Hornbill News | 27 April 2013

User Rating: 0 / 5

Star InactiveStar InactiveStar InactiveStar InactiveStar Inactive
 

* ZHRF saina in One Day Manipur Tribal People Peace Process Consultative Meet neih in om.
* Manipur Ex-Servicemen MPCS Limited (MEMCOS) Churachandpur in General Body Meeting -Cum-Election nei.
* District Training Centre ah Consumers' Awareness Campaign neih in om.
* Nurse/ANM te'n RTI/STI tawh kisai in Training neiding.
* State Level Review Meeting of State Health Society om ding.
* The 14th Veteran Challenge Cup ah Churachandpur Veteran leh Sadar Hills Veteran kimawl ding.
* Tuila Area Football Tournament Closing Ceremony CDSA President Lalvullien in Chief Guest hihna tawh uap.

Zomi Human Rights Foundation (ZHRF) saina in tuni sunma dak 10 in Grace Bible College New-Lamka Dorcas Veng ah " Peace and Tranquality" chih thupi pansan in Ond Day Manipur Tribal People Peace Process Consultative Meet nei uhi. Hiai hun ah Siamzading Valte Chairman Executive Council ZHRF in vaidawnna thugen a, Resource Person Rev. Th. Mangthianlal in " Roadmap to Peace and Tranquality in the context of Manipur hill areas Theological perspective" chih pansan in thugen a, Dr. Leban Serto in " Building Peace in Manipur and Northeast India" chih pansan in thugen a, Dr. Sonthang Haokip in "Suspension of Operation: will it bring permanent peace" chih pansan in thugen hi. Hiai hun ah Civil society, church leader, student organisation, philantrophic organisation leh NGO khenkhat in lemna omna ding tawh kisai in ngaihdan kikumkhawm uhi.

Manipur Ex-Servicemen MPCS Limited (MEMCOS) Churachandpur District pawl in tuni sunma dak 11 in Synod Hall IB road ah General Body Meeting tawh kithuah in Board of Director ding kitelna nei uhi. Hiai hun ah, Sub. Major Kawlchhawna President MEMCOS in member te vaidawnna thugen in member phamsa te suunna hun makaih hi. Meeting hun ah society sung a member te share neihdan tawh kisai leh society paidan tawh kisai genkhawm uhi. Sunnung in Board of Director kum 3 sung mohpuakna lending kitelna nei ua, huai ah Sianzathang, Vanlalchuanga, Haukhopau, Ginthianmang, Sumkunga, Lalthansang a, Ngulkhanzam, M Paukhanlian leh Henchinsong te telching uhi. Telching a omte'n amau sung ah Board of Director ding telkhe ding uhi. Sub. (Rev) Hrangthansanga in vualzawlna ngetsak hi.

Consumers Affairs and Public Distribution leh Churachandpur Consumers' Club saina in tuni sunma dak 11 in District Training Centre Tuibuang ah, Consumer Awareness Campaign neih in om hi. Hiai hun ah Maniram Sharma IAS Additional Deputy Commissioner in Campaign patna ding in thugenna hunzang a, technical session hun ah resource person Chinlunthang Advocate Legal Adviser to Consumers Club Churachandpur in "Consumer Protection Act. 1986" tawh kisai gen a, George Jangpu Advocate in "Consumer Rights and Duties" tawh kisai gen hi. Hiai hun M Ginzasuan District Supply Officer inleng uap in Awareness Campaign khakna nei hi.

District Health Society saina in May 3-4 sung in Nurse leh ANM te ading in Reproductive Tract Infection (RTI), Sexualy Transmitted Infection (STI) Training om ding hi. Hiai Training ding Group A leh B in kikhen ah Group A ah Nurse 30 in CMO Office huangsung a Mini Conference Hall ah Training neiding ua, Group B ah leng Nurse 30 mah in Female Health Worker Training School ah Training neiding uhi.

Dr. O Ibomcha Singh State Mission Director State Health Society makaih in 2012-2013 financial year sung a State Health Society, physical leh financial performance tawh kisai in April 29, 2013 sunma dak 11 in Family Welfare Conference Hall Imphal ah State Level Review Meeting of State Health Society om ding hi. Hiai hun ah Churachandpur District apan Dr. HL Liensang Chief Medical Officer, Dr. VC Pau Tonsing District Family Welfare Officer, D Khuala Vaiphei District Programme Officer leh Bharia District Finance Manager te telding uhi.

Manipur Veteran Football Association saina in Imphal ah The 14th Veteran Challenge Cup pailel a, zingchiang in Veteran Sports Association of Churachandpur leh Sadar Hill Veteran Sport Association te kimawl ding uhi.

Tuila Area Sports Association saina in tuni sunnung dak 3 in Tuilaphai khua ah Football Tournament khakna neih in om a, hiai hun Lalvullien President Churachandpur District Sports Association (CDSA) in Chief Guest hihna tawh uap in CDSA min in Tournament saitu te Football khat pia hi.

GAMDANG THU

Khawvel a airline passenger service khanghat pen Lion Airways sunga vaihawmna management hoihlouh ziak a lenna chiklai peuh in accident tuak thei hi’n Pilot ten gen uhi. Boeing leh Airbus lenna 230 tuaktuak neilel hiai Indonesia airline company khat Lion Air sunga Pilot kiningchin louh banah, company sunga sem Pilot ten niteng in dakkal 9 val lenna hek gige ua, accident theihna naktak in khangtuan mahmah hi’n Pilot ten gen uhi. Tunitan in Indonesia ah 121 vei lenna accident ziaka mi 2,367 sita hi’n Aviation safety network in gen hi.

Kum 2014 chianga FIFA world cup kimawlna a zat ding stadium kim leh kianga khawsate solkal in hawlkhe panta hi. Hong tung ding June 2013 sunga Brazil gamsung ah football stadium 4 mansa a koih ding ngimna in thunei ten hiai bang panlakna nei mah leh, gamsung mipi’n deihlouhna langsak ngal uhi.

Syria sepaihte’n helpawlte douna dingin Chemical galvan zang hiam chih United Nations in etchianna pan hi. Zanin President Obama in UN ah Syria in chemical a zat leh zatlouh sui teitei na ding naktak in a ngiat nung in Secretary General Ban Ki-moon in Syria President Bahsar AL Assad kiangah UN investigation a sawl ding thu theisak hi. UN deihna bangin Syria in investigatorte phalna pea-ngal hi. Khalui in Aleppo khawpi mallam a om Khan AL Assal khua ah Chemical galvan ziak a si leh liamna thu ah sepaih leh helpawlte kal ah kingawh tuahna om khin ta hi.

Hot spring omna Iceland gam in general election a neih sawm nawn ta hi. Hiai tawh kiton in candidate ten campaign na mun teng ah Iceland economy dopkang nading gen thupi pen in nei uhi. Iceland gam ahih leh kum 2008 in gamsung pumpi puuktaw in om hi.

Zimbabwe gamsung ah mipi dawn ding tuisiang kha bangzah hiam kiningchingtak in solkal ten supply zou nawn lou hi. Hiai haksatna siamphat na dingin solkal leh mipi ten private water supply kia kingakna in nei uhi. Tuizat leh Tuinek ding niteng a lei a poimawh ziak in water supply pen sum muhna hoih mahmah khat suak hi.