Nisin Thuhiltu - 17 April 2017

User Rating: 0 / 5

Star InactiveStar InactiveStar InactiveStar InactiveStar Inactive
 

*Khawvel pumpi ah Christian te'n "Easter" mang*
_President Pranab Mukherjee, Vice President Hamid Ansari leh PM Modi te'n Easter wish bawl_
Lamka, April 16 ( Nisin Thuhiltu): Khawvel pumpi Christian te'n tuni'n Calvary cross ah ah Jesu khetden ah a um nung ah a thawkitna "Easter" - Pasch, Resurrection Sunday or Easter Sunday a mang ua, India gam sung mun chuam chuam a le mat in a um hi. India ah Tamil Nadu, Kerala, Karnataka, Andhra Pradesh, Goa, Maharashtra, Mizoram, Nagaland, Meghalaya leh state chuam chuam ah le Easter Sunday mat in a um a, Tamil Nadu ah a 1000 ah sim te'n zingkal pauchapkhawmna'n panlakna a nei ua, Velankanni, Tiruchirapalli, Tirunelveli, Nagercoil lehh Thoothukudi church te ah mi a tam diak hi. Mun tamzaw Easter chu pauchapkhawmna leh Pathian chawihawina tawh mat a hi. India President, Vice President leh Prime Minister Narendra Modi in Easter – Jesu thawkitna mangtu te wish bawlna a nei ua, President Pranab Mukherjee in Jesu'n thudik, ngaidamna, hepina kipiakzaw te ei kawkmu dungzui ah India mipi te kipumkhatna tuntu, gitlo bawl huatna leh society ah kituaklo sumangtu a hiding a nawp thu a gen a, Vice President Hamid Ansari in easter chu kimudana sang ah kihepina suhattu a hizing ding a nawpthu gen in zalen tak leh a lawting theipen ah Jesu thawkitna mat ding dawisakna thu a puang hi. Prime Minister Narendra Modi in Jesu thuhilna a pat gamsung ah kipumkhatna, kihepina leh society sung ah thagau lam ah damtheina a um ding a nawp thu a a puang hi. Ziagualma a chun, Pope Francis of Vatican in le Easter Sunday chibai bukna bawl in, lawting tak ah Easter mat ding a nawp thu a taklang hi. Chun, Christian community te sawisak leh engbawl ah a um mun na mamau ah kihia, Pakistan ah Christian community te'n le security khautak venbitna nuai in Easter Sunday a mang ua, a diak ah Lahore, Karachi, Quetta, Peshawar, Rawalpindi, Islamabad leh khawpi sung mun chuam chuam in pauchapna tawh hun a mang ui. Christian community member tamtak te'n Lahore ah Biak-inn in Easter Vigil Service a uap ua, Pakistan Punjab Chief Minister Shahbaz Sharif in Easter matna tawh kisai a genna a chun, Pakistan ah minority zosia'n sakhua thudawl ah thuneina kibang (equal rights) nei a hidan uh taklang in Christian community in gamsung khantona ding ah panlakna nasatak nei a hidan uh leh venbitna kituptak piak hizing ding a hidan uh a gen hi. Chuleh, Churachandpur panna Manipur sung mun chuam chuam ah le Easter Sunday mat in a um a, pauchap khawmna, Pathian thu leh laa kipawllimna banah nekkhawm bawlna hun mat in a um hi.

*Lampi siamna chiatha zing*
Lamka, April 16 ( Nisin Thuhiltu): Khawpi sung ah One Way Traffic chiapi a hi a pat lampi pawimaw mama Tedim Road a pat District Hospital zawtna le hi, IB Road siamthakna nasep chia zawm zel in tuni'n alkatara (bitumen) sung a kipan a, road roller khat mang in lampi level suktuakna le a neingal ui. Lampi siamthakna ahileh Manipur ah BJP mapui Solkal in gamsung khantona ding ah ngaikhawkna nei a hidan a taklat zing tawh kitawn ah Bialtu MLA leh Minister, Agriculture, Veterinary & Animal Husbandry- V. Hangkhanlian panlakna Public Works Department (PWD), Churachandpur Division in naasepna March 27, 2017 ni a pat uh a hi.

*Fair Price Shop Dealers leh S_K. Oil Sub-Dealers' selection and Appointment Committee, meeting hun kichawn*
Lamka, April 16 ( Nisin Thuhiltu): Government Order No. 11/1/90-FCS(Pt- II) dated 14th December, 2012 dungzui ah Fair Price Shop Dealers leh S_K. Oil Sub-Dealers' selection and Appointment Committee, District level te'n 17 April 2017 zingkal lam dak 11:00 leh DC/CCpur Office ah meeting a nei ding uh chu 17 April 2017 zingkal lam dak 11:00 ding ah chawn (postponed) a hidan R Sudhan, IAS, Deputy Commissioner, Churachandpur in thusua a bawlna a chun a taklang a, a hun tak ah a kisaipi zosia pangkim chiat ding in chialna le a bawl hi. selection and Appointment Committee, District level member te chu ; Chairman - Deputy Commissioner, Churachandpur a hia, Member te a hiu leh Superintendent of Police, Churachandpur, Additional Deputy Commissioner, ChurchandprChfief Executive Officer, ADC, Churachandpur, SDO/BDOs of Churachandpur District, Zonal Education Officer, Churachandpur, District Agri, Officer, Churachandpur, Executive Engineer, PWD, Churachandpur, Executive Engineer, MSRRDA, Churachandpur leh Member Secretary- District' Supply Officer, Churachandpur a hi.

*Delhi thupukna dungzui ah Health Minister haina issue sukfel hiding*
Imphal, April 16 ( Nisin Thuhiltu): Manipur ah a tha (month) ah upa Bharatiya Janata Party (BJP)-led coalition government in Congress government hunlai ah ki guat Health Director Okram Ibomcha suspend a bawlna chung ah Health Minister Langpoklakpam Jayentakumar in Chief Minister N. Biren Singh kiang ah haina (resignation) lekha a piakna chung in Chief Minister haina lekha a pawm nai pua, hutut kimu'n a taklatna a chun, zia issue chu sukfelna ding ah panlakna um zing in a gen hi. Chuleh, Chief Minister N. Biren Singh chu Delhi ah senior BJP leader te tawh Health Minister haina chung chang thuhiat ding ah khualzin hina kigen a, bangkim sukfel ah umta ding ah ginchak himaleh Chief Minister Imphal a tut kit masai thuchian hiat thei hilo phawt in a kilang hi. Health leh Law portfolio tuk Mr. Jayentakumar chu Chief Minister chung ah lung awilo hin a kigen a, CM in state pawlam a pat Advocate-General thak ding a guat bak ah ama thuhiatlo ah Health Director Dr. Ibomcha paithak ah a um ziak ah Chief Minister in thuneikhum ziang ah ngaituana nei ah lung-awilo hiding in a kigen hi.

*Minister Nemcha Kipgen in departmental work entha ding*
Imphal, April 16 ( Nisin Thuhiltu): Social Welfare and Cooperation Minister, Nemcha Kipgen in 17th April, 2017 zingkal lam dak 11:00 a pat Keithelmanbi leh Kangpokpi ah departmental works chuam chuam te etthakna nei ding a hidan N. Krishnakumar Singh, Assistant Publicity Officer (Press) Information & Public Relations, Government of Manipur in tuni'n a taklang hi.

*Training um ding*
Lamka, April 16 ( Nisin Thuhiltu) : Centre for Community Initiative (CCI) saina, tuni 17 April 2017, sunma dak 10:00 a pat CCI Conference Hall, Nehru Marg ah Child Sexual Abuse, Right of Persons with Disabilities Act, 2016 leh Disability Inclusive Disaster Risk Reduction (DIDRR) tawh kisai ah Training um ding a hi. Training hun ah TISS Guwahati a pat Angela Vungthianmuang, MSW leh N. Thomas, MSW leh Pauzagin Tonsing, Executive Director, CCI banah Niang Ngaih Mang, Deputy Director (HR & Admin), CCI te resource person ah pang ding a hiu. Chun, The Malsawm Initiative (TMI) leh CCI a Staff zosia training ah pang ding a hiu a, a lung te le pangthei ding a hi.

*Rs 30, 45,000 tunna kihialo*
Imphal, April 16: Manipur Building and Other Construction Workers' Welfare Board, Manipur State Labour Department in kum 2016 sung ah Awareness programme saina ding ah fund ki sanctioned Rs 30, 45,000/- kimatna sulang theilo a hidan uh taklat in a um hi. Zia Awarness programme chu District zosia chiapina ding ah piak himaleh awarness prog. um,lo a sum kimang zo ti a hi.

*Bandh um ding ah thuzuak thezak ziak ah Manipur Police in mi 2 man*
Imphal, April 16 ( Nisin Thuhiltu): Imphal-Jiribam section, NH-37 ah 17 April apat indefinite bandh um ding ah thuzuau thezak Jiribam district pansa civil society organization member 2 tuni'n Manipur Police te'n a man ui. Social Welfare Forum (SWF), Phaiton in issued a bawl dan ah press statement Whatsapp ah taklat ah a um tawh kitawn ah Jiribam police te'n thil umdan a khualzui nung ua mi 2 mat te matdaw ah um a hiu a, Social Welfare Forum (SWF) chairman leh secretary banah functionary te'n Police te'n a thuhiat hun ua ziagual indefinite bandh thu chu hiatpilo a hidan uh a taklat uh hin a kigen hi. Mat ah um mi 2 te chu G Thangboi Kuki leh Timothy Singson hi ah hiat a hi. A mau chu diklo tak ah social media a mat ziak ua Act tawh kituak ah a chung ua case ziklut in a um a, SWF chairman S Khongsai in forum member hina a pat tha 3 sung suspend a hidan uh le a puang ngal hi.

*Rajya Sabha MP tel ding demand*
Imphal, April 16 ( Nisin Thuhiltu): Thoubal District MP candidate Demand Committee in Prime Minister of India kiang in Assembly constituency 8- Sugnu, Hiyanglam, Waagai, Kakching, Wangjing Thentha Kangabok leh Jiribam a pat candidate te outer Manipur Parliamentary Constituency a pat Rajya Sabha MP tel (elect) bawl ding in phutna a nei ua, zia chu tawh kitawn in memorandum piakna le a nei ua, ziagual demand a siamna ziak uh chu LOk Sabha election ah vote khia thei ding ah um sek himaleu ST a ding ah reserved a hi dungzui ah amau in contest a bawl thei seklo ziak uh hin a kigen hi.

*Manipur Lawyer te'n Advocate Act of 1961 amend kibawlthak a dawilo thu'u taklang*
Imphal, April 16 ( Nisin Thuhiltu): Bar Council of Manipur (BCM) leh All Bar Association of Manipur (ABAM) in Manipur High Court, complex ah thuthak lakhawm mite kiang ah a gennau a chun, Advocate Act of 1961 amend kibawl thak chu dawilo a hidan uh a gen ua, amendments demna bawl kawm in New Delhi ah kiphinna nei ding a hidan uh A Jagit, spokesperson in agen a, India gam sung pumpi lawyer te'n ziagual dan kisiam chu pawm theilo a hidan uh le a gen hi. Amendment thak dungzui ah lawyer khat in case a zawlo leh a client te sum sen zosia bak ah Rs 3 lakh a piak ding uh ti provisions um in le a gen a, advocate gam dang mi (foreigner) te'n le India ah case dinpi thei ding ua provision um in le a gen a, zia gual dan thak chun lawyer te thunei subuai in a gen hi. Chuleh, Manipur ah Advocates te'n signature campaign bawl ding leh Governor kiang ah memorandum pelut ding uh hin Jagjit in a gen hi. Manipur High Court, Complex ah Law Commission siamkawm lim le halna nei ding uh hin a gen hi.

*Art & Culture nasatak ah promote bawl pawimaw*
Imphal, April 16 ( Nisin Thuhiltu): Manipur Dramatic Union, MDU Hall, Yaiskul Police Line, Imphal ah tuni'n Manipur Dramatic Union saina 5th All Manipur Folk Drama Festival-2017 mat in a um a, zia hun chu Art & Culture Minister, L. Jayentakumar Singh in Chief Guest hina tawh a uap hi. L. Jayentakumar Singh in a thugenna a chun, state sung ah Art & Culture dinmun sia mama hin a gen a, state sung ah Art & Culture promote bawl thak ding pawimaw in a gen hi. Hun matna a chu President MDU A. Ksheergopal Singh, Sangeet Natak Academi Awardee E. Joychandra Singh & Director Manipuri Ensemble Kshetri Jugindro Singh leh Director DIPR, Manipur Meghachandra Kongbam te'n le a uap ui.

articlenew