UPDATES:

Hornbill News | 06 August 2013

Hornbill-Cable-Network*DYAS Makaihna in Youth Integration Camp 2013 Kipan
*Lamka ah Petrol Tung Nawn; A Deih Tam
*Independence Day Parade Contingent Ding 50 Valta
*NYK in My Earth My Duty Chih Thupi Zang in Singnou Suan Ding
*Public Leaders leh DLO-te'n Badminton Kimawlna Nei Ding
*Kei a Di'n Video Album Honkhiakna Om Ding

Tanchin Kimzaw:
***Department of Youth Affairs & Sports (DYAS) Government of Manipur saina in tuni apan August 8, 2013 tan daih ding Youth Integration Camp 2013 kipan hi. Hiai hun zatna Jacintha Lazarus IAS DC/CCpur in khuallian hihna toh uap in hongkhia ding chih himahleh Imphal ah meeting poimohtak a neihziak in tel theilou a, guest of honour dia chial a om M. Chandrakumar Singh Senior Officer (YAS) in chief guest hihna toh hiai hun zatna uap hi. Tua banah Lalvullien Joute President CCpur District Sports Association (CDSA) leh Lunkhosei Haokip District Youth Affairs & Sport Officer-te'n guest of honour leh functional president hihna toh uap uhi. Hiai hun a chief guest a pang M. Chandrakumar Singh in a thugenna ah khovel pumpi a kikhekna a om theihna ding in tuailaite poimohpen ahi chi a, society leh nam leh gam bawlphatna ding in tuailaite mah poimohpen ahi chi hi. Youth Affairs & Sport department in ahihleh kimawlna tuamtuam nei zel a, huaite apan in national level tan a kimawl dia sawlkhiak a om zel uh chi hi. Hiai camp hun sung in K. Vungzamawi Associate Prof. CCpur Govt. College, Dr. F. Thienkhogin District Aids Control Officer, Dr Lalzagou Head of Dept. Geagraphy CCpur Govt College, Laltanpuii Vanchhong MCS SDO/CCpur leh Soiminthang Dousel Lecturer CCpur Goverment College-te resource persons in pang ding ua, amau thupi tuamchiat pansan in sinsakna pia ding uhi. Hiai camp ah tuailai tamtak kihel uhi.

***Manipur in National Highway a neihte lak a Imphal to Dimapur leh Imphal to Jiribam Road-te ah menchim ziak in Manipur lut ding niteng van poimoh pua gari tamtak lamkal ah kha khat phial a tang nung in gari bangzah hiam, zan in Imphal hong tung nawn ua, tuate lak ah Hmar Veng a M/S Suakhnun & Sons Oil Pump a ding Petrol 4,000 litre hong tung a tuni in hawmkhiakna nei uhi. Petrol ahihleh gari lai RC Book tawite kia piak in om ua, pei nih neite litre 5 leh, pei thum leh pei li neite litre 10 piak in om uhi. India pumpi ah petrol man sukpung ahihnung in petrol litre khat ah teng 70 leh paisa 23 in kileita hi.

***Hong tung ding August 15, 2013 chiang a Lamka Public Ground ah India in British-te khut nuai apan zalenna a muhnung kum 66 chinna, Independence Day lopna om ding hi. Hiai ding toh kisai in kisakkhawlna paitou zel a Private leh Government School tuamtuam 55 vel in parade contingent a telding in ZEO/CCpur Office ah min khumlutta uh hidan in thutut kingah hi.

***India Prime Minister lui phamsa Rajiv Gandhi pianni theihgigena ding in NYK CCpur makaih in hong tung ding August 15-20, 2013 kikal sung in My Earth My Duty chih thupi a nei in mun tuamtuam ah singnou suanna om ding hi. Hiai ding in H. Doungel District Co-ordinator NYK CCpur in NYK CCpur nuai a om Club-te'n hiai hunsung a mahni omna veng chiat a singnou suan chiat ding in theihsakna bawl hi.

***S. Khaikhopau MCS Branch Officer DC Office in tuni a thusuah a bawlna ah Independence Day cheplawkna in Jacintha Lazarus IAS DC/CCpur makaih in August 12, 2013 apan in August 14, 2013 kikal sung, Community Hall Hiangtam Lamka ah public leaders leh District Level Officer (DLO)-te'ng in badminton kimawlna nei ding uhi. Hiai ding toh kisai in Public Leaders leh DLO-te'n August 8, 2013 tan a kimawlna a tel dingte min list submit chiat ding in theihsakna bawl hi. Hiai hun a kimawlna ding dan ahihleh men's double team 6, mix double team 1 hi ding hi.

***Zingchiang sunnung dak 1:00 in Synod Hall IB Road ah 'Kei a Di'n' kichi Video Album honkhiakna om ding hi. Hiai hun Michael Ginzasuan District Supply Officer CCpur in khuallian hihna toh uap in Video Album thak honkhiakna nei ding hi. Tua banah T. Lala Vaiphei, Special Contractor leh H. Samson, Mahajon-te'n guest of honour leh functional president hihna tawh uap ding ua, HK Sonmuan, Mangpu, Seithang, Goulal Kapboi, Kamlian Paojangam Genlal Kaineipau leh Lamkhosiem Chongloi District Transport Officer-te'n leng special guest hihna toh hiai hun zatna uap ding ua, lasasiam tuamtuam hunkhop in leng uap ding uh hi'n kigen hi.

Gamdang Thuthang:
***Khuavannuai a helpawl minthang al Qaeda heutu lianpen Pakistan pansan Ayman al Zawahari leh Al Qaeda helpawl a tel Yemen pansan Al Qaeda in the Arabian peninsula a Commanderander khat kihouna American thuguk saite'n a matkhiakna ua pan in al Qaeda helpawlte'n banghiam hihsawm a gamtat tum uh ahihdan theihkhiak ahihnung a US in Muslim gamte ah a' emmbassy-te uh khak ahihdan puang hi. Middle East leh Africa a Muslim gam 19 ah US in a embassy-te tu nipikal sung khaklai ding hi'n kigen hi. Huaibanah, International Police, Interpol thusuak in a taklatdan in, Muslim gam tuamtuam a jail apan a mat a om helpawlte taikhiakna pen A Qaeda helpawlte'n malakna leh panlakna ziak hi'n taklang a, tuaziak in helna leh hiamgamna a mohpaih aomte Islamic helpawl a telte suahtakna tuh muanna leh bitna a ding a lauthawnghuai hi'n gen hi. US State Department in Yemen apan in non-essential staff teng samkhia hi. Huchikawmkal ah, US in Yemen a Al Qaeda helpawlte drone zang a a beihna paitouzel in drone strike nanung pen ah Al Qaeda member li in sihna tuak uh hi'n kigen hi.

***Canada New Brunswick ah school naupang nih gulpi'n that hi. Gulpi bel pet shop apan a suakta a, ventillation system ah lut a naupangte a ihmut lai un va viallum, gaklum hi'n kigen hi. Naupangte bel kum 7 leh kum 5 a upa hi ua, unau ahi uh. Gulpi bel African Rock Python kichite ahi a, metre li leh akim, feet 15 vel a sau hi'n kigen a, pound 100 vel in gik hi. Gulpi pen tu'n police-te'n kem lel ua, pet shop neitu in kum sawm val ana khoi tak himahleh thah hiding in kigen hi.

***Pakistan simlam khopi Karachi tel in Pakistan leh Afghanistan gamgi zul lak ah monsoon vuah nasatak ziak in Pakistan leh Afghanistan a Provinces nga ah tuilian tung a, mipite'n haksatna thupitak tuak uhi. Pakistan ah tuilian a huaisiatna munte ah innsung ah tui kivung in, buanzut innte kichim a, tuilian in school khenkhat a tupte ah electric in naupang khenkhat manlum a, tunitan in tuilian ziak in Pakistan ah mihing 50 val in sihna tuak uh hi'n kigen hi.

***Egypt gamsung buaina hihvengna ding toh kisai a khovel gamte panlakna hihhatsemna ding in US apan in Sr Republican Senator nih John McCain leh Lindsey Granham-te Egypt ah lemna leh muanna, kituahna lampi zong in taam lel uhi. Mipi deihtelna vote tungtawn a dan bangtak a President dia telching a, ahihhang a vaihawmna leh thuneihna apan a paihkhiak a om Morsi gumtute'n thuneihna leh vaihawmna Morsi kiang a piakkik ding leh Egypt vaihawmna ah sepaih thuneihna leh vaihawmna deihlouhlouhna taklatna in protest thupi deuhdeuh neizom touzel lai ua, Egyptian interim solkal vauna ngaihsak tuanlou in million-men march ah mi tamtak in protest rally thupitak nei uhi. Egyptian Army-te deihna bang a interim solkal thak kibawlkhia pen in Morsi gumtute' kiphinna pen a dawhzawh nawn ngellouh toh kiton in Egypt ah sisan luanna leh minautangte sihna leh kahna a tunglouhna ding leh pumpelhna ding in khovel gam tuamtuam makaite'n Egypt interim solkal thak a makaite leh Muslim Brotherhood leh Egyptian Army thuneitute kimuhpihna leh houlimpihna nei uhi.

***Jammu and Kashmir a Poonch District ah India leh Pakistan kal a Line of Control ah Indian Army patrolling paite Pakistan leitang apan a kap in om ua, Indian sepaih nga kaplup in om uhi. Hiai thiltung bel, Pakistani Prime Minister thak Nawaz Sharif in India leh Pakistan a lemna leh muanna leh bitna a om theihna ding a kihouna sutzop ding hoihsa ahihdan a gen nung nitamlou sung a thil tung ahi a, India leh Pakistan kal kizopna naktak a sawiling zou get ding hi'n kigen hi. Indian thusuak in a gendan in Pakistan gamtatna pen 2003 a India leh Pakistan in ceasefire kilemna suaikai a kaih uh bawhsiatna ahihdan taklang a, Indian gam leitang tung a lutgukna toh kibang ahi chi hi. Pakistan in hiai thiltung ah kigolh leh kigolhlou ahihdan bangmah puanglou in, huchibang thiltung bangmah omkei chi'n pang hi.

***Numei naupang 11 pawngsual leh sualluih ziak a kum 38 suangkul taang dia thutankhum a Daniel Galvan Vina in, kum nih sang a tawmzaw suangkul ah a om nung in, Moroco kumpi apan in ngaihdamna mu a, jail apan in khahkhiak in om hi. Himahleh Galvan Vina khahkhiakna ziak in Moroco ah mipi lungkimlou in kiphinna sousangtak in zui a, migiloupa tuh Spain ah mat in om nawn hi. Morocan thuneitute'n Galvan Vina khahkhiak a a omna pen hihkhelh ahihdan puang ua, Morocan Kumpi Mohammed in ngaihdamna a puan pen zukkik in Prison Chief leng a sepna apan in paihkhia hi.

***Japan khopite lak a khat Hiroshima khopi tung ah Atomi Bomb, Nuclear bomb a puahzak nung kum 68 chinna ah atom bomb ziak a sihna leh siatna tungte sunna leh phawkthak hun zatna tuni in Hiroshima ah phalvak apan in neih in om hi. Peace Bell khet ahihnung in sunna hun ah Atomic Bomb ziak a manthatna leh sihna ana tuakte tengteng sunna hun minute khat sung neih in om hi. United States in Khovel Kidoupi Nihna beina'ng a Japan-te kipiakkhiakna ding lampi bawltu ding in 1945 in Hiroshima khopi tung ah nuclear galvan masapen zang a, huainung ni thum in Nagasaki khopi tung ah nuclear galvan dang khat puakzak sak nawn hi.

***India leh Pakistan gamgi, LOC a Poonch Sector ah Pakistani sepaihte leh helpawlte'n Indian Jawan nga kaplup nbanu'ah jawan khat a kapliamna u'toh kisai in tuni'n India vaihawmna innpi nihte Opposition-te'n naktak in hihbuaizou ua, BJP in Indian solkal makaihtu Congress-te'n helpawlte tung ah bangchik chiang a khauhtak a panlak tum na hi ua chi'n dotna bawl uhi. LOC a Indian Jawan nga kaplup a a omna uh toh kisai in Samajwadi Party in Adjournment Motion tanpha ngiat hi. Himahleh Indian solkal makaihtu UPA in bel helna leh helpawlte tung ah Indian solkal nem tuanlou ahihdan taklang hi.Nitaklam dak thum in Indian Defence Minister AK Antony in LOC a Indian Army-te tung a Pakistan sepaihte' khutkhakna toh kisai in Parliament ah statement suahkhia hi.

***Kerela ah ni nih paisa apan vuah nasatak a a zuk zom zel ziak in menchim leh leitolh ah sihna tuak mihing14 chingta ua, mi bangzah hiam mangthang lai uh hi'n kigen hi. Vuah tamluat ziak in Kerela apan international leh national flight cancelled in om hi.

***Uttar Pradesh solkal in IAS Officer Durga Shakti Nagpal tung a suspension order a puankhum toh kisai in National Commission Women kigolh in Uttar Pradesh Chief Secretary kiang ah IAS officer suspend a a omna toh kisai a detail report pialut ding in ngetna leh theihsakna bawl hi. Supreme Court ah leng Durga Shakti Nagpal min in Public Interest Litigation filed in om hi. Janata Dal United Chief Sharad Yadav in Durga Shakti Nagpal gum in suspend a a omna toh kisai Mulayalam Singh Yadav kiang tawh genkhawm tum ahihdan gen a, Centre in a ut-leh Durga suspend a a omna pen revoke theilua ahihdan gen hi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING