Hornbill News | 22 June 2013

User Rating: 0 / 5

Star InactiveStar InactiveStar InactiveStar InactiveStar Inactive
 

hornbill news logo* Tribal Affairs & Hill (TA & H) Scheme 2013-24 tungtawn in Wheelchair leh Hearing Aid Hawmkhia
* Dist Malaria Office ah Review Meeting neih in om
* National Foundation for Communal Harmony tungtawn in Panpihna Hawm
* T. Lianboi Memorial Super Division League Kimawlna Kipan; NLYC leh LFC Ki-draw
* CCI in Ability Village And Empowerment Centre for Persons with Disabilities Foundation stone phum ding
* Dist Level Screening Committee on BADP Review Meeting om ding

Tanchin Kimzaw:
***60-Singngat Assembly Constituency bialtu MLA Ginsuanhau in Tribal Affairs & Hill (TA & H) Scheme 2013-24 tungtawn in a bialsung a om pianken a vualphalou (handicapped person) mi 12 kiang ah panpihna tuni zingkal 9:30 in a tenna inn mun Lailam veng ah piakkhiakna nei hi. Hiai hun a Singngat MLA Ginsuanhau in a genna ah Handicapped/Disable Welfare Scheme Tribal Affiars & Hill, Manipur 2013-24 tungtawn in constituency teng a ding in panpihna tuamtuam piakkhiakna zanhal in Deputy Chief Minister leh Manipur Home Minister lenkhawm Gaikhanngam in MLA teng kiang ah piakkhiakna nei hi’n gen a, aman huaite zanhal mah in Lamka a hon pawtou in zan a hawmkhiakna nei hi’n gen hi. A ban a gen zelna ah tutung a panpihna piak a om mi 12 hi ua, tua lak ah mi 6 te kiang ah wheel chair piak in om ua, midang 6 te kiang ah hearing aid piak in om uhi.

***CMO/CCpur leh District Malaria Officer hihna lenkhawm Dr. HL Liensang makaih in tuni zinglam dak 10:00 in Dist Malaria Office ah review meeting neih in om hi. Hiai meeting hun ah Male Health Supervisor (MHS), Male Health Worker ((MHW) leh Multi-purposes Worker (MPW) leh Field Worker-te banah Malaria Department a staff-te tel uhi. Meeting hun ah Malaria tawh kisai maban a panlak touh dingdan genkhawmna nei uhi. CMO/CCpur in a genna ah Malaria doudalna toh kisai a naktak a panlak touh ahi a, singtanglam ah leng slide tua sang a tam lak zawk hiding in gen a, tua banah slide toh kisai in khaloh neilou a sem ASHA te khut kia ah ngansiahlou a, Department sung a semte'n leng naktak a panla a, slide tamsem kaikhawm ding in ngetna bawl a, huai ding mah a goverment in khaloh hon pia ahi chi hi.

***Maniram Sharma, IAS, Addl DC/CCpur in apaisa July 7, 2013 in Lamka nusia in Delhi zuan in zinkhia a, July 8 & 9, 2013 kikal sung New Delhi a Vigyan Bhawan ah All India a DRDA nuai a Project Director-te a ding a National Conference om ah va tel hi. DRDA Project Director teng National Conference hun ah Jairam Ramesh, Union Minister (Rural & development) chief guest in pang hi. Conference hun sung in DRDA nuai a developement works tuamtuam leh a experience te uh genkhawmna nei uhi. Conference zoh in Delhi apan Maniram Sharma in a tenna khua uh va pha in huai apan a paisa Kiginni July 20, 2013 in Lamka hongtung kik nawn in tuni apan office kai in nasep sunzom nawn hi.

***Government of India, in namkal buaina ziak a naupang, nu le pa neiloute panpihna ding a scheme a bawl, National Foundation for Communal Harmony (NFCH) tungtawn in, district sung ah naupang tagah bangzahhiamte'n panpihna ngahta ua, huai mah bang in tuni sunnung dak 2:30 in naupang tamtak kiang ah NFCH tungtawn a panpihna sum hawmna nei uhi. Maniram Sharma, IAS, Additional DC, Project Director DRDA in cheque in naupangte kiang ah NFCH tungtawn a panpihna sumte hawmna nei hi. Tutung in naupang mi 62 te kiang ah panpihna sum hawmkhiat in om a, hiai ding toh kisai in CCpur District apan naupang 70 te min list DC office apan in goverment kiang ah khak in om a, himahleh mi 62 te min hong tungkik hidan in kigen hi. National Foundation for Communal Harmony (NFCH) scheme tungtawn a panpihna ngah thei dingte ahihleh student ahih ngai teitei hi. Tuni a panpihna piak a omte lak ah high school leh higher secondary (Class XII) tan zilte kiang ah cheque tungtawn in panpihna sum 10,000/- piak in om ua, graduate leh post graduate te kiang ah 12,500/- piak in om ua, proffessional Course te kiang ah 15,000/- piak in om uhi.

***CCpur District Sports Association (CDSA) saina in apaisa Kiginni July 20, 2013 in Lamka Public Ground ah (L) T. Lianboi Memorial Super Division League - 2013 hon khiakna neih in om hi. Tuni nitaklam dak 3:00 in kimawlna (match) masa neih in om a, tua ah New Lamka Youth Club (NLYC) leh Lamka Footbal Club (LFC) te kimawl ua, first half tan in Lamka Football Club in New Lamka Youth Club te 1- 0 in makaih ua, second half nung in New Lamka Youth Club te'n a ki draw na ding un Lamka Football Club te goal khat in dinkik nawn ua, full time in goal kikhum zou om nawnlou ua, 1-1 in kidraw tuak uhi. Zingchiang nitaklam dak 3:00 in kimawlna om nawn ding a, Lamka Sports Club (LSC) leh Sport Club of Leatherite (SCL) te'n kimawlna nei ding uhi. Hiai (L) T. Lianboi Memorial Super Division League - 2013 ah CCpur District sunga Super Division League lak a club 5 om ua, amaute ahihleh New Lamka Youth Club (NLYC), Lamka Football Club (LFC), Lamka Sports Club (LSC), Sport Club of Leatherite (SCL) leh Ahsi Jolneng Football Club (AFC) hi ua, a vek hiai league ah kihel vek uhi.

***Centre for community Initiative(CCI) in hong tung ding July 27, 2013, nitaklam dak 2 in Pearsonmun khosak a Ability Village (songnawite munpi) And Empowerment Centre for Persons with Disabilities mun ding suangphuh honna nei ding uhi. Hiai hun ah Ms.Lise Grande, UN Resident Co-ordinator & UNDP Resident Representative in Chief Guest hihna toh uap in suangphuh honna nei ding a, Pu. Phungzathang Tonsing, Health Minister in Chief Host hihna toh uap in, Rev. S Vungminthang, General Secretary EBC in Ability Village mun ding latna nei ding hi.

***Langkhanpau Guite, Chairman DRDA CCpur makaih in hong tung ding July 24, 2013 sun dak 12:00 in amah office chamber ah Dist Level Screening Committee on BADP review meeting om ding hi. Meeting hun ah BADP Annual Action plan 2013-14 kikupna leh finalise bawlna nei ding uhi.

Gamdang Tanchin:
***Pathianni in Japanese Parliament a Upper House election neih in om a, tulel a Japanese Prime Minister Shinzo Abe makaih Liberal Democratic party in makai a, tuaziak in Parliament a innpi nihte tuh Shinzo Abe makaihna leh vaihawmna' thuneihna nuai ah om tuakta uh chihna ahi. Shinzo Abe in a thugenna ah Japanese mipite'n amah leh a makaih party tung ah muanngamna nei a, hichituk a vualzawhna thupi a piak ziak un kipahthu gen hi. Japan parliament a Upper House ah seats 242 om a, huai lak a akimkhat tuh kum thum dan zel in election neih in om zel hi. Japanese Parliament ah, Lower House sang in Upper house thuneihna neuzaw mahleh, a deihlouh lam uh legislation thak bawlkhiak ding bel dalzou mahmah uhi.

***China tumlam a om Ganju province a rural area lak zinling nih in nuai a atawmpen in mi 75 a sih banuah, midang za guk phial in liamna tuak ua, inn tamtak kisia hi'n kigen hi. Tuni zinglam dak 7 in tehna a 6.6 magnitude a hat zinling in Denxi khopi kiang a tanggam khuate nuai masa a, huaizawh minute 19 nung vel in magnitude 5.6 a hat zinling dang in nuainawn hi'n kigen hi. Zinling ziak in tenna khua giat kisia a, khua sawm-le-thum vel toh mun dangte kikawmtuahna teng leng khaktan aom hi'n kigen hi. Hutkhiakna leh panpihna nasep pai lellel hi.

***FARC helpawl toh kihouna neilel Colombia solkal in thupuan a bawlna uah, FARC rebel-te toh kihouna pai zom zel mahleh, Colombian sepaihte tung a FARC helpawlte gamtatnate thukkik geihgeihta ding uh ahihdan puang hi. Colombian solkal in hichibang a thupuan a bawlna ziak bel, FARC helpawlte gamtatna mun tuamtuak nih ah FARC helpawlte'n Colombian sepaih 19 a thah ziak uh ahi. Thiltung khat ah, Colombia leh Venezuela gamgi zul ah thautuilawng vengbit a om Colombian sepaihte FARC helpawlte'n va bukap ua, mi 15 kaplum uh hi'n kigen a, Colombia suahlam ah sepaih 4 kaplum uhi. Hichibang thiltungte kawmkal ah, Colombia a buaina leh helpawlte ziak a minautang gentheihna leh haksatnate hihbeina ding ngimna toh Colombia a kum sawm nga val helna leh buaina hihbeina ding a FARC leh Colombia solkal in Cuba a kihouna a neih lel uh bangtan a paizom thei dia chih tuh tamtak dotna ahi.

***Ohio police-te'n tenna veng khat apan numei siluang thum plastic a kituun a muhkhiak nung un, tualthattu matkhiak tum in police naktak in suizuina nei lel hi. Numei siluan thum-te bel Cleveland apan Kiginni leh Pathianni amuh khiak ahi ua, a paisa ni sawm sung a thah a om uh hi'n police-te'n gen uhi.

***France a om Islam sakhua zui numeite'n a sakhua dan uh dungzui a, a pumpi uh leh a mel uh puan a khuhna uh toh kisai in apaisa kum nih France in gakna ana bawl a, security leh dan leh thupiak a hoihzawk ding lam-etna toh France in gakna ana bawl hi. Hiai tuh French politician-te leh police forces-te'n naktak in kipahpih uhi. Himahleh, maikhuh ding gakna dan pen sepsuahna ding in buaina in zui hi. Ningani paisa in French police-te'n Islam sakhua zui nupa kopkhat check bawl ua, huai ah numei pen puan a kikhuh ngemngum ahihman in French police khat in a ahihna, identity check a neihlai in a' pasal in police pa tuh sual a, huai mipa mat in om hi. Huai apan a buaina kipan in Ziltawpni leh Kiginni nitak tan in Paris ah police-te toh kinawktuahna piang a, kiphinna neite'n gari hunkhop halsia man uh hi'n kigen hi. Rights group khenkhat in France in hichibang a Islam sakhua dan kalh a maikhuh ding phalllouhna, gakna a bawl tuh Muslim-te khentuamna, mullitna leh chiziatna ahi chi'n ngawh uhi.

***Mexico ah thautui zawllutna lawngpi, pipeline puakzak ziak in mi sagih in liamna tuak uh hi'n kigen hi. Hiai thautui lakna pipeline bel Mexican solkal etkolna nuai a om ahi a, thuneitute gendan in, mi khenkhat in dankalh leh ahilou bangtak a pipeline a thautui luangte ana zawlguk, illegal tapping ziak uh hiding in gen uhi.

***Roman Catholic saptuam a a lianpen, Pope dinmun a letnung a Vatican pawlam a a khualzin khiakna masapen ding in, Rio de Janeiro World Youth Day zatna uap ding in tuni in Pope Francis, Brazil tung hi. Rio de Janeiro khopi sung ah security khauhsak in om a, khovel mun tuamtuam apan in Pope toh World Youth Day zangkhawm ding in mi tamtak Brazil tungta ua, tamtak tun behlap lai ding uhi. Brazil bel leitung a Roman Catholic saptuamte tamna mun pen ahi.

***Syria buaina a Syrian solkal toh pangkhawm a Syrian opposition rebel-te douna a naktak a pang Lebanon pansan Hezbollah helpawlte' military wing tung ah European Union in sanction puang a, pawlpi leng danpua ah koih hi. Huchikal lak ah, Russian Foreign Minister makaihna in Moscow ah Syrian solkal palaite toh Russia in Syria kiang a economic a huhna piak dingdan genkhawmna nei uhi. Syria gamsung mun tuamtuam ah kikaptuahna pai zom zel a, Syrian opposition rebel-te'n Aleppo a om Khan Al-Assal, Syrian solkal sepaihte apan in la zou nawn uhi. Damascus khopi a panmun poimoh deuh Syrian solkal sepaihte'n luhkhia in Syrian opposition rebel 49 kaplum uh hi'n kigen hi. Syrian solkal ding lel phuk tum a kisa opposition rebel-te lak ah kituahna leh kihoutheihna tawm deuhdeuh a, tuaziak in, opposition rebel-te lak ah leng kikhenna thuktak om in, amau-le-amau leng kikaptuah uh hi'n kigen hi. Opposition rebel-te kikhaikhawmna Free Syrian Army sung ah kingeihlouhna, ngaihdan, deihdan kikalhna leh thuneihna kituhna naktak a opposition rebel baibawmsak zou hi'n kigen hi.