Nisin Thuhiltu - 13 April 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Nisin Thuhiltu - 13 April 2017

HAC Chairman ding TT Haokip
Lamka, April 12: Henglep Assembly Constituency a pat BJP MLA leh Manipur Legislative Assembly ah Deputy Speaker lui T. Thangzalam Haokip chu tuni'n Chairman of Hill Area Committee (HAC), Manipur Legislative Assembly ding ah teldaw in a um hi. Hill Area Committee chu Constitution of India, Article 371 (C) nuai ah Constitutional body khat a hi. Banker-turned Politician, TT Haokip chu Manipur Legislative Assembly ah a khatveina ding ah MSCP ticket ah kum 1998 ah MLA ding ah teltin ah a la um, Deputy Speaker panmun a la tu a hi.Chairman of Hill Area Committee (HAC) ding ah teltin ah a um tawh kitawn in tuni, sunnung dak 12:00 tuam in office a lua pan ngal hi.

Women Police Station O.C ding Niangdoi Lengen
Lamka, April 12: Superintendent of Police, Imphal West in 11th April 2017 ni order a sua dungzui ah Florence Niangdoi Lengen @ Poopcee d/o (L) W K Lengen (I.P.S) Sanjenthong, Imphal chu Women Police Station (IC), Imphal O.C ding ah guat in a um a, zia chu tawh kitawn in ama'n 14th April 2017 a pat OC mawpuakna la pan ngal ding hin a kigen hi.

JAC-AATB in Delhi ah palai sawl ding
Lamka, April 12: Joint Action Committee Against Anti-Tribal Bills (JAC-AATB) in existing member tribe-based organizations - Mizo People Convention, United Zou Organisation, Simte Tribe Council, Tedim Chin Union leh Young Paite Association palai te tawh tuni'n YPA GHQ Office, Hiangtam Lamka, CCpur ah joint meeting nei in a chiatha zing Tribal Movement tawh kisai ah maban panlak dingdan tawh kisai genkhawmna a nei ui. Joint meeting hun ah JAC keklian ding leh Tribe chuam chuam a pat palai lakbe ding in lemsakna a nei ua, a vaima theipen ah Delhi ah palai (delegation) sawl ding in thupukna a siam ui. Chun, April 22, 2017 leh Tribal Movement ni 600th Day tinna mat ding in le lemsakna a nei ua, buaina sukven vak a hitheina ding ah public in Pathian kiang ah pauchapna tawh panlakpi zing ding in le JAC leh tribe-based organization te'n chialna a bawl ui.

VPC Moreh Chairman ding S. Jamthang Baite
Lamka, April 12: Vaiphei Peoples' Council (VPC) Moreh Block in tuni, 12 April 12 in Jangnom Village ah Block election a nei a, zia hun a chun Vaiphei Peoples' Council (VPC) Moreh Block, Chairman ding ah S. Jamthang Baite teltin in a um a, Vice Chairman ding ah Gentinkhup Vaiphei teltin in a um hi. Chun, General Secretary ding ah N. Seiyang Baite teltin a um a, ni 15 sung ah Ex Chairman zosia, le Hausa leh khawpi sung ah lawiupa te tawh kithua ah cabinet expansion a bawl ding ua mawpuakna piak ngal a hiu.

Ni 3 anngawl pauchapna nei
Lamka, April 12: All Tribal Women Union (ATWU) General Headquarter, Lamka in ni thum sung Morgue mun ah anngawl pauchapna a nei uh tuni, April 12, 2017 sunnung dak 1:00 in a zo thiang ui. ATWU GHQ in a hihleh Anti-Tribal Bills ziak ki phutdawk Joint Action Committee Against Anti-Tribal Bills (JAC-AATB) tawh Manipur Government in tribal martyr vuilo ah um te vuidawna ding leh demand ah um te chung chang ah kihona lawting tak ah zaw a hitheina ding ah Seppatni, April 10, 2017 ni thum sung Morgue mun ah anngawl pauchapna a pat a hi. Anngawl pauchapkhawmna ahileh zingkal dak 7:00 in a kipan a, tuni hun matna a chun, T. Gouzavung, Prayer Secretary, ATWU in hun matna amapui hi.

YPA Unit 2 in election nei
Lamka, April 12: Young Paite Association (YPA) New Lamka Block sung ah Unit 12 um te a term uh a bei tak tawh kitawn in kum 2017-2019 sung vaipaw thak ding telna tuni, April 12, 2017 zingkal dak 7:00 in Block lawiupa te mapuina Unit 2 in election a nei ui. Election saitu ding ah guat a um, YPA New Lamka Block lawiupa te chu Langkhanpau Guite, Adviser, YPA New Lamka Block in Block Office ah pauchap piakna a nei a, Block lawiupa te mapuina Dorcas Veng Unit leh Gouchinkhup Veng Unit in election a conduct ui. Dorcas Veng Unit election chu YPA New Lamka Block a pat Awnsuanhau, Secretary, Haukhenpau, Treasurer, T. Jamkhanpau, Secretary, Social & Culture leh Awnzachin, Vice President te'n amapui ua, zia hun a chun candidate 36 um te lak ah Zamsuan, Pauchinzam, David Hatlang, Pauzam, Thanglian, Satkholian, Khamzading, Thuamginlian, Pumshong, Thangkhanlian, Dongzamang, Ginsuanthang, Khamchinhau, Lalbiaklian leh Thangkhanmuan te teltin in a um ui. YPA Gouchinkhup Veng Unit election a hileh YPA New Lamka Block a pat S. Manlian, President, H. Amzatuan, Finance Secretary, Pausuanmung, General Secretary, Paumuanlal, Assistant Secretary leh KK Sut, Information Secretary te'n amapui ua, zia hun a chun, H. Ginkhankim, S. Ginsanglian, G. Goukam, K. Kamchinkhup, N. Kapchinthang, M. Lamzathang, Liankhansiam, G. Mangdouthang, G. Nengsuanthang, M. Nangvanglian, S. Pumkhokam, G. Suankhanmung, H. Thuamhnun, Thuamkhopau Ngaihte leh N. Vunghuailian te lawiupa thak ding ah teldaw in a um ui. April 13, 2017 ah YPA V. Munhoih Unit leh YPA Khominthang Unit ah election um kit ding a hi.

VPC Thanlon Block election
Lamka, April 12: VPC Thanlon Block in kum-2017-2019 sung vaipaw ding telna (election) tuni'n a nei a, zia hun a chun, Chairman ding ah Mr Thangvel of Thanlon teltin in a um a, Vice Chairman: Lettingen of Leijangphai; Secretary: Sasang of Saihum; Asst Secy: Ginpu of Leijangphai; Fin. Secy: Lema of Leijangphai; Treasurer: Luna of Leijangphai; Information:K. Thensong of Leijangphai leh Member ding ah Kapkholal of Tuipiphai teltin a hi.

Pherzawl ah World Malaria Day mat hidi
Lamka, April 12: State Malaria Department a pat Official te'n tuni, April 12, 2017 sunma dak 11:00 vel in Lamka a hung phau a, Dr. Kim Ngaihching Simte, CMO Churachandpur mapuina CMO Office Chamber ah State Level World Malaria Day matna ding tawh kisai genkhawmna a nei ui. State a pat hung palai te chu Dr. L. Gojendro Singh, State Malaria Officer (SMO)/State Nodal Officer leh N. Gopal Kishore, IEC-State Consultant te a hiu a, Dr. Liankhawjam Guite, CMO Pherzawl in le meeting a uap hi. Malaria Day ahileh a hung tung ding April 20, 2017 ni leh "End Malaria for Good" ti thupi mang ah Pherzawl District ah mat hiding, State sung ah Malaria vei mudaw a tamna pen hisek, Tipaimukh Constituency a hitawh kitawn ah Pherzawl District in a zintun ding ti a hi.

Taxi in Kg I simlai school naupang khat phukha
Lamka, April 12: Lalbiaktluangi Hrahsel d/o Malsawmdawngzela Hrahsel, Armed Veng, St Mary's School ah Kg I simlai chu tuni, April 12, 2017 sunma dak 11:50 vel ah school kaipel ah innlam zuan ah a chiana Jubilee Road ah Taxi khat a vei lam keng liamna nasa mama in a kigen hi. Thu kimu dan in Aizawl Taxi (Registration Number MZ-01C 1596) brake fail in naupang Lalbiaktluangi, Gilzom Offset kiang ah a phut khak hin a kigen a, zia thiltung ziak a chu naupang' a pa Malsawmdawngzela leh anu khua helo ah um uh leh Aizawl Civil Hospital puaklut a hi bak ua, thiltung hun ah kawl mix zuak khat in le liamna tuak in a kigen hi. Mit ah mute gendan in Lalbiaktluangi Hrahsel chu mihing ngaituana damdawk kit ding ah ginchat a umlo bak ah a damdaw kit leh le a keng tan ngai ding in a gen ui.

Medical Team khat in Behiang leh Singngat PHC entha
Lamka, April 12: Medical Team khat in tuni, April 12, 2017 sunnung dak 1:00 in District Immunization Office etthakna a nei ui. Medical Team, District Immunization Office etthakna nei te a hiu leh Dr. Subhash Godara, Regional RCC Coonsultant, UNICEF leh Arun Meitrum, State RMNCH+A Consultant-te a hiu a, tuni'n Behiang PHC leh Singngat PHC te etthaakna a nei zaw un nitaklam ah Dr. VC Pau Tonsing, DIO/DFWO Churachandpur tawh holimna nei in Maternity Ward, District Hospital leh District Immunization Office ah damdawi kikawi dan te etthakna a nei ui. Medical Team te'n ahihleh damlo inn a thiantho ding, Routine Immunization leh Mission Indradhanush hawitak ah neizaw a hitheina ding ah Cold Chain Management tungtawn ah damdawi kituptak ah kawi ding pawimaw in a gen ui.

Pauchap khawmna nei di
Lamka, April 12: Vaiphei Tawngsua kiti Whatsapp group in saina' VPC Community Centre, Bethel Veng ah 15 April 2017 leh Pauchapkhawmna um ding a hi. Zia hun a chu a pang nuam taphawt panthei hiding in Vaiphei Tawngsua group Chairman leh Secretary in chialna a bawl ui. Chuleh, zia pauchapkhawmna chu Nampi pauchapkhawmna hilo, Vaiphei Tawngsua kiti Whatsapp group te pauchapkhawmna hizaw hin a kigen hi.

SBI-RSETI nuai ah Training chiatha zing
Lamka, April 12: State Bank of India-Rural Self Employed Training Institute (SBI-RSETI), Bijang in khangthak kum 18 a pat kum 45 kikal mite a ding ah Short Term Course chuam chuam ah Training a sai zing uh tawh kitawn in tuni, April 12, 2017 in Piggery Training a kipan hi. Training hun ah vawk vak lunglut mi 26 a pang ua, training hunsung in P. Khamsanglian, Progressive Farmer in vawk vakdan tawh kisai ah ziltilna nei ding a hi. Chun, S. Mangboi Vaiphei, Faculty, SBI-RSETI in Rural Entrepreneurship Development Program (REDP) tawh kisai ah ziltilna nei ding a hi. SBI-RSETI in ahihleh April thasung in le Course chuam chuam ah training conduct bawl ding a hia, April 17, 2017 leh ni 13 sung um ding REDP Training kipan ding, April 24, 2017 leh ni 30 sung um ding Beauty Parlor Management training kipan ding a hi. April 29, 2017 leh Photography & Videography training kipan ding a hi.

Mualnuam Polling Station ah Vungzagin Valte in vote mutam pen
Lamka, April 12: 11 Manipur Legislative Assembly election, 2017 hun ah 56-Thanlon ST Assembly Constituency ah BJP candidate, teltin ah um Vungzagin Valte a ding ah Core Committee te saina tuni'n Vungzagin Valte, Chairman, MTDC & MLA Thanlon, Quarter, Lamphelpat, Imphal ah Prize Distribution of booth wise Performance cum cluster committee meeting a um hi. Zia hun a chun, tu chung MLA election hun ah 56-Thanlon Assembly constituency ah BJP ngaina tu, dawisaktu, worker leh committee member tamtak a chiakhawm ui. Sun dak 12 in hun matna a kipan a, Vungzagin Valte in a thugenna a chun, tu chung election ah ama thiamna leh pilna ziak hilo ah mipi te leh Pathian panpina MLA kaiikit thei ah um a hidan a gen a, Parliament Secretary panmun tuk ding ah dawisakna piak ah um himaleh government masa ah term khat Parliament Secretary mawpuakna tuta a hina chung ah MTFD chairman ding ah dawisakna piak ah um hin a gen hi. 56-Thanglon Assembly Constituency sung ah Polling Station chuam chuam ah BJP a ding ah vote tam kikhiakna pen polling station te kiang ah kipakman hawpna a um a, category thum ah kikhen in category khatna 900-1000 tiang vote kikhiak tamna Mualnuam Polling Station, Mualnuam leh Thuangtam in kipakman in Rs. Lakh 3 a sang ua, category ni na ah 500-900 kikal vote kikhiak tamna Mualkui Polling station - Mualkui, Umtal, B Munpi leh Thiekbang te Rs Lakh 2 piak a hi. Category thumna 100-500 kikal vote kikhiak tampenna Bungpilon Polling station 3rd hina a chang a, Rs. Lakh 1 leh kim a sang ui. Polling Station chuam chuam ah vote kikhiak tamna pen Bukpi, Songtal, Aibulon, Kaihlam leh Pamjang te'n a mau khaw chiat ah Aganwadi Centre kihawng ding ti a hi.

Damlo-inn ah damlo te kinai tak tak ah um
Lamka, April 12: Churachandpur District Damlo-inn (hospital) Ward khenkhat ah damlo te lupna (bed) kichi/kinai thei mama in, damlo leh a umpi te ding ah lemchanglona tamtak a um hi. A diak ah tuhun ah nilum (summer a hi taktawh kitawn ah kinai tak ah damlo te lupna a um chu damthei huai leh a kilawmlo a hi. Expert ten Hospital Bed Space Recommend a bawl dungzui ua damlo te lupna 6 ft - 8 ft bek ah kikak ding ti himaleh Churachandpur District Damlo-inn (hospital) ah lupna khenkhat kikak dan (space distance) 2 ft le tingzo lo ah kikak bang a um hi. A langkhatlam in room khenkhat matlo le a um hi. Chuleh, a da um kit mama khat chu damlo-inn a sawng step/ stair ah kuva tui siatlo ding ti lekha kitak maleh a lekha kitakna chung sese ah kuva tui vasia khel khel bang a ki um a, thilpha dawi te nasep chung ah a chapo nuam kitam mama a bang hi.

Manipur CM in anti-migrant bill siamthak ding lemsa
Imphal, April 12: Manipur Chief Minister N Biren Singh in ama government anti-migrant bills tawh kisai then (changes) ding ah lemsa hin a gen hi. Joint Action Committee Against Anti-Tribal Bill (JAC) tawh April 7 leh 10 ah kihona a nei nung ua Daily News and Analysis (DNA) in thudawtna a bawl hun in Chief Minister in anti-migrant bills tawh kisai then (changes) na ding ah kinawptuana a um thei ding gingcha hin a gen a, Bills thak chu JAC te phatchuamna hiding ah hiatsak nuam in le a gen hi. Chule, a pawimaw leh bills chu san hiding hin a gen hi. Three bills — the Protection of Manipur People's Bill, the Manipur Land Revenue and Land Reforms (Seventh Amendment) Bill, leh Manipur Shops and Establishment (Second Amendment) Bill te Ibobi government in a passed nung ah state sung ah tribal community te'n kiphinna a nei uh tawh kitawn ah khangthak mi 9 te'n thina a la tuak uh leh ni 600 tinna ding ni tamlo a vat tak tiang ah thina tuak te luang vuilo ah kikawi leh local mite'n kinawptuakna a um tak leh vui hipan ding ua phutna nei uh hin DNA thusuak in a taklang hi.

Mi chuam chuam in CM kimupi
Imphal, April 12: Vikram Shahegal (MN) IGP CRPF Langjing leh Vasumitra Sankar,National Convenor,DDUSS & Co-ordination Co-Chair,Yogshala Expo 2017 te'n tuni'n Manipur Chief Minister Nongthombam Biren Singh chu a office mun in a kimupiu a, kipakpina siam in, issue chuam chuam a genpi ui. Zia hun chu V. Hangkhanlian, Minister of Agriculture, Animal Husbandry and Veterinary, Government of Manipur in le a uap hi.

CM in CCpur pha ding
Lamka, April 12: Editors Guild Manipur (EGM) leh Manipur Hill Journalists Union (MHJU) saina' a hung tung ding 22 April 2017 leh Lamka Press Club, HQ Veng, Churachandpur ah "One Day Workshop" kiti um ding a hi. Zia hun chu Manipur Chief Minister Nongthombam Biren Singh leh Commissioner, Information and Public Relation, Govt of Manipur te banah Minister 2/ 3 te'n khuallian hina tawh zia hun matna chu uap ding a hiu. Chun, Chief Minister in Workshop hawnna nei ding a hi.

MSPA in CM Biren kimupi

Imphal, April 12: Manipuri Sahitya Parishad, Assam pawl in tuni'n Manipur Chief Minister Nongthombam Biren Singh chu a office chamber in a kimupiu hi. Manipuri Sahitya Parishad, Assam President Dr. Karam Ibungohal Singh in Chief Minister kipakpina thu puang kawm in, kipakpina thilpiak pikna a nei a, Chief Minister in Parishad te a pawimaw dungzui ua a haksatna chung ua a kithuapi zing ding kinepthu taklang kawm in Manipuri language, literature leh culture promote bawlna pan nasatak la ding in chialna a bawl ui. Zia hun chu Revenue, PDS & Consumer Affairs Minister Karam Shyam in le a uap hi.

nisinthuhiltu-13april2017 2

Shumang Leela pawimawna beilo: Minister, Th. Radheshyam

Imphal, April 12: Manipur State Shumang Leela Council (MSSLC) in tuni'n Iboyaima Shumang Leela Shanglen, Palace Compound,Imphal ah 16th Shumang Leela Day a mang a, zia hun chu Manipur Education Minister, Th. Radheshyam in Chief Guest hina tawh a uap hi. Minister, Th. Radheshyam in a thugenna a chun, Shumang Leela ah kiziltilna pha um te chu society ah chiapi ding dawi a hidan a gen a, society sung siamhawina ding ah Shumang Leela chiapi ding pawimaw a hidan gen in, tu electronic media khang ah a khangtawh a ki tuakta puai ti ah education bak khat a hina a pat Shumang Leela chu chuam kawi thei hilo in a gen hi. Shumang Leela in society sung ah panmun pawimaw tak nei zing in le a gen hi. Zia hun matna chun, Iboyaima Award piakdawna leh Padmashree Awardee, Wareppa Naba chawihawina le a um a, Completion Award of Iboyaima Shumang Leela Fellowship (2016 - 17) chu Surjit Maibam of Sanaleipak Daily piak in a um a, Iboyaima Shumang Leela Fellowship Award (2017 – 18) ahileh Herojit Nongmaithem of Thoudang Daily piak in a um hi.

nisinthuhiltu-13april2017 1

PM Modi in Manipur ah National Sports University foundation suangphuna nei di: CM Biren
Imphal, April 12: Doordarshan News, Delhi in tuni'n Manipur Chief Minister Nongthombam Biren Singh chu a office chamber ah interview bawlna a nei a, zia hun a chun Parliament session kichai tak leh Prime Minister Narendra Modi in Manipur vena nei ding leh National Sports University sakna ding ah foundation suangphuna nei ding hin a gen hi. Manipur ah National Sports University um ding ah Prime Minister Narendra Modiji in lemsakna a nei chu kipak mama a hidan gen in Prime Minister's Office a pat phone ah Modiji in Parliament session kichai tak leh Manipur vena nei ding leh National Sports University sakna ding ah foundation suangphuna nei ding a hidan hiatsak ah um a hidan a gen hi. Churachandpur issue tawh kisai dawtna a dawnhuna a chun, Chief Minister in tu ah State Government in JAC Against Anti-Tribal Bills tawh 2 vei kihona neita a hidan a gen a, tunung sawtlo ah sukven hiding ah kinem hin a gen hi. Manipur chu mini-Indiaa hi ti'n le Chief Minister in a gen a, Government in community ahiloleh religion dawichuam leh khenchuam nei ah nasem theilo a hidan a taklang hi. Congress mapui state government lui in mass recruitment drive a bawlna tawh kisai ah dawtna Chief Minister Nongthombam Biren Singh in a dawnhun a a chun, independent body in recruitment process khualna nei ding leh diklo tak ah recruitment process chiapi ah um te cancel hiding leh diklo tak ah appointment kibawl te le State Government, recruitment rules tawh kituak ah cancel hiding in a gen hi. Manipur bandh/blockade-free State a hitheina ding ah banggual panlakna a um ding a pawimaw em? ti ah dawtna a dawnhuna a chun, kiphinna leh buaina um te chung ah bandhs or blockade bawl masang ah lung-awilona nei te tawh table khat ah chutkhawm ah kihona um zing thei leh Manipur bandh/blockade-free state hithei ding hin a gen hi. Highway Protection Force tawh kisai ah dawtna a dawnhun a chun, Chief Minister in Union Home Minister Rajnath Singh thuhiat ah a um nung ah IRB battalions 4 te Highway Protection Force ah mat thei ding ah approval a um nung Highway Protection Force ah mat ah umta a hidan a gen hi.

Education Minister in Thoubal ah Digi-Dhan Mela uap
Thoubal, April 12: Basu Ground ,Khangabok ,Thoubal ah District Administration Thoubal saina leh Department of information Technology, Government of Manipur support bawlna'n one day Digi-Dhan Mela a um a, zia hun chun public in cashless transaction tawh kisai a hiatthiamna ding tawh kisai suklatna leh taklatna a um hi. Education Minister Th Radheshyam, Chief Secretary O. Nabakishore,Commissioner (IT) P.K. Singh leh Deputy Commissioner Thoubal, Shyam Lal Poonia te'n Digi-Dhan Mela chu Chief Guest ,President & Guests of Honour hina tawh a uap ua, Education Minister Th Radheshyam in, state economy siamhawina ding ah mipi te'n local made van te uangbawl thak ding a nawpthu a gen a, cashless transaction a pat black money dodalna masawn chuam a hidan te a gen hi. Chief Secretary O.Nabakishore in digital card ki matna a pat public in phatchuamna chi nuam chuam nasatak ah nei ding a hidan uh a gen hi. Mela a chun, bank chuam chuam a pat stall 42 hawn in a um a, State Bank of India leh HDFC Bank in customer telchuam ah um te kiang in Point of Sales(PoS) machines piakna a nei ui. Chuleh, 31st March, 2017 ah Digi-Dhan Contest of Poster, Jingle & Slogan competitions ah winner te kiang ah prize piakdawna le a um hi.

Accident ziak ah 7th IRB personnel 1 in thina tuak
Imphal, April 12: Indian Reserved Battalion (7th IRB) personnel khat in Oinamlong area, Tousem Sub-Division ah gari accident ziak in thina a tuak hi. Thina tuak chu Subidhar Paul, 7th IRB post, Oinamlong ah posting a hi. Gari tuaksia mini truck (407) driver in a hileh liamna a tuak a, hospital tut ah um in a kigen hi. Driver chu Ranbir Meetei hi ah hiat a hi.

NEIDP in vote sim thak ding phutna rally nei
Imphal, April 12: 19- Patsoi Assembly constituency ah vote sim thak ding phutna'n North East Development Party (NEIDP) in tuni'n party office Tera Loukrakpam Leikai, Imphal West a pat DC, Lamphal, Imphal West tiang in protest rally a nei a, election Returning Officer chung ah action khautak lakding phutna le a nei ui. NEIDP party office ah Narengbam Bishorjit in thuthak lakhawm mite kiang ah a genna a chun, 19-Patsoi A/C ah Returning Officer (RO) in Election Commission of India (ECI) in thuneina a piak diklo tak ah mang a hidan gen in 11 Manipur Legislative Assembly election, 2017 vote simna diklo tak ah nasep chuam chuam nei in a gen hi. RO in election norms, rules & regulation te a hiding gual tak ah a chiapilo ziak ah vote simna a thak ah nei ding demand a hidan uh a gen a, Election Commission of India kiang ah March 12, 2017 ah vote sim thakna ding ah proposal a piak uh tuni tiang ah limsak a umlona chung ah NEIDP party in public dawitelna leh Indian Constitution za (respect) tak ah nasep chiapi zingkawm ah NEIDP in protest rally nei ah DC, Imphal West kiang ah vote sim thakna ding ah memorandum pelut uh hin a gen hi.