/CCpur; ZEO/CCpur, Med Suptd, Dist Hospital; DTO (Transport); DAO (AIDS) leh DFWO/CCpur hi uhi.


Liverpool Academy adi’n mi 5 ching
Lamka, June-18: Liverpool International Football Academy, Pune a luttheihna dingin kal 1 sung selection om a, huai ah Lamka mi 5 ching uh a, amaute’n football academy a kimawl a zilkawm un scholarship ngahding uhi. Under-17 ah Lianminthang Vualzong of D.Phailien, Henry Thanglalmuan of Zenhang Lamka, J Dd Haokip of Molnom leh Under-19 ah Biaklian Paite of New Lamka banah Elmin Hau of Kangpokpi hi uhi. National player hihtheihna dingin football academy hoihdeuh a lutte lawhching sek uh hi’n kigen a, tunitan a eilam mi national player omte leng football academy alut sung ua club te’n a leikhiak uh hisek hi.


Summer Mela om ding
Lamka, June-18: KSO/CCpur leh Brothers Enterprises, Assam saina in June 20 apan July 2014 khasung Tuibuong Peace Ground ah Summer Mela omding hi. Huai ah Mary Goal, Magic show, Disco Dance, Bike rider, Mickey Mouse, Baby sitting round, Rusiun plane, Dragon Plane om ding a, dawr/dukan tuamtuam ah thil tuamtuam mipi leitheih ding kizuak ding hi.


World cup superstars
World cup tawh kisai ‘World cup superstars 2014’ chih kisuahna The Week magazine copy tamlou hongtung a, a deihte’n IB Road, Lamka a Dicky Choose & Pick (News agency) ah leitheih ding hi.


Behiang & Sinzawl PHC telding
CMO Mini Training Hall leh DFWO Conference Hall ah ASHA worker te ading in Home Delivery of Contraceptive workshop pailel ah June 23, 2014 in Behiang PHC te leh June 26, 2014 in Sinzawl PHC nuai a ASHA worker- te telding uhi.


Badminton tournament kipan
Lamka, June -18: Bungmual Youth Club (BYC) nuaia om Bungmual Badminton Association (BBA) saina in Bungmual Community Hall ah Badminton Tournament 2014 kichi pan uh a, tua ah single, double leh mixed double ah mi tamtak tel uhi. Haulianmang @ Mamang Hanghal in Chief Guest a pang in tournament hong a, huai hunah Khupthang Social Worker, Paulianthang Naulak 2nd OC Thanlon PS leh mi poimawh tamtakin uap uhi.


Life Skill Education Program
Lamka, June-18: Imphal Bal Seasthya Project nuai a World Vision saina in June 16, 2014 apan IB road a Synod Hall ah ‘Life Skill Education Program kipan a, tuni’n zou uhi. Huai hun ah Megha, Community Health Co-ordinator, World Vision in sinsak a, student 30 vel tel uh a, student te’n omdan hoih, zu-le-sa banah khamtheih akipan taksa kikep siangthou dingdan sinsak uhi.


Bethel Home Mission’ website hong
Lamka, June-18: Myanmar Sagaing Division sunga Makuri tribe laka Missionary sem, Evangelist B. Pauven Ngaihte in a nasepna Bethel Home Mission adingin website (http://bhm-indo-myanmar.org/ ) hong hi. Bethel Home Mission (BHM) ahihleh May 24, 2013 in Tamu, Myanmar ah kipankhia hi.


SUUNNA
Miss Dimthianmawi (17) d/o Ginkholal of Tangpijol tunitak dak 6.30 in TB natna ziakin Dist. Hospital ah si a, aluang puakna ding YPA Lamka Unit in hankuang bawlsak in Tangpijol ah vui dingin kipua hi.


IMPHAL NEWS:
Uprising/Unity Day zatna om
Imphal, June-18 : AMUCO leh UCM kigawmte panlakna in tuni in Kekrupat ah the 13th Great June Uprising/Unity Day zatna om hi. Huai June 18, 2001 a Manipur gam leitang humbitna dinga hinna pia martyr 18te zahna piak hi uh a, a kihalna mun uah mipi tamtak in pakvui thah uhi. Huai hun ah Observation Committee chairman Y. Nabachandra, UCM President Dr. Y. Mani Khuman, Vice Chairman, Observation committee & President AMUCO Th. Ramani; General Secretary, Nupi Samaj, L. Memchoubi; President, Poirei Leimarol, Kh. Samuel; President, Kharam Tribe Union Manipur; P. Tongthang Zou, social worker telin mi poimawh tamtak in uap uap uhi.


Hills ah Central Agriculture College
Imphal, June-18: Th. Chaoba Singh, President, Manipur Pradesh BJP makaihna BJP High power delegate team a Gen. Secretaries tuak M. Ashnikumar Singh leh Laimayum Bashanta te’n tuni’n PMO leh Union Home Ministry ah memorandum pia uh a, huai ah Manipur a agricultural productt puahphatna ding proposal banah Manipur Rural area ah CAU Iroisemba nuai a Central Agricultural College bawlkhiak ding in phu uhi. All Loktak Lake Area Fishermen tawh kithuzak in kum 2011 a Loktak lake eviction zia a buai ngabeng mi 777 te’ special occupational rehabilitation package piak ding, Hill area ah horticulture development scheme sai ding chihte’ proposal atel hi’n kigen hi. Union Minister in Manipur a rural area mun hoih deuh ah Central Agriculture College bawlkhiak ding in chiam a, hiai tungtang BJP teamte’ ma ah official a puankhiak pah hidin gen hi.


Inter-District boundaries enzui dingin sub-committee kibawlkhia
Imphal, June-18 : Manipur ah nam tuamtuam tengkhawm ahih dungzui in district gamgi kichiantak omlouha mun tam mahmah a, tunaichin in gamgi thu in nam khat leh nam khat kal kitheihsiamlouhna tunthei ding in om hi. Huaiziakin Inter-District boundaries enkai dingin sub-committee bawlkhiak ahi hi. Huai sub-committee ah Chairman hihna Z. Kikhonbou Newmai in hihna len a, member-te TN Haokip, MLA; D. Korungthang, MLA ; Samuel Raison,MLA leh IFCD Minister Ngamthang Haokip hi uhi. Amau HAC Vice-Chairman tel in June 9, 2014 in meeting nei uh a, tua hun ah Sub-Committee bawlkhia uhi.


Helpawl mi 2 apan galvan mukhia
Imphal, June-18: PRO Assam Rifles thusuak in a gendan in Lilong area ah helpawl om chih thuguk a zak uhziakin A/R te’n tuni’n Lilong area ah Motor Vehicle Check Post(MVCP) khat bawl in huai ah Maruti-800 (No. MN-01S/3497) a tuang KCP cadre 2 mankhia uhi. Mat a omte S. Shantikumar Singh(40) s/o S. Nilo Singh of Singjamei Naorem Leikai leh S. Tomba (32) s/o of S. Tombal of Kakwa Keibung Oinam Leikai hi uh a, amau akipan 9mm pistol leh magazine khat, 9mm tang 4, Chinese hand grenade 1 leh sum Rs. 6,700 muhkhiak hi a, mi 2 leh van muhkhiakte Lilong Police station ah piakkhiak hi’n kigen hi.


Army recruitment result suak
Imphal, June-18: PRO Defence Wing thusuak in a gendan in Leimakhong ah May 25, 2014 in Army a General Duty, Soldier Tradesman, Soldier Technical lakna din Common Entrance Examination (CEE) leh CBET tungtawn a Soldier Nursing Assistant lakna ding in Shillong ah April 24-25, 2014 a exam result puankhiak hi a, candidate telkhiak a omte’n original document leh document teng xerox copy 1 attested bawlsa toi in June 24-25, 2014 zing dak 8:00-11.25 am sungin Rangapahar ah joining letter lak theih ding hi.Thuchian kimzaw PIB(Defence Wing), M. Sector, Imphal te’ Notice Board ah ettheih hi’n kigen hi.


Sepna neilou mi 7,02,397 om
Imphal, June-18: Manipur a district tuamtuam a Employment Exchange ah June kha tan in lekha thei himahleh sepna neilou mi 7,02,397 om a, huai lak ah pasal 5,00,888 leh numei 2,01,507 hi’n kigen hi. Imphal West district a mi 1,82,987 lakah pasal 11,932 leh numei 63,665 hi a, Imphal East district a mi 1,11,645 lakah pasal 79,345 leh numei 32,300, Thoubal district a mi 1,18,132 lakah pasal 92,970 leh numei 25,162, Bishenpur district a mi 68,272 lakah pasal 50,801 leh numei 17,471, Churachandpur district a mi 70,471 lakah pasal 51,917 leh numei 18,544, Ukhrul district ah mi 28,554 lakah pasal 20,105 leh numei 8,439, Senapati district a mi 58,912 lakah pasal 42,624 leh numei 16,288, Tamenlong district a mi 24,899 lakah pasal 18,877 leh numei 6,022, Chandel district a mi 29,759 lakah pasal 20,439 leh numei 9,320 leh Vualphalou(physically challegend) mi 2,643 lakah pasal 1,774 leh numei 869 hi’n kigen hi.


Mipi’n sik gulai URF cadre 2 mankhia
Imphal, June-18: Loitang Khunou ah a kizang nawn lou Spinning Mill complex sung a sik(Iron rod) leh sik chi tuamtuam gulai mipite’n mi 2 mankhia in kua hi uhiam chih a kansui ua leh SoO atel Loitang Khunou a 9- Dogra te kianga designated camp apan URF cadre ahihdan thei khia uhi. Mi 2te’ Sinam Suresh (31) s/o S. Rabei of Chingmeirong Maning Leikai leh Akham Prakash (33) s/o (late ) A. Noren of Singjamei Thongam Leikai hi uhi. Huai thu ah mipite’n Loitang Khunou Primary School ground ah kihouna nei uh a, huai ah Loitang Khunou apan URF te’ designated camp suankhiak dia phut ding leh CM kiangah memorandum piak ding in leng thutanna la uh hi’n kigen a, sunnung dak 2:00 velin Sekmai police te’n mi 2 te’ va pawkhia uh hi’n kigen hi.


Sabeng tu 1 matkhia: Rs 5000 liausak
Imphal, June-18: Thoubal Commando te’n tuni’n Kakching area a Loisipat mun ah sabeng te’ kibukna mun hidia gintak valuh uh a, sabeng mi 5/6 vel omte’ lakah mi 1 mankhia in adangte’ taikhe thei uh hi’n kigen hi. Mat a om Khuleibam Muffizudin(32) s/o (late) Niamalik of Sora Ching Wangma hi a, Kakching police te’n Munal, Kakching Forest Range officer kianga pekhia in huai apan, Divinl Forest Officer/Thoubal kiang tut hi a, Rs. 5,000 liausak in om hi.

zogam thupuak logo

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING