UPDATES:

Nisin Thuhiltu - 11 April 2017

Nisin Thuhiltu - 11 April 2017 | via Zogam.com

State Govt leh JAC-AATB in kihona nei; Kihonan sutzawm hiding

Lamka, April 10: Manipur State Government leh Joint Action Committee Against Anti-Tribal Bills (JAC-AATB) in tuni, April 10, 2017 sunma dak 11:30 in Chief Minister Secretariat ah kihona (second round talk) a nei ua, zia hun a chun JAC-AATB in a chiata April 7 2017 ni ah Government kiang ah Charter of Demand a piak uh tawh kisai genkhawmna a nei ui. JAC-AATB in mipi dawidan gual ah Constitutional Safeguard nei a hitheina ding ah Demand a neih uh tawh kitawn in dakkal 3 val kihona nei maleu kinawptuana tak tak bangma siam theilo ah kihona sutzawm ding ah kihona chawlsak uh hin a kigen hi. Zia kihona a chun Manipur State Government thasik in Chief Minister N Biren Singh leh a Council of Minister te banah Manipur Chief Secretary O Nabakishore, DGP L M Khaute leh R Sudhan, Deputy Commissioner, Churachandpur te a pang ua, JAC-AATB thasik in H. Mangchinkhup, Chief Convener mapuina member 14 - Tribe chuam chuam UZO GHQ, YPA GHQ, MPC GHQ, STC GHQ, TCU GHQ a pat palai te a pang ui. Joint Action Committee Against Anti-Tribal Bills (JAC-AATB), Demand chu Hill District ah 6th Schedule umsak (implement) ding, tunaicha Manipur ah District kisiam dawk thak 7 te withdraw bawl ding leh martyr te ex-gratia Rs 10 Lakh leh liamna tuak te Rs 1 Lakh piak ding hi'n a kigen hi.

NisinThuhiltu11april2017a 5

April 12 ah HAC Chairman tel hidi
Imphal, April 10: Manipur Legislative Assembly ah 12 April leh Hill Areas Committee (HAC), Chairman telna um ding a hi. Secretariat of Manipur Legislative Assembly in HAC Chairman telna ding tawh kisai ah tuni thusua a bawlna a chun, BJP legislator V Hangkhalian chu HAC Chairman telna mapui ding ah guat ah um a gen a, April 12, 11:00 AM leh assembly secretariat, committee room ah HAC Chairman ding telna um ding, April 11 tiang ah Chairman ding ah propose bawl thei hithei ding ti a hi. Hill Areas Committee (HAC) Chairman ding telna a chu, Hill District chuam chuam ah ST reserved seat 20 ah teltin ah um MLA 20 te'n vote nei ding a hiu a, MLA 20 lak a chun, Congress MLA 9, BJP 5, NPF 4 leh NPP 2 a um hi.

Class XII student te'n exam sunzawm
Lamka, April 10: Manipur State pumpi ah Council of Higher Secondary Education Manipur (COHSEM) nuai ah Class XII Examination 2017 a chiata March 20, 2017 a pat xam a pat uh chu chiatha zing in tuni'n Science Stream additional ah Math subject la student ten exam a bawl ui. Class XII exam na ding in CCpur District ah Centre 4 mat in a um a, Rengkai Government Higher Secondary School ah Rayburn College student te a exam ua, Rengkai Government Higher Secondary School ah total candidate 512 lak ah Improvement exam pia student 4 a um ui. Exam Center Don Bosco Higher Secondary School ah VK Tawna College leh Sielmat Christian Higher Secondary School te a exam ua, total candidate 525 lak ah Improvement exam pia student 4 a um ui. Exam center Rayburn College ah Vungzagen Higher Secondary School, Ebenezer Academy, Vision Academy, Rengkai Government higher Secondary School, Bethany Christian Higher Secondary School ban ah Young Pillar School te a exam ua, Exam Centre VK Tawna College ah Don Bosco Higher Secondary School a pat student te'n exam a bawl ua, total candidate 383 um lak in Improvement exam pia student 4 a um ui. Class XII student Science Stream additional ah Home Science subject la ten April 12 leh exam bawl zawm ding a hiu a, April 15 in Commerce Stream Additional a Economics subject la ten exam sunzawm ding uh leh April 21 ah Arts stream additional ah sociology subject la ten exam bawl ding uh leh Class XII examination 2017 kichai ding a hi.

Police team khat in Zu zawkna leh Lagao lawkte bulu

Lamka, April 10: Churachandpur Police team khat in tuni, April 10, 2017 sunma dak 11:00 vel in New Bazaar Bus Parking mun ah Zu zuakna leh Lagao lawkte a bulu ui. Zia hun a chun, Zu zuakna mun te a pat in Indian Made Foreign Liquor (IMFL), Beer leh Local Zu hunkhawp banin Lagao lawna van mat set thum leh Lagao Chang 18 te a suksiat piak ui. Zu zuakna leh Lagao lawk te buluna a chun, AG Sharma, SDPO, Churachandpur, M. Kamarjit, Additional SP (Operation), Lhunkhomang Khongsai, Additional SP (Law) leh Augustine Khongsai, SDPO, Thanlon te le a pang ua, maban ah sum ah kihelna te khawpi sung ah etzui zing hiding leh dodal zing hiding in police thusuak in a gen hi.

NisinThuhiltu11april2017a 2

Chairman ADCC mapuina' School tawh kisai genkhawmna nei

Lamka, April 10: Langkhanpau Guite, Chairman, Autonomous District Council (ADC), Churachandpur mapuina tuni, April 10, 2017 sun dak 12:00 in ADCC nuai ah School Headmaster/Headmistress te'n ADCC Meeting Hall, Tuibuang in meeting a nei ui. Meeting hun ah District Council nuai ah School Headmaster/Headmistress 149 a pang ua, District Council nuai ah School 11 ah Biometric Attendance mat pat ah um chu maban ah School 10 ah le matbe ding dan genkhawmna a nei ui. Churachandpur District Council nuai ah School 11 ah Biometric Attendance a kimatna chu New Lamka Upper Primary School, N. Muolhoi Junior School, Thangkangphai Junior School, Tuinom Junior School, Khomun Junior School, Khengjang Juior School, Khoirengtak Juior School, Kangathei Juior School, Thenjang Juior School, Mandot Juior School leh Tangmual Juior Schoo te a hia, School 4 ah le matbe thei ding ah Sanctioned umsa himaleh School 10 a ding Proposal piaklut ah ums ate ngakbe hinalai in a kigen hi. Hiatthei khat chu, 2015 kum in ADC Churachandpur nuai ah School 5 - Upper Primary School dawpsang (upgrade) in a la um a, 2016 kum ah le School 5 ma dawpsan in a la um hi. School 5 Upper Primary School ah dawpsang (upgrade) ah um te chu Misao Lhahvom, New Lamka, MB Saichang, Sangaikot, Seilal, Khajang, Upper Kharkhuoplien, Saichang, Najang leh Mairang Mantak te a hi. Chuleh, ADC Churachandpur nuai in School 170 a um hi.

NisinThuhiltu11april2017a 4

38th Executive Committee meeting nei ding
Lamka, April 10: Paite Tribe Council (PTC), General Headquarters Executive Committee in a hung tung ding April 13, 2017 zingkal lam dak 7:00 in PTC/GHQ Office, Hiangtam Lamka ah 38th Executive Committee meeting nei ding a hiu a, zia hun a chu MLA tingthak te CWC Ex-Officio Member ding ah laklutna leh kipakpina nei ding a hiu a, PTC/GHQ Raising Day 2017 leh Assembly-cum-General Election ding leh District thak tawh kisai panna issue chuam chuam genkhawm ding uh a hidan H. Pauzalal, General Secretary, PTC/GHQ in a taklang hi.

FMPB Calendar 2017 suklatna nei

Lamka, April 10: Friends Missionary Prayer Band (FMPB) in tuni sunnung dak 2:00 in FMPB Office, Beulahlane ah FMPB Calendar 2017 mipi a dawi te kiang ahzawkdaw thei ding in suklatna a nei ui. FMPB Calendar 2017 ahihleh Manipur hinna lampi National highway ah 2016 October a pat economic blockade a um ziak ah a hun tak ah Lamka tung theilo hin a kigen a, blockade hawn ah a um tawh kitawn ah Lamka tut ah um leh FMPB Office, Beulahlane ah Pastor S Thangzamang, Local Pastor, Songtal EBCC in Pathian kiang ah a latna leh a hawnna a nei a hi. FMPB Calendar 2017 ahihleh copy 800 um in a kigen a, zia lak a chu FMPB CCpur branch in amau nuai a member, tha sin leh missionary leh naupang chawm tu mi 300 val kiang ah a thawn ah FMPB calendar hawm ding a hiu a, a val sia chu EBC Convention Book Room, Dorcas Road, New Lamka ah mipi a dawi taphawt in Rs. 50 zel ah chawk thei ding ah kawi hiding ti a hi.

NisinThuhiltu11april2017a 7

Khuga Battalion in thisan donate bawl

Lamka, April 10: Nau nei ziak ah thisan tasam nupi khat a ding in tuni'n Khuga Battalion nuai ah 6th Sixh Light Infantry a pat Rifleman Harpreet Singh (23) leh Jarnail Singh (35) te'n thisan Unit khat gel donate a bawl ui. Thisan piak ah um chu Tinghoivak (34) w/o Lianminthang of Mata a hia, a chiata April 7, 2017 ni Maternity Ward, District Hospital ah nau a neina, thisan a taaksap ziak ah Blood Bank ah thisan a lak uh ditkitna ding ah Khuga Battalion in thisan donate a bawl uh a hi.

NisinThuhiltu11april2017a 3

ILP issue ah kihiatthiamlona um te sukbeina ding ah hill leh alley palai te'n meeting nei di: JCILPS Convenor
Imphal, April 10: Joint Committee on Inner Line Permit System (JCILPS), Convenor, Arjun Telheiba in tuni Kwakeithel Takhel Leikai ah thuthak lakhawm mite kiang ah a genna a chun, ILP issue ah kihiatthiamlona um te sukbeina ding ah hill leh valley ah palai te kimukhawm ah genkhawmna (meeting) um ding a hidan a gen a, ILP issue ziak ah hills leh valley ah um te'n hinna chaan a hidan uh gen in a diklo lam ah ILP issue a chiakhak ding lauthawnna ziak ah kihiat thiamlona piang in a gen hi. A vaima theipen ah community 2 kal ah kihiatthiamlona um te sukven hiding in a gen a, state government thak ding a vaima theipen ah ILP issue a sukven ding dawi in le a gen hi. Chuleh, JCILPS in Jiribam MLA, Assab Uddin activity te kituptak ah enzui zing ding a hifan a gen a, Assab Uddin chu indigenous citizen hilo maleh base year, 1951 masang ah Manipur ah chenglut a hi ziak leh Constitutional citizen a hi ziak ah a chung ah action bangma lak hilo in a gen hi.

 

Public hearing on Acquisition of Land kipan
Imphal, April 10: Asian Development Bank funding bawlna Uripok Kangchup -Tamenglong lampi siamna ding ah State Social Impact Assesment Unit, Directorate of Environment saina' ni 5 sung Public hearing on Acquisition of Land um ding chu tuni'n a kipan a, Taothong leh Lamdeng Khunou, Lamdeng Community Hall ah tuni'n first public hearing a um hi. Tunung ah Cultural Hall Phayeng, Lairenkabi Dramatic Hall, Heibongpokpi Lai Haraopham Hall leh Samusang Community Hall ah hearing neizawm ah um ding a hi. Retired, DSO Revenue Md Abdul Salam, president of Lamsang Pana Sanalup, RK Ranendrajit, Taothong Nagar Panchayat member of Ward No 9, Chingthang Khomba leh affected villager te'n tuni hearing hun chu a uap ui. Deputy director, Directorate of Environment, T Brajakumar in state government in lampi siamna ding ah gam kisukha ding leh gam neite ngaidan tawh kisai detailed report pelut ding ah hiatsakna bawl hin a gen a, gam neitu (land owner) 80 percent in lampi siamna ding ah gam a sukkhak ding a phalna chung ua thiangtho tak ah compensation piak ding phutna nei uh hin a gen hi.

Valley leh K'pi CSO te'n kihiathiamna ding ah Jt. meeting nei
Kangpokpi, April 10: Hotel LNC, Kangpokpi District HQ ah tuni'n valley-based civil society organizations te leh Kangpokpi civil society organization te'n joint meeting nei in kihiatthiamlona um te kihiatthiam tuana ding leh maban ah panlak khawmna ding tawh kisai genkhawmna a nei ui. Zia meeting a chu valley-based CSO lam a pat in - UCM, AMUCO leh CCSK a pang ua, Kangpokpi CSO lam a pat in Kuki Inpi Sadar Hills (Kangpokpi) District, JAC Sadar Hills, Sadar Hills Districthood Demand Committee, KWU, KSO banah KTC, KWWO leh KYU palai te a pang ui. UMC President Elangbam Johnson; IPR Secretary Leisemba; Jt.Secy.N.Jiban; Office Secy. H. Kumar; AMUCO President Deban, Gen.Secy. Sanjoy leh CCSK Gen.Secy. Jitendra Ningomba te'n valley-based CSO te amapui ua, Kuki Inpi Sadar Hills President Seikhomang Khongsai leh JAC Sadar Hills Convener Nehthang te'n Kangpokpi CSO te amapui ui.