UPDATES:

S5 Box

ZOGAM.COM Login

Hornbill News | 23 June 2013

hornbill news logo*CCPur Consumers Club in Sammetna toh Kisai in Theihsakna Bawl
*Thanlon Constituency MLA in Panpihna Tuamtuam Hawmkhia Ding
*3-days Workshop on Techniques of Teaching, Question Setting and Evaluation om ding
*E-District Manager/CCpur Lakna'ng Written Test leh Interview Om Ding
*DAPCC, CONGO leh DCC (HIV-TB)-te'n Quarterly Review Meeting Nei Ding
*PMEGP Loan Project Application toh Kisai in IAS Addl. DC/CCpur in Theihsakna Bawl
*Lianboi Memorial Super Division League Paitou lel; LSC Vualzou

Tanchin Kimzaw:
***CCpur Consumers' Club in tuni in Lamka khopi sung a samtan (barber)-te zuih ding leh mipite theih ding in thusuah bawl hi. Thusuak in a taklat dan in a paisa July 21, 2013 sunnung dak 1:00 in Lamka khopi sung a sammetna dawr (hair cutting saloon) neitu leh samtantu (barber)-te samkhawm in amaute zuih ding thupukna point 3 bawlpih uhi. Thupukna a bawlte uh ahihleh samtantute'n samtanna leh mulmetna vanzat tuamtuamte suksiang gige ding, apoimoh bang a spirit zat gige ding, natna kilawhsawn theihna apan kivenbitna dia mi khat tung a zatsa mi dang kiang a zat nawnlouh ding, samtan chiang a puansilhte atam theilam neih ding banah puan pen sawpsiang gige ding, puan siang leh sianglou theihchet baih theihna ding a samtantu (barber)-te'n puanvom zat nawnlouh ding, puan ahing (green), adum (blue) leh aeng (yellow)-te zang zaw ding in theisak uhi.

***56-Thanlon Assembly Constituency bialtu Vungzagin Valte, Parliamentary Secretary (horticulture/soil conseration/CADA) in a bialsung a poihlong leh khozakna hoihloute a ding in wheelchair leh hearing aid piakkhiakna; hong tung ding July 25, 2013 sunma dak 11:00 in (L) Niangzen Khualbuk, Dorcas Veng, New Lamka ah nei ding hi. Hiai hun ah Vungzagin Valte Parliamentary Secretary in poihlong leh khozakna hoihlou mi 25-te kiang ah panpihna pekhe ding hi. Panpihna piak khiak dingte ahihleh hearing aid 20, wheel chair 4 leh tri-cycle 1 hidan in kigen hi. Hiai hun ah poihlong leh khozakna hoihlouhte a ding in thumsakna Pastor (Retd) V. Songkhothang in nei ding hi.

***Churachandpur District Private School Associatoin (CDPSA) leh Council of Higher Secondary Education Manipur (CoHSEM)-te kithuah in hong tung ding July 25-27, 2013 kikal sung in Donbosco Higher Secondary School ah 3-days Workshop on Techniques of Teaching, Question Setting and Evaluation om ding hi. Hiai hun ah, L. Biren Singh Principal, Ukhrul Higher Higher Secondary School, Dr.L. Ramananda Singh Retd. Reader DM College of Science, Ng. Amumacha Singh, Retd. Jt. Director of Education (s) leh H. Jayanta Kumar Singh Retd. Head of Department, Maths DM College of Science-te'n sinsakna nei in khopi sung a higher secondary school leh college a Physics, Chemistry, Biology leh Mathematics a teacher teng tel ding uhi. Hiai ding toh kisai a CDPSA lam apan thu kimu dan in, hiai hun sung a teacher/lecturer tamtak tel ding ahihna uah, district sung a private higher secondary school leh college a science student-te'n class neilou ding uh hidan in taklang uhi.

***Ms Jacintha Lazarus, IAS DC/CCpur makaih in amah' office chamber ah zingchiang sunma dak 11:00 apan in E-District Manager/CCpur Dist nuai a post 1 sem ding written test leh interview neih hi ding hi. E-District Manager/CCpur a post 1 lakna ding ah mi 11 in application pialut uhi.

***Zomi Football Club (ZFC) in football kimawlna lam ah State Champion hih sawm in nasatak in pan lalel uhi. Tua dung zui in ZFC in zingchiang July 24, 2013 zingkal dak 8:00 in Artificial Tuft Ground Imphal ah NISA Club-te toh friendly match nei ding uh hidan in ZFC official-te apan thutut kingah hi.

***Distric AIDS Prevention and Control Committee (DAPCC), CONGO leh DCC (HIV-TB)-te'n zingchiang sunma dak 11:00 in BRGF Resource Centre DC Office ah Quarterly Review Meeting om ding a, tua ah District AIDS Prevention and Control Committee (DAPCC), District AIDS Prevention and Control Committee (DAPCC) chairperson Jacintha Lazarus IAS DC/CCpur in makaih ding hi. Hiai meeting ah, DAPCU in kum kim paisa ana sep khiakte uh gen khawmna leh Rehab centre-te toh kisai thu poimawh tuamtuam genkhawmna nei ding uhi. Meeting hun ah NGO-te, Rehab centre teng banah member teng telkim chiat ding in Dr. F Thienkhogin DACO in theihsakna bawl hi.

***Maniram Sharma IAS Addl. DC/CCpur in tuni a theihsakna a bawlna ah, kha lui June 28, 2013 a DIC Office a PMEGP loan project form la kha teng leh DIC Office mun mah a submit kha teng in hong tung ding July 25, 2013 tan a Maniram Sharma IAS Addl DC/CCpur kiang a va ki-report chiat ding leh, ki-report hun a identity proof-na ding documents leng tawi ding in taklang hi.

***CCpur District Sport Association (CDSA) saina in (L) T. Lianboi Memorial Super Division League paitou lel a, tuni in Lamka Sports Club (LSC) leh Sport Club of Leatherites (SCL)-te'n kimawlna nei uhi. First half tan in goal khat tuak in ki-draw ua, hun bei tan in LSC in SCL-te 2-1 in zou hi. Zingchiang in leng kimawlna sunnung dak 3:00 in om nawn ding a, tua ah Ahsi Jolneng Football Club (AFC) leh New Lamka Youth Club (NLYC)-te'n kimawl ding uhi. NLYC-te'n ahihleh zan in Lamka Footbal Club (LFC)-te goal khat tuak in ana ki-draw pihta uhi.

Gamdang Tanchin:
***Egypt' Prime Minister ahihna apan apaihkhiak a om Mohammed Morsi gumtute'n Egyptian President ahihna, vaihawmna leh thuneihna piakkik nawn ding phutna a peaceful protest a neih uh paitou zel in, zan nitak in Egypt gamsung mun nih a protest a neihna uah beih in om ua, mi kua in sihna a tuah banuah, mi dang tamkhop in liamna tuak uhi. Geza ah kuate ahi ua chih theihlouhte'n Morsi gumtute bei ua, huaikim vel mah ah car bangzah hiam hal in bok hi. Cairo khopi laizang ah leng Morsi gumtute leh Morsi deihloute'n protest rally nei tuaktuak ua, pawl nihte kal ah kisualzakna piang in mi bangzah hiam in liamna tuak uhi. Egypt Prime Minister ahihna apan a paihkhiak a om Mohammed Morsi omna bel tunitan puankhiak hinailou a, a innkuan naipente'n leng a omna a theihlouh ziak un Egypt military, sepaihte tung ah legal action la in, Egypt gamsung leh international court ah hekna bawl uhi.

***Lebanon pansan Hezbollah pawl tung a European Union in gakna leh thununna a puankhum US in kipahpih mahmah ahihdan puang hi. European Union sung a om gamte' Foreign Minister teng in kituak tak in Hezbollah military wing tuh danpua ah koih a, terrorism organisation khat ahi chi a chiamtehna ding in thupukna bawl ua, sanctions puankhum uhi. EU in Hezbollah-te helpawl hi a a chiamteh a, dan pua a a koihna pen lamdang salou uh ahihdan Hezbollah thupuangtu in gen a, Israel, US leh Britain nawhhat thu leh fuihna ziak a danpua a koih a om uh ahihdan gen hi. Hezbollah bel Lebanon gam a polityical party poimawh mahmah khat hi'n kigen a, galvan tawi pawl a neih kawmkawm un Lebanon politics ah leng tuitum veve ua, tulel a Lebanon solkal bawlna ah panmun poimawhtak a neih banuah, Parliament ah leng palai bangzah hiam a neih ua, Lebanese society ah dinmun leh panmun poimawhtak nei uh kigen hi. Lebanon a Shia Muslim om teng in naktak a Hezbollah zathuap in, gupna pia uhi. Hezbollah tung a EU gamtatna pen Hezbollah-te'n bel a hatna uh leh huzap uh khanglian zel pen dal tupna hi'n ngoh lel ua, adang bel ngai thupi vaklou uhi.

***Brazil ah World Youth Day zatna hun uap ding a Pope Francis in Rio de Janeiro a bawhnung sawtlou in buaina in zui ngal hi. Rio de Janeiro a police munpi kong ah protesters za thum vel in Roman Catholic Siampu lianpen, pontiff Pope Francis zintunna ding a Brazil solkal sum sennna tung ah lungkimlou in in kiphinna nei ua, police-te toh kinawktuah ua, kiphinna neite'n firebomb khawng zang uhi. Pope Francis bel Brazil ah nipikal khat vel taam ding a zin ahi a, huai hun sung in World Youth Day zatna hun leng uap ding hi. Roman Catholic gingtu tamtak in Pope Francis ana vaidawn in, airport apan in lampi dung ah mi tamtak kivual dim uhi. Official welcom ceremony ah Pope Francis in a thugenna ah, 'Brazil thuneitute kiang ah tu nipikal noute toh zatkhawm theihna ding in phalna ka ngen a, himahleh noute a ding in thil thupi silver leh gold-te ka hon puakzoukei, himahleh ka hon puakzoh omsun tuh kei kiang a thil thupi pen piak a om Jesu Khrist k'on puak,' chi'n gen hi.

***Zinling hattak nih in China tumlam a om Gansu province a Dinxi khopi kim-lekiang lak a sawisiat nung in hutkhiakna leh panpihna nasep pai lellel lai a, tuni tan in misi 89 muhkhiak leh theihkhiak hita a, midang za tamkhop in liamna tuak uhi. Zinling masa pen tehna ah 6.6 magnitude in hat a, a nihna pen tehna ah 5.6 magnitude in hat hi. Zinling tuh epicentre Dinxi City ahi a, Dinxi City bel China gam khopi Beijing apan kilometers 12,00 vel a gamla hi'n kigen hi. Zinling ziak a siatna leh manthatna tunna mun tak bel Dinxi khopi kim nai vel a tangggam khotate lak ah siatna leh manthatna nasa mahmah hi. Kikawmtuahna lampi hoihlouh ziak in hutkhiakna leh panpihna pia ding a kuante leng zinling ziak a siatna mun a tunna ding ua dakkal bangzah hiam lut hi'n kigen hi. Huchikawmkal ah vuah nasatak a a zuk ziak in hutkhiakna leh panpihna nasepna nawngkaisak ban mahmah a, leitolh leh menchim tamsem piangsak behlap hi. Zinling ziak a siatna leh manthatna tung teng sum a tuat in $30 million sang a tamzaw ding hi'n thuneitute'n gen uhi.

***New York a La Guardia Airport ah Southwest Airline-te' lenna khat a bawh lai in a malam pei kichim in lenna kimuktuk a, mi 10 in liamna tuak uhi. Liamna tuakte lenna phual mun mah ah etkol in om lel ua, mi dang guk bel liamna neu chikchik ziak in damdawi inn ah paipih in om uhi.

***Thailand ah bus tuahsia huaisia mahmah khat ah atawmpen in mi 18 in sihna tuak ua, mi dang 20 liam uhi. Salabuli province apan Bangkok zuan a hong pai, mi 45 vel tuanna bus khat toh truck khat kiphutuah hi'n kigen hi.

***British Kumpi innsung ah tunung a Kumpi hong hi ding kibehlap zel a, khovel in a ngaklah leh bildawh mahmah British Kumpi William leh Duchess of Cambridge-te' nupa in tapa neita uhi. Kumpi innsung ah pasal naupang khat kibehlap ahi chih thu Prince William in a' nu British Kumpinu Elizabeth kiang ah damdawi inn apan telephone tungtawn in hilh hi. Hiai Royal Baby piangna cover ut in leitung mun tuamtuam apan in journalist tamtak damdawi inn leh Britain Kumpi tenna inn Buckimham Palace kim-le-kiang ah giaklut top uhi. Tua piang naungek in British Laltutphah a luah theihna ding in a khang thumna ah om hi. A min ding bel bangmah puankhiak ahinaikei.

COMMENT (2) PHA TA..  
  •  
  •  

#2#2 tonXing » 2013-07-24 20:10

CCPur Consumers Club can do better, hai kei ni!

  •  
  •  

#1#1 aihnake » 2013-07-24 14:25

CCPur Consumers Club in Sammetna toh Kisai in Theihsakna Bawl : ".... puan siang leh sianglou theihchet baih theihna ding a samtantu (barber)-te'n puanvom zat nawnlouh ding, puan ahing (green), adum (blue) leh aeng (yellow)-te zang zaw ding in theisak uhi."

hmmm puansiang theihchet na di'n angou mah chiang pen lou ding hiam!!!!

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING