Hornbill News | 14 August 2013

User Rating: 0 / 5

Star InactiveStar InactiveStar InactiveStar InactiveStar Inactive
 

hornbill news logo*District Administration Makaih In Singnou Suanna Om
*KSDC in State Ngetna in Bandh Puang; Mun Khenkhat ah Khauh mahleh Town Sung ah Bandh Om-leh-Omlouh Kibang
*67th Independence Day Lopna Om Ding
*Egypt ah Crackdown Kipan
*India Tunuai Longpi Puakzak; Tuipi Taw ah Tummang

Tanchin Kimzaw:
***Zingchiang a Independence Day zatna ding toh kisai in, District Administration makaihna in Clean & Green chih thupi pansan in tuni in Lanva nak ah singnou chi tuamtuam tamtak suanna neih in om hi. Singnou suan dingte tuzingkal dak 8:00 in Lalpuithauii Foundation School Bungmual ah Langkhanpau Guite Chairman ADC/CCpur in singnou suan dingte flag off na nei hi. Hiai hun a DC/CCpur in a thugenna ah, CCpur District sung ah tuinek ding lakna mun 3 ah kinei a, khat ahihleh Lanva lui hi a, nihna Koite lui leh Khugam Dam-te ahi a, himahleh mipite'n tuilam ah haksatna kituak den a, adiak in vuah zuklouh hun chiang in Lanva apan tuilakna ah tui nek ding taksapna lianpi om sek a, hiai pen sing leh guate a kiphuk tam ziak ahi chi hi. Mipi i vangphatna mahmah ahihleh gamlei tang Pathian in hon vualzawl a, sing leh lou hing dipdep omna mun a teng kha ihi ua, kei hong kipatna lam gamkeu ahihziak in haksa mahmah ahi chi hi. Tua banah gamsung resources omte a kepbit poimoh mahmah a, huaiziak a tuni singnou suan hun ah student leaders, philantrophic organisation makaite leh student-te teltuam in om ua, amaute tunung a i gam sung makai dingte ahi uh chi hi. Tua banah zingchiang a Independence Day lopna ding toh kisai in leng thupi ding in clean & green chih thupi a zat in om a, himahleh mipite'n sianthouna lam ah taksap lianpi nei i hi chi hi. Tua banah Langkhanpaui Guite Chairman ADC/CCpur in a thugenna ah, i gamsung ua, sing leh gua omte nasatak a phuk siatna in gamsung hon keusak ahi chi a, gamsung hing (green) hen i chihleh singnou tampi suan poimoh ahi chi hi. Singkung khat i phuk leh a tawmpen a singnou 10 tan bek suan poimoh ahi chi hi. I gamsung ua sing omte phukkhiak kia hilou in a zung teng toh bulkalh khiak in om a, huaite meihol dia bawl zomahte i hi ua, hiaibang chindan i tawpsan kei ua ahihleh tunung kum 20 nung chiang a, i gamsung uh keu gai vek ding ahi chi hi. Tuni a singnou suanna hun ah District Council Members, Philantrophic Organization makite, Student leader-te banah School tuamtuam apan teltuam student 200 val in kihel ua, singnou 500 vel suan in om hi.

***Kuki State Demand Committee (KSDC) in Kuki State demand a neih uh government in ngaihsaklou chihziak in zan nitak zankim apan zingchiang nitak tan daih ding in Manipur a Kuki-te tenna munte'ng huam in bandh puang uhi. KSDC in demand a neih uh toh kisai in government kiang ah kiphinna bangzah vei hiam neita mahle uh government lam apan lungtunhuaitak dawnna mu nailou uhi. CCpur District sung ah leng bandh khauh mahmah a diak in Sielmat lei apan in gari tai muh ding omlou a, bandh supporter mipite'n lampi khaktan in lamlian lai ah om uhi. Sielmat lei apan bandh naktak a khuahsak ahihziak in security-te gari tanpha leng tai phallou ua, security-te' garite taisuak saklou in sawlkik uhi. KSDC in ahihleh zingchiang a Independence Day zat a om ding pen a tenna gamsung u'ah kuamah in lawm theilou ding hidan in thusuah ana bawl uhi. Sielmat lei apan bandh nasatak a khauhsak ahihlai in Lamka lam ah bandh omlou mahbang in dawrte kihong in passenger pua diesel auto-te ngeina bang in tai uhi. Bandh ziak a thilsia om lam hiai news bawl ahihtan in bangmah theih omlou a, himahleh zingchiang in bandh hiaisang a khauhzaw ding hi'n kigen hi.

***India in British-te thunuai apan zalenna amuh ni August 15, 2013 zingchiang in India gamsung pumpi ah thupitak a zat hiding hi. CCpur District ah leng zingchiang zinglam dak 9:00 apan Lamka Public Ground ah Independence Day lopna om ding a, huai hun ah Jacintha Lazarus IAS DC/CCpur in khuallian hihna toh uap in India flag kaih palhna leh parade contingent-te apan Rashtriya Salute la ding hi. Chief guest in India flag a kaihpalh zoh in parade contingent-te apan march past in zui ding a, tua zoh in chief guest in thugenna hun zang ding hi. Zingchiang Independence Day zatna hun ah CCpur Goverment College leh Lamka Goverment College-te'n cultural show nei ding ua, tua banah traffic police leh District transport office-te kigawm in special item show ding uhi. Tua banah government nasemte lak ah nna sem hoih tungtuan teltuam a omte kiang ah award piakna leh kho hausa bangzah hiamte kiang ah hausa puansan piakna banah private leh government school hoihtak a function-te kiang ah kipahman piakna chief guest in nei ding hi. Tua banah mihangsan teltuam a omte kiang ah leng kipahman piakna nei ding hi. Zingchiang a hiai hun zatna ah Langkhanpau Guite Chairman ADC/CCpur, Executive Members ADC/CCpur leh MDC, Army officer leh District Level Officer-te'n uap ding uhi. Tua banah zingchiang in Jacintha Lazarus IAS DC/CCpur makaih in amah tenna quarter IB road ah nitak dak 5:00 in Independence Day dinner party om ding a, tua ah District Level Officers banah mi poimoh tuamtuam chialkhawmte'n ann nek khawmna nei ding uhi. Independence Day lopna ding toh kisai in kisakkhawlhna bangkim tuni tan in mansiangta hi.

***Egyptian President paihkhiak a ana omta Mohammed Morsi gumtute'n Morsi paihkhiak a a om nungsang Cairo khopi mun nih ah khawllou in kiphinna leh sit-in protest nei den ua, Egyptian interim solkal in, vaihawmna a ding a nawngkai ahihman in kiphinna neite'n a kiphinna uh khawlsan a, kongzing nusia ding in vauna bangzah-vei hiam a bawlnung un kiphinna neite'n interim solkal thupiak leh theihsakna a ngeingaihlouh tuanlouh ziak un tuni zinglam dak sagih apan in Nasr City a Nahda Square leh Geza a Rabaa-al Adawiya Mosque pansan a Morsi gum a kiphinna neite interim solkal in thagum in hawlkhiakna panta a, security force-te'n teargas, rubber bullet leh thautang taktak zang in kiphinna neite lak nawk panta uhi. Report khenkhat in atawmpen a mi 200 in sihna tuak chi'n taklang mahleh si-le-liam zah diktak bangmah theih hinailou a, mi si tuasang a tamzaw ding in kigen hi. State TV in a taklat dan in kiphinna neite thagum a hawlzakna ah security forces personnel 5 in sihna tuak ua, khenkhat in liamna tuak uh hi'n kigen a, hiai leng thuchian diktak bangmah theih hinailou hi. Egyptian military thupuangtu gendan in Morsi gum a kiphinna neite kikulhna, camp-te ah thau leh thautang tamkhop muhkhiak in om hi. Hichibang thiltung mulkimhuaitak kawmkal ah Muslim Brotherhood in kiphinna sutzop hi veve ding in puang hi.

***Israel leh Palestine in peace talk tuni a sunzom nawn ding a a kisakna u'ah, kihouna pat ahihma in Israel in a chiam bang in Palestinians mi 26 jail apan in khahkhia a, West Bank puaktung in om ngal ua, amaute Palestinian leader Mahmoud Abbas tel in Palestinians tamtak in ana vaidawn uhi.

***Tukum pailel sung a leitung a typhoon hatpen hilai a kigen Typhoon Utor in Phillipines nawkkhin in, tu'n China' Guangdong Province lam manawh a kihei in, Hong Kong lak vel ah huih hat mahmah chiamteh in om a, tuni a China gam nawk nawn ding hi'n kigen hi. Typhoon Utor ziak in Phillipines ah mi 4 in sihna tuak uhi.

***Kupwara, Jammu and Kashmir a Keran Sector lak ah Pakistan leitang pansan helpawl mi 5 vel in gamgi kantan in India luttum mahle-uh Indian Army-te'n theihkhia in mi 5-te lak ah mi nih kaplum ua, mi dang thum Pakistan gam lam ah kihemkhia uh hi'n kigen a, Army-te'n AK-47 thum leh pistols nih mukhia uhi. Helpawlte tawh kikaptuahna in dakkal bangzah hiam daih hi'n kigen hi.

***Kishtwar, Jammu and Kashmir ah nipikallui Sintawpni a Muslim leh Hindu community-te kal a buaina a piang nung in, curfew koih in om a tuni tawh ni guk chingta mahleh Kishtwar dinmun sousang mahmah lai a, patauhna sang mahmah lai hi'n kigen hi. Tuabangkal ah, Supreme Court in, Sintawpni a buaina ziak a liamna tuakte kiang ah zangnadopna a Rs Lakh 2 chiat pia ding in state solkal kiang ah theihsakna bawl a, banah, State Chief Secretary in hiai buaina tawh kisai a affidavit filed ding in leng top court in theihsakna bawl hi.

***Zan nitak zankim nung zek in, Mumbai dockyard ah Indian Navy-te zatlai tuinuai long INS Sindhuraksak puakzak in tuipi taw ah tumsuk hi. A kigendan in, tuinuai longpi INS Sindhurakshak bel battery charging kawm a khawl hi'n kigen a, battery hoihlouh ziak a battery puakzak in galvan leh missiles dang a puak tektokte puakzaksak sawn hiding in kigen hi. Dak 12:30 vel in INS Sindhurakshak apan in puakzak ging masapen kiza masa a, anung in akizom in puakzak ging ngaih mahmah bangzah hiam zak behlap in om hi. INS Sindhurakshak a puahzak hun in long sepaih 18 vel tuinuai long sung ah om uh hi'n kigen a, mithum Navy officer ahihbanu'ah midang 15-te bel sailors hi un kigen a, amaute dinmun bangmah theih hinailou lai a, Navy tuileuh siamte'n hutkhiakna leh panpihna nna semlel uhi. Bangziak pentak a hiai tuinuai long ah tuahsiatna tung hihiam chih theih hinailou a, suizuina pai lellel hi. INS Sindhurakshak bel ton 2,300 in gik a, battery 500 nei a, tuinuai a missiles kizang torpedoes chi nih a puak banah, anti-ship missiles leng pua a, $80 million bei a thawp thak ahihnung a April kha apan kizang nawn pan hi'n leng kigen hi.