Hornbill News | 19 August 2013

User Rating: 0 / 5

Star InactiveStar InactiveStar InactiveStar InactiveStar Inactive
 

hornbill news logo*SSA Saina in Training on Implementation of Multi-media Educational Content Neih in Om
*HPF-M Makaihna in One Day Political Awareness Progranmme Zatna Om
*DC in Tedim Road Dung a Foothpath kibawlte Enkhia Ding
*Jail Official-te'n Lamka Hongpha Uh; Tuibuaong Jail Enkhia
*DLCC Meeting Hun Ding Kisuan
*The 3rd Lamka Book Fair Kipan Ding
*YPA Lamka Block in Thupuan Bawl

Tanchin Kimzaw:
***SSA/CCpur saina in government school 25 a teacher-te a ding in Training on Implementation of Multi-media Educational Content neih in om hi. Hiai hun ah PR Dorie, Director, Sakhi Automation Solution Private Limited, Chennai in teacher-te sinsakna pia hi. SSA lam apan thutut kingah dan in school-te kiang ah computer piak hiding ua, student-te kiang ah educational content (E- Content) tungtawn in lehkha sinsakna piak hiding hi'n gen uhi.

***Hill Peoples' Forum, Manipur saina in tuni sunma ak 11:00 apan Rengkai Community Hall ah One Day Political Awareness Progranmme zatna neih in om hi. Rev. Fimthasang EFCI Sielmat in thumna in programme hongkhia a, VL. Mawi Vice Chairman, Hill Peoples' Forum in vaidawn thugenna hun zang a, Dr. R. Sanga Chairman, Hill Peolpes' Forum in introductory speech nei hi. Tuni a hiai hun zatna ah LB Sona Chairman, People Consultative Committee on Peace (PCCP) in thugenna hun saulou nei a, K. Guite leh Dr. John Pulamte-te resource persons apang in thugenna hun zang uhi. Dr. John Pulamte in a thugenna ah tulai in India gamsung mun tuamtuam ah State Movement tamtak om a, eilak ah leng mun dang a movement omte toh kibang mah om ahihdan gen a, tulel a eilak a movement omlel pen thautawi pawlte kia in a phut ding uh hituamlou leh i lak ua, civil society tuamtuam, church leaders-te leh women organisation-te'n kituaktak a pangkhawm a i phut ding uh ahi chi hi.

A ban a gen zelna ah Manipur ah Meetei-te'n apu-apa khang ua pan in history hoihtak nei a a om nung un, tua Schedule Tribe (ST) a Meetei-te gelh lut ding a Centre Government kiang a a phut uh thildiklou leh thil hitheilou ahi chi'n gen hi. Centre Goverment in Meetei-te Manipur a singtangmite toh status kibang dia Schedule Tribe (ST) ahihsakleh Manipur Land Record and LR Act toh kikalhkha ding ahi chi hi. K. Guite in a thugenna hun ah Manipur State Boundary bawl ahihlai in Meetei-te kuamah telkha omlou ua, British-te'n Manipur Boundary abawl uh ahi chi'n gen hi. Tua banah tulel in Manipur phaizang mite'n Manipur a singtang mite omte toh status kibang a om theihna ding a, Centre Government kiang ah Manipur phaizang pen tangdawn a phaizang om ahi chih pansan in Manipur pen Hill State a om sak theihna dia Centre Government ah ngetna pia ua, Singtangmite toh common land law zatkhop ding chih tup in nei uh a, huai a hihtheihna ding in ST a om ding ahi chi chi'n gen hi.

A ban a gen zelna ah phaizang mite thilnget piak in om le uh a thuak ding eite mah ihi uhi chi hi.

Naga-te a dia centre in Nagaland a piak khit nung in Manipur a Naga omte a ding in centre in special status piak ding ngaihtuah in nei nawnlou chi a, tua banah Kuki State chih ngen a om a, Kuki State ngente Kuki-te ahikei ua, KNO ahi uh chi'n gen a, Kuki State mu thei ding uh hia mutheilou ding chih i sui leh Kuki State ngen KNO-te Suspendion of Operation (SoS) nuai a suaikaite ahi ua, Suspension of Operation a suaikaite hihlouh ding point 3 om a, tuate ahihleh thil kigen peuhmah India Constitution nuai a om kha ahih ding, India khua leh tui dan zuih ding chih leh Manipur Territorial Boundary sukkek louh ding chih ahi a, tuaziak in State a nget pen uah Suspension of Operation a suai kaih a om pen palsat uh ahi chi a, huaiziak in amau suaikaihsa palsat ahihman un government in a taksand ding in gintakhuailou ahi chi hi.

Tua ban ah Autonomous Hill State ngen pawl om nawn a, huaite ading in khatna ah boundary dispute omlou ding a, hiai in bangmah poi khoihkhalou ding a, Naga leh Kuki-te a ding in leng manna ding omlou a, Zomi-Hmar-te a ding in leng manna ding om lou a, punna ngen hi zaw ahi chi a, tua banah Meetei-te a ding in State integrity leng bangmah sukhalou ding a, manna ding khatmahleng omlou ahihdan gen hi.

***Jacintha Lazarus, IAS, DC/CCpur in August 20, 2013 sunnung in Lanva apan Tuibuang kikal a jobcard tungtawn a foothpath kibawlte etkhiakna (inspection) nei ding hi. Huai hun ah Police-te leng tel ding ua, footpath tung a encroacher omte, mehzuakte leh van chi tuamtuam zuakte banah footpath tung a inn leh varanda omkha teng Police-te phelkesak vek ding hi'n kigen hi.

***Imphal apan Jail Official te leh Manipur Police Housing Corpoation Ltd official-te'n tuni sun dak 12:00 vel in Lamka hongpha ua, Tuibuong a Jail om pen etkhiakna hong nei uhi. Thusuak kingah dan in jail official-te'n Tuibuang Jail siatna munte bawl thak ding dan hong enkhia uh hi'n kigen hi.

***S. Khaikhopau Ngaihte Jr. MCS Branch Officer HQ DC office in tuni a thusuah a bawl kimu in a taklatna ah, August 21, 2013 in Jacintha Lazarus IAS DC/CCpur makaihna a BRGF Resource Centre DC office ah District Level Co-ordination Committe (DLCC) Meeting om ding chih himahleh August 28, 2013 a di'n a hun suan in om hi.

***Book Link Kolkatta leh Hmar Student Association (HSA) Jt HQ Lamka pangkhawm in zingchiang August 20, 2013 apan August 29, 2013 kikal sung Synod Hall IB Road ah, The 3rd Lamka Book Fair om ding hi. 3rd Lamka Book fairs neih hunsung in laibu kizuak khempeuh 10 percent discount hivek ding a, tua ah general books on Arts, Music, Literature, Classics, Fiction, Spirituality, Cookery leh Children Books leh a dangdang tamtak zuak hi ding hi.

***Tedim Chin Student Association (TCSA) GHQ saina in Annual Sports Meet 2013 tuni sunnung dak 2:00 in Pangzawl play ground ah honkhiakna neih in om hi. Hiai hun ah H. Mangchinkhup EM ADCC in khuallian hihna toh uap in TCSA Annual Sports Meet 2013 honkhiakna nei a, tua banah N. Thuamkhansuan SDC/Singngat in functional president hihna toh uap hi.

***Young Paite Association (YPA) Lamka Block a information & publicity in tuni a thusuah a bawl kimu in a taklatna ah khopi sung a zu zuakna munte nitak dak 5:30 nunga kuama'n hong nawnlou ding leh khopi sung a khamtheih bawl leh zu dawnte'n mipi vantang omna munte a hih nawnlou ding in theihsakna bawl uhi. Hiai thusuah toh kisai in YPA Unit in amau area chiat ah mohpuakna len ding ua, hiai nna sepsuahna pen kuama'n nam thil a lalou ding in mipite kiang ah ngetna bawl kawm in kuapeuh in hiai thupuan ngai poimoh leh zui chiat ding in ngetna bawl uhi.

Gamdang Tanchin:
***Bihar a Saharsa apan Patna zuan a tai Rajya Rani Express kichi train khat in Saharsa apan gamlalou Dhamara Station ah atawmpen in mi 35 a phutlup ziak in mipi thangpaite'n train nih a hal banua'ah mi phulumtu train driver leng naktak in vawliam uhi. Train chesual ah midang 40 vel in liamna tuak ua, liamna tuak atamzawte dinmun dengdel mahmah hi'n kigen hi. A kigendan in, sabiak tawh kisai a khualzin, pilgrims khenkhat local train khat apan kumkhia in train dang ah tuang ding a kisa a rel lampi, track a kanlaitak ua thiltung hi'n kigen a, khenkhatte a taksa uh zan dimdem a, a themneng a kithehdalh ahihman in misite khat-khat a sim theihlouh hi'n police thusuak in gen hi. Thiltung ziak in tualsung mite thangpai mahmah ua, a sousang mahmah ziak un security forces tamsem in thiltunna mun kidelh huan in, buaina sousang sem ding pen bengdai thei hamham uhi. Sihna tuak innkuante kiang ah Bihar solkal in zangnadopna a Rs Lakh Nih chiat piak ding in chiam hi.

***Kum 2014 a General Election ding tawh kisai a kisakkhawlhna in BJP Campaign Chief Narendra Modi makaihna in New Delhi ah BJP Party Meeting-na ah, BJP Chief Rajnath Singh in BJP khangthu a tup-le-ngim gol pen leh thupipen puankhiakna nei a, huai bel General Election ah Party hatpen hih ding chih ahi chi'n puang a, Lok Sabha seats 500 ah candidate guang ding ua, seats 272 sang a tawmzawlou BJP in ngah ding chih a tup uh ahihdan gen hi. Himahleh, BJP Prime Ministerial Candidate ding bel bangmah puankhiak theih om nailou a, a kigendan in hiai thu ah BJP leadership-te kal ah kikantuahna omzeklai hi.

***India's ISRO in space mission a ding a rocket ana kapkhiak masak nih-te ah ana lohsamta mahleh, tuni'n a khutsuak ngei GSLV-D5, Shriharikota, Andhra Pradesh ah nitaklam 4:50 vel in kapkhiakna nei nawn hi. Rocket in leitung kim vel a lengkual ding GSAT-14 kichi pua a, huai bel telecast leh telecommunication a zat ding sattellite ahi. Hiai mission pen a lohchin leh space lam ah India in masawnna thupitak ngah ding a, za-awng ah leng manned mission sawlkhia theita ding hi. Huchikawm in ISRO Chief K Radhakrishnan in hiai mission lohchinna ding in ahih ngeina bang in temple khat ah thumna va nei hi.

***Egypt buaina pai zom touzel ah, Cairo khopi nawl a Muslim Brotherhood member 600 vel mat a omte a khumna uh suangkul apan prison mun dang ah suankhiak dia puakkhiak dek ahihlai un khenkhat in taikhiak tum ua, mi 36 kaplup in om uhi. Huchi kawm in, Egyptian Army a lianpen Gen Fatah Al-Sisi in paihkhiak a om president lui Mohamed Morsi gumtute'n thagum zang a kiphinna aneih uh dawhzawhna tawh thuak theih maimai hinawnlou ding in gen a, Egypt interim solkal in Muslim Brotherhood-te terrorist organisation khat ahi chi'n puang hi. Muslim Brotherhood bel a dinmun leh panmun apan tolh tum tuanlou in, vauna kawmkal ah dingkip sem tum uhi. Thautang in mihingte kaplum theih mahleh, idea a kaplum theikei chi'n pang tinten uhi.

***Vual phaloute Olympic kimawlna, Paralympic star Oscar Pistorius tual thahna thubuai ngaihkhiakna tuni'n South Africa a Pretoria ah neih in om nawn hi. A khe lang-nih a kitan Oscar Pistorius in nikum Valentines Day in a ngaihzawng-nu kaplum a, hiai tual thahna thubuai ah Oscar in a ngaihzawng-nu a kaplup khakna pen midang, a innsung a va lutgu a; amah khoih va tum a sak ziak a, mahni-kivenna dan a ana kaplum kha hi'n pang a, tupmawng leh utthu a a kaplup hilou hi'n pang hi. Prosecutor-te'n bel Oscar tung a tualthahna thubuai ah chetna leh evidence bangkim kaikhawm khin uh hi'n gen uhi. Kum nawn March in Oscar tual thahna thubuai ngaihkhiakna, trial taktak kipan ding a lam-et ahi. Oscar in a kaplup a ngaihzawng-nu Reeva Steenkamp bel South Africa a top model khat ahi a, damlai hileh tuni'n kum 30 chingta ding hi.

***Mexico ah Kiginni in khamtheih a sumdawnna makai lian leh tallang mahmah pawl khat Gulf Cartel makai Mario Ramirez Trevino mat in om nawn a, tua nung in Mexican solkal in gamsung mallam ah security naktak in khauhsak a, khamtheih a sundawngte'n a thuneihna bial u'leh huzaap uh kekletna ding a hiamgamna leh thagum suahna tawh minautangte patautak leh dipkua a a koihna uh ngaihthah hinawnlou ding in Mexican Interior Ministry thusuak in gen hi.

***Russia's Far-east ah tuilian ziak in innkuan tamtak mun bitzaw ah tuahkhiak leh nawnkhiak in om uhi. Akizom a vuah ni bangzah hiam a zuk zom nung in lui tuite luanglet in tenna inn bangzah hiam tumta hi'n kigen a, official thusuak in a taklat dan in, Russia's Far-east a tuilian bel kum za khat sung a ding a tuilian huaisiat hun pen hi'n kigen lai hi.

***Chinese state media in a taklatdan in China malsuah leh simsuah lam ah tuilian ziak in Sintawpni apan in China northern province ah mi 90 sang a tamzaw in sihna tuakta ua, sim dawh lam a om Guangdong Province ah Typhoon Utor ziak in vuahzu nasa mahmah a, tuilian ziak in mi 20 in sihna tuak uh hi'n kigen hi. Vuah tamluat ziak in inn tamtak kisia in, inn-le-lou tamtak tui in tumta a, lampi tamzaw ah menchim om a kikawmtuahna naktak in nawngkai zou hi.