UPDATES:

Nisin Thuhiltu - 12 April 2017

Ukhrul ah CM N Biren Singh leh a team te thupitak ah kivaidawn; Tourist Resort hawnna nei; Shirui tourism festival mat ding ah puang; Ukhrul DHQ ah womens' market sakna ding Rs 10 crore

Imphal, April 11: Manipur Chief Minister N Biren in tuni'n Ukhrul district vena a nei hi. Zia hun a chun Ukhrul zawtna lampi ah umYaingangpokpi, Litan, Ramva (Lambui), Nungshangkhong leh Hamleikhong ah khawmi (villagers), student leh numei pawl te'n vaidawnna a nei ua, Yaingangpokpi ah Wunghon Village Authority leh Wonghon Shanao Long te saina vaidawnna programme hun in CM kiang in memorandum piakna a nei ui. Litan ah Kuki Inpi leh KSO Ukhrul te'n welcome gate siam in CM leh Council Minister te vaidawnna a nei ua, numei pawl leh student te line saupi ah kitiang in CM chibukna a nei ui. Organisation chuam chuam te'n Chief Minister kiang in Memoranda piakna le a nei ui. Ramva (Lambui) ah mipi tamtak te'n CM leh Council of Minister te vaidawnna nei in, 'Samkaphang Laa' (welcome song) sakna a nei ua, Ramva Village Authority leh Sapao Village Authority in le memoranda piakna a nei ui. Nungshangkhong Hunpung ah tourist resort hawnna nei CM chu khawsung mipi te'n vaidawnna nei in chawihawina a nei ui.Nungshangkhong Hungpung, Ukhrul ah CM in tourist resort hawnna a nei chu Nungsangkhong Lei (Bridge) tawh kinaicha um a hia, Ministry of Tourism, Government of India funding nuai ah kisiam Integrated Tourist Circuit for Imphal Mahadev – Lambui – Finch Corner – Hundung – Jessami, Manipur a hi. Shirui lily or Siroi lily enthatu te ding khualna deu ah kisiam le a hi.

Nisinthuhiltu12april2017

Nungshangkhong Hunpung ah hun a matzaw in Tangkhul Nagalong Ground (TNG), Ukhrul ah Tangkhul Community te saina Chief Minister N Biren Singh leh a council minister te kipakpina hun matpi in a um a, Chief Minister in mipi lak ah a thugen hun in Ukhrul district headquarter ah womens' market sakna ding ah Rs 10 crore sanctioned ah um a hidan a puang a, kumsin leh Sangai Festival a ki matsek gual ah Shirui tourism festival le tukum a pat mat hita ding in a puang hi. Shirui Tourism Festival chu May 5 a pat ni 5 sung Shirui village leh Tangkhul Nagalong Ground (TNG), Ukhrul ah mat hiding ina gen a, hun matna uap Works Minister chu a vaima theipen ah Ukhrul district headquarter zawtna lampi blacktoping bawl ding in a hiatsak ngal hi. Ukhrul district headquarter ah ni 15 sung ah mast lighting systems pathum kawibe hiding in le a puang a, Sirarakhong village ah nimchim in chenna inn a suksiat piak te Rs 1.01 lakh chiat piak hiding in le a puang hi. Chief Minister N Biren Singh chun ama government in tanggam khantona ding ngaikhawk mama in a gen a, hill areas ah Village Chief leh CSO representatives te tawh kithuhiat zing theina ding ah thasin leh date 10 chu reserved bawl a hidan puang kawm in hill district ah government semtu te chu regular tak ah office kai ding ah hiatsakna bawl in a kailo a um leh a chung ua action lak hiding in a gen hi. Zia hun matna chu– Minister Th. Biswajit, Letpao Haokip, L. Dikho, Karam Shyam, Nemcha Kipgen, Thounaojam Shyamkumar, Thokchom Radheshyam, V Hangkhanlian- Parliamentary Secretary - L Sushindro, S Subhaschandra, N Indrajit, K Robindro, H Dingo, Asab Uddin, Khashim Vashum, K Leishiyo, Dr Sapam Ranjan, Satyabrata leh Chairman of Manipur Pollution Control Board L Radhakishore te banah MTDC Chairman & MLA, Vungzagin Valte, MLA TT Haokip, Chief Secy O Nabakishore, DGP LM Khaute leh ADC Ukhrul Chairman Dr Yaralso te'n le a uap ui. Th Biswajit in a thugenna a chun Sirarakhong leh a kiangnai tuam ah malcha (chilli) production tamsem a um theina ding ah panlak hiding in a gen a, developmental work kituptak ah a um theina ding ah PWD leh MSRDA official banah employees te a sepna mun chiat ua regular ding in hiatsakna a bawl a, ki muanngamna, ki hepina, khantona leh chamna a um ding dawi hin a gen hi. Minister V Hangkhanlian in a thugenna a chun hill leh valley areas ah kibang (equal) tak ah developmental works chiapi hiding in a gen a, Minister L Dikho in a thugenna a chun Manipur ah kikhelna (change), khantona (development) chamna, kipumkhat theina ding ah state mipi te'n khangthu tepte thei ding ah tunaicha election ah panla a hidan uh a gen hi. Tangkhul Nagalong Ground (TNG) ah hun matzaw in Mini-Secretariat complex, Ukhrul ah Chief Minister N. Biren Singh in District Transport Office, Ukhrul nuai ah driving license leh vehicle registration document on smart cards hawnna a nei a, zia chu Vahan & Sarathi softwares mang ah chiapi hiding ti a hi. Vahan chu gari registration bawlna lam tawh kisai ah mat hiding a hia, Sarathi chu public ah Learning/Driving licenses piakna lam ah kimang ding a hi. Zia hun matzaw a chun, Chief Minister in District in a chiapi development project dinmun tawh kisai review meeting uap in DLOs Ukhrul abnah Minister, Parliamentary Secretary leh bureaucrat te tawh holimkhawmna a nei hi.

 

Old Age Pensionn hawpna chiathazing
Lamka, April 11: Indira Gandhi National Old Age Pension Scheme nuai ah Red leh Blue Card Holder te pension sum hawpna chu District Social Welfare Office, Chiengkhonpang ah chiatha zel in tuni'n Thanlon Assembly Constituency sung ah Old Age Pensioner te kiang ah Pension sum piakdawna a um hi. Sum hawmna 1st round chu zing, April 12 leh kichai ding a hi ta, zia hun hileh Tipaimukh AC hi ding a hi. Pension sum a hileh tha 5 – April, 2015 a pat August 2015 chan a hawp a hia, a kigawm ah Rs. 1,000 hawp a hi. Scheme nuai ah pensioner te'n sum lakdawna ding ah Old Age Card Receipt chawi in amau taksa ngei in a va kilak ua, lim passport size copy 2 le a kichawi uh a ngai hi. Taksa ngei ah vaki lak theilo te'n April 15, 2017 ni leh zikthaw ah District Social Welfare Officer (DSWO) kiang ah kidawtna lekha pelut thei in tin uh, department in hawitak ah chetna a bawl zaw tak ua leh a mutu ding te kiang ah piak hi ding a hi. Tipaimukh AC a pat pensioner te'n zing leh la ding a hiu a, zia hun a hin mi a tawm leh mani AC leh Block a kihawmhun ah la manlo te a le hawpdaw hi ding a hia, a hin la mi a tam leh tawm ah kinga ding hi'n DSWO in a gen hi. Chun, April 17, 2017 leh 2nd round kipan kit ngal ding a hina ah 1st round ah la manlo te'n zia hi ngaiven pawimaw ding hi'n le DSWO in hiatsakna a bawl hi.

KIC in election nei
Lamka, April 11: Kuki Innpi Churachandpur (KIC) Office, Tuibong ah tuni'n 2017-19 sung KIC vaipaw ding kitelna a um a, zia hun a chun President ding ah Daniel Gangte teltin a hia, Vice President (Administration) ding ah Letpu Haokip, Vice President (Home) ding ah Thangboi Baite, General Secretary ding ah Lalkhohao Chongloi leh Information Secretary ding in Jampao Haokip teltin in a um hi.

NID/IPPI 2nd Round Report tungkimta
Lamka, April 11: April 2 a pat April 4, 2017 sung nei a um, 2017 a ding ah National Immunization Day (NID)/Intensified Pulse Polio Immunization (IPPI) Second Round zaw thiang a hi tawh kitawn in DFWO, Churachandpur kiang ah Booth Day leh follow-up House-to-House visit hun ah nausen piangtha pan a pat naupang kum 5 nuailamte kiang ah polio dawnsak dan report a tungkim tai. Tuchung NID/IPPI Second Round ah Booth Day April 2, 2017 ni a chun District sung ah Polio Booth chuam chuam ah OPV Vials 1,454 mang ah naupang kum 5 nuailam mi 26, 601 te kiang ah polio damdawi dawn sak in a um ua, follow-up House-to-House visit April 3 leh April 4, 2017 sung in OPV vial 137 mang in naupang 37,808 kiang ah polio damdawi dawnsak in a um ui. NID/ IPPI Second Round ah OPV vial 1,591 mang in naupang 30, 249 te kiang ah Polio damdawi piak in a um hi.

CCC in Rs. 10 thîk tawh kisai hiatsakna bawl
Lamka, April 11: Churachandpur Consumers' Club (CCC) in Rs. 10 thîk matthei taklo ding ti ah thuthang um tawh kisai ah thusua a bawlna' chun, Churachandpur Consumers' Club (CCC) in sum bawltu Reserve Bank of India (RBI) kithuhiatpi in market ah Rs 10 cuam chuam kithethang (circulated) te chu a lêm (fake) umlo a hidan mudaw a um in, zia tawh kitawn a chun sum thîk chu la vek ding in hiatsakna a bawl hi. Chun, zia hiatsakna zuilo ah Rs. 10 thîk la nuamlo a um leh CCC contact no. 9612403672 / 9862239567 ah complaint bawl thei ding hi'n le a gen hi.

Imphal a pat Team khat in Annual Review Meeting nei pi
Lamka, April 11: Imphal a pat team khat in tuni'n Lamka pha in District sung ah AIDS lam tawh kisai ah nasep dan chuam chuam etthâkna leh AIDS lam kisai khakpite tawh Annual Meeting a nei ui. Imphal a pat Team a hileh Abhiram, Joint Director (TI), MSACS, Gautam, Coordinator, Noarth East Technical Unit (NETSU), Roshan, State Coordinator, FHI-360 leh Deepak, State Coordinator, (TI) MSACS te a pang ua, District Hospital ah ATC Centre etthâkna nei in sunnung dak 1:00 in District AIDS Control Officer (DACO) Office Chamber ah Annual Review Meeting a nei ui. Meeting hun ah Dr. Kim Ngaihching Simte, Chief Medical Officer/Vice-Chairman, District AIDS Prevention and Control, Churachandpur, T. Benjamin, District Supervisor, DAPCU ban ah DAPCU nuai ah NGO leh Partner chuam chuam - LRRC, SHALOM, PPO, ART Centre, District Hospital, MSF, STI Clinic, District Hospital, Link Worker Scheme (LWS), Blood Bank, District Hospital, People Health Foundation (PHF), PPTCT, District Hospital leh ICTC Saikot a pat official te a pang ua, district sung a nasep dan tawh kisai report piakna a nei ban un maban panlak ding dan le a genkhawm ui.

Gûl in a chuk mi 1 Army in hukdawk
Lamka, April 11: A chiata April 8, 2017 nitak dak 7:00 tuam ah gul in a chuk, H. Lalngaizuala (Kum 55) of Thingkangphai chu kintak ah damdawi inn puak tun himaleh Churachandpur District Hospital ah gûlgû thana (anti snake bite venom) ding a umlo ziak in Khuga Battalion te a hi dung zui in duty doctor in 6th Sikh Light Infantry (Khuga Battallion) te ko in amau ziak in Lalngaizuala hinna chu humbit a um hi'n a kigen hi. Zia hi Army te'n gûl chuk a hukdaw uh a khatveina a hi tapua, hun chia te a khan le hinna bangzat a hem a la hukdaw uh a hitai.

HAC Chairman têlna um ding
Lamka, April 11: Manipur Legislative Assembly ah zing, April 12 leh Hill Areas Committee (HAC), Chairman telna umding hi. Secretariat of Manipur Legislative Assembly in thusua a bawlna a chun, BJP legislator V Hangkhalian in HAC Chairman telna chu malat ding hi'n a gen a, April 12, sunma dak 11 leh assembly secretariat, committee room ah zia kitelna chu um ding a hi. HAC Chairman ding telna a hin Hill District chuam chuam ah ST reserved seat 20 a pat teltin a um MLA 20 te'n vote nei chiat ding a hiu a, MLA 20 lak a chun Congress MLA 9, BJP 5, NPF 4 leh NPP 2 a um hi.

Police in khawpi sukthianna chia pi zing
Lamka, April 11: District Police in khawpi sung thiangthona ding tawh kisai ah pan a lakna sunzawm tozelin tuni zing kal dak 7 tuam in New Bazaar area sukthianna a nei hi. District Police in Drive Against Drugs, Alcohol, Gambling, Waste, leh a dang dang minvua in hun bangchan hem a pat Drive chu a la nei pan a. tuni zingkal in New Bazaar Bus Parking ah nîn um te suthiang in Bus te le a kitup zaw diing ah parking sak a hi ban ah Tanker mang ah tui chapna le a nei hi. Bus Parking a sukthian zaw un, Thangzam Road leh New Bazaar sung ah nîn um te a suthiang kit ua, Hollywood Street to cheng le a suthiang ui. Drive nei hun a chun Lhunkhomang Khongsai, Additional SP (Law), AG Sharma, SDPO, Churachandpur leh Augustine Khongsai, SDPO, Thanlon ban ah P. Neihsial, in-charge OC Traffic te le a pang ua, Civil Police, Women Police, Traffic Control Police leh VDF kithua in nasepna a nei ui. Thangzam Road zul ah lampi tawh kinaitak ah mezuak hunkhawpte le kichawn sak ah a um uh tawh kitawn in lampi le a thawveng chuam chuam mama hi.

LIK thusua tawh kisai hilchianna bawl
Lamka, April 11: Lhungdim Innpi Kiloikhomna (LIK) in nisin chanchinbu Eimi Times ah Dampi hausa tawh kisai ah Jamkholal Lhungdim leh Lalboi Lhungdim-te' chung chang ah thusua a bawl uh tawh kitawn in Jamkholal Lhungdim in tuni, April 11, 2017 sunnung dak 2:30 in Lamka Press Club, Headquarter Veng ah Press Conference ko in hilchianna a bawl hi. Jamkholal in thusua kibawl a simna a pat Lhungdim Innpi Kiloikhomna kiti pawl in Jamkholal Lhungdim kiti Dampi gam ah cheng theilo ding leh Dampi gam ah nasep bangma neitheilo ding a hih dan taklat ah um chu, ama Dampi gam ah a chen thei leh theilo ding tawh kisai ah Lhungdim Innpi Kiloikhomna kiti te'n bangma thuneina neilo leh a pawl min uh le a hiatkhak ngai hilo a hibak ah, Lhungdim Innsung Kiloikhom kiti hundang ah a hiatkhak himaleh Tungdim Innpi Organization hiatpi le hidiaklo in a gen hi. Himaleh Lhungdim Innpi Kiloikhomna kiti pawl in a a chung ah thutanna a siam uhh thil hithei hilo a hi dan gen in, 1998 January/February vel ah Churachandpur District Khongsai Innpi President, Dr. Mangthang mapuina Dampi khua ah apa, Chungngam Lhungdim kiang ah Dampi khua ah cheng theilo ding ua a gen ua a pat vaihawmna a tuk uh himaleh pawt ding ah a sawl uh tawh kisai hiathiamlo a hidan genkhum kha hita hin a gen a, tuchung ah le Government in 1951 kum ah T. Kipgen, Assistant Secretary ahi hunlai ah Dampi gam Reserved Forest ding ah Order a sua, mipi khualna a khawsung mipi tawh pangkhawm a nan ziak ah khut thuak leh January 26, 2017 ni ah Lalboi Lhungdim le meithal tawh tha ding ah del ah um in a gen hi. Khutlum a thuak hun ah Police ah Report bawl leh damlo- inn (hospital) ah a ki-etkawlna zosia lekha kawl a hidan gen in zia chungchang ah Police in khuttha te chung ah bangma Action a laklo uh lamdangsa a hidan gen in, thil umdan tawh kisai Court chona bawl ding hin a gen hi.

(L) Maharaja Narasingh hiatzingna bawl
Imphal, April 11: A mualliam ta Maharaja Narasingh thichampha kum 167 tinni a hi tawh kitawn in tuni'n Kangla ah Manipur State Archaeology, Department of Art & Culture saina Maharaja Narasingh hiatzingna hun mat in a um hi. Zia hun a chun (late) Manipur Rifles contingent te'n gun salute a bawlna a nei ua, MLA P. Saratchandra leh mi chuam chuam in Nungjeng pond, Kangla ah tarpon piakna a nei ui. P. Saratchandra in a thugenna a chun, Maharaja Narasingh in mipi te ding ah panlakna a neidan te leh kituak tak ah kivaihawmna a um theina ding ah pan a lakdan te taklatna a nei hi.

Dr. Grace Lhaineikim kipakpina nei
Grace Lhaineikim Chongloi (32) d/o (L). Haokholun Chongloi, ex-MDC of Deilhing Chongloi, Kangpokpi DHQ in tunaicha a khan Indian Institute of Science Bangalore ah Ph.D a zo a, zia chu tawh kitawn ah Indian Institute of Science Bangalore in Doctor of Philosophy in Faculty of Science a piai. Grace Lhaineikim Chongloi chu Molecular Genetics, Prestigious Weizmann Institute of Science, Israel ah Post-Doctoral Studies zo, Daulat Ram College, University of Delhi ah kum 2005 ah(B.Sc. Zoology Honors) ah graduate leh Department of Zoology ah Master zo a hia, Thadou-Kuki community sung ah numei ziagual dinmun tiang chu a tungzo masapen hiding in a kigen hi. A lawtinna chung ah Kangpokpi Christian Church Hall ah tuni'n kipakpina hun matpi in a um a, zia hun chu Haokholal Hangshing, Chairman ADC Sadar Hills leh Seikhomang Khongsai, President, Kuki Inpi Kangpokpi District, Rev. J. Lunkim, Chairman Town Churches Fellowship, Kangpokpi Youth Union, Chong-Hang Youth Union, KCU, KCK, KCN leh ama dawisaktu leh ngaina tu tamtak te'n a uap ui.

Kangpokpi DHQ ah Digi-Dhan Mela um
KANGPOKPI, Apr.11:Digital economy masawn theina ding in tuni'n District Administration Kangpokpi leh Department of Information Technology, Government of India saina' Brig. Thomas Ground, Kangpokpi ah cashless transaction tawh kisai in Digi-Dhan Mela (Go Cashless, Go Digital) kiti a um a, zia hun a chun T. Ranjit Singh, IAS, Deputy Commissioner Kangpokpi in Kangpokpi District sung ah Banks Manager zosia'n Digital economy masawn theina ding ah cashless transaction tawh kisai mipia hiatthiam sak ding uh pawimaw in a gen a, a kisaipi District Level Officer te'n le kituptak ah panlakna a nei ding un chialna a bawl hi.

AR te'n solar lamp hawm
Imphal, April 11: HQ IGAR (South) nuai a um 26 Sector Assam Rifles a pat 18 Assam Rifles te'n a chiata April 9, 2017 ni khan Chandel district huapsung a um Ralringkhu, Lamkang Khunou, Mantripantha leh Kuthar ah khawmipi a mamaw te kiang ah Solar Lamp piakna a nei ui. Zia hun a hin 18 Assam Rifles Commandant in meithai 25 pang in a kigawm ah mi 71 te kiang in lamp khat chiat a pedawk a, mipi te tawh kithuakhawmna hun le a mang hi. AR te penlak dan tawh kisai ah khua hausa te chu kipak thu a gen ui.