Hornbill News | 01 August 2013

User Rating: 0 / 5

Star InactiveStar InactiveStar InactiveStar InactiveStar Inactive
 

Hornbill-Cable-Network

*Council Day ah Mass Social Work Kizang
*ZYA Lamka Block Honkhiakna Om
*GeGS, DIT, MSITS, M/S Zoom leh M/S HUGHES toh Kisai Meeting Om
*IAS leh MCS Officer Hunkhop Suankual In Om Uh
*MZP in Kipahpihthu Puang

Tanchin Kimzaw:
***Autonomous District Council, CCpur in tuni August 1, 2013 ahih toh kiton in sung siangthouna ngaih poimohna ziak in Council Day dan a zangkawm in tuzingkal dak 6:00 apan in khopi sung ah group 3 a kikhen in mun tuamtuam ah mass social work nei uhi. Mass Social Work neihna munte ahihleh Tuibuang Bazar, Zenhang Bazar, New Bazar, Damkam Bazar leh District Council Office huang sungte ahi. Group khatna in, Demmang Haokip Vice Chairman ADC/CCpur makaihna in Tuibuang Bazar leh Zenhang Bazar hahsiangna nei ua; Group nihna, Kamsuanlun EM makaihna in New Bazar leh Damkam Bazar hahsiangna nei ua, Group 3 na, Ngamhao Touthang makaih in District Council Office huang sung hahna nei uhi.

***Zomi Youth Association (ZYA) GHQ in tuni sunma dak 11:00 in YPA GHQ Hall Hiangtam Lamka ah Zomi Youth Association (ZYA) Lamka Block honkhiakna leh lopna nei uhi. Hiai hun ah Phungzathang Tonsing Minister, Health & Family, GAD & CADA in chief guest hihna toh uap ding chih himahleh damlouhna ziak a Delhi a hawh ziak in tel theilou a, ZYA GHQ panpihna in dangka 20,000/- khak hi. Tua banah Thanglianpau @ Sia Pau President ZRO in chief host hihna toh hiai hun zatna uap a, LB. Sona Chairman Zomi Council in functional president hihna uap a, Langkhanpau Guite Chairman ADC/CCpur, Ginsuanhau Singngat MLA, Vungzagin Valte Parliamentary Secretary, te'n guest of honour hihna toh hiai hun zatna uap in thugen hun zang chiat uhi. Hiai hun ah T. Goukhomang President ZYA GHQ in ZYA Lamka Block makaite kichiamsakna nei a, Rev Stephen Chinzathang ZPCS in amaute thumsakna nei hi. Hiai hun zatna Zomi nam sung a pawlpi poimawh tuamtuam a makaite'n leng uap uhi. Tuni a hiai hun zatna ah ZYA GHQ in khalui July 16, 2013 a Khuga Dam a kelum Khumlemsang luang tuikawm a va la khetu Zamlianthang of Hiangdung Village pahtawina pia ua, memento leh sumtang in cheng 2,000/- pia uhi.

***Mairam Sharma IAS Addl. DC/CCpur makaih in tuni sunma dak 11:00 in District Training Centre Tuibuang ah GeGS, DIT, MSITS, M/S Zoom leh M/S HUGHES toh kisai in meeting om hi. Hiai hun ah VLE te'n haksatna a neihte uh, VSAT leh Solar Power installation toh kisai, Citizen Centre Service toh kisai a VLE leh SDO/BDO te nasep ding dan leh CSC toh kisai a guidlines leh a function dan te gen khawmna nei uhi.

***Manipur Goverment in Manipur State sung a IAS leh MCS Officer hunkhop suankualna nei hi. Suan khak a omte lak ah CCpur District ah MCS Officer 5 hong pai thak ua, mi 5 te lak ah mi 4 in tuni Maniram Sharma IAS Addl. DC/CCpur kiang ah joining report pia uhi. Tuni a joining report pete ahihleh Soiminlien MCS Assistant Commissioner to DC/CCpur, Dr, Ayekpam Chinglenkhomba Meeitei MCS SDO/BDO, Parbung, Lalropui Fimate MCS SDO/BDO, Singngat, S. Theinlaljoy Gangte MCS SDO/BDO, Thanlon leh Joel G. Haokip MCS, SDO/BDO, Parbung te hi uhi.

***CCpur District Sport Association (CDSA) saina a apaisa July 20, 2013 a Lamka Public Ground ah (L) T. Lianbawi Simte Memorial District Super Division League 2013 neih a om paitou zel in hong tung ding August 3, 2013 sunnung dak 2:00 in Lamka Public Ground ah khakna hun zat hiding hi. Hiai hun ah Khanthang Tonsing, Executive Member, Manipur Pradesh Congress Committee in khuallian hihna toh uap ding a, Kamsuanlun EM ADC/CCpur leh B. Dongzalian Simte President Simte Tribe Council (STC) GHQ te'n guest of honour leh functional president hihna toh hiai hun zatna uap ding uhi. (L) T. Lianbawi Simte Memorial District Super Division League 2013 ah team/club 5 kihel ua, tuate lak ah Lamka Sports Club (LSC) leh Ahshijolneng team-te final kimawl ding uhi.

***Mizo Zirlai Pawl, MZP HQ Manipur in tuni a thusuah a press note a suah khiak uh kimu in a taklat dan in PC Lawmkunga IAS in Manipur Chief Secretary a let kipahpihthu puang uhi. Press note in ataklatdan in O. Ibobi Singh Chief Minister Manipur makaih SP Goverment in hiaibang thil thupi leh kipahhuaitak a bawl ziak un pahtak thu puang uhi. Tua banah, zan zek a SDO Thanlon dinmun lending a Goverment in S. Thianlaljoy Gangte MCS a koih ziak in kipahpihthu puang uhi. Tua bangkal ah MZP Press note in a taklat zelna ah menchim ziak a National Highway 2 apan niteng poimoh van bangmah puaklut theihlouh in om a, tuaziak in State Goverment leh BRO te'n Mizoram apan van puaklut theihna omsun Guite Road puahpha thak in ding MZP HQ Manipur in ngetna bawl hi.

Gamdang Tanchin:
***UN thusuak in a taklat dan in Syrian Civil War ah chemical galvan kizang ahi chia ngawhna omte suizuina leh investigation panpahta ding uhi. Syrian solkal in UN Investigation team-te'n Syria gamsung a chemical galvan kizatna mun hia kigen mun thum phak theihna'ng leh investigation bawl theihna'ng in phalna pia hi. Syrian Civil War ah Syrian solkal leh opposition rebel-te kal ah chemical galvan zang a kingawhtuahna ana omta hi. Syria khopi Aleppo leh Homs ah kikaptuahna nasa mahmah paizom zel a, Syrian sepaihte'n Homs khopi lianzaw la zouta uh hi'n kigen hi. Huchikawmkal ah, Syrian Army-te'n Army Day zatna nei ua

***Democratic Republic of Congo suahlam pansan M23 helpawlte'n galvan koihkhiakna ding in dakkal tamlou lel nei ua, huai dakkal 48 hun kipia sung a rebel-te'n a galvante uh a koihkhiak ua, a luikhiak kei u'leh United Nations' sepaihte'n thagum leh phutluih a a galvante uh koihkhiaksak ding uh hi'n kigen hi. DR Congo minautangte humbitna'ng leh venbitna'ng in UN Intervention Brigade-te'n Security Zone khat Goma khopi ah bawlkhia uhi. Hundang leh nidang bangloutak in, DR Congo a United Nations' mandate nuai a sepaihte'n offensive operation bawl theihna ding in thuneihna leh phalna nei ua, UN in DRC solkal leh Army-te toh kithuzak leh kizomkhawm a nasem a naktak a panla khawm uh ahihdan puang hi.

***Zimbabwe ah Presidential leh Parliamentary Election neih zawh in omta a, vote simna pai lel hi. Zimbabwe ah phalbi sukpi laitak himahleh, gintak sang in vote khia ding tamzaw a, mun khenkhat ah vote khiak theihna hun behlap in om hi. Africa Union apan election observer a kuante'n tutan in election toh kisai in lamzangtak a thil pai ahihdan gen uhi. Tulel a Zimbabwean President Robert Mugabe leh Zimbabwean Prime Minister-lui Morgan Tsvangarai-te kikhing thei mahmah ding un kigen hi. Polling stations tuamtuamte ah vote simna pai lel a, huai result-te Election Commission's headquarters ah thotlut hiding a, thotlutna lam ah buaina, logistical problem bangmah a omkeileh ni nga sung a election result-te puankhiak hiding in kigen hi.

***Chinese sepaih, People's Liberation Army phuhkhiak a om nung kum 86 chinna lopna leh China a Communist Vaihawmna kum sqawm guk chinna lopna Beijing a Tiannanmen Square ah om a, hiai hun pen China in galvan a neih nanungpente leh galvan muanhuai a neihte lahkhiakna hun in zang hi. China in, 1953 a Korean War ah tumlam gamte toh kidouna a maituah nung in kidouna thupi deuh ah kihelkhakna nei nawnlou a, huai hunsung in galvan leh sepaih lam ah naktak in China khangtou mahleh, galvan leh sepaih thahatna lam ah US leh tumlam gam khenkhatte a delhphakna ding in atawmpen in kum sawm hiam, sawm nih hiam khawng ngailai ding hi'n Korean War veteran khat in gen hi. China in leng Defenc Budget naktak khangsak mahleh US Defence Budget toh bukkak theih hinailou a, US Defence Budget sehsawm-suah-sehguk khawng delhpha pan hi'n kigen a, himahleh, China in a Denfence Budget taktak pen puangkhia ngeilou hi'n kigen a, Defence Budget a puankhiak zah sang a a-leh nih a tamzaw zang ding in tamtak in gingta uhi.

***Bangladesh gamsung a polical party lianpen thumna Jamaat-e-Islami Party-te danpua a koih ding in High Court in thutanna bawl khum hi. Jamaat-e-Islami Party-te'n Bangladesh's Election Commission ah registration a bawl uh dankalh, illegal hi'n court in thukhenna bawl a, tuaziak in January election ah hiai party min in kuama'n election tuh theilou ding uhi. Banah, Jamaat-e-Islami Party-te' charter in Bangladesh gamsung ki-ukhna dan kalh, unconstitutional hi'n kigen hi.

***US leh Pakistan a solkal ding thak in high level ah kihouna nei ding in US Secretary of State John Kerry, Islamabad tung hi. Gam nihte'n kihouna a agenda dingte lak ah Pakistan gamsung a US in Drone Strike a neih zel toh kisai leng genkhawm ding uhi. US in helpawlte delhzuina leh beihna a Pakistan gamsung a Drone Strike a neih zel pen gam nihte kizopna hihsiatu hi'n kigen hi. White House thusuak in, Islamabad leh Washington kizopna nakpitak a poimawh ahi chi'n taklang hi.

***Khovel khangthu a amasapen ding in, Uruguay in a gamsung nganja chinna, bawlkhiakna leh zuakkhiak dan bangtak a phalsakna ding in Uruguay Parliament in vote lakna nei hi. Uraguay Congress a Lower House in hiaipen pompihna in vote peta a, Senate ah koihtouh hinawn ding a, Senate in a pompihleh Uraguay ah dan bangtak in nganja zuak hita ding a, nganja tepna leh zuakna, nganja apan a sum muhkhiakna tuh dan toh kituak hita ding hi.

***Vaihawmna leh thuneihna apan a paihkhiak a ana omta Mohammed Morsi gumtute'n Egypt gamsung mun tuamtuam ah kiphinna sunzomtou zellai ua, tua toh kiton in Egyptian Army-te zathuapna leh huhna toh bawlkhiak a om interim solkal in, Egypt gamsung a khopi tuamtuam kongzingte a kiphinna leh nuakna nei Mohammed Morsi gumtute hahsiangna leh hawlkhiakna ding in police-te kiang ah thuneihna lianzaw piak behlap hi. Vaihawmna leh thuneihna Mohammed Morsi kiang a piak nawnna ding ngiat in Morsi gumtute'n Egypt kongzingte ah kha khat val giaklut top in kiphinna leh protest neita uhi. Egypt interior ministry thusuak in, tunitan a Muslim Brotherhood-te makaih a kongzing a kiphinna leh protest neihtouh a om nilouh pen pom theih hinawnlou chi'n taklang a, Nasr City leh Geza a Morsi gumtu kiphinna neite hawlkhia vek ding in police-te kiang ah thupiak bawl a, national security threat, gamsung' muanna leh bitna a ding a lauhuai leh muanna leh bitna susia thei gige uh hi'n taklat behlap hi.

***Australia in gamdang apan a gamsung ua bukna leh bitna, asylum zongte tung a gakna khauhtak bawlna ding a dan khauhtak a zat nung a amasapen ding in Australia in Papua New Guinea ah asylum zong mi 40 thonlut hi. Australia dan thak nuai ah, Australia a bukna leh bitna, asylum zong a long, boat zang a Australia gam lut tum peuhmahte Australia gam leitang sikkhaksak hilou ding ua, Papua New Guinea ah thonlut pahpah hiding uh a chih dungzui in Pakistan, Afghanistan leh Iran apan asylum zong ding a Australia ah boat zang a luttum mi 40 vel Christmas Island apan in PNG a Manus Island ah thonlut nghal hi. Australia apan PNG a asylum seeker thotlut a omte bel Australian solkal sumsenna nuai ah etkol hi veve ding uhi.

***Honduras ah dengue fever ziak a mi 16 in sihna a tuak ua, midang sang sawm-le-nih val in dengue fever a vei nung un, Honduras ah state of emergency puan in om a, health worker-te'n Honduras gamsung pumpi ah thoukang kapna nasatak nei lel uhi. Dengue khosik bel thoukang ziak a kithehdalh ahi.