UPDATES:

S5 Box

ZOGAM.COM Login

Hornbill News | 29 August 2013

hornbill news logo*3rd World Zomi Convention a ding Information Centre Honkhiak in Omta
*Third Lamka Book Fair Zousiangta
*HPF CCpur District Level Working Committe Bawlkhiak in Om
*Niin Buakna Truck' Battery Kigumang Nawn
*Sum Demand-tu Police-te'n Mankhia uh
*YPA GHQ in Kipahthu Puang

Tanchin Kimzaw:
***Third World Zomi Convention, October kha a om ding toh kisai in tuni zinglam 7:30 AM in Hebron Veng, New Lamka ah Information Centre ding honna LB. Sona Chairman ZC in nei a, Pastor T. Vungkhansuan, Local Pastor EBCC Hebron in latna nei hi. LB. Sona in saulou a thugenna ah, sum-le-pai giautauna ziak in Convention budget bang leng deithusam banglou in Rs 14.6 lakhs lel kibawl chi hi. Aman a genzelna ah, i identity kepbitna ding a gilkialna leh haksatna tuah hun ah leng lungkelou a Saipi pai bang a paitou ding in Third World Zomi Convention makaite kiang ah ngetna leh hasawtna nei hi.

***The Third Lamka Book Fair, Synod Hall, IB Road a om tuni in zousiangta uhi Hiai hun sung in children books, spiritual & history book zuakkhia tampen uh hidan in Organizer-te'n gen uhi. Hiai book fair apan et in nu-le-pate'n a tate uh laisimna lampang ngaihsak uh ahihdan muhtheih in om hi. Orgniser lam apan thu kizadan in, Lamka ah book fair pen zawhsiang in om phot mahleh zingchiang apan Imphal a Nupilal War Memorial Complex ah nei sunzom nawn ding uh hi'n gen uhi.

***Tuni zinglam dak 11:30 in Zomi Council Administrative Building ah, Hill Peoples Forum, Churahchandpur district level working committee a vaipo ding kitelna neih in om hi. Hill Peoples Forum ahihleh July 13, 2013 in phuhkhiak ana hita hi. Hill Peoples Forum in panlaktouh zel sawm uh ahih dungzui in Manipur a district teng ah district level working committee phuhkhiak vek hiding hi. Churachandpur Distirct Level working committe phuhkhiak ahih tawh kiton in member ding in mi 7 guanna nei ngal uhi. Member ding a guan thak a omte bel - Lalrothang, John Benedict, Vungsuanthang, MC Chinminthang, Th.Khamminthang Vaiphei, H.Pauzalal leh TK Hang te ahi ua, meeting masapen Lalrothang leh Vungsuanthang-te'n makaih ding uh chi in thupuk uhi. HPF District Level Working Committee a member thakte a ding in Pastor T.Thoumngell in thumsakna nei hi. Hiai hun ah, LB Sona, Chairman, Zomi Council in leng uap a, a thugenna ah, Manipur a singtangmi omte'n voice khat i neihkei uleh, i demand-te uh bangmah pichinglou ding ahi chi a, voice khat i neihkei leh, government in political dialogue leng hon neihpih ngeilou ding ahi chi'n gen a voice khat i neihtheihna ding ua, kithutuaktak a khe khat a dinkhawm hun ahi chi'n gen hi.

***Apaisa August 27, 2013 nitak in meltheihlouh pawlkhat in, Town Office, IB Road a kikoih sanitary truck MN01-6879 battery gumang uhi. Battery kigumang toh kisai in V.Kamzagin, EO/Town in police ah report bawl a, police in leng FIR No. 75(8) 2013 CCP PS U/S 379 IPC tungtawn in guktakna case khat chiamteh in, kansuina nei ngal uhi.

***August 27, 2013 nitak dak 10.00 vel in,Teijang khua a Nepali Basti ah meltheihlouh pasal 2 in sum 20,000 demand va bawl uhi. Police apan thu kizadan in, Nepali Basti a omten sum piak ding a neihlouh ziak un, pasal 2-te'n Hill Town, Tipaimukh Road ah a sum demand-te uh pe ding in thupia uhi. Hiai toh kisai police-te kiang ah theihsak ahihdungzui in, police in kansuina nei in, mi nih-te lak a khat, Lunkhongam Haokip, 28 S/o (L) Ngamkholun Haokip of Ukha Gate, Kwakta, zan August 28, 2013 sunnung dak 4.40 vel in, sum la ding a kuanlai mankhia uhi. Hiai tohkisai police in FIR No. 76(8) 2013 CCP PS U/S 506/511/34 IPC & 25(1-C)A.Act tungtawn in case chiamteh ua, a thukzaw in kansuina nei nei zom uhi. Sum demand-te lak a khat mat a om pen, tuni in court ah dingsak in om a, court in ni 4 sung, September 2, 2013 tan police custody a om tadihphot ding in thutankhum hi.

***Tuni zinglam dak 10.45 vel in Bangladesh Supreme Court a Judge semlel Justice Bhabani Prasad Singha in Lamka hongpha in Khuga dam etna hong nei hi. Official lam apan thukizadan in, Justice Bhabani Prasad Singha ahihleh, Manipuri tribe ahihdungzui a khat-vei bek Manipur phak a ut ziak a Manipur hongpha hidan in kigen hi. Bangladeh Supreme Court Justice Bhabani Prasad Singha ahihleh apaisa August 24 in Manipur hong tung a, Manipur a mun tuamtuam pha a zingchiang, August 30, 2013 in Manipur nusia in Bangladesh zuan nawn ding hidan in gen uhi.

***Young Paite Association General Headquarters panlakna a khotang a siatna leh sualna douna a panlakna ah muh theih in gah kipahhuai kilangta a, tuaziak in YPA GHQ nasepna leh panlakna kithuahpih kuapeuhmah kiang ah YPA GHQ sik-le-tang in General Secretary Paukhanmawi Guite in mipi kithuahpihna ziak in kipahthu gen hi. Banah, sinlai naupangte' kicheina, omdan leh gamtat-khohei etzuina tawh kisai a a kisaipih mite leh siamsinna innte kiang a theihsakna a bawlna uah huntawp a piak bang un, September 01, 1013 apan in siamsinna innte etkhiakna leh vehna nei ding uhi.

Gamdang Thuthang:
***Syria buaina a va kigolhna ding in US President Barack Obama in thupukna tangtak in bawl naikei mahleh, kigolh theihna ding in American mipite lak ah case bawl panta a, Damascus ah nipikal lui a, chemical galvan zang a kibeihna mun etchetna leh suichetna nei a om lel UN Inspection Team-te'n a thilsui uh zou kinmeng ding in nawhna nei hi. Huchibang kal ah, UN in khovel gam makaite kiang ah Syria buaina a kigolhna ding ah military strike sang a diplomacy zang zaw tadihlai ding in ngetna bawl hi. Britain in Syria buaina ah kigolh theihna ding a National Security Council's draft resolution tuh UN Security Council kiang ah thehlut a, UN Security a Permanent Member gamte'n ngaihtuahkhawmna nei ua, himahleh China leh Russia in galvan leh sepaih thahatna tawh Syria buaina ah gamdang kigolh ding deihlou ua, naktak in nang zom lai uhi. Himahleh, Syria ah UK, US leh France in UN in phalna pia piakei taleh Syria ah kigolh ding uh hi'n kilang hi. UK, US, France leh tumlam gamdangte ngaihdan in, kidouna a chemical galvan zatna tuh war crime ahihbanah, crime against humanity ahi a, gawtlouh a koihlouh ding chih ahi. Tuabangkal ah, British opposition Labour Party in UN Inspection Team-te'n chemical galvan kizang ahi chihleh Syrian solkal in chemical galvan ahi chih muanhuai huntawk a chetna ding a omkei leh Syria a Britain in military strike a neih ding zupna leh zahtuapna pialou ding uh hi'n gen ua, tua ziak in Syria a tumlam gamte kigolhna ding tuh ni bangzah hiam in zekaisak nawn hi. UN Team-te'n Ningani in a thil suina uh sunzom nawnta uhi.

***Syria buaina ah Tumlam gamte kigolh ding a a kisakkholh uh tawh kiton in, Middle East a player poimawh mahmah Israel in Syria tualgal ah kigolhkhakna bangmah neilou ahihdan puang a, himahleh, Syria a tumlam gamte kigolhna ziak a Israel khoih leh hihnat tum a gamtatna peuhmah khauhtak a thukkik hiding in puang a, tua ding chauh in Israel kiginkhol hi. Israel in sepaih reserved a a koih teng leng duty ding in samkhiata a, missiles interceptor-te leng kigingsa in koihta hi. Iran pansan Fars News Agency in Syrian senior military leader khat thugen a gelhna u'ah, 'Tumlam gamte'n Syria a beih uhleh Israel leng a kuangzak ding,' chi ahi chi'n gelh uhi. Israeli Prime Minister Benjamin Netanyahu in a genna ah, Syria tualgal ah Israel in kigolhkhakna a neikei a, himahleh Syria buaina ziak a Israel interest sukha leh khoihkha thiltung a om peuhmah leh bel khauhtak a thukkik hiding in gen hi. Syria a tumlam gamte kigolhna ding thawm ging a ngaih deuhdeuh tawh kiton in Israeli solkal in mipite kiang ah mai tuamna, gas mask hawmkhiakna nei a, Israel in a opkhum Golan Heights a mipi 70% velte kiang ah post office tungtawn in gas mask hawmkhiata uhi. Kum nih val Syria buaina ah mihing lakh khat in sihna tuakta ua, mi tamtak liam-le-bai a om in, millions-a-simte gamdang ah bukna leh bitna zong in galtai uhi.

***US Army Psychiatrist, Major Nadil Hassan in 2009 a Fort Hood, Texas ah a US sepaih 13 kaplum a, midang 32 a kapliamna thu ah military court in si ding in thutanna bawlkhum hi. US Army-te Afghanistan ah lut ding a a kisaklai ua thiltung ahi a, Nadil Hasan in Muslim gamte ah America in kidouna bul apatte ziak a lungkimlou a, phuba lakna a huchibang a US sepaihte kaplum ahihdan gen hi. Gamtat khelhna ziak a si ding a thutan khum a om US sepaih 500 vel kikhum khawmna mun Kansas a Laven Worth ah Texas apan suanlut hingal ding hi. US military court in si ding a thutanna a bawlkhumte leng that mengmeng tuan khollou a, 1961 kum a US military court in mi a khailup chihlouh, kum 52 sung US military court in si ding a thutanna a bawlkhumte leng that kha nawn nailou hi'n kigen hi. Major Nadil Hassan in si ding thutan khum a aomna pen appeal bawl thei mahleh atawmpen in kum li lut ding hi.

***Khovel a Film Festival upapen Venice Film Festival a 70-veina honkhiak in omta hi. Tukum Venice Film Festival a kipahman sangpen, Golden Lion Award kituh ding in leitung mun tuamtuam apan in film 20 telkhiak in om a, huai lak ah documentary films nih leng tel hi. Hun paisa ah, Venice Film Festival ah narrative film-te chihlouh documentary film-te kidemna ah telsak ana hingeilou uhi.

***Argentina ah mi sang thum vel in shale gas exploration neih ding dalna leh deihlouhna a kiphinna a neih uh thagum suahna in zui a, Argentine Congress kong ah kiphinna neite leh police-te nasatak in kinawktuah uhi. US energy company lian mahmahte lak a khat Chevron leh Argentina solkal in a etkol company khat in pangkhawm a Argentina ah shale gas exploration neihkhawm tum uh hi'n kigen hi.

***Asaram Bapu kichi vai pathian kibawltawm khat in Rajasthan a Jodhpur ah amah ashram in a etkol hostel a om numei naupang khat kilawmloutak a khoih leh thagum a luppih ahi chi a ngawhna a tung ah bawl ahihnung in, Jodhpur police in self-style pathian tung ah thubuai bulhkhum in om a, a tung a ngawhna omte dawnna a piakna ding in dakkal 24 sung hun neita hi. Himahleh Asaram Bapu bel Madhya Pradesh ah bittak leh bubittak in om thei leuleu a, media-te'n Madhya Pradesh ah political vengbitna nuai a om anop leh noplouh a dot uleh thangpai mahmah a, Sonia Gandhi leh a tapa' thubawl ziak a hichibangteng tuak hi'n ngawh hi. Hichibang a numei naupang tung a tatsiatna a tung ah ngawh leh bulh a a omlai a bangziak a Jodhpur police-te'n Asaram Bapu manlou a, thudotna maituah ding a sapna bawl thawh maimai uhiam, chi'n dotna tam mahmah a, political connection hoihtak leh nungzui a hauhziak hi'n numei pawlte'n ngawh ua, kintak a matkhiak a, dan tawh kituak a a tung ah suizuina pan ding in nawhna nei uhi.

***Land Acquisition Bill ah amendments 166 bawl ahihnung in tuni'n Parliament ah Rural Development Minister Jairam Ramesh in luikhiakna nei hi. Land Acquisition Bill ah amendments 400 bek bawl kul om hi'n kigen a, bill a paisuakna ding in nitak dak giat vel a vote lakna om ding hi'n kigen hi. Land Acquisition Bill a feature poimawh deuhte bel, mipi leh nautang hoihna'ng, hamphatna'ng leh khantouhna'ng kia in dan bang a compensation pia in gam laksak theihna, land acquisition right solkal in nei ding a, solkal in land acquisition a bawl chiang in rural area ah compensation a piak ding pen market value sanga a-leh li a tamzaw ahihding ahihbanah, urban area ah market value sanga a-leh nih a tamzaw ahihding chih ahi. Solkal in land acquisition a bawlsate ah kum nga sanga tamzaw compensation piaklouh a a koihleh Land Acquisition Bill thakpen zatkhum hiding hi. Gam zatak huam a public-private project sepsuahna ding a land acquisition a kulleh gam neitu 70% tan phalna poimawh a, private project sepsuahna ding a solkal in land acquisition a bawlleh gam neitu 80%-te phalna poimawh hi. Banah, compensation bangkim leh gam luahtute tenna mun ding bawlfel leh koihfel ahihma gam neitute hawlkhiak theihlouh ding chihte ahi.

***West Bengal gamsung Jaipalguri a om Alipurduar ah helpawlte hidia gintakte'n cycle khat ah bomb thang a kam uh CID bomb squad-te'n a lakkhiak tum a pan a laklai un puakzak kha a, mi khat a sih banah, mi dang nih in liamna tuak ua, damdawi inn ah etkol in om lel uhi. Bomb kikam pen agal apan hihpuak theihna ding in timer device kikoih a, tuaziak a puakzak hiding in police thusuak in gen hi.

***Ni tamlou paisa a Mumbai ah photojournalist numei khat ahon a pawngsualna a kigolhte lak a khat pen kum chinglou ahi chih ziak in tuni'n, a kum zah theihchetna ding in bone test neih in om a, result bel ni nih nung in kitheipan ding hi. Mumbai Police Chief in bel numei pawngsualna a kigolh teng piching ngen ahi ua, kum chinglou kuamah a omkei uh chi'n ana genta hi.

***India a Islamic helpawl Indian Mujahideen phutkhiatu Yasin Bhatkal leh amah panpihtu Asadullah Akhtar, zan nitak in India's Bihar leh Nepal gamgi zul a om Gorakhpur kiang ah matkhiak in om hi. Yasin Bhatkal bel Indian Mujahideen matkhiakna ding in Indian security agency tuamtuam abik in, IB leh RAW-te'n naktak in panla uhi. Yasin Bhatkal bel 2008 in Kolkata police-te'n guktakna ziak in khat-vei ana mankhata ua, himahleh huai hun in midang asak ziak un bail a khahkhiak in ana om nawn hi. Yasin Bhatkal bel India gamsung mun tuamtuam a bomb thaang kamna leh tuamtuam 10 ah kigolhna nei ahi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING