Hornbill News | 21 August 2013

User Rating: 0 / 5

Star InactiveStar InactiveStar InactiveStar InactiveStar Inactive
 

hornbill news logo*Awareness for Beneficiaries of Weavers Credit Card Holder and leh Mahatma Gandhi Bunkar Bima Yojana Neih in Om
*KSO in Dendrite Tamtak Mankhia; Haltum Uh
*Coalition on Environment and Natural Resource-te Project Launching Nei Ding
*New Lamka Area Village Authority Council leh New Lamka Area Women Committee Welfare Association-te'n Khamtheih Douna Pan Ding
*EBC Baptist Dorcas Fellowship, Lamka North Division Khawmpi 5-veina Om Ding

Tanchin Kimzaw:
***Tuni sunma dak 11:30 in Lailamveng a Muallum MDC Grace Zamnu tenna inn ah Action for Women and Child Advancement-te saina in 'Awareness for Beneficiaries of Weavers Credit Card Holder and leh Mahatma Gandhi Bunkar Bima Yojana (MGBBY)' neih in om hi. Hiai hun ah Mega Chandra, Project Officer DIC/CCpur resourse person a pang in sinsakna pia a, hiai hun ah Singngat area akipan a siam gan (weavers) mi 25 val paikhawm uhi. Churachandpur district ah Handloom lam ah lohching mahmah a, singtanglam ah adiak in Singngat leh Parbung area ah tulel in Deptt-te'n Handloom Centre bawlkhiak dingdan project buaipih lel uh hi'n gen hi. Singtanglam ah Handloom Centre honkhiak hileh siamgan (weaver) te' nitha kumdang a ni 1 a Rs 100 vel pen Rs 300 tan bang tungzou ding hi'n gen hi. Kum paisa 2012 in Singngat area ah weaver 25 te kiang ah loan kipia a, tukum in midang 38 te loan muhtheih nang un proposed kibol hi'n gen hi. Loan lak a om pen weavers te kibulpatna ding a piak hi ua, huai ziak a loan piak a omte'n amanpha theipen dia zangchiat a, loan ditkiklam leng ngaihsak poimoh hi'n Grace Zamnu in gen hi.

***Zan August 20 nitaklam in Tuibuang a Peace mela a hohte lak ah pasal naupang khat Dendrite kham KSO te'n mankhia ua, mat a ompa thudotna a neihna apan aamah kipuanna dungzui in Tuibuang a Elite store dawr bawl, Lulun Guite of Lajangphai kiang a denrite va lei zel uh ahihdan KSO-te'n theisuah ua, tuzingkal in KSO makaite'n Elite Store va luh ua, tua ah Dendrite piece 180, leh Correcting fluid, sumtang a tuat in Rs.9000 man ding mankhia uhi. Hiai thu toh kisai in tuni sunnung lam dak 1:30 in KSO press-te kimuhpih in Dendrite mat a omte haltumna nei uhi. KSO-te'n a gen dan un Lulun Guite in denrite piece khat ah teng 50/- zel in zuak a, himahleh a retail price ki print na ah teng 30 kigelh hidan in gen uhi. Tua banah KSO lam in press leh media te a kimuhpihna hun ua Paokai President in a thugenna ah, denrite kichi manphatak a zattheih ahi a, himahleh pasal naupang khenkhatte'n khamtheih ding in zang ua, tuaziak a khamtheih hihte kiang a Lulun Guite in ana piakkhiak ziak a mat a om ahihdan gen hi. KSO in apaisa April 26, 2013 in Tuibuang ah Dendrite tamkhop man in ana haltum ngeita uhi.

***Coalition on Environment and Natural resource-te saina in zingchiang August 22, 2013 sunma dak 11:00 in ICI Gospel Centenary Building Council Hall, opposite Sielmat Christian Hospital, CCpur ah Project launching neih hiding hi. Hiai programme ah Coalition objectives toh kisai Rev. Edwin Darsanglur in highlight bawl ding a, Plenary session hun ah Mr. David Buhril leh Mr. John Pamei te'n hun zatna nei ding uhi.

***New Lamka Area Village Authority Council (NAVAC) leh New Lamka Area Women Committe Welfare Association-te'n tuni zingkal dak 7:00 in Hebron Veng Village Authority House New Lamka ah joint meeting nei ua, tua ah New Lamka Area a khamtheih zuak leh sualna tuamtuam hihte dou ding in thupukna la uhi. Tua dung zui in hong tung ding August 28, 2013 sunma dak 11:00 in YPA Hall New Lamka ah awareness programme zatna om ding hi. Hiai hun ah New Lamka huam sunga mipite abik in nupite tengteng telchiat ding in Niangkhanching President leh Gouzavung Secretary, New Lamka Area Women Committe Welfare Association te'n chialna bawl uhi.

***Evangelical Baptist Convention (EBC) Baptist Dorcas Fellowship, Lamka North Division khawmpi 5 veina hongtung ding August 23-25, 2013 kikal sung in EBCC Bethel, Lailam Veng ah "Nang Vualzawlna hi in" Genesis 12:2 chih thupi a nei in khawmpi om ding uhi. Hiai hun ah Rev Paukhanmang Guite Divisional Superintendent Lamka North Division EBC thugentu in pang ding a, Pastor Dr. Thangminlun Mangte Local Pastor EBCC Bethel, Lailam Veng seminar pitu in pang ding hi. Hiai khawmpi ahihleh August 23, 2013 nitak dak 6:00 in Upa V. Ginchinpau Chairman DWC Lamka North Division in honkhiakna nei ding a, August 25, 2013 nitak in Upa HL Khai Vice Chairman DWC Lamka North Division in khakna nei ding hi. August 24, 2013 sunnung dak 12:00 apan in DS Lamka North Division makaih in kum nawn 2014 a Year Plan leh Budget ding genkhawmna nei ding uhi.

Gamdang Tanchin:
***Pakistan Security Forces thusuak in a taklat dan in, Quetta a van koihkhawmna inn, warehouse khat apan puakthei, explosives tonnes 100 mankhia uhi. Thusuak in a gendan in, hiai explosive vanzatte bel April, 2013 a Quetta ah Shia Muslims 200 val thahna a kizangte tawh kibang hi. Hiai tawh kizawitawn in mi 10 mat in om uhi.

***Decatur, Georgia a om McNair Discovery Learning Academy ah Ak-47 leh galvan dang khenkhat tawh kithuam in kum 20 vel a upa pasal khat school's front office ah va lut in, local TV stattion khat tawh kihouna nei ding in va ngiat hi. Elementary School ah police-te a tun u'tawh kiton in mipa'n thau khah a, himahleh si-le-liam kuamah omlou hi'n kigen. School apan naupangte hutkhiak in om ua, anung in a nu-le-pate chiat u'tawh kimukhawm nawn ua, huai school a clerk sem lel Antoinette Tuff in galvan tawipa kamsiamtak in ana khoudaizou hi'n kigen a, atawp in police-te kiang ah kipekhia a, a thiltup banghihiam chih bel bangmah theih in omlou hi.

***Egypt buaina nasatak ziak in, US in panpihna leh huhna $1.5 billion a piaklelte hihkiam ding leh khawlsak ding tawh kisai in Obama Administration a senior member-te'n genkhawmna nei ua, European Union Foreign Ministers-te'ng in leng Egypt tawh kisai in emergency meeting nei uhi. Huchikawm in, paihkhiak a om Mohammed Morsi gumtute kiphinna tung ah thagum zatna pen Egyptian interim Prime Minister in naktak in gum a, Muslim Brotherhood makai tamsem mat behlap lai ding uh hi'n kigen hi. Tuni tan in Egypt buaina ah mi 900 vel in sihna tuakta uhi. Thudang khat ah, Egypt a Muslim Brotherhood vaihawmna a piankhiak theihna ding a 2011 a kiphinna ah, huai hunlai a Egyptian President Hosni Mubarak paihkhiakna ding a Muslim Brotherhood makaihna a kiphinna neite tunga a thagum suahna leh hiamgamna zat ding Hosni Mubarak vaihawmna in phalsak chi'n vaihawmna apan paihkhiak a a om nung in Egypt a Muslim Brotherhood makaih solkal in ngawhna bawl in, hentang in suangkul ah khum a, nekgukna leh dukdaklouhna khenkhat ah leng ngawh in om hi. Hosni Mubarak tung a ngawhna omte ginatak a ngaihkhiakna neih in om nailou a, himahleh a tung a ngawhna omte tawh kisai ngaihkhiakna neih ahihma a hentang theih ahih hunsung beita hi'n kigen hi. Tu'n Hosni Mubarak paihkhiatu Muslim Brotherhood-te a vaihawmna ua pan phuk leh paihkhiak in om nawn ua, tua tawh kiton in jail apan Mubarak khahkhiak nawn ding in kigen a, Muslim Brotherhood makai Morsi leh midangte hentang a, Muslim Brotherhood makaih a paihkhiak leh phuk a ana om Hosni Mubarak khahkhiak nawn ahihleh Egypt ah buaina sousang zawsem piangthei hi'n kigen a, Egypt dinmun tuh khirh mahmah hi.

***Tua pan kum khat nung in Brazil in World Cup zintun ding a, huai nung kum thum in Olympic Games zintun nawn ding hi. Kiphinna tamtak ana tuakkhinta mahle-uh, World Cup zintun ding a lam tuamtuam a Brazil kisakkholhna paizom zel a, World Cup a tunna ding khopi Rio de Janeiro siangthouna'ng leh kilawmna'ng a panlakna khauhzaw sem paitou zel a, Rio de Janeiro Mayor in thupuan a bawlna ah, khopi sung a niin paih muh, theih leh matkhiak a om leh $1,000 sang a tawmzaw a gap theih, liausak theih hiding uhi.

***Pune pansan a Marathi pau a nipikal teng a kisuah tanchinbu Sadhana a editor Dr Narendra Dabholkar zan zingkal a kaplup a a omna tawh kisai suizuina bangmahtan tung nailou a, police-te'n tual thattu hidia muanmawh mi khat lim, sketches bel khahkhiata uhi. Dr Narendra Dabholkar ahihleh, Maharashtra solkal in anti-Superstition leh Black Magic Law bawlkhiakna ding a naktak a panla khat ahi a, thah a om ziak in mipi lungkimloute'n tuni'n Pune ah kiphinna nei in, kintak a tual thatte mankhia ding in state thuneitute nawh uhi. Dr Dabholkar thahna ziak in Pune khopi ah political party omteng in tuni'n bandh puang uhi.

***Tuni zingsang baihtak in Kaziranga National Park a Bura Pahar Range ah chingpi nih kaplup in om nawn a, tua tawh tukum pai lel sung a chingpi kaplup a om zah 24 chingta hi. Tuni chingpi nih kaplupna mun bel National Highway 37 apan gamlalou hi'n kigen a, Range Office apan metres 200 lel a gamla hi'n kigen a, chingpi kap a sum zongte'n chingpi a kaplup uh khat pen kii satkhia manlou in taisan uhi. State solkal in Kaziranga a chingpite kepbit leh venbitna ding in programme tuamtuam genkhiak nei mahle-uh bangmah sepsuah taktak omlou a, chingpi kapte leh chingpite gamtatna mun, omna mun suizuina ding in Unmanned Aerial Vehicles, UAV-te leng kizang ding in kigen mahleh tunitan in zat in om nailou a, solkal in chingpi kii khat neite humbit ding a pan a lak taktak chiang in Kaziranga a chingpite beisiang man ding in kilang hi. Asia gambup ah chingpi kii khat nei India kia ah omta a, gamsa leh gammang hauhsakna chi khat ahihman in humbit leh kepbit hun mahmahta hi.

***Gurgaon a international school khat in school bus a a zatlel uh tool-box sung ah, numei sisa luang khat muhkhiak in om a, muat phialta hi'n kigen a, bus bel workshop apan tuni a service ding a lakkhiak hinawn hi'n kigen a, police-te'n misi pen kua hihiam chit chet ding in a hihna theih tum in panla lel ua, post mortem leng bawl in om hi.

***Vuah tamtak ziak in Kolkata khopi ah tuilian a, khopi sung mun khenkhat ah tui kivung maimah a, niteng hinkhua naktak a a nawngkaisak banah traffic leng subuai zou mahmah hi. Sealdah Station ah train traffic leng bangtan hiam ah nawngkaisak mahmah hi.

***Andhra Pradesh khenzak a Telengana state bawlkhiakna deihlou a, Andhra Pradesh state pumpi khenzak ding deihloute'n Seemandhra ah kiphinna sunzom lai ua, protest thak khat pan in gul tawh kiphinna nei ua, lamlian ah gul khawng vaksak ngangngang uhi. Andhra Pradesh state khenzak a, Telengana state bawlkhiak deihloute'n kiphinna a hunchiam omlou indefinite bandh a puang uh tuni'n nipikal khat chingta a, siamsinna inn, solkal office leh mun poimawh tamtak subuai mahmah a, hindan ngeina naktak in nawngkaisak hi. Hiai kiphinna solkal nasemte'n a zop banu'ah bus-te na-ngawn a tailouhna nipikal khat hita hi. Solkal in kiphinna neite betdaihna ding in, Andhra Pradesh khenzak deihlouhna a protest a tel government employee-te kiang ah vauna bawl a, no work, no pay thupuan bawl hi.

***Bangalore a om Indiranagar a inn khat apan in kum 53 a upa numei khat, Shanti Reddy kichi a sih nung kha nga phial in muhkhiak in om pan hi. Shanti innvengte gendan in numei-nu amah kia a khosa ahi a, a sanggamte apan tol ten ahihbanah, apaisa kha nga sung in kuama'n va vehlou uh chihna ahi. Kha li paisa in a innvengte'n Shanti Reddy inn apan in gim namsia leh uih mahmah za ua, police-te kiang ah report bawl mahle-uh, ganhing vakthap si, a muat ziak a uih hiding in gen mai ua, suizuina bangmah ana neilou uhi. Ngeina banglou a sihna chi'n case khat chiamteh in om a, a luang pen post mortem bawl in om hi.

***Belgaum, Karnataka a court in rape leh murder a mohpaih a om mi nih tuni a khailup ding in thutanna bawlkhum mahleh, Supreme Court a kigolh ziak in mi nihte khailup in om nailou ua, Human Rights Activist-te'n court thutanna chouna bawl in, Supreme Court ah ana tun ua, Supreme Court in October 22nd in thubuai ngaihkhiakna nei ding hi.