UPDATES:

S5 Box

ZOGAM.COM Login

Hornbill News | 30 June 2013

hornbill news logo*ICDS nuai a CCpur Anganwadi Worker-te'n Rally Nei; Honorarium Kha 14 Mulou Uh
*Addl. DC/CCpur leh SDC in District Hospital Visit Bawl; Doctor Khenkhat Kiang ah Showcause Notice Piak Hiding Uh
*Athawn in Japanese Encephilitis (JE) Damdawi Kapna Pailel
*Major General Vinod Kumar GOC in Ex-Servicemen Contributionary Health Scheme Poly Clinic Etkhiakna Nei
*Prevention of Cruelty to Animal kichi Society CCpur ah Phuhkhiak Hiding
*Lions Club of CCpur Greater in Theihsakna Bawl

Tanchin Kimzaw:
***Integrated Child Developent Scheme (ICDS) nuai a CCpur District sung a omAnganwadi Workers leh helper-te'n honorarium kha 14 amuhlouh uh phutna in tuni'n lampi zuihna nei uhi. Lampi zuihna ahihleh tuni zinglam dak 10:00 apan Lamka Public ground apan Tipaimukh road tawn in Red Cross road ah pial khesuk in Tedim road tawn in DC/CCpur Office tan lamzuihna nei uhi. Anganwadi workers leh helpers te'n tuni in kha 14 a honorarium pedia phut kawm in Jacintha Lazarus IAS DC/CCpur kiang ah memorundum piakna nei ding chih himahleh Imphal a a hoh ziak in ama sik in Maniram Sharma IAS Addl. DC/CCpur kiang ah memoradum piakna nei uhi. DC a ding a memorandum submit a om kimu in a taklat dan in CCpur District sung ah Anganwadi Centre 1010 om a, State Social Welfare Deparment in June 2013 a ding in tuni tan in fund khat leng released bawl nailou ahihdan leh hiai ziak in anganwadi worker leh helpers te'n haksatna lianpi tuahlawh uh ahihdan leng taklang uhi. Tua banah tuma hun bang tan hiam paisa in State Social Welfare Department in kha nih a ding honorarium pia ua, himahleh hiai kha 2 ading lel released a ompen worker leh helpers te ading a haksatna tut behlapzaw hidan in taklang uhi. Memorandum in a taklat zelna ah a kisaipih thuneite apan thu kipah huai bang mah zak ahihkeileh maban ah leng kiphinna chituam dangkhat nei nawn ding uh ahihdan uh taklang uhi. Tuni a lampi zuihna hun ah anganwadi woker leh helpers 2000 val lampi zuihna ah kihel uhi.

***Maniram Sharma IAS Addl. DC/CCpur leh S. Khaikhopau Ngaihte SDC, Branch Officer DC office te'n tuni zinglam 10:30 in District Hospital visit va bawl uhi. Maniram Sharma IAS DC/CCpur leh S. Khaikhopau Ngaihte SDC in Hospital aphak hun un Medical Superintendent leng office tung nailou a, tua banah hospital a ward om teng leng check bawlsuak uhi. Addl. DC in visit a bawl lai in doctor mi 3 kia in damlou ki-ensak dia hohte ana en lel ua, doctor dangte kuamah atung nailouh ziak in heh mahmah hi. Tua banah District hospital sunga zunbuk leh dailen buk omte leng hahsianglouh in om hi. Maniram Sharma IAS Addl. DC/CCpur in Dr. Paulginthang Medical Superintendent kiang ah tuni a a visit bawl hun a tunglou doctor teng kiang ah showcause notice suahkhum ding in thupia a, show cause notice copy DC leh amah kiang ah leng peding in theisak hi. Aban a gen zelna ah hun danga visit a bawl nawn hun a doctor leh nurse duty hun laploute kiang ah amah mah in show cause notice suahkhum ding ahihdan gen a, tua banah doctor leh nurse te duty hun ding kichiantak a bawl ding leh takkhe ding in Medical Superintendent kiang ah theisak hi.

***District Hospital konga District Immunization Office ah kal masa apan in Japanese Encephilitis (JE) natna toh kisai in kal paisa apan in naupang kum 1 apan kum 10 kikalte kiang ah athawn a damdawi kapna neih a om pen paitou zel in tuni in leng kapna nei nawn uhi. Naupang kum 1 apan kum 10 kikal tuni tan a Japanese Enciphilitis damdawi kikap sak naupang 2191 chingta a, tukal sung in 2 vei kap lai ding ua, ta kum 1 apan kum 10 kikal neite'n Ningani leh Kiginni in District Immunization Office ah athawn in va kapsak theih ding hi. Kum paisa 2012 in naupang kum 1 apan kum 10 kikal mi 30,708 te athawn mah in Japanese Enciphilitis dawmdawi kap in ana om uhi.

***Major General Vinod Kumar GOC 41 Sub - Area Jorhat, Assam in tuni nitaklam dak 1:30 in Lamka hong pha in HQ Veng a PHED te Office kianga Assam Rifles te gam a Ex-Servicemen Contributionary Health Scheme (ECHS) Poly Clinic mun etkhiakna hong nei hi. Major General Vinod Kumar GOC 41 Sub - Area Jorhat ahih leh tuni in 57 Mountain Division Leimakhong apan in hong pai a, Ex-Servicemen Contributionary Health Scheme (ECHS) Poly Clinic mun ah ex-servicemen makaite leh Ex-Servicemen Contributionary Health Scheme (ECHS) Poly Clinic a staff te toh hun zatna sawtlou nei khawm uhi. Hiai hun a, Ex-Servicemen Contributionary Health Scheme (ECHS) Poly Clinic te'n apoimoh te uh Major General Vinod Kumar a theihsak ban uah, agelh thoh in leng lekha pia uhi. Major General Vinod Kumar in leng a kin theilam a tuleh tu a kitasam omte piak hiding in chiam a, tua ban ah hiai hun ka hong phak nawn hun in thil teng felvekta ahi chi hi. Ex-Servicemen Contributionary Health Scheme (ECHS) Poly Clinic Ex-Servicemen Contributionary Health Scheme (ECHS) Poly Clinic ahih leh tukum bul in January 15, 2013 in kiphut khia a, huai hun in Leimakhong Army HQ ah kha nih sung va om ua, April 1, 2013 in hiai mun luah pan uh hi. Ex-Servicemen Contributionary Health Scheme (ECHS) Poly Clinic ah K. Thangkhopau in Administration JCO hihna len a, tua ban staff 8 om ding chih himah leh Officer In-Charge (IOC) ding om louh ziak in Medical Officer In-Charge (MOIC) Dr. T. Hartlang in IOC toh len khawm a, Tua ban ah Lab. Technician khat, Lady Attendent 1, nurse khat, driver khat leh peon khat om uhi. Hiai mun ah sepaih pension sa smart card nei te a thawn in ki-etsak theih dinga, tua ban ah damdawi leng a thawn in piak hiding ua, investigation leng a thawn mah in bawlsak hi ding uhi.

***District Malaria Department in July 2013 khasunga damlou tuamtuam mi 2327 te sisan test a bawlna uah mi 16 te malaria vei uh ahihdan musuah ua, mi 16 te lak ah 15 te malaria PF ahihdan musuah uhi. Tukha in malaria PF muh khiak a omte lak ah khat in sihna tuak hi. Malaria Department lam in a gen dan in kumlui 2012 Apriil kha apan tuni tan in malaria department malaria damdawi tang khat leng mulou ua, tua ziak in tukha in malaria PF te lak ah khat in sihna tuak kha hidan in gen uhi.

***N. Rajendro Singh Joint Director Vety CCpur in thusuah abawlna ah Prevention of Cruelty to Animal kichi Society khat CCpur ah phuhkhiak hiding a, huai ding in numei leh pasal kum 18 tunglam a ut kuapeuh member hitheihna ding in min piaklut theih a, tua banah min piaklut hun a annual fee 250 leng piak ngai ding a, huai pen demand draft in leng piak theih ding hi. Hiai ding a lunglutna nei te'n District Veterinary Office Tuibuang ah form la in August 21, 2013 tan in submit theih ding hi.

***Pearsonmun a om The Malsawm Initiative (TMI) a teacher teng kal nih sung daih ding Mumbai a training dia a kuan vek ziak un tuni July 30, 2013 apan in The Malsawm Initiative khak in om hi. The Malsawm Initiative a teacher te ahihleh The Malsawm Initiative technical support ana pe gige Voice & Vision India in a sponsore hi a, Helen Keller Deaf & Deafblind Mumbai mun ah kal nih sung va training ding uhi. Amaute September 1, 2013 in Lamka hong tungkik nawn ding ua, tua banah The Malsawm Initiative leng September 2, 2013 apan in kihong nawn ding hidan Pauzagin Tonsing Secretary Centre for Community Centre (CCI) apan thutut kingah hi.

***District Governor, District 322D thupiak dung zui a, Lions Club of CCpur Greater Secretary Lion Frankie P. Gangte in thusuah a bawlna ah Uttarakhand State a Himalayan Tsunami thuakte panpihna ding in Lions Club of CCpur Greater a Member teng kiang ah panpihna pe khawm chiat ding in ngetna bawl hi. Tua banah Lions Club of CCpur Greaters in mipite khualna ziak in JP Selection ah Blue Star Water Cooler kichi tuisiang mipite dawn theih ding koih uhi. Hiai pen niteng a tui bottle khat Rs 40 hisap a niteng a litre 200 thun gige ngai ahihziak in Lions Club of CCpur Greater in haksatna tuak ahihman in mipite khualna ziak a, mimal pawlpi phatuam ngai nuam a panpih utte ding in panpihna piak theih gige ahihdan leng taklang uhi.

Gamdang Tanchin:
***Ni tamlou paisa a Tunis khopi ah Tunisian opposition makai Mohammed Brahmi kaplup a a om nung in, solkal tung a mipi lungkimlouhna leh kiphinna paizom zel a, huchikawmkal ah, Tunisia leh Algeria kigamgitna zul Chambi taangdung ah Tunisian Army-te ambush in om ua, sepaih giat in sihna tuak uhi. Tunisian President Moncef Marzouki in kaplup a om Tunisian sepaihte sunna ding in ni thum sung lusunna ni in puang hi.

***Nigeria a Christian-te tenna mun deuh Kano City ah a kizom in bomb bangzah hiam puak a, atawmpen in mi 15 in sihna tuak uh hi'n kigen hi. Kuate gamtatna hihiam chih theih hikei mahleh, Kano area bel Islamic helpawl Boko Haram-te hatna leh thuneihna bial ahi.

***United States a Florida state ah gas plant khat ah puakzak bangzah hiam a om nung in kuangzak a, mi sagih in liamna a tuah banu'ah, midang 15 vel mangthang lai uh hi'n kigen a, mi nih bel bangmah chilou in suakta thei uhi. Emergency worker-te'n meikuang pen phelh ua, local media in a report-na ah, hiai Blue Rhino Gas Plant a semtu mi bangzah hiam mangthanglai uh hi'n taklang uhi. Gas Plant kimnai a a om mi khenkhat a lauhthawnghuai louh deuhna mun ah pikhiak in om uhi.Explosion kipatna theihchet hinailou hi.

***Pakistan maltumlam aom Dera Ismail Khan ah Pakistani Taliban-te'n jail khat buluh ua, kikaptuahna nasatak a piang ah mi 12 kaplup in om ua, jail taang mi 248 vel Taliban khahkhia uhi. Taliban fighter-te'n jail buluhna ding in grenade leh RPG tanpha zang ua, paungaihna, mic zang in a mi pikhiak dingte uh min samkhia uh hi'n kigen a, Dera Ismail Khan jail apan high profile, high value suangkul tang mi 40 apan 45 kikal vel suakta uh hi'n kigen hi. Taliban-te'n a luh uh jail ah mi 5,000 vel khum a om uh hi'n kigen a, jail venbitna toh kisai a security lam mohpuakna neite a ding a thiltung zahlakhuai leh maizumhuai mahmah ahi. April 2012 in leng Bannu ah Taliban-te'n jail khat ana luhta ua huai apan in a commander uh khat ana hunkhia uhi. Tulai in Islamic gam tuamtuam ah jail buluh leh jail apan taikhiak chih kithang mahmah hi.

***European Union Foreign Policy Chief Catherine Ashton in nipikal thum vel paisa a vaihawmna leh thuneihna apan paihkhiak ana om Egyptian President lui Mohammed Morsi kimuhpihna nei a, Egypt gamsung buaina toh kisai nouneltak a genkhawm uh hi'n kigen hi. Tuabangkal ah, Morsi supporter-te'n Egypt a sepaih vaihawmna, military rule deihlouhna toh a dinmun leh thuneihna leh vaihawmna ah Morsi koihkik ding phutna in Muslim Brotherhood in protest tamsem neih ding in puang hi. Catherine Ashton in Egypt a interim solkal leader-te leh military thuneitute leng kimuhna nei a, Muslim Brotherhood palaite toh leng kihouna nei hi.

***UN Secretary General Ban Ki-moon in, Iraq gamsung a sectarian violence toh kisai a Iraqi solkal in bangmah panlakna a neih keileh buaina, siatna, sihna leh manthatna huaisia zaw tamsem tung behlap ding hi'n vauhilhna bawl hi. Seppatni in a kizom a bomb 15 puakzak ah mi 60 vel in sihna tuak ua, tukum pailel sung in suicide bomber leh car bomb ziak in mihing 3,000 val in sihna tuakta ua, July kha sung chauh in leng mi 800 in sihna ana tuak uhi.

***Nekgukna leh golhgukna ziak a Mr Ten Percent chih a om Pakistani President Asif Ali Zardari hun bei ding ahihtoh kiton in, amah mun luahtu ding telna Pakistani's Presidential election om ding hi. Pakistan President thak ding bel Pakistan gamsung a National leh Provincial Assemblies apan a politician-te omna electoral college in telkhia ding hi. Pakistani Prime Minister Nawaz Saharif's Muslim League in Presidential election tuh ding in Mamnoon Hussaini guang a, amah tuh madawk mahmah a, telching a om ngei ding a gintak ahi. Asif Ali Zardari makaih Pakistan People's Party in bel Presidential election pen boycott ding uh hi'n puang uhi.

***Tax piak dukdaklouh leh diktattak a piaklouh ziak a Italian Prime Minister lui Silvio Berlusconi tung a ngawhna pansan in, Berlusconi in kum 2018 tan public office bangmah luah theilou ding in Italian court niamzaw khat in thutanna bawlkhum a, Italian Supreme Court in Berlusconi tungtang ngaihtuah ding a, court niamzaw thukhenna a zahtak pih leh Berlusconi in kum 2018 tan Italy gamsung a public office himhim luah theilou ding a, kum li sung suangkul taang ding hi. Kum sawm paisa in, Berlusconi' media company khat in a sum muhkhiak zah ua pan ginatak leh diktattak a tax pialou ua, a piak ding zah uh tax pelou uh hi'n ngawhna om hi. Tu'n, Supreme Court in Berlusconi tung ah thutanna bawl a, court niamzaw in October 2012 a Berlusconi tung a thutanna a bawlpen a zahtakpihleh Berlusconi in Italian coalition solkal apan in a' party-te zukkhia ding hi'n kigen a, Italian solkal dinglel tuh naktak a buai ban ding hi'n kigen hi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING