Nisin Thuhiltu - 18 April 2017

User Rating: 0 / 5

Star InactiveStar InactiveStar InactiveStar InactiveStar Inactive
 

NISIN THUHILTU - 18 April 2017 (Tuesday) | via Zogam.com


*Congress MLA GS Haupu leh ADC member 14 te'n BJP zawm*
Lamka, April 17 (Nisin Thuhiltu): BJP mapui state government ah ruling partner NPP a pat cabinet minister khat in haina a siam zaw in Congress MLA khat in tuni'n BJP a zawm thak hi. Opposition a pat ruling zawm thak Congress MLA Ginsuanhau Zou a hileh tuni nitak lam in BJP ah laklutna nei in a um hi. NPP legislator L Jayentakumar in Health & Family Welfare Minister hina a pat haina a siam tawh kisai ah buaina thupi talua umlo in kihiatthiamlo na le kihiattuaklo ziak hi zaw hi'n Chief Minister N.Biren in a gen a, ama mimal ngei in minister chu kihopi in a thu chu sukfel hita hi'n le a gen hi. BJP leh a kizawppi NPP kal ah buaina um chu BJP a ding in a lelam ah kipak um zaw ding a suak a, Congress a pat MLA 1 a zawllutzo in maban a le kailut be gua nalai hi'n a kigen hi. Churachandpur district sung a um Singhat A/C a pat kitelting, sitting Congress MLA Ginsuanhau Zou leh BJP zawm thak, Chandel district ah Congress ADC (Autonomous District Council) member 14 te laklutna chu tuni'n party office ah nei a hi. BJP a pat thutut kimu dungzui in, Congress MLA 11 te'n BJP zawm nuam uh hi ah hiat a hi dan a gen hi. Congress MLA khat in BJP a zawp tawh kitawn in Congress in tu hin MLA 26 bep a nei tai. Congress MLA te'n le BJP a lut ding nuam uh a hi dan puangdawk uh hi'n CM Biren in a gen lang a, maban ah Congress a pat legislator hunkhawp kailut be hi ding ti'n le member thak te laklut hun a chun a gen hi.

NisinThuhiltu18april2017 4

*IB Road ah alkatara sunna chiatha zing*
Lamka, April 17 (Nisin Thuhiltu): Churachandpur District sung mun chuam chuam ah lampi siamna nasep a chiathak zing tawh kitawn in IB Road ah alkatara (bitumen) sunna le a chiatha zing a, zia chu tawh kitawn in tuni'n Tedim Road ah One-Way Traffic le lakdaw in a um phawt a, Tedim Road ah gari taitua te a kine thei mama hi. Chun, Deputy Comminssioner, Churachandpur kiangnai tuam ah alkatara (bitumen) sunna le tuni'n a kipan hi. PWD, Churachandpur Division in ahileh maban ah khawpi sung lampi chuam chuam Rengkai Road, Nehru Marg, Thangjam Road, Red Cross Road, Zoveng leh mun dangdang nasep pat a hitheina ding in tuni'n Survey a pan ua, Survey zaw thian a hi hun hun ah Manipur Government ah Report pelut ding a hiu.

*Old Age Pension sum kihawm zawm*
Lamka, April 17 (Nisin Thuhiltu): District Social Welfare Office (DSWO), Chiengkhonpang, Tipaimukh Road ah Churachandpur District a ding Indira Gandhi National Old Age Pension Scheme nuai ah Red leh Blue Card Holder-te a ding pension sum hawmna chiatha to zel in tuni, April 17, 2017 in Block leh Assembly Constituency chuam chuam ah hawp ah a um hun ah a lakhalo te a ding hun piak a hi. Tuni ah Assembly Constituency khen chuam umlo in Pension Sum hawm ding ti a hi ziak in mi a tam mama a, chutna ding kituptak a umlo ziak in mi tamtak lungkia'n a thawn in a ki le kit ui.District Social Welfare Office huangsung a kituplo ziak in ziagual Pension Sum hawpna mi a tam hun in lemchanlona nasatak a tung a, Pension Sum la ding Tiangkhut tawh kuan taksa upa taktak Bench changzo lo te leitual ah a chut uh a ngai hial hi. Pension Sum thakhat (one month) ah Rs. 200/ hisap tha 5 a ding Rs. 1,000/- hawm a hia, himahleh Assembly Constituency gamla a pat hung kipan te a ding ah taksa mama Pesion Sum va lak a lawk umlo gual in le a kilang hi.

*ZEO/CCpur in in Mid-Day Meal, Gas Stove piakdawna nei*
Lamka, April 17 (Nisin Thuhiltu): ZEO Churachandpur nuai ah School bang zat a hem te a ding in Mid-Day Meal huanna mat ding Gas Stove, ZEO Office puak tung a hi tawh kitawn in tuni, April 17, 2017 sunnung in ZEO office ah school chuam chuam ah mat ding, Headmaster/Headmistress te kiang ah piakdaw in a um hi. Mid Day Meal huanna ding Gas Stove ahileh Mid-Day Meal Scheme nuai ah hung a hia, phase I a ding in ZEO nuai ah school 15 ah mat ding hung tung in, school 15 te'n Gas permit chawi in amau a ding ah kipia Gas Agency-te kiang ah Gas Cylinder la ding a hiu. Tuni ah Gas Stove hawpdaw hun in T Goukhomang Simte, ZEO Churachadnpur in school 5 kian in piakdawna a nei a, zia hun ah a la khalo school dang te'n office kai hun sung ah ZEO Office ah Kapneihthang, In-charge, Mid-Day Meal Churachandpur leh DI, Singngat Office ah Gas Stove leh Gas Permit lathei ding uh ti a hi. Mid-Day Meal huanna ding Gas Stove lathei ding school te chu - Bijang Loubuk Junior High School, Gandhi Memorial High School, Henglep High School, Kangvai High School, Lanva High School, Molphei Tampak Junior High School, NKT Aided Junior High School, Phungkhothang High School, Singngat High School, Singngat Aided Junior High School, Tuibuang Junior High School, Vimala Raina High School, Vumhao High School, Vungzagen High School leh Zogal Aided Junior High School te a hiu a, tuni'n Bijang Loubuk High School, Gandhi Memorial High School, Molphei Tampak Junior High School leh Phungkhothang High School te'n Gas Stove a la dawk ui.

NisinThuhiltu18april2017 2

*VDF 6th General Assembly 2017*
Lamka, April 17 (Nisin Thuhiltu): Churachandpur District VDF Welfare Association (CDVDFWA) pawl in tuni, April 17, 2017 sunma dak 10:00 a pat Reserve Line, SP Office ah 6th General Assembly 2017 a nei ui. Assembly hun masa Paomang Kipgen leh L. Limkhosei Haokip, Vice President te'n amapui ua, Jangthang Haokip in hun pat pauchapna nei in, Kamminthang Kipgen, Finance Secretary in vaidawn thugenna a nei hi. S. Laltingen Vaiphei, President in VIP-te introduce bawlna nei in thil piak piakna a nei a, L. Deban Singh, President, All Manipur VDF Welfare Association, S. Pauchinlian, Ex-President leh Dilo Mate, Ex-General Secretary-te a pat thugenna um in, Assembly 2nd Session a kipan hi. Zia hun a chun, Kamminthang Kipgen, Finance Secretary a pat in Finance Report piakna a um a, Agenda chuam chuam puaklut ah um te Manipur Government Employee List (MGEL), Post Information, Condolence, Rules & Regulation, CDVDFWA Official Identity Card, CDVDFWA Official WhatsApp Group leh thu pawimaw chuam chuam genkhawmna a nei ui. S. Laltingen Vaiphei, President in a thugenna a chun, Manipur Governor leh Manipur ah BJP Solkal mapui N. Biren Singh, Chief Minister te'n lemsakpina a nei uh tawh kitawn ah thalaw Rs. 5,000/- hisek maleh tu ah Rs 2000 belap ah a umna chung in VDF personnel dang te thasik in kipakthugenna a nei a, maban ah Rs. 2,000/- in tha law pung maleh innsung-khawsakna ding ah ki ning ting diaklo a hidan a hiatpi uh pawimaw a hidan le taklang kawm in 13th Pay, MGEL, Uniform Issue lehHighway Protection Force ding ah Manipur Government in IRB Battalion 4 lakthak a guat uh, la lo ah VDF-te a laklut to zawk ding un dawtna le a siam hi.

NisinThuhiltu18april2017 5

*PTC in MLA thak te kipakpina nei ding*
Lamka, April 17 (Nisin Thuhiltu) : Paite Tribe Council (PTC) General Headquarter in a hung tung ding April 22, 2017 sunnung dak 1:00 leh PTC GHQ Conference Hall, Hiangtam Lamka ah Paite Nam sung ah MLA teltin thak ah um te kipakpina leh CWC ex-officio member ding ah laklutna nei ding a hi. LT Juan Tonsing, Chairman, CWC in MLA teltin thak ah um te CWC ex-officio member ding ah laklutna leh thilpiak piakna nei ding a hia, laklut ah um ding te chu - V. Hangkhanlian, Minister (Agriculture, Vetirinary & Animal Husbandary) leh Vungzagin Valte, Chairman, MTDC hiding a hiu. Chun, S. Vung Minthang, General Secretary, EBC in teltin thak ah um MLA-te, CWC ex-officio member ding ah laklut ah um te pauchap piakna nei ding a hi.

*CCI saina Training nei*
Lamka, April 17 (Nisin Thuhiltu): Centre for Community Initiative (CCI) saina' tuni, April 17, 2017 sunma dak 10:00 a pat CCI Conference Hall, Nehru Marg ah The Malsawm Initiative (TMI) leh CCI a Staff-te' a ding in Training a um hi. Training hun ah TISS Guwahati a pat Angela Vungthianmuang, MSW leh N. Thomas, MSW te'n Child Sexual Abuse tawh kisai in a chiakhawm te ziltilna a nei ua, Pauzagin Tonsing, Executive Director, CCI in Right of Persons with Disabilities Act, 2016 tawh kisai, Niang Ngaih Mang, Deputy Director (HR & Admin), CCI in Disability Inclusive Disaster Risk Reduction (DIDRR) tawh kisai ah ziltilna a nei hi. April 18, 2017 sunma dak 11:30 ah 25th Assam Riffle in The Malsawm Ability Resource Centre (MARC), Pearsonmun ah gualphalo etkawl ah um te mat ding van mat chi chuam chuam piakdawna nei ding uh ti le a hi.

*Gari accident ah mi 3 in liamnna tuak*
Lamka, April 17 (Nisin Thuhiltu): Hmuia Veng, Tedim Road ah tuni 17 April nitak dak 7:00 tuam in gari accident a um a, ziana a chun mi 3 te'n liamna a tuak ui. Liamna tuak te chu a vek ua District Hospital tut in a um ua, Duty Doctor in Vanlalkungi (31) w/o Mangheta of Thingkangphai leh Seingam Mate (53) s/o (L) Doukholun of D. Phailen-te Imphal in Refered a bawl hi. Khaiminlien (29) s/o Janglet of Jangnomphai a hileh a changlam keng liam in, serious talua a hilo ziak in Surgical Ward, District Hospital ah admit in a um hi. A langkhatlam ah zia thu zik a hi tiang ah tuaksiatna ziak diktak hiat a hi puai.

*Minister 2 in Kpi ah lui te entha*
Kangpokpi, April 17 (Nisin Thuhiltu): IFCD, Youth Affairs & Sports Minister Letpao Haokip leh Social Welfare & Cooperation Minister Nemcha Kipgen te'n tuni'n Kangpokpi District sung a um lui te etthâkna a nei ua, zia hun a hin minister 2 te chu Chief Engineer Ksh. Pritam Singh leh SE (FMC) Md. Liaquat Ali te pang in IFCD official chuam chuam in a zui ui. Ministerial team in Keithelmanbi Cemetery kiang ah Twineh lui pang a va etthâk ban un Kangpokpi ah Kanggui leh Imphal river te lui pang chule a va enthau hi. IFCD Minister Letpao Haokip in kui pang le a kiangtuam dinmun chu siam phatna ding ah ama department in pan la ding hi ah tiam kawm in Chief Minister tawh kihiatua in lui pang a chu retaining wall bawl hi ding in le a gen hi. Local MLA ban ah Social Welfare & Cooperation Minister le hi, Nemcha Kipgen in BJP mapui state government in mipi te dawi gual chu subuting ngei ding hi ah kinepna liantak nei a hi dan a puangdawk hi.

*Buyer-Seller Meet cum Workshop kipan*
Imphal, April 17 (Nisin Thuhiltu): Manipur Organic Mission Agency (MOMA), Department of Horticulture & Soil Conservation, Government of Manipur te saina nuai ah ni 2 um ding 'Buyer and Seller Meet Cum Workshop for Agriculture and Horticulture Products with Special Focus on Organic Produces of Manipur' chu City Convention Centre, Palace Compound, Imphal ah tuni'n a kipan hi. Zia meet hi a hileh Agricultural and Processed Food Product Export Development Authority leh Ministry of Agriculture & Farmers' Welfare, Government of India in a sponsor a hi. MOMA in 2015-16 a pat in Ministry of Agriculture and Farmers' Welfare nuai in Manipur ah Mission Organic Value Chain Development for North Region (MOVCDNER) scheme nasep chu a chiapi zing a, zia scheme hi a hileh gamdang thawtdaw thei ding thaichi - Tamenglong kawmla, Kachai champra, lêngthei, sâp malcha, thîng, âi-eng leh bu-man te chu promote na ding leh a tam thei pen pawtdaw sakna ding tupna ah kibawl scheme a hia, zia hin lobawlmi 5,000 leh lo 5,000 Hectare a huap hi. Hun matna ah chief guest hin atawh uap, Th. Shyamkumar, Minister of Horticulture and Soil Conservation, Forest and Environment leh MAHUD, Manipur in function ah mi za um leh mi thupi tak tak te melmu a hi na a pat chu organic farming lam khantona ding ah Centre government in pan a lak dan te mipi'n lunglut pi a hi dan kichian mama hi'n a gen hi. Manipur ah mi tamzaw te'n agriculture leh horticulture chu nek hawlna ah mang maleu lo masuak chu a tawm ziak ah farm income le tawm mama hi'n le a gen a, organic farming chiapi hileh Manipur ah lobawl mite a ding a le kithenna tamtak piangzaw ding a hi dan le a tângkopi hi. Organic farming chun lomasuak le supung mama ding hi ah taklang kawm in zia chun lobawlmi te sum muna le pungsak ding ban ah a piang te chu le damthei huai mama ding hi'n minister chun a gen hi. Chun, Buyer Seller Meet chu a pang te'n a phatchuampi ngei uh kinepthu taklang kawm zia chun lobawlmite a ding ah state sung bep hilo ah mun dang dang a le market a siamdaw zaw na ding ah dawisak na thu le a puang hi. Meet cum Workshop hawnna ah President hina tawh uap, Manipur Chief Secretary, O. Nabakishore Singh in bu-man phatchuam dan genlang kawm in demand-supply ratio suk butin thei na ding ah lobawlmite'n pan la thak ding in a dawn a, lobawlmite chu gunchu tak leh tawmngai tak ah nasem ding leh amau chun Government scheme a hilo leh programme te chu a phatchuampi theina ding ua officer a hiloleh agente'n le diktat tak ah nasem ding in le chialna a bawl hi. Zia hun matna chun Dr. M. Premjit Singh, Vice Chancellor, Central Agricultural University, Imphal; I. Rani Kumudini, IAS, Joint Secretary, INM Division, Ministry of Agriculture & Farmers' Welfare, Government of India; Dr. N. Prakash, Joint Director, ICAR, Manipur Centre; AK Yadav, Advisor, National Accreditation Board, APEDA te'n Guest of Honour hina tawh a uap ua, Marcina Epao, Director DoNER, Government of India; Pankaj Prasad, Managing Director, NERAMAC; Professor Joykumar Laishram, Dean, College of Agriculture, CAU, Director of Horticulture & Soil Conservation & Agriculture, farmers, exporters ban ah India sung mun chuam chuam a pat expert hunkhawp te'n le zia hun chu a uap ui.

*Puimang a um te thadaw hita*
Kangpokpi, April 17 (Nisin Thuhiltu): DFO Kangpokpi ah posting Deputy Ranger, Forest Department, leh Kangpokpi DHQ a cheng local mi khat chu zani'n mun chuam chuam ah thadaw a hi gel ui. Kangpokpi Ward No.2 a cheng, Lalal Sitlhou chu a chiata April 14 zan dak 10:30 tuam ah melhiatlo te'n a la puimang uh a hia, zani sunma dak 11 tuam a achun thadaw a um in dam tak ah inn tung ta hi'n a kigen hi. Deputy Ranger, DFO Kangpokpi Angam Leivon a hileh Kangpokpi Ward No.8 a cheng a hia, a chiata April 12 zan ah melhiatlo galvan chawi te'n puimang in thadaw a hi na ding ah Rs. 30 lakh a dawn ui. Ni 4 sung gamlak ah a umpi zaw un zani nitak dak 5:30 tuam ah thadaw a um in zan dak 8 tuam in inn a tung hi. Deputy Ranger, Leivon puimang a hi ziak in a sungnu (a zi pianna nu) thi le gâl man talo in a um a, ama chu DFO Kangpokpi ah a lianpen hi ah a gel khak ziak ua puimang a um kha hi a gen kawm in ama puimang a hi sung ah a innkuan te thina tuak um maleh ama department in a gâlna a siamlo chung ah lung awilo thu le a puang hi. Deputy Ranger in ama puimang tu te chun a mobile handset a lak piak zaw ua a mit kan piak in gamlak ah lam zawt pi uh a hi dan a gen a, bang ziak ah puimang a hi thu a dawt a chun ama mimal mawna hilo in ama department tawh kisai ah puimang hi zaw hi'n a dawnhu ui. Department nasep dan leh kivaipuak dan chung chang tilo ah thudang dawng khalo uh hi'n le a gen a, zepna leh sawisakna tuak khalo a hi dan le a puangdawk hi. Chun, BP patient a hi na ah a puimang tu te chun ama damthei na ding khawksak mama in BP sukniam thei na ding ah changkuangche, anphui, ankha che ti te chu nicheng ah me sak sek uh hi'n le a puangdawk hi. Leivon a hileh KBC Centre Church, Kangpokpi DHQ ah active member a hina ah puimang a hi a pat dam tak ah a kilekit thei ziak ah Pastor, Deacon leh Church member te'n kipakpi kawm in pauchapna va nei piak uh hi'n a kigen hi. Deputy Ranger chu damtak ah inn tung maleh ama thadaw thei na ding ah kidawn sum chu a piak leh a piaklo uh hiatchian a hi puai.

*Makhan ah Minister N. Kayisii kipakpina nei*
Kangpokpi, April 17 (Nisin Thuhiltu): Tribal Areas Development & Fishery, Minister N. Kayisii chu tuni'n Makhan Centre Village ah kipakpina nei piak in a um hi. Zia vai guan hi a hileh Makhan village 7 kigawpna, Makhan Union in a sai a hia, zia hun chu K. David, ADC Member Senapati, Ex-MDC Member te ban ah Makhan Khullen, Makhan Centre, Makhan Khuman, New Makhan, Makhan Lovadziingho, Makhan Tabio leh Makhan Otobu a pat officer, leader, khua hausa, chairman, secretary leh mipi tamtak in le auap ui. Minister N. Kayisii in zia hun a chun election hun ah mipi te ziak ah gualzo a hina ah kipak mama a hi dan puang dawk a, election hunlai ah ama chenna inn ah pauchapna va nei piak sek numei te chung in le kipakthu puang kawm in a pauchapnau chu Pathian in dawnhu hi'n a gen hi. Ama chu mipi minister a hina ah mipi te a ding ah napha sem zing ding hi ah puangdawk kawm in Makhan mipi te chu nidang sang ah Pathian nai zaw ding leh nunnem zaw ding in le a chial hi. Minister N. Kayisii in lui chu tekhinna ah mang in guam te'n lui chu zawm lo hileh zia lui chu lianthei lo ding a hi na ah mipi zosia pangkhawm ziak ah election ah gualzo a hia, ama constituency sung a um community chuam chuam te'n a kithuapina chung ua kipak mama a hi dan a puangdawk hi. Makhan leader lui te, Ekhramei Students Union, All Makhan Youth Organization, All Makhan Women Association, Khrasi Welfare Forum, Makhan Ex-Servicemen Union leh Makhan Teachers Union te'n le zia hun a chun thugenna a nei ui. Hiathei khat chu, Minister N. Kayisii hi Makhan te lak ah Minister masapen a hi.

*Dy CM in National Mathematics Day matna uap*
Imphal, April 17 (Nisin Thuhiltu): Deputy Chief Minister Y. Joykumar Singh in state sung ah quality education puaklut theina ding ah a hil lam hi'n a zil lam hilehle systematic approach pawimaw hi'n a gen hi. Indoor Stadium, Oriental College, Takyelpat ah ni 4 um ding National Mathematics Day Celebration hawnna hun a chun, Deputy Chief Minister in thiamzilna kawng ah basic step 3 te chu zil ding, hiatchian ding leh mat ding ti a hia, zia chu quality education puaklutna ding ah pawimaw hi'n a gen hi. Zia gual chu thiamzil te'n a zilsa teu a hiatzing thei na ding ua panpi tu ah pang ding a hi ban ah lawk tak ah mang thiam thei ding uh hi'n le a gen hi. National Mathematics Day Celebration kisai chu pawimaw mama a hi dan gen kawm in zia gual hun matna sai chun mi tamtak lung khelsak ding ban ah mathematics pawimaw dan hiatchianna ah tamtak in mang thei uh hi'n a genlang hi. Parliamentary Secretary (Science & Technology) Th. Satyabarta Singh in Mathematics chu student te zil ding subject bep hilo in nisin hinkhua matna ah kimang zing hi'n a gen hi. Zia hun matna uap Deputy Chief Minister leh mi challang dang dang te'n Mathematics Models suklat a um te etthâkna le a nei ui. National Mathematics Day Celebration a hileh Manipur Science and Technology Council (MASTEC) leh Department of Mathematics, Oriental College (Autonomous), Imphal kithua ah a sai uh a hia, zia hin a hin state sung a um institution chuam chuam a pat student 400 student te'n competition chuam chuamnei ding a hiu. Hun mat chu Secretary (Science & technology) H. Gyanprakash Singh, Director, MASTEC Th. Surendranath leh Th. Devendra, Dean, School of Science, Oriental College te'n le a uap ui.

*DG IIMC leh ADG IIS te'n Manipur pha*
Imphal, April 17 (Nisin Thuhiltu): Indian Institute of Mass Communication (IIMC) ah Director General, KG Suresh leh Indian Information Services (IIS) ah Additional Director General, Mayank Agarwal ban ah IIS ah Group 'A' Trainee Officer 15 te'n April 15 a pat 20 sung Manipur ah hun mang ding a hiu. Trainee Officer te a ding ah orientation leh familiarization program lak ah Manipur vena chule pangkha a hia, zia program chu Assam Rifles kithuapina tawh sai a hi. Gamsung mun chuam chuam a pat kipan Trainee Officer te chu Professor Rinku Pegu, Coordinator in le a kitawn pi a, Manipur a phak masakna pen uh hi'n a kigen hi. Manipur ve a hung te kiang a chun tuni'n Manipur khangthu, chawndan leh tu dinmun ah thi um dan te HQ IGAR (S) ah genlatna hun nei pi a hi. Mantripukhri ah thusua mite tawh kimutuana hun le sai in a um a, zia hun a chun KG Suresh, DG IIMC in thusua mi te kiang in IIMC chung chang genlatna nei in IIMC chu India ah mass communication student te a idng ah premiere training institute khat hi'n a gen hi. Mass communication lam ah IIMC chu institution hawi pen hi ah Week Magazine in suadawk a hi dan le taklang kawm in IIMC student te chun Doordarshan, All India Radio ban ah Government department dang dang te ah appointment pawimaw tak tak dawng ta uh hi'n le a gen hi. IIMC in North Eastern region pumpi huap ah Nodal institution ding in Aizawl ah Nodal Centre khat hawng gua in pan la zing hi'n le a gen hi. Chun, maban ah IIMC in local journalist te le training a piak ding kinep um a sak thu puangkawm in a tawp tiang ah panpi ding in Government leh AMWJU kiang in kithuapina a dawn hi. DG (IIMC) KG Suresh leh ADG IIS Mayank Agrawal te'n tuni Delhi zuan in Manipur nusia maleu Trainee Officer te chu April 20, 2017 tiang um nalai ding a hiu a, zia hun sung a hin Moreh, Moirang, Loktak Lake leh Imphal sung mun chuam chuam pha ding a hiu.

*Assam Rifles in nauchaga te tawh Easter Sunday mangkhawm*
Imphal, April 17 (Nisin Thuhiltu): HQ IGAR (South) nuai a um 26 Sector Assam Rifles a pat 18 Assam Rifles te'n Easter Sunday ni a khan Orphanage Home, Chandel ah medical camp sai in naupang 70 te medical leh health check up bawl in amau a ding in Health card le a bawl piak ui. Medical checkup chu cake cutting leh annek khawmna in zui ngal in zia zaw a chun naupang te chu musical program a nei pi ui. Camp a chun nauchaga te kiang a chun a thawn ah damdawi le a hawp piak ui. Assam Rifles te'n zia gual ah Easter a matpina chung ah orphanage ah caretaker te'n kipakthu a puang ua, AR te panlak dan chu management bep hilo in a kiang tuam a cheng te'n le pâkchat thu a puangdawk ui.